೧೧. ಏಕಾದಸಮವಗ್ಗೋ

(೧೦೯) ೪. ಞಾಣಕಥಾ

೬೧೪. ಅಞ್ಞಾಣೇ ವಿಗತೇ ಞಾಣವಿಪ್ಪಯುತ್ತೇ ಚಿತ್ತೇ ವತ್ತಮಾನೇ ನ ವತ್ತಬ್ಬಂ – ‘‘ಞಾಣೀ’’ತಿ? ಆಮನ್ತಾ. ರಾಗೇ ವಿಗತೇ ನ ವತ್ತಬ್ಬಂ – ‘‘ವೀತರಾಗೋ’’ತಿ? ನ ಹೇವಂ ವತ್ತಬ್ಬೇ…ಪೇ… ಅಞ್ಞಾಣೇ ವಿಗತೇ ಞಾಣವಿಪ್ಪಯುತ್ತೇ ಚಿತ್ತೇ ವತ್ತಮಾನೇ ನ ವತ್ತಬ್ಬಂ – ‘‘ಞಾಣೀ’’ತಿ? ಆಮನ್ತಾ. ದೋಸೇ ವಿಗತೇ… ಮೋಹೇ ವಿಗತೇ… ಕಿಲೇಸೇ ವಿಗತೇ ನ ವತ್ತಬ್ಬಂ – ‘‘ನಿಕ್ಕಿಲೇಸೋ’’ತಿ? ನ ಹೇವಂ ವತ್ತಬ್ಬೇ…ಪೇ….

ರಾಗೇ ವಿಗತೇ ವತ್ತಬ್ಬಂ – ‘‘ವೀತರಾಗೋ’’ತಿ? ಆಮನ್ತಾ. ಅಞ್ಞಾಣೇ ವಿಗತೇ ಞಾಣವಿಪ್ಪಯುತ್ತೇ ಚಿತ್ತೇ ವತ್ತಮಾನೇ ವತ್ತಬ್ಬಂ – ‘‘ಞಾಣೀ’’ತಿ? ನ ಹೇವಂ ವತ್ತಬ್ಬೇ…ಪೇ… ದೋಸೇ ವಿಗತೇ… ಮೋಹೇ ವಿಗತೇ… ಕಿಲೇಸೇ ವಿಗತೇ ವತ್ತಬ್ಬಂ – ‘‘ನಿಕ್ಕಿಲೇಸೋ’’ತಿ? ಆಮನ್ತಾ. ಅಞ್ಞಾಣೇ ವಿಗತೇ ಞಾಣವಿಪ್ಪಯುತ್ತೇ ಚಿತ್ತೇ ವತ್ತಮಾನೇ ವತ್ತಬ್ಬಂ – ‘‘ಞಾಣೀ’’ತಿ? ನ ಹೇವಂ ವತ್ತಬ್ಬೇ…ಪೇ….

೬೧೫. ಅಞ್ಞಾಣೇ ವಿಗತೇ ಞಾಣವಿಪ್ಪಯುತ್ತೇ ಚಿತ್ತೇ ವತ್ತಮಾನೇ ವತ್ತಬ್ಬಂ – ‘‘ಞಾಣೀ’’ತಿ? ಆಮನ್ತಾ. ಅತೀತೇನ ಞಾಣೇನ ಞಾಣೀ ನಿರುದ್ಧೇನ ವಿಗತೇನ ಪಟಿಪಸ್ಸದ್ಧೇನ ಞಾಣೇನ ಞಾಣೀತಿ? ನ ಹೇವಂ ವತ್ತಬ್ಬೇ…ಪೇ….

ಞಾಣಕಥಾ ನಿಟ್ಠಿತಾ.