(೨೧) ೧. ಬಲಕಥಾ

೩೫೪. ತಥಾಗತಬಲಂ ಸಾವಕಸಾಧಾರಣನ್ತಿ? ಆಮನ್ತಾ. ತಥಾಗತಬಲಂ ಸಾವಕಬಲಂ, ಸಾವಕಬಲಂ ತಥಾಗತಬಲನ್ತಿ? ನ ಹೇವಂ ವತ್ತಬ್ಬೇ…ಪೇ….

ತಥಾಗತಬಲಂ ಸಾವಕಸಾಧಾರಣನ್ತಿ? ಆಮನ್ತಾ. ತಞ್ಞೇವ ತಥಾಗತಬಲಂ ತಂ ಸಾವಕಬಲಂ, ತಞ್ಞೇವ ಸಾವಕಬಲಂ ತಂ ತಥಾಗತಬಲನ್ತಿ? ನ ಹೇವಂ ವತ್ತಬ್ಬೇ…ಪೇ….

ತಥಾಗತಬಲಂ ಸಾವಕಸಾಧಾರಣನ್ತಿ? ಆಮನ್ತಾ. ಯಾದಿಸಂ ತಥಾಗತಬಲಂ ತಾದಿಸಂ ಸಾವಕಬಲಂ, ಯಾದಿಸಂ ಸಾವಕಬಲಂ ತಾದಿಸಂ ತಥಾಗತಬಲನ್ತಿ? ನ ಹೇವಂ ವತ್ತಬ್ಬೇ…ಪೇ….

ತಥಾಗತಬಲಂ ಸಾವಕಸಾಧಾರಣನ್ತಿ? ಆಮನ್ತಾ. ಯಾದಿಸೋ ತಥಾಗತಸ್ಸ ಪುಬ್ಬಯೋಗೋ ಪುಬ್ಬಚರಿಯಾ ಧಮ್ಮಕ್ಖಾನಂ ಧಮ್ಮದೇಸನಾ ತಾದಿಸೋ ಸಾವಕಸ್ಸ ಪುಬ್ಬಯೋಗೋ ಪುಬ್ಬಚರಿಯಾ ಧಮ್ಮಕ್ಖಾನಂ ಧಮ್ಮದೇಸನಾತಿ? ನ ಹೇವಂ ವತ್ತಬ್ಬೇ…ಪೇ….

ತಥಾಗತಬಲಂ ಸಾವಕಸಾಧಾರಣನ್ತಿ? ಆಮನ್ತಾ. ತಥಾಗತೋ ಜಿನೋ ಸತ್ಥಾ ಸಮ್ಮಾಸಮ್ಬುದ್ಧೋ ಸಬ್ಬಞ್ಞೂ ಸಬ್ಬದಸ್ಸಾವೀ ಧಮ್ಮಸ್ಸಾಮೀ ಧಮ್ಮಪ್ಪಟಿಸರಣೋತಿ? ಆಮನ್ತಾ. ಸಾವಕೋ ಜಿನೋ ಸತ್ಥಾ ಸಮ್ಮಾಸಮ್ಬುದ್ಧೋ ಸಬ್ಬಞ್ಞೂ ಸಬ್ಬದಸ್ಸಾವೀ ಧಮ್ಮಸ್ಸಾಮೀ ಧಮ್ಮಪ್ಪಟಿಸರಣೋತಿ? ನ ಹೇವಂ ವತ್ತಬ್ಬೇ…ಪೇ….

ತಥಾಗತಬಲಂ ಸಾವಕಸಾಧಾರಣನ್ತಿ? ಆಮನ್ತಾ. ತಥಾಗತೋ ಅನುಪ್ಪನ್ನಸ್ಸ ಮಗ್ಗಸ್ಸ ಉಪ್ಪಾದೇತಾ ಅಸಞ್ಜಾತಸ್ಸ ಮಗ್ಗಸ್ಸ ಸಞ್ಜನೇತಾ ಅನಕ್ಖಾತಸ್ಸ ಮಗ್ಗಸ್ಸ ಅಕ್ಖಾತಾ ಮಗ್ಗಞ್ಞೂ ಮಗ್ಗವಿದೂ ಮಗ್ಗಕೋವಿದೋತಿ? ಆಮನ್ತಾ. ಸಾವಕೋ ಅನುಪ್ಪನ್ನಸ್ಸ ಮಗ್ಗಸ್ಸ ಉಪ್ಪಾದೇತಾ ಅಸಞ್ಜಾತಸ್ಸ ಮಗ್ಗಸ್ಸ ಸಞ್ಜನೇತಾ ಅನಕ್ಖಾತಸ್ಸ ಮಗ್ಗಸ್ಸ ಅಕ್ಖಾತಾ ಮಗ್ಗಞ್ಞೂ ಮಗ್ಗವಿದೂ ಮಗ್ಗಕೋವಿದೋತಿ? ನ ಹೇವಂ ವತ್ತಬ್ಬೇ…ಪೇ….

