೧೧. ಗತಿಅನುಯೋಗೋ

೬೯. ಪುಗ್ಗಲೋ ಸನ್ಧಾವತಿ ಅಸ್ಮಾ ಲೋಕಾ ಪರಂ ಲೋಕಂ, ಪರಸ್ಮಾ ಲೋಕಾ ಇಮಂ ಲೋಕನ್ತಿ? ಆಮನ್ತಾ. ಸೋ ಪುಗ್ಗಲೋ ಸನ್ಧಾವತಿ ಅಸ್ಮಾ ಲೋಕಾ ಪರಂ ಲೋಕಂ, ಪರಸ್ಮಾ ಲೋಕಾ ಇಮಂ ಲೋಕನ್ತಿ? ನ ಹೇವಂ ವತ್ತಬ್ಬೇ …ಪೇ….

೭೦. ಪುಗ್ಗಲೋ ಸನ್ಧಾವತಿ ಅಸ್ಮಾ ಲೋಕಾ ಪರಂ ಲೋಕಂ, ಪರಸ್ಮಾ ಲೋಕಾ ಇಮಂ ಲೋಕನ್ತಿ? ಆಮನ್ತಾ. ಅಞ್ಞೋ ಪುಗ್ಗಲೋ ಸನ್ಧಾವತಿ ಅಸ್ಮಾ ಲೋಕಾ ಪರಂ ಲೋಕಂ, ಪರಸ್ಮಾ ಲೋಕಾ ಇಮಂ ಲೋಕನ್ತಿ? ನ ಹೇವಂ ವತ್ತಬ್ಬೇ…ಪೇ….

೭೧. ಪುಗ್ಗಲೋ ಸನ್ಧಾವತಿ ಅಸ್ಮಾ ಲೋಕಾ ಪರಂ ಲೋಕಂ, ಪರಸ್ಮಾ ಲೋಕಾ ಇಮಂ ಲೋಕನ್ತಿ? ಆಮನ್ತಾ. ಸೋ ಚ ಅಞ್ಞೋ ಚ ಸನ್ಧಾವತಿ ಅಸ್ಮಾ ಲೋಕಾ ಪರಂ ಲೋಕಂ, ಪರಸ್ಮಾ ಲೋಕಾ ಇಮಂ ಲೋಕನ್ತಿ? ನ ಹೇವಂ ವತ್ತಬ್ಬೇ…ಪೇ….

೭೨. ಪುಗ್ಗಲೋ ಸನ್ಧಾವತಿ ಅಸ್ಮಾ ಲೋಕಾ ಪರಂ ಲೋಕಂ, ಪರಸ್ಮಾ ಲೋಕಾ ಇಮಂ ಲೋಕನ್ತಿ? ಆಮನ್ತಾ. ನೇವ ಸೋ ಸನ್ಧಾವತಿ, ನ ಅಞ್ಞೋ ಸನ್ಧಾವತಿ ಅಸ್ಮಾ ಲೋಕಾ ಪರಂ ಲೋಕಂ, ಪರಸ್ಮಾ ಲೋಕಾ ಇಮಂ ಲೋಕನ್ತಿ? ನ ಹೇವಂ ವತ್ತಬ್ಬೇ…ಪೇ….

೭೩. ಪುಗ್ಗಲೋ ಸನ್ಧಾವತಿ ಅಸ್ಮಾ ಲೋಕಾ ಪರಂ ಲೋಕಂ, ಪರಸ್ಮಾ ಲೋಕಾ ಇಮಂ ಲೋಕನ್ತಿ? ಆಮನ್ತಾ. ಸೋ ಪುಗ್ಗಲೋ ಸನ್ಧಾವತಿ, ಅಞ್ಞೋ ಪುಗ್ಗಲೋ ಸನ್ಧಾವತಿ, ಸೋ ಚ ಅಞ್ಞೋ ಚ ಸನ್ಧಾವತಿ, ನೇವ ಸೋ ಸನ್ಧಾವತಿ ನ ಅಞ್ಞೋ ಸನ್ಧಾವತಿ ಅಸ್ಮಾ ಲೋಕಾ ಪರಂ ಲೋಕಂ, ಪರಸ್ಮಾ ಲೋಕಾ ಇಮಂ ಲೋಕನ್ತಿ? ನ ಹೇವಂ ವತ್ತಬ್ಬೇ…ಪೇ….

