(೩೬) ೪. ಸಮನ್ನಾಗತಕಥಾ

೩೯೩. ಅರಹಾ ಚತೂಹಿ ಫಲೇಹಿ ಸಮನ್ನಾಗತೋತಿ? ಆಮನ್ತಾ. ಅರಹಾ ಚತೂಹಿ ಫಸ್ಸೇಹಿ ಚತೂಹಿ ವೇದನಾಹಿ ಚತೂಹಿ ಸಞ್ಞಾಹಿ ಚತೂಹಿ ಚೇತನಾಹಿ ಚತೂಹಿ ಚಿತ್ತೇಹಿ ಚತೂಹಿ ಸದ್ಧಾಹಿ ಚತೂಹಿ ವೀರಿಯೇಹಿ ಚತೂಹಿ ಸತೀಹಿ ಚತೂಹಿ ಸಮಾಧೀಹಿ ಚತೂಹಿ ಪಞ್ಞಾಹಿ ಸಮನ್ನಾಗತೋತಿ? ನ ಹೇವಂ ವತ್ತಬ್ಬೇ…ಪೇ….

ಅನಾಗಾಮೀ ತೀಹಿ ಫಲೇಹಿ ಸಮನ್ನಾಗತೋತಿ? ಆಮನ್ತಾ. ಅನಾಗಾಮೀ ತೀಹಿ ಫಸ್ಸೇಹಿ…ಪೇ… ತೀಹಿ ಪಞ್ಞಾಹಿ ಸಮನ್ನಾಗತೋತಿ? ನ ಹೇವಂ ವತ್ತಬ್ಬೇ…ಪೇ….

ಸಕದಾಗಾಮೀ ದ್ವೀಹಿ ಫಲೇಹಿ ಸಮನ್ನಾಗತೋತಿ? ಆಮನ್ತಾ. ಸಕದಾಗಾಮೀ ದ್ವೀಹಿ ಫಸ್ಸೇಹಿ…ಪೇ… ದ್ವೀಹಿ ಪಞ್ಞಾಹಿ ಸಮನ್ನಾಗತೋತಿ? ನ ಹೇವಂ ವತ್ತಬ್ಬೇ…ಪೇ….

ಅರಹಾ ಸೋತಾಪತ್ತಿಫಲೇನ ಸಮನ್ನಾಗತೋತಿ? ಆಮನ್ತಾ. ಅರಹಾ ಸೋತಾಪನ್ನೋ ಸತ್ತಕ್ಖತ್ತುಪರಮೋ, ಕೋಲಙ್ಕೋಲೋ, ಏಕಬೀಜೀತಿ? ನ ಹೇವಂ ವತ್ತಬ್ಬೇ…ಪೇ… ಅರಹಾ ಸಕದಾಗಾಮಿಫಲೇನ ಸಮನ್ನಾಗತೋತಿ? ಆಮನ್ತಾ. ಅರಹಾ ಸಕದಾಗಾಮೀತಿ? ನ ಹೇವಂ ವತ್ತಬ್ಬೇ …ಪೇ… ಅರಹಾ ಅನಾಗಾಮಿಫಲೇನ ಸಮನ್ನಾಗತೋತಿ? ಆಮನ್ತಾ. ಅರಹಾ ಅನಾಗಾಮೀ, ಅನ್ತರಾಪರಿನಿಬ್ಬಾಯೀ, ಉಪಹಚ್ಚಪರಿನಿಬ್ಬಾಯೀ, ಅಸಙ್ಖಾರಪರಿನಿಬ್ಬಾಯೀ, ಸಸಙ್ಖಾರಪರಿನಿಬ್ಬಾಯೀ, ಉದ್ಧಂಸೋತೋ ಅಕನಿಟ್ಠಗಾಮೀತಿ? ನ ಹೇವಂ ವತ್ತಬ್ಬೇ…ಪೇ….

