೧೦. ದಸಮವಗ್ಗೋ

(೯೬) ೨. ರೂಪಂ ಮಗ್ಗೋತಿಕಥಾ

೫೭೩. ಮಗ್ಗಸಮಙ್ಗಿಸ್ಸ ರೂಪಂ ಮಗ್ಗೋತಿ? ಆಮನ್ತಾ. ಸಾರಮ್ಮಣಂ, ಅತ್ಥಿ ತಸ್ಸ ಆವಟ್ಟನಾ ಆಭೋಗೋ ಸಮನ್ನಾಹಾರೋ ಮನಸಿಕಾರೋ ಚೇತನಾ ಪತ್ಥನಾ ಪಣಿಧೀತಿ? ನ ಹೇವಂ ವತ್ತಬ್ಬೇ…ಪೇ… ನನು ಅನಾರಮ್ಮಣಂ, ನತ್ಥಿ ತಸ್ಸ ಆವಟ್ಟನಾ…ಪೇ… ಪಣಿಧೀತಿ? ಆಮನ್ತಾ. ಹಞ್ಚಿ ಅನಾರಮ್ಮಣಂ, ನತ್ಥಿ ತಸ್ಸ ಆವಟ್ಟನಾ…ಪೇ… ಪಣಿಧಿ; ನೋ ಚ ವತ ರೇ ವತ್ತಬ್ಬೇ – ‘‘ಮಗ್ಗಸಮಙ್ಗಿಸ್ಸ ರೂಪಂ ಮಗ್ಗೋ’’ತಿ.

ಸಮ್ಮಾವಾಚಾ ಮಗ್ಗೋತಿ? ಆಮನ್ತಾ. ಸಾರಮ್ಮಣಾ, ಅತ್ಥಿ ತಾಯ ಆವಟ್ಟನಾ…ಪೇ… ಪಣಿಧೀತಿ? ನ ಹೇವಂ ವತ್ತಬ್ಬೇ…ಪೇ… ನನು ಅನಾರಮ್ಮಣಾ, ನತ್ಥಿ ತಾಯ ಆವಟ್ಟನಾ…ಪೇ… ಪಣಿಧೀತಿ? ಆಮನ್ತಾ. ಹಞ್ಚಿ ಅನಾರಮ್ಮಣಾ, ನತ್ಥಿ ತಾಯ ಆವಟ್ಟನಾ…ಪೇ… ಪಣಿಧಿ; ನೋ ಚ ವತ ರೇ ವತ್ತಬ್ಬೇ – ‘‘ಸಮ್ಮಾವಾಚಾ ಮಗ್ಗೋ’’ತಿ.

ಸಮ್ಮಾಕಮ್ಮನ್ತೋ …ಪೇ… ಸಮ್ಮಾಆಜೀವೋ ಮಗ್ಗೋತಿ? ಆಮನ್ತಾ. ಸಾರಮ್ಮಣೋ, ಅತ್ಥಿ ತಸ್ಸ ಆವಟ್ಟನಾ…ಪೇ… ಪಣಿಧೀತಿ? ನ ಹೇವಂ ವತ್ತಬ್ಬೇ…ಪೇ… ನನು ಅನಾರಮ್ಮಣೋ, ನತ್ಥಿ ತಸ್ಸ ಆವಟ್ಟನಾ…ಪೇ… ಪಣಿಧೀತಿ? ಆಮನ್ತಾ. ಹಞ್ಚಿ ಅನಾರಮ್ಮಣೋ, ನತ್ಥಿ ತಸ್ಸ ಆವಟ್ಟನಾ…ಪೇ… ಪಣಿಧಿ; ನೋ ಚ ವತ ರೇ ವತ್ತಬ್ಬೇ – ‘‘ಸಮ್ಮಾಆಜೀವೋ ಮಗ್ಗೋ’’ತಿ.

೫೭೪. ಸಮ್ಮಾದಿಟ್ಠಿ ಮಗ್ಗೋ, ಸಾ ಚ ಸಾರಮ್ಮಣಾ, ಅತ್ಥಿ ತಾಯ ಆವಟ್ಟನಾ…ಪೇ… ಪಣಿಧೀತಿ? ಆಮನ್ತಾ. ಸಮ್ಮಾವಾಚಾ ಮಗ್ಗೋ, ಸಾ ಚ ಸಾರಮ್ಮಣಾ, ಅತ್ಥಿ ತಾಯ ಆವಟ್ಟನಾ…ಪೇ… ಪಣಿಧೀತಿ? ನ ಹೇವಂ ವತ್ತಬ್ಬೇ …ಪೇ… ಸಮ್ಮಾದಿಟ್ಠಿ ಮಗ್ಗೋ, ಸಾ ಚ ಸಾರಮ್ಮಣಾ, ಅತ್ಥಿ ತಾಯ ಆವಟ್ಟನಾ…ಪೇ… ಪಣಿಧೀತಿ? ಆಮನ್ತಾ. ಸಮ್ಮಾಕಮ್ಮನ್ತೋ…ಪೇ… ಸಮ್ಮಾಆಜೀವೋ ಮಗ್ಗೋ, ಸೋ ಚ ಸಾರಮ್ಮಣೋ, ಅತ್ಥಿ ತಸ್ಸ ಆವಟ್ಟನಾ…ಪೇ… ಪಣಿಧೀತಿ? ನ ಹೇವಂ ವತ್ತಬ್ಬೇ…ಪೇ… ಸಮ್ಮಾಸಙ್ಕಪ್ಪೋ…ಪೇ… ಸಮ್ಮಾವಾಯಾಮೋ…ಪೇ… ಸಮ್ಮಾಸತಿ…ಪೇ….

