೧೯. ಪಟಿವೇಧಾನುಯೋಗೋ

೨೦೧. ನ ವತ್ತಬ್ಬಂ – ‘‘ಪುಗ್ಗಲೋ ಉಪಲಬ್ಭತಿ ಸಚ್ಚಿಕಟ್ಠಪರಮತ್ಥೇನಾ’’ತಿ? ಆಮನ್ತಾ. ನನು ಸೋತಾಪನ್ನೋ ಅತ್ಥೀತಿ? ಆಮನ್ತಾ. ಹಞ್ಚಿ ಸೋತಾಪನ್ನೋ ಅತ್ಥಿ, ತೇನ ವತ ರೇ ವತ್ತಬ್ಬೇ – ‘‘ಪುಗ್ಗಲೋ ಉಪಲಬ್ಭತಿ ಸಚ್ಚಿಕಟ್ಠಪರಮತ್ಥೇನಾ’’ತಿ.

೨೦೨. ನ ವತ್ತಬ್ಬಂ – ‘‘ಪುಗ್ಗಲೋ ಉಪಲಬ್ಭತಿ ಸಚ್ಚಿಕಟ್ಠಪರಮತ್ಥೇನಾ’’ತಿ? ಆಮನ್ತಾ. ನನು ಸಕದಾಗಾಮೀ ಅತ್ಥಿ…ಪೇ… ಅನಾಗಾಮೀ ಅತ್ಥಿ… ಅರಹಾ ಅತ್ಥಿ… ಉಭತೋಭಾಗವಿಮುತ್ತೋ ಅತ್ಥಿ… ಪಞ್ಞಾವಿಮುತ್ತೋ ಅತ್ಥಿ… ಕಾಯಸಕ್ಖಿ [ಕಾಯಸಕ್ಖೀ (ಸ್ಯಾ.)] ಅತ್ಥಿ… ದಿಟ್ಠಿಪ್ಪತ್ತೋ ಅತ್ಥಿ… ಸದ್ಧಾವಿಮುತ್ತೋ ಅತ್ಥಿ… ಧಮ್ಮಾನುಸಾರೀ ಅತ್ಥಿ… ಸದ್ಧಾನುಸಾರೀ ಅತ್ಥೀತಿ? ಆಮನ್ತಾ.

ಹಞ್ಚಿ ಸದ್ಧಾನುಸಾರೀ ಅತ್ಥಿ, ತೇನ ವತ ರೇ ವತ್ತಬ್ಬೇ – ‘‘ಪುಗ್ಗಲೋ ಉಪಲಬ್ಭತಿ ಸಚ್ಚಿಕಟ್ಠಪರಮತ್ಥೇನಾ’’ತಿ.

೨೦೩. ಸೋತಾಪನ್ನೋ ಅತ್ಥೀತಿ ಕತ್ವಾ ತೇನ ಚ ಕಾರಣೇನ ಪುಗ್ಗಲೋ ಉಪಲಬ್ಭತಿ ಸಚ್ಚಿಕಟ್ಠಪರಮತ್ಥೇನಾತಿ? ಆಮನ್ತಾ. ಅತ್ಥಿ ಕೋಚಿ ನ ಸೋತಾಪನ್ನೋ ಹುತ್ವಾ ಸೋತಾಪನ್ನೋ ಹೋತೀತಿ? ಆಮನ್ತಾ. ಅತ್ಥಿ ಕೋಚಿ ನ ಪುಗ್ಗಲೋ ಹುತ್ವಾ ಪುಗ್ಗಲೋ ಹೋತೀತಿ? ನ ಹೇವಂ ವತ್ತಬ್ಬೇ…ಪೇ….

೨೦೪. ಅತ್ಥಿ ಕೋಚಿ ನ ಸಕದಾಗಾಮೀ ಹುತ್ವಾ… ನ ಅನಾಗಾಮೀ ಹುತ್ವಾ… ನ ಅರಹಾ ಹುತ್ವಾ… ನ ಉಭತೋಭಾಗವಿಮುತ್ತೋ ಹುತ್ವಾ… ನ ಪಞ್ಞಾವಿಮುತ್ತೋ ಹುತ್ವಾ… ನ ಕಾಯಸಕ್ಖಿ ಹುತ್ವಾ… ನ ದಿಟ್ಠಿಪ್ಪತ್ತೋ ಹುತ್ವಾ… ನ ಸದ್ಧಾವಿಮುತ್ತೋ ಹುತ್ವಾ… ನ ಧಮ್ಮಾನುಸಾರೀ ಹುತ್ವಾ… ನ ಸದ್ಧಾನುಸಾರೀ ಹುತ್ವಾ ಸದ್ಧಾನುಸಾರೀ ಹೋತೀತಿ? ಆಮನ್ತಾ. ಅತ್ಥಿ ಕೋಚಿ ನ ಪುಗ್ಗಲೋ ಹುತ್ವಾ ಪುಗ್ಗಲೋ ಹೋತೀತಿ? ನ ಹೇವಂ ವತ್ತಬ್ಬೇ…ಪೇ….

೨೦೫. ಸೋತಾಪನ್ನೋ ಅತ್ಥೀತಿ ಕತ್ವಾ ತೇನ ಚ ಕಾರಣೇನ ಪುಗ್ಗಲೋ ಉಪಲಬ್ಭತಿ ಸಚ್ಚಿಕಟ್ಠಪರಮತ್ಥೇನಾತಿ? ಆಮನ್ತಾ. ಅತ್ಥಿ ಕೋಚಿ ಸೋತಾಪನ್ನೋ ಹುತ್ವಾ ನ ಸೋತಾಪನ್ನೋ ಹೋತೀತಿ? ಆಮನ್ತಾ. ಅತ್ಥಿ ಕೋಚಿ ಪುಗ್ಗಲೋ ಹುತ್ವಾ ನ ಪುಗ್ಗಲೋ ಹೋತೀತಿ? ನ ಹೇವಂ ವತ್ತಬ್ಬೇ…ಪೇ….

ಅತ್ಥಿ ಕೋಚಿ ಸಕದಾಗಾಮೀ ಹುತ್ವಾ… ಅನಾಗಾಮೀ ಹುತ್ವಾ ನ ಅನಾಗಾಮೀ ಹೋತೀತಿ? ಆಮನ್ತಾ. ಅತ್ಥಿ ಕೋಚಿ ಪುಗ್ಗಲೋ ಹುತ್ವಾ ನ ಪುಗ್ಗಲೋ ಹೋತೀತಿ? ನ ಹೇವಂ ವತ್ತಬ್ಬೇ…ಪೇ….

ಪಟಿವೇಧಾನುಯೋಗೋ.