(೮೧) ೯. ರೂಪಂ ಕಮ್ಮನ್ತಿಕಥಾ

೫೨೭. ಕುಸಲೇನ ಚಿತ್ತೇನ ಸಮುಟ್ಠಿತಂ ಕಾಯಕಮ್ಮಂ ರೂಪಂ ಕುಸಲನ್ತಿ? ಆಮನ್ತಾ. ಸಾರಮ್ಮಣಂ, ಅತ್ಥಿ ತಸ್ಸ ಆವಟ್ಟನಾ ಆಭೋಗೋ ಸಮನ್ನಾಹಾರೋ ಮನಸಿಕಾರೋ ಚೇತನಾ ಪತ್ಥನಾ ಪಣಿಧೀತಿ? ನ ಹೇವಂ ವತ್ತಬ್ಬೇ…ಪೇ… ನನು ಅನಾರಮ್ಮಣಂ, ನತ್ಥಿ ತಸ್ಸ ಆವಟ್ಟನಾ ಆಭೋಗೋ ಸಮನ್ನಾಹಾರೋ ಮನಸಿಕಾರೋ ಚೇತನಾ ಪತ್ಥನಾ ಪಣಿಧೀತಿ? ಆಮನ್ತಾ. ಹಞ್ಚಿ ಅನಾರಮ್ಮಣಂ, ನತ್ಥಿ ತಸ್ಸ ಆವಟ್ಟನಾ…ಪೇ… ಪಣಿಧೀತಿ, ನೋ ಚ ವತ ರೇ ವತ್ತಬ್ಬೇ – ‘‘ಕುಸಲೇನ ಚಿತ್ತೇನ ಸಮುಟ್ಠಿತಂ ಕಾಯಕಮ್ಮಂ ರೂಪಂ ಕುಸಲ’’ನ್ತಿ.

ಕುಸಲೇನ ಚಿತ್ತೇನ ಸಮುಟ್ಠಿತೋ ಫಸ್ಸೋ ಕುಸಲೋ ಸಾರಮ್ಮಣೋ, ಅತ್ಥಿ ತಸ್ಸ ಆವಟ್ಟನಾ…ಪೇ… ಪಣಿಧೀತಿ? ಆಮನ್ತಾ. ಕುಸಲೇನ ಚಿತ್ತೇನ ಸಮುಟ್ಠಿತಂ ಕಾಯಕಮ್ಮಂ ರೂಪಂ ಕುಸಲಂ ಸಾರಮ್ಮಣಂ, ಅತ್ಥಿ ತಸ್ಸ ಆವಟ್ಟನಾ…ಪೇ… ಪಣಿಧೀತಿ? ನ ಹೇವಂ ವತ್ತಬ್ಬೇ…ಪೇ… ಕುಸಲೇನ ಚಿತ್ತೇನ ಸಮುಟ್ಠಿತಾ ವೇದನಾ…ಪೇ… ಸಞ್ಞಾ… ಚೇತನಾ… ಸದ್ಧಾ… ವೀರಿಯಂ… ಸತಿ… ಸಮಾಧಿ…ಪೇ… ಪಞ್ಞಾ ಕುಸಲಾ ಸಾರಮ್ಮಣಾ, ಅತ್ಥಿ ತಾಯ ಆವಟ್ಟನಾ…ಪೇ… ಪಣಿಧೀತಿ? ಆಮನ್ತಾ. ಕುಸಲೇನ ಚಿತ್ತೇನ ಸಮುಟ್ಠಿತಂ ಕಾಯಕಮ್ಮಂ ರೂಪಂ ಕುಸಲಂ ಸಾರಮ್ಮಣಂ, ಅತ್ಥಿ ತಸ್ಸ ಆವಟ್ಟನಾ…ಪೇ… ಪಣಿಧೀತಿ? ನ ಹೇವಂ ವತ್ತಬ್ಬೇ…ಪೇ….

ಕುಸಲೇನ ಚಿತ್ತೇನ ಸಮುಟ್ಠಿತಂ ಕಾಯಕಮ್ಮಂ ರೂಪಂ ಕುಸಲಂ ಅನಾರಮ್ಮಣಂ, ನತ್ಥಿ ತಸ್ಸ ಆವಟ್ಟನಾ…ಪೇ… ಪಣಿಧೀತಿ? ಆಮನ್ತಾ. ಕುಸಲೇನ ಚಿತ್ತೇನ ಸಮುಟ್ಠಿತೋ ಫಸ್ಸೋ ಕುಸಲೋ ಅನಾರಮ್ಮಣೋ, ನತ್ಥಿ ತಸ್ಸ ಆವಟ್ಟನಾ…ಪೇ… ಪಣಿಧೀತಿ? ನ ಹೇವಂ ವತ್ತಬ್ಬೇ…ಪೇ… ಕುಸಲೇನ ಚಿತ್ತೇನ ಸಮುಟ್ಠಿತಂ ಕಾಯಕಮ್ಮಂ ರೂಪಂ ಕುಸಲಂ ಅನಾರಮ್ಮಣಂ, ನತ್ಥಿ ತಸ್ಸ ಆವಟ್ಟನಾ…ಪೇ… ಪಣಿಧೀತಿ? ಆಮನ್ತಾ. ಕುಸಲೇನ ಚಿತ್ತೇನ ಸಮುಟ್ಠಿತಾ ವೇದನಾ…ಪೇ… ಸಞ್ಞಾ… ಚೇತನಾ… ಸದ್ಧಾ… ವೀರಿಯಂ… ಸತಿ… ಸಮಾಧಿ…ಪೇ… ಪಞ್ಞಾ ಕುಸಲಾ ಅನಾರಮ್ಮಣಾ, ನತ್ಥಿ ತಾಯ ಆವಟ್ಟನಾ…ಪೇ… ಪಣಿಧೀತಿ? ನ ಹೇವಂ ವತ್ತಬ್ಬೇ…ಪೇ….

೫೨೮. ಕುಸಲೇನ ಚಿತ್ತೇನ ಸಮುಟ್ಠಿತಂ ಕಾಯಕಮ್ಮಂ ರೂಪಂ ಕುಸಲನ್ತಿ? ಆಮನ್ತಾ. ಯಂ ಕಿಞ್ಚಿ ಕುಸಲೇನ ಚಿತ್ತೇನ ಸಮುಟ್ಠಿತಂ ರೂಪಂ ಸಬ್ಬಂ ತಂ ಕುಸಲನ್ತಿ? ನ ಹೇವಂ ವತ್ತಬ್ಬೇ…ಪೇ….

ಕುಸಲೇನ ಚಿತ್ತೇನ ಸಮುಟ್ಠಿತಂ ಕಾಯಕಮ್ಮಂ ರೂಪಂ ಕುಸಲನ್ತಿ? ಆಮನ್ತಾ. ಕುಸಲೇನ ಚಿತ್ತೇನ ಸಮುಟ್ಠಿತಂ ರೂಪಾಯತನಂ ಕುಸಲನ್ತಿ? ನ ಹೇವಂ ವತ್ತಬ್ಬೇ…ಪೇ… ಕುಸಲೇನ ಚಿತ್ತೇನ ಸಮುಟ್ಠಿತಂ ಕಾಯಕಮ್ಮಂ ರೂಪಂ ಕುಸಲನ್ತಿ? ಆಮನ್ತಾ. ಕುಸಲೇನ ಚಿತ್ತೇನ ಸಮುಟ್ಠಿತಂ ಸದ್ದಾಯತನಂ…ಪೇ… ಗನ್ಧಾಯತನಂ… ರಸಾಯತನಂ… ಫೋಟ್ಠಬ್ಬಾಯತನಂ…ಪೇ… ಪಥವೀಧಾತು … ಆಪೋಧಾತು… ತೇಜೋಧಾತು…ಪೇ… ವಾಯೋಧಾತು ಕುಸಲಾತಿ? ನ ಹೇವಂ ವತ್ತಬ್ಬೇ…ಪೇ….

