೧೨. ಉಪಾದಾಪಞ್ಞತ್ತಾನುಯೋಗೋ

೯೫. ರೂಪಂ ಉಪಾದಾಯ ಪುಗ್ಗಲಸ್ಸ ಪಞ್ಞತ್ತೀತಿ? ಆಮನ್ತಾ. ರೂಪಂ ಅನಿಚ್ಚಂ ಸಙ್ಖತಂ ಪಟಿಚ್ಚಸಮುಪ್ಪನ್ನಂ ಖಯಧಮ್ಮಂ ವಯಧಮ್ಮಂ ವಿರಾಗಧಮ್ಮಂ ನಿರೋಧಧಮ್ಮಂ ವಿಪರಿಣಾಮಧಮ್ಮನ್ತಿ? ಆಮನ್ತಾ? ಪುಗ್ಗಲೋಪಿ ಅನಿಚ್ಚೋ ಸಙ್ಖತೋ ಪಟಿಚ್ಚಸಮುಪ್ಪನ್ನೋ ಖಯಧಮ್ಮೋ ವಯಧಮ್ಮೋ ವಿರಾಗಧಮ್ಮೋ ನಿರೋಧಧಮ್ಮೋ ವಿಪರಿಣಾಮಧಮ್ಮೋತಿ? ನ ಹೇವಂ ವತ್ತಬ್ಬೇ…ಪೇ….

೯೬. ವೇದನಂ ಉಪಾದಾಯ… ಸಞ್ಞಂ ಉಪಾದಾಯ… ಸಙ್ಖಾರೇ ಉಪಾದಾಯ… ವಿಞ್ಞಾಣಂ ಉಪಾದಾಯ ಪುಗ್ಗಲಸ್ಸ ಪಞ್ಞತ್ತೀತಿ? ಆಮನ್ತಾ. ವಿಞ್ಞಾಣಂ ಅನಿಚ್ಚಂ ಸಙ್ಖತಂ ಪಟಿಚ್ಚಸಮುಪ್ಪನ್ನಂ ಖಯಧಮ್ಮಂ ವಯಧಮ್ಮಂ ವಿರಾಗಧಮ್ಮಂ ನಿರೋಧಧಮ್ಮಂ ವಿಪರಿಣಾಮಧಮ್ಮನ್ತಿ? ಆಮನ್ತಾ. ಪುಗ್ಗಲೋಪಿ ಅನಿಚ್ಚೋ ಸಙ್ಖತೋ ಪಟಿಚ್ಚಸಮುಪ್ಪನ್ನೋ ಖಯಧಮ್ಮೋ ವಯಧಮ್ಮೋ ವಿರಾಗಧಮ್ಮೋ ನಿರೋಧಧಮ್ಮೋ ವಿಪರಿಣಾಮಧಮ್ಮೋತಿ? ನ ಹೇವಂ ವತ್ತಬ್ಬೇ…ಪೇ….

೯೭. ರೂಪಂ ಉಪಾದಾಯ ಪುಗ್ಗಲಸ್ಸ ಪಞ್ಞತ್ತೀತಿ? ಆಮನ್ತಾ. ನೀಲಂ ರೂಪಂ ಉಪಾದಾಯ ನೀಲಕಸ್ಸ ಪುಗ್ಗಲಸ್ಸ ಪಞ್ಞತ್ತೀತಿ? ನ ಹೇವಂ ವತ್ತಬ್ಬೇ…ಪೇ… ಪೀತಂ ರೂಪಂ ಉಪಾದಾಯ… ಲೋಹಿತಂ ರೂಪಂ ಉಪಾದಾಯ… ಓದಾತಂ ರೂಪಂ ಉಪಾದಾಯ… ಸನಿದಸ್ಸನಂ ರೂಪಂ ಉಪಾದಾಯ… ಅನಿದಸ್ಸನಂ ರೂಪಂ ಉಪಾದಾಯ… ಸಪ್ಪಟಿಘಂ ರೂಪಂ ಉಪಾದಾಯ… ಅಪ್ಪಟಿಘಂ ರೂಪಂ ಉಪಾದಾಯ ಅಪ್ಪಟಿಘಸ್ಸ ಪುಗ್ಗಲಸ್ಸ ಪಞ್ಞತ್ತೀತಿ? ನ ಹೇವಂ ವತ್ತಬ್ಬೇ…ಪೇ….

೯೮. ವೇದನಂ ಉಪಾದಾಯ ಪುಗ್ಗಲಸ್ಸ ಪಞ್ಞತ್ತೀತಿ? ಆಮನ್ತಾ. ಕುಸಲಂ ವೇದನಂ ಉಪಾದಾಯ ಕುಸಲಸ್ಸ ಪುಗ್ಗಲಸ್ಸ ಪಞ್ಞತ್ತೀತಿ? ನ ಹೇವಂ ವತ್ತಬ್ಬೇ…ಪೇ… ಕುಸಲಂ ವೇದನಂ ಉಪಾದಾಯ ಕುಸಲಸ್ಸ ಪುಗ್ಗಲಸ್ಸ ಪಞ್ಞತ್ತೀತಿ? ಆಮನ್ತಾ. ಕುಸಲಾ ವೇದನಾ ಸಫಲಾ ಸವಿಪಾಕಾ ಇಟ್ಠಫಲಾ ಕನ್ತಫಲಾ ಮನುಞ್ಞಫಲಾ ಅಸೇಚನಕಫಲಾ ಸುಖುದ್ರಯಾ ಸುಖವಿಪಾಕಾತಿ? ಆಮನ್ತಾ. ಕುಸಲೋಪಿ ಪುಗ್ಗಲೋ ಸಫಲೋ ಸವಿಪಾಕೋ ಇಟ್ಠಫಲೋ ಕನ್ತಫಲೋ ಮನುಞ್ಞಫಲೋ ಅಸೇಚನಕಫಲೋ ಸುಖುದ್ರಯೋ ಸುಖವಿಪಾಕೋತಿ? ನ ಹೇವಂ ವತ್ತಬ್ಬೇ…ಪೇ….

