೩. ತತಿಯವಗ್ಗೋ

(೩೦) ೧೦. ಸಂವರಕಥಾ

೩೭೯. ಅತ್ಥಿ ದೇವೇಸು ಸಂವರೋತಿ? ಆಮನ್ತಾ. ಅತ್ಥಿ ದೇವೇಸು ಅಸಂವರೋತಿ? ನ ಹೇವಂ ವತ್ತಬ್ಬೇ…ಪೇ….

ನತ್ಥಿ ದೇವೇಸು ಅಸಂವರೋತಿ? ಆಮನ್ತಾ. ನತ್ಥಿ ದೇವೇಸು ಸಂವರೋತಿ? ನ ಹೇವಂ ವತ್ತಬ್ಬೇ…ಪೇ….

ನನು ಅಸಂವರಾ ಸಂವರೋ ಸೀಲಂ, ಅತ್ಥಿ ದೇವೇಸು ಸಂವರೋತಿ? ಆಮನ್ತಾ. ಅತ್ಥಿ ದೇವೇಸು ಅಸಂವರೋ, ಯಮ್ಹಾ ಅಸಂವರಾ ಸಂವರೋ ಸೀಲನ್ತಿ? ನ ಹೇವಂ ವತ್ತಬ್ಬೇ…ಪೇ….

ಆಜಾನಾಹಿ ನಿಗ್ಗಹಂ. ಹಞ್ಚಿ ಅಸಂವರಾ ಸಂವರೋ ಸೀಲಂ, ಅತ್ಥಿ ದೇವೇಸು ಸಂವರೋ, ತೇನ ವತ ರೇ ವತ್ತಬ್ಬೇ – ‘‘ಅತ್ಥಿ ದೇವೇಸು ಅಸಂವರೋ, ಯಮ್ಹಾ ಅಸಂವರಾ ಸಂವರೋ ಸೀಲ’’ನ್ತಿ. ಯಂ ತತ್ಥ ವದೇಸಿ – ‘‘ವತ್ತಬ್ಬೇ ಖೋ – ‘ಅಸಂವರಾ ಸಂವರೋ ಸೀಲಂ, ಅತ್ಥಿ ದೇವೇಸು ಸಂವರೋ,’ ನೋ ಚ ವತ್ತಬ್ಬೇ – ‘ಅತ್ಥಿ ದೇವೇಸು ಅಸಂವರೋ, ಯಮ್ಹಾ ಅಸಂವರಾ ಸಂವರೋ ಸೀಲ’’’ನ್ತಿ ಮಿಚ್ಛಾ.

ನೋ ಚೇ ಪನ ವತ್ತಬ್ಬೇ – ‘‘ಅತ್ಥಿ ದೇವೇಸು ಅಸಂವರೋ, ಯಮ್ಹಾ ಅಸಂವರಾ ಸಂವರೋ ಸೀಲ’’ನ್ತಿ, ನೋ ಚ ವತ ರೇ ವತ್ತಬ್ಬೇ – ‘‘ಅಸಂವರಾ ಸಂವರೋ ಸೀಲಂ, ಅತ್ಥಿ ದೇವೇಸು ಸಂವರೋ’’ತಿ. ಯಂ ತತ್ಥ ವದೇಸಿ – ‘‘ವತ್ತಬ್ಬೇ ಖೋ ‘ಅಸಂವರಾ ಸಂವರೋ ಸೀಲಂ, ಅತ್ಥಿ ದೇವೇಸು ಸಂವರೋ,’ ನೋ ಚ ವತ್ತಬ್ಬೇ – ‘ಅತ್ಥಿ ದೇವೇಸು ಅಸಂವರೋ, ಯಮ್ಹಾ ಅಸಂವರಾ ಸಂವರೋ ಸೀಲ’’’ನ್ತಿ ಮಿಚ್ಛಾ.

ಅತ್ಥಿ ಮನುಸ್ಸೇಸು ಸಂವರೋ, ಅತ್ಥಿ ತತ್ಥ ಅಸಂವರೋತಿ? ಆಮನ್ತಾ. ಅತ್ಥಿ ದೇವೇಸು ಸಂವರೋ, ಅತ್ಥಿ ತತ್ಥ ಅಸಂವರೋತಿ? ನ ಹೇವಂ ವತ್ತಬ್ಬೇ…ಪೇ….

ಅತ್ಥಿ ದೇವೇಸು ಸಂವರೋ, ನತ್ಥಿ ತತ್ಥ ಅಸಂವರೋತಿ? ಆಮನ್ತಾ. ಅತ್ಥಿ ಮನುಸ್ಸೇಸು ಸಂವರೋ, ನತ್ಥಿ ತತ್ಥ ಅಸಂವರೋತಿ? ನ ಹೇವಂ ವತ್ತಬ್ಬೇ…ಪೇ….

೩೮೦. ಅತ್ಥಿ ದೇವೇಸು ಪಾಣಾತಿಪಾತಾ ವೇರಮಣೀತಿ? ಆಮನ್ತಾ. ಅತ್ಥಿ ದೇವೇಸು ಪಾಣಾತಿಪಾತೋತಿ? ನ ಹೇವಂ ವತ್ತಬ್ಬೇ…ಪೇ….

