(೨೦೫) ೬. ಸಬ್ಬದಿಸಾಕಥಾ

೮೮೬. ಸಬ್ಬಾ ದಿಸಾ ಬುದ್ಧಾ ತಿಟ್ಠನ್ತೀತಿ? ಆಮನ್ತಾ. ಪುರತ್ಥಿಮಾಯ ದಿಸಾಯ ಬುದ್ಧೋ ತಿಟ್ಠತೀತಿ? ನ ಹೇವಂ ವತ್ತಬ್ಬೇ…ಪೇ… ಪುರತ್ಥಿಮಾಯ ದಿಸಾಯ ಬುದ್ಧೋ ತಿಟ್ಠತೀತಿ? ಆಮನ್ತಾ. ಕಿನ್ನಾಮೋ ಸೋ ಭಗವಾ, ಕಿಂಜಚ್ಚೋ, ಕಿಂಗೋತ್ತೋ, ಕಿನ್ನಾಮಾ ತಸ್ಸ ಭಗವತೋ ಮಾತಾಪಿತರೋ, ಕಿನ್ನಾಮಂ ತಸ್ಸ ಭಗವತೋ ಸಾವಕಯುಗಂ, ಕೋನಾಮೋ ತಸ್ಸ ಭಗವತೋ ಉಪಟ್ಠಾಕೋ, ಕೀದಿಸಂ ಚೀವರಂ ಧಾರೇತಿ, ಕೀದಿಸಂ ಪತ್ತಂ ಧಾರೇತಿ, ಕತರಸ್ಮಿಂ ಗಾಮೇ ವಾ ನಿಗಮೇ ವಾ ನಗರೇ ವಾ ರಟ್ಠೇ ವಾ ಜನಪದೇ ವಾತಿ? ನ ಹೇವಂ ವತ್ತಬ್ಬೇ…ಪೇ….

ದಕ್ಖಿಣಾಯ ದಿಸಾಯ…ಪೇ… ಪಚ್ಛಿಮಾಯ ದಿಸಾಯ…ಪೇ… ಉತ್ತರಾಯ ದಿಸಾಯ…ಪೇ… ಹೇಟ್ಠಿಮಾಯ ದಿಸಾಯ ಬುದ್ಧೋ ತಿಟ್ಠತೀತಿ? ನ ಹೇವಂ ವತ್ತಬ್ಬೇ…ಪೇ… ಹೇಟ್ಠಿಮಾಯ ದಿಸಾಯ ಬುದ್ಧೋ ತಿಟ್ಠತೀತಿ? ಆಮನ್ತಾ. ಕಿನ್ನಾಮೋ ಸೋ ಭಗವಾ…ಪೇ… ಜನಪದೇ ವಾತಿ? ನ ಹೇವಂ ವತ್ತಬ್ಬೇ…ಪೇ….

ಉಪರಿಮಾಯ ದಿಸಾಯ ಬುದ್ಧೋ ತಿಟ್ಠತೀತಿ? ನ ಹೇವಂ ವತ್ತಬ್ಬೇ…ಪೇ…. ಉಪರಿಮಾಯ ದಿಸಾಯ ಬುದ್ಧೋ ತಿಟ್ಠತೀತಿ? ಆಮನ್ತಾ. ಚಾತುಮಹಾರಾಜಿಕೇ ತಿಟ್ಠತಿ…ಪೇ… ತಾವತಿಂಸೇ ತಿಟ್ಠತಿ…ಪೇ… ಯಾಮೇ ತಿಟ್ಠತಿ…ಪೇ… ತುಸಿತೇ ತಿಟ್ಠತಿ…ಪೇ… ನಿಮ್ಮಾನರತಿಯಾ ತಿಟ್ಠತಿ…ಪೇ… ಪರನಿಮ್ಮಿತವಸವತ್ತಿಯಾ ತಿಟ್ಠತಿ…ಪೇ… ಬ್ರಹ್ಮಲೋಕೇ ತಿಟ್ಠತೀತಿ? ನ ಹೇವಂ ವತ್ತಬ್ಬೇ…ಪೇ….

ಸಬ್ಬದಿಸಾಕಥಾ ನಿಟ್ಠಿತಾ.