(೯೪) ೧೧. ಅತೀತಾನಾಗತಸಮನ್ನಾಗತಕಥಾ

೫೬೮. ಅತೀತೇನ ಸಮನ್ನಾಗತೋತಿ? ಆಮನ್ತಾ. ನನು ಅತೀತಂ ನಿರುದ್ಧಂ ವಿಗತಂ ವಿಪರಿಣತಂ ಅತ್ಥಙ್ಗತಂ ಅಬ್ಭತ್ಥಙ್ಗತನ್ತಿ? ಆಮನ್ತಾ. ಹಞ್ಚಿ ಅತೀತಂ ನಿರುದ್ಧಂ ವಿಗತಂ ವಿಪರಿಣತಂ ಅತ್ಥಙ್ಗತಂ ಅಬ್ಭತ್ಥಙ್ಗತಂ, ನೋ ಚ ವತ ರೇ ವತ್ತಬ್ಬೇ – ‘‘ಅತೀತೇನ ಸಮನ್ನಾಗತೋ’’ತಿ.

ಅನಾಗತೇನ ಸಮನ್ನಾಗತೋತಿ? ಆಮನ್ತಾ. ನನು ಅನಾಗತಂ ಅಜಾತಂ ಅಭೂತಂ ಅಸಞ್ಜಾತಂ ಅನಿಬ್ಬತ್ತಂ ಅನಭಿನಿಬ್ಬತ್ತಂ ಅಪಾತುಭೂತನ್ತಿ? ಆಮನ್ತಾ. ಹಞ್ಚಿ ಅನಾಗತಂ ಅಜಾತಂ ಅಭೂತಂ ಅಸಞ್ಜಾತಂ ಅನಿಬ್ಬತ್ತಂ ಅನಭಿನಿಬ್ಬತ್ತಂ ಅಪಾತುಭೂತಂ, ನೋ ಚ ವತ ರೇ ವತ್ತಬ್ಬೇ – ‘‘ಅನಾಗತೇನ ಸಮನ್ನಾಗತೋ’’ತಿ.

೫೬೯. ಅತೀತೇನ ರೂಪಕ್ಖನ್ಧೇನ ಸಮನ್ನಾಗತೋ, ಅನಾಗತೇನ ರೂಪಕ್ಖನ್ಧೇನ ಸಮನ್ನಾಗತೋ, ಪಚ್ಚುಪ್ಪನ್ನೇನ ರೂಪಕ್ಖನ್ಧೇನ ಸಮನ್ನಾಗತೋತಿ? ಆಮನ್ತಾ. ತೀಹಿ ರೂಪಕ್ಖನ್ಧೇಹಿ ಸಮನ್ನಾಗತೋತಿ? ನ ಹೇವಂ ವತ್ತಬ್ಬೇ…ಪೇ… ಅತೀತೇಹಿ ಪಞ್ಚಹಿ ಖನ್ಧೇಹಿ ಸಮನ್ನಾಗತೋ, ಅನಾಗತೇಹಿ ಪಞ್ಚಹಿ ಖನ್ಧೇಹಿ ಸಮನ್ನಾಗತೋ, ಪಚ್ಚುಪ್ಪನ್ನೇಹಿ ಪಞ್ಚಹಿ ಖನ್ಧೇಹಿ ಸಮನ್ನಾಗತೋತಿ? ಆಮನ್ತಾ. ಪನ್ನರಸಹಿ ಖನ್ಧೇಹಿ ಸಮನ್ನಾಗತೋತಿ? ನ ಹೇವಂ ವತ್ತಬ್ಬೇ…ಪೇ….

ಅತೀತೇನ ಚಕ್ಖಾಯತನೇನ ಸಮನ್ನಾಗತೋ, ಅನಾಗತೇನ ಚಕ್ಖಾಯತನೇನ ಸಮನ್ನಾಗತೋ, ಪಚ್ಚುಪ್ಪನ್ನೇನ ಚಕ್ಖಾಯತನೇನ ಸಮನ್ನಾಗತೋತಿ? ಆಮನ್ತಾ. ತೀಹಿ ಚಕ್ಖಾಯತನೇಹಿ ಸಮನ್ನಾಗತೋತಿ? ನ ಹೇವಂ ವತ್ತಬ್ಬೇ…ಪೇ… ಅತೀತೇಹಿ ದ್ವಾದಸಹಿ ಆಯತನೇಹಿ ಸಮನ್ನಾಗತೋ, ಅನಾಗತೇಹಿ ದ್ವಾದಸಹಿ ಆಯತನೇಹಿ ಸಮನ್ನಾಗತೋ, ಪಚ್ಚುಪ್ಪನ್ನೇಹಿ ದ್ವಾದಸಹಿ ಆಯತನೇಹಿ ಸಮನ್ನಾಗತೋತಿ? ಆಮನ್ತಾ. ಛತ್ತಿಂಸಾಯತನೇಹಿ ಸಮನ್ನಾಗತೋತಿ? ನ ಹೇವಂ ವತ್ತಬ್ಬೇ…ಪೇ….