೭೪. ನ ವತ್ತಬ್ಬಂ – ‘‘ಪುಗ್ಗಲೋ ಸನ್ಧಾವತಿ ಅಸ್ಮಾ ಲೋಕಾ ಪರಂ ಲೋಕಂ, ಪರಸ್ಮಾ ಲೋಕಾ ಇಮಂ ಲೋಕ’’ನ್ತಿ? ಆಮನ್ತಾ. ನನು ವುತ್ತಂ ಭಗವತಾ –

‘‘ಸ ಸತ್ತಕ್ಖತ್ತುಪರಮಂ, ಸನ್ಧಾವಿತ್ವಾನ ಪುಗ್ಗಲೋ;

ದುಕ್ಖಸ್ಸನ್ತಕರೋ ಹೋತಿ, ಸಬ್ಬಸಂಯೋಜನಕ್ಖಯಾ’’ತಿ [ಸಂ. ನಿ. ೨.೧೩೩; ಇತಿವು. ೨೪ ಇತಿವುತ್ತಕೇಪಿ].

ಅತ್ಥೇವ ಸುತ್ತನ್ತೋತಿ? ಆಮನ್ತಾ. ತೇನ ಹಿ ಪುಗ್ಗಲೋ ಸನ್ಧಾವತಿ ಅಸ್ಮಾ ಲೋಕಾ ಪರಂ ಲೋಕಂ, ಪರಸ್ಮಾ ಲೋಕಾ ಇಮಂ ಲೋಕನ್ತಿ.

೭೫. ನ ವತ್ತಬ್ಬಂ – ‘‘ಪುಗ್ಗಲೋ ಸನ್ಧಾವತಿ ಅಸ್ಮಾ ಲೋಕಾ ಪರಂ ಲೋಕಂ, ಪರಸ್ಮಾ ಲೋಕಾ ಇಮಂ ಲೋಕ’’ನ್ತಿ? ಆಮನ್ತಾ. ನನು ವುತ್ತಂ ಭಗವತಾ – ‘‘ಅನಮತಗ್ಗೋಯಂ [ಅನಮತಗ್ಗಾಯಂ (ಕ.)], ಭಿಕ್ಖವೇ, ಸಂಸಾರೋ. ಪುಬ್ಬಕೋಟಿ ನ ಪಞ್ಞಾಯತಿ, ಅವಿಜ್ಜಾನೀವರಣಾನಂ ಸತ್ತಾನಂ ತಣ್ಹಾಸಂಯೋಜನಾನಂ ಸನ್ಧಾವತಂ ಸಂಸರತ’’ನ್ತಿ [ಸಂ. ನಿ. ೨.೧೨೪]! ಅತ್ಥೇವ ಸುತ್ತನ್ತೋತಿ? ಆಮನ್ತಾ. ತೇನ ಹಿ ಪುಗ್ಗಲೋ ಸನ್ಧಾವತಿ ಅಸ್ಮಾ ಲೋಕಾ ಪರಂ ಲೋಕಂ, ಪರಸ್ಮಾ ಲೋಕಾ ಇಮಂ ಲೋಕನ್ತಿ.

