(೯೨) ೯. ನ ಯಥಾಚಿತ್ತಸ್ಸ ವಾಚಾತಿಕಥಾ

೫೬೪. ನ ಯಥಾಚಿತ್ತಸ್ಸ ವಾಚಾತಿ? ಆಮನ್ತಾ. ಅಫಸ್ಸಕಸ್ಸ ವಾಚಾ ಅವೇದನಕಸ್ಸ ವಾಚಾ ಅಸಞ್ಞಕಸ್ಸ ವಾಚಾ ಅಚೇತನಕಸ್ಸ ವಾಚಾ ಅಚಿತ್ತಕಸ್ಸ ವಾಚಾತಿ? ನ ಹೇವಂ ವತ್ತಬ್ಬೇ…ಪೇ… ನನು ಸಫಸ್ಸಕಸ್ಸ ವಾಚಾ ಸವೇದನಕಸ್ಸ ವಾಚಾ ಸಸಞ್ಞಕಸ್ಸ ವಾಚಾ ಸಚೇತನಕಸ್ಸ ವಾಚಾ ಸಚಿತ್ತಕಸ್ಸ ವಾಚಾತಿ? ಆಮನ್ತಾ. ಹಞ್ಚಿ ಸಫಸ್ಸಕಸ್ಸ ವಾಚಾ…ಪೇ… ಸಚಿತ್ತಕಸ್ಸ ವಾಚಾ, ನೋ ಚ ವತ ರೇ ವತ್ತಬ್ಬೇ – ‘‘ನ ಯಥಾಚಿತ್ತಸ್ಸ ವಾಚಾ’’ತಿ.

ನ ಯಥಾಚಿತ್ತಸ್ಸ ವಾಚಾತಿ? ಆಮನ್ತಾ. ಅನಾವಟ್ಟೇನ್ತಸ್ಸ [ಅನಾವಟ್ಟನ್ತಸ್ಸ (ಪೀ.), ಅನಾವಜ್ಜನ್ತಸ್ಸ (ಸೀ. ಸ್ಯಾ. ಕ.) ಕಥಾ. ೪೮೪ ಪಸ್ಸಿತಬ್ಬಂ] ವಾಚಾ…ಪೇ… ಅನಾಭೋಗಸ್ಸ ವಾಚಾ…ಪೇ… ಅಪ್ಪಣಿದಹನ್ತಸ್ಸ ವಾಚಾತಿ? ನ ಹೇವಂ ವತ್ತಬ್ಬೇ…ಪೇ… ನನು ಆವಟ್ಟೇನ್ತಸ್ಸ ವಾಚಾ ಆಭೋಗಸ್ಸ ವಾಚಾ…ಪೇ… ಪಣಿದಹನ್ತಸ್ಸ ವಾಚಾತಿ? ಆಮನ್ತಾ. ಹಞ್ಚಿ ಆವಟ್ಟೇನ್ತಸ್ಸ ವಾಚಾ ಆಭೋಗಸ್ಸ ವಾಚಾ ಪಣಿದಹನ್ತಸ್ಸ ವಾಚಾ, ನೋ ಚ ವತ ರೇ ವತ್ತಬ್ಬೇ – ‘‘ನ ಯಥಾಚಿತ್ತಸ್ಸ ವಾಚಾ’’ತಿ.

ನ ಯಥಾಚಿತ್ತಸ್ಸ ವಾಚಾತಿ? ಆಮನ್ತಾ. ನನು ವಾಚಾ ಚಿತ್ತಸಮುಟ್ಠಾನಾ ಚಿತ್ತೇನ ಸಹಜಾತಾ ಚಿತ್ತೇನ ಸಹ ಏಕುಪ್ಪಾದಾತಿ? ಆಮನ್ತಾ. ಹಞ್ಚಿ ವಾಚಾ ಚಿತ್ತಸಮುಟ್ಠಾನಾ ಚಿತ್ತೇನ ಸಹಜಾತಾ ಚಿತ್ತೇನ ಸಹ ಏಕುಪ್ಪಾದಾ, ನೋ ಚ ವತ ರೇ ವತ್ತಬ್ಬೇ – ‘‘ನ ಯಥಾಚಿತ್ತಸ್ಸ ವಾಚಾ’’ತಿ.

ನ ಯಥಾಚಿತ್ತಸ್ಸ ವಾಚಾತಿ? ಆಮನ್ತಾ. ನ ಭಣಿತುಕಾಮೋ ಭಣತಿ, ನ ಕಥೇತುಕಾಮೋ ಕಥೇತಿ, ನ ಆಲಪಿತುಕಾಮೋ ಆಲಪತಿ, ನ ವೋಹರಿತುಕಾಮೋ ವೋಹರತೀತಿ? ನ ಹೇವಂ ವತ್ತಬ್ಬೇ…ಪೇ… ನನು ಭಣಿತುಕಾಮೋ ಭಣತಿ, ಕಥೇತುಕಾಮೋ ಕಥೇತಿ, ಆಲಪಿತುಕಾಮೋ ಆಲಪತಿ, ವೋಹರಿತುಕಾಮೋ ವೋಹರತೀತಿ? ಆಮನ್ತಾ. ಹಞ್ಚಿ ಭಣಿತುಕಾಮೋ ಭಣತಿ, ಕಥೇತುಕಾಮೋ ಕಥೇತಿ, ಆಲಪಿತುಕಾಮೋ ಆಲಪತಿ, ವೋಹರಿತುಕಾಮೋ ವೋಹರತಿ, ನೋ ಚ ವತ ರೇ ವತ್ತಬ್ಬೇ – ‘‘ನ ಯಥಾಚಿತ್ತಸ್ಸ ವಾಚಾ’’ತಿ.

೫೬೫. ನ ವತ್ತಬ್ಬಂ – ‘‘ನ ಯಥಾಚಿತ್ತಸ್ಸ ವಾಚಾ’’ತಿ? ಆಮನ್ತಾ. ನನು ಅತ್ಥಿ ಕೋಚಿ ‘‘ಅಞ್ಞಂ ಭಣಿಸ್ಸಾಮೀ’’ತಿ ಅಞ್ಞಂ ಭಣತಿ, ‘‘ಅಞ್ಞಂ ಕಥೇಸ್ಸಾಮೀ’’ತಿ ಅಞ್ಞಂ ಕಥೇತಿ, ‘‘ಅಞ್ಞಂ ಆಲಪಿಸ್ಸಾಮೀ’’ತಿ ಅಞ್ಞಂ ಆಲಪತಿ, ‘‘ಅಞ್ಞಂ ವೋಹರಿಸ್ಸಾಮೀ’’ತಿ ಅಞ್ಞಂ ವೋಹರತೀತಿ? ಆಮನ್ತಾ. ಹಞ್ಚಿ ಅತ್ಥಿ ಕೋಚಿ ‘‘ಅಞ್ಞಂ ಭಣಿಸ್ಸಾಮೀ’’ತಿ ಅಞ್ಞಂ ಭಣತಿ,…ಪೇ… ‘‘ಅಞ್ಞಂ ವೋಹರಿಸ್ಸಾಮೀ’’ತಿ ಅಞ್ಞಂ ವೋಹರತಿ, ತೇನ ವತ ರೇ ವತ್ತಬ್ಬೇ – ‘‘ನ ಯಥಾಚಿತ್ತಸ್ಸ ವಾಚಾ’’ತಿ.

ನ ಯಥಾಚಿತ್ತಸ್ಸ ವಾಚಾತಿಕಥಾ ನಿಟ್ಠಿತಾ.