(೨೫) ೫. ಅಟ್ಠಮಕಕಥಾ

೩೬೮. ಅಟ್ಠಮಕಸ್ಸ ಪುಗ್ಗಲಸ್ಸ ದಿಟ್ಠಿಪರಿಯುಟ್ಠಾನಂ ಪಹೀನನ್ತಿ? ಆಮನ್ತಾ. ಅಟ್ಠಮಕೋ ಪುಗ್ಗಲೋ ಸೋತಾಪನ್ನೋ ಸೋತಾಪತ್ತಿಫಲಪ್ಪತ್ತೋ ಪಟಿಲದ್ಧೋ ಅಧಿಗತೋ ಸಚ್ಛಿಕತೋ ಉಪಸಮ್ಪಜ್ಜ ವಿಹರತಿ, ಕಾಯೇನ ಫುಸಿತ್ವಾ ವಿಹರತೀತಿ? ನ ಹೇವಂ ವತ್ತಬ್ಬೇ…ಪೇ….

ಅಟ್ಠಮಕಸ್ಸ ಪುಗ್ಗಲಸ್ಸ ವಿಚಿಕಿಚ್ಛಾಪರಿಯುಟ್ಠಾನಂ ಪಹೀನನ್ತಿ? ಆಮನ್ತಾ. ಅಟ್ಠಮಕೋ ಪುಗ್ಗಲೋ ಸೋತಾಪನ್ನೋ ಸೋತಾಪತ್ತಿಫಲಪ್ಪತ್ತೋ…ಪೇ… ಕಾಯೇನ ಫುಸಿತ್ವಾ ವಿಹರತೀತಿ? ನ ಹೇವಂ ವತ್ತಬ್ಬೇ…ಪೇ….

ಅಟ್ಠಮಕಸ್ಸ ಪುಗ್ಗಲಸ್ಸ ದಿಟ್ಠಿಪರಿಯುಟ್ಠಾನಂ ಪಹೀನನ್ತಿ? ಆಮನ್ತಾ. ಅಟ್ಠಮಕಸ್ಸ ಪುಗ್ಗಲಸ್ಸ ದಿಟ್ಠಾನುಸಯೋ ಪಹೀನೋತಿ? ನ ಹೇವಂ ವತ್ತಬ್ಬೇ…ಪೇ… ಅಟ್ಠಮಕಸ್ಸ ಪುಗ್ಗಲಸ್ಸ ದಿಟ್ಠಿಪರಿಯುಟ್ಠಾನಂ ಪಹೀನನ್ತಿ? ಆಮನ್ತಾ. ಅಟ್ಠಮಕಸ್ಸ ಪುಗ್ಗಲಸ್ಸ ವಿಚಿಕಿಚ್ಛಾನುಸಯೋ… ಸೀಲಬ್ಬತಪರಾಮಾಸೋ ಪಹೀನೋತಿ? ನ ಹೇವಂ ವತ್ತಬ್ಬೇ…ಪೇ….

ಅಟ್ಠಮಕಸ್ಸ ಪುಗ್ಗಲಸ್ಸ ವಿಚಿಕಿಚ್ಛಾಪರಿಯುಟ್ಠಾನಂ ಪಹೀನನ್ತಿ? ಆಮನ್ತಾ. ಅಟ್ಠಮಕಸ್ಸ ಪುಗ್ಗಲಸ್ಸ ವಿಚಿಕಿಚ್ಛಾನುಸಯೋ ಪಹೀನೋತಿ? ನ ಹೇವಂ ವತ್ತಬ್ಬೇ…ಪೇ… ಅಟ್ಠಮಕಸ್ಸ ಪುಗ್ಗಲಸ್ಸ ವಿಚಿಕಿಚ್ಛಾಪರಿಯುಟ್ಠಾನಂ ಪಹೀನನ್ತಿ? ಆಮನ್ತಾ. ಅಟ್ಠಮಕಸ್ಸ ಪುಗ್ಗಲಸ್ಸ ದಿಟ್ಠಾನುಸಯೋ… ಸೀಲಬ್ಬತಪರಾಮಾಸೋ ಪಹೀನೋತಿ? ನ ಹೇವಂ ವತ್ತಬ್ಬೇ…ಪೇ….