೭೬. ಪುಗ್ಗಲೋ ಸನ್ಧಾವತಿ ಅಸ್ಮಾ ಲೋಕಾ ಪರಂ ಲೋಕಂ, ಪರಸ್ಮಾ ಲೋಕಾ ಇಮಂ ಲೋಕನ್ತಿ? ಆಮನ್ತಾ. ಸ್ವೇವ ಪುಗ್ಗಲೋ ಸನ್ಧಾವತಿ ಅಸ್ಮಾ ಲೋಕಾ ಪರಂ ಲೋಕಂ, ಪರಸ್ಮಾ ಲೋಕಾ ಇಮಂ ಲೋಕನ್ತಿ? ನ ಹೇವಂ ವತ್ತಬ್ಬೇ…ಪೇ….

೭೭. ಸ್ವೇವ ಪುಗ್ಗಲೋ ಸನ್ಧಾವತಿ ಅಸ್ಮಾ ಲೋಕಾ ಪರಂ ಲೋಕಂ, ಪರಸ್ಮಾ ಲೋಕಾ ಇಮಂ ಲೋಕನ್ತಿ? ಆಮನ್ತಾ. ಅತ್ಥಿ ಕೋಚಿ ಮನುಸ್ಸೋ ಹುತ್ವಾ ದೇವೋ ಹೋತೀತಿ? ಆಮನ್ತಾ. ಸ್ವೇವ ಮನುಸ್ಸೋ ಸೋ ದೇವೋತಿ? ನ ಹೇವಂ ವತ್ತಬ್ಬೇ…ಪೇ….

೭೮. ಸ್ವೇವ ಮನುಸ್ಸೋ ಸೋ ದೇವೋತಿ? ಆಮನ್ತಾ. ಮನುಸ್ಸೋ ಹುತ್ವಾ ದೇವೋ ಹೋತಿ, ದೇವೋ ಹುತ್ವಾ ಮನುಸ್ಸೋ ಹೋತಿ, ಮನುಸ್ಸಭೂತೋ ಅಞ್ಞೋ, ದೇವೋ ಅಞ್ಞೋ, ಮನುಸ್ಸಭೂತೋ ಸ್ವೇವಾಯಂ ಸನ್ಧಾವತೀತಿ ಮಿಚ್ಛಾ…ಪೇ….

ಸಚೇ ಹಿ ಸನ್ಧಾವತಿ ಸ್ವೇವ ಪುಗ್ಗಲೋ ಇತೋ ಚುತೋ ಪರಂ ಲೋಕಂ ಅನಞ್ಞೋ, ಹೇವಂ ಮರಣಂ ನ ಹೇಹಿತಿ, ಪಾಣಾತಿಪಾತೋಪಿ ನುಪಲಬ್ಭತಿ. ಕಮ್ಮಂ ಅತ್ಥಿ, ಕಮ್ಮವಿಪಾಕೋ ಅತ್ಥಿ, ಕತಾನಂ ಕಮ್ಮಾನಂ ವಿಪಾಕೋ ಅತ್ಥಿ, ಕುಸಲಾಕುಸಲೇ ವಿಪಚ್ಚಮಾನೇ ಸ್ವೇವಾಯಂ ಸನ್ಧಾವತೀತಿ ಮಿಚ್ಛಾ.

೭೯. ಸ್ವೇವ ಪುಗ್ಗಲೋ ಸನ್ಧಾವತಿ ಅಸ್ಮಾ ಲೋಕಾ ಪರಂ ಲೋಕಂ, ಪರಸ್ಮಾ ಲೋಕಾ ಇಮಂ ಲೋಕನ್ತಿ? ಆಮನ್ತಾ. ಅತ್ಥಿ ಕೋಚಿ ಮನುಸ್ಸೋ ಹುತ್ವಾ ಯಕ್ಖೋ ಹೋತಿ, ಪೇತೋ ಹೋತಿ, ನೇರಯಿಕೋ ಹೋತಿ, ತಿರಚ್ಛಾನಗತೋ ಹೋತಿ, ಓಟ್ಠೋ ಹೋತಿ, ಗೋಣೋ ಹೋತಿ, ಗದ್ರಭೋ ಹೋತಿ, ಸೂಕರೋ ಹೋತಿ, ಮಹಿಂಸೋ [ಮಹಿಸೋ (ಸೀ. ಸ್ಯಾ. ಕಂ. ಪೀ.)] ಹೋತೀತಿ? ಆಮನ್ತಾ. ಸ್ವೇವ ಮನುಸ್ಸೋ ಸೋ ಮಹಿಂಸೋತಿ? ನ ಹೇವಂ ವತ್ತಬ್ಬೇ…ಪೇ….

