(೧೦೪) ೧೦. ವಿಞ್ಞತ್ತಿ ಸೀಲನ್ತಿಕಥಾ

೬೦೧. ವಿಞ್ಞತ್ತಿ ಸೀಲನ್ತಿ? ಆಮನ್ತಾ. ಪಾಣಾತಿಪಾತಾ ವೇರಮಣೀತಿ? ನ ಹೇವಂ ವತ್ತಬ್ಬೇ…ಪೇ… ಅದಿನ್ನಾದಾನಾ ವೇರಮಣೀತಿ? ನ ಹೇವಂ ವತ್ತಬ್ಬೇ…ಪೇ… ಕಾಮೇಸುಮಿಚ್ಛಾಚಾರಾ ವೇರಮಣೀತಿ? ನ ಹೇವಂ ವತ್ತಬ್ಬೇ …ಪೇ… ಮುಸಾವಾದಾ ವೇರಮಣೀತಿ? ನ ಹೇವಂ ವತ್ತಬ್ಬೇ…ಪೇ… ಸುರಾಮೇರಯಮಜ್ಜಪಮಾದಟ್ಠಾನಾ ವೇರಮಣೀತಿ? ನ ಹೇವಂ ವತ್ತಬ್ಬೇ…ಪೇ….

ಅಭಿವಾದನಂ ಸೀಲಂ, ಪಚ್ಚುಟ್ಠಾನಂ ಸೀಲಂ, ಅಞ್ಜಲಿಕಮ್ಮಂ ಸೀಲಂ, ಸಾಮೀಚಿಕಮ್ಮಂ ಸೀಲಂ, ಆಸನಾಭಿಹಾರೋ ಸೀಲಂ, ಸೇಯ್ಯಾಭಿಹಾರೋ ಸೀಲಂ, ಪಾದೋದಕಾಭಿಹಾರೋ ಸೀಲಂ, ಪಾದಕಥಲಿಕಾಭಿಹಾರೋ ಸೀಲಂ, ನ್ಹಾನೇ ಪಿಟ್ಠಿಪರಿಕಮ್ಮಂ ಸೀಲನ್ತಿ? ಆಮನ್ತಾ. ಪಾಣಾತಿಪಾತಾ ವೇರಮಣೀತಿ? ನ ಹೇವಂ ವತ್ತಬ್ಬೇ…ಪೇ… ಸುರಾಮೇರಯಮಜ್ಜಪಮಾದಟ್ಠಾನಾ ವೇರಮಣೀತಿ? ನ ಹೇವಂ ವತ್ತಬ್ಬೇ…ಪೇ….

೬೦೨. ನ ವತ್ತಬ್ಬಂ – ‘‘ವಿಞ್ಞತ್ತಿ ಸೀಲ’’ನ್ತಿ? ಆಮನ್ತಾ. ದುಸ್ಸಿಲ್ಯನ್ತಿ? ನ ಹೇವಂ ವತ್ತಬ್ಬೇ…ಪೇ… ತೇನ ಹಿ ವಿಞ್ಞತ್ತಿ ಸೀಲನ್ತಿ.

ವಿಞ್ಞತ್ತಿ ಸೀಲನ್ತಿಕಥಾ ನಿಟ್ಠಿತಾ.