ಅಟ್ಠಮಕಸ್ಸ ಪುಗ್ಗಲಸ್ಸ ದಿಟ್ಠಾನುಸಯೋ ಅಪ್ಪಹೀನೋತಿ? ಆಮನ್ತಾ. ಅಟ್ಠಮಕಸ್ಸ ಪುಗ್ಗಲಸ್ಸ ದಿಟ್ಠಿಪರಿಯುಟ್ಠಾನಂ ಅಪ್ಪಹೀನನ್ತಿ? ನ ಹೇವಂ ವತ್ತಬ್ಬೇ…ಪೇ… ಅಟ್ಠಮಕಸ್ಸ ಪುಗ್ಗಲಸ್ಸ ದಿಟ್ಠಾನುಸಯೋ ಅಪ್ಪಹೀನೋತಿ? ಆಮನ್ತಾ. ಅಟ್ಠಮಕಸ್ಸ ಪುಗ್ಗಲಸ್ಸ ವಿಚಿಕಿಚ್ಛಾಪರಿಯುಟ್ಠಾನಂ ಅಪ್ಪಹೀನನ್ತಿ? ನ ಹೇವಂ ವತ್ತಬ್ಬೇ…ಪೇ….

ಅಟ್ಠಮಕಸ್ಸ ಪುಗ್ಗಲಸ್ಸ ವಿಚಿಕಿಚ್ಛಾನುಸಯೋ… ಸೀಲಬ್ಬತಪರಾಮಾಸೋ ಅಪ್ಪಹೀನೋತಿ? ಆಮನ್ತಾ. ಅಟ್ಠಮಕಸ್ಸ ಪುಗ್ಗಲಸ್ಸ ದಿಟ್ಠಿಪರಿಯುಟ್ಠಾನಂ ಅಪ್ಪಹೀನನ್ತಿ? ನ ಹೇವಂ ವತ್ತಬ್ಬೇ…ಪೇ… ಅಟ್ಠಮಕಸ್ಸ ಪುಗ್ಗಲಸ್ಸ ಸೀಲಬ್ಬತಪರಾಮಾಸೋ ಅಪ್ಪಹೀನೋತಿ? ಆಮನ್ತಾ. ಅಟ್ಠಮಕಸ್ಸ ಪುಗ್ಗಲಸ್ಸ ವಿಚಿಕಿಚ್ಛಾಪರಿಯುಟ್ಠಾನಂ ಅಪ್ಪಹೀನನ್ತಿ? ನ ಹೇವಂ ವತ್ತಬ್ಬೇ…ಪೇ….

೩೬೯. ಅಟ್ಠಮಕಸ್ಸ ಪುಗ್ಗಲಸ್ಸ ದಿಟ್ಠಿಪರಿಯುಟ್ಠಾನಂ ಪಹೀನನ್ತಿ? ಆಮನ್ತಾ. ಅಟ್ಠಮಕಸ್ಸ ಪುಗ್ಗಲಸ್ಸ ದಿಟ್ಠಿಪರಿಯುಟ್ಠಾನಪಹಾನಾಯ ಮಗ್ಗೋ ಭಾವಿತೋತಿ? ನ ಹೇವಂ ವತ್ತಬ್ಬೇ…ಪೇ… ಅಟ್ಠಮಕಸ್ಸ ಪುಗ್ಗಲಸ್ಸ ದಿಟ್ಠಿಪರಿಯುಟ್ಠಾನಂ ಪಹೀನನ್ತಿ? ಆಮನ್ತಾ. ಅಟ್ಠಮಕಸ್ಸ ಪುಗ್ಗಲಸ್ಸ ದಿಟ್ಠಿಪರಿಯುಟ್ಠಾನಪಹಾನಾಯ ಸತಿಪಟ್ಠಾನಾ ಭಾವಿತಾ…ಪೇ… ಸಮ್ಮಪ್ಪಧಾನಾ…ಪೇ… ಬೋಜ್ಝಙ್ಗಾ ಭಾವಿತಾತಿ? ನ ಹೇವಂ ವತ್ತಬ್ಬೇ.

ಅಟ್ಠಮಕಸ್ಸ ಪುಗ್ಗಲಸ್ಸ ವಿಚಿಕಿಚ್ಛಾಪರಿಯುಟ್ಠಾನಂ ಪಹೀನನ್ತಿ? ಆಮನ್ತಾ. ಅಟ್ಠಮಕಸ್ಸ ಪುಗ್ಗಲಸ್ಸ ವಿಚಿಕಿಚ್ಛಾಪರಿಯುಟ್ಠಾನಪಹಾನಾಯ ಮಗ್ಗೋ ಭಾವಿತೋ…ಪೇ… ಬೋಜ್ಝಙ್ಗಾ ಭಾವಿತಾತಿ? ನ ಹೇವಂ ವತ್ತಬ್ಬೇ…ಪೇ….

