೨೧. ಏಕವೀಸತಿಮವಗ್ಗೋ

(೨೦೦) ೧. ಸಾಸನಕಥಾ

೮೭೮. ಸಾಸನಂ ನವಂ ಕತನ್ತಿ? ಆಮನ್ತಾ. ಸತಿಪಟ್ಠಾನಾ ನವಂ ಕತಾತಿ? ನ ಹೇವಂ ವತ್ತಬ್ಬೇ…ಪೇ… ಸಾಸನಂ ನವಂ ಕತನ್ತಿ? ಆಮನ್ತಾ. ಸಮ್ಮಪ್ಪಧಾನಾ…ಪೇ… ಇದ್ಧಿಪಾದಾ…ಪೇ… ಇನ್ದ್ರಿಯಾ…ಪೇ… ಬಲಾ…ಪೇ… ಬೋಜ್ಝಙ್ಗಾ ನವಂ ಕತಾತಿ? ನ ಹೇವಂ ವತ್ತಬ್ಬೇ…ಪೇ… ಪುಬ್ಬೇ ಅಕುಸಲಂ ಪಚ್ಛಾ ಕುಸಲಂ ಕತನ್ತಿ? ನ ಹೇವಂ ವತ್ತಬ್ಬೇ…ಪೇ… ಪುಬ್ಬೇ ಸಾಸವಂ…ಪೇ… ಸಂಯೋಜನಿಯಂ ಗನ್ಥನಿಯಂ ಓಘನಿಯಂ ಯೋಗನಿಯಂ ನೀವರಣಿಯಂ ಪರಾಮಟ್ಠಂ ಉಪಾದಾನಿಯಂ…ಪೇ… ಸಂಕಿಲೇಸಿಕಂ ಪಚ್ಛಾ ಅಸಂಕಿಲೇಸಿಕಂ ಕತನ್ತಿ? ನ ಹೇವಂ ವತ್ತಬ್ಬೇ…ಪೇ….

ಅತ್ಥಿ ಕೋಚಿ ತಥಾಗತಸ್ಸ ಸಾಸನಂ ನವಂ ಕರೋತೀತಿ? ಆಮನ್ತಾ. ಅತ್ಥಿ ಕೋಚಿ ಸತಿಪಟ್ಠಾನೇ ನವಂ ಕರೋತೀತಿ? ನ ಹೇವಂ ವತ್ತಬ್ಬೇ…ಪೇ… ಅತ್ಥಿ ಕೋಚಿ ಸಮ್ಮಪ್ಪಧಾನೇ…ಪೇ… ಇದ್ಧಿಪಾದೇ…ಪೇ… ಇನ್ದ್ರಿಯೇ…ಪೇ… ಬಲೇ…ಪೇ… ಬೋಜ್ಝಙ್ಗೇ ನವಂ ಕರೋತೀತಿ? ನ ಹೇವಂ ವತ್ತಬ್ಬೇ…ಪೇ… ಅತ್ಥಿ ಕೋಚಿ ಪುಬ್ಬೇ ಅಕುಸಲಂ ಪಚ್ಛಾ ಕುಸಲಂ ಕರೋತೀತಿ? ನ ಹೇವಂ ವತ್ತಬ್ಬೇ…ಪೇ… ಅತ್ಥಿ ಕೋಚಿ ಪುಬ್ಬೇ ಸಾಸವಂ…ಪೇ… ಸಂಕಿಲೇಸಿಕಂ ಪಚ್ಛಾ ಅಸಂಕಿಲೇಸಿಯಂ ಕರೋತೀತಿ? ನ ಹೇವಂ ವತ್ತಬ್ಬೇ…ಪೇ….

ಲಬ್ಭಾ ತಥಾಗತಸ್ಸ ಸಾಸನಂ ಪುನ ನವಂ ಕಾತುನ್ತಿ? ಆಮನ್ತಾ. ಲಬ್ಭಾ ಸತಿಪಟ್ಠಾನಾ ಪುನ ನವಂ ಕಾತುನ್ತಿ? ನ ಹೇವಂ ವತ್ತಬ್ಬೇ…ಪೇ… ಲಬ್ಭಾ ಸಮ್ಮಪ್ಪಧಾನಾ…ಪೇ… ಇದ್ಧಿಪಾದಾ…ಪೇ… ಇನ್ದ್ರಿಯಾ…ಪೇ… ಬಲಾ…ಪೇ… ಬೋಜ್ಝಙ್ಗಾ ಪುನ ನವಂ ಕಾತುನ್ತಿ? ನ ಹೇವಂ ವತ್ತಬ್ಬೇ…ಪೇ… ಲಬ್ಭಾ ಪುಬ್ಬೇ ಅಕುಸಲಂ ಪಚ್ಛಾ ಕುಸಲಂ ಕಾತುನ್ತಿ? ನ ಹೇವಂ ವತ್ತಬ್ಬೇ…ಪೇ… ಲಬ್ಭಾ ಪುಬ್ಬೇ ಸಾಸವಂ…ಪೇ… ಸಂಕಿಲೇಸಿಯಂ ಪಚ್ಛಾ ಅಸಂಕಿಲೇಸಿಯಂ ಕಾತುನ್ತಿ? ನ ಹೇವಂ ವತ್ತಬ್ಬೇ…ಪೇ….

