(೨೬) ೬. ಅಟ್ಠಮಕಸ್ಸಇನ್ದ್ರಿಯಕಥಾ

೩೭೧. ಅಟ್ಠಮಕಸ್ಸ ಪುಗ್ಗಲಸ್ಸ ನತ್ಥಿ ಸದ್ಧಿನ್ದ್ರಿಯನ್ತಿ? ಆಮನ್ತಾ. ಅಟ್ಠಮಕಸ್ಸ ಪುಗ್ಗಲಸ್ಸ ನತ್ಥಿ ಸದ್ಧಾತಿ? ನ ಹೇವಂ ವತ್ತಬ್ಬೇ. ಅಟ್ಠಮಕಸ್ಸ ಪುಗ್ಗಲಸ್ಸ ನತ್ಥಿ ವೀರಿಯಿನ್ದ್ರಿಯಂ…ಪೇ… ನತ್ಥಿ ಸತಿನ್ದ್ರಿಯಂ…ಪೇ… ನತ್ಥಿ ಸಮಾಧಿನ್ದ್ರಿಯಂ…ಪೇ… ನತ್ಥಿ ಪಞ್ಞಿನ್ದ್ರಿಯನ್ತಿ? ಆಮನ್ತಾ. ಅಟ್ಠಮಕಸ್ಸ ಪುಗ್ಗಲಸ್ಸ ನತ್ಥಿ ಪಞ್ಞಾತಿ? ನ ಹೇವಂ ವತ್ತಬ್ಬೇ…ಪೇ….

ಅಟ್ಠಮಕಸ್ಸ ಪುಗ್ಗಲಸ್ಸ ಅತ್ಥಿ ಸದ್ಧಾತಿ? ಆಮನ್ತಾ. ಅಟ್ಠಮಕಸ್ಸ ಪುಗ್ಗಲಸ್ಸ ಅತ್ಥಿ ಸದ್ಧಿನ್ದ್ರಿಯನ್ತಿ? ನ ಹೇವಂ ವತ್ತಬ್ಬೇ…ಪೇ… ಅಟ್ಠಮಕಸ್ಸ ಪುಗ್ಗಲಸ್ಸ ಅತ್ಥಿ ವೀರಿಯಂ…ಪೇ… ಅತ್ಥಿ ಸತಿ… ಅತ್ಥಿ ಸಮಾಧಿ… ಅತ್ಥಿ ಪಞ್ಞಾತಿ? ಆಮನ್ತಾ. ಅಟ್ಠಮಕಸ್ಸ ಪುಗ್ಗಲಸ್ಸ ಅತ್ಥಿ ಪಞ್ಞಿನ್ದ್ರಿಯನ್ತಿ? ನ ಹೇವಂ ವತ್ತಬ್ಬೇ…ಪೇ….

ಅಟ್ಠಮಕಸ್ಸ ಪುಗ್ಗಲಸ್ಸ ಅತ್ಥಿ ಮನೋ, ಅತ್ಥಿ ಮನಿನ್ದ್ರಿಯನ್ತಿ? ಆಮನ್ತಾ. ಅಟ್ಠಮಕಸ್ಸ ಪುಗ್ಗಲಸ್ಸ ಅತ್ಥಿ ಸದ್ಧಾ, ಅತ್ಥಿ ಸದ್ಧಿನ್ದ್ರಿಯನ್ತಿ? ನ ಹೇವಂ ವತ್ತಬ್ಬೇ…ಪೇ… ಅಟ್ಠಮಕಸ್ಸ ಪುಗ್ಗಲಸ್ಸ ಅತ್ಥಿ ಮನೋ, ಅತ್ಥಿ ಮನಿನ್ದ್ರಿಯನ್ತಿ? ಆಮನ್ತಾ. ಅಟ್ಠಮಕಸ್ಸ ಪುಗ್ಗಲಸ್ಸ ಅತ್ಥಿ ಪಞ್ಞಾ, ಅತ್ಥಿ ಪಞ್ಞಿನ್ದ್ರಿಯನ್ತಿ? ನ ಹೇವಂ ವತ್ತಬ್ಬೇ…ಪೇ….

