(೧೮೬) ೧. ಕಿಲೇಸಜಹನಕಥಾ

೮೨೮. ಅತೀತೇ ಕಿಲೇಸೇ ಜಹತೀತಿ? ಆಮನ್ತಾ. ನಿರುದ್ಧಂ ನಿರೋಧೇತಿ, ವಿಗತಂ ವಿಗಮೇತಿ, ಖೀಣಂ ಖೇಪೇತಿ, ಅತ್ಥಙ್ಗತಂ ಅತ್ಥಙ್ಗಮೇತಿ, ಅಬ್ಭತ್ಥಙ್ಗತಂ ಅಬ್ಭತ್ಥಙ್ಗಮೇತೀತಿ? ನ ಹೇವಂ ವತ್ತಬ್ಬೇ…ಪೇ… ಅತೀತೇ ಕಿಲೇಸೇ ಜಹತೀತಿ? ಆಮನ್ತಾ. ನನು ಅತೀತಂ ನಿರುದ್ಧನ್ತಿ? ಆಮನ್ತಾ. ಹಞ್ಚಿ ಅತೀತಂ ನಿರುದ್ಧಂ, ನೋ ಚ ವತ ರೇ ವತ್ತಬ್ಬೇ – ‘‘ಅತೀತೇ ಕಿಲೇಸೇ ಜಹತೀ’’ತಿ. ಅತೀತೇ ಕಿಲೇಸೇ ಜಹತೀತಿ? ಆಮನ್ತಾ. ನನು ಅತೀತಂ ನತ್ಥೀತಿ? ಆಮನ್ತಾ. ಹಞ್ಚಿ ಅತೀತಂ ನತ್ಥಿ, ನೋ ಚ ವತ ರೇ ವತ್ತಬ್ಬೇ – ‘‘ಅತೀತೇ ಕಿಲೇಸೇ ಜಹತೀ’’ತಿ.

೮೨೯. ಅನಾಗತೇ ಕಿಲೇಸೇ ಜಹತೀತಿ? ಆಮನ್ತಾ. ಅಜಾತಂ ಅಜನೇತಿ, ಅಸಞ್ಜಾತಂ ಅಸಞ್ಜನೇತಿ, ಅನಿಬ್ಬತ್ತಂ ಅನಿಬ್ಬತ್ತೇತಿ, ಅಪಾತುಭೂತಂ ಅಪಾತುಭಾವೇತೀತಿ? ನ ಹೇವಂ ವತ್ತಬ್ಬೇ…ಪೇ… ಅನಾಗತೇ ಕಿಲೇಸೇ ಜಹತೀತಿ? ಆಮನ್ತಾ. ನನು ಅನಾಗತಂ ಅಜಾತನ್ತಿ? ಆಮನ್ತಾ. ಹಞ್ಚಿ ಅನಾಗತಂ ಅಜಾತಂ, ನೋ ಚ ವತ ರೇ ವತ್ತಬ್ಬೇ – ‘‘ಅನಾಗತೇ ಕಿಲೇಸೇ ಜಹತೀ’’ತಿ. ಅನಾಗತೇ ಕಿಲೇಸೇ ಜಹತೀತಿ? ಆಮನ್ತಾ. ನನು ಅನಾಗತಂ ನತ್ಥೀತಿ? ಆಮನ್ತಾ. ಹಞ್ಚಿ ಅನಾಗತಂ ನತ್ಥಿ, ನೋ ಚ ವತ ರೇ ವತ್ತಬ್ಬೇ – ‘‘ಅನಾಗತೇ ಕಿಲೇಸೇ ಜಹತೀ’’ತಿ.

೮೩೦. ಪಚ್ಚುಪ್ಪನ್ನೇ ಕಿಲೇಸೇ ಜಹತೀತಿ? ಆಮನ್ತಾ. ರತ್ತೋ ರಾಗಂ ಜಹತಿ, ದುಟ್ಠೋ ದೋಸಂ ಜಹತಿ, ಮೂಳ್ಹೋ ಮೋಹಂ ಜಹತಿ, ಕಿಲಿಟ್ಠೋ ಕಿಲೇಸೇ ಜಹತೀತಿ? ನ ಹೇವಂ ವತ್ತಬ್ಬೇ…ಪೇ… ರಾಗೇನ ರಾಗಂ ಜಹತಿ, ದೋಸೇನ ದೋಸಂ ಜಹತಿ, ಮೋಹೇನ ಮೋಹಂ ಜಹತಿ, ಕಿಲೇಸೇಹಿ ಕಿಲೇಸೇ ಜಹತೀತಿ? ನ ಹೇವಂ ವತ್ತಬ್ಬೇ…ಪೇ….