ಸಾಸನಕಥಾ ನಿಟ್ಠಿತಾ.

೨೧. ಏಕವೀಸತಿಮವಗ್ಗೋ

(೨೦೧) ೨. ಅವಿವಿತ್ತಕಥಾ

೮೭೯. ಪುಥುಜ್ಜನೋ ತೇಧಾತುಕೇಹಿ ಧಮ್ಮೇಹಿ ಅವಿವಿತ್ತೋತಿ? ಆಮನ್ತಾ. ಪುಥುಜ್ಜನೋ ತೇಧಾತುಕೇಹಿ ಫಸ್ಸೇಹಿ…ಪೇ… ತೇಧಾತುಕಾಹಿ ವೇದನಾಹಿ… ಸಞ್ಞಾಹಿ … ಚೇತನಾಹಿ… ಚಿತ್ತೇಹಿ… ಸದ್ಧಾಹಿ… ವೀರಿಯೇಹಿ… ಸತೀಹಿ… ಸಮಾಧೀಹಿ…ಪೇ… ತೇಧಾತುಕಾಹಿ ಪಞ್ಞಾಹಿ ಅವಿವಿತ್ತೋತಿ? ನ ಹೇವಂ ವತ್ತಬ್ಬೇ…ಪೇ….

ಪುಥುಜ್ಜನೋ ತೇಧಾತುಕೇಹಿ ಕಮ್ಮೇಹಿ ಅವಿವಿತ್ತೋತಿ? ಆಮನ್ತಾ. ಯಸ್ಮಿಂ ಖಣೇ ಪುಥುಜ್ಜನೋ ಚೀವರಂ ದೇತಿ, ತಸ್ಮಿಂ ಖಣೇ ಪಠಮಂ ಝಾನಂ ಉಪಸಮ್ಪಜ್ಜ ವಿಹರತಿ…ಪೇ… ಆಕಾಸಾನಞ್ಚಾಯತನಂ ಉಪಸಮ್ಪಜ್ಜ ವಿಹರತೀತಿ? ನ ಹೇವಂ ವತ್ತಬ್ಬೇ…ಪೇ… ಯಸ್ಮಿಂ ಖಣೇ ಪುಥುಜ್ಜನೋ ಪಿಣ್ಡಪಾತಂ ದೇತಿ…ಪೇ… ಸೇನಾಸನಂ ದೇತಿ…ಪೇ… ಗಿಲಾನಪಚ್ಚಯಭೇಸಜ್ಜಪರಿಕ್ಖಾರಂ ದೇತಿ, ತಸ್ಮಿಂ ಖಣೇ ಚತುತ್ಥಂ ಝಾನಂ ಉಪಸಮ್ಪಜ್ಜ ವಿಹರತಿ… ನೇವಸಞ್ಞಾನಾಸಞ್ಞಾಯತನಂ ಉಪಸಮ್ಪಜ್ಜ ವಿಹರತೀತಿ? ನ ಹೇವಂ ವತ್ತಬ್ಬೇ…ಪೇ….

೮೮೦. ನ ವತ್ತಬ್ಬಂ – ‘‘ಪುಥುಜ್ಜನೋ ತೇಧಾತುಕೇಹಿ ಕಮ್ಮೇಹಿ ಅವಿವಿತ್ತೋ’’ತಿ? ಆಮನ್ತಾ. ಪುಥುಜ್ಜನಸ್ಸ ರೂಪಧಾತುಅರೂಪಧಾತೂಪಗಂ ಕಮ್ಮಂ ಪರಿಞ್ಞಾತನ್ತಿ? ನ ಹೇವಂ ವತ್ತಬ್ಬೇ. ತೇನ ಹಿ ಪುಥುಜ್ಜನೋ ತೇಧಾತುಕೇಹಿ ಕಮ್ಮೇಹಿ ಅವಿವಿತ್ತೋತಿ…ಪೇ….

ಅವಿವಿತ್ತಕಥಾ ನಿಟ್ಠಿತಾ.