ಅಟ್ಠಮಕಸ್ಸ ಪುಗ್ಗಲಸ್ಸ ಅತ್ಥಿ ಸೋಮನಸ್ಸಂ, ಅತ್ಥಿ ಸೋಮನಸ್ಸಿನ್ದ್ರಿಯಂ, ಅತ್ಥಿ ಜೀವಿತಂ, ಅತ್ಥಿ ಜೀವಿತಿನ್ದ್ರಿಯನ್ತಿ? ಆಮನ್ತಾ. ಅಟ್ಠಮಕಸ್ಸ ಪುಗ್ಗಲಸ್ಸ ಅತ್ಥಿ ಸದ್ಧಾ, ಅತ್ಥಿ ಸದ್ಧಿನ್ದ್ರಿಯನ್ತಿ? ನ ಹೇವಂ ವತ್ತಬ್ಬೇ…ಪೇ… ಅಟ್ಠಮಕಸ್ಸ ಪುಗ್ಗಲಸ್ಸ ಅತ್ಥಿ ಜೀವಿತಂ, ಅತ್ಥಿ ಜೀವಿತಿನ್ದ್ರಿಯನ್ತಿ? ಆಮನ್ತಾ. ಅಟ್ಠಮಕಸ್ಸ ಪುಗ್ಗಲಸ್ಸ…ಪೇ… ಅತ್ಥಿ ಪಞ್ಞಾ, ಅತ್ಥಿ ಪಞ್ಞಿನ್ದ್ರಿಯನ್ತಿ? ನ ಹೇವಂ ವತ್ತಬ್ಬೇ…ಪೇ….

ಅಟ್ಠಮಕಸ್ಸ ಪುಗ್ಗಲಸ್ಸ ಅತ್ಥಿ ಸದ್ಧಾ, ನತ್ಥಿ ಸದ್ಧಿನ್ದ್ರಿಯನ್ತಿ? ಆಮನ್ತಾ. ಅಟ್ಠಮಕಸ್ಸ ಪುಗ್ಗಲಸ್ಸ ಅತ್ಥಿ ಮನೋ, ನತ್ಥಿ ಮನಿನ್ದ್ರಿಯನ್ತಿ? ನ ಹೇವಂ ವತ್ತಬ್ಬೇ…ಪೇ….

ಅಟ್ಠಮಕಸ್ಸ ಪುಗ್ಗಲಸ್ಸ ಅತ್ಥಿ ಸದ್ಧಾ, ನತ್ಥಿ ಸದ್ಧಿನ್ದ್ರಿಯನ್ತಿ? ಆಮನ್ತಾ. ಅಟ್ಠಮಕಸ್ಸ ಪುಗ್ಗಲಸ್ಸ ಅತ್ಥಿ ಸೋಮನಸ್ಸಂ, ನತ್ಥಿ ಸೋಮನಸ್ಸಿನ್ದ್ರಿಯನ್ತಿ…ಪೇ… ಅತ್ಥಿ ಜೀವಿತಂ, ನತ್ಥಿ ಜೀವಿತಿನ್ದ್ರಿಯನ್ತಿ? ನ ಹೇವಂ ವತ್ತಬ್ಬೇ…ಪೇ… ಅಟ್ಠಮಕಸ್ಸ ಪುಗ್ಗಲಸ್ಸ ಅತ್ಥಿ ಪಞ್ಞಾ, ನತ್ಥಿ ಪಞ್ಞಿನ್ದ್ರಿಯನ್ತಿ? ಆಮನ್ತಾ. ಅಟ್ಠಮಕಸ್ಸ ಪುಗ್ಗಲಸ್ಸ ಅತ್ಥಿ ಮನೋ, ನತ್ಥಿ ಮನಿನ್ದ್ರಿಯನ್ತಿ? ಅತ್ಥಿ ಸೋಮನಸ್ಸಂ, ನತ್ಥಿ ಸೋಮನಸ್ಸಿನ್ದ್ರಿಯನ್ತಿ? ಅತ್ಥಿ ಜೀವಿತಂ, ನತ್ಥಿ ಜೀವಿತಿನ್ದ್ರಿಯನ್ತಿ? ನ ಹೇವಂ ವತ್ತಬ್ಬೇ…ಪೇ….

