೮. ಅಟ್ಠಮವಗ್ಗೋ

(೮೨) ೧೦. ಜೀವಿತಿನ್ದ್ರಿಯಕಥಾ

೫೪೦. ನತ್ಥಿ ರೂಪಜೀವಿತಿನ್ದ್ರಿಯನ್ತಿ? ಆಮನ್ತಾ. ನತ್ಥಿ ರೂಪೀನಂ ಧಮ್ಮಾನಂ ಆಯು ಠಿತಿ ಯಪನಾ ಯಾಪನಾ ಇರಿಯನಾ ವತ್ತನಾ ಪಾಲನಾತಿ? ನ ಹೇವಂ ವತ್ತಬ್ಬೇ…ಪೇ… ಅತ್ಥಿ ರೂಪೀನಂ ಧಮ್ಮಾನಂ ಆಯು ಠಿತಿ ಯಪನಾ ಯಾಪನಾ ಇರಿಯನಾ ವತ್ತನಾ ಪಾಲನಾತಿ? ಆಮನ್ತಾ. ಹಞ್ಚಿ ಅತ್ಥಿ ರೂಪೀನಂ ಧಮ್ಮಾನಂ ಆಯು ಠಿತಿ ಯಪನಾ ಯಾಪನಾ ಇರಿಯನಾ ವತ್ತನಾ ಪಾಲನಾ, ನೋ ಚ ವತ ರೇ ವತ್ತಬ್ಬೇ – ‘‘ನತ್ಥಿ ರೂಪಜೀವಿತಿನ್ದ್ರಿಯ’’ನ್ತಿ.

ಅತ್ಥಿ ಅರೂಪೀನಂ ಧಮ್ಮಾನಂ ಆಯು ಠಿತಿ ಯಪನಾ ಯಾಪನಾ ಇರಿಯನಾ ವತ್ತನಾ ಪಾಲನಾ, ಅತ್ಥಿ ಅರೂಪಜೀವಿತಿನ್ದ್ರಿಯನ್ತಿ? ಆಮನ್ತಾ. ಅತ್ಥಿ ರೂಪೀನಂ ಧಮ್ಮಾನಂ ಆಯು ಠಿತಿ ಯಪನಾ ಯಾಪನಾ ಇರಿಯನಾ ವತ್ತನಾ ಪಾಲನಾ, ಅತ್ಥಿ ರೂಪಜೀವಿತಿನ್ದ್ರಿಯನ್ತಿ? ನ ಹೇವಂ ವತ್ತಬ್ಬೇ…ಪೇ… ಅತ್ಥಿ ರೂಪೀನಂ ಧಮ್ಮಾನಂ ಆಯು ಠಿತಿ ಯಪನಾ ಯಾಪನಾ ಇರಿಯನಾ ವತ್ತನಾ ಪಾಲನಾ, ನತ್ಥಿ ರೂಪಜೀವಿತಿನ್ದ್ರಿಯನ್ತಿ? ಆಮನ್ತಾ. ಅತ್ಥಿ ಅರೂಪೀನಂ ಧಮ್ಮಾನಂ ಆಯು ಠಿತಿ ಯಪನಾ ಯಾಪನಾ ಇರಿಯನಾ ವತ್ತನಾ ಪಾಲನಾ, ನತ್ಥಿ ಅರೂಪಜೀವಿತಿನ್ದ್ರಿಯನ್ತಿ? ನ ಹೇವಂ ವತ್ತಬ್ಬೇ…ಪೇ….