೨೧. ಏಕವೀಸತಿಮವಗ್ಗೋ

(೨೦೨) ೩. ಸಂಯೋಜನಕಥಾ

೮೮೧. ಅತ್ಥಿ ಕಿಞ್ಚಿ ಸಂಯೋಜನಂ ಅಪ್ಪಹಾಯ ಅರಹತ್ತಪ್ಪತ್ತೀತಿ? ಆಮನ್ತಾ. ಅತ್ಥಿ ಕಿಞ್ಚಿ ಸಕ್ಕಾಯದಿಟ್ಠಿಂ ಅಪ್ಪಹಾಯ…ಪೇ… ವಿಚಿಕಿಚ್ಛಂ ಅಪ್ಪಹಾಯ…ಪೇ… ಸೀಲಬ್ಬತಪರಾಮಾಸಂ ಅಪ್ಪಹಾಯ… ರಾಗಂ ಅಪ್ಪಹಾಯ… ದೋಸಂ ಅಪ್ಪಹಾಯ… ಮೋಹಂ ಅಪ್ಪಹಾಯ… ಅನೋತ್ತಪ್ಪಂ ಅಪ್ಪಹಾಯ ಅರಹತ್ತಪ್ಪತ್ತೀತಿ? ನ ಹೇವಂ ವತ್ತಬ್ಬೇ…ಪೇ….

ಅತ್ಥಿ ಕಿಞ್ಚಿ ಸಂಯೋಜನಂ ಅಪ್ಪಹಾಯ ಅರಹತ್ತಪ್ಪತ್ತೀತಿ? ಆಮನ್ತಾ. ಅರಹಾ ಸರಾಗೋ ಸದೋಸೋ ಸಮೋಹೋ ಸಮಾನೋ ಸಮಕ್ಖೋ ಸಪಳಾಸೋ ಸಉಪಾಯಾಸೋ ಸಕಿಲೇಸೋತಿ? ನ ಹೇವಂ ವತ್ತಬ್ಬೇ…ಪೇ… ನನು ಅರಹಾ ನಿರಾಗೋ ನಿದ್ದೋಸೋ ನಿಮ್ಮೋಹೋ ನಿಮ್ಮಾನೋ ನಿಮ್ಮಕ್ಖೋ ನಿಪ್ಪಳಾಸೋ ನಿರುಪಾಯಾಸೋ ನಿಕ್ಕಿಲೇಸೋತಿ? ಆಮನ್ತಾ. ಹಞ್ಚಿ ಅರಹಾ ನಿರಾಗೋ…ಪೇ… ನಿಕ್ಕಿಲೇಸೋ, ನೋ ಚ ವತ ರೇ ವತ್ತಬ್ಬೇ – ‘‘ಅತ್ಥಿ ಕಿಞ್ಚಿ ಸಂಯೋಜನಂ ಅಪ್ಪಹಾಯ ಅರಹತ್ತಪ್ಪತ್ತೀ’’ತಿ.

೮೮೨. ನ ವತ್ತಬ್ಬಂ – ‘‘ಅತ್ಥಿ ಕಿಞ್ಚಿ ಸಂಯೋಜನಂ ಅಪ್ಪಹಾಯ ಅರಹತ್ತಪ್ಪತ್ತೀ’’ತಿ? ಆಮನ್ತಾ. ಅರಹಾ ಸಬ್ಬಂ ಬುದ್ಧವಿಸಯಂ ಜಾನಾತೀತಿ? ನ ಹೇವಂ ವತ್ತಬ್ಬೇ. ತೇನ ಹಿ ಅತ್ಥಿ ಕಿಞ್ಚಿ ಸಂಯೋಜನಂ ಅಪ್ಪಹಾಯ ಅರಹತ್ತಪ್ಪತ್ತೀತಿ.

ಸಂಯೋಜನಕಥಾ ನಿಟ್ಠಿತಾ.

೨೧. ಏಕವೀಸತಿಮವಗ್ಗೋ

(೨೦೩) ೪. ಇದ್ಧಿಕಥಾ

೮೮೩. ಅತ್ಥಿ ಅಧಿಪ್ಪಾಯಇದ್ಧಿ ಬುದ್ಧಾನಂ ವಾ ಸಾವಕಾನಂ ವಾತಿ? ಆಮನ್ತಾ. ‘‘ನಿಚ್ಚಪಣ್ಣಾ ರುಕ್ಖಾ ಹೋನ್ತೂ’’ತಿ – ಅತ್ಥಿ ಅಧಿಪ್ಪಾಯಇದ್ಧಿ ಬುದ್ಧಾನಂ ವಾ ಸಾವಕಾನಂ ವಾತಿ? ನ ಹೇವಂ ವತ್ತಬ್ಬೇ…ಪೇ… ನಿಚ್ಚಪುಪ್ಫಾ ರುಕ್ಖಾ ಹೋನ್ತು…ಪೇ… ನಿಚ್ಚಫಲಿಕಾ ರುಕ್ಖಾ ಹೋನ್ತು… ನಿಚ್ಚಂ ಜುಣ್ಹಂ ಹೋತು… ನಿಚ್ಚಂ ಖೇಮಂ ಹೋತು… ನಿಚ್ಚಂ ಸುಭಿಕ್ಖಂ ಹೋತು… ‘‘ನಿಚ್ಚಂ ಸುವತ್ಥಿ [ಸುವುಟ್ಠಿಕಂ (ಸ್ಯಾ.)] ಹೋತೂ’’ತಿ – ಅತ್ಥಿ ಅಧಿಪ್ಪಾಯಇದ್ಧಿ ಬುದ್ಧಾನಂ ವಾ ಸಾವಕಾನಂ ವಾತಿ? ನ ಹೇವಂ ವತ್ತಬ್ಬೇ…ಪೇ….