ಕುಸಲೇನ ಚಿತ್ತೇನ ಸಮುಟ್ಠಿತಂ ರೂಪಾಯತನಂ ಅಬ್ಯಾಕತನ್ತಿ? ಆಮನ್ತಾ. ಕುಸಲೇನ ಚಿತ್ತೇನ ಸಮುಟ್ಠಿತಂ ಕಾಯಕಮ್ಮಂ ರೂಪಂ ಅಬ್ಯಾಕತನ್ತಿ? ನ ಹೇವಂ ವತ್ತಬ್ಬೇ…ಪೇ… ಕುಸಲೇನ ಚಿತ್ತೇನ ಸಮುಟ್ಠಿತಂ ಸದ್ದಾಯತನಂ…ಪೇ… ಗನ್ಧಾಯತನಂ… ರಸಾಯತನಂ… ಫೋಟ್ಠಬ್ಬಾಯತನಂ…ಪೇ… ಪಥವೀಧಾತು… ಆಪೋಧಾತು … ತೇಜೋಧಾತು …ಪೇ… ವಾಯೋಧಾತು ಅಬ್ಯಾಕತಾತಿ? ಆಮನ್ತಾ. ಕುಸಲೇನ ಚಿತ್ತೇನ ಸಮುಟ್ಠಿತಂ ಕಾಯಕಮ್ಮಂ ರೂಪಂ ಅಬ್ಯಾಕತನ್ತಿ? ನ ಹೇವಂ ವತ್ತಬ್ಬೇ…ಪೇ….

೫೨೯. ಕುಸಲೇನ ಚಿತ್ತೇನ ಸಮುಟ್ಠಿತಂ ಕಾಯಕಮ್ಮಂ ರೂಪಂ ಅನಾರಮ್ಮಣಂ ಕುಸಲನ್ತಿ? ಆಮನ್ತಾ. ಕುಸಲೇನ ಚಿತ್ತೇನ ಸಮುಟ್ಠಿತಂ ರೂಪಾಯತನಂ ಅನಾರಮ್ಮಣಂ ಕುಸಲನ್ತಿ? ನ ಹೇವಂ ವತ್ತಬ್ಬೇ…ಪೇ… ಕುಸಲೇನ ಚಿತ್ತೇನ ಸಮುಟ್ಠಿತಂ ಕಾಯಕಮ್ಮಂ ರೂಪಂ ಅನಾರಮ್ಮಣಂ ಕುಸಲನ್ತಿ? ಆಮನ್ತಾ. ಕುಸಲೇನ ಚಿತ್ತೇನ ಸಮುಟ್ಠಿತಂ ಸದ್ದಾಯತನಂ…ಪೇ… ಗನ್ಧಾಯತನಂ… ರಸಾಯತನಂ… ಫೋಟ್ಠಬ್ಬಾಯತನಂ…ಪೇ… ಪಥವೀಧಾತು… ಆಪೋಧಾತು… ತೇಜೋಧಾತು…ಪೇ… ವಾಯೋಧಾತು ಅನಾರಮ್ಮಣಾ ಕುಸಲಾತಿ? ನ ಹೇವಂ ವತ್ತಬ್ಬೇ…ಪೇ….

ಕುಸಲೇನ ಚಿತ್ತೇನ ಸಮುಟ್ಠಿತಂ ರೂಪಾಯತನಂ ಅನಾರಮ್ಮಣಂ ಅಬ್ಯಾಕತನ್ತಿ? ಆಮನ್ತಾ. ಕುಸಲೇನ ಚಿತ್ತೇನ ಸಮುಟ್ಠಿತಂ ಕಾಯಕಮ್ಮಂ ರೂಪಂ ಅನಾರಮ್ಮಣಂ ಅಬ್ಯಾಕತನ್ತಿ? ನ ಹೇವಂ ವತ್ತಬ್ಬೇ…ಪೇ… ಕುಸಲೇನ ಚಿತ್ತೇನ ಸಮುಟ್ಠಿತಂ ಸದ್ದಾಯತನಂ…ಪೇ… ಗನ್ಧಾಯತನಂ … ರಸಾಯತನಂ… ಫೋಟ್ಠಬ್ಬಾಯತನಂ…ಪೇ… ಪಥವೀಧಾತು… ಆಪೋಧಾತು… ತೇಜೋಧಾತು…ಪೇ… ವಾಯೋಧಾತು ಅನಾರಮ್ಮಣಾ ಅಬ್ಯಾಕತಾತಿ? ಆಮನ್ತಾ. ಕುಸಲೇನ ಚಿತ್ತೇನ ಸಮುಟ್ಠಿತಂ ಕಾಯಕಮ್ಮಂ ರೂಪಂ ಅನಾರಮ್ಮಣಂ ಅಬ್ಯಾಕತನ್ತಿ? ನ ಹೇವಂ ವತ್ತಬ್ಬೇ…ಪೇ….

೫೩೦. ಕುಸಲೇನ ಚಿತ್ತೇನ ಸಮುಟ್ಠಿತಂ ಕಾಯಕಮ್ಮಂ ರೂಪಂ ಫಸ್ಸವಿಪ್ಪಯುತ್ತಂ ಕುಸಲನ್ತಿ? ಆಮನ್ತಾ. ಕುಸಲೇನ ಚಿತ್ತೇನ ಸಮುಟ್ಠಿತಂ ರೂಪಾಯತನಂ ಫಸ್ಸವಿಪ್ಪಯುತ್ತಂ ಕುಸಲನ್ತಿ? ನ ಹೇವಂ ವತ್ತಬ್ಬೇ…ಪೇ… ಕುಸಲೇನ ಚಿತ್ತೇನ ಸಮುಟ್ಠಿತಂ ಕಾಯಕಮ್ಮಂ ರೂಪಂ ಫಸ್ಸವಿಪ್ಪಯುತ್ತಂ ಕುಸಲನ್ತಿ? ಆಮನ್ತಾ. ಕುಸಲೇನ ಚಿತ್ತೇನ ಸಮುಟ್ಠಿತಂ ಸದ್ದಾಯತನಂ…ಪೇ… ಗನ್ಧಾಯತನಂ… ರಸಾಯತನಂ… ಫೋಟ್ಠಬ್ಬಾಯತನಂ…ಪೇ… ಪಥವೀಧಾತು… ಆಪೋಧಾತು… ತೇಜೋಧಾತು…ಪೇ… ವಾಯೋಧಾತು ಫಸ್ಸವಿಪ್ಪಯುತ್ತಾ ಕುಸಲಾತಿ? ನ ಹೇವಂ ವತ್ತಬ್ಬೇ…ಪೇ….

ಕುಸಲೇನ ಚಿತ್ತೇನ ಸಮುಟ್ಠಿತಂ ರೂಪಾಯತನಂ ಫಸ್ಸವಿಪ್ಪಯುತ್ತಂ ಅಬ್ಯಾಕತನ್ತಿ? ಆಮನ್ತಾ. ಕುಸಲೇನ ಚಿತ್ತೇನ ಸಮುಟ್ಠಿತಂ ಕಾಯಕಮ್ಮಂ ರೂಪಂ ಫಸ್ಸವಿಪ್ಪಯುತ್ತಂ ಅಬ್ಯಾಕತನ್ತಿ? ನ ಹೇವಂ ವತ್ತಬ್ಬೇ…ಪೇ… ಕುಸಲೇನ ಚಿತ್ತೇನ ಸಮುಟ್ಠಿತಂ ಸದ್ದಾಯತನಂ…ಪೇ… ಗನ್ಧಾಯತನಂ… ರಸಾಯತನಂ… ಫೋಟ್ಠಬ್ಬಾಯತನಂ…ಪೇ… ಪಥವೀಧಾತು… ಆಪೋಧಾತು… ತೇಜೋಧಾತು…ಪೇ… ವಾಯೋಧಾತು ಫಸ್ಸವಿಪ್ಪಯುತ್ತಾ ಅಬ್ಯಾಕತಾತಿ? ಆಮನ್ತಾ. ಕುಸಲೇನ ಚಿತ್ತೇನ ಸಮುಟ್ಠಿತಂ ಕಾಯಕಮ್ಮಂ ರೂಪಂ ಫಸ್ಸವಿಪ್ಪಯುತ್ತಂ ಅಬ್ಯಾಕತನ್ತಿ? ನ ಹೇವಂ ವತ್ತಬ್ಬೇ…ಪೇ….