ಇನ್ದ್ರಿಯಪರೋಪರಿಯತ್ತಂ ಯಥಾಭೂತಂ ಞಾಣಂ ತಥಾಗತಬಲಂ ಸಾವಕಸಾಧಾರಣನ್ತಿ? ಆಮನ್ತಾ. ಸಾವಕೋ ಸಬ್ಬಞ್ಞೂ ಸಬ್ಬದಸ್ಸಾವೀತಿ? ನ ಹೇವಂ ವತ್ತಬ್ಬೇ…ಪೇ….

೩೫೫. ಸಾವಕೋ ಠಾನಾಠಾನಂ ಜಾನಾತೀತಿ? ಆಮನ್ತಾ. ಹಞ್ಚಿ ಸಾವಕೋ ಠಾನಾಠಾನಂ ಜಾನಾತಿ, ತೇನ ವತ ರೇ ವತ್ತಬ್ಬೇ – ‘‘ಠಾನಾಠಾನಂ ಯಥಾಭೂತಂ ಞಾಣಂ ತಥಾಗತಬಲಂ ಸಾವಕಸಾಧಾರಣ’’ನ್ತಿ.

ಸಾವಕೋ ಅತೀತಾನಾಗತಪಚ್ಚುಪ್ಪನ್ನಾನಂ ಕಮ್ಮಸಮಾದಾನಾನಂ ಠಾನಸೋ ಹೇತುಸೋ ವಿಪಾಕಂ ಜಾನಾತೀತಿ? ಆಮನ್ತಾ. ಹಞ್ಚಿ ಸಾವಕೋ ಅತೀತಾನಾಗತಪಚ್ಚುಪ್ಪನ್ನಾನಂ ಕಮ್ಮಸಮಾದಾನಾನಂ ಠಾನಸೋ ಹೇತುಸೋ ವಿಪಾಕಂ ಜಾನಾತಿ, ತೇನ ವತ ರೇ ವತ್ತಬ್ಬೇ – ‘‘ಅತೀತಾನಾಗತಪಚ್ಚುಪ್ಪನ್ನಾನಂ ಕಮ್ಮಸಮಾದಾನಾನಂ ಠಾನಸೋ ಹೇತುಸೋ ವಿಪಾಕಂ ಯಥಾಭೂತಂ ಞಾಣಂ ತಥಾಗತಬಲಂ ಸಾವಕಸಾಧಾರಣ’’ನ್ತಿ.

ಸಾವಕೋ ಸಬ್ಬತ್ಥಗಾಮಿನಿಂ ಪಟಿಪದಂ ಜಾನಾತೀತಿ? ಆಮನ್ತಾ. ಹಞ್ಚಿ ಸಾವಕೋ ಸಬ್ಬತ್ಥಗಾಮಿನಿಂ ಪಟಿಪದಂ ಜಾನಾತಿ, ತೇನ ವತ ರೇ ವತ್ತಬ್ಬೇ – ‘‘ಸಬ್ಬತ್ಥಗಾಮಿನಿಂ ಪಟಿಪದಂ ಯಥಾಭೂತಂ ಞಾಣಂ ತಥಾಗತಬಲಂ ಸಾವಕಸಾಧಾರಣ’’ನ್ತಿ.

ಸಾವಕೋ ಅನೇಕಧಾತುಂ ನಾನಾಧಾತುಂ ಲೋಕಂ ಜಾನಾತೀತಿ? ಆಮನ್ತಾ. ಹಞ್ಚಿ ಸಾವಕೋ ಅನೇಕಧಾತುಂ ನಾನಾಧಾತುಂ ಲೋಕಂ ಜಾನಾತಿ, ತೇನ ವತ ರೇ ವತ್ತಬ್ಬೇ – ‘‘ಅನೇಕಧಾತುಂ ನಾನಾಧಾತುಂ ಲೋಕಂ ಯಥಾಭೂತಂ ಞಾಣಂ ತಥಾಗತಬಲಂ ಸಾವಕಸಾಧಾರಣ’’ನ್ತಿ.

ಸಾವಕೋ ಸತ್ತಾನಂ ನಾನಾಧಿಮುತ್ತಿಕತಂ ಜಾನಾತೀತಿ? ಆಮನ್ತಾ. ಹಞ್ಚಿ ಸಾವಕೋ ಸತ್ತಾನಂ ನಾನಾಧಿಮುತ್ತಿಕತಂ ಜಾನಾತಿ, ತೇನ ವತ ರೇ ವತ್ತಬ್ಬೇ – ‘‘ಸತ್ತಾನಂ ನಾನಾಧಿಮುತ್ತಿಕತಂ ಯಥಾಭೂತಂ ಞಾಣಂ ತಥಾಗತಬಲಂ ಸಾವಕಸಾಧಾರಣ’’ನ್ತಿ.