ಅಟ್ಠಮಕಸ್ಸ ಪುಗ್ಗಲಸ್ಸ ನತ್ಥಿ ಸದ್ಧಿನ್ದ್ರಿಯನ್ತಿ? ಆಮನ್ತಾ. ಅಟ್ಠಮಕೋ ಪುಗ್ಗಲೋ ಅಸ್ಸದ್ಧೋತಿ? ನ ಹೇವಂ ವತ್ತಬ್ಬೇ…ಪೇ… ಅಟ್ಠಮಕಸ್ಸ ಪುಗ್ಗಲಸ್ಸ ನತ್ಥಿ ವೀರಿಯಿನ್ದ್ರಿಯನ್ತಿ? ಆಮನ್ತಾ. ಅಟ್ಠಮಕೋ ಪುಗ್ಗಲೋ ಕುಸೀತೋ ಹೀನವೀರಿಯೋತಿ? ನ ಹೇವಂ ವತ್ತಬ್ಬೇ…ಪೇ… ಅಟ್ಠಮಕಸ್ಸ ಪುಗ್ಗಲಸ್ಸ ನತ್ಥಿ ಸತಿನ್ದ್ರಿಯನ್ತಿ? ಆಮನ್ತಾ. ಅಟ್ಠಮಕೋ ಪುಗ್ಗಲೋ ಮುಟ್ಠಸ್ಸತಿ ಅಸಮ್ಪಜಾನೋತಿ? ನ ಹೇವಂ ವತ್ತಬ್ಬೇ…ಪೇ… ಅಟ್ಠಮಕಸ್ಸ ಪುಗ್ಗಲಸ್ಸ ನತ್ಥಿ ಸಮಾಧಿನ್ದ್ರಿಯನ್ತಿ? ಆಮನ್ತಾ. ಅಟ್ಠಮಕೋ ಪುಗ್ಗಲೋ ಅಸಮಾಹಿತೋ ವಿಬ್ಭನ್ತಚಿತ್ತೋತಿ? ನ ಹೇವಂ ವತ್ತಬ್ಬೇ…ಪೇ… ಅಟ್ಠಮಕಸ್ಸ ಪುಗ್ಗಲಸ್ಸ ನತ್ಥಿ ಪಞ್ಞಿನ್ದ್ರಿಯನ್ತಿ? ಆಮನ್ತಾ. ಅಟ್ಠಮಕೋ ಪುಗ್ಗಲೋ ದುಪ್ಪಞ್ಞೋ ಏಲಮೂಗೋತಿ? ನ ಹೇವಂ ವತ್ತಬ್ಬೇ…ಪೇ….

