೬. ಛಟ್ಠವಗ್ಗೋ

(೫೮) ೬. ಆಕಾಸಕಥಾ

೪೬೦. ಆಕಾಸೋ ಅಸಙ್ಖತೋತಿ? ಆಮನ್ತಾ. ನಿಬ್ಬಾನಂ ತಾಣಂ ಲೇಣಂ ಸರಣಂ ಪರಾಯನಂ ಅಚ್ಚುತಂ ಅಮತನ್ತಿ? ನ ಹೇವಂ ವತ್ತಬ್ಬೇ…ಪೇ… ಆಕಾಸೋ ಅಸಙ್ಖತೋ, ನಿಬ್ಬಾನಂ ಅಸಙ್ಖತನ್ತಿ? ಆಮನ್ತಾ. ದ್ವೇ ಅಸಙ್ಖತಾನೀತಿ? ನ ಹೇವಂ ವತ್ತಬ್ಬೇ…ಪೇ…. ದ್ವೇ ಅಸಙ್ಖತಾನೀತಿ? ಆಮನ್ತಾ. ದ್ವೇ ತಾಣಾನಿ…ಪೇ… ಅನ್ತರಿಕಾ ವಾತಿ? ನ ಹೇವಂ ವತ್ತಬ್ಬೇ…ಪೇ….

ಆಕಾಸೋ ಅಸಙ್ಖತೋತಿ? ಆಮನ್ತಾ. ಅತ್ಥಿ ಕೇಚಿ ಅನಾಕಾಸಂ ಆಕಾಸಂ ಕರೋನ್ತೀತಿ? ಆಮನ್ತಾ. ಅತ್ಥಿ ಕೇಚಿ ಸಙ್ಖತಂ ಅಸಙ್ಖತಂ ಕರೋನ್ತೀತಿ? ನ ಹೇವಂ ವತ್ತಬ್ಬೇ…ಪೇ… ಅತ್ಥಿ ಕೇಚಿ ಆಕಾಸಂ ಅನಾಕಾಸಂ ಕರೋನ್ತೀತಿ? ಆಮನ್ತಾ. ಅತ್ಥಿ ಕೇಚಿ ಅಸಙ್ಖತಂ ಸಙ್ಖತಂ ಕರೋನ್ತೀತಿ? ನ ಹೇವಂ ವತ್ತಬ್ಬೇ…ಪೇ….

ಆಕಾಸೇ ಪಕ್ಖಿನೋ ಗಚ್ಛನ್ತಿ, ಚನ್ದಿಮಸೂರಿಯಾ ಗಚ್ಛನ್ತಿ, ತಾರಕರೂಪಾನಿ ಗಚ್ಛನ್ತಿ, ಇದ್ಧಿಂ ವಿಕುಬ್ಬನ್ತಿ, ಬಾಹುಂ ಚಾಲೇನ್ತಿ, ಪಾಣಿಂ ಚಾಲೇನ್ತಿ, ಲೇಡ್ಡುಂ ಖಿಪನ್ತಿ, ಲಗುಳಂ ಖಿಪನ್ತಿ, ಇದ್ಧಿಂ [ಸತ್ತಿಂ (?)] ಖಿಪನ್ತಿ, ಉಸುಂ ಖಿಪನ್ತೀತಿ? ಆಮನ್ತಾ. ಅಸಙ್ಖತೇ ಪಕ್ಖಿನೋ ಗಚ್ಛನ್ತಿ, ಚನ್ದಿಮಸೂರಿಯಾ ಗಚ್ಛನ್ತಿ, ತಾರಕರೂಪಾನಿ ಗಚ್ಛನ್ತಿ, ಇದ್ಧಿಂ ವಿಕುಬ್ಬನ್ತಿ, ಬಾಹುಂ ಚಾಲೇನ್ತಿ, ಪಾಣಿಂ ಚಾಲೇನ್ತಿ, ಲೇಡ್ಡುಂ ಖಿಪನ್ತಿ, ಲಗುಳಂ ಖಿಪನ್ತಿ, ಇದ್ಧಿಂ ಖಿಪನ್ತಿ, ಉಸುಂ ಖಿಪನ್ತೀತಿ? ನ ಹೇವಂ ವತ್ತಬ್ಬೇ…ಪೇ….

೪೬೧. ಆಕಾಸಂ ಪರಿವಾರೇತ್ವಾ ಘರಾನಿ ಕರೋನ್ತಿ ಕೋಟ್ಠಾನಿ ಕರೋನ್ತೀತಿ? ಆಮನ್ತಾ. ಅಸಙ್ಖತಂ ಪರಿವಾರೇತ್ವಾ ಘರಾನಿ ಕರೋನ್ತಿ ಕೋಟ್ಠಾನಿ ಕರೋನ್ತೀತಿ? ನ ಹೇವಂ ವತ್ತಬ್ಬೇ…ಪೇ….

ಉದಪಾನೇ ಖಞ್ಞಮಾನೇ ಅನಾಕಾಸೋ ಆಕಾಸೋ ಹೋತೀತಿ? ಆಮನ್ತಾ. ಸಙ್ಖತಂ ಅಸಙ್ಖತಂ ಹೋತೀತಿ? ನ ಹೇವಂ ವತ್ತಬ್ಬೇ…ಪೇ….

ತುಚ್ಛಉದಪಾನೇ ಪೂರಿಯಮಾನೇ, ತುಚ್ಛಕೋಟ್ಠೇ ಪೂರಿಯಮಾನೇ, ತುಚ್ಛಕುಮ್ಭಿಯಾ ಪೂರಿಯಮಾನಾಯ ಆಕಾಸೋ ಅನ್ತರಧಾಯತೀತಿ? ಆಮನ್ತಾ. ಅಸಙ್ಖತಂ ಅನ್ತರಧಾಯತೀತಿ? ನ ಹೇವಂ ವತ್ತಬ್ಬೇ…ಪೇ….

೪೬೨. ನ ವತ್ತಬ್ಬಂ – ‘‘ಆಕಾಸೋ ಅಸಙ್ಖತೋ’’ತಿ? ಆಮನ್ತಾ. ಆಕಾಸೋ ಸಙ್ಖತೋತಿ? ನ ಹೇವಂ ವತ್ತಬ್ಬೇ…ಪೇ… ತೇನ ಹಿ ಆಕಾಸೋ ಅಸಙ್ಖತೋತಿ.

ಆಕಾಸಕಥಾ ನಿಟ್ಠಿತಾ.