೮೦. ಸ್ವೇವ ಮನುಸ್ಸೋ ಸೋ ಮಹಿಂಸೋತಿ? ಆಮನ್ತಾ. ಮನುಸ್ಸೋ ಹುತ್ವಾ ಮಹಿಂಸೋ ಹೋತಿ, ಮಹಿಂಸೋ ಹುತ್ವಾ ಮನುಸ್ಸೋ ಹೋತಿ, ಮನುಸ್ಸಭೂತೋ ಅಞ್ಞೋ, ಮಹಿಂಸೋ ಅಞ್ಞೋ, ಮನುಸ್ಸಭೂತೋ ಸ್ವೇವಾಯಂ ಸನ್ಧಾವತೀತಿ ಮಿಚ್ಛಾ…ಪೇ….

ಸಚೇ ಹಿ ಸನ್ಧಾವತಿ ಸ್ವೇವ ಪುಗ್ಗಲೋ ಇತೋ ಚುತೋ ಪರಂ ಲೋಕಂ ಅನಞ್ಞೋ, ಹೇವಂ ಮರಣಂ ನ ಹೇಹಿತಿ, ಪಾಣಾತಿಪಾತೋಪಿ ನುಪಲಬ್ಭತಿ. ಕಮ್ಮಂ ಅತ್ಥಿ, ಕಮ್ಮವಿಪಾಕೋ ಅತ್ಥಿ, ಕತಾನಂ ಕಮ್ಮಾನಂ ವಿಪಾಕೋ ಅತ್ಥಿ, ಕುಸಲಾಕುಸಲೇ ವಿಪಚ್ಚಮಾನೇ ಸ್ವೇವಾಯಂ ಸನ್ಧಾವತೀತಿ ಮಿಚ್ಛಾ.

೮೧. ಸ್ವೇವ ಪುಗ್ಗಲೋ ಸನ್ಧಾವತಿ ಅಸ್ಮಾ ಲೋಕಾ ಪರಂ ಲೋಕಂ, ಪರಸ್ಮಾ ಲೋಕಾ ಇಮಂ ಲೋಕನ್ತಿ? ಆಮನ್ತಾ. ಅತ್ಥಿ ಕೋಚಿ ಖತ್ತಿಯೋ ಹುತ್ವಾ ಬ್ರಾಹ್ಮಣೋ ಹೋತೀತಿ? ಆಮನ್ತಾ. ಸ್ವೇವ ಖತ್ತಿಯೋ ಸೋ ಬ್ರಾಹ್ಮಣೋತಿ? ನ ಹೇವಂ ವತ್ತಬ್ಬೇ…ಪೇ….

೮೨. ಅತ್ಥಿ ಕೋಚಿ ಖತ್ತಿಯೋ ಹುತ್ವಾ ವೇಸ್ಸೋ ಹೋತಿ, ಸುದ್ದೋ ಹೋತೀತಿ? ಆಮನ್ತಾ. ಸ್ವೇವ ಖತ್ತಿಯೋ ಸೋ ಸುದ್ದೋತಿ? ನ ಹೇವಂ ವತ್ತಬ್ಬೇ…ಪೇ….

೮೩. ಅತ್ಥಿ ಕೋಚಿ ಬ್ರಾಹ್ಮಣೋ ಹುತ್ವಾ ವೇಸ್ಸೋ ಹೋತಿ, ಸುದ್ದೋ ಹೋತಿ, ಖತ್ತಿಯೋ ಹೋತೀತಿ? ಆಮನ್ತಾ. ಸ್ವೇವ ಬ್ರಾಹ್ಮಣೋ ಸೋ ಖತ್ತಿಯೋತಿ? ನ ಹೇವಂ ವತ್ತಬ್ಬೇ…ಪೇ….