೫೩೧. ಕುಸಲೇನ ಚಿತ್ತೇನ ಸಮುಟ್ಠಿತಂ ಕಾಯಕಮ್ಮಂ ರೂಪಂ ಅನಾರಮ್ಮಣಂ ಫಸ್ಸವಿಪ್ಪಯುತ್ತಂ ಕುಸಲನ್ತಿ? ಆಮನ್ತಾ. ಕುಸಲೇನ ಚಿತ್ತೇನ ಸಮುಟ್ಠಿತಂ ರೂಪಾಯತನಂ ಅನಾರಮ್ಮಣಂ ಫಸ್ಸವಿಪ್ಪಯುತ್ತಂ ಕುಸಲನ್ತಿ? ನ ಹೇವಂ ವತ್ತಬ್ಬೇ…ಪೇ… ಕುಸಲೇನ ಚಿತ್ತೇನ ಸಮುಟ್ಠಿತಂ ಕಾಯಕಮ್ಮಂ ರೂಪಂ ಅನಾರಮ್ಮಣಂ ಫಸ್ಸವಿಪ್ಪಯುತ್ತಂ ಕುಸಲನ್ತಿ? ಆಮನ್ತಾ. ಕುಸಲೇನ ಚಿತ್ತೇನ ಸಮುಟ್ಠಿತಂ ಸದ್ದಾಯತನಂ…ಪೇ… ಗನ್ಧಾಯತನಂ… ರಸಾಯತನಂ… ಫೋಟ್ಠಬ್ಬಾಯತನಂ…ಪೇ… ಪಥವೀಧಾತು… ಆಪೋಧಾತು… ತೇಜೋಧಾತು…ಪೇ… ವಾಯೋಧಾತು ಅನಾರಮ್ಮಣಾ ಫಸ್ಸವಿಪ್ಪಯುತ್ತಾ ಕುಸಲಾತಿ? ನ ಹೇವಂ ವತ್ತಬ್ಬೇ…ಪೇ….

ಕುಸಲೇನ ಚಿತ್ತೇನ ಸಮುಟ್ಠಿತಂ ರೂಪಾಯತನಂ ಅನಾರಮ್ಮಣಂ ಫಸ್ಸವಿಪ್ಪಯುತ್ತಂ ಅಬ್ಯಾಕತನ್ತಿ? ಆಮನ್ತಾ. ಕುಸಲೇನ ಚಿತ್ತೇನ ಸಮುಟ್ಠಿತಂ ಕಾಯಕಮ್ಮಂ ರೂಪಂ ಅನಾರಮ್ಮಣಂ ಫಸ್ಸವಿಪ್ಪಯುತ್ತಂ ಅಬ್ಯಾಕತನ್ತಿ? ನ ಹೇವಂ ವತ್ತಬ್ಬೇ…ಪೇ… ಕುಸಲೇನ ಚಿತ್ತೇನ ಸಮುಟ್ಠಿತಂ ಸದ್ದಾಯತನಂ…ಪೇ… ಗನ್ಧಾಯತನಂ… ರಸಾಯತನಂ… ಫೋಟ್ಠಬ್ಬಾಯತನಂ…ಪೇ… ಪಥವೀಧಾತು… ಆಪೋಧಾತು… ತೇಜೋಧಾತು…ಪೇ… ವಾಯೋಧಾತು ಅನಾರಮ್ಮಣಾ ಫಸ್ಸವಿಪ್ಪಯುತ್ತಾ ಅಬ್ಯಾಕತಾತಿ? ಆಮನ್ತಾ. ಕುಸಲೇನ ಚಿತ್ತೇನ ಸಮುಟ್ಠಿತಂ ಕಾಯಕಮ್ಮಂ ರೂಪಂ ಅನಾರಮ್ಮಣಂ ಫಸ್ಸವಿಪ್ಪಯುತ್ತಂ ಅಬ್ಯಾಕತನ್ತಿ? ನ ಹೇವಂ ವತ್ತಬ್ಬೇ…ಪೇ….

೫೩೨. ಕುಸಲೇನ ಚಿತ್ತೇನ ಸಮುಟ್ಠಿತಂ ವಚೀಕಮ್ಮಂ ರೂಪಂ ಕುಸಲನ್ತಿ? ಆಮನ್ತಾ. ಸಾರಮ್ಮಣಂ, ಅತ್ಥಿ ತಸ್ಸ ಆವಟ್ಟನಾ…ಪೇ… ಪಣಿಧೀತಿ? ನ ಹೇವಂ ವತ್ತಬ್ಬೇ…ಪೇ… ನನು ಅನಾರಮ್ಮಣಂ, ನತ್ಥಿ ತಸ್ಸ ಆವಟ್ಟನಾ…ಪೇ… ಪಣಿಧೀತಿ? ಆಮನ್ತಾ. ಹಞ್ಚಿ ಅನಾರಮ್ಮಣಂ, ನತ್ಥಿ ತಸ್ಸ ಆವಟ್ಟನಾ…ಪೇ… ಪಣಿಧಿ; ನೋ ಚ ವತ ರೇ ವತ್ತಬ್ಬೇ – ‘‘ಕುಸಲೇನ ಚಿತ್ತೇನ ಸಮುಟ್ಠಿತಂ ವಚೀಕಮ್ಮಂ ರೂಪಂ ಕುಸಲ’’ನ್ತಿ.

ಕುಸಲೇನ ಚಿತ್ತೇನ ಸಮುಟ್ಠಿತೋ ಫಸ್ಸೋ ಕುಸಲೋ ಸಾರಮ್ಮಣೋ, ಅತ್ಥಿ ತಸ್ಸ ಆವಟ್ಟನಾ…ಪೇ… ಪಣಿಧೀತಿ? ಆಮನ್ತಾ. ಕುಸಲೇನ ಚಿತ್ತೇನ ಸಮುಟ್ಠಿತಂ ವಚೀಕಮ್ಮಂ ರೂಪಂ ಕುಸಲಂ ಸಾರಮ್ಮಣಂ, ಅತ್ಥಿ ತಸ್ಸ ಆವಟ್ಟನಾ…ಪೇ… ಪಣಿಧೀತಿ? ನ ಹೇವಂ ವತ್ತಬ್ಬೇ…ಪೇ… ಕುಸಲೇನ ಚಿತ್ತೇನ ಸಮುಟ್ಠಿತಾ ವೇದನಾ…ಪೇ… ಸಞ್ಞಾ… ಚೇತನಾ… ಸದ್ಧಾ… ವೀರಿಯಂ… ಸತಿ… ಸಮಾಧಿ…ಪೇ… ಪಞ್ಞಾ ಕುಸಲಾ ಸಾರಮ್ಮಣಾ, ಅತ್ಥಿ ತಾಯ ಆವಟ್ಟನಾ…ಪೇ… ಪಣಿಧೀತಿ? ಆಮನ್ತಾ. ಕುಸಲೇನ ಚಿತ್ತೇನ ಸಮುಟ್ಠಿತಂ ವಚೀಕಮ್ಮಂ ರೂಪಂ ಕುಸಲಂ ಸಾರಮ್ಮಣಂ, ಅತ್ಥಿ ತಸ್ಸ ಆವಟ್ಟನಾ…ಪೇ… ಪಣಿಧೀತಿ? ನ ಹೇವಂ ವತ್ತಬ್ಬೇ…ಪೇ….

ಕುಸಲೇನ ಚಿತ್ತೇನ ಸಮುಟ್ಠಿತಂ ವಚೀಕಮ್ಮಂ ರೂಪಂ ಕುಸಲಂ ಅನಾರಮ್ಮಣಂ, ನತ್ಥಿ ತಸ್ಸ ಆವಟ್ಟನಾ…ಪೇ… ಪಣಿಧೀತಿ? ಆಮನ್ತಾ. ಕುಸಲೇನ ಚಿತ್ತೇನ ಸಮುಟ್ಠಿತೋ ಫಸ್ಸೋ ಕುಸಲೋ ಅನಾರಮ್ಮಣೋ, ನತ್ಥಿ ತಸ್ಸ ಆವಟ್ಟನಾ…ಪೇ… ಪಣಿಧೀತಿ? ನ ಹೇವಂ ವತ್ತಬ್ಬೇ…ಪೇ… ಕುಸಲೇನ ಚಿತ್ತೇನ ಸಮುಟ್ಠಿತಂ ವಚೀಕಮ್ಮಂ ರೂಪಂ ಕುಸಲಂ ಅನಾರಮ್ಮಣಂ, ನತ್ಥಿ ತಸ್ಸ ಆವಟ್ಟನಾ…ಪೇ… ಪಣಿಧೀತಿ? ಆಮನ್ತಾ. ಕುಸಲೇನ ಚಿತ್ತೇನ ಸಮುಟ್ಠಿತಾ ವೇದನಾ…ಪೇ… ಸಞ್ಞಾ… ಚೇತನಾ… ಸದ್ಧಾ… ವೀರಿಯಂ… ಸತಿ… ಸಮಾಧಿ…ಪೇ… ಪಞ್ಞಾ ಕುಸಲಾ ಅನಾರಮ್ಮಣಾ, ನತ್ಥಿ ತಾಯ ಆವಟ್ಟನಾ…ಪೇ… ಪಣಿಧೀತಿ? ನ ಹೇವಂ ವತ್ತಬ್ಬೇ…ಪೇ….