ಸಮ್ಮಾಸಮಾಧಿ ಮಗ್ಗೋ, ಸೋ ಚ ಸಾರಮ್ಮಣೋ, ಅತ್ಥಿ ತಸ್ಸ ಆವಟ್ಟನಾ…ಪೇ… ಪಣಿಧೀತಿ? ಆಮನ್ತಾ. ಸಮ್ಮಾವಾಚಾ ಮಗ್ಗೋ, ಸಾ ಚ ಸಾರಮ್ಮಣಾ, ಅತ್ಥಿ ತಾಯ ಆವಟ್ಟನಾ…ಪೇ… ಪಣಿಧೀತಿ? ನ ಹೇವಂ ವತ್ತಬ್ಬೇ…ಪೇ… ಸಮ್ಮಾಸಮಾಧಿ ಮಗ್ಗೋ, ಸೋ ಚ ಸಾರಮ್ಮಣೋ, ಅತ್ಥಿ ತಸ್ಸ ಆವಟ್ಟನಾ…ಪೇ… ಪಣಿಧೀತಿ? ಆಮನ್ತಾ. ಸಮ್ಮಾಕಮ್ಮನ್ತೋ…ಪೇ… ಸಮ್ಮಾಆಜೀವೋ ಮಗ್ಗೋ, ಸೋ ಚ ಸಾರಮ್ಮಣೋ, ಅತ್ಥಿ ತಸ್ಸ ಆವಟ್ಟನಾ…ಪೇ… ಪಣಿಧೀತಿ? ನ ಹೇವಂ ವತ್ತಬ್ಬೇ…ಪೇ….

ಸಮ್ಮಾವಾಚಾ ಮಗ್ಗೋ, ಸಾ ಚ ಅನಾರಮ್ಮಣಾ, ನತ್ಥಿ ತಾಯ ಆವಟ್ಟನಾ…ಪೇ… ಪಣಿಧೀತಿ? ಆಮನ್ತಾ. ಸಮ್ಮಾದಿಟ್ಠಿ ಮಗ್ಗೋ, ಸಾ ಚ ಅನಾರಮ್ಮಣಾ, ನತ್ಥಿ ತಾಯ ಆವಟ್ಟನಾ…ಪೇ… ಪಣಿಧೀತಿ? ನ ಹೇವಂ ವತ್ತಬ್ಬೇ…ಪೇ… ಸಮ್ಮಾವಾಚಾ ಮಗ್ಗೋ, ಸಾ ಚ ಅನಾರಮ್ಮಣಾ, ನತ್ಥಿ ತಾಯ ಆವಟ್ಟನಾ…ಪೇ… ಪಣಿಧೀತಿ? ಆಮನ್ತಾ. ಸಮ್ಮಾಸಙ್ಕಪ್ಪೋ…ಪೇ… ಸಮ್ಮಾವಾಯಾಮೋ… ಸಮ್ಮಾಸತಿ … ಸಮ್ಮಾಸಮಾಧಿ ಮಗ್ಗೋ, ಸೋ ಚ ಅನಾರಮ್ಮಣೋ, ನತ್ಥಿ ತಸ್ಸ ಆವಟ್ಟನಾ…ಪೇ… ಪಣಿಧೀತಿ? ನ ಹೇವಂ ವತ್ತಬ್ಬೇ…ಪೇ….

ಸಮ್ಮಾಕಮ್ಮನ್ತೋ …ಪೇ… ಸಮ್ಮಾಆಜೀವೋ ಮಗ್ಗೋ, ಸೋ ಚ ಅನಾರಮ್ಮಣೋ, ನತ್ಥಿ ತಸ್ಸ ಆವಟ್ಟನಾ…ಪೇ… ಪಣಿಧೀತಿ? ಆಮನ್ತಾ. ಸಮ್ಮಾದಿಟ್ಠಿ… ಸಮ್ಮಾಸಙ್ಕಪ್ಪೋ… ಸಮ್ಮಾವಾಯಾಮೋ… ಸಮ್ಮಾಸತಿ…ಪೇ… ಸಮ್ಮಾಸಮಾಧಿ ಮಗ್ಗೋ, ಸೋ ಚ ಅನಾರಮ್ಮಣೋ, ನತ್ಥಿ ತಸ್ಸ ಆವಟ್ಟನಾ…ಪೇ… ಪಣಿಧೀತಿ? ನ ಹೇವಂ ವತ್ತಬ್ಬೇ…ಪೇ….

೫೭೫. ನ ವತ್ತಬ್ಬಂ – ‘‘ಮಗ್ಗಸಮಙ್ಗಿಸ್ಸ ರೂಪಂ ಮಗ್ಗೋ’’ತಿ? ಆಮನ್ತಾ. ನನು ಸಮ್ಮಾವಾಚಾ ಸಮ್ಮಾಕಮ್ಮನ್ತೋ ಸಮ್ಮಾಆಜೀವೋ ಮಗ್ಗೋತಿ? ಆಮನ್ತಾ. ಹಞ್ಚಿ ಸಮ್ಮಾವಾಚಾ ಸಮ್ಮಾಕಮ್ಮನ್ತೋ ಸಮ್ಮಾಆಜೀವೋ ಮಗ್ಗೋ, ತೇನ ವತ ರೇ ವತ್ತಬ್ಬೇ – ‘‘ಮಗ್ಗಸಮಙ್ಗಿಸ್ಸ ರೂಪಂ ಮಗ್ಗೋ’’ತಿ.

ರೂಪಂ ಮಗ್ಗೋತಿಕಥಾ ನಿಟ್ಠಿತಾ.