ಅರೂಪೀನಂ ಧಮ್ಮಾನಂ ಆಯು ಅರೂಪಜೀವಿತಿನ್ದ್ರಿಯನ್ತಿ? ಆಮನ್ತಾ. ರೂಪೀನಂ ಧಮ್ಮಾನಂ ಆಯು ರೂಪಜೀವಿತಿನ್ದ್ರಿಯನ್ತಿ? ನ ಹೇವಂ ವತ್ತಬ್ಬೇ…ಪೇ… ರೂಪೀನಂ ಧಮ್ಮಾನಂ ಆಯು ನ ವತ್ತಬ್ಬಂ – ‘‘ರೂಪಜೀವಿತಿನ್ದ್ರಿಯ’’ನ್ತಿ? ಆಮನ್ತಾ. ಅರೂಪೀನಂ ಧಮ್ಮಾನಂ ಆಯು ನ ವತ್ತಬ್ಬಂ – ‘‘ಅರೂಪಜೀವಿತಿನ್ದ್ರಿಯ’’ನ್ತಿ? ನ ಹೇವಂ ವತ್ತಬ್ಬೇ…ಪೇ….

೫೪೧. ರೂಪೀನಂ ಧಮ್ಮಾನಂ ಆಯು ಅರೂಪಜೀವಿತಿನ್ದ್ರಿಯನ್ತಿ? ಆಮನ್ತಾ. ಅರೂಪೀನಂ ಧಮ್ಮಾನಂ ಆಯು ರೂಪಜೀವಿತಿನ್ದ್ರಿಯನ್ತಿ? ನ ಹೇವಂ ವತ್ತಬ್ಬೇ…ಪೇ….

ಅರೂಪೀನಂ ಧಮ್ಮಾನಂ ಆಯು ನ ವತ್ತಬ್ಬಂ – ‘‘ರೂಪಜೀವಿತಿನ್ದ್ರಿಯ’’ನ್ತಿ? ಆಮನ್ತಾ. ರೂಪೀನಂ ಧಮ್ಮಾನಂ ಆಯು ನ ವತ್ತಬ್ಬಂ – ‘‘ಅರೂಪಜೀವಿತಿನ್ದ್ರಿಯ’’ನ್ತಿ? ನ ಹೇವಂ ವತ್ತಬ್ಬೇ…ಪೇ….

ರೂಪೀನಞ್ಚ ಅರೂಪೀನಞ್ಚ ಧಮ್ಮಾನಂ ಆಯು ಅರೂಪಜೀವಿತಿನ್ದ್ರಿಯನ್ತಿ? ಆಮನ್ತಾ. ರೂಪೀನಞ್ಚ ಅರೂಪೀನಞ್ಚ ಧಮ್ಮಾನಂ ಆಯು ರೂಪಜೀವಿತಿನ್ದ್ರಿಯನ್ತಿ? ನ ಹೇವಂ ವತ್ತಬ್ಬೇ…ಪೇ….

ರೂಪೀನಞ್ಚ ಅರೂಪೀನಞ್ಚ ಧಮ್ಮಾನಂ ಆಯು ನ ವತ್ತಬ್ಬಂ – ‘‘ರೂಪಜೀವಿತಿನ್ದ್ರಿಯ’’ನ್ತಿ? ಆಮನ್ತಾ. ರೂಪೀನಞ್ಚ ಅರೂಪೀನಞ್ಚ ಧಮ್ಮಾನಂ ಆಯು ನ ವತ್ತಬ್ಬಂ – ‘‘ಅರೂಪಜೀವಿತಿನ್ದ್ರಿಯ’’ನ್ತಿ? ನ ಹೇವಂ ವತ್ತಬ್ಬೇ…ಪೇ… ನತ್ಥಿ ರೂಪಜೀವಿತಿನ್ದ್ರಿಯನ್ತಿ? ಆಮನ್ತಾ. ನಿರೋಧಂ ಸಮಾಪನ್ನಸ್ಸ ನತ್ಥಿ ಜೀವಿತಿನ್ದ್ರಿಯನ್ತಿ? ನ ಹೇವಂ ವತ್ತಬ್ಬೇ…ಪೇ….

೫೪೨. ನಿರೋಧಂ ಸಮಾಪನ್ನಸ್ಸ ಅತ್ಥಿ ಜೀವಿತಿನ್ದ್ರಿಯನ್ತಿ? ಆಮನ್ತಾ. ಹಞ್ಚಿ ನಿರೋಧಂ ಸಮಾಪನ್ನಸ್ಸ ಅತ್ಥಿ ಜೀವಿತಿನ್ದ್ರಿಯಂ, ನೋ ಚ ವತ ರೇ ವತ್ತಬ್ಬೇ – ‘‘ನತ್ಥಿ ರೂಪಜೀವಿತಿನ್ದ್ರಿಯ’’ನ್ತಿ.