ಕುಸಲೇನ ಚಿತ್ತೇನ ಸಮುಟ್ಠಿತಂ ವಚೀಕಮ್ಮಂ ರೂಪಂ ಕುಸಲನ್ತಿ? ಆಮನ್ತಾ. ಯಂ ಕಿಞ್ಚಿ ಕುಸಲೇನ ಚಿತ್ತೇನ ಸಮುಟ್ಠಿತಂ ರೂಪಂ ಸಬ್ಬಂ ತಂ ಕುಸಲನ್ತಿ? ನ ಹೇವಂ ವತ್ತಬ್ಬೇ…ಪೇ… ಯಥಾ ಕಾಯಕಮ್ಮಂ ತಥಾ ವಚೀಕಮ್ಮನ್ತಿ.

೫೩೩. ಅಕುಸಲೇನ ಚಿತ್ತೇನ ಸಮುಟ್ಠಿತಂ ಕಾಯಕಮ್ಮಂ ರೂಪಂ ಅಕುಸಲನ್ತಿ? ಆಮನ್ತಾ. ಸಾರಮ್ಮಣಂ, ಅತ್ಥಿ ತಸ್ಸ ಆವಟ್ಟನಾ ಆಭೋಗೋ ಸಮನ್ನಾಹಾರೋ ಮನಸಿಕಾರೋ ಚೇತನಾ ಪತ್ಥನಾ ಪಣಿಧೀತಿ? ನ ಹೇವಂ ವತ್ತಬ್ಬೇ…ಪೇ… ನನು ಅನಾರಮ್ಮಣಂ, ನತ್ಥಿ ತಸ್ಸ ಆವಟ್ಟನಾ ಆಭೋಗೋ ಸಮನ್ನಾಹಾರೋ ಮನಸಿಕಾರೋ ಚೇತನಾ ಪತ್ಥನಾ ಪಣಿಧೀತಿ? ಆಮನ್ತಾ. ಹಞ್ಚಿ ಅನಾರಮ್ಮಣಂ, ನತ್ಥಿ ತಸ್ಸ ಆವಟ್ಟನಾ ಆಭೋಗೋ ಸಮನ್ನಾಹಾರೋ ಮನಸಿಕಾರೋ ಚೇತನಾ ಪತ್ಥನಾ ಪಣಿಧಿ; ನೋ ಚ ವತ ರೇ ವತ್ತಬ್ಬೇ – ‘‘ಅಕುಸಲೇನ ಚಿತ್ತೇನ ಸಮುಟ್ಠಿತಂ ಕಾಯಕಮ್ಮಂ ರೂಪಂ ಅಕುಸಲ’’ನ್ತಿ.

ಅಕುಸಲೇನ ಚಿತ್ತೇನ ಸಮುಟ್ಠಿತೋ ಫಸ್ಸೋ ಅಕುಸಲೋ ಸಾರಮ್ಮಣೋ, ಅತ್ಥಿ ತಸ್ಸ ಆವಟ್ಟನಾ…ಪೇ… ಪಣಿಧೀತಿ? ಆಮನ್ತಾ. ಅಕುಸಲೇನ ಚಿತ್ತೇನ ಸಮುಟ್ಠಿತಂ ಕಾಯಕಮ್ಮಂ ರೂಪಂ ಅಕುಸಲಂ ಸಾರಮ್ಮಣಂ, ಅತ್ಥಿ ತಸ್ಸ ಆವಟ್ಟನಾ…ಪೇ… ಪಣಿಧೀತಿ? ನ ಹೇವಂ ವತ್ತಬ್ಬೇ…ಪೇ… ಅಕುಸಲೇನ ಚಿತ್ತೇನ ಸಮುಟ್ಠಿತಾ ವೇದನಾ…ಪೇ… ಸಞ್ಞಾ… ಚೇತನಾ… ರಾಗೋ… ದೋಸೋ… ಮೋಹೋ… ಮಾನೋ… ದಿಟ್ಠಿ… ವಿಚಿಕಿಚ್ಛಾ… ಥಿನಂ… ಉದ್ಧಚ್ಚಂ… ಅಹಿರಿಕಂ…ಪೇ… ಅನೋತ್ತಪ್ಪಂ ಅಕುಸಲಂ ಸಾರಮ್ಮಣಂ, ಅತ್ಥಿ ತಸ್ಸ ಆವಟ್ಟನಾ…ಪೇ… ಪಣಿಧೀತಿ? ಆಮನ್ತಾ. ಅಕುಸಲೇನ ಚಿತ್ತೇನ ಸಮುಟ್ಠಿತಂ ಕಾಯಕಮ್ಮಂ ರೂಪಂ ಅಕುಸಲಂ ಸಾರಮ್ಮಣಂ, ಅತ್ಥಿ ತಸ್ಸ ಆವಟ್ಟನಾ…ಪೇ… ಪಣಿಧೀತಿ? ನ ಹೇವಂ ವತ್ತಬ್ಬೇ…ಪೇ….

ಅಕುಸಲೇನ ಚಿತ್ತೇನ ಸಮುಟ್ಠಿತಂ ಕಾಯಕಮ್ಮಂ ರೂಪಂ ಅಕುಸಲಂ ಅನಾರಮ್ಮಣಂ, ನತ್ಥಿ ತಸ್ಸ ಆವಟ್ಟನಾ…ಪೇ… ಪಣಿಧೀತಿ? ಆಮನ್ತಾ. ಅಕುಸಲೇನ ಚಿತ್ತೇನ ಸಮುಟ್ಠಿತೋ ಫಸ್ಸೋ ಅಕುಸಲೋ ಅನಾರಮ್ಮಣೋ, ನತ್ಥಿ ತಸ್ಸ ಆವಟ್ಟನಾ…ಪೇ… ಪಣಿಧೀತಿ? ನ ಹೇವಂ ವತ್ತಬ್ಬೇ…ಪೇ… ಅಕುಸಲೇನ ಚಿತ್ತೇನ ಸಮುಟ್ಠಿತಂ ಕಾಯಕಮ್ಮಂ ರೂಪಂ ಅಕುಸಲಂ ಅನಾರಮ್ಮಣಂ, ನತ್ಥಿ ತಸ್ಸ ಆವಟ್ಟನಾ…ಪೇ… ಪಣಿಧೀತಿ? ಆಮನ್ತಾ. ಅಕುಸಲೇನ ಚಿತ್ತೇನ ಸಮುಟ್ಠಿತಾ ವೇದನಾ…ಪೇ… ಸಞ್ಞಾ… ಚೇತನಾ… ರಾಗೋ… ದೋಸೋ… ಮೋಹೋ… ಮಾನೋ… ದಿಟ್ಠಿ… ವಿಚಿಕಿಚ್ಛಾ… ಥಿನಂ… ಉದ್ಧಚ್ಚಂ… ಅಹಿರಿಕಂ…ಪೇ… ಅನೋತ್ತಪ್ಪಂ ಅಕುಸಲಂ ಅನಾರಮ್ಮಣಂ, ನತ್ಥಿ ತಸ್ಸ ಆವಟ್ಟನಾ…ಪೇ… ಪಣಿಧೀತಿ? ನ ಹೇವಂ ವತ್ತಬ್ಬೇ…ಪೇ….

ಅಕುಸಲೇನ ಚಿತ್ತೇನ ಸಮುಟ್ಠಿತಂ ಕಾಯಕಮ್ಮಂ ರೂಪಂ ಅಕುಸಲನ್ತಿ? ಆಮನ್ತಾ. ಯಂ ಕಿಞ್ಚಿ ಅಕುಸಲೇನ ಚಿತ್ತೇನ ಸಮುಟ್ಠಿತಂ ರೂಪಂ ಸಬ್ಬಂ ತಂ ಅಕುಸಲನ್ತಿ? ನ ಹೇವಂ ವತ್ತಬ್ಬೇ…ಪೇ….

೫೩೪. ಅಕುಸಲೇನ ಚಿತ್ತೇನ ಸಮುಟ್ಠಿತಂ ವಚೀಕಮ್ಮಂ ರೂಪಂ ಅಕುಸಲನ್ತಿ? ಆಮನ್ತಾ. ಸಾರಮ್ಮಣಂ, ಅತ್ಥಿ ತಸ್ಸ ಆವಟ್ಟನಾ…ಪೇ… ಪಣಿಧೀತಿ? ನ ಹೇವಂ ವತ್ತಬ್ಬೇ…ಪೇ… ನನು ಅನಾರಮ್ಮಣಂ, ನತ್ಥಿ ತಸ್ಸ ಆವಟ್ಟನಾ…ಪೇ… ಪಣಿಧೀತಿ? ಆಮನ್ತಾ. ಹಞ್ಚಿ ಅನಾರಮ್ಮಣಂ, ನತ್ಥಿ ತಸ್ಸ ಆವಟ್ಟನಾ…ಪೇ… ಪಣಿಧಿ; ನೋ ಚ ವತ ರೇ ವತ್ತಬ್ಬೇ – ‘‘ಅಕುಸಲೇನ ಚಿತ್ತೇನ ಸಮುಟ್ಠಿತಂ ವಚೀಕಮ್ಮಂ ರೂಪಂ ಅಕುಸಲ’’ನ್ತಿ.

