(೧೫೫) ೧೧. ಕಮ್ಮೂಪಚಯಕಥಾ

೭೩೭. ಅಞ್ಞಂ ಕಮ್ಮಂ ಅಞ್ಞೋ ಕಮ್ಮೂಪಚಯೋತಿ? ಆಮನ್ತಾ. ಅಞ್ಞೋ ಫಸ್ಸೋ, ಅಞ್ಞೋ ಫಸ್ಸೂಪಚಯೋ; ಅಞ್ಞಾ ವೇದನಾ, ಅಞ್ಞೋ ವೇದನೂಪಚಯೋ; ಅಞ್ಞಾ ಸಞ್ಞಾ, ಅಞ್ಞೋ ಸಞ್ಞೂಪಚಯೋ; ಅಞ್ಞಾ ಚೇತನಾ, ಅಞ್ಞೋ ಚೇತನೂಪಚಯೋ; ಅಞ್ಞಂ ಚಿತ್ತಂ, ಅಞ್ಞೋ ಚಿತ್ತೂಪಚಯೋ; ಅಞ್ಞಾ ಸದ್ಧಾ, ಅಞ್ಞೋ ಸದ್ಧೂಪಚಯೋ; ಅಞ್ಞಂ ವೀರಿಯಂ, ಅಞ್ಞೋ ವೀರಿಯೂಪಚಯೋ; ಅಞ್ಞಾ ಸತಿ, ಅಞ್ಞೋ ಸತೂಪಚಯೋ; ಅಞ್ಞೋ ಸಮಾಧಿ, ಅಞ್ಞೋ ಸಮಾಧೂಪಚಯೋ; ಅಞ್ಞಾ ಪಞ್ಞಾ, ಅಞ್ಞೋ ಪಞ್ಞೂಪಚಯೋ; ಅಞ್ಞೋ ರಾಗೋ, ಅಞ್ಞೋ ರಾಗೂಪಚಯೋ…ಪೇ… ಅಞ್ಞಂ ಅನೋತ್ತಪ್ಪಂ, ಅಞ್ಞೋ ಅನೋತ್ತಪ್ಪೂಪಚಯೋತಿ? ನ ಹೇವಂ ವತ್ತಬ್ಬೇ…ಪೇ….

೭೩೮. ಅಞ್ಞಂ ಕಮ್ಮಂ, ಅಞ್ಞೋ ಕಮ್ಮೂಪಚಯೋತಿ? ಆಮನ್ತಾ. ಕಮ್ಮೂಪಚಯೋ ಕಮ್ಮೇನ ಸಹಜಾತೋತಿ? ನ ಹೇವಂ ವತ್ತಬ್ಬೇ…ಪೇ….

ಕಮ್ಮೂಪಚಯೋ ಕಮ್ಮೇನ ಸಹಜಾತೋತಿ, ಆಮನ್ತಾ. ಕುಸಲೇನ ಕಮ್ಮೇನ ಸಹಜಾತೋ ಕಮ್ಮೂಪಚಯೋ ಕುಸಲೋತಿ, ನ ಹೇವಂ ವತ್ತಬ್ಬೇ…ಪೇ….

ಕುಸಲೇನ ಕಮ್ಮೇನ ಸಹಜಾತೋ ಕಮ್ಮೂಪಚಯೋ ಕುಸಲೋತಿ? ಆಮನ್ತಾ. ಸುಖಾಯ ವೇದನಾಯ ಸಮ್ಪಯುತ್ತೇನ ಕಮ್ಮೇನ ಸಹಜಾತೋ ಕಮ್ಮೂಪಚಯೋ ಸುಖಾಯ ವೇದನಾಯ ಸಮ್ಪಯುತ್ತೋತಿ? ನ ಹೇವಂ ವತ್ತಬ್ಬೇ…ಪೇ… ದುಕ್ಖಾಯ ವೇದನಾಯ…ಪೇ… ಅದುಕ್ಖಮಸುಖಾಯ ವೇದನಾಯ ಸಮ್ಪಯುತ್ತೇನ ಕಮ್ಮೇನ ಸಹಜಾತೋ ಕಮ್ಮೂಪಚಯೋ ಅದುಕ್ಖಮಸುಖಾಯ ವೇದನಾಯ ಸಮ್ಪಯುತ್ತೋತಿ? ನ ಹೇವಂ ವತ್ತಬ್ಬೇ…ಪೇ….