ಅಟ್ಠಮಕಸ್ಸ ಪುಗ್ಗಲಸ್ಸ ಅತ್ಥಿ ಸದ್ಧಾ, ಸಾ ಚ ಸದ್ಧಾ ನಿಯ್ಯಾನಿಕಾತಿ? ಆಮನ್ತಾ. ಹಞ್ಚಿ ಅಟ್ಠಮಕಸ್ಸ ಪುಗ್ಗಲಸ್ಸ ಅತ್ಥಿ ಸದ್ಧಾ, ಸಾ ಚ ಸದ್ಧಾ ನಿಯ್ಯಾನಿಕಾ, ನೋ ಚ ವತ ರೇ ವತ್ತಬ್ಬೇ – ‘‘ಅಟ್ಠಮಕಸ್ಸ ಪುಗ್ಗಲಸ್ಸ ನತ್ಥಿ ಸದ್ಧಿನ್ದ್ರಿಯ’’ನ್ತಿ. ಅಟ್ಠಮಕಸ್ಸ ಪುಗ್ಗಲಸ್ಸ ಅತ್ಥಿ ವೀರಿಯಂ, ತಞ್ಚ ವೀರಿಯಂ ನಿಯ್ಯಾನಿಕಂ; ಅತ್ಥಿ ಸತಿ, ಸಾ ಚ ಸತಿ ನಿಯ್ಯಾನಿಕಾ; ಅತ್ಥಿ ಸಮಾಧಿ, ಸೋ ಚ ಸಮಾಧಿ ನಿಯ್ಯಾನಿಕೋ; ಅತ್ಥಿ ಪಞ್ಞಾ, ಸಾ ಚ ಪಞ್ಞಾ ನಿಯ್ಯಾನಿಕಾತಿ? ಆಮನ್ತಾ. ಹಞ್ಚಿ ಅಟ್ಠಮಕಸ್ಸ ಪುಗ್ಗಲಸ್ಸ ಅತ್ಥಿ ಪಞ್ಞಾ, ಸಾ ಚ ಪಞ್ಞಾ ನಿಯ್ಯಾನಿಕಾ, ನೋ ಚ ವತ ರೇ ವತ್ತಬ್ಬೇ – ‘‘ಅಟ್ಠಮಕಸ್ಸ ಪುಗ್ಗಲಸ್ಸ ನತ್ಥಿ ಪಞ್ಞಿನ್ದ್ರಿಯ’’ನ್ತಿ.

೩೭೨. ಸಕದಾಗಾಮಿಫಲಸಚ್ಛಿಕಿರಿಯಾಯ ಪಟಿಪನ್ನಸ್ಸ ಪುಗ್ಗಲಸ್ಸ ಅತ್ಥಿ ಸದ್ಧಾ, ಅತ್ಥಿ ಸದ್ಧಿನ್ದ್ರಿಯನ್ತಿ? ಆಮನ್ತಾ. ಅಟ್ಠಮಕಸ್ಸ ಪುಗ್ಗಲಸ್ಸ ಅತ್ಥಿ ಸದ್ಧಾ, ಅತ್ಥಿ ಸದ್ಧಿನ್ದ್ರಿಯನ್ತಿ? ನ ಹೇವಂ ವತ್ತಬ್ಬೇ…ಪೇ… ಸಕದಾಗಾಮಿಫಲಸಚ್ಛಿಕಿರಿಯಾಯ ಪಟಿಪನ್ನಸ್ಸ ಪುಗ್ಗಲಸ್ಸ ಅತ್ಥಿ ಪಞ್ಞಾ, ಅತ್ಥಿ ಪಞ್ಞಿನ್ದ್ರಿಯನ್ತಿ? ಆಮನ್ತಾ. ಅಟ್ಠಮಕಸ್ಸ ಪುಗ್ಗಲಸ್ಸ ಅತ್ಥಿ ಪಞ್ಞಾ, ಅತ್ಥಿ ಪಞ್ಞಿನ್ದ್ರಿಯನ್ತಿ? ನ ಹೇವಂ ವತ್ತಬ್ಬೇ…ಪೇ….