ಅಕುಸಲೇನ ಚಿತ್ತೇನ ಸಮುಟ್ಠಿತೋ ಫಸ್ಸೋ ಅಕುಸಲೋ ಸಾರಮ್ಮಣೋ, ಅತ್ಥಿ ತಸ್ಸ ಆವಟ್ಟನಾ…ಪೇ… ಪಣಿಧೀತಿ? ಆಮನ್ತಾ. ಅಕುಸಲೇನ ಚಿತ್ತೇನ ಸಮುಟ್ಠಿತಂ ವಚೀಕಮ್ಮಂ ರೂಪಂ ಅಕುಸಲಂ ಸಾರಮ್ಮಣಂ, ಅತ್ಥಿ ತಸ್ಸ ಆವಟ್ಟನಾ…ಪೇ… ಪಣಿಧೀತಿ? ನ ಹೇವಂ ವತ್ತಬ್ಬೇ…ಪೇ… ಅಕುಸಲೇನ ಚಿತ್ತೇನ ಸಮುಟ್ಠಿತಾ ವೇದನಾ…ಪೇ… ಸಞ್ಞಾ … ಚೇತನಾ… ರಾಗೋ… ದೋಸೋ… ಮೋಹೋ… ಮಾನೋ… ದಿಟ್ಠಿ… ವಿಚಿಕಿಚ್ಛಾ… ಥಿನಂ… ಉದ್ಧಚ್ಚಂ… ಅಹಿರಿಕಂ…ಪೇ… ಅನೋತ್ತಪ್ಪಂ ಅಕುಸಲಂ ಸಾರಮ್ಮಣಂ, ಅತ್ಥಿ ತಸ್ಸ ಆವಟ್ಟನಾ…ಪೇ… ಪಣಿಧೀತಿ? ಆಮನ್ತಾ. ಅಕುಸಲೇನ ಚಿತ್ತೇನ ಸಮುಟ್ಠಿತಂ ವಚೀಕಮ್ಮಂ ರೂಪಂ ಅಕುಸಲಂ ಸಾರಮ್ಮಣಂ, ಅತ್ಥಿ ತಸ್ಸ ಆವಟ್ಟನಾ…ಪೇ… ಪಣಿಧೀತಿ? ನ ಹೇವಂ ವತ್ತಬ್ಬೇ…ಪೇ….

ಅಕುಸಲೇನ ಚಿತ್ತೇನ ಸಮುಟ್ಠಿತಂ ವಚೀಕಮ್ಮಂ ರೂಪಂ ಅಕುಸಲಂ ಅನಾರಮ್ಮಣಂ, ನತ್ಥಿ ತಸ್ಸ ಆವಟ್ಟನಾ…ಪೇ… ಪಣಿಧೀತಿ? ಆಮನ್ತಾ. ಅಕುಸಲೇನ ಚಿತ್ತೇನ ಸಮುಟ್ಠಿತೋ ಫಸ್ಸೋ ಅಕುಸಲೋ ಅನಾರಮ್ಮಣೋ, ನತ್ಥಿ ತಸ್ಸ ಆವಟ್ಟನಾ…ಪೇ… ಪಣಿಧೀತಿ? ನ ಹೇವಂ ವತ್ತಬ್ಬೇ…ಪೇ… ಅಕುಸಲೇನ ಚಿತ್ತೇನ ಸಮುಟ್ಠಿತಂ ವಚೀಕಮ್ಮಂ ರೂಪಂ ಅಕುಸಲಂ ಅನಾರಮ್ಮಣಂ, ನತ್ಥಿ ತಸ್ಸ ಆವಟ್ಟನಾ…ಪೇ… ಪಣಿಧೀತಿ? ಆಮನ್ತಾ. ಅಕುಸಲೇನ ಚಿತ್ತೇನ ಸಮುಟ್ಠಿತಾ ವೇದನಾ…ಪೇ… ಸಞ್ಞಾ… ಚೇತನಾ… ರಾಗೋ… ದೋಸೋ… ಮೋಹೋ… ಮಾನೋ… ದಿಟ್ಠಿ… ವಿಚಿಕಿಚ್ಛಾ… ಥಿನಂ… ಉದ್ಧಚ್ಚಂ… ಅಹಿರಿಕಂ…ಪೇ… ಅನೋತ್ತಪ್ಪಂ ಅಕುಸಲಂ ಅನಾರಮ್ಮಣಂ, ನತ್ಥಿ ತಸ್ಸ ಆವಟ್ಟನಾ…ಪೇ… ಪಣಿಧೀತಿ? ನ ಹೇವಂ ವತ್ತಬ್ಬೇ…ಪೇ….

ಅಕುಸಲೇನ ಚಿತ್ತೇನ ಸಮುಟ್ಠಿತಂ ವಚೀಕಮ್ಮಂ ರೂಪಂ ಅಕುಸಲನ್ತಿ? ಆಮನ್ತಾ. ಯಂ ಕಿಞ್ಚಿ ಅಕುಸಲೇನ ಚಿತ್ತೇನ ಸಮುಟ್ಠಿತಂ ರೂಪಂ ಸಬ್ಬಂ ತಂ ಅಕುಸಲನ್ತಿ? ನ ಹೇವಂ ವತ್ತಬ್ಬೇ…ಪೇ….

೫೩೫. ಅಕುಸಲೇನ ಚಿತ್ತೇನ ಸಮುಟ್ಠಿತಂ ವಚೀಕಮ್ಮಂ ರೂಪಂ ಅಕುಸಲನ್ತಿ? ಆಮನ್ತಾ. ಅಕುಸಲೇನ ಚಿತ್ತೇನ ಸಮುಟ್ಠಿತಂ ರೂಪಾಯತನಂ ಅಕುಸಲನ್ತಿ? ನ ಹೇವಂ ವತ್ತಬ್ಬೇ…ಪೇ… ಅಕುಸಲೇನ ಚಿತ್ತೇನ ಸಮುಟ್ಠಿತಂ ವಚೀಕಮ್ಮಂ ರೂಪಂ ಅಕುಸಲನ್ತಿ? ಆಮನ್ತಾ. ಅಕುಸಲೇನ ಚಿತ್ತೇನ ಸಮುಟ್ಠಿತಂ ಸದ್ದಾಯತನಂ…ಪೇ… ಗನ್ಧಾಯತನಂ… ರಸಾಯತನಂ… ಫೋಟ್ಠಬ್ಬಾಯತನಂ…ಪೇ… ಪಥವೀಧಾತು… ಆಪೋಧಾತು… ತೇಜೋಧಾತು…ಪೇ… ವಾಯೋಧಾತು ಅಸುಚಿ ಅಸ್ಸು ಲೋಹಿತಂ ಸೇದೋ ಅಕುಸಲೋತಿ? ನ ಹೇವಂ ವತ್ತಬ್ಬೇ…ಪೇ….

ಅಕುಸಲೇನ ಚಿತ್ತೇನ ಸಮುಟ್ಠಿತಂ ರೂಪಾಯತನಂ ಅಬ್ಯಾಕತನ್ತಿ? ಆಮನ್ತಾ. ಅಕುಸಲೇನ ಚಿತ್ತೇನ ಸಮುಟ್ಠಿತಂ ವಚೀಕಮ್ಮಂ ರೂಪಂ ಅಬ್ಯಾಕತನ್ತಿ? ನ ಹೇವಂ ವತ್ತಬ್ಬೇ…ಪೇ… ಅಕುಸಲೇನ ಚಿತ್ತೇನ ಸಮುಟ್ಠಿತಂ ಸದ್ದಾಯತನಂ…ಪೇ… ಗನ್ಧಾಯತನಂ… ರಸಾಯತನಂ… ಫೋಟ್ಠಬ್ಬಾಯತನಂ…ಪೇ… ಪಥವೀಧಾತು… ಆಪೋಧಾತು… ತೇಜೋಧಾತು…ಪೇ… ವಾಯೋಧಾತು ಅಸುಚಿ ಅಸ್ಸು ಲೋಹಿತಂ ಸೇದೋ ಅಬ್ಯಾಕತೋತಿ? ಆಮನ್ತಾ. ಅಕುಸಲೇನ ಚಿತ್ತೇನ ಸಮುಟ್ಠಿತಂ ವಚೀಕಮ್ಮಂ ರೂಪಂ ಅಬ್ಯಾಕತನ್ತಿ? ನ ಹೇವಂ ವತ್ತಬ್ಬೇ…ಪೇ….