೭೩೯. ಕಮ್ಮೂಪಚಯೋ ಕಮ್ಮೇನ ಸಹಜಾತೋತಿ? ಆಮನ್ತಾ. ಅಕುಸಲೇನ ಕಮ್ಮೇನ ಸಹಜಾತೋ ಕಮ್ಮೂಪಚಯೋ ಅಕುಸಲೋತಿ? ನ ಹೇವಂ ವತ್ತಬ್ಬೇ…ಪೇ….

ಅಕುಸಲೇನ ಕಮ್ಮೇನ ಸಹಜಾತೋ ಕಮ್ಮೂಪಚಯೋ ಅಕುಸಲೋತಿ? ಆಮನ್ತಾ. ಸುಖಾಯ ವೇದನಾಯ ಸಮ್ಪಯುತ್ತೇನ ಕಮ್ಮೇನ ಸಹಜಾತೋ ಕಮ್ಮೂಪಚಯೋ ಸುಖಾಯ ವೇದನಾಯ ಸಮ್ಪಯುತ್ತೋತಿ? ನ ಹೇವಂ ವತ್ತಬ್ಬೇ…ಪೇ… ದುಕ್ಖಾಯ ವೇದನಾಯ…ಪೇ… ಅದುಕ್ಖಮಸುಖಾಯ ವೇದನಾಯ ಸಮ್ಪಯುತ್ತೇನ ಕಮ್ಮೇನ ಸಹಜಾತೋ ಕಮ್ಮೂಪಚಯೋ ಅದುಕ್ಖಮಸುಖಾಯ ವೇದನಾಯ ಸಮ್ಪಯುತ್ತೋತಿ? ನ ಹೇವಂ ವತ್ತಬ್ಬೇ…ಪೇ….

೭೪೦. ಕಮ್ಮಂ ಚಿತ್ತೇನ ಸಹಜಾತಂ, ಕಮ್ಮಂ ಸಾರಮ್ಮಣನ್ತಿ? ಆಮನ್ತಾ. ಕಮ್ಮೂಪಚಯೋ ಚಿತ್ತೇನ ಸಹಜಾತೋ, ಕಮ್ಮೂಪಚಯೋ ಸಾರಮ್ಮಣೋತಿ? ನ ಹೇವಂ ವತ್ತಬ್ಬೇ…ಪೇ… ಕಮ್ಮೂಪಚಯೋ ಚಿತ್ತೇನ ಸಹಜಾತೋ, ಕಮ್ಮೂಪಚಯೋ ಅನಾರಮ್ಮಣೋತಿ? ಆಮನ್ತಾ. ಕಮ್ಮಂ ಚಿತ್ತೇನ ಸಹಜಾತಂ, ಕಮ್ಮಂ ಅನಾರಮ್ಮಣನ್ತಿ? ನ ಹೇವಂ ವತ್ತಬ್ಬೇ…ಪೇ….

ಕಮ್ಮಂ ಚಿತ್ತೇನ ಸಹಜಾತಂ, ಚಿತ್ತಂ ಭಿಜ್ಜಮಾನಂ ಕಮ್ಮಂ ಭಿಜ್ಜತೀತಿ? ಆಮನ್ತಾ. ಕಮ್ಮೂಪಚಯೋ ಚಿತ್ತೇನ ಸಹಜಾತೋ, ಚಿತ್ತಂ ಭಿಜ್ಜಮಾನಂ ಕಮ್ಮೂಪಚಯೋ ಭಿಜ್ಜತೀತಿ? ನ ಹೇವಂ ವತ್ತಬ್ಬೇ…ಪೇ….

ಕಮ್ಮೂಪಚಯೋ ಚಿತ್ತೇನ ಸಹಜಾತೋ, ಚಿತ್ತಂ ಭಿಜ್ಜಮಾನಂ ಕಮ್ಮೂಪಚಯೋ ನ ಭಿಜ್ಜತೀತಿ? ಆಮನ್ತಾ. ಕಮ್ಮಂ ಚಿತ್ತೇನ ಸಹಜಾತಂ, ಚಿತ್ತಂ ಭಿಜ್ಜಮಾನಂ ಕಮ್ಮಂ ನ ಭಿಜ್ಜತೀತಿ? ನ ಹೇವಂ ವತ್ತಬ್ಬೇ…ಪೇ….