ನಿರೋಧಂ ಸಮಾಪನ್ನಸ್ಸ ಅತ್ಥಿ ಜೀವಿತಿನ್ದ್ರಿಯನ್ತಿ? ಆಮನ್ತಾ. ಕತಮಕ್ಖನ್ಧಪರಿಯಾಪನ್ನನ್ತಿ? ಸಙ್ಖಾರಕ್ಖನ್ಧಪರಿಯಾಪನ್ನನ್ತಿ. ನಿರೋಧಂ ಸಮಾಪನ್ನಸ್ಸ ಅತ್ಥಿ ಸಙ್ಖಾರಕ್ಖನ್ಧೋತಿ? ನ ಹೇವಂ ವತ್ತಬ್ಬೇ…ಪೇ….

ನಿರೋಧಂ ಸಮಾಪನ್ನಸ್ಸ ಅತ್ಥಿ ಸಙ್ಖಾರಕ್ಖನ್ಧೋತಿ? ಆಮನ್ತಾ. ನಿರೋಧಂ ಸಮಾಪನ್ನಸ್ಸ ಅತ್ಥಿ ವೇದನಾಕ್ಖನ್ಧೋ…ಪೇ… ಸಞ್ಞಾಕ್ಖನ್ಧೋ…ಪೇ… ವಿಞ್ಞಾಣಕ್ಖನ್ಧೋತಿ? ನ ಹೇವಂ ವತ್ತಬ್ಬೇ…ಪೇ….

ನಿರೋಧಂ ಸಮಾಪನ್ನಸ್ಸ ಅತ್ಥಿ ವೇದನಾಕ್ಖನ್ಧೋ…ಪೇ… ಸಞ್ಞಾಕ್ಖನ್ಧೋ…ಪೇ… ವಿಞ್ಞಾಣಕ್ಖನ್ಧೋತಿ? ಆಮನ್ತಾ. ನ ನಿರೋಧಂ ಸಮಾಪನ್ನೋತಿ? ನ ಹೇವಂ ವತ್ತಬ್ಬೇ…ಪೇ….

೫೪೩. ನತ್ಥಿ ರೂಪಜೀವಿತಿನ್ದ್ರಿಯನ್ತಿ? ಆಮನ್ತಾ. ಅಸಞ್ಞಸತ್ತಾನಂ ನತ್ಥಿ ಜೀವಿತಿನ್ದ್ರಿಯನ್ತಿ? ನ ಹೇವಂ ವತ್ತಬ್ಬೇ…ಪೇ….

ಅಸಞ್ಞಸತ್ತಾನಂ ಅತ್ಥಿ ಜೀವಿತಿನ್ದ್ರಿಯನ್ತಿ? ಆಮನ್ತಾ. ಹಞ್ಚಿ ಅಸಞ್ಞಸತ್ತಾನಂ ಅತ್ಥಿ ಜೀವಿತಿನ್ದ್ರಿಯಂ, ನೋ ಚ ವತ ರೇ ವತ್ತಬ್ಬೇ – ‘‘ನತ್ಥಿ ರೂಪಜೀವಿತಿನ್ದ್ರಿಯ’’ನ್ತಿ. ಅಸಞ್ಞಸತ್ತಾನಂ ಅತ್ಥಿ ಜೀವಿತಿನ್ದ್ರಿಯನ್ತಿ? ಆಮನ್ತಾ. ಕತಮಕ್ಖನ್ಧಪರಿಯಾಪನ್ನನ್ತಿ? ಸಙ್ಖಾರಕ್ಖನ್ಧಪರಿಯಾಪನ್ನನ್ತಿ. ಅಸಞ್ಞಸತ್ತಾನಂ ಅತ್ಥಿ ಸಙ್ಖಾರಕ್ಖನ್ಧೋತಿ? ನ ಹೇವಂ ವತ್ತಬ್ಬೇ…ಪೇ….