೫೩೬. ಅಕುಸಲೇನ ಚಿತ್ತೇನ ಸಮುಟ್ಠಿತಂ ವಚೀಕಮ್ಮಂ ರೂಪಂ ಅನಾರಮ್ಮಣಂ ಅಕುಸಲನ್ತಿ? ಆಮನ್ತಾ. ಅಕುಸಲೇನ ಚಿತ್ತೇನ ಸಮುಟ್ಠಿತಂ ರೂಪಾಯತನಂ ಅನಾರಮ್ಮಣಂ ಅಕುಸಲನ್ತಿ? ನ ಹೇವಂ ವತ್ತಬ್ಬೇ…ಪೇ… ಅಕುಸಲೇನ ಚಿತ್ತೇನ ಸಮುಟ್ಠಿತಂ ವಚೀಕಮ್ಮಂ ರೂಪಂ ಅನಾರಮ್ಮಣಂ ಅಕುಸಲನ್ತಿ? ಆಮನ್ತಾ. ಅಕುಸಲೇನ ಚಿತ್ತೇನ ಸಮುಟ್ಠಿತಂ ಸದ್ದಾಯತನಂ…ಪೇ… ಗನ್ಧಾಯತನಂ…ಪೇ… ರಸಾಯತನಂ…ಪೇ… ಫೋಟ್ಠಬ್ಬಾಯತನಂ… ಪಥವೀಧಾತು… ಆಪೋಧಾತು… ತೇಜೋಧಾತು…ಪೇ… ವಾಯೋಧಾತು ಅಸುಚಿ ಅಸ್ಸು ಲೋಹಿತಂ ಸೇದೋ ಅನಾರಮ್ಮಣೋ ಅಕುಸಲೋತಿ? ನ ಹೇವಂ ವತ್ತಬ್ಬೇ…ಪೇ….

ಅಕುಸಲೇನ ಚಿತ್ತೇನ ಸಮುಟ್ಠಿತಂ ರೂಪಾಯತನಂ ಅನಾರಮ್ಮಣಂ ಅಬ್ಯಾಕತನ್ತಿ? ಆಮನ್ತಾ. ಅಕುಸಲೇನ ಚಿತ್ತೇನ ಸಮುಟ್ಠಿತಂ ವಚೀಕಮ್ಮಂ ರೂಪಂ ಅನಾರಮ್ಮಣಂ ಅಬ್ಯಾಕತನ್ತಿ? ನ ಹೇವಂ ವತ್ತಬ್ಬೇ…ಪೇ… ಅಕುಸಲೇನ ಚಿತ್ತೇನ ಸಮುಟ್ಠಿತಂ ಸದ್ದಾಯತನಂ…ಪೇ… ಗನ್ಧಾಯತನಂ… ರಸಾಯತನಂ… ಫೋಟ್ಠಬ್ಬಾಯತನಂ…ಪೇ… ಪಥವೀಧಾತು… ಆಪೋಧಾತು… ತೇಜೋಧಾತು…ಪೇ… ವಾಯೋಧಾತು ಅಸುಚಿ ಅಸ್ಸು ಲೋಹಿತಂ ಸೇದೋ ಅನಾರಮ್ಮಣೋ ಅಬ್ಯಾಕತೋತಿ? ಆಮನ್ತಾ. ಅಕುಸಲೇನ ಚಿತ್ತೇನ ಸಮುಟ್ಠಿತಂ ವಚೀಕಮ್ಮಂ ರೂಪಂ ಅನಾರಮ್ಮಣಂ ಅಬ್ಯಾಕತನ್ತಿ? ನ ಹೇವಂ ವತ್ತಬ್ಬೇ…ಪೇ….

೫೩೭. ಅಕುಸಲೇನ ಚಿತ್ತೇನ ಸಮುಟ್ಠಿತಂ ವಚೀಕಮ್ಮಂ ರೂಪಂ ಫಸ್ಸವಿಪ್ಪಯುತ್ತಂ ಅಕುಸಲನ್ತಿ? ಆಮನ್ತಾ. ಅಕುಸಲೇನ ಚಿತ್ತೇನ ಸಮುಟ್ಠಿತಂ ರೂಪಾಯತನಂ ಫಸ್ಸವಿಪ್ಪಯುತ್ತಂ ಅಕುಸಲನ್ತಿ? ನ ಹೇವಂ ವತ್ತಬ್ಬೇ…ಪೇ… ಅಕುಸಲೇನ ಚಿತ್ತೇನ ಸಮುಟ್ಠಿತಂ ವಚೀಕಮ್ಮಂ ರೂಪಂ ಫಸ್ಸವಿಪ್ಪಯುತ್ತಂ ಅಕುಸಲನ್ತಿ? ಆಮನ್ತಾ. ಅಕುಸಲೇನ ಚಿತ್ತೇನ ಸಮುಟ್ಠಿತಂ ಸದ್ದಾಯತನಂ…ಪೇ… ಗನ್ಧಾಯತನಂ… ರಸಾಯತನಂ… ಫೋಟ್ಠಬ್ಬಾಯತನಂ… ಪಥವೀಧಾತು… ಆಪೋಧಾತು… ತೇಜೋಧಾತು…ಪೇ… ವಾಯೋಧಾತು ಅಸುಚಿ ಅಸ್ಸು ಲೋಹಿತಂ ಸೇದೋ ಫಸ್ಸವಿಪ್ಪಯುತ್ತೋ ಅಕುಸಲೋತಿ? ನ ಹೇವಂ ವತ್ತಬ್ಬೇ…ಪೇ….

ಅಕುಸಲೇನ ಚಿತ್ತೇನ ಸಮುಟ್ಠಿತಂ ರೂಪಾಯತನಂ ಫಸ್ಸವಿಪ್ಪಯುತ್ತಂ ಅಬ್ಯಾಕತನ್ತಿ? ಆಮನ್ತಾ. ಅಕುಸಲೇನ ಚಿತ್ತೇನ ಸಮುಟ್ಠಿತಂ ವಚೀಕಮ್ಮಂ ರೂಪಂ ಅನಾರಮ್ಮಣಂ ಫಸ್ಸವಿಪ್ಪಯುತ್ತಂ ಅಬ್ಯಾಕತನ್ತಿ? ನ ಹೇವಂ ವತ್ತಬ್ಬೇ…ಪೇ… ಅಕುಸಲೇನ ಚಿತ್ತೇನ ಸಮುಟ್ಠಿತಂ ಸದ್ದಾಯತನಂ…ಪೇ… ಗನ್ಧಾಯತನಂ… ರಸಾಯತನಂ… ಫೋಟ್ಠಬ್ಬಾಯತನಂ… ಪಥವೀಧಾತು… ಆಪೋಧಾತು… ತೇಜೋಧಾತು…ಪೇ… ವಾಯೋಧಾತು ಅಸುಚಿ ಅಸ್ಸು ಲೋಹಿತಂ ಸೇದೋ ಅನಾರಮ್ಮಣೋ ಫಸ್ಸವಿಪ್ಪಯುತ್ತೋ ಅಬ್ಯಾಕತೋತಿ? ಆಮನ್ತಾ. ಅಕುಸಲೇನ ಚಿತ್ತೇನ ಸಮುಟ್ಠಿತಂ ವಚೀಕಮ್ಮಂ ರೂಪಂ ಅನಾರಮ್ಮಣಂ ಫಸ್ಸವಿಪ್ಪಯುತ್ತಂ ಅಬ್ಯಾಕತನ್ತಿ? ನ ಹೇವಂ ವತ್ತಬ್ಬೇ…ಪೇ….

