(೨೭) ೭. ದಿಬ್ಬಚಕ್ಖುಕಥಾ

೩೭೩. ಮಂಸಚಕ್ಖುಂ ಧಮ್ಮುಪತ್ಥದ್ಧಂ ದಿಬ್ಬಚಕ್ಖುಂ ಹೋತೀತಿ? ಆಮನ್ತಾ. ಮಂಸಚಕ್ಖುಂ ದಿಬ್ಬಚಕ್ಖುಂ, ದಿಬ್ಬಚಕ್ಖುಂ ಮಂಸಚಕ್ಖುನ್ತಿ? ನ ಹೇವಂ ವತ್ತಬ್ಬೇ…ಪೇ….

ಮಂಸಚಕ್ಖುಂ ಧಮ್ಮುಪತ್ಥದ್ಧಂ ದಿಬ್ಬಚಕ್ಖುಂ ಹೋತೀತಿ? ಆಮನ್ತಾ. ಯಾದಿಸಂ ಮಂಸಚಕ್ಖುಂ ತಾದಿಸಂ ದಿಬ್ಬಚಕ್ಖುಂ, ಯಾದಿಸಂ ದಿಬ್ಬಚಕ್ಖುಂ ತಾದಿಸಂ ಮಂಸಚಕ್ಖುನ್ತಿ? ನ ಹೇವಂ ವತ್ತಬ್ಬೇ…ಪೇ….

ಮಂಸಚಕ್ಖುಂ ಧಮ್ಮುಪತ್ಥದ್ಧಂ ದಿಬ್ಬಚಕ್ಖುಂ ಹೋತೀತಿ? ಆಮನ್ತಾ. ತಞ್ಞೇವ ಮಂಸಚಕ್ಖುಂ ತಂ ದಿಬ್ಬಚಕ್ಖುಂ, ತಂ ದಿಬ್ಬಚಕ್ಖುಂ ತಂ ಮಂಸಚಕ್ಖುನ್ತಿ? ನ ಹೇವಂ ವತ್ತಬ್ಬೇ…ಪೇ….

ಮಂಸಚಕ್ಖುಂ ಧಮ್ಮುಪತ್ಥದ್ಧಂ ದಿಬ್ಬಚಕ್ಖುಂ ಹೋತೀತಿ? ಆಮನ್ತಾ. ಯಾದಿಸೋ ಮಂಸಚಕ್ಖುಸ್ಸ ವಿಸಯೋ ಆನುಭಾವೋ ಗೋಚರೋ ತಾದಿಸೋ ದಿಬ್ಬಸ್ಸ ಚಕ್ಖುಸ್ಸ ವಿಸಯೋ ಆನುಭಾವೋ ಗೋಚರೋತಿ? ನ ಹೇವಂ ವತ್ತಬ್ಬೇ…ಪೇ….

ಮಂಸಚಕ್ಖುಂ ಧಮ್ಮುಪತ್ಥದ್ಧಂ ದಿಬ್ಬಚಕ್ಖುಂ ಹೋತೀತಿ? ಆಮನ್ತಾ. ಉಪಾದಿಣ್ಣಂ [ಉಪಾದಿನ್ನಂ (ಸ್ಯಾ. ಕಂ.)] ಹುತ್ವಾ ಅನುಪಾದಿಣ್ಣಂ ಹೋತೀತಿ? ನ ಹೇವಂ ವತ್ತಬ್ಬೇ…ಪೇ….

ಉಪಾದಿಣ್ಣಂ ಹುತ್ವಾ ಅನುಪಾದಿಣ್ಣಂ ಹೋತೀತಿ? ಆಮನ್ತಾ. ಕಾಮಾವಚರಂ ಹುತ್ವಾ ರೂಪಾವಚರಂ ಹೋತೀತಿ? ನ ಹೇವಂ ವತ್ತಬ್ಬೇ…ಪೇ….

ಕಾಮಾವಚರಂ ಹುತ್ವಾ ರೂಪಾವಚರಂ ಹೋತೀತಿ? ಆಮನ್ತಾ. ರೂಪಾವಚರಂ ಹುತ್ವಾ ಅರೂಪಾವಚರಂ ಹೋತೀತಿ? ನ ಹೇವಂ ವತ್ತಬ್ಬೇ…ಪೇ….

ರೂಪಾವಚರಂ ಹುತ್ವಾ ಅರೂಪಾವಚರಂ ಹೋತೀತಿ? ಆಮನ್ತಾ. ಪರಿಯಾಪನ್ನಂ ಹುತ್ವಾ ಅಪರಿಯಾಪನ್ನಂ ಹೋತೀತಿ? ನ ಹೇವಂ ವತ್ತಬ್ಬೇ…ಪೇ….

೩೭೪. ಮಂಸಚಕ್ಖುಂ ಧಮ್ಮುಪತ್ಥದ್ಧಂ ದಿಬ್ಬಚಕ್ಖುಂ ಹೋತೀತಿ? ಆಮನ್ತಾ. ದಿಬ್ಬಚಕ್ಖುಂ ಧಮ್ಮುಪತ್ಥದ್ಧಂ ಮಂಸಚಕ್ಖುಂ ಹೋತೀತಿ? ನ ಹೇವಂ ವತ್ತಬ್ಬೇ…ಪೇ….