ಅತ್ಥಿ ಅಧಿಪ್ಪಾಯಇದ್ಧಿ ಬುದ್ಧಾನಂ ವಾ ಸಾವಕಾನಂ ವಾತಿ? ಆಮನ್ತಾ. ‘‘ಉಪ್ಪನ್ನೋ ಫಸ್ಸೋ ಮಾ ನಿರುಜ್ಝೀ’’ತಿ – ಅತ್ಥಿ ಅಧಿಪ್ಪಾಯಇದ್ಧಿ ಬುದ್ಧಾನಂ ವಾ ಸಾವಕಾನಂ ವಾತಿ? ನ ಹೇವಂ ವತ್ತಬ್ಬೇ…ಪೇ….

ಉಪ್ಪನ್ನಾ ವೇದನಾ…ಪೇ… ಸಞ್ಞಾ… ಚೇತನಾ… ಚಿತ್ತಂ… ಸದ್ಧಾ… ವೀರಿಯಂ… ಸತಿ… ಸಮಾಧಿ…ಪೇ… ಪಞ್ಞಾ ಮಾ ನಿರುಜ್ಝೀತಿ – ಅತ್ಥಿ ಅಧಿಪ್ಪಾಯಇದ್ಧಿ ಬುದ್ಧಾನಂ ವಾ ಸಾವಕಾನಂ ವಾತಿ? ನ ಹೇವಂ ವತ್ತಬ್ಬೇ…ಪೇ….

ಅತ್ಥಿ ಅಧಿಪ್ಪಾಯಇದ್ಧಿ ಬುದ್ಧಾನಂ ವಾ ಸಾವಕಾನಂ ವಾತಿ? ಆಮನ್ತಾ. ‘‘ರೂಪಂ ನಿಚ್ಚಂ ಹೋತೂ’’ತಿ – ಅತ್ಥಿ ಅಧಿಪ್ಪಾಯಇದ್ಧಿ… ವೇದನಾ…ಪೇ… ಸಞ್ಞಾ…ಪೇ… ಸಙ್ಖಾರಾ…ಪೇ… ‘‘ವಿಞ್ಞಾಣಂ ನಿಚ್ಚಂ ಹೋತೂ’’ತಿ – ಅತ್ಥಿ ಅಧಿಪ್ಪಾಯಇದ್ಧಿ ಬುದ್ಧಾನಂ ವಾ ಸಾವಕಾನಂ ವಾತಿ? ನ ಹೇವಂ ವತ್ತಬ್ಬೇ…ಪೇ….

ಅತ್ಥಿ ಅಧಿಪ್ಪಾಯಇದ್ಧಿ ಬುದ್ಧಾನಂ ವಾ ಸಾವಕಾನಂ ವಾತಿ? ಆಮನ್ತಾ. ‘‘ಜಾತಿಧಮ್ಮಾ ಸತ್ತಾ ಮಾ ಜಾಯಿಂಸೂ’’ತಿ ಅತ್ಥಿ…ಪೇ… ‘‘ಜರಾಧಮ್ಮಾ ಸತ್ತಾ ಮಾ ಜೀರಿಂಸೂ’’ತಿ…ಪೇ… ‘‘ಬ್ಯಾಧಿಧಮ್ಮಾ ಸತ್ತಾ ಮಾ ಬ್ಯಾಧಿಯಿಂಸೂ’’ತಿ…ಪೇ… ‘‘ಮರಣಧಮ್ಮಾ ಸತ್ತಾ ಮಾ ಮೀಯಿಂಸೂ’’ತಿ – ಅತ್ಥಿ ಅಧಿಪ್ಪಾಯಇದ್ಧಿ ಬುದ್ಧಾನಂ ವಾ ಸಾವಕಾನಂ ವಾತಿ? ನ ಹೇವಂ ವತ್ತಬ್ಬೇ…ಪೇ….