೮೪. ಅತ್ಥಿ ಕೋಚಿ ವೇಸ್ಸೋ ಹುತ್ವಾ ಸುದ್ದೋ ಹೋತಿ, ಖತ್ತಿಯೋ ಹೋತಿ, ಬ್ರಾಹ್ಮಣೋ ಹೋತೀತಿ? ಆಮನ್ತಾ. ಸ್ವೇವ ವೇಸ್ಸೋ ಸೋ ಬ್ರಾಹ್ಮಣೋತಿ? ನ ಹೇವಂ ವತ್ತಬ್ಬೇ…ಪೇ….

೮೫. ಅತ್ಥಿ ಕೋಚಿ ಸುದ್ದೋ ಹುತ್ವಾ ಖತ್ತಿಯೋ ಹೋತಿ, ಬ್ರಾಹ್ಮಣೋ ಹೋತಿ, ವೇಸ್ಸೋ ಹೋತೀತಿ? ಆಮನ್ತಾ. ಸ್ವೇವ ಸುದ್ದೋ ಸೋ ವೇಸ್ಸೋತಿ? ನ ಹೇವಂ ವತ್ತಬ್ಬೇ…ಪೇ….

೮೬. ಸ್ವೇವ ಪುಗ್ಗಲೋ ಸನ್ಧಾವತಿ ಅಸ್ಮಾ ಲೋಕಾ ಪರಂ ಲೋಕಂ, ಪರಸ್ಮಾ ಲೋಕಾ ಇಮಂ ಲೋಕನ್ತಿ? ಆಮನ್ತಾ. ಹತ್ಥಚ್ಛಿನ್ನೋ ಹತ್ಥಚ್ಛಿನ್ನೋವ ಹೋತಿ, ಪಾದಚ್ಛಿನ್ನೋ ಪಾದಚ್ಛಿನ್ನೋವ ಹೋತಿ, ಹತ್ಥಪಾದಚ್ಛಿನ್ನೋ ಹತ್ಥಪಾದಚ್ಛಿನ್ನೋವ ಹೋತಿ, ಕಣ್ಣಚ್ಛಿನ್ನೋ… ನಾಸಚ್ಛಿನ್ನೋ… ಕಣ್ಣನಾಸಚ್ಛಿನ್ನೋ… ಅಙ್ಗುಲಿಚ್ಛಿನ್ನೋ… ಅಳಚ್ಛಿನ್ನೋ… ಕಣ್ಡರಚ್ಛಿನ್ನೋ… ಕುಣಿಹತ್ಥಕೋ… ಫಣಹತ್ಥಕೋ… ಕುಟ್ಠಿಯೋ… ಗಣ್ಡಿಯೋ… ಕಿಲಾಸಿಯೋ… ಸೋಸಿಯೋ… ಅಪಮಾರಿಯೋ… ಓಟ್ಠೋ… ಗೋಣೋ… ಗದ್ರಭೋ… ಸೂಕರೋ… ಮಹಿಂಸೋ ಮಹಿಂಸೋವ ಹೋತೀತಿ? ನ ಹೇವಂ ವತ್ತಬ್ಬೇ…ಪೇ….

೮೭. ನ ವತ್ತಬ್ಬಂ – ‘‘ಸ್ವೇವ ಪುಗ್ಗಲೋ ಸನ್ಧಾವತಿ ಅಸ್ಮಾ ಲೋಕಾ ಪರಂ ಲೋಕಂ, ಪರಸ್ಮಾ ಲೋಕಾ ಇಮಂ ಲೋಕ’’ನ್ತಿ? ಆಮನ್ತಾ. ನನು ಸೋತಾಪನ್ನೋ ಪುಗ್ಗಲೋ ಮನುಸ್ಸಲೋಕಾ ಚುತೋ ದೇವಲೋಕಂ ಉಪಪನ್ನೋ ತತ್ಥಪಿ ಸೋತಾಪನ್ನೋವ ಹೋತೀತಿ? ಆಮನ್ತಾ.