ಅನಾಗಾಮೀ ಸೋತಾಪತ್ತಿಫಲೇನ ಸಮನ್ನಾಗತೋತಿ? ಆಮನ್ತಾ. ಅನಾಗಾಮೀ ಸೋತಾಪನ್ನೋ ಸತ್ತಕ್ಖತ್ತುಪರಮೋ, ಕೋಲಙ್ಕೋಲೋ, ಏಕಬೀಜೀತಿ? ನ ಹೇವಂ ವತ್ತಬ್ಬೇ …ಪೇ… ಅನಾಗಾಮೀ ಸಕದಾಗಾಮಿಫಲೇನ ಸಮನ್ನಾಗತೋತಿ? ಆಮನ್ತಾ. ಅನಾಗಾಮೀ ಸಕದಾಗಾಮೀತಿ? ನ ಹೇವಂ ವತ್ತಬ್ಬೇ…ಪೇ….

ಸಕದಾಗಾಮೀ ಸೋತಾಪತ್ತಿಫಲೇನ ಸಮನ್ನಾಗತೋತಿ? ಆಮನ್ತಾ. ಸಕದಾಗಾಮೀ ಸೋತಾಪನ್ನೋ ಸತ್ತಕ್ಖತ್ತುಪರಮೋ, ಕೋಲಙ್ಕೋಲೋ, ಏಕಬೀಜೀತಿ? ನ ಹೇವಂ ವತ್ತಬ್ಬೇ…ಪೇ….

೩೯೪. ಸೋತಾಪತ್ತಿಫಲೇನ ಸಮನ್ನಾಗತೋ ‘‘ಸೋತಾಪನ್ನೋ’’ತಿ ವತ್ತಬ್ಬೋತಿ? ಆಮನ್ತಾ. ಅರಹಾ ಸೋತಾಪತ್ತಿಫಲೇನ ಸಮನ್ನಾಗತೋತಿ? ಆಮನ್ತಾ. ಸ್ವೇವ ಅರಹಾ, ಸೋ ಸೋತಾಪನ್ನೋತಿ? ನ ಹೇವಂ ವತ್ತಬ್ಬೇ…ಪೇ….

ಸಕದಾಗಾಮಿಫಲೇನ ಸಮನ್ನಾಗತೋ ‘‘ಸಕದಾಗಾಮೀ’’ತಿ ವತ್ತಬ್ಬೋತಿ? ಆಮನ್ತಾ. ಅರಹಾ ಸಕದಾಗಾಮಿಫಲೇನ ಸಮನ್ನಾಗತೋತಿ? ಆಮನ್ತಾ. ಸ್ವೇವ ಅರಹಾ, ಸೋ ಸಕದಾಗಾಮೀತಿ? ನ ಹೇವಂ ವತ್ತಬ್ಬೇ…ಪೇ….

ಅನಾಗಾಮಿಫಲೇನ ಸಮನ್ನಾಗತೋ ‘‘ಅನಾಗಾಮೀ’’ತಿ ವತ್ತಬ್ಬೋತಿ? ಆಮನ್ತಾ. ಅರಹಾ ಅನಾಗಾಮಿಫಲೇನ ಸಮನ್ನಾಗತೋತಿ? ಆಮನ್ತಾ. ಸ್ವೇವ ಅರಹಾ, ಸೋ ಅನಾಗಾಮೀತಿ? ನ ಹೇವಂ ವತ್ತಬ್ಬೇ…ಪೇ….

ಸೋತಾಪತ್ತಿಫಲೇನ ಸಮನ್ನಾಗತೋ ‘‘ಸೋತಾಪನ್ನೋ’’ತಿ ವತ್ತಬ್ಬೋತಿ? ಆಮನ್ತಾ. ಅನಾಗಾಮೀ ಸೋತಾಪತ್ತಿಫಲೇನ ಸಮನ್ನಾಗತೋತಿ? ಆಮನ್ತಾ. ಸ್ವೇವ ಅನಾಗಾಮೀ, ಸೋ ಸೋತಾಪನ್ನೋತಿ? ನ ಹೇವಂ ವತ್ತಬ್ಬೇ…ಪೇ….