೮೮೪. ನ ವತ್ತಬ್ಬಂ – ‘‘ಅತ್ಥಿ ಅಧಿಪ್ಪಾಯಇದ್ಧಿ ಬುದ್ಧಾನಂ ವಾ ಸಾವಕಾನಂ ವಾ’’ತಿ? ಆಮನ್ತಾ. ನನು ಆಯಸ್ಮಾ ಪಿಲಿನ್ದವಚ್ಛೋ ರಞ್ಞೋ ಮಾಗಧಸ್ಸ ಸೇನಿಯಸ್ಸ ಬಿಮ್ಬಿಸಾರಸ್ಸ ಪಾಸಾದಂ ‘‘ಸುವಣ್ಣ’’ನ್ತ್ವೇವ ಅಧಿಮುಚ್ಚಿ, ಸುವಣ್ಣೋ ಚ ಪನ ಆಸೀತಿ [ಪಾರಾ. ೬೨೧; ಮಹಾವ. ೨೭೧]? ಆಮನ್ತಾ. ಹಞ್ಚಿ ಆಯಸ್ಮಾ ಪಿಲಿನ್ದವಚ್ಛೋ ರಞ್ಞೋ ಮಾಗಧಸ್ಸ ಸೇನಿಯಸ್ಸ ಬಿಮ್ಬಿಸಾರಸ್ಸ ಪಾಸಾದಂ ಸುವಣ್ಣನ್ತ್ವೇವ ಅಧಿಮುಚ್ಚಿ, ಸುವಣ್ಣೋ ಚ ಪನ ಆಸಿ, ತೇನ ವತ ರೇ ವತ್ತಬ್ಬೇ – ‘‘ಅತ್ಥಿ ಅಧಿಪ್ಪಾಯಇದ್ಧಿ ಬುದ್ಧಾನಂ ವಾ ಸಾವಕಾನಂ ವಾ’’ತಿ.

ಇದ್ಧಿಕಥಾ ನಿಟ್ಠಿತಾ.

೨೧. ಏಕವೀಸತಿಮವಗ್ಗೋ

(೨೦೪) ೫. ಬುದ್ಧಕಥಾ

೮೮೫. ಅತ್ಥಿ ಬುದ್ಧಾನಂ ಬುದ್ಧೇಹಿ ಹೀನಾತಿರೇಕತಾತಿ? ಆಮನ್ತಾ. ಸತಿಪಟ್ಠಾನತೋತಿ? ನ ಹೇವಂ ವತ್ತಬ್ಬೇ …ಪೇ… ಸಮ್ಮಪ್ಪಧಾನತೋ…ಪೇ… ಇದ್ಧಿಪಾದತೋ… ಇನ್ದ್ರಿಯತೋ… ಬಲತೋ… ಬೋಜ್ಝಙ್ಗತೋ… ವಸಿಭಾವತೋ…ಪೇ… ಸಬ್ಬಞ್ಞುತಞಾಣದಸ್ಸನತೋತಿ? ನ ಹೇವಂ ವತ್ತಬ್ಬೇ…ಪೇ….

ಬುದ್ಧಕಥಾ ನಿಟ್ಠಿತಾ.

೨೧. ಏಕವೀಸತಿಮವಗ್ಗೋ

(೨೦೫) ೬. ಸಬ್ಬದಿಸಾಕಥಾ

೮೮೬. ಸಬ್ಬಾ ದಿಸಾ ಬುದ್ಧಾ ತಿಟ್ಠನ್ತೀತಿ? ಆಮನ್ತಾ. ಪುರತ್ಥಿಮಾಯ ದಿಸಾಯ ಬುದ್ಧೋ ತಿಟ್ಠತೀತಿ? ನ ಹೇವಂ ವತ್ತಬ್ಬೇ…ಪೇ… ಪುರತ್ಥಿಮಾಯ ದಿಸಾಯ ಬುದ್ಧೋ ತಿಟ್ಠತೀತಿ? ಆಮನ್ತಾ. ಕಿನ್ನಾಮೋ ಸೋ ಭಗವಾ, ಕಿಂಜಚ್ಚೋ, ಕಿಂಗೋತ್ತೋ, ಕಿನ್ನಾಮಾ ತಸ್ಸ ಭಗವತೋ ಮಾತಾಪಿತರೋ, ಕಿನ್ನಾಮಂ ತಸ್ಸ ಭಗವತೋ ಸಾವಕಯುಗಂ, ಕೋನಾಮೋ ತಸ್ಸ ಭಗವತೋ ಉಪಟ್ಠಾಕೋ, ಕೀದಿಸಂ ಚೀವರಂ ಧಾರೇತಿ, ಕೀದಿಸಂ ಪತ್ತಂ ಧಾರೇತಿ, ಕತರಸ್ಮಿಂ ಗಾಮೇ ವಾ ನಿಗಮೇ ವಾ ನಗರೇ ವಾ ರಟ್ಠೇ ವಾ ಜನಪದೇ ವಾತಿ? ನ ಹೇವಂ ವತ್ತಬ್ಬೇ…ಪೇ….

ದಕ್ಖಿಣಾಯ ದಿಸಾಯ…ಪೇ… ಪಚ್ಛಿಮಾಯ ದಿಸಾಯ…ಪೇ… ಉತ್ತರಾಯ ದಿಸಾಯ…ಪೇ… ಹೇಟ್ಠಿಮಾಯ ದಿಸಾಯ ಬುದ್ಧೋ ತಿಟ್ಠತೀತಿ? ನ ಹೇವಂ ವತ್ತಬ್ಬೇ…ಪೇ… ಹೇಟ್ಠಿಮಾಯ ದಿಸಾಯ ಬುದ್ಧೋ ತಿಟ್ಠತೀತಿ? ಆಮನ್ತಾ. ಕಿನ್ನಾಮೋ ಸೋ ಭಗವಾ…ಪೇ… ಜನಪದೇ ವಾತಿ? ನ ಹೇವಂ ವತ್ತಬ್ಬೇ…ಪೇ….

