(೨೦೨) ೩. ಸಂಯೋಜನಕಥಾ

೮೮೧. ಅತ್ಥಿ ಕಿಞ್ಚಿ ಸಂಯೋಜನಂ ಅಪ್ಪಹಾಯ ಅರಹತ್ತಪ್ಪತ್ತೀತಿ? ಆಮನ್ತಾ. ಅತ್ಥಿ ಕಿಞ್ಚಿ ಸಕ್ಕಾಯದಿಟ್ಠಿಂ ಅಪ್ಪಹಾಯ…ಪೇ… ವಿಚಿಕಿಚ್ಛಂ ಅಪ್ಪಹಾಯ…ಪೇ… ಸೀಲಬ್ಬತಪರಾಮಾಸಂ ಅಪ್ಪಹಾಯ… ರಾಗಂ ಅಪ್ಪಹಾಯ… ದೋಸಂ ಅಪ್ಪಹಾಯ… ಮೋಹಂ ಅಪ್ಪಹಾಯ… ಅನೋತ್ತಪ್ಪಂ ಅಪ್ಪಹಾಯ ಅರಹತ್ತಪ್ಪತ್ತೀತಿ? ನ ಹೇವಂ ವತ್ತಬ್ಬೇ…ಪೇ….

ಅತ್ಥಿ ಕಿಞ್ಚಿ ಸಂಯೋಜನಂ ಅಪ್ಪಹಾಯ ಅರಹತ್ತಪ್ಪತ್ತೀತಿ? ಆಮನ್ತಾ. ಅರಹಾ ಸರಾಗೋ ಸದೋಸೋ ಸಮೋಹೋ ಸಮಾನೋ ಸಮಕ್ಖೋ ಸಪಳಾಸೋ ಸಉಪಾಯಾಸೋ ಸಕಿಲೇಸೋತಿ? ನ ಹೇವಂ ವತ್ತಬ್ಬೇ…ಪೇ… ನನು ಅರಹಾ ನಿರಾಗೋ ನಿದ್ದೋಸೋ ನಿಮ್ಮೋಹೋ ನಿಮ್ಮಾನೋ ನಿಮ್ಮಕ್ಖೋ ನಿಪ್ಪಳಾಸೋ ನಿರುಪಾಯಾಸೋ ನಿಕ್ಕಿಲೇಸೋತಿ? ಆಮನ್ತಾ. ಹಞ್ಚಿ ಅರಹಾ ನಿರಾಗೋ…ಪೇ… ನಿಕ್ಕಿಲೇಸೋ, ನೋ ಚ ವತ ರೇ ವತ್ತಬ್ಬೇ – ‘‘ಅತ್ಥಿ ಕಿಞ್ಚಿ ಸಂಯೋಜನಂ ಅಪ್ಪಹಾಯ ಅರಹತ್ತಪ್ಪತ್ತೀ’’ತಿ.

೮೮೨. ನ ವತ್ತಬ್ಬಂ – ‘‘ಅತ್ಥಿ ಕಿಞ್ಚಿ ಸಂಯೋಜನಂ ಅಪ್ಪಹಾಯ ಅರಹತ್ತಪ್ಪತ್ತೀ’’ತಿ? ಆಮನ್ತಾ. ಅರಹಾ ಸಬ್ಬಂ ಬುದ್ಧವಿಸಯಂ ಜಾನಾತೀತಿ? ನ ಹೇವಂ ವತ್ತಬ್ಬೇ. ತೇನ ಹಿ ಅತ್ಥಿ ಕಿಞ್ಚಿ ಸಂಯೋಜನಂ ಅಪ್ಪಹಾಯ ಅರಹತ್ತಪ್ಪತ್ತೀತಿ.

ಸಂಯೋಜನಕಥಾ ನಿಟ್ಠಿತಾ.