ಸಕದಾಗಾಮಿಫಲೇನ ಸಮನ್ನಾಗತೋ ‘‘ಸಕದಾಗಾಮೀ’’ತಿ ವತ್ತಬ್ಬೋತಿ? ಆಮನ್ತಾ. ಅನಾಗಾಮೀ ಸಕದಾಗಾಮಿಫಲೇನ ಸಮನ್ನಾಗತೋತಿ? ಆಮನ್ತಾ. ಸ್ವೇವ ಅನಾಗಾಮೀ, ಸೋ ಸಕದಾಗಾಮೀತಿ? ನ ಹೇವಂ ವತ್ತಬ್ಬೇ…ಪೇ….

ಸೋತಾಪತ್ತಿಫಲೇನ ಸಮನ್ನಾಗತೋ ‘‘ಸೋತಾಪನ್ನೋ’’ತಿ ವತ್ತಬ್ಬೋತಿ? ಆಮನ್ತಾ. ಸಕದಾಗಾಮೀ ಸೋತಾಪತ್ತಿಫಲೇನ ಸಮನ್ನಾಗತೋತಿ? ಆಮನ್ತಾ. ಸ್ವೇವ ಸಕದಾಗಾಮೀ, ಸೋ ಸೋತಾಪನ್ನೋತಿ? ನ ಹೇವಂ ವತ್ತಬ್ಬೇ…ಪೇ….

೩೯೫. ಅರಹಾ ಸೋತಾಪತ್ತಿಫಲೇನ ಸಮನ್ನಾಗತೋತಿ? ಆಮನ್ತಾ. ನನು ಅರಹಾ ಸೋತಾಪತ್ತಿಫಲಂ ವೀತಿವತ್ತೋತಿ? ಆಮನ್ತಾ. ಹಞ್ಚಿ ಅರಹಾ ಸೋತಾಪತ್ತಿಫಲಂ ವೀತಿವತ್ತೋ, ನೋ ಚ ವತ ರೇ ವತ್ತಬ್ಬೇ – ‘‘ಅರಹಾ ಸೋತಾಪತ್ತಿಫಲೇನ ಸಮನ್ನಾಗತೋ’’ತಿ.

ಅರಹಾ ಸೋತಾಪತ್ತಿಫಲಂ ವೀತಿವತ್ತೋ ತೇನ ಸಮನ್ನಾಗತೋತಿ? ಆಮನ್ತಾ. ಅರಹಾ ಸೋತಾಪತ್ತಿಮಗ್ಗಂ ವೀತಿವತ್ತೋ, ಸಕ್ಕಾಯದಿಟ್ಠಿಂ ವಿಚಿಕಿಚ್ಛಂ ಸೀಲಬ್ಬತಪರಾಮಾಸಂ, ಅಪಾಯಗಮನೀಯಂ ರಾಗಂ, ಅಪಾಯಗಮನೀಯಂ ದೋಸಂ, ಅಪಾಯಗಮನೀಯಂ ಮೋಹಂ ವೀತಿವತ್ತೋ ತೇನ ಸಮನ್ನಾಗತೋತಿ? ನ ಹೇವಂ ವತ್ತಬ್ಬೇ…ಪೇ….

ಅರಹಾ ಸಕದಾಗಾಮಿಫಲೇನ ಸಮನ್ನಾಗತೋತಿ? ಆಮನ್ತಾ. ನನು ಅರಹಾ ಸಕದಾಗಾಮಿಫಲಂ ವೀತಿವತ್ತೋತಿ? ಆಮನ್ತಾ. ಹಞ್ಚಿ ಅರಹಾ ಸಕದಾಗಾಮಿಫಲಂ ವೀತಿವತ್ತೋ, ನೋ ಚ ವತ ರೇ ವತ್ತಬ್ಬೇ – ‘‘ಅರಹಾ ಸಕದಾಗಾಮಿಫಲೇನ ಸಮನ್ನಾಗತೋ’’ತಿ.

ಅರಹಾ ಸಕದಾಗಾಮಿಫಲಂ ವೀತಿವತ್ತೋ ತೇನ ಸಮನ್ನಾಗತೋತಿ? ಆಮನ್ತಾ. ಅರಹಾ ಸಕದಾಗಾಮಿಮಗ್ಗಂ ವೀತಿವತ್ತೋ, ಓಳಾರಿಕಂ ಕಾಮರಾಗಂ, ಓಳಾರಿಕಂ ಬ್ಯಾಪಾದಂ ವೀತಿವತ್ತೋ ತೇನ ಸಮನ್ನಾಗತೋತಿ? ನ ಹೇವಂ ವತ್ತಬ್ಬೇ…ಪೇ….