ರಾಗೋ ಚಿತ್ತಸಮ್ಪಯುತ್ತೋ, ಮಗ್ಗೋ ಚಿತ್ತಸಮ್ಪಯುತ್ತೋತಿ? ಆಮನ್ತಾ. ದ್ವಿನ್ನಂ ಚಿತ್ತಾನಂ ಸಮೋಧಾನಂ ಹೋತೀತಿ? ನ ಹೇವಂ ವತ್ತಬ್ಬೇ…ಪೇ….

ರಾಗೋ ಅಕುಸಲೋ, ಮಗ್ಗೋ ಕುಸಲೋತಿ? ಆಮನ್ತಾ. ಕುಸಲಾಕುಸಲಾ ಸಾವಜ್ಜಾನವಜ್ಜಾ ಹೀನಪಣೀತಾ ಕಣ್ಹಸುಕ್ಕಸಪ್ಪಟಿಭಾಗಾ ಧಮ್ಮಾ ಸಮ್ಮುಖೀಭಾವಂ ಆಗಚ್ಛನ್ತೀತಿ? ನ ಹೇವಂ ವತ್ತಬ್ಬೇ…ಪೇ….

ಕುಸಲಾಕುಸಲಾ ಸಾವಜ್ಜಾನವಜ್ಜಾ ಹೀನಪಣೀತಾ ಕಣ್ಹಸುಕ್ಕಸಪ್ಪಟಿಭಾಗಾ ಧಮ್ಮಾ ಸಮ್ಮುಖೀಭಾವಂ ಆಗಚ್ಛನ್ತೀತಿ? ಆಮನ್ತಾ. ನನು ವುತ್ತಂ ಭಗವತಾ – ‘‘ಚತ್ತಾರಿಮಾನಿ, ಭಿಕ್ಖವೇ, ಸುವಿದೂರವಿದೂರಾನಿ! ಕತಮಾನಿ ಚತ್ತಾರಿ? ನಭಞ್ಚ, ಭಿಕ್ಖವೇ, ಪಥವೀ ಚ – ಇದಂ ಪಠಮಂ ಸುವಿದೂರವಿದೂರಂ…ಪೇ… ತಸ್ಮಾ ಸತಂ ಧಮ್ಮೋ ಅಸಬ್ಭಿ ಆರಕಾ’’ತಿ. ಅತ್ಥೇವ ಸುತ್ತನ್ತೋತಿ? ಆಮನ್ತಾ. ತೇನ ಹಿ ನ ವತ್ತಬ್ಬಂ – ‘‘ಕುಸಲಾಕುಸಲಾ…ಪೇ… ಸಮ್ಮುಖೀಭಾವಂ ಆಗಚ್ಛನ್ತೀ’’ತಿ.

೮೩೧. ನ ವತ್ತಬ್ಬಂ – ‘‘ಅತೀತೇ ಕಿಲೇಸೇ ಜಹತಿ, ಅನಾಗತೇ ಕಿಲೇಸೇ ಜಹತಿ, ಪಚ್ಚುಪ್ಪನ್ನೇ ಕಿಲೇಸೇ ಜಹತೀ’’ತಿ? ಆಮನ್ತಾ. ನತ್ಥಿ ಕಿಲೇಸೇ ಜಹತೀತಿ? ನ ಹೇವಂ ವತ್ತಬ್ಬೇ…ಪೇ… ತೇನ ಹಿ ಅತೀತೇ ಕಿಲೇಸೇ ಜಹತಿ, ಅನಾಗತೇ ಕಿಲೇಸೇ ಜಹತಿ, ಪಚ್ಚುಪ್ಪನ್ನೇ ಕಿಲೇಸೇ ಜಹತೀತಿ.

ಕಿಲೇಸಜಹನಕಥಾ ನಿಟ್ಠಿತಾ.