ಉಪರಿಮಾಯ ದಿಸಾಯ ಬುದ್ಧೋ ತಿಟ್ಠತೀತಿ? ನ ಹೇವಂ ವತ್ತಬ್ಬೇ…ಪೇ…. ಉಪರಿಮಾಯ ದಿಸಾಯ ಬುದ್ಧೋ ತಿಟ್ಠತೀತಿ? ಆಮನ್ತಾ. ಚಾತುಮಹಾರಾಜಿಕೇ ತಿಟ್ಠತಿ…ಪೇ… ತಾವತಿಂಸೇ ತಿಟ್ಠತಿ…ಪೇ… ಯಾಮೇ ತಿಟ್ಠತಿ…ಪೇ… ತುಸಿತೇ ತಿಟ್ಠತಿ…ಪೇ… ನಿಮ್ಮಾನರತಿಯಾ ತಿಟ್ಠತಿ…ಪೇ… ಪರನಿಮ್ಮಿತವಸವತ್ತಿಯಾ ತಿಟ್ಠತಿ…ಪೇ… ಬ್ರಹ್ಮಲೋಕೇ ತಿಟ್ಠತೀತಿ? ನ ಹೇವಂ ವತ್ತಬ್ಬೇ…ಪೇ….

ಸಬ್ಬದಿಸಾಕಥಾ ನಿಟ್ಠಿತಾ.

೨೧. ಏಕವೀಸತಿಮವಗ್ಗೋ

(೨೦೬) ೭. ಧಮ್ಮಕಥಾ

೮೮೭. ಸಬ್ಬೇ ಧಮ್ಮಾ ನಿಯತಾತಿ? ಆಮನ್ತಾ. ಮಿಚ್ಛತ್ತನಿಯತಾತಿ? ನ ಹೇವಂ ವತ್ತಬ್ಬೇ…ಪೇ… ಸಮ್ಮತ್ತನಿಯತಾತಿ? ನ ಹೇವಂ ವತ್ತಬ್ಬೇ…ಪೇ… ನತ್ಥಿ ಅನಿಯತೋ ರಾಸೀತಿ? ನ ಹೇವಂ ವತ್ತಬ್ಬೇ…ಪೇ… ನನು ಅತ್ಥಿ ಅನಿಯತೋ ರಾಸೀತಿ? ಆಮನ್ತಾ. ಹಞ್ಚಿ ಅತ್ಥಿ ಅನಿಯತೋ ರಾಸಿ, ನೋ ಚ ವತ ರೇ ವತ್ತಬ್ಬೇ – ‘‘ಸಬ್ಬೇ ಧಮ್ಮಾ ನಿಯತಾ’’ತಿ.

ಸಬ್ಬೇ ಧಮ್ಮಾ ನಿಯತಾತಿ? ಆಮನ್ತಾ. ನನು ತಯೋ ರಾಸೀ ವುತ್ತಾ ಭಗವತಾ – ಮಿಚ್ಛತ್ತನಿಯತೋ ರಾಸಿ, ಸಮ್ಮತ್ತನಿಯತೋ ರಾಸಿ, ಅನಿಯತೋ ರಾಸೀತಿ [ಧ. ಸ. ತಿಕಮಾತಿಕಾ ೧೫]? ಆಮನ್ತಾ. ಹಞ್ಚಿ ತಯೋ ರಾಸೀ ವುತ್ತಾ ಭಗವತಾ – ಮಿಚ್ಛತ್ತನಿಯತೋ ರಾಸಿ, ಸಮ್ಮತ್ತನಿಯತೋ ರಾಸಿ, ಅನಿಯತೋ ರಾಸಿ, ನೋ ಚ ವತ ರೇ ವತ್ತಬ್ಬೇ – ‘‘ಸಬ್ಬೇ ಧಮ್ಮಾ ನಿಯತಾ’’ತಿ.

ರೂಪಂ ರೂಪಟ್ಠೇನ ನಿಯತನ್ತಿ? ಆಮನ್ತಾ. ಮಿಚ್ಛತ್ತನಿಯತನ್ತಿ? ನ ಹೇವಂ ವತ್ತಬ್ಬೇ…ಪೇ… ಸಮ್ಮತ್ತನಿಯತನ್ತಿ? ನ ಹೇವಂ ವತ್ತಬ್ಬೇ…ಪೇ… ವೇದನಾ…ಪೇ… ಸಞ್ಞಾ…ಪೇ… ಸಙ್ಖಾರಾ…ಪೇ… ವಿಞ್ಞಾಣಂ ವಿಞ್ಞಾಣಟ್ಠೇನ ನಿಯತನ್ತಿ? ಆಮನ್ತಾ. ಮಿಚ್ಛತ್ತನಿಯತನ್ತಿ? ನ ಹೇವಂ ವತ್ತಬ್ಬೇ…ಪೇ… ಸಮ್ಮತ್ತನಿಯತನ್ತಿ? ನ ಹೇವಂ ವತ್ತಬ್ಬೇ…ಪೇ….