ಅರಹಾ ಅನಾಗಾಮಿಫಲೇನ ಸಮನ್ನಾಗತೋತಿ? ಆಮನ್ತಾ. ನನು ಅರಹಾ ಅನಾಗಾಮಿಫಲಂ ವೀತಿವತ್ತೋತಿ? ಆಮನ್ತಾ. ಹಞ್ಚಿ ಅರಹಾ ಅನಾಗಾಮಿಫಲಂ ವೀತಿವತ್ತೋ, ನೋ ಚ ವತ ರೇ ವತ್ತಬ್ಬೇ – ‘‘ಅರಹಾ ಅನಾಗಾಮಿಫಲೇನ ಸಮನ್ನಾಗತೋ’’ತಿ.

ಅರಹಾ ಅನಾಗಾಮಿಫಲಂ ವೀತಿವತ್ತೋ ತೇನ ಸಮನ್ನಾಗತೋತಿ? ಆಮನ್ತಾ. ಅರಹಾ ಅನಾಗಾಮಿಮಗ್ಗಂ ವೀತಿವತ್ತೋ, ಅಣುಸಹಗತಂ ಕಾಮರಾಗಂ, ಅಣುಸಹಗತಂ ಬ್ಯಾಪಾದಂ ವೀತಿವತ್ತೋ ತೇನ ಸಮನ್ನಾಗತೋತಿ? ನ ಹೇವಂ ವತ್ತಬ್ಬೇ…ಪೇ….

ಅನಾಗಾಮೀ ಸೋತಾಪತ್ತಿಫಲೇನ ಸಮನ್ನಾಗತೋತಿ? ಆಮನ್ತಾ. ನನು ಅನಾಗಾಮೀ ಸೋತಾಪತ್ತಿಫಲಂ ವೀತಿವತ್ತೋತಿ? ಆಮನ್ತಾ. ಹಞ್ಚಿ ಅನಾಗಾಮೀ ಸೋತಾಪತ್ತಿಫಲಂ ವೀತಿವತ್ತೋ, ನೋ ಚ ವತ ರೇ ವತ್ತಬ್ಬೇ – ‘‘ಅನಾಗಾಮೀ ಸೋತಾಪತ್ತಿಫಲೇನ ಸಮನ್ನಾಗತೋ’’ತಿ.

ಅನಾಗಾಮೀ ಸೋತಾಪತ್ತಿಫಲಂ ವೀತಿವತ್ತೋ ತೇನ ಸಮನ್ನಾಗತೋತಿ? ಆಮನ್ತಾ. ಅನಾಗಾಮೀ ಸೋತಾಪತ್ತಿಮಗ್ಗಂ ವೀತಿವತ್ತೋ, ಸಕ್ಕಾಯದಿಟ್ಠಿಂ…ಪೇ… ಅಪಾಯಗಮನೀಯಂ ಮೋಹಂ ವೀತಿವತ್ತೋ ತೇನ ಸಮನ್ನಾಗತೋತಿ? ನ ಹೇವಂ ವತ್ತಬ್ಬೇ…ಪೇ….

ಅನಾಗಾಮೀ ಸಕದಾಗಾಮಿಫಲೇನ ಸಮನ್ನಾಗತೋತಿ? ಆಮನ್ತಾ. ನನು ಅನಾಗಾಮೀ ಸಕದಾಗಾಮಿಫಲಂ ವೀತಿವತ್ತೋತಿ? ಆಮನ್ತಾ. ಹಞ್ಚಿ ಅನಾಗಾಮೀ ಸಕದಾಗಾಮಿಫಲಂ ವೀತಿವತ್ತೋ, ನೋ ಚ ವತ ರೇ ವತ್ತಬ್ಬೇ – ‘‘ಅನಾಗಾಮೀ ಸಕದಾಗಾಮಿಫಲೇನ ಸಮನ್ನಾಗತೋ’’ತಿ.

ಅನಾಗಾಮೀ ಸಕದಾಗಾಮಿಫಲಂ ವೀತಿವತ್ತೋ ತೇನ ಸಮನ್ನಾಗತೋತಿ? ಆಮನ್ತಾ. ಅನಾಗಾಮೀ ಸಕದಾಗಾಮಿಮಗ್ಗಂ ವೀತಿವತ್ತೋ, ಓಳಾರಿಕಂ ಕಾಮರಾಗಂ, ಓಳಾರಿಕಂ ಬ್ಯಾಪಾದಂ ವೀತಿವತ್ತೋ ತೇನ ಸಮನ್ನಾಗತೋತಿ? ನ ಹೇವಂ ವತ್ತಬ್ಬೇ…ಪೇ….

ಸಕದಾಗಾಮೀ ಸೋತಾಪತ್ತಿಫಲೇನ ಸಮನ್ನಾಗತೋತಿ? ಆಮನ್ತಾ. ನನು ಸಕದಾಗಾಮೀ ಸೋತಾಪತ್ತಿಫಲಂ ವೀತಿವತ್ತೋತಿ? ಆಮನ್ತಾ. ಹಞ್ಚಿ ಸಕದಾಗಾಮೀ ಸೋತಾಪತ್ತಿಫಲಂ ವೀತಿವತ್ತೋ, ನೋ ಚ ವತ ರೇ ವತ್ತಬ್ಬೇ – ‘‘ಸಕದಾಗಾಮೀ ಸೋತಾಪತ್ತಿಫಲೇನ ಸಮನ್ನಾಗತೋ’’ತಿ.

ಸಕದಾಗಾಮೀ ಸೋತಾಪತ್ತಿಫಲಂ ವೀತಿವತ್ತೋ ತೇನ ಸಮನ್ನಾಗತೋತಿ? ಆಮನ್ತಾ. ಸಕದಾಗಾಮೀ ಸೋತಾಪತ್ತಿಮಗ್ಗಂ ವೀತಿವತ್ತೋ, ಸಕ್ಕಾಯದಿಟ್ಠಿಂ…ಪೇ… ಅಪಾಯಗಮನೀಯಂ ಮೋಹಂ ವೀತಿವತ್ತೋ ತೇನ ಸಮನ್ನಾಗತೋತಿ? ನ ಹೇವಂ ವತ್ತಬ್ಬೇ…ಪೇ….

೩೯೬. ನ ವತ್ತಬ್ಬಂ – ‘‘ಅರಹಾ ಚತೂಹಿ ಫಲೇಹಿ ಸಮನ್ನಾಗತೋ’’ತಿ? ಆಮನ್ತಾ. ನನು ಅರಹತಾ ಚತ್ತಾರಿ ಫಲಾನಿ ಪಟಿಲದ್ಧಾನಿ, ತೇಹಿ ಚ ಅಪರಿಹೀನೋತಿ? ಆಮನ್ತಾ. ಹಞ್ಚಿ ಅರಹತಾ ಚತ್ತಾರಿ ಫಲಾನಿ ಪಟಿಲದ್ಧಾನಿ ತೇಹಿ ಚ ಅಪರಿಹೀನೋ, ತೇನ ವತ ರೇ ವತ್ತಬ್ಬೇ – ‘‘ಅರಹಾ ಚತೂಹಿ ಫಲೇಹಿ ಸಮನ್ನಾಗತೋ’’ತಿ.

ನ ವತ್ತಬ್ಬಂ – ‘‘ಅನಾಗಾಮೀ ತೀಹಿ ಫಲೇಹಿ ಸಮನ್ನಾಗತೋ’’ತಿ? ಆಮನ್ತಾ. ನನು ಅನಾಗಾಮಿನಾ ತೀಣಿ ಫಲಾನಿ ಪಟಿಲದ್ಧಾನಿ, ತೇಹಿ ಚ ಅಪರಿಹೀನೋತಿ? ಆಮನ್ತಾ. ಹಞ್ಚಿ ಅನಾಗಾಮಿನಾ ತೀಣಿ ಫಲಾನಿ ಪಟಿಲದ್ಧಾನಿ ತೇಹಿ ಚ ಅಪರಿಹೀನೋ, ತೇನ ವತ ರೇ ವತ್ತಬ್ಬೇ – ‘‘ಅನಾಗಾಮೀ ತೀಹಿ ಫಲೇಹಿ ಸಮನ್ನಾಗತೋ’’ತಿ.

ನ ವತ್ತಬ್ಬಂ – ‘‘ಸಕದಾಗಾಮೀ ದ್ವೀಹಿ ಫಲೇಹಿ ಸಮನ್ನಾಗತೋ’’ತಿ? ಆಮನ್ತಾ. ನನು ಸಕದಾಗಾಮಿನಾ ದ್ವೇ ಫಲಾನಿ ಪಟಿಲದ್ಧಾನಿ, ತೇಹಿ ಚ ಅಪರಿಹೀನೋತಿ? ಆಮನ್ತಾ. ಹಞ್ಚಿ ಸಕದಾಗಾಮಿನಾ ದ್ವೇ ಫಲಾನಿ ಪಟಿಲದ್ಧಾನಿ ತೇಹಿ ಚ ಅಪರಿಹೀನೋ, ತೇನ ವತ ರೇ ವತ್ತಬ್ಬೇ – ‘‘ಸಕದಾಗಾಮೀ ದ್ವೀಹಿ ಫಲೇಹಿ ಸಮನ್ನಾಗತೋ’’ತಿ.

ಅರಹತಾ ಚತ್ತಾರಿ ಫಲಾನಿ ಪಟಿಲದ್ಧಾನಿ ತೇಹಿ ಚ ಅಪರಿಹೀನೋತಿ, ಅರಹಾ ಚತೂಹಿ ಫಲೇಹಿ ಸಮನ್ನಾಗತೋತಿ? ಆಮನ್ತಾ. ಅರಹತಾ ಚತ್ತಾರೋ ಮಗ್ಗಾ ಪಟಿಲದ್ಧಾ ತೇಹಿ ಚ ಅಪರಿಹೀನೋತಿ, ಅರಹಾ ಚತೂಹಿ ಮಗ್ಗೇಹಿ ಸಮನ್ನಾಗತೋತಿ? ನ ಹೇವಂ ವತ್ತಬ್ಬೇ…ಪೇ….

ಅನಾಗಾಮಿನಾ ತೀಣಿ ಫಲಾನಿ ಪಟಿಲದ್ಧಾನಿ ತೇಹಿ ಚ ಅಪರಿಹೀನೋತಿ, ಅನಾಗಾಮೀ ತೀಹಿ ಫಲೇಹಿ ಸಮನ್ನಾಗತೋತಿ? ಆಮನ್ತಾ. ಅನಾಗಾಮಿನಾ ತಯೋ ಮಗ್ಗಾ ಪಟಿಲದ್ಧಾ ತೇಹಿ ಚ ಅಪರಿಹೀನೋತಿ, ಅನಾಗಾಮೀ ತೀಹಿ ಮಗ್ಗೇಹಿ ಸಮನ್ನಾಗತೋತಿ? ನ ಹೇವಂ ವತ್ತಬ್ಬೇ…ಪೇ….

ಸಕದಾಗಾಮಿನಾ ದ್ವೇ ಫಲಾನಿ ಪಟಿಲದ್ಧಾನಿ ತೇಹಿ ಚ ಅಪರಿಹೀನೋತಿ, ಸಕದಾಗಾಮೀ ದ್ವೀಹಿ ಫಲೇಹಿ ಸಮನ್ನಾಗತೋತಿ? ಆಮನ್ತಾ. ಸಕದಾಗಾಮಿನಾ ದ್ವೇ ಮಗ್ಗಾ ಪಟಿಲದ್ಧಾ, ತೇಹಿ ಚ ಅಪರಿಹೀನೋತಿ, ಸಕದಾಗಾಮೀ ದ್ವೀಹಿ ಮಗ್ಗೇಹಿ ಸಮನ್ನಾಗತೋತಿ? ನ ಹೇವಂ ವತ್ತಬ್ಬೇ…ಪೇ….

ಸಮನ್ನಾಗತಕಥಾ ನಿಟ್ಠಿತಾ.