ಅಟ್ಠಮಕಸ್ಸ ಪುಗ್ಗಲಸ್ಸ ದಿಟ್ಠಿಪರಿಯುಟ್ಠಾನಪಹಾನಾಯ ಮಗ್ಗೋ ಅಭಾವಿತೋತಿ? ಆಮನ್ತಾ. ಅಮಗ್ಗೇನ ಪಹೀನಂ ಲೋಕಿಯೇನ ಸಾಸವೇನ…ಪೇ… ಸಂಕಿಲೇಸಿಯೇನಾತಿ? ನ ಹೇವಂ ವತ್ತಬ್ಬೇ…ಪೇ… ಅಟ್ಠಮಕಸ್ಸ ಪುಗ್ಗಲಸ್ಸ ದಿಟ್ಠಿಪರಿಯುಟ್ಠಾನಪಹಾನಾಯ ಸತಿಪಟ್ಠಾನಾ…ಪೇ… ಬೋಜ್ಝಙ್ಗಾ ಅಭಾವಿತಾತಿ? ಆಮನ್ತಾ. ಅಮಗ್ಗೇನ ಪಹೀನಂ ಲೋಕಿಯೇನ ಸಾಸವೇನ…ಪೇ… ಸಂಕಿಲೇಸಿಯೇನಾತಿ? ನ ಹೇವಂ ವತ್ತಬ್ಬೇ…ಪೇ….

ಅಟ್ಠಮಕಸ್ಸ ಪುಗ್ಗಲಸ್ಸ ವಿಚಿಕಿಚ್ಛಾಪರಿಯುಟ್ಠಾನಪಹಾನಾಯ ಮಗ್ಗೋ ಅಭಾವಿತೋ…ಪೇ… ಸತಿಪಟ್ಠಾನಾ…ಪೇ… ಬೋಜ್ಝಙ್ಗಾ ಅಭಾವಿತಾತಿ? ಆಮನ್ತಾ. ಅಮಗ್ಗೇನ ಪಹೀನಂ ಲೋಕಿಯೇನ ಸಾಸವೇನ…ಪೇ… ಸಂಕಿಲೇಸಿಯೇನಾತಿ? ನ ಹೇವಂ ವತ್ತಬ್ಬೇ…ಪೇ….

೩೭೦. ನ ವತ್ತಬ್ಬಂ – ‘‘ಅಟ್ಠಮಕಸ್ಸ ಪುಗ್ಗಲಸ್ಸ ದಿಟ್ಠಿಪರಿಯುಟ್ಠಾನಂ ಪಹೀನ’’ನ್ತಿ? ಆಮನ್ತಾ. ಉಪ್ಪಜ್ಜಿಸ್ಸತೀತಿ? ನುಪ್ಪಜ್ಜಿಸ್ಸತಿ. ಹಞ್ಚಿ ನುಪ್ಪಜ್ಜಿಸ್ಸತಿ, ತೇನ ವತ ರೇ ವತ್ತಬ್ಬೇ – ‘‘ಅಟ್ಠಮಕಸ್ಸ ಪುಗ್ಗಲಸ್ಸ ದಿಟ್ಠಿಪರಿಯುಟ್ಠಾನಂ ಪಹೀನ’’ನ್ತಿ.

ನ ವತ್ತಬ್ಬಂ – ‘‘ಅಟ್ಠಮಕಸ್ಸ ಪುಗ್ಗಲಸ್ಸ ವಿಚಿಕಿಚ್ಛಾಪರಿಯುಟ್ಠಾನಂ ಪಹೀನ’’ನ್ತಿ? ಆಮನ್ತಾ. ಉಪ್ಪಜ್ಜಿಸ್ಸತೀತಿ? ನುಪ್ಪಜ್ಜಿಸ್ಸತಿ. ಹಞ್ಚಿ ನುಪ್ಪಜ್ಜಿಸ್ಸತಿ, ತೇನ ವತ ರೇ ವತ್ತಬ್ಬೇ – ‘‘ಅಟ್ಠಮಕಸ್ಸ ಪುಗ್ಗಲಸ್ಸ ವಿಚಿಕಿಚ್ಛಾಪರಿಯುಟ್ಠಾನಂ ಪಹೀನ’’ನ್ತಿ.