ಅತೀತಾಯ ಚಕ್ಖುಧಾತುಯಾ ಸಮನ್ನಾಗತೋ, ಅನಾಗತಾಯ ಚಕ್ಖುಧಾತುಯಾ ಸಮನ್ನಾಗತೋ, ಪಚ್ಚುಪ್ಪನ್ನಾಯ ಚಕ್ಖುಧಾತುಯಾ ಸಮನ್ನಾಗತೋತಿ? ಆಮನ್ತಾ. ತೀಹಿ ಚಕ್ಖುಧಾತೂಹಿ ಸಮನ್ನಾಗತೋತಿ? ನ ಹೇವಂ ವತ್ತಬ್ಬೇ…ಪೇ… ಅತೀತಾಹಿ ಅಟ್ಠಾರಸಹಿ ಧಾತೂಹಿ ಸಮನ್ನಾಗತೋ, ಅನಾಗತಾಹಿ ಅಟ್ಠಾರಸಹಿ ಧಾತೂಹಿ ಸಮನ್ನಾಗತೋ, ಪಚ್ಚುಪ್ಪನ್ನಾಹಿ ಅಟ್ಠಾರಸಹಿ ಧಾತೂಹಿ ಸಮನ್ನಾಗತೋತಿ? ಆಮನ್ತಾ. ಚತುಪಞ್ಞಾಸಧಾತೂಹಿ ಸಮನ್ನಾಗತೋತಿ? ನ ಹೇವಂ ವತ್ತಬ್ಬೇ…ಪೇ….

ಅತೀತೇನ ಚಕ್ಖುನ್ದ್ರಿಯೇನ ಸಮನ್ನಾಗತೋ, ಅನಾಗತೇನ ಚಕ್ಖುನ್ದ್ರಿಯೇನ ಸಮನ್ನಾಗತೋ, ಪಚ್ಚುಪ್ಪನ್ನೇನ ಚಕ್ಖುನ್ದ್ರಿಯೇನ ಸಮನ್ನಾಗತೋತಿ? ಆಮನ್ತಾ. ತೀಹಿ ಚಕ್ಖುನ್ದ್ರಿಯೇಹಿ ಸಮನ್ನಾಗತೋತಿ? ನ ಹೇವಂ ವತ್ತಬ್ಬೇ…ಪೇ… ಅತೀತೇಹಿ ಬಾವೀಸತಿನ್ದ್ರಿಯೇಹಿ ಸಮನ್ನಾಗತೋ, ಅನಾಗತೇಹಿ ಬಾವೀಸತಿನ್ದ್ರಿಯೇಹಿ ಸಮನ್ನಾಗತೋ, ಪಚ್ಚುಪ್ಪನ್ನೇಹಿ ಬಾವೀಸತಿನ್ದ್ರಿಯೇಹಿ ಸಮನ್ನಾಗತೋತಿ? ಆಮನ್ತಾ. ಛಸಟ್ಠಿನ್ದ್ರಿಯೇಹಿ ಸಮನ್ನಾಗತೋತಿ? ನ ಹೇವಂ ವತ್ತಬ್ಬೇ…ಪೇ….

೫೭೦. ನ ವತ್ತಬ್ಬಂ – ‘‘ಅತೀತಾನಾಗತೇಹಿ ಸಮನ್ನಾಗತೋ’’ತಿ? ಆಮನ್ತಾ. ನನು ಅತ್ಥಿ ಅಟ್ಠವಿಮೋಕ್ಖಝಾಯೀ ಚತುನ್ನಂ ಝಾನಾನಂ ನಿಕಾಮಲಾಭೀ ನವನ್ನಂ ಅನುಪುಬ್ಬವಿಹಾರಸಮಾಪತ್ತೀನಂ ಲಾಭೀತಿ? ಆಮನ್ತಾ. ಹಞ್ಚಿ ಅತ್ಥಿ ಅಟ್ಠವಿಮೋಕ್ಖಝಾಯೀ ಚತುನ್ನಂ ಝಾನಾನಂ ನಿಕಾಮಲಾಭೀ ನವನ್ನಂ ಅನುಪುಬ್ಬವಿಹಾರಸಮಾಪತ್ತೀನಂ ಲಾಭೀ, ತೇನ ವತ ರೇ ವತ್ತಬ್ಬೇ – ‘‘ಅತೀತಾನಾಗತೇಹಿ ಸಮನ್ನಾಗತೋ’’ತಿ.

ಅತೀತಾನಾಗತಸಮನ್ನಾಗತಕಥಾ ನಿಟ್ಠಿತಾ.

ನವಮವಗ್ಗೋ.

ತಸ್ಸುದ್ದಾನಂ –

ಆನಿಸಂಸದಸ್ಸಾವಿಸ್ಸ ಸಂಯೋಜನಾನಂ ಪಹಾನಂ, ಅಮತಾರಮ್ಮಣಂ ಸಂಯೋಜನಂ, ರೂಪಂ ಸಾರಮ್ಮಣಂ, ಅನುಸಯಾ ಅನಾರಮ್ಮಣಾ, ಏವಮೇವಂ ಞಾಣಂ, ಅತೀತಾನಾಗತಾರಮ್ಮಣಂ ಚಿತ್ತಂ, ಸಬ್ಬಂ ಚಿತ್ತಂ ವಿತಕ್ಕಾನುಪತಿತಂ, ಸಬ್ಬಸೋ ವಿತಕ್ಕಯತೋ ವಿಚಾರಯತೋ ವಿತಕ್ಕವಿಪ್ಫಾರೋ ಸದ್ದೋ, ನ ಯಥಾಚಿತ್ತಸ್ಸ ವಾಚಾ, ತಥೇವ ಕಾಯಕಮ್ಮಂ ಅತೀತಾನಾಗತೇಹಿ ಸಮನ್ನಾಗತೋತಿ.