ಹಞ್ಚಿ ಸೋತಾಪನ್ನೋ ಪುಗ್ಗಲೋ ಮನುಸ್ಸಲೋಕಾ ಚುತೋ ದೇವಲೋಕಂ ಉಪಪನ್ನೋ ತತ್ಥಪಿ ಸೋತಾಪನ್ನೋವ ಹೋತಿ, ತೇನ ವತ ರೇ ವತ್ತಬ್ಬೇ – ‘‘ಸ್ವೇವ ಪುಗ್ಗಲೋ ಸನ್ಧಾವತಿ ಅಸ್ಮಾ ಲೋಕಾ ಪರಂ ಲೋಕಂ, ಪರಸ್ಮಾ ಲೋಕಾ ಇಮಂ ಲೋಕ’’ನ್ತಿ.

೮೮. ಸೋತಾಪನ್ನೋ ಪುಗ್ಗಲೋ ಮನುಸ್ಸಲೋಕಾ ಚುತೋ ದೇವಲೋಕಂ ಉಪಪನ್ನೋ ತತ್ಥಪಿ ಸೋತಾಪನ್ನೋವ ಹೋತೀತಿ ಕತ್ವಾ ತೇನ ಚ ಕಾರಣೇನ ಸ್ವೇವ ಪುಗ್ಗಲೋ ಸನ್ಧಾವತಿ ಅಸ್ಮಾ ಲೋಕಾ ಪರಂ ಲೋಕಂ, ಪರಸ್ಮಾ ಲೋಕಾ ಇಮಂ ಲೋಕನ್ತಿ? ಆಮನ್ತಾ. ಸೋತಾಪನ್ನೋ ಪುಗ್ಗಲೋ ಮನುಸ್ಸಲೋಕಾ ಚುತೋ ದೇವಲೋಕಂ ಉಪಪನ್ನೋ ತತ್ಥಪಿ ಮನುಸ್ಸೋ ಹೋತೀತಿ ಕತ್ವಾ? ನ ಹೇವಂ ವತ್ತಬ್ಬೇ…ಪೇ….

೮೯. ಸ್ವೇವ ಪುಗ್ಗಲೋ ಸನ್ಧಾವತಿ ಅಸ್ಮಾ ಲೋಕಾ ಪರಂ ಲೋಕಂ, ಪರಸ್ಮಾ ಲೋಕಾ ಇಮಂ ಲೋಕನ್ತಿ? ಆಮನ್ತಾ. ಅನಞ್ಞೋ ಅವಿಗತೋ ಸನ್ಧಾವತೀತಿ? ನ ಹೇವಂ ವತ್ತಬ್ಬೇ…ಪೇ….

೯೦. ಅನಞ್ಞೋ ಅವಿಗತೋ ಸನ್ಧಾವತೀತಿ? ಆಮನ್ತಾ. ಹತ್ಥಚ್ಛಿನ್ನೋ ಹತ್ಥಚ್ಛಿನ್ನೋವ ಹೋತಿ, ಪಾದಚ್ಛಿನ್ನೋ ಪಾದಚ್ಛಿನ್ನೋವ ಹೋತಿ, ಹತ್ಥಪಾದಚ್ಛಿನ್ನೋ ಹತ್ಥಪಾದಚ್ಛಿನ್ನೋವ ಹೋತಿ, ಕಣ್ಣಚ್ಛಿನ್ನೋ… ನಾಸಚ್ಛಿನ್ನೋ… ಕಣ್ಣನಾಸಚ್ಛಿನ್ನೋ… ಅಙ್ಗುಲಿಚ್ಛಿನ್ನೋ… ಅಳಚ್ಛಿನ್ನೋ… ಕಣ್ಡರಚ್ಛಿನ್ನೋ… ಕುಣಿಹತ್ಥಕೋ… ಫಣಹತ್ಥಕೋ… ಕುಟ್ಠಿಯೋ… ಗಣ್ಡಿಯೋ… ಕಿಲಾಸಿಯೋ… ಸೋಸಿಯೋ… ಅಪಮಾರಿಯೋ… ಓಟ್ಠೋ… ಗೋಣೋ… ಗದ್ರಭೋ… ಸೂಕರೋ… ಮಹಿಂಸೋ ಮಹಿಂಸೋವ ಹೋತೀತಿ? ನ ಹೇವಂ ವತ್ತಬ್ಬೇ…ಪೇ….