ಅಟ್ಠಮಕಸ್ಸ ಪುಗ್ಗಲಸ್ಸ ದಿಟ್ಠಿಪರಿಯುಟ್ಠಾನಂ ನುಪ್ಪಜ್ಜಿಸ್ಸತೀತಿ ಕತ್ವಾ ಪಹೀನನ್ತಿ? ಆಮನ್ತಾ. ಅಟ್ಠಮಕಸ್ಸ ಪುಗ್ಗಲಸ್ಸ ದಿಟ್ಠಾನುಸಯೋ ನುಪ್ಪಜ್ಜಿಸ್ಸತೀತಿ ಕತ್ವಾ ಪಹೀನೋತಿ? ನ ಹೇವಂ ವತ್ತಬ್ಬೇ…ಪೇ….

ಅಟ್ಠಮಕಸ್ಸ ಪುಗ್ಗಲಸ್ಸ ದಿಟ್ಠಿಪರಿಯುಟ್ಠಾನಂ ನುಪ್ಪಜ್ಜಿಸ್ಸತೀತಿ ಕತ್ವಾ ಪಹೀನನ್ತಿ? ಆಮನ್ತಾ. ಅಟ್ಠಮಕಸ್ಸ ಪುಗ್ಗಲಸ್ಸ ವಿಚಿಕಿಚ್ಛಾನುಸಯೋ… ಸೀಲಬ್ಬತಪರಾಮಾಸೋ ನುಪ್ಪಜ್ಜಿಸ್ಸತೀತಿ ಕತ್ವಾ ಪಹೀನೋತಿ? ನ ಹೇವಂ ವತ್ತಬ್ಬೇ…ಪೇ….

ಅಟ್ಠಮಕಸ್ಸ ಪುಗ್ಗಲಸ್ಸ ವಿಚಿಕಿಚ್ಛಾಪರಿಯುಟ್ಠಾನಂ ನುಪ್ಪಜ್ಜಿಸ್ಸತೀತಿ ಕತ್ವಾ ಪಹೀನನ್ತಿ? ಆಮನ್ತಾ. ಅಟ್ಠಮಕಸ್ಸ ಪುಗ್ಗಲಸ್ಸ ವಿಚಿಕಿಚ್ಛಾನುಸಯೋ… ಸೀಲಬ್ಬತಪರಾಮಾಸೋ ನುಪ್ಪಜ್ಜಿಸ್ಸತೀತಿ ಕತ್ವಾ ಪಹೀನೋತಿ? ನ ಹೇವಂ ವತ್ತಬ್ಬೇ…ಪೇ….

ಅಟ್ಠಮಕಸ್ಸ ಪುಗ್ಗಲಸ್ಸ ದಿಟ್ಠಿಪರಿಯುಟ್ಠಾನಂ ನುಪ್ಪಜ್ಜಿಸ್ಸತೀತಿ ಕತ್ವಾ ಪಹೀನನ್ತಿ? ಆಮನ್ತಾ. ಗೋತ್ರಭುನೋ ಪುಗ್ಗಲಸ್ಸ ದಿಟ್ಠಿಪರಿಯುಟ್ಠಾನಂ ನುಪ್ಪಜ್ಜಿಸ್ಸತೀತಿ ಕತ್ವಾ ಪಹೀನನ್ತಿ? ನ ಹೇವಂ ವತ್ತಬ್ಬೇ…ಪೇ… ಅಟ್ಠಮಕಸ್ಸ ಪುಗ್ಗಲಸ್ಸ ವಿಚಿಕಿಚ್ಛಾಪರಿಯುಟ್ಠಾನಂ ನುಪ್ಪಜ್ಜಿಸ್ಸತೀತಿ ಕತ್ವಾ ಪಹೀನನ್ತಿ? ಆಮನ್ತಾ. ಗೋತ್ರಭುನೋ ಪುಗ್ಗಲಸ್ಸ ವಿಚಿಕಿಚ್ಛಾಪರಿಯುಟ್ಠಾನಂ ನುಪ್ಪಜ್ಜಿಸ್ಸತೀತಿ ಕತ್ವಾ ಪಹೀನನ್ತಿ? ನ ಹೇವಂ ವತ್ತಬ್ಬೇ…ಪೇ….

ಅಟ್ಠಮಕಕಥಾ ನಿಟ್ಠಿತಾ.