೮೮೮. ನ ವತ್ತಬ್ಬಂ – ರೂಪಂ ರೂಪಟ್ಠೇನ ನಿಯತಂ…ಪೇ… ವೇದನಾ…ಪೇ… ಸಞ್ಞಾ…ಪೇ… ಸಙ್ಖಾರಾ…ಪೇ… ವಿಞ್ಞಾಣಂ ವಿಞ್ಞಾಣಟ್ಠೇನ ನಿಯತನ್ತಿ? ಆಮನ್ತಾ. ರೂಪಂ ವೇದನಾ ಹೋತಿ…ಪೇ… ಸಞ್ಞಾ ಹೋತಿ… ಸಙ್ಖಾರಾ ಹೋನ್ತಿ… ವಿಞ್ಞಾಣಂ ಹೋತಿ… ವೇದನಾ…ಪೇ… ಸಞ್ಞಾ…ಪೇ… ಸಙ್ಖಾರಾ…ಪೇ… ವಿಞ್ಞಾಣಂ ರೂಪಂ ಹೋತಿ…ಪೇ… ವೇದನಾ ಹೋತಿ… ಸಞ್ಞಾ ಹೋತಿ… ಸಙ್ಖಾರಾ ಹೋನ್ತೀತಿ? ನ ಹೇವಂ ವತ್ತಬ್ಬೇ. ತೇನ ಹಿ ರೂಪಂ ರೂಪಟ್ಠೇನ ನಿಯತಂ, ವೇದನಾ…ಪೇ… ಸಞ್ಞಾ…ಪೇ… ಸಙ್ಖಾರಾ…ಪೇ… ವಿಞ್ಞಾಣಂ ವಿಞ್ಞಾಣಟ್ಠೇನ ನಿಯತನ್ತಿ.

ಧಮ್ಮಕಥಾ ನಿಟ್ಠಿತಾ.

೨೧. ಏಕವೀಸತಿಮವಗ್ಗೋ

(೨೦೭) ೮. ಕಮ್ಮಕಥಾ

೮೮೯. ಸಬ್ಬೇ ಕಮ್ಮಾ ನಿಯತಾತಿ? ಆಮನ್ತಾ. ಮಿಚ್ಛತ್ತನಿಯತಾತಿ? ನ ಹೇವಂ ವತ್ತಬ್ಬೇ…ಪೇ… ಸಮ್ಮತ್ತನಿಯತಾತಿ? ನ ಹೇವಂ ವತ್ತಬ್ಬೇ…ಪೇ… ನತ್ಥಿ ಅನಿಯತೋ ರಾಸೀತಿ? ನ ಹೇವಂ ವತ್ತಬ್ಬೇ…ಪೇ… ನನು ಅತ್ಥಿ ಅನಿಯತೋ ರಾಸೀತಿ? ಆಮನ್ತಾ. ಹಞ್ಚಿ ಅತ್ಥಿ ಅನಿಯತೋ ರಾಸಿ, ನೋ ಚ ವತ ರೇ ವತ್ತಬ್ಬೇ – ‘‘ಸಬ್ಬೇ ಕಮ್ಮಾ ನಿಯತಾ’’ತಿ.

ಸಬ್ಬೇ ಕಮ್ಮಾ ನಿಯತಾತಿ? ಆಮನ್ತಾ. ನನು ತಯೋ ರಾಸೀ ವುತ್ತಾ ಭಗವತಾ – ಮಿಚ್ಛತ್ತನಿಯತೋ ರಾಸಿ, ಸಮ್ಮತ್ತನಿಯತೋ ರಾಸಿ, ಅನಿಯತೋ ರಾಸೀತಿ? ಆಮನ್ತಾ. ಹಞ್ಚಿ ತಯೋ ರಾಸೀ ವುತ್ತಾ ಭಗವತಾ – ಮಿಚ್ಛತ್ತನಿಯತೋ ರಾಸಿ, ಸಮ್ಮತ್ತನಿಯತೋ ರಾಸಿ, ಅನಿಯತೋ ರಾಸಿ, ನೋ ಚ ವತ ರೇ ವತ್ತಬ್ಬೇ – ‘‘ಸಬ್ಬೇ ಕಮ್ಮಾ ನಿಯತಾ’’ತಿ.