ಅಕುಸಲೇನ ಚಿತ್ತೇನ ಸಮುಟ್ಠಿತಂ ವಚೀಕಮ್ಮಂ ರೂಪಂ ಅನಾರಮ್ಮಣಂ ಫಸ್ಸವಿಪ್ಪಯುತ್ತಂ ಅಕುಸಲನ್ತಿ? ಆಮನ್ತಾ. ಅಕುಸಲೇನ ಚಿತ್ತೇನ ಸಮುಟ್ಠಿತಂ ರೂಪಾಯತನಂ ಅನಾರಮ್ಮಣಂ ಫಸ್ಸವಿಪ್ಪಯುತ್ತಂ ಅಕುಸಲನ್ತಿ? ನ ಹೇವಂ ವತ್ತಬ್ಬೇ…ಪೇ… ಅಕುಸಲೇನ ಚಿತ್ತೇನ ಸಮುಟ್ಠಿತಂ ವಚೀಕಮ್ಮಂ ರೂಪಂ ಅನಾರಮ್ಮಣಂ ಫಸ್ಸವಿಪ್ಪಯುತ್ತಂ ಅಕುಸಲನ್ತಿ? ಆಮನ್ತಾ. ಅಕುಸಲೇನ ಚಿತ್ತೇನ ಸಮುಟ್ಠಿತಂ ಸದ್ದಾಯತನಂ…ಪೇ… ಗನ್ಧಾಯತನಂ… ರಸಾಯತನಂ… ಫೋಟ್ಠಬ್ಬಾಯತನಂ… ಪಥವೀಧಾತು… ಆಪೋಧಾತು… ತೇಜೋಧಾತು…ಪೇ… ವಾಯೋಧಾತು ಅಸುಚಿ ಅಸ್ಸು ಲೋಹಿತಂ ಸೇದೋ ಅನಾರಮ್ಮಣೋ ಫಸ್ಸವಿಪ್ಪಯುತ್ತೋ ಅಕುಸಲೋತಿ? ನ ಹೇವಂ ವತ್ತಬ್ಬೇ…ಪೇ….

ಅಕುಸಲೇನ ಚಿತ್ತೇನ ಸಮುಟ್ಠಿತಂ ರೂಪಾಯತನಂ ಅನಾರಮ್ಮಣಂ ಫಸ್ಸವಿಪ್ಪಯುತ್ತಂ ಅಬ್ಯಾಕತನ್ತಿ? ಆಮನ್ತಾ. ಅಕುಸಲೇನ ಚಿತ್ತೇನ ಸಮುಟ್ಠಿತಂ ವಚೀಕಮ್ಮಂ ರೂಪಂ ಅನಾರಮ್ಮಣಂ ಫಸ್ಸವಿಪ್ಪಯುತ್ತಂ ಅಬ್ಯಾಕತನ್ತಿ? ನ ಹೇವಂ ವತ್ತಬ್ಬೇ…ಪೇ… ಅಕುಸಲೇನ ಚಿತ್ತೇನ ಸಮುಟ್ಠಿತಂ ಸದ್ದಾಯತನಂ…ಪೇ… ಗನ್ಧಾಯತನಂ… ರಸಾಯತನಂ… ಫೋಟ್ಠಬ್ಬಾಯತನಂ… ಪಥವೀಧಾತು… ಆಪೋಧಾತು… ತೇಜೋಧಾತು…ಪೇ… ವಾಯೋಧಾತು ಅಸುಚಿ ಅಸ್ಸು ಲೋಹಿತಂ ಸೇದೋ ಅನಾರಮ್ಮಣೋ ಫಸ್ಸವಿಪ್ಪಯುತ್ತೋ ಅಬ್ಯಾಕತೋತಿ? ಆಮನ್ತಾ. ಅಕುಸಲೇನ ಚಿತ್ತೇನ ಸಮುಟ್ಠಿತಂ ವಚೀಕಮ್ಮಂ ರೂಪಂ ಅನಾರಮ್ಮಣಂ ಫಸ್ಸವಿಪ್ಪಯುತ್ತಂ ಅಬ್ಯಾಕತನ್ತಿ? ನ ಹೇವಂ ವತ್ತಬ್ಬೇ…ಪೇ….

೫೩೮. ನ ವತ್ತಬ್ಬಂ – ‘‘ರೂಪಂ ಕುಸಲಮ್ಪಿ ಅಕುಸಲಮ್ಪೀ’’ತಿ? ಆಮನ್ತಾ. ನನು ಕಾಯಕಮ್ಮಂ ವಚೀಕಮ್ಮಂ ಕುಸಲಮ್ಪಿ ಅಕುಸಲಮ್ಪೀತಿ? ಆಮನ್ತಾ. ಹಞ್ಚಿ ಕಾಯಕಮ್ಮಂ ವಚೀಕಮ್ಮಂ ಕುಸಲಮ್ಪಿ ಅಕುಸಲಮ್ಪಿ, ತೇನ ವತ ರೇ ವತ್ತಬ್ಬೇ – ‘‘ರೂಪಂ ಕುಸಲಮ್ಪಿ ಅಕುಸಲಮ್ಪೀ’’ತಿ.

ರೂಪಂ ಕುಸಲಮ್ಪಿ ಅಕುಸಲಮ್ಪೀತಿ? ಆಮನ್ತಾ. ಚಕ್ಖಾಯತನಂ ಕುಸಲಮ್ಪಿ ಅಕುಸಲಮ್ಪೀತಿ? ನ ಹೇವಂ ವತ್ತಬ್ಬೇ…ಪೇ… ರೂಪಂ ಕುಸಲಮ್ಪಿ ಅಕುಸಲಮ್ಪೀತಿ? ಆಮನ್ತಾ. ಸೋತಾಯತನಂ…ಪೇ… ಘಾನಾಯತನಂ… ಜಿವ್ಹಾಯತನಂ… ಕಾಯಾಯತನಂ… ರೂಪಾಯತನಂ… ಸದ್ದಾಯತನಂ… ಗನ್ಧಾಯತನಂ… ರಸಾಯತನಂ … ಫೋಟ್ಠಬ್ಬಾಯತನಂ… ಪಥವೀಧಾತು… ಆಪೋಧಾತು… ತೇಜೋಧಾತು…ಪೇ… ವಾಯೋಧಾತು ಅಸುಚಿ ಅಸ್ಸು ಲೋಹಿತಂ ಸೇದೋ ಕುಸಲೋಪಿ ಅಕುಸಲೋಪೀತಿ? ನ ಹೇವಂ ವತ್ತಬ್ಬೇ…ಪೇ….

ಕಾಯೋ ರೂಪಂ, ಕಾಯಕಮ್ಮಂ ರೂಪನ್ತಿ? ಆಮನ್ತಾ. ಮನೋ ರೂಪಂ, ಮನೋಕಮ್ಮಂ ರೂಪನ್ತಿ? ನ ಹೇವಂ ವತ್ತಬ್ಬೇ …ಪೇ… ಮನೋ ಅರೂಪಂ, ಮನೋಕಮ್ಮಂ ಅರೂಪನ್ತಿ? ಆಮನ್ತಾ. ಕಾಯೋ ಅರೂಪಂ, ಕಾಯಕಮ್ಮಂ ಅರೂಪನ್ತಿ? ನ ಹೇವಂ ವತ್ತಬ್ಬೇ…ಪೇ….

ಕಾಯೋ ರೂಪನ್ತಿ, ಕಾಯಕಮ್ಮಂ ರೂಪನ್ತಿ? ಆಮನ್ತಾ. ಚಕ್ಖಾಯತನಂ ರೂಪನ್ತಿ, ಚಕ್ಖುವಿಞ್ಞಾಣಂ ರೂಪನ್ತಿ? ನ ಹೇವಂ ವತ್ತಬ್ಬೇ…ಪೇ… ಕಾಯೋ ರೂಪನ್ತಿ, ಕಾಯಕಮ್ಮಂ ರೂಪನ್ತಿ? ಆಮನ್ತಾ. ಸೋತಾಯತನಂ ರೂಪನ್ತಿ, ಸೋತವಿಞ್ಞಾಣಂ ರೂಪನ್ತಿ? ನ ಹೇವಂ ವತ್ತಬ್ಬೇ…ಪೇ… ಕಾಯೋ ರೂಪನ್ತಿ, ಕಾಯಕಮ್ಮಂ ರೂಪನ್ತಿ? ಆಮನ್ತಾ. ಘಾನಾಯತನಂ ರೂಪನ್ತಿ, ಘಾನವಿಞ್ಞಾಣಂ ರೂಪನ್ತಿ? ನ ಹೇವಂ ವತ್ತಬ್ಬೇ…ಪೇ… ಕಾಯೋ ರೂಪನ್ತಿ, ಕಾಯಕಮ್ಮಂ ರೂಪನ್ತಿ? ಆಮನ್ತಾ. ಜಿವ್ಹಾಯತನಂ ರೂಪನ್ತಿ, ಜಿವ್ಹಾವಿಞ್ಞಾಣಂ ರೂಪನ್ತಿ? ನ ಹೇವಂ ವತ್ತಬ್ಬೇ…ಪೇ… ಕಾಯೋ ರೂಪನ್ತಿ, ಕಾಯಕಮ್ಮಂ ರೂಪನ್ತಿ? ಆಮನ್ತಾ. ಕಾಯಾಯತನಂ ರೂಪನ್ತಿ, ಕಾಯವಿಞ್ಞಾಣಂ ರೂಪನ್ತಿ? ನ ಹೇವಂ ವತ್ತಬ್ಬೇ…ಪೇ….

