(೨೮) ೮. ದಿಬ್ಬಸೋತಕಥಾ

೩೭೫. ಮಂಸಸೋತಂ ಧಮ್ಮುಪತ್ಥದ್ಧಂ ದಿಬ್ಬಸೋತಂ ಹೋತೀತಿ? ಆಮನ್ತಾ. ಮಂಸಸೋತಂ ದಿಬ್ಬಸೋತಂ, ದಿಬ್ಬಸೋತಂ ಮಂಸಸೋತನ್ತಿ? ನ ಹೇವಂ ವತ್ತಬ್ಬೇ…ಪೇ….

ಮಂಸಸೋತಂ ಧಮ್ಮುಪತ್ಥದ್ಧಂ ದಿಬ್ಬಸೋತಂ ಹೋತೀತಿ? ಆಮನ್ತಾ. ಯಾದಿಸಂ ಮಂಸಸೋತಂ ತಾದಿಸಂ ದಿಬ್ಬಸೋತಂ, ಯಾದಿಸಂ ದಿಬ್ಬಸೋತಂ ತಾದಿಸಂ ಮಂಸಸೋತನ್ತಿ? ನ ಹೇವಂ ವತ್ತಬ್ಬೇ…ಪೇ….

ಮಂಸಸೋತಂ ಧಮ್ಮುಪತ್ಥದ್ಧಂ ದಿಬ್ಬಸೋತಂ ಹೋತೀತಿ? ಆಮನ್ತಾ. ತಞ್ಞೇವ ಮಂಸಸೋತಂ ತಂ ದಿಬ್ಬಸೋತಂ, ತಂ ದಿಬ್ಬಸೋತಂ ತಂ ಮಂಸಸೋತನ್ತಿ? ನ ಹೇವಂ ವತ್ತಬ್ಬೇ…ಪೇ….

ಮಂಸಸೋತಂ ಧಮ್ಮುಪತ್ಥದ್ಧಂ ದಿಬ್ಬಸೋತಂ ಹೋತೀತಿ? ಆಮನ್ತಾ. ಯಾದಿಸೋ ಮಂಸಸೋತಸ್ಸ ವಿಸಯೋ ಆನುಭಾವೋ ಗೋಚರೋ ತಾದಿಸೋ ದಿಬ್ಬಸ್ಸ ಸೋತಸ್ಸ ವಿಸಯೋ ಆನುಭಾವೋ ಗೋಚರೋತಿ? ನ ಹೇವಂ ವತ್ತಬ್ಬೇ…ಪೇ….

ಮಂಸಸೋತಂ ಧಮ್ಮುಪತ್ಥದ್ಧಂ ದಿಬ್ಬಸೋತಂ ಹೋತೀತಿ? ಆಮನ್ತಾ. ಉಪಾದಿಣ್ಣಂ ಹುತ್ವಾ ಅನುಪಾದಿಣ್ಣಂ ಹೋತೀತಿ? ನ ಹೇವಂ ವತ್ತಬ್ಬೇ…ಪೇ….

ಉಪಾದಿಣ್ಣಂ ಹುತ್ವಾ ಅನುಪಾದಿಣ್ಣಂ ಹೋತೀತಿ? ಆಮನ್ತಾ. ಕಾಮಾವಚರಂ ಹುತ್ವಾ ರೂಪಾವಚರಂ ಹೋತೀತಿ? ನ ಹೇವಂ ವತ್ತಬ್ಬೇ…ಪೇ….

ಕಾಮಾವಚರಂ ಹುತ್ವಾ ರೂಪಾವಚರಂ ಹೋತೀತಿ? ಆಮನ್ತಾ. ರೂಪಾವಚರಂ ಹುತ್ವಾ ಅರೂಪಾವಚರಂ ಹೋತೀತಿ? ನ ಹೇವಂ ವತ್ತಬ್ಬೇ…ಪೇ….

ರೂಪಾವಚರಂ ಹುತ್ವಾ ಅರೂಪಾವಚರಂ ಹೋತೀತಿ? ಆಮನ್ತಾ. ಪರಿಯಾಪನ್ನಂ ಹುತ್ವಾ ಅಪರಿಯಾಪನ್ನಂ ಹೋತೀತಿ? ನ ಹೇವಂ ವತ್ತಬ್ಬೇ…ಪೇ….

೩೭೬. ಮಂಸಸೋತಂ ಧಮ್ಮುಪತ್ಥದ್ಧಂ ದಿಬ್ಬಸೋತಂ ಹೋತೀತಿ? ಆಮನ್ತಾ. ದಿಬ್ಬಸೋತಂ ಧಮ್ಮುಪತ್ಥದ್ಧಂ ಮಂಸಸೋತಂ ಹೋತೀತಿ? ನ ಹೇವಂ ವತ್ತಬ್ಬೇ…ಪೇ….

ಮಂಸಸೋತಂ ಧಮ್ಮುಪತ್ಥದ್ಧಂ ದಿಬ್ಬಸೋತಂ ಹೋತೀತಿ? ಆಮನ್ತಾ. ಏಕಂಯೇವ ಸೋತನ್ತಿ? ನ ಹೇವಂ ವತ್ತಬ್ಬೇ…ಪೇ….

ಏಕಂಯೇವ ಸೋತನ್ತಿ? ಆಮನ್ತಾ. ನನು ದ್ವೇ ಸೋತಾನಿ ವುತ್ತಾನಿ ಭಗವತಾ – ‘‘ಮಂಸಸೋತಂ, ದಿಬ್ಬಸೋತ’’ನ್ತಿ? ಆಮನ್ತಾ. ಹಞ್ಚಿ ದ್ವೇ ಸೋತಾನಿ ವುತ್ತಾನಿ ಭಗವತಾ – ಮಂಸಸೋತಂ, ದಿಬ್ಬಸೋತಂ, ನೋ ಚ ವತ ರೇ ವತ್ತಬ್ಬೇ – ‘‘ಏಕಞ್ಞೇವ ಸೋತ’’ನ್ತಿ.

ದಿಬ್ಬಸೋತಕಥಾ ನಿಟ್ಠಿತಾ.