೯೯. ವೇದನಂ ಉಪಾದಾಯ ಪುಗ್ಗಲಸ್ಸ ಪಞ್ಞತ್ತೀತಿ? ಆಮನ್ತಾ. ಅಕುಸಲಂ ವೇದನಂ ಉಪಾದಾಯ ಅಕುಸಲಸ್ಸ ಪುಗ್ಗಲಸ್ಸ ಪಞ್ಞತ್ತೀತಿ? ನ ಹೇವಂ ವತ್ತಬ್ಬೇ…ಪೇ… ಅಕುಸಲಂ ವೇದನಂ ಉಪಾದಾಯ ಅಕುಸಲಸ್ಸ ಪುಗ್ಗಲಸ್ಸ ಪಞ್ಞತ್ತೀತಿ? ಆಮನ್ತಾ. ಅಕುಸಲಾ ವೇದನಾ ಸಫಲಾ ಸವಿಪಾಕಾ ಅನಿಟ್ಠಫಲಾ ಅಕನ್ತಫಲಾ ಅಮನುಞ್ಞಫಲಾ ಸೇಚನಕಫಲಾ ದುಕ್ಖುದ್ರಯಾ ದುಕ್ಖವಿಪಾಕಾತಿ? ಆಮನ್ತಾ. ಅಕುಸಲೋಪಿ ಪುಗ್ಗಲೋ ಸಫಲೋ ಸವಿಪಾಕೋ ಅನಿಟ್ಠಫಲೋ ಅಕನ್ತಫಲೋ ಅಮನುಞ್ಞಫಲೋ ಸೇಚನಕಫಲೋ ದುಕ್ಖುದ್ರಯೋ ದುಕ್ಖವಿಪಾಕೋತಿ? ನ ಹೇವಂ ವತ್ತಬ್ಬೇ…ಪೇ….

೧೦೦. ವೇದನಂ ಉಪಾದಾಯ ಪುಗ್ಗಲಸ್ಸ ಪಞ್ಞತ್ತೀತಿ? ಆಮನ್ತಾ. ಅಬ್ಯಾಕತಂ ವೇದನಂ ಉಪಾದಾಯ ಅಬ್ಯಾಕತಸ್ಸ ಪುಗ್ಗಲಸ್ಸ ಪಞ್ಞತ್ತೀತಿ? ನ ಹೇವಂ ವತ್ತಬ್ಬೇ…ಪೇ… ಅಬ್ಯಾಕತಂ ವೇದನಂ ಉಪಾದಾಯ ಅಬ್ಯಾಕತಸ್ಸ ಪುಗ್ಗಲಸ್ಸ ಪಞ್ಞತ್ತೀತಿ? ಆಮನ್ತಾ. ಅಬ್ಯಾಕತಾ ವೇದನಾ ಅನಿಚ್ಚಾ ಸಙ್ಖತಾ ಪಟಿಚ್ಚಸಮುಪ್ಪನ್ನಾ ಖಯಧಮ್ಮಾ ವಯಧಮ್ಮಾ ವಿರಾಗಧಮ್ಮಾ ನಿರೋಧಧಮ್ಮಾ ವಿಪರಿಣಾಮಧಮ್ಮಾತಿ? ಆಮನ್ತಾ. ಅಬ್ಯಾಕತೋಪಿ ಪುಗ್ಗಲೋ ಅನಿಚ್ಚೋ ಸಙ್ಖತೋ ಪಟಿಚ್ಚಸಮುಪ್ಪನ್ನೋ ಖಯಧಮ್ಮೋ ವಯಧಮ್ಮೋ ವಿರಾಗಧಮ್ಮೋ ನಿರೋಧಧಮ್ಮೋ ವಿಪರಿಣಾಮಧಮ್ಮೋತಿ? ನ ಹೇವಂ ವತ್ತಬ್ಬೇ…ಪೇ….

೧೦೧. ಸಞ್ಞಂ ಉಪಾದಾಯ… ಸಙ್ಖಾರೇ ಉಪಾದಾಯ… ವಿಞ್ಞಾಣಂ ಉಪಾದಾಯ ಪುಗ್ಗಲಸ್ಸ ಪಞ್ಞತ್ತೀತಿ? ಆಮನ್ತಾ. ಕುಸಲಂ ವಿಞ್ಞಾಣಂ ಉಪಾದಾಯ ಕುಸಲಸ್ಸ ಪುಗ್ಗಲಸ್ಸ ಪಞ್ಞತ್ತೀತಿ? ನ ಹೇವಂ ವತ್ತಬ್ಬೇ…ಪೇ… ಕುಸಲಂ ವಿಞ್ಞಾಣಂ ಉಪಾದಾಯ ಕುಸಲಸ್ಸ ಪುಗ್ಗಲಸ್ಸ ಪಞ್ಞತ್ತೀತಿ? ಆಮನ್ತಾ. ಕುಸಲಂ ವಿಞ್ಞಾಣಂ ಸಫಲಂ ಸವಿಪಾಕಂ ಇಟ್ಠಫಲಂ ಕನ್ತಫಲಂ ಮನುಞ್ಞಫಲಂ ಅಸೇಚನಕಫಲಂ ಸುಖುದ್ರಯಂ ಸುಖವಿಪಾಕನ್ತಿ? ಆಮನ್ತಾ. ಕುಸಲೋಪಿ ಪುಗ್ಗಲೋ ಸಫಲೋ ಸವಿಪಾಕೋ ಇಟ್ಠಫಲೋ ಕನ್ತಫಲೋ ಮನುಞ್ಞಫಲೋ ಅಸೇಚನಕಫಲೋ ಸುಖುದ್ರಯೋ ಸುಖವಿಪಾಕೋತಿ? ನ ಹೇವಂ ವತ್ತಬ್ಬೇ…ಪೇ….