೭೪೧. ಕಮ್ಮಮ್ಹಿ ಕಮ್ಮೂಪಚಯೋತಿ? ಆಮನ್ತಾ. ತಞ್ಞೇವ ಕಮ್ಮಂ ಸೋ ಕಮ್ಮೂಪಚಯೋತಿ? ನ ಹೇವಂ ವತ್ತಬ್ಬೇ…ಪೇ….

ಕಮ್ಮಮ್ಹಿ ಕಮ್ಮೂಪಚಯೋ, ಕಮ್ಮೂಪಚಯತೋ ವಿಪಾಕೋ ನಿಬ್ಬತ್ತತೀತಿ? ಆಮನ್ತಾ. ತಞ್ಞೇವ ಕಮ್ಮಂ, ಸೋ ಕಮ್ಮೂಪಚಯೋ, ಸೋ ಕಮ್ಮವಿಪಾಕೋತಿ? ನ ಹೇವಂ ವತ್ತಬ್ಬೇ…ಪೇ….

ಕಮ್ಮಮ್ಹಿ ಕಮ್ಮೂಪಚಯೋ, ಕಮ್ಮೂಪಚಯತೋ ವಿಪಾಕೋ ನಿಬ್ಬತ್ತತಿ, ವಿಪಾಕೋ ಸಾರಮ್ಮಣೋತಿ? ಆಮನ್ತಾ. ಕಮ್ಮೂಪಚಯೋ ಸಾರಮ್ಮಣೋತಿ? ನ ಹೇವಂ ವತ್ತಬ್ಬೇ…ಪೇ… ಕಮ್ಮೂಪಚಯೋ ಅನಾರಮ್ಮಣೋತಿ? ಆಮನ್ತಾ. ವಿಪಾಕೋ ಅನಾರಮ್ಮಣೋತಿ? ನ ಹೇವಂ ವತ್ತಬ್ಬೇ…ಪೇ….