ಸಾವಕೋ ಝಾನವಿಮೋಕ್ಖಸಮಾಧಿಸಮಾಪತ್ತೀನಂ ಸಂಕಿಲೇಸಂ ವೋದಾನಂ ವುಟ್ಠಾನಂ ಜಾನಾತೀತಿ? ಆಮನ್ತಾ. ಹಞ್ಚಿ ಸಾವಕೋ ಝಾನವಿಮೋಕ್ಖಸಮಾಧಿಸಮಾಪತ್ತೀನಂ ಸಂಕಿಲೇಸಂ ವೋದಾನಂ ವುಟ್ಠಾನಂ ಜಾನಾತಿ, ತೇನ ವತ ರೇ ವತ್ತಬ್ಬೇ – ‘‘ಝಾನವಿಮೋಕ್ಖಸಮಾಧಿಸಮಾಪತ್ತೀನಂ ಸಂಕಿಲೇಸಂ ವೋದಾನಂ ವುಟ್ಠಾನಂ ಯಥಾಭೂತಂ ಞಾಣಂ ತಥಾಗತಬಲಂ ಸಾವಕಸಾಧಾರಣ’’ನ್ತಿ.

ಸಾವಕೋ ಪುಬ್ಬೇನಿವಾಸಾನುಸ್ಸತಿಂ ಜಾನಾತೀತಿ? ಆಮನ್ತಾ. ಹಞ್ಚಿ ಸಾವಕೋ ಪುಬ್ಬೇನಿವಾಸಾನುಸ್ಸತಿಂ ಜಾನಾತಿ, ತೇನ ವತ ರೇ ವತ್ತಬ್ಬೇ – ‘‘ಪುಬ್ಬೇನಿವಾಸಾನುಸ್ಸತಿ ಯಥಾಭೂತಂ ಞಾಣಂ ತಥಾಗತಬಲಂ ಸಾವಕಸಾಧಾರಣ’’ನ್ತಿ.

ಸಾವಕೋ ಸತ್ತಾನಂ ಚುತೂಪಪಾತಂ ಜಾನಾತೀತಿ? ಆಮನ್ತಾ. ಹಞ್ಚಿ ಸಾವಕೋ ಸತ್ತಾನಂ ಚುತೂಪಪಾತಂ ಜಾನಾತಿ, ತೇನ ವತ ರೇ ವತ್ತಬ್ಬೇ – ‘‘ಸತ್ತಾನಂ ಚುತೂಪಪಾತಂ ಯಥಾಭೂತಂ ಞಾಣಂ ತಥಾಗತಬಲಂ ಸಾವಕಸಾಧಾರಣ’’ನ್ತಿ.

ನನು ತಥಾಗತಸ್ಸಾಪಿ ಆಸವಾ ಖೀಣಾ ಸಾವಕಸ್ಸಾಪಿ ಆಸವಾ ಖೀಣಾತಿ? ಆಮನ್ತಾ. ಅತ್ಥಿ ಕಿಞ್ಚಿ ನಾನಾಕರಣಂ ತಥಾಗತಸ್ಸ ವಾ ಸಾವಕಸ್ಸ ವಾ ಆಸವಕ್ಖಯೇನ ವಾ ಆಸವಕ್ಖಯಂ ವಿಮುತ್ತಿಯಾ ವಾ ವಿಮುತ್ತೀತಿ? ನತ್ಥಿ. ಹಞ್ಚಿ ನತ್ಥಿ ಕಿಞ್ಚಿ ನಾನಾಕರಣಂ ತಥಾಗತಸ್ಸ ವಾ ಸಾವಕಸ್ಸ ವಾ ಆಸವಕ್ಖಯೇನ ವಾ ಆಸವಕ್ಖಯಂ ವಿಮುತ್ತಿಯಾ ವಾ ವಿಮುತ್ತಿ, ತೇನ ವತ ರೇ ವತ್ತಬ್ಬೇ – ‘‘ಆಸವಾನಂ ಖಯೇ ಯಥಾಭೂತಂ ಞಾಣಂ ತಥಾಗತಬಲಂ ಸಾವಕಸಾಧಾರಣ’’ನ್ತಿ.

೩೫೬. ಆಸವಾನಂ ಖಯೇ ಯಥಾಭೂತಂ ಞಾಣಂ ತಥಾಗತಬಲಂ ಸಾವಕಸಾಧಾರಣನ್ತಿ? ಆಮನ್ತಾ. ಠಾನಾಠಾನೇ ಯಥಾಭೂತಂ ಞಾಣಂ ತಥಾಗತಬಲಂ ಸಾವಕಸಾಧಾರಣನ್ತಿ? ನ ಹೇವಂ ವತ್ತಬ್ಬೇ…ಪೇ….