೯೧. ಸ್ವೇವ ಪುಗ್ಗಲೋ ಸನ್ಧಾವತಿ ಅಸ್ಮಾ ಲೋಕಾ ಪರಂ ಲೋಕಂ, ಪರಸ್ಮಾ ಲೋಕಾ ಇಮಂ ಲೋಕನ್ತಿ? ಆಮನ್ತಾ. ಸರೂಪೋ ಸನ್ಧಾವತೀತಿ? ನ ಹೇವಂ ವತ್ತಬ್ಬೇ…ಪೇ… ಸರೂಪೋ ಸನ್ಧಾವತೀತಿ? ಆಮನ್ತಾ. ತಂ ಜೀವಂ ತಂ ಸರೀರನ್ತಿ? ನ ಹೇವಂ ವತ್ತಬ್ಬೇ…ಪೇ….

ಸವೇದನೋ…ಪೇ… ಸಸಞ್ಞೋ…ಪೇ… ಸಸಙ್ಖಾರೋ…ಪೇ… ಸವಿಞ್ಞಾಣೋ ಸನ್ಧಾವತೀತಿ? ನ ಹೇವಂ ವತ್ತಬ್ಬೇ…ಪೇ… ಸವಿಞ್ಞಾಣೋ ಸನ್ಧಾವತೀತಿ? ಆಮನ್ತಾ. ತಂ ಜೀವಂ ತಂ ಸರೀರನ್ತಿ? ನ ಹೇವಂ ವತ್ತಬ್ಬೇ…ಪೇ….

೯೨. ಸ್ವೇವ ಪುಗ್ಗಲೋ ಸನ್ಧಾವತಿ ಅಸ್ಮಾ ಲೋಕಾ ಪರಂ ಲೋಕಂ, ಪರಸ್ಮಾ ಲೋಕಾ ಇಮಂ ಲೋಕನ್ತಿ? ಆಮನ್ತಾ. ಅರೂಪೋ ಸನ್ಧಾವತೀತಿ? ನ ಹೇವಂ ವತ್ತಬ್ಬೇ…ಪೇ… ಅರೂಪೋ ಸನ್ಧಾವತೀತಿ? ಆಮನ್ತಾ. ಅಞ್ಞಂ ಜೀವಂ ಅಞ್ಞಂ ಸರೀರನ್ತಿ? ನ ಹೇವಂ ವತ್ತಬ್ಬೇ…ಪೇ….

ಅವೇದನೋ…ಪೇ… ಅಸಞ್ಞೋ…ಪೇ… ಅಸಙ್ಖಾರೋ…ಪೇ… ಅವಿಞ್ಞಾಣೋ ಸನ್ಧಾವತೀತಿ? ನ ಹೇವಂ ವತ್ತಬ್ಬೇ…ಪೇ… ಅವಿಞ್ಞಾಣೋ ಸನ್ಧಾವತೀತಿ? ಆಮನ್ತಾ. ಅಞ್ಞಂ ಜೀವಂ ಅಞ್ಞಂ ಸರೀರನ್ತಿ? ನ ಹೇವಂ ವತ್ತಬ್ಬೇ…ಪೇ….