೭೪೨. ಅಞ್ಞಂ ಕಮ್ಮಂ ಅಞ್ಞೋ ಕಮ್ಮೂಪಚಯೋತಿ, ಆಮನ್ತಾ. ನನು ವುತ್ತಂ ಭಗವತಾ – ‘‘ಇಧ, ಪುಣ್ಣ, ಏಕಚ್ಚೋ ಸಬ್ಯಾಬಜ್ಝಮ್ಪಿ ಅಬ್ಯಾಬಜ್ಝಮ್ಪಿ [ಸಬ್ಯಾಪಜ್ಝಮ್ಪಿ ಅಬ್ಯಾಪಜ್ಝಮ್ಪಿ (ಕ.) ಮ. ನಿ. ೨.೮೧ ಪಸ್ಸಿತಬ್ಬಂ] ಕಾಯಸಙ್ಖಾರಂ ಅಭಿಸಙ್ಖರೋತಿ, ಸಬ್ಯಾಬಜ್ಝಮ್ಪಿ ಅಬ್ಯಾಬಜ್ಝಮ್ಪಿ ವಚೀಸಙ್ಖಾರಂ…ಪೇ… ಮನೋಸಙ್ಖಾರಂ ಅಭಿಸಙ್ಖರೋತಿ, ಸೋ ಸಬ್ಯಾಬಜ್ಝಮ್ಪಿ ಅಬ್ಯಾಬಜ್ಝಮ್ಪಿ ಕಾಯಸಙ್ಖಾರಂ ಅಭಿಸಙ್ಖರಿತ್ವಾ, ಸಬ್ಯಾಬಜ್ಝಮ್ಪಿ ಅಬ್ಯಾಬಜ್ಝಮ್ಪಿ ವಚೀಸಙ್ಖಾರಂ…ಪೇ… ಮನೋಸಙ್ಖಾರಂ ಅಭಿಸಙ್ಖರಿತ್ವಾ ಸಬ್ಯಾಬಜ್ಝಮ್ಪಿ ಅಬ್ಯಾಬಜ್ಝಮ್ಪಿ ಲೋಕಂ ಉಪಪಜ್ಜತಿ. ತಮೇನಂ ಸಬ್ಯಾಬಜ್ಝಮ್ಪಿ ಅಬ್ಯಾಬಜ್ಝಮ್ಪಿ ಲೋಕಂ ಉಪಪನ್ನಂ ಸಮಾನಂ ಸಬ್ಯಾಬಜ್ಝಾಪಿ ಅಬ್ಯಾಬಜ್ಝಾಪಿ ಫಸ್ಸಾ ಫುಸನ್ತಿ. ಸೋ ಸಬ್ಯಾಬಜ್ಝೇಹಿಪಿ ಅಬ್ಯಾಬಜ್ಝೇಹಿಪಿ ಫಸ್ಸೇಹಿ ಫುಟ್ಠೋ ಸಮಾನೋ ಸಬ್ಯಾಬಜ್ಝಮ್ಪಿ ಅಬ್ಯಾಬಜ್ಝಮ್ಪಿ ವೇದನಂ ವೇದೇತಿ ವೋಕಿಣ್ಣಸುಖದುಕ್ಖಂ, ಸೇಯ್ಯಥಾಪಿ ಮನುಸ್ಸಾ ಏಕಚ್ಚೇ ಚ ದೇವಾ ಏಕಚ್ಚೇ ಚ ವಿನಿಪಾತಿಕಾ. ಇತಿ ಖೋ, ಪುಣ್ಣ, ಭೂತಾ ಭೂತಸ್ಸ ಉಪಪತ್ತಿ ಹೋತಿ, ಯಂ ಕರೋತಿ ತೇನ ಉಪಪಜ್ಜತಿ, ಉಪಪನ್ನಮೇತಂ ಫಸ್ಸಾ ಫುಸನ್ತಿ. ಏವಮ್ಪಾಹಂ, ಪುಣ್ಣ, ‘ಕಮ್ಮದಾಯಾದಾ ಸತ್ತಾ’ತಿ ವದಾಮೀ’’ತಿ [ಮ. ನಿ. ೨.೮೧]. ಅತ್ಥೇವ ಸುತ್ತನ್ತೋತಿ? ಆಮನ್ತಾ. ತೇನ ಹಿ ನ ವತ್ತಬ್ಬಂ – ‘‘ಅಞ್ಞಂ ಕಮ್ಮಂ, ಅಞ್ಞೋ ಕಮ್ಮೂಪಚಯೋ’’ತಿ.

ಕಮ್ಮೂಪಚಯಕಥಾ ನಿಟ್ಠಿತಾ.

ಪನ್ನರಸಮವಗ್ಗೋ.

ತಸ್ಸುದ್ದಾನಂ –

ಪಚ್ಚಯತಾ ವವತ್ಥಿತಾ, ಪಟಿಚ್ಚಸಮುಪ್ಪಾದೋ, ಅದ್ಧಾ, ಖಣೋ ಲಯೋ ಮುಹುತ್ತಂ, ಚತ್ತಾರೋ ಆಸವಾ ಅನಾಸವಾ, ಲೋಕುತ್ತರಾನಂ ಧಮ್ಮಾನಂ ಜರಾಮರಣಂ ಲೋಕುತ್ತರಾ, ಸಞ್ಞಾವೇದಯಿತನಿರೋಧಸಮಾಪತ್ತಿ ಲೋಕುತ್ತರಾ, ಸಞ್ಞಾವೇದಯಿತನಿರೋಧಸಮಾಪತ್ತಿ ಲೋಕಿಯಾ, ಸಞ್ಞಾವೇದಯಿತನಿರೋಧಂ ಸಮಾಪನ್ನೋ ಕಾಲಂ ಕರೇಯ್ಯ, ಸ್ವೇವ ಮಗ್ಗೋ ಅಸಞ್ಞಸತ್ತುಪಪತ್ತಿಯಾ, ಅಞ್ಞಂ ಕಮ್ಮಂ ಅಞ್ಞೋ ಕಮ್ಮೂಪಚಯೋತಿ.

ತತಿಯೋ ಪಣ್ಣಾಸಕೋ.

ತಸ್ಸುದ್ದಾನಂ –

ಅನುಸಯಾ, ಸಂವರೋ, ಕಪ್ಪೋ, ಮೂಲಞ್ಚ ವವತ್ಥಿತಾತಿ.