(೫೯) ೭. ಆಕಾಸೋ ಸನಿದಸ್ಸನೋತಿಕಥಾ

೪೬೩. ಆಕಾಸೋ ಸನಿದಸ್ಸನೋತಿ? ಆಮನ್ತಾ. ರೂಪಂ ರೂಪಾಯತನಂ ರೂಪಧಾತು ನೀಲಂ ಪೀತಕಂ ಲೋಹಿತಕಂ ಓದಾತಂ ಚಕ್ಖುವಿಞ್ಞೇಯ್ಯಂ ಚಕ್ಖುಸ್ಮಿಂ ಪಟಿಹಞ್ಞತಿ ಚಕ್ಖುಸ್ಸ ಆಪಾಥಂ ಆಗಚ್ಛತೀತಿ? ನ ಹೇವಂ ವತ್ತಬ್ಬೇ…ಪೇ….

ಆಕಾಸೋ ಸನಿದಸ್ಸನೋತಿ? ಆಮನ್ತಾ. ಚಕ್ಖುಞ್ಚ ಪಟಿಚ್ಚ ಆಕಾಸಞ್ಚ ಉಪ್ಪಜ್ಜತಿ ಚಕ್ಖುವಿಞ್ಞಾಣನ್ತಿ? ನ ಹೇವಂ ವತ್ತಬ್ಬೇ …ಪೇ….

ಚಕ್ಖುಞ್ಚ ಪಟಿಚ್ಚ ಆಕಾಸಞ್ಚ ಉಪ್ಪಜ್ಜತಿ ಚಕ್ಖುವಿಞ್ಞಾಣನ್ತಿ? ಆಮನ್ತಾ. ‘‘ಚಕ್ಖುಞ್ಚ ಪಟಿಚ್ಚ ಆಕಾಸಞ್ಚ ಉಪ್ಪಜ್ಜತಿ ಚಕ್ಖುವಿಞ್ಞಾಣ’’ನ್ತಿ – ಅತ್ಥೇವ [ಅತ್ಥಿ (?)] ಸುತ್ತನ್ತೋತಿ? ನತ್ಥಿ. ‘‘ಚಕ್ಖುಞ್ಚ ಪಟಿಚ್ಚ ರೂಪೇ ಚ ಉಪ್ಪಜ್ಜತಿ ಚಕ್ಖುವಿಞ್ಞಾಣ’’ನ್ತಿ [ಮ. ನಿ. ೧.೪೦೦; ೩.೪೨೧; ಸಂ. ನಿ. ೪.೬೦] – ಅತ್ಥೇವ ಸುತ್ತನ್ತೋತಿ? ಆಮನ್ತಾ. ಹಞ್ಚಿ ‘‘ಚಕ್ಖುಞ್ಚ ಪಟಿಚ್ಚ ರೂಪೇ ಚ ಉಪ್ಪಜ್ಜತಿ ಚಕ್ಖುವಿಞ್ಞಾಣ’’ನ್ತಿ – ಅತ್ಥೇವ ಸುತ್ತನ್ತೋ, ನೋ ಚ ವತ ರೇ ವತ್ತಬ್ಬೇ – ‘‘ಚಕ್ಖುಞ್ಚ ಪಟಿಚ್ಚ ಆಕಾಸಞ್ಚ ಉಪ್ಪಜ್ಜತಿ ಚಕ್ಖುವಿಞ್ಞಾಣ’’ನ್ತಿ.

೪೬೪. ನ ವತ್ತಬ್ಬಂ – ‘‘ಆಕಾಸೋ ಸನಿದಸ್ಸನೋ’’ತಿ? ಆಮನ್ತಾ. ನನು ಪಸ್ಸತಿ ದ್ವಿನ್ನಂ ರುಕ್ಖಾನಂ ಅನ್ತರಂ, ದ್ವಿನ್ನಂ ಥಮ್ಭಾನಂ ಅನ್ತರಂ, ತಾಳಚ್ಛಿದ್ದಂ ವಾತಪಾನಚ್ಛಿದ್ದನ್ತಿ? ಆಮನ್ತಾ. ಹಞ್ಚಿ ಪಸ್ಸತಿ ದ್ವಿನ್ನಂ ರುಕ್ಖಾನಂ ಅನ್ತರಂ, ದ್ವಿನ್ನಂ ಥಮ್ಭಾನಂ ಅನ್ತರಂ, ತಾಳಚ್ಛಿದ್ದಂ ವಾತಪಾನಚ್ಛಿದ್ದಂ, ತೇನ ವತ ರೇ ವತ್ತಬ್ಬೇ – ‘‘ಆಕಾಸೋ ಸನಿದಸ್ಸನೋ’’ತಿ.

ಆಕಾಸೋ ಸನಿದಸ್ಸನೋತಿಕಥಾ ನಿಟ್ಠಿತಾ.