ಆಸವಾನಂ ಖಯೇ ಯಥಾಭೂತಂ ಞಾಣಂ ತಥಾಗತಬಲಂ ಸಾವಕಸಾಧಾರಣನ್ತಿ? ಆಮನ್ತಾ. ಸತ್ತಾನಂ ಚುತೂಪಪಾತೇ ಯಥಾಭೂತಂ ಞಾಣಂ ತಥಾಗತಬಲಂ ಸಾವಕಸಾಧಾರಣನ್ತಿ? ನ ಹೇವಂ ವತ್ತಬ್ಬೇ…ಪೇ….

ಠಾನಾಠಾನೇ ಯಥಾಭೂತಂ ಞಾಣಂ ತಥಾಗತಬಲಂ ಸಾವಕಅಸಾಧಾರಣನ್ತಿ? ಆಮನ್ತಾ. ಆಸವಾನಂ ಖಯೇ ಯಥಾಭೂತಂ ಞಾಣಂ ತಥಾಗತಬಲಂ ಸಾವಕಅಸಾಧಾರಣನ್ತಿ? ನ ಹೇವಂ ವತ್ತಬ್ಬೇ…ಪೇ….

ಸತ್ತಾನಂ ಚುತೂಪಪಾತೇ ಯಥಾಭೂತಂ ಞಾಣಂ ತಥಾಗತಬಲಂ ಸಾವಕಅಸಾಧಾರಣನ್ತಿ? ಆಮನ್ತಾ. ಆಸವಾನಂ ಖಯೇ ಯಥಾಭೂತಂ ಞಾಣಂ ತಥಾಗತಬಲಂ ಸಾವಕಅಸಾಧಾರಣನ್ತಿ? ನ ಹೇವಂ ವತ್ತಬ್ಬೇ…ಪೇ….

ಇನ್ದ್ರಿಯಪರೋಪರಿಯತ್ತಂ ಯಥಾಭೂತಂ ಞಾಣಂ ತಥಾಗತಬಲಂ ಸಾವಕಅಸಾಧಾರಣನ್ತಿ? ಆಮನ್ತಾ. ಠಾನಾಠಾನೇ ಯಥಾಭೂತಂ ಞಾಣಂ ತಥಾಗತಬಲಂ ಸಾವಕಅಸಾಧಾರಣನ್ತಿ? ನ ಹೇವಂ ವತ್ತಬ್ಬೇ [ಅಯಮೇತ್ಥ ಸಾಧಾರಣಪಕ್ಖಂ ಸನ್ಧಾಯ ಪಟಿಕ್ಖೇಪೋ (ಟೀಕಾ ಓಲೋಕೇತಬ್ಬಾ)] …ಪೇ….

ಇನ್ದ್ರಿಯಪರೋಪರಿಯತ್ತಂ ಯಥಾಭೂತಂ ಞಾಣಂ ತಥಾಗತಬಲಂ ಸಾವಕಅಸಾಧಾರಣನ್ತಿ? ಆಮನ್ತಾ…ಪೇ…. ಆಸವಾನಂ ಖಯೇ ಯಥಾಭೂತಂ ಞಾಣಂ ತಥಾಗತಬಲಂ ಸಾವಕಅಸಾಧಾರಣನ್ತಿ? ನ ಹೇವಂ ವತ್ತಬ್ಬೇ…ಪೇ….

ಠಾನಾಠಾನೇ ಯಥಾಭೂತಂ ಞಾಣಂ ತಥಾಗತಬಲಂ ಸಾವಕಸಾಧಾರಣನ್ತಿ? ಆಮನ್ತಾ. ಇನ್ದ್ರಿಯಪರೋಪರಿಯತ್ತಂ ಯಥಾಭೂತಂ ಞಾಣಂ ತಥಾಗತಬಲಂ ಸಾವಕಸಾಧಾರಣನ್ತಿ? ನ ಹೇವಂ ವತ್ತಬ್ಬೇ…ಪೇ….

ಆಸವಾನಂ ಖಯೇ ಯಥಾಭೂತಂ ಞಾಣಂ ತಥಾಗತಬಲಂ ಸಾವಕಸಾಧಾರಣನ್ತಿ? ಆಮನ್ತಾ. ಇನ್ದ್ರಿಯಪರೋಪರಿಯತ್ತಂ ಯಥಾಭೂತಂ ಞಾಣಂ ತಥಾಗತಬಲಂ ಸಾವಕಸಾಧಾರಣನ್ತಿ? ನ ಹೇವಂ ವತ್ತಬ್ಬೇ…ಪೇ….

ಬಲಕಥಾ ನಿಟ್ಠಿತಾ.