೯೩. ಸ್ವೇವ ಪುಗ್ಗಲೋ ಸನ್ಧಾವತಿ ಅಸ್ಮಾ ಲೋಕಾ ಪರಂ ಲೋಕಂ, ಪರಸ್ಮಾ ಲೋಕಾ ಇಮಂ ಲೋಕನ್ತಿ? ಆಮನ್ತಾ. ರೂಪಂ ಸನ್ಧಾವತೀತಿ? ನ ಹೇವಂ ವತ್ತಬ್ಬೇ…ಪೇ… ರೂಪಂ ಸನ್ಧಾವತೀತಿ? ಆಮನ್ತಾ. ತಂ ಜೀವಂ ತಂ ಸರೀರನ್ತಿ? ನ ಹೇವಂ ವತ್ತಬ್ಬೇ…ಪೇ….

ವೇದನಾ …ಪೇ… ಸಞ್ಞಾ…ಪೇ… ಸಙ್ಖಾರಾ…ಪೇ… ವಿಞ್ಞಾಣಂ ಸನ್ಧಾವತೀತಿ? ನ ಹೇವಂ ವತ್ತಬ್ಬೇ…ಪೇ… ವಿಞ್ಞಾಣಂ ಸನ್ಧಾವತೀತಿ? ಆಮನ್ತಾ. ತಂ ಜೀವಂ ತಂ ಸರೀರನ್ತಿ? ನ ಹೇವಂ ವತ್ತಬ್ಬೇ…ಪೇ….

೯೪. ಸ್ವೇವ ಪುಗ್ಗಲೋ ಸನ್ಧಾವತಿ ಅಸ್ಮಾ ಲೋಕಾ ಪರಂ ಲೋಕಂ, ಪರಸ್ಮಾ ಲೋಕಾ ಇಮಂ ಲೋಕನ್ತಿ? ಆಮನ್ತಾ. ರೂಪಂ ನ ಸನ್ಧಾವತೀತಿ? ನ ಹೇವಂ ವತ್ತಬ್ಬೇ…ಪೇ… ರೂಪಂ ನ ಸನ್ಧಾವತೀತಿ? ಆಮನ್ತಾ. ಅಞ್ಞಂ ಜೀವಂ ಅಞ್ಞಂ ಸರೀರನ್ತಿ? ನ ಹೇವಂ ವತ್ತಬ್ಬೇ…ಪೇ….

ವೇದನಾ …ಪೇ… ಸಞ್ಞಾ…ಪೇ… ಸಙ್ಖಾರಾ…ಪೇ… ವಿಞ್ಞಾಣಂ ನ ಸನ್ಧಾವತೀತಿ? ನ ಹೇವಂ ವತ್ತಬ್ಬೇ…ಪೇ… ವಿಞ್ಞಾಣಂ ನ ಸನ್ಧಾವತೀತಿ? ಆಮನ್ತಾ. ಅಞ್ಞಂ ಜೀವಂ ಅಞ್ಞಂ ಸರೀರನ್ತಿ? ನ ಹೇವಂ ವತ್ತಬ್ಬೇ. (ಸಂಖಿತ್ತಂ).

ಖನ್ಧೇಸು ಭಿಜ್ಜಮಾನೇಸು, ಸೋ ಚೇ ಭಿಜ್ಜತಿ ಪುಗ್ಗಲೋ;

ಉಚ್ಛೇದಾ ಭವತಿ ದಿಟ್ಠಿ, ಯಾ ಬುದ್ಧೇನ ವಿವಜ್ಜಿತಾ.

ಖನ್ಧೇಸು ಭಿಜ್ಜಮಾನೇಸು, ನೋ ಚೇ ಭಿಜ್ಜತಿ ಪುಗ್ಗಲೋ;

ಪುಗ್ಗಲೋ ಸಸ್ಸತೋ ಹೋತಿ, ನಿಬ್ಬಾನೇನ ಸಮಸಮೋತಿ.

ಗತಿಅನುಯೋಗೋ.