೮೯೦. ದಿಟ್ಠಧಮ್ಮವೇದನೀಯಂ ಕಮ್ಮಂ ದಿಟ್ಠಧಮ್ಮವೇದನೀಯಟ್ಠೇನ ನಿಯತನ್ತಿ? ಆಮನ್ತಾ. ಮಿಚ್ಛತ್ತನಿಯತನ್ತಿ? ನ ಹೇವಂ ವತ್ತಬ್ಬೇ…ಪೇ… ಸಮ್ಮತ್ತನಿಯತನ್ತಿ? ನ ಹೇವಂ ವತ್ತಬ್ಬೇ…ಪೇ…. ಉಪಪಜ್ಜವೇದನೀಯಂ ಕಮ್ಮಂ…ಪೇ… ಅಪರಾಪರಿಯವೇದನೀಯಂ ಕಮ್ಮಂ ಅಪರಾಪರಿಯವೇದನೀಯಟ್ಠೇನ ನಿಯತನ್ತಿ? ಆಮನ್ತಾ. ಮಿಚ್ಛತ್ತನಿಯತನ್ತಿ? ನ ಹೇವಂ ವತ್ತಬ್ಬೇ…ಪೇ… ಸಮ್ಮತ್ತನಿಯತನ್ತಿ? ನ ಹೇವಂ ವತ್ತಬ್ಬೇ…ಪೇ….

೮೯೧. ನ ವತ್ತಬ್ಬಂ – ದಿಟ್ಠಧಮ್ಮವೇದನೀಯಂ ಕಮ್ಮಂ ದಿಟ್ಠಧಮ್ಮವೇದನೀಯಟ್ಠೇನ ನಿಯತಂ, ಉಪಪಜ್ಜವೇದನೀಯಂ ಕಮ್ಮಂ…ಪೇ… ಅಪರಾಪರಿಯವೇದನೀಯಂ ಕಮ್ಮಂ ಅಪರಾಪರಿಯವೇದನೀಯಟ್ಠೇನ ನಿಯತನ್ತಿ? ಆಮನ್ತಾ. ದಿಟ್ಠಧಮ್ಮವೇದನೀಯಂ ಕಮ್ಮಂ ಉಪಪಜ್ಜವೇದನೀಯಂ ಹೋತಿ, ಅಪರಾಪರಿಯವೇದನೀಯಂ ಹೋತಿ…ಪೇ… ಉಪಪಜ್ಜವೇದನೀಯಂ ಕಮ್ಮಂ ದಿಟ್ಠಧಮ್ಮವೇದನೀಯಂ ಹೋತಿ, ಅಪರಾಪರಿಯವೇದನೀಯಂ ಹೋತಿ…ಪೇ… ಅಪರಾಪರಿಯವೇದನೀಯಂ ಕಮ್ಮಂ ದಿಟ್ಠಧಮ್ಮವೇದನೀಯಂ ಹೋತಿ, ಉಪಪಜ್ಜವೇದನೀಯಂ ಹೋತೀತಿ? ನ ಹೇವಂ ವತ್ತಬ್ಬೇ. ತೇನ ಹಿ ದಿಟ್ಠಧಮ್ಮವೇದನೀಯಂ ಕಮ್ಮಂ ದಿಟ್ಠಧಮ್ಮವೇದನೀಯಟ್ಠೇನ ನಿಯತಂ, ಉಪಪಜ್ಜವೇದನೀಯಂ ಕಮ್ಮಂ…ಪೇ… ಅಪರಾಪರಿಯವೇದನೀಯಂ ಕಮ್ಮಂ ಅಪರಾಪರಿಯವೇದನೀಯಟ್ಠೇನ ನಿಯತನ್ತಿ.

ಕಮ್ಮಕಥಾ ನಿಟ್ಠಿತಾ.

ಏಕವೀಸತಿಮವಗ್ಗೋ.

ತಸ್ಸುದ್ದಾನಂ –

ಸಾಸನಂ ನವಂ ಕತಂ ಅತ್ಥಿ ಕೋಚಿ ತಥಾಗತಸ್ಸ ಸಾಸನಂ ನವಂ ಕರೋತಿ ಲಬ್ಭಾ ತಥಾಗತಸ್ಸ ಸಾಸನಂ ಪುನ ನವಂ ಕಾತುಂ, ಪುಥುಜ್ಜನೋ ತೇಧಾತುಕೇಹಿ ಧಮ್ಮೇಹಿ ಅವಿವಿತ್ತೋ, ಅತ್ಥಿ ಕಿಞ್ಚಿ ಸಂಯೋಜನಂ ಅಪ್ಪಹಾಯ ಅರಹತ್ತಪ್ಪತ್ತಿ, ಅತ್ಥಿ ಅಧಿಪ್ಪಾಯಿದ್ಧಿ ಬುದ್ಧಾನಂ ವಾ ಸಾವಕಾನಂ ವಾ, ಅತ್ಥಿ ಬುದ್ಧಾನಂ ಬುದ್ಧೇಹಿ ಹೀನಾತಿರೇಕತಾ, ಸಬ್ಬಾ ದಿಸಾ ಬುದ್ಧಾ ತಿಟ್ಠನ್ತಿ, ಸಬ್ಬೇ ಧಮ್ಮಾ ನಿಯತಾ, ಸಬ್ಬೇ ಕಮ್ಮಾ ನಿಯತಾತಿ.