ಅನಾಗಾಮಿಫಲಸಚ್ಛಿಕಿರಿಯಾಯ ಪಟಿಪನ್ನಸ್ಸ ಪುಗ್ಗಲಸ್ಸ… ಅರಹತ್ತಸಚ್ಛಿಕಿರಿಯಾಯ ಪಟಿಪನ್ನಸ್ಸ ಪುಗ್ಗಲಸ್ಸ ಅತ್ಥಿ ಸದ್ಧಾ, ಅತ್ಥಿ ಸದ್ಧಿನ್ದ್ರಿಯಂ…ಪೇ… ಅತ್ಥಿ ಪಞ್ಞಾ, ಅತ್ಥಿ ಪಞ್ಞಿನ್ದ್ರಿಯನ್ತಿ? ಆಮನ್ತಾ. ಅಟ್ಠಮಕಸ್ಸ ಪುಗ್ಗಲಸ್ಸ ಅತ್ಥಿ ಪಞ್ಞಾ, ಅತ್ಥಿ ಪಞ್ಞಿನ್ದ್ರಿಯನ್ತಿ? ನ ಹೇವಂ ವತ್ತಬ್ಬೇ…ಪೇ….

ಅಟ್ಠಮಕಸ್ಸ ಪುಗ್ಗಲಸ್ಸ ಅತ್ಥಿ ಸದ್ಧಾ, ನತ್ಥಿ ಸದ್ಧಿನ್ದ್ರಿಯನ್ತಿ? ಆಮನ್ತಾ. ಸಕದಾಗಾಮಿಫಲಸಚ್ಛಿಕಿರಿಯಾಯ ಪಟಿಪನ್ನಸ್ಸ ಪುಗ್ಗಲಸ್ಸ ಅತ್ಥಿ ಸದ್ಧಾ, ನತ್ಥಿ ಸದ್ಧಿನ್ದ್ರಿಯನ್ತಿ? ನ ಹೇವಂ ವತ್ತಬ್ಬೇ…ಪೇ… ಅಟ್ಠಮಕಸ್ಸ ಪುಗ್ಗಲಸ್ಸ ಅತ್ಥಿ ಪಞ್ಞಾ, ನತ್ಥಿ ಪಞ್ಞಿನ್ದ್ರಿಯನ್ತಿ? ಆಮನ್ತಾ. ಸಕದಾಗಾಮಿಫಲಸಚ್ಛಿಕಿರಿಯಾಯ ಪಟಿಪನ್ನಸ್ಸ ಪುಗ್ಗಲಸ್ಸ ಅತ್ಥಿ ಪಞ್ಞಾ, ನತ್ಥಿ ಪಞ್ಞಿನ್ದ್ರಿಯನ್ತಿ? ನ ಹೇವಂ ವತ್ತಬ್ಬೇ…ಪೇ….

ಅಟ್ಠಮಕಸ್ಸ ಪುಗ್ಗಲಸ್ಸ ಅತ್ಥಿ ಸದ್ಧಾ, ನತ್ಥಿ ಸದ್ಧಿನ್ದ್ರಿಯನ್ತಿ…ಪೇ… ಅತ್ಥಿ ಪಞ್ಞಾ, ನತ್ಥಿ ಪಞ್ಞಿನ್ದ್ರಿಯನ್ತಿ? ಆಮನ್ತಾ. ಅನಾಗಾಮಿಫಲಸಚ್ಛಿಕಿರಿಯಾಯ ಪಟಿಪನ್ನಸ್ಸ ಪುಗ್ಗಲಸ್ಸ… ಅರಹತ್ತಸಚ್ಛಿಕಿರಿಯಾಯ ಪಟಿಪನ್ನಸ್ಸ ಪುಗ್ಗಲಸ್ಸ ಅತ್ಥಿ ಪಞ್ಞಾ, ನತ್ಥಿ ಪಞ್ಞಿನ್ದ್ರಿಯನ್ತಿ? ನ ಹೇವಂ ವತ್ತಬ್ಬೇ…ಪೇ….

