೨೦. ಸಙ್ಘಾನುಯೋಗೋ

೨೦೬. ನ ವತ್ತಬ್ಬಂ – ‘‘ಪುಗ್ಗಲೋ ಉಪಲಬ್ಭತಿ ಸಚ್ಚಿಕಟ್ಠಪರಮತ್ಥೇನಾ’’ತಿ? ಆಮನ್ತಾ. ನನು ಚತ್ತಾರೋ ಪುರಿಸಯುಗಾ ಅಟ್ಠ ಪುರಿಸಪುಗ್ಗಲಾ ಅತ್ಥೀತಿ? ಆಮನ್ತಾ. ಹಞ್ಚಿ ಚತ್ತಾರೋ ಪುರಿಸಯುಗಾ ಅಟ್ಠ ಪುರಿಸಪುಗ್ಗಲಾ ಅತ್ಥಿ, ತೇನ ವತ ರೇ ವತ್ತಬ್ಬೇ – ‘‘ಪುಗ್ಗಲೋ ಉಪಲಬ್ಭತಿ ಸಚ್ಚಿಕಟ್ಠಪರಮತ್ಥೇನಾ’’ತಿ.

೨೦೭. ಚತ್ತಾರೋ ಪುರಿಸಯುಗಾ ಅಟ್ಠ ಪುರಿಸಪುಗ್ಗಲಾ ಅತ್ಥೀತಿ ಕತ್ವಾ ತೇನ ಚ ಕಾರಣೇನ ಪುಗ್ಗಲೋ ಉಪಲಬ್ಭತಿ ಸಚ್ಚಿಕಟ್ಠಪರಮತ್ಥೇನಾತಿ? ಆಮನ್ತಾ. ಚತ್ತಾರೋ ಪುರಿಸಯುಗಾ ಅಟ್ಠ ಪುರಿಸಪುಗ್ಗಲಾ ಬುದ್ಧಪಾತುಭಾವಾ ಪಾತುಭವನ್ತೀತಿ? ಆಮನ್ತಾ. ಪುಗ್ಗಲೋ ಬುದ್ಧಪಾತುಭಾವಾ ಪಾತುಭವತೀತಿ? ನ ಹೇವಂ ವತ್ತಬ್ಬೇ…ಪೇ….

ಪುಗ್ಗಲೋ ಬುದ್ಧಪಾತುಭಾವಾ ಪಾತುಭವತೀತಿ? ಆಮನ್ತಾ. ಬುದ್ಧಸ್ಸ ಭಗವತೋ ಪರಿನಿಬ್ಬುತೇ ಉಚ್ಛಿನ್ನೋ ಪುಗ್ಗಲೋ, ನತ್ಥಿ ಪುಗ್ಗಲೋತಿ? ನ ಹೇವಂ ವತ್ತಬ್ಬೇ…ಪೇ….

ಸಙ್ಘಾನುಯೋಗೋ.