ಅಸಞ್ಞಸತ್ತಾನಂ ಅತ್ಥಿ ಸಙ್ಖಾರಕ್ಖನ್ಧೋತಿ? ಆಮನ್ತಾ. ಅಸಞ್ಞಸತ್ತಾನಂ ಅತ್ಥಿ ವೇದನಾಕ್ಖನ್ಧೋ…ಪೇ… ಸಞ್ಞಾಕ್ಖನ್ಧೋ…ಪೇ… ವಿಞ್ಞಾಣಕ್ಖನ್ಧೋತಿ? ನ ಹೇವಂ ವತ್ತಬ್ಬೇ…ಪೇ….

ಅಸಞ್ಞಸತ್ತಾನಂ ಅತ್ಥಿ ವೇದನಾಕ್ಖನ್ಧೋ…ಪೇ… ಸಞ್ಞಾಕ್ಖನ್ಧೋ…ಪೇ… ವಿಞ್ಞಾಣಕ್ಖನ್ಧೋತಿ? ಆಮನ್ತಾ. ಪಞ್ಚವೋಕಾರಭವೋತಿ? ನ ಹೇವಂ ವತ್ತಬ್ಬೇ…ಪೇ….

೫೪೪. ಉಪಪತ್ತೇಸಿಯೇನ ಚಿತ್ತೇನ ಸಮುಟ್ಠಿತಂ ಜೀವಿತಿನ್ದ್ರಿಯಂ ಉಪಪತ್ತೇಸಿಯೇ ಚಿತ್ತೇ ಭಿಜ್ಜಮಾನೇ ಏಕದೇಸಂ ಭಿಜ್ಜತೀತಿ? ಆಮನ್ತಾ. ಉಪಪತ್ತೇಸಿಯೇನ ಚಿತ್ತೇನ ಸಮುಟ್ಠಿತೋ ಫಸ್ಸೋ ಉಪಪತ್ತೇಸಿಯೇ ಚಿತ್ತೇ ಭಿಜ್ಜಮಾನೇ ಏಕದೇಸೋ ಭಿಜ್ಜತೀತಿ? ನ ಹೇವಂ ವತ್ತಬ್ಬೇ…ಪೇ….

ಉಪಪತ್ತೇಸಿಯೇನ ಚಿತ್ತೇನ ಸಮುಟ್ಠಿತೋ ಫಸ್ಸೋ ಉಪಪತ್ತೇಸಿಯೇ ಚಿತ್ತೇ ಭಿಜ್ಜಮಾನೇ ಅನವಸೇಸೋ ಭಿಜ್ಜತೀತಿ? ಆಮನ್ತಾ. ಉಪಪತ್ತೇಸಿಯೇನ ಚಿತ್ತೇನ ಸಮುಟ್ಠಿತಂ ಜೀವಿತಿನ್ದ್ರಿಯಂ ಉಪಪತ್ತೇಸಿಯೇ ಚಿತ್ತೇ ಭಿಜ್ಜಮಾನೇ ಅನವಸೇಸಂ ಭಿಜ್ಜತೀತಿ? ನ ಹೇವಂ ವತ್ತಬ್ಬೇ…ಪೇ….

೫೪೫. ದ್ವೇ ಜೀವಿತಿನ್ದ್ರಿಯಾನೀತಿ? ಆಮನ್ತಾ. ದ್ವೀಹಿ ಜೀವಿತೇಹಿ ಜೀವತಿ, ದ್ವೀಹಿ ಮರಣೇಹಿ ಮೀಯತೀತಿ? ಆಮನ್ತಾ [ನ ಹೇವಂ ವತ್ತಬ್ಬೇ (ಸ್ಯಾ. ಕಂ. ಪೀ.)].

ಜೀವಿತಿನ್ದ್ರಿಯಕಥಾ ನಿಟ್ಠಿತಾ.