ಅಟ್ಠಮಕಸ್ಸ ಪುಗ್ಗಲಸ್ಸ ನತ್ಥಿ ಪಞ್ಚಿನ್ದ್ರಿಯಾನೀತಿ? ಆಮನ್ತಾ. ನನು ವುತ್ತಂ ಭಗವತಾ – ‘‘ಪಞ್ಚಿಮಾನಿ, ಭಿಕ್ಖವೇ, ಇನ್ದ್ರಿಯಾನಿ! ಕತಮಾನಿ ಪಞ್ಚ? ಸದ್ಧಿನ್ದ್ರಿಯಂ, ವೀರಿಯಿನ್ದ್ರಿಯಂ, ಸತಿನ್ದ್ರಿಯಂ, ಸಮಾಧಿನ್ದ್ರಿಯಂ, ಪಞ್ಞಿನ್ದ್ರಿಯಂ – ಇಮಾನಿ ಖೋ, ಭಿಕ್ಖವೇ, ಪಞ್ಚಿನ್ದ್ರಿಯಾನಿ. ಇಮೇಸಂ ಖೋ, ಭಿಕ್ಖವೇ, ಪಞ್ಚನ್ನಂ ಇನ್ದ್ರಿಯಾನಂ ಸಮತ್ತಾ ಪರಿಪೂರತ್ತಾ ಅರಹಾ ಹೋತಿ. ತತೋ ಮುದುತರೇಹಿ ಅರಹತ್ತಸಚ್ಛಿಕಿರಿಯಾಯ ಪಟಿಪನ್ನೋ ಹೋತಿ, ತತೋ ಮುದುತರೇಹಿ ಅನಾಗಾಮೀ ಹೋತಿ, ತತೋ ಮುದುತರೇಹಿ ಅನಾಗಾಮಿಫಲಸಚ್ಛಿಕಿರಿಯಾಯ ಪಟಿಪನ್ನೋ ಹೋತಿ, ತತೋ ಮುದುತರೇಹಿ ಸಕದಾಗಾಮೀ ಹೋತಿ, ತತೋ ಮುದುತರೇಹಿ ಸಕದಾಗಾಮಿಫಲಸಚ್ಛಿಕಿರಿಯಾಯ ಪಟಿಪನ್ನೋ ಹೋತಿ, ತತೋ ಮುದುತರೇಹಿ ಸೋತಾಪನ್ನೋ ಹೋತಿ, ತತೋ ಮುದುತರೇಹಿ ಸೋತಾಪತ್ತಿಫಲಸಚ್ಛಿಕಿರಿಯಾಯ ಪಟಿಪನ್ನೋ ಹೋತಿ. ಯಸ್ಸ ಖೋ, ಭಿಕ್ಖವೇ, ಇಮಾನಿ ಪಞ್ಚಿನ್ದ್ರಿಯಾನಿ ಸಬ್ಬೇನ ಸಬ್ಬಂ ಸಬ್ಬಥಾ ಸಬ್ಬಂ ನತ್ಥಿ, ತಮಹಂ ‘ಬಾಹಿರೋ ಪುಥುಜ್ಜನಪಕ್ಖೇ ಠಿತೋ’ತಿ ವದಾಮೀ’’ತಿ [ಸಂ. ನಿ. ೫.೪೮೮]. ಅತ್ಥೇವ ಸುತ್ತನ್ತೋತಿ? ಆಮನ್ತಾ. ಅಟ್ಠಮಕೋ ಪುಗ್ಗಲೋ ಬಾಹಿರೋ ಪುಥುಜ್ಜನಪಕ್ಖೇ ಠಿತೋತಿ? ನ ಹೇವಂ ವತ್ತಬ್ಬೇ…ಪೇ… ತೇನ ಹಿ ಅಟ್ಠಮಕಸ್ಸ ಪುಗ್ಗಲಸ್ಸ ಅತ್ಥಿ ಪಞ್ಚಿನ್ದ್ರಿಯಾನೀತಿ.

ಅಟ್ಠಮಕಸ್ಸ ಇನ್ದ್ರಿಯಕಥಾ ನಿಟ್ಠಿತಾ.