೫೩೯. ರೂಪಂ ಕಮ್ಮನ್ತಿ? ಆಮನ್ತಾ. ನನು ವುತ್ತಂ ಭಗವತಾ – ‘‘ಚೇತನಾಹಂ, ಭಿಕ್ಖವೇ, ಕಮ್ಮಂ ವದಾಮಿ; ಚೇತಯಿತ್ವಾ ಕಮ್ಮಂ ಕರೋತಿ ಕಾಯೇನ ವಾಚಾಯ ಮನಸಾ’’ತಿ [ಅ. ನಿ. ೬.೬೩ ನಿಬ್ಬೇಧಿಕಸುತ್ತೇ]! ಅತ್ಥೇವ ಸುತ್ತನ್ತೋತಿ? ಆಮನ್ತಾ. ತೇನ ಹಿ ನ ವತ್ತಬ್ಬಂ – ‘‘ರೂಪಂ ಕಮ್ಮ’’ನ್ತಿ.

ರೂಪಂ ಕಮ್ಮನ್ತಿ? ಆಮನ್ತಾ. ನನು ವುತ್ತಂ ಭಗವತಾ – ‘‘ಕಾಯೇ ವಾ, ಆನನ್ದ [ಹಾನನ್ದ (ಸಂ. ನಿ. ೨.೨೫)], ಸತಿ ಕಾಯಸಞ್ಚೇತನಾಹೇತು ಉಪ್ಪಜ್ಜತಿ ಅಜ್ಝತ್ತಂ ಸುಖದುಕ್ಖಂ; ವಾಚಾಯ ವಾ, ಆನನ್ದ [ಹಾನನ್ದ (ಸಂ. ನಿ. ೨.೨೫)], ಸತಿ ವಚೀಸಞ್ಚೇತನಾಹೇತು ಉಪ್ಪಜ್ಜತಿ ಅಜ್ಝತ್ತಂ ಸುಖದುಕ್ಖಂ; ಮನೇ ವಾ, ಆನನ್ದ [ಹಾನನ್ದ (ಸಂ. ನಿ. ೨.೨೫)], ಸತಿ ಮನೋಸಞ್ಚೇತನಾಹೇತು ಉಪ್ಪಜ್ಜತಿ ಅಜ್ಝತ್ತಂ ಸುಖದುಕ್ಖ’’ನ್ತಿ [ಸಂ. ನಿ. ೨.೨೫; ಅ. ನಿ. ೪.೧೭೧]! ಅತ್ಥೇವ ಸುತ್ತನ್ತೋತಿ? ಆಮನ್ತಾ. ತೇನ ಹಿ ನ ವತ್ತಬ್ಬಂ – ‘‘ರೂಪಂ ಕಮ್ಮ’’ನ್ತಿ.

ರೂಪಂ ಕಮ್ಮನ್ತಿ? ಆಮನ್ತಾ. ನನು ವುತ್ತಂ ಭಗವತಾ – ‘‘ತಿವಿಧಾ, ಭಿಕ್ಖವೇ, ಕಾಯಸಞ್ಚೇತನಾ ಅಕುಸಲಂ ಕಾಯಕಮ್ಮಂ ದುಕ್ಖುದ್ರಯಂ ದುಕ್ಖವಿಪಾಕಂ; ಚತುಬ್ಬಿಧಾ, ಭಿಕ್ಖವೇ, ವಚೀಸಞ್ಚೇತನಾ ಅಕುಸಲಂ ವಚೀಕಮ್ಮಂ ದುಕ್ಖುದ್ರಯಂ ದುಕ್ಖವಿಪಾಕಂ; ತಿವಿಧಾ, ಭಿಕ್ಖವೇ, ಮನೋಸಞ್ಚೇತನಾ ಅಕುಸಲಂ ಮನೋಕಮ್ಮಂ ದುಕ್ಖುದ್ರಯಂ ದುಕ್ಖವಿಪಾಕಂ; ತಿವಿಧಾ, ಭಿಕ್ಖವೇ, ಕಾಯಸಞ್ಚೇತನಾ ಕುಸಲಂ ಕಾಯಕಮ್ಮಂ ಸುಖುದ್ರಯಂ ಸುಖವಿಪಾಕಂ; ಚತುಬ್ಬಿಧಾ, ಭಿಕ್ಖವೇ, ವಚೀಸಞ್ಚೇತನಾ ಕುಸಲಂ ವಚೀಕಮ್ಮಂ ಸುಖುದ್ರಯಂ ಸುಖವಿಪಾಕಂ; ತಿವಿಧಾ, ಭಿಕ್ಖವೇ, ಮನೋಸಞ್ಚೇತನಾ ಕುಸಲಂ ಮನೋಕಮ್ಮಂ ಸುಖುದ್ರಯಂ ಸುಖವಿಪಾಕ’’ನ್ತಿ [ಅ. ನಿ. ೧೦.೨೧೭ ಥೋಕಂ ಪನ ವಿಸದಿಸಂ]! ಅತ್ಥೇವ ಸುತ್ತನ್ತೋತಿ? ಆಮನ್ತಾ. ತೇನ ಹಿ ನ ವತ್ತಬ್ಬಂ – ‘‘ರೂಪಂ ಕಮ್ಮ’’ನ್ತಿ.

ರೂಪಂ ಕಮ್ಮನ್ತಿ? ಆಮನ್ತಾ. ನನು ವುತ್ತಂ ಭಗವತಾ – ‘‘ಸಚಾಯಂ, ಆನನ್ದ, ಸಮಿದ್ಧಿ ಮೋಘಪುರಿಸೋ ಪಾಟಲಿಪುತ್ತಸ್ಸ [ಪೋತಲಿಪುತ್ತಸ್ಸ (ಮ. ನಿ. ೩.೩೦೦)] ಪರಿಬ್ಬಾಜಕಸ್ಸ ಏವಂ ಪುಟ್ಠೋ ಏವಂ ಬ್ಯಾಕರೇಯ್ಯ – ‘ಸಞ್ಚೇತನಿಯಂ, ಆವುಸೋ ಪಾಟಲಿಪುತ್ತ, ಕಮ್ಮಂ ಕತ್ವಾ ಕಾಯೇನ ವಾಚಾಯ ಮನಸಾ ಸುಖವೇದನಿಯಂ ಸುಖಂ ಸೋ ವೇದಯತಿ; ಸಞ್ಚೇತನಿಯಂ, ಆವುಸೋ ಪಾಟಲಿಪುತ್ತ, ಕಮ್ಮಂ ಕತ್ವಾ ಕಾಯೇನ ವಾಚಾಯ ಮನಸಾ ದುಕ್ಖವೇದನಿಯಂ ದುಕ್ಖಂ ಸೋ ವೇದಯತಿ; ಸಞ್ಚೇತನಿಯಂ, ಆವುಸೋ ಪಾಟಲಿಪುತ್ತ, ಕಮ್ಮಂ ಕತ್ವಾ ಕಾಯೇನ ವಾಚಾಯ ಮನಸಾ ಅದುಕ್ಖಮಸುಖವೇದನಿಯಂ ಅದುಕ್ಖಮಸುಖಂ ಸೋ ವೇದಯತೀ’ತಿ, ಏವಂ ಬ್ಯಾಕರಮಾನೋ ಖೋ, ಆನನ್ದ, ಸಮಿದ್ಧಿ ಮೋಘಪುರಿಸೋ ಪಾಟಲಿಪುತ್ತಸ್ಸ ಪರಿಬ್ಬಾಜಕಸ್ಸ ಸಮ್ಮಾ ಬ್ಯಾಕರಮಾನೋ ಬ್ಯಾಕರೇಯ್ಯಾ’’ತಿ [ಮ. ನಿ. ೩.೩೦೦]! ಅತ್ಥೇವ ಸುತ್ತನ್ತೋತಿ? ಆಮನ್ತಾ. ತೇನ ಹಿ ನ ವತ್ತಬ್ಬಂ – ‘‘ರೂಪಂ ಕಮ್ಮ’’ನ್ತಿ.

ರೂಪಂ ಕಮ್ಮನ್ತಿಕಥಾ ನಿಟ್ಠಿತಾ.