ಅತ್ಥಿ ದೇವೇಸು ಸುರಾಮೇರಯಮಜ್ಜಪಮಾದಟ್ಠಾನಾ ವೇರಮಣೀತಿ? ಆಮನ್ತಾ. ಅತ್ಥಿ ದೇವೇಸು ಸುರಾಮೇರಯಮಜ್ಜಪಮಾದಟ್ಠಾನನ್ತಿ? ನ ಹೇವಂ ವತ್ತಬ್ಬೇ…ಪೇ….

ನತ್ಥಿ ದೇವೇಸು ಪಾಣಾತಿಪಾತೋತಿ? ಆಮನ್ತಾ. ನತ್ಥಿ ದೇವೇಸು ಪಾಣಾತಿಪಾತಾ ವೇರಮಣೀತಿ? ನ ಹೇವಂ ವತ್ತಬ್ಬೇ…ಪೇ….

ನತ್ಥಿ ದೇವೇಸು ಸುರಾಮೇರಯಮಜ್ಜಪಮಾದಟ್ಠಾನನ್ತಿ? ಆಮನ್ತಾ. ನತ್ಥಿ ದೇವೇಸು ಸುರಾಮೇರಯಮಜ್ಜಪಮಾದಟ್ಠಾನಾ ವೇರಮಣೀತಿ? ನ ಹೇವಂ ವತ್ತಬ್ಬೇ…ಪೇ….

ಅತ್ಥಿ ಮನುಸ್ಸೇಸು ಪಾಣಾತಿಪಾತಾ ವೇರಮಣಿ, ಅತ್ಥಿ ತತ್ಥ ಪಾಣಾತಿಪಾತೋತಿ? ಆಮನ್ತಾ. ಅತ್ಥಿ ದೇವೇಸು ಪಾಣಾತಿಪಾತಾ ವೇರಮಣಿ, ಅತ್ಥಿ ತತ್ಥ ಪಾಣಾತಿಪಾತೋತಿ? ನ ಹೇವಂ ವತ್ತಬ್ಬೇ…ಪೇ….

ಅತ್ಥಿ ಮನುಸ್ಸೇಸು ಸುರಾಮೇರಯಮಜ್ಜಪಮಾದಟ್ಠಾನಾ ವೇರಮಣಿ, ಅತ್ಥಿ ತತ್ಥ ಸುರಾಮೇರಯಮಜ್ಜಪಮಾದಟ್ಠಾನನ್ತಿ? ಆಮನ್ತಾ. ಅತ್ಥಿ ದೇವೇಸು ಸುರಾಮೇರಯಮಜ್ಜಪಮಾದಟ್ಠಾನಾ ವೇರಮಣಿ, ಅತ್ಥಿ ತತ್ಥ ಸುರಾಮೇರಯಮಜ್ಜಪಮಾದಟ್ಠಾನನ್ತಿ? ನ ಹೇವಂ ವತ್ತಬ್ಬೇ…ಪೇ….

ಅತ್ಥಿ ದೇವೇಸು ಪಾಣಾತಿಪಾತಾ ವೇರಮಣಿ, ನತ್ಥಿ ತತ್ಥ ಪಾಣಾತಿಪಾತೋತಿ? ಆಮನ್ತಾ. ಅತ್ಥಿ ಮನುಸ್ಸೇಸು ಪಾಣಾತಿಪಾತಾ ವೇರಮಣಿ, ನತ್ಥಿ ತತ್ಥ ಪಾಣಾತಿಪಾತೋತಿ? ನ ಹೇವಂ ವತ್ತಬ್ಬೇ…ಪೇ….

ಅತ್ಥಿ ದೇವೇಸು ಸುರಾಮೇರಯಮಜ್ಜಪಮಾದಟ್ಠಾನಾ ವೇರಮಣಿ, ನತ್ಥಿ ತತ್ಥ ಸುರಾಮೇರಯಮಜ್ಜಪಮಾದಟ್ಠಾನನ್ತಿ? ಆಮನ್ತಾ. ಅತ್ಥಿ ಮನುಸ್ಸೇಸು ಸುರಾಮೇರಯಮಜ್ಜಪಮಾದಟ್ಠಾನಾ ವೇರಮಣಿ, ನತ್ಥಿ ತತ್ಥ ಸುರಾಮೇರಯಮಜ್ಜಪಮಾದಟ್ಠಾನನ್ತಿ? ನ ಹೇವಂ ವತ್ತಬ್ಬೇ…ಪೇ….

ನತ್ಥಿ ದೇವೇಸು ಸಂವರೋತಿ? ಆಮನ್ತಾ. ಸಬ್ಬೇ ದೇವಾ ಪಾಣಾತಿಪಾತಿನೋ ಅದಿನ್ನಾದಾಯಿನೋ ಕಾಮೇಸುಮಿಚ್ಛಾಚಾರಿನೋ ಮುಸಾವಾದಿನೋ ಸುರಾಮೇರಯಮಜ್ಜಪಮಾದಟ್ಠಾಯಿನೋತಿ? ನ ಹೇವಂ ವತ್ತಬ್ಬೇ…ಪೇ… ತೇನ ಹಿ ಅತ್ಥಿ ದೇವೇಸು ಸಂವರೋತಿ.

ಸಂವರಕಥಾ ನಿಟ್ಠಿತಾ.