ಮಂಸಚಕ್ಖುಂ ಧಮ್ಮುಪತ್ಥದ್ಧಂ ದಿಬ್ಬಚಕ್ಖುಂ ಹೋತೀತಿ? ಆಮನ್ತಾ. ದಿಬ್ಬಚಕ್ಖುಂ ಧಮ್ಮುಪತ್ಥದ್ಧಂ ಪಞ್ಞಾಚಕ್ಖುಂ ಹೋತೀತಿ? ನ ಹೇವಂ ವತ್ತಬ್ಬೇ…ಪೇ….

ಮಂಸಚಕ್ಖುಂ ಧಮ್ಮುಪತ್ಥದ್ಧಂ ದಿಬ್ಬಚಕ್ಖುಂ ಹೋತೀತಿ? ಆಮನ್ತಾ. ದಿಬ್ಬಚಕ್ಖುಂ ಧಮ್ಮುಪತ್ಥದ್ಧಂ ಮಂಸಚಕ್ಖುಂ ಹೋತೀತಿ? ನ ಹೇವಂ ವತ್ತಬ್ಬೇ…ಪೇ….

ಮಂಸಚಕ್ಖುಂ ಧಮ್ಮುಪತ್ಥದ್ಧಂ ದಿಬ್ಬಚಕ್ಖುಂ ಹೋತೀತಿ? ಆಮನ್ತಾ. ದ್ವೇವ ಚಕ್ಖೂನೀತಿ? ನ ಹೇವಂ ವತ್ತಬ್ಬೇ…ಪೇ… ದ್ವೇವ ಚಕ್ಖೂನೀತಿ? ಆಮನ್ತಾ. ನನು ತೀಣಿ ಚಕ್ಖೂನಿ ವುತ್ತಾನಿ ಭಗವತಾ – ಮಂಸಚಕ್ಖುಂ, ದಿಬ್ಬಚಕ್ಖುಂ, ಪಞ್ಞಾಚಕ್ಖುನ್ತಿ? ಆಮನ್ತಾ. ಹಞ್ಚಿ ತೀಣಿ ಚಕ್ಖೂನಿ ವುತ್ತಾನಿ ಭಗವತಾ – ಮಂಸಚಕ್ಖುಂ, ದಿಬ್ಬಚಕ್ಖುಂ, ಪಞ್ಞಾಚಕ್ಖುಂ, ನೋ ಚ ವತ ರೇ ವತ್ತಬ್ಬೇ – ‘‘ದ್ವೇವ ಚಕ್ಖೂನೀ’’ತಿ.

ದ್ವೇವ ಚಕ್ಖೂನೀತಿ? ಆಮನ್ತಾ. ನನು ವುತ್ತಂ ಭಗವತಾ – ‘‘ತೀಣಿಮಾನಿ, ಭಿಕ್ಖವೇ, ಚಕ್ಖೂನಿ! ಕತಮಾನಿ ತೀಣಿ? ಮಂಸಚಕ್ಖುಂ, ದಿಬ್ಬಚಕ್ಖುಂ, ಪಞ್ಞಾಚಕ್ಖುನ್ತಿ – ಇಮಾನಿ ಖೋ, ಭಿಕ್ಖವೇ, ತೀಣಿ ಚಕ್ಖೂನೀ’’ತಿ.

‘‘ಮಂಸಚಕ್ಖುಂ ದಿಬ್ಬಚಕ್ಖುಂ, ಪಞ್ಞಾಚಕ್ಖುಂ ಅನುತ್ತರಂ;

ಏತಾನಿ ತೀಣಿ ಚಕ್ಖೂನಿ, ಅಕ್ಖಾಸಿ ಪುರಿಸುತ್ತಮೋ.

‘‘ಮಂಸಚಕ್ಖುಸ್ಸ ಉಪ್ಪಾದೋ, ಮಗ್ಗೋ ದಿಬ್ಬಸ್ಸ ಚಕ್ಖುನೋ;

ಯದಾ ಚ ಞಾಣಂ ಉದಪಾದಿ, ಪಞ್ಞಾಚಕ್ಖುಂ ಅನುತ್ತರಂ;

ತಸ್ಸ ಚಕ್ಖುಸ್ಸ ಪಟಿಲಾಭಾ, ಸಬ್ಬದುಕ್ಖಾ ಪಮುಚ್ಚತೀ’’ತಿ [ಇತಿವು. ೬೧ ಇತಿವುತ್ತಕೇ].

ಅತ್ಥೇವ ಸುತ್ತನ್ತೋತಿ? ಆಮನ್ತಾ. ತೇನ ಹಿ ನ ವತ್ತಬ್ಬಂ – ‘‘ದ್ವೇವ ಚಕ್ಖೂನೀ’’ತಿ.

ದಿಬ್ಬಚಕ್ಖುಕಥಾ ನಿಟ್ಠಿತಾ.