೧೦೨. ವಿಞ್ಞಾಣಂ ಉಪಾದಾಯ ಪುಗ್ಗಲಸ್ಸ ಪಞ್ಞತ್ತೀತಿ? ಆಮನ್ತಾ. ಅಕುಸಲಂ ವಿಞ್ಞಾಣಂ ಉಪಾದಾಯ ಅಕುಸಲಸ್ಸ ಪುಗ್ಗಲಸ್ಸ ಪಞ್ಞತ್ತೀತಿ? ನ ಹೇವಂ ವತ್ತಬ್ಬೇ…ಪೇ… ಅಕುಸಲಂ ವಿಞ್ಞಾಣಂ ಉಪಾದಾಯ ಅಕುಸಲಸ್ಸ ಪುಗ್ಗಲಸ್ಸ ಪಞ್ಞತ್ತೀತಿ? ಆಮನ್ತಾ. ಅಕುಸಲಂ ವಿಞ್ಞಾಣಂ ಸಫಲಂ ಸವಿಪಾಕಂ ಅನಿಟ್ಠಫಲಂ ಅಕನ್ತಫಲಂ ಅಮನುಞ್ಞಫಲಂ ಸೇಚನಕಫಲಂ ದುಕ್ಖುದ್ರಯಂ ದುಕ್ಖವಿಪಾಕನ್ತಿ? ಆಮನ್ತಾ. ಅಕುಸಲೋಪಿ ಪುಗ್ಗಲೋ ಸಫಲೋ ಸವಿಪಾಕೋ ಅನಿಟ್ಠಫಲೋ ಅಕನ್ತಫಲೋ ಅಮನುಞ್ಞಫಲೋ ಸೇಚನಕಫಲೋ ದುಕ್ಖುದ್ರಯೋ ದುಕ್ಖವಿಪಾಕೋತಿ? ನ ಹೇವಂ ವತ್ತಬ್ಬೇ…ಪೇ….

೧೦೩. ವಿಞ್ಞಾಣಂ ಉಪಾದಾಯ ಪುಗ್ಗಲಸ್ಸ ಪಞ್ಞತ್ತೀತಿ? ಆಮನ್ತಾ. ಅಬ್ಯಾಕತಂ ವಿಞ್ಞಾಣಂ ಉಪಾದಾಯ ಅಬ್ಯಾಕತಸ್ಸ ಪುಗ್ಗಲಸ್ಸ ಪಞ್ಞತ್ತೀತಿ? ನ ಹೇವಂ ವತ್ತಬ್ಬೇ…ಪೇ… ಅಬ್ಯಾಕತಂ ವಿಞ್ಞಾಣಂ ಉಪಾದಾಯ ಅಬ್ಯಾಕತಸ್ಸ ಪುಗ್ಗಲಸ್ಸ ಪಞ್ಞತ್ತೀತಿ? ಆಮನ್ತಾ. ಅಬ್ಯಾಕತಂ ವಿಞ್ಞಾಣಂ ಅನಿಚ್ಚಂ ಸಙ್ಖತಂ ಪಟಿಚ್ಚಸಮುಪ್ಪನ್ನಂ ಖಯಧಮ್ಮಂ ವಯಧಮ್ಮಂ ವಿರಾಗಧಮ್ಮಂ ನಿರೋಧಧಮ್ಮಂ ವಿಪರಿಣಾಮಧಮ್ಮನ್ತಿ? ಆಮನ್ತಾ. ಅಬ್ಯಾಕತೋಪಿ ಪುಗ್ಗಲೋ ಅನಿಚ್ಚೋ ಸಙ್ಖತೋ ಪಟಿಚ್ಚಸಮುಪ್ಪನ್ನೋ ಖಯಧಮ್ಮೋ ವಯಧಮ್ಮೋ ವಿರಾಗಧಮ್ಮೋ ನಿರೋಧಧಮ್ಮೋ ವಿಪರಿಣಾಮಧಮ್ಮೋತಿ? ನ ಹೇವಂ ವತ್ತಬ್ಬೇ…ಪೇ….

೧೦೪. ಚಕ್ಖುಂ ಉಪಾದಾಯ ‘‘ಚಕ್ಖುಮಾ ಪುಗ್ಗಲೋ’’ತಿ ವತ್ತಬ್ಬೋತಿ? ಆಮನ್ತಾ. ಚಕ್ಖುಮ್ಹಿ ನಿರುದ್ಧೇ ‘‘ಚಕ್ಖುಮಾ ಪುಗ್ಗಲೋ ನಿರುದ್ಧೋ’’ತಿ ವತ್ತಬ್ಬೋತಿ? ನ ಹೇವಂ ವತ್ತಬ್ಬೇ…ಪೇ… ಸೋತಂ ಉಪಾದಾಯ… ಘಾನಂ ಉಪಾದಾಯ… ಜಿವ್ಹಂ ಉಪಾದಾಯ… ಕಾಯಂ ಉಪಾದಾಯ… ಮನಂ ಉಪಾದಾಯ ‘‘ಮನವಾ ಪುಗ್ಗಲೋ’’ತಿ ವತ್ತಬ್ಬೋತಿ? ಆಮನ್ತಾ. ಮನಮ್ಹಿ ನಿರುದ್ಧೇ ‘‘ಮನವಾ ಪುಗ್ಗಲೋ ನಿರುದ್ಧೋ’’ತಿ ವತ್ತಬ್ಬೋತಿ? ನ ಹೇವಂ ವತ್ತಬ್ಬೇ.

೧೦೫. ಮಿಚ್ಛಾದಿಟ್ಠಿಂ ಉಪಾದಾಯ ‘‘ಮಿಚ್ಛಾದಿಟ್ಠಿಯೋ ಪುಗ್ಗಲೋ’’ತಿ ವತ್ತಬ್ಬೋತಿ? ಆಮನ್ತಾ. ಮಿಚ್ಛಾದಿಟ್ಠಿಯಾ ನಿರುದ್ಧಾಯ ‘‘ಮಿಚ್ಛಾದಿಟ್ಠಿಯೋ ಪುಗ್ಗಲೋ ನಿರುದ್ಧೋ’’ತಿ ವತ್ತಬ್ಬೋತಿ? ನ ಹೇವಂ ವತ್ತಬ್ಬೇ. ಮಿಚ್ಛಾಸಙ್ಕಪ್ಪಂ ಉಪಾದಾಯ… ಮಿಚ್ಛಾವಾಚಂ ಉಪಾದಾಯ… ಮಿಚ್ಛಾಕಮ್ಮನ್ತಂ ಉಪಾದಾಯ… ಮಿಚ್ಛಾಆಜೀವಂ ಉಪಾದಾಯ … ಮಿಚ್ಛಾವಾಯಾಮಂ ಉಪಾದಾಯ… ಮಿಚ್ಛಾಸತಿಂ ಉಪಾದಾಯ… ಮಿಚ್ಛಾಸಮಾಧಿಂ ಉಪಾದಾಯ ‘‘ಮಿಚ್ಛಾಸಮಾಧಿಯೋ ಪುಗ್ಗಲೋ’’ತಿ ವತ್ತಬ್ಬೋತಿ? ಆಮನ್ತಾ. ಮಿಚ್ಛಾಸಮಾಧಿಮ್ಹಿ ನಿರುದ್ಧೇ ‘‘ಮಿಚ್ಛಾಸಮಾಧಿಯೋ ಪುಗ್ಗಲೋ ನಿರುದ್ಧೋ’’ತಿ ವತ್ತಬ್ಬೋತಿ? ನ ಹೇವಂ ವತ್ತಬ್ಬೇ.

೧೦೬. ಸಮ್ಮಾದಿಟ್ಠಿಂ ಉಪಾದಾಯ ‘‘ಸಮ್ಮಾದಿಟ್ಠಿಯೋ ಪುಗ್ಗಲೋ’’ತಿ ವತ್ತಬ್ಬೋತಿ? ಆಮನ್ತಾ. ಸಮ್ಮಾದಿಟ್ಠಿಯಾ ನಿರುದ್ಧಾಯ ‘‘ಸಮ್ಮಾದಿಟ್ಠಿಯೋ ಪುಗ್ಗಲೋ ನಿರುದ್ಧೋ’’ತಿ ವತ್ತಬ್ಬೋತಿ? ನ ಹೇವಂ ವತ್ತಬ್ಬೇ…ಪೇ… ಸಮ್ಮಾಸಙ್ಕಪ್ಪಂ ಉಪಾದಾಯ… ಸಮ್ಮಾವಾಚಂ ಉಪಾದಾಯ… ಸಮ್ಮಾಕಮ್ಮನ್ತಂ ಉಪಾದಾಯ… ಸಮ್ಮಾಆಜೀವಂ ಉಪಾದಾಯ… ಸಮ್ಮಾವಾಯಾಮಂ ಉಪಾದಾಯ… ಸಮ್ಮಾಸತಿಂ ಉಪಾದಾಯ… ಸಮ್ಮಾಸಮಾಧಿಂ ಉಪಾದಾಯ ‘‘ಸಮ್ಮಾಸಮಾಧಿಯೋ ಪುಗ್ಗಲೋ’’ತಿ ವತ್ತಬ್ಬೋತಿ? ಆಮನ್ತಾ. ಸಮ್ಮಾಸಮಾಧಿಮ್ಹಿ ನಿರುದ್ಧೇ ‘‘ಸಮ್ಮಾಸಮಾಧಿಯೋ ಪುಗ್ಗಲೋ ನಿರುದ್ಧೋ’’ತಿ ವತ್ತಬ್ಬೋತಿ? ನ ಹೇವಂ ವತ್ತಬ್ಬೇ…ಪೇ….

೧೦೭. ರೂಪಂ ಉಪಾದಾಯ, ವೇದನಂ ಉಪಾದಾಯ ಪುಗ್ಗಲಸ್ಸ ಪಞ್ಞತ್ತೀತಿ? ಆಮನ್ತಾ. ದ್ವಿನ್ನಂ ಖನ್ಧಾನಂ ಉಪಾದಾಯ ದ್ವಿನ್ನಂ ಪುಗ್ಗಲಾನಂ ಪಞ್ಞತ್ತೀತಿ? ನ ಹೇವಂ ವತ್ತಬ್ಬೇ…ಪೇ… ರೂಪಂ ಉಪಾದಾಯ, ವೇದನಂ ಉಪಾದಾಯ, ಸಞ್ಞಂ ಉಪಾದಾಯ, ಸಙ್ಖಾರೇ ಉಪಾದಾಯ, ವಿಞ್ಞಾಣಂ ಉಪಾದಾಯ ಪುಗ್ಗಲಸ್ಸ ಪಞ್ಞತ್ತೀತಿ? ಆಮನ್ತಾ. ಪಞ್ಚನ್ನಂ ಖನ್ಧಾನಂ ಉಪಾದಾಯ ಪಞ್ಚನ್ನಂ ಪುಗ್ಗಲಾನಂ ಪಞ್ಞತ್ತೀತಿ? ನ ಹೇವಂ ವತ್ತಬ್ಬೇ…ಪೇ….

೧೦೮. ಚಕ್ಖಾಯತನಂ ಉಪಾದಾಯ, ಸೋತಾಯತನಂ ಉಪಾದಾಯ ಪುಗ್ಗಲಸ್ಸ ಪಞ್ಞತ್ತೀತಿ? ಆಮನ್ತಾ. ದ್ವಿನ್ನಂ ಆಯತನಾನಂ ಉಪಾದಾಯ ದ್ವಿನ್ನಂ ಪುಗ್ಗಲಾನಂ ಪಞ್ಞತ್ತೀತಿ? ನ ಹೇವಂ ವತ್ತಬ್ಬೇ…ಪೇ… ಚಕ್ಖಾಯತನಂ ಉಪಾದಾಯ, ಸೋತಾಯತನಂ ಉಪಾದಾಯ…ಪೇ… ಧಮ್ಮಾಯತನಂ ಉಪಾದಾಯ ಪುಗ್ಗಲಸ್ಸ ಪಞ್ಞತ್ತೀತಿ? ಆಮನ್ತಾ. ದ್ವಾದಸನ್ನಂ ಆಯತನಾನಂ ಉಪಾದಾಯ ದ್ವಾದಸನ್ನಂ ಪುಗ್ಗಲಾನಂ ಪಞ್ಞತ್ತೀತಿ? ನ ಹೇವಂ ವತ್ತಬ್ಬೇ…ಪೇ….

೧೦೯. ಚಕ್ಖುಧಾತುಂ ಉಪಾದಾಯ, ಸೋತಧಾತುಂ ಉಪಾದಾಯ ಪುಗ್ಗಲಸ್ಸ ಪಞ್ಞತ್ತೀತಿ? ಆಮನ್ತಾ. ದ್ವಿನ್ನಂ ಧಾತೂನಂ ಉಪಾದಾಯ ದ್ವಿನ್ನಂ ಪುಗ್ಗಲಾನಂ ಪಞ್ಞತ್ತೀತಿ? ನ ಹೇವಂ ವತ್ತಬ್ಬೇ…ಪೇ… ಚಕ್ಖುಧಾತುಂ ಉಪಾದಾಯ, ಸೋತಧಾತುಂ ಉಪಾದಾಯ…ಪೇ… ಧಮ್ಮಧಾತುಂ ಉಪಾದಾಯ ಪುಗ್ಗಲಸ್ಸ ಪಞ್ಞತ್ತೀತಿ? ಆಮನ್ತಾ. ಅಟ್ಠಾರಸನ್ನಂ ಧಾತೂನಂ ಉಪಾದಾಯ ಅಟ್ಠಾರಸನ್ನಂ ಪುಗ್ಗಲಾನಂ ಪಞ್ಞತ್ತೀತಿ? ನ ಹೇವಂ ವತ್ತಬ್ಬೇ…ಪೇ….

೧೧೦. ಚಕ್ಖುನ್ದ್ರಿಯಂ ಉಪಾದಾಯ, ಸೋತಿನ್ದ್ರಿಯಂ ಉಪಾದಾಯ ಪುಗ್ಗಲಸ್ಸ ಪಞ್ಞತ್ತೀತಿ? ಆಮನ್ತಾ. ದ್ವಿನ್ನಂ ಇನ್ದ್ರಿಯಾನಂ ಉಪಾದಾಯ ದ್ವಿನ್ನಂ ಪುಗ್ಗಲಾನಂ ಪಞ್ಞತ್ತೀತಿ? ನ ಹೇವಂ ವತ್ತಬ್ಬೇ…ಪೇ… ಚಕ್ಖುನ್ದ್ರಿಯಂ ಉಪಾದಾಯ, ಸೋತಿನ್ದ್ರಿಯಂ ಉಪಾದಾಯ…ಪೇ… ಅಞ್ಞಾತಾವಿನ್ದ್ರಿಯಂ ಉಪಾದಾಯ ಪುಗ್ಗಲಸ್ಸ ಪಞ್ಞತ್ತೀತಿ? ಆಮನ್ತಾ. ಬಾವೀಸತೀನಂ [ಬಾವೀಸತಿಯಾ (?)] ಇನ್ದ್ರಿಯಾನಂ ಉಪಾದಾಯ ಬಾವೀಸತೀನಂ ಪುಗ್ಗಲಾನಂ ಪಞ್ಞತ್ತೀತಿ? ನ ಹೇವಂ ವತ್ತಬ್ಬೇ…ಪೇ….

೧೧೧. ಏಕವೋಕಾರಭವಂ ಉಪಾದಾಯ ಏಕಸ್ಸ ಪುಗ್ಗಲಸ್ಸ ಪಞ್ಞತ್ತೀತಿ? ಆಮನ್ತಾ. ಚತುವೋಕಾರಭವಂ ಉಪಾದಾಯ ಚತುನ್ನಂ ಪುಗ್ಗಲಾನಂ ಪಞ್ಞತ್ತೀತಿ? ನ ಹೇವಂ ವತ್ತಬ್ಬೇ…ಪೇ… ಏಕವೋಕಾರಭವಂ ಉಪಾದಾಯ ಏಕಸ್ಸ ಪುಗ್ಗಲಸ್ಸ ಪಞ್ಞತ್ತೀತಿ? ಆಮನ್ತಾ. ಪಞ್ಚವೋಕಾರಭವಂ ಉಪಾದಾಯ ಪಞ್ಚನ್ನಂ ಪುಗ್ಗಲಾನಂ ಪಞ್ಞತ್ತೀತಿ? ನ ಹೇವಂ ವತ್ತಬ್ಬೇ…ಪೇ… ಏಕವೋಕಾರಭವೇ ಏಕೋವ ಪುಗ್ಗಲೋತಿ? ಆಮನ್ತಾ. ಚತುವೋಕಾರಭವೇ ಚತ್ತಾರೋವ [ಚತ್ತಾರೋ (?)] ಪುಗ್ಗಲಾತಿ? ನ ಹೇವಂ ವತ್ತಬ್ಬೇ…ಪೇ… ಏಕವೋಕಾರಭವೇ ಏಕೋವ ಪುಗ್ಗಲೋತಿ? ಆಮನ್ತಾ. ಪಞ್ಚವೋಕಾರಭವೇ ಪಞ್ಚೇವ ಪುಗ್ಗಲಾತಿ? ನ ಹೇವಂ ವತ್ತಬ್ಬೇ…ಪೇ….

೧೧೨. ಯಥಾ ರುಕ್ಖಂ ಉಪಾದಾಯ ಛಾಯಾಯ ಪಞ್ಞತ್ತಿ, ಏವಮೇವಂ ರೂಪಂ ಉಪಾದಾಯ ಪುಗ್ಗಲಸ್ಸ ಪಞ್ಞತ್ತೀತಿ? ( ) [(ಆಮನ್ತಾ) (?) ಏವಂ ಅನನ್ತರವಾರತ್ತಯೇಪಿ] ಯಥಾ ರುಕ್ಖಂ ಉಪಾದಾಯ ಛಾಯಾಯ ಪಞ್ಞತ್ತಿ, ರುಕ್ಖೋಪಿ ಅನಿಚ್ಚೋ ಛಾಯಾಪಿ ಅನಿಚ್ಚಾ, ಏವಮೇವಂ ರೂಪಂ ಉಪಾದಾಯ ಪುಗ್ಗಲಸ್ಸ ಪಞ್ಞತ್ತಿ, ರೂಪಮ್ಪಿ ಅನಿಚ್ಚಂ ಪುಗ್ಗಲೋಪಿ ಅನಿಚ್ಚೋತಿ? ನ ಹೇವಂ ವತ್ತಬ್ಬೇ…ಪೇ… ಯಥಾ ರುಕ್ಖಂ ಉಪಾದಾಯ ಛಾಯಾಯ ಪಞ್ಞತ್ತಿ, ಅಞ್ಞೋ ರುಕ್ಖೋ ಅಞ್ಞಾ ಛಾಯಾ, ಏವಮೇವಂ ರೂಪಂ ಉಪಾದಾಯ ಪುಗ್ಗಲಸ್ಸ ಪಞ್ಞತ್ತಿ, ಅಞ್ಞಂ ರೂಪಂ ಅಞ್ಞೋ ಪುಗ್ಗಲೋತಿ? ನ ಹೇವಂ ವತ್ತಬ್ಬೇ…ಪೇ….

೧೧೩. ಯಥಾ ಗಾಮಂ ಉಪಾದಾಯ ಗಾಮಿಕಸ್ಸ ಪಞ್ಞತ್ತಿ, ಏವಮೇವಂ ರೂಪಂ ಉಪಾದಾಯ ಪುಗ್ಗಲಸ್ಸ ಪಞ್ಞತ್ತೀತಿ? ಯಥಾ ಗಾಮಂ ಉಪಾದಾಯ ಗಾಮಿಕಸ್ಸ ಪಞ್ಞತ್ತಿ, ಅಞ್ಞೋ ಗಾಮೋ ಅಞ್ಞೋ ಗಾಮಿಕೋ, ಏವಮೇವಂ ರೂಪಂ ಉಪಾದಾಯ ಪುಗ್ಗಲಸ್ಸ ಪಞ್ಞತ್ತಿ, ಅಞ್ಞಂ ರೂಪಂ ಅಞ್ಞೋ ಪುಗ್ಗಲೋತಿ? ನ ಹೇವಂ ವತ್ತಬ್ಬೇ…ಪೇ….

೧೧೪. ಯಥಾ ರಟ್ಠಂ ಉಪಾದಾಯ ರಞ್ಞೋ ಪಞ್ಞತ್ತಿ, ಏವಮೇವಂ ರೂಪಂ ಉಪಾದಾಯ ಪುಗ್ಗಲಸ್ಸ ಪಞ್ಞತ್ತೀತಿ? ಯಥಾ ರಟ್ಠಂ ಉಪಾದಾಯ ರಞ್ಞೋ ಪಞ್ಞತ್ತಿ, ಅಞ್ಞಂ ರಟ್ಠಂ ಅಞ್ಞೋ ರಾಜಾ, ಏವಮೇವಂ ರೂಪಂ ಉಪಾದಾಯ ಪುಗ್ಗಲಸ್ಸ ಪಞ್ಞತ್ತಿ, ಅಞ್ಞಂ ರೂಪಂ ಅಞ್ಞೋ ಪುಗ್ಗಲೋತಿ? ನ ಹೇವಂ ವತ್ತಬ್ಬೇ…ಪೇ….

೧೧೫. ಯಥಾ ನ ನಿಗಳೋ ನೇಗಳಿಕೋ, ಯಸ್ಸ ನಿಗಳೋ ಸೋ ನೇಗಳಿಕೋ, ಏವಮೇವಂ ನ ರೂಪಂ ರೂಪವಾ, ಯಸ್ಸ ರೂಪಂ ಸೋ ರೂಪವಾತಿ? ಯಥಾ ನ ನಿಗಳೋ ನೇಗಳಿಕೋ, ಯಸ್ಸ ನಿಗಳೋ ಸೋ ನೇಗಳಿಕೋ, ಅಞ್ಞೋ ನಿಗಳೋ ಅಞ್ಞೋ ನೇಗಳಿಕೋ, ಏವಮೇವಂ ನ ರೂಪಂ ರೂಪವಾ, ಯಸ್ಸ ರೂಪಂ ಸೋ ರೂಪವಾ, ಅಞ್ಞಂ ರೂಪಂ ಅಞ್ಞೋ ರೂಪವಾತಿ? ನ ಹೇವಂ ವತ್ತಬ್ಬೇ…ಪೇ….

೧೧೬. ಚಿತ್ತೇ ಚಿತ್ತೇ ಪುಗ್ಗಲಸ್ಸ ಪಞ್ಞತ್ತೀತಿ? ಆಮನ್ತಾ. ಚಿತ್ತೇ ಚಿತ್ತೇ ಪುಗ್ಗಲೋ ಜಾಯತಿ ಜೀಯತಿ ಮೀಯತಿ ಚವತಿ ಉಪಪಜ್ಜತೀತಿ? ನ ಹೇವಂ ವತ್ತಬ್ಬೇ…ಪೇ… ದುತಿಯೇ ಚಿತ್ತೇ ಉಪ್ಪನ್ನೇ ನ ವತ್ತಬ್ಬಂ ಸೋತಿ ವಾ ಅಞ್ಞೋತಿ ವಾತಿ? ಆಮನ್ತಾ. ದುತಿಯೇ ಚಿತ್ತೇ ಉಪ್ಪನ್ನೇ ನ ವತ್ತಬ್ಬಂ ಕುಮಾರಕೋತಿ ವಾ ಕುಮಾರಿಕಾತಿ ವಾತಿ? ವತ್ತಬ್ಬಂ.

ಆಜಾನಾಹಿ ನಿಗ್ಗಹಂ. ಹಞ್ಚಿ ದುತಿಯೇ ಚಿತ್ತೇ ಉಪ್ಪನ್ನೇ ನ ವತ್ತಬ್ಬಂ – ‘‘ಸೋತಿ ವಾ ಅಞ್ಞೋತಿ ವಾ,’’ ತೇನ ವತ ರೇ ವತ್ತಬ್ಬೇ – ‘‘ದುತಿಯೇ ಚಿತ್ತೇ ಉಪ್ಪನ್ನೇ ನ ವತ್ತಬ್ಬಂ – ‘ಕುಮಾರಕೋತಿ ವಾ ಕುಮಾರಿಕಾತಿ ವಾ’’’ತಿ. ಯಂ ತತ್ಥ ವದೇಸಿ – ‘‘ವತ್ತಬ್ಬೇ ಖೋ – ‘ದುತಿಯೇ ಚಿತ್ತೇ ಉಪ್ಪನ್ನೇ ನ ವತ್ತಬ್ಬಂ – ಸೋತಿ ವಾ ಅಞ್ಞೋತಿ ವಾ, ದುತಿಯೇ ಚಿತ್ತೇ ಉಪ್ಪನ್ನೇ ವತ್ತಬ್ಬಂ – ಕುಮಾರಕೋತಿ ವಾ ಕುಮಾರಿಕಾತಿ ವಾ’’’ತಿ ಮಿಚ್ಛಾ.

ಹಞ್ಚಿ ವಾ ಪನ ದುತಿಯೇ ಚಿತ್ತೇ ಉಪ್ಪನ್ನೇ ವತ್ತಬ್ಬಂ – ‘‘ಕುಮಾರಕೋತಿ ವಾ ಕುಮಾರಿಕಾ’’ತಿ ವಾ, ತೇನ ವತ ರೇ ವತ್ತಬ್ಬೇ – ‘‘ದುತಿಯೇ ಚಿತ್ತೇ ಉಪ್ಪನ್ನೇ ವತ್ತಬ್ಬಂ – ‘ಸೋತಿ ವಾ ಅಞ್ಞೋತಿ ವಾ’’’ತಿ. ಯಂ ತತ್ಥ ವದೇಸಿ – ‘‘ವತ್ತಬ್ಬೇ ಖೋ – ‘ದುತಿಯೇ ಚಿತ್ತೇ ಉಪ್ಪನ್ನೇ ನ ವತ್ತಬ್ಬಂ – ಸೋತಿ ವಾ ಅಞ್ಞೋತಿ ವಾ, ದುತಿಯೇ ಚಿತ್ತೇ ಉಪ್ಪನ್ನೇ ವತ್ತಬ್ಬಂ – ಕುಮಾರಕೋತಿ ವಾ ಕುಮಾರಿಕಾತಿ ವಾ’’’ತಿ ಮಿಚ್ಛಾ.

೧೧೭. ದುತಿಯೇ ಚಿತ್ತೇ ಉಪ್ಪನ್ನೇ ನ ವತ್ತಬ್ಬಂ – ‘‘ಸೋತಿ ವಾ ಅಞ್ಞೋತಿ ವಾ’’ತಿ? ಆಮನ್ತಾ. ದುತಿಯೇ ಚಿತ್ತೇ ಉಪ್ಪನ್ನೇ ನ ವತ್ತಬ್ಬಂ – ‘‘ಇತ್ಥೀತಿ ವಾ ಪುರಿಸೋತಿ ವಾ ಗಹಟ್ಠೋತಿ ವಾ ಪಬ್ಬಜಿತೋತಿ ವಾ ದೇವೋತಿ ವಾ ಮನುಸ್ಸೋತಿ ವಾ’’ತಿ? ವತ್ತಬ್ಬಂ.

ಆಜಾನಾಹಿ ನಿಗ್ಗಹಂ. ಹಞ್ಚಿ ದುತಿಯೇ ಚಿತ್ತೇ ಉಪ್ಪನ್ನೇ ನ ವತ್ತಬ್ಬಂ – ‘‘ಸೋತಿ ವಾ ಅಞ್ಞೋತಿ ವಾ,’’ ತೇನ ವತ ರೇ ವತ್ತಬ್ಬೇ – ‘‘ದುತಿಯೇ ಚಿತ್ತೇ ಉಪ್ಪನ್ನೇ ನ ವತ್ತಬ್ಬಂ – ‘ದೇವೋತಿ ವಾ ಮನುಸ್ಸೋತಿ ವಾ’’’ತಿ. ಯಂ ತತ್ಥ ವದೇಸಿ – ‘‘ವತ್ತಬ್ಬೇ ಖೋ – ‘ದುತಿಯೇ ಚಿತ್ತೇ ಉಪ್ಪನ್ನೇ ನ ವತ್ತಬ್ಬಂ – ಸೋತಿ ವಾ ಅಞ್ಞೋತಿ ವಾ, ದುತಿಯೇ ಚಿತ್ತೇ ಉಪ್ಪನ್ನೇ ವತ್ತಬ್ಬಂ – ದೇವೋತಿ ವಾ ಮನುಸ್ಸೋತಿ ವಾ’’’ತಿ ಮಿಚ್ಛಾ.

ಹಞ್ಚಿ ವಾ ಪನ ದುತಿಯೇ ಚಿತ್ತೇ ಉಪ್ಪನ್ನೇ ವತ್ತಬ್ಬಂ – ‘‘ದೇವೋತಿ ವಾ ಮನುಸ್ಸೋತಿ ವಾ,’’ ತೇನ ವತ ರೇ ವತ್ತಬ್ಬೇ – ‘‘ದುತಿಯೇ ಚಿತ್ತೇ ಉಪ್ಪನ್ನೇ ವತ್ತಬ್ಬಂ – ‘ಸೋತಿ ವಾ ಅಞ್ಞೋತಿ ವಾ’’’ತಿ. ಯಂ ತತ್ಥ ವದೇಸಿ – ‘‘ವತ್ತಬ್ಬೇ ಖೋ – ‘ದುತಿಯೇ ಚಿತ್ತೇ ಉಪ್ಪನ್ನೇ ನ ವತ್ತಬ್ಬಂ – ಸೋತಿ ವಾ ಅಞ್ಞೋತಿ ವಾ, ದುತಿಯೇ ಚಿತ್ತೇ ಉಪ್ಪನ್ನೇ ವತ್ತಬ್ಬಂ – ದೇವೋತಿ ವಾ ಮನುಸ್ಸೋತಿ ವಾ’’’ತಿ ಮಿಚ್ಛಾ…ಪೇ….

೧೧೮. ನ ವತ್ತಬ್ಬಂ – ‘‘ಪುಗ್ಗಲೋ ಉಪಲಬ್ಭತಿ ಸಚ್ಚಿಕಟ್ಠಪರಮತ್ಥೇನಾ’’ತಿ? ಆಮನ್ತಾ. ನನು ಯೋ ಪಸ್ಸತಿ ಯಂ ಪಸ್ಸತಿ ಯೇನ ಪಸ್ಸತಿ, ಸೋ ಪಸ್ಸತಿ ತಂ ಪಸ್ಸತಿ ತೇನ ಪಸ್ಸತೀತಿ? ಆಮನ್ತಾ. ಹಞ್ಚಿ ಯೋ ಪಸ್ಸತಿ ಯಂ ಪಸ್ಸತಿ ಯೇನ ಪಸ್ಸತಿ, ಸೋ ಪಸ್ಸತಿ ತಂ ಪಸ್ಸತಿ ತೇನ ಪಸ್ಸತಿ; ತೇನ ವತ ರೇ ವತ್ತಬ್ಬೇ – ‘‘ಪುಗ್ಗಲೋ ಉಪಲಬ್ಭತಿ ಸಚ್ಚಿಕಟ್ಠಪರಮತ್ಥೇನಾ’’ತಿ.

೧೧೯. ನ ವತ್ತಬ್ಬಂ – ‘‘ಪುಗ್ಗಲೋ ಉಪಲಬ್ಭತಿ ಸಚ್ಚಿಕಟ್ಠಪರಮತ್ಥೇನಾ’’ತಿ? ಆಮನ್ತಾ. ನನು ಯೋ ಸುