೯. ನವಮವಗ್ಗೋ

(೯೩) ೧೦. ನ ಯಥಾಚಿತ್ತಸ್ಸ ಕಾಯಕಮ್ಮನ್ತಿಕಥಾ

೫೬೬. ನ ಯಥಾಚಿತ್ತಸ್ಸ ಕಾಯಕಮ್ಮನ್ತಿ? ಆಮನ್ತಾ. ಅಫಸ್ಸಕಸ್ಸ ಕಾಯಕಮ್ಮಂ…ಪೇ… ಅಚಿತ್ತಕಸ್ಸ ಕಾಯಕಮ್ಮನ್ತಿ? ನ ಹೇವಂ ವತ್ತಬ್ಬೇ…ಪೇ… ನನು ಸಫಸ್ಸಕಸ್ಸ ಕಾಯಕಮ್ಮಂ…ಪೇ… ಸಚಿತ್ತಕಸ್ಸ ಕಾಯಕಮ್ಮನ್ತಿ? ಆಮನ್ತಾ. ಹಞ್ಚಿ ಸಫಸ್ಸಕಸ್ಸ ಕಾಯಕಮ್ಮಂ…ಪೇ… ಸಚಿತ್ತಕಸ್ಸ ಕಾಯಕಮ್ಮಂ, ನೋ ಚ ವತ ರೇ ವತ್ತಬ್ಬೇ – ‘‘ನ ಯಥಾಚಿತ್ತಸ್ಸ ಕಾಯಕಮ್ಮ’’ನ್ತಿ.

ನ ಯಥಾಚಿತ್ತಸ್ಸ ಕಾಯಕಮ್ಮನ್ತಿ? ಆಮನ್ತಾ. ಅನಾವಟ್ಟೇನ್ತಸ್ಸ ಕಾಯಕಮ್ಮಂ…ಪೇ… ಅಪ್ಪಣಿದಹನ್ತಸ್ಸ ಕಾಯಕಮ್ಮನ್ತಿ? ನ ಹೇವಂ ವತ್ತಬ್ಬೇ…ಪೇ… ನನು ಆವಟ್ಟೇನ್ತಸ್ಸ ಕಾಯಕಮ್ಮಂ…ಪೇ… ಪಣಿದಹನ್ತಸ್ಸ ಕಾಯಕಮ್ಮನ್ತಿ? ಆಮನ್ತಾ. ಹಞ್ಚಿ ಆವಟ್ಟೇನ್ತಸ್ಸ ಕಾಯಕಮ್ಮಂ…ಪೇ… ಪಣಿದಹನ್ತಸ್ಸ ಕಾಯಕಮ್ಮಂ, ನೋ ಚ ವತ ರೇ ವತ್ತಬ್ಬೇ – ‘‘ನ ಯಥಾಚಿತ್ತಸ್ಸ ಕಾಯಕಮ್ಮ’’ನ್ತಿ.

ನ ಯಥಾಚಿತ್ತಸ್ಸ ಕಾಯಕಮ್ಮನ್ತಿ? ಆಮನ್ತಾ. ನನು ಕಾಯಕಮ್ಮಂ ಚಿತ್ತಸಮುಟ್ಠಾನಂ ಚಿತ್ತೇನ ಸಹಜಾತಂ ಚಿತ್ತೇನ ಸಹ ಏಕುಪ್ಪಾದನ್ತಿ? ಆಮನ್ತಾ. ಹಞ್ಚಿ ಕಾಯಕಮ್ಮಂ ಚಿತ್ತಸಮುಟ್ಠಾನಂ ಚಿತ್ತೇನ ಸಹಜಾತಂ ಚಿತ್ತೇನ ಸಹ ಏಕುಪ್ಪಾದಂ, ನೋ ಚ ವತ ರೇ ವತ್ತಬ್ಬೇ – ‘‘ನ ಯಥಾಚಿತ್ತಸ್ಸ ಕಾಯಕಮ್ಮ’’ನ್ತಿ.

ನ ಯಥಾಚಿತ್ತಸ್ಸ ಕಾಯಕಮ್ಮನ್ತಿ? ಆಮನ್ತಾ. ನ ಅಭಿಕ್ಕಮಿತುಕಾಮೋ ಅಭಿಕ್ಕಮತಿ, ನ ಪಟಿಕ್ಕಮಿತುಕಾಮೋ ಪಟಿಕ್ಕಮತಿ, ನ ಆಲೋಕೇತುಕಾಮೋ ಆಲೋಕೇತಿ, ನ ವಿಲೋಕೇತುಕಾಮೋ ವಿಲೋಕೇತಿ, ನ ಸಮಿಞ್ಜಿತುಕಾಮೋ ಸಮಿಞ್ಜೇತಿ, ನ ಪಸಾರೇತುಕಾಮೋ ಪಸಾರೇತೀತಿ? ನ ಹೇವಂ ವತ್ತಬ್ಬೇ…ಪೇ…. ನನು ಅಭಿಕ್ಕಮಿತುಕಾಮೋ ಅಭಿಕ್ಕಮತಿ, ಪಟಿಕ್ಕಮಿತುಕಾಮೋ ಪಟಿಕ್ಕಮತಿ, ಆಲೋಕೇತುಕಾಮೋ ಆಲೋಕೇತಿ, ವಿಲೋಕೇತುಕಾಮೋ ವಿಲೋಕೇತಿ, ಸಮಿಞ್ಜಿತುಕಾಮೋ ಸಮಿಞ್ಜೇತಿ, ಪಸಾರೇತುಕಾಮೋ ಪಸಾರೇತೀತಿ? ಆಮನ್ತಾ. ಹಞ್ಚಿ ಅಭಿಕ್ಕಮಿತುಕಾಮೋ ಅಭಿಕ್ಕಮತಿ…ಪೇ… ಪಸಾರೇತುಕಾಮೋ ಪಸಾರೇತಿ, ನೋ ಚ ವತ ರೇ ವತ್ತಬ್ಬೇ – ‘‘ನ ಯಥಾಚಿತ್ತಸ್ಸ ಕಾಯಕಮ್ಮ’’ನ್ತಿ.

೫೬೭. ನ ವತ್ತಬ್ಬಂ – ‘‘ನ ಯಥಾಚಿತ್ತಸ್ಸ ಕಾಯಕಮ್ಮ’’ನ್ತಿ? ಆಮನ್ತಾ. ನನು ಅತ್ಥಿ ಕೋಚಿ ‘‘ಅಞ್ಞತ್ರ ಗಚ್ಛಿಸ್ಸಾಮೀ’’ತಿ ಅಞ್ಞತ್ರ ಗಚ್ಛತಿ…ಪೇ… ‘‘ಅಞ್ಞಂ ಪಸಾರೇಸ್ಸಾಮೀ’’ತಿ ಅಞ್ಞಂ ಪಸಾರೇತೀತಿ? ಆಮನ್ತಾ. ಹಞ್ಚಿ ಅತ್ಥಿ ಕೋಚಿ ‘‘ಅಞ್ಞತ್ರ ಗಚ್ಛಿಸ್ಸಾಮೀ’’ತಿ ಅಞ್ಞತ್ರ ಗಚ್ಛತಿ…ಪೇ… ‘‘ಅಞ್ಞಂ ಪಸಾರೇಸ್ಸಾಮೀ’’ತಿ ಅಞ್ಞಂ ಪಸಾರೇತಿ, ತೇನ ವತ ರೇ ವತ್ತಬ್ಬೇ – ‘‘ನ ಯಥಾಚಿತ್ತಸ್ಸ ಕಾಯಕಮ್ಮ’’ನ್ತಿ.

ನ ಯಥಾಚಿತ್ತಸ್ಸ ಕಾಯಕಮ್ಮನ್ತಿಕಥಾ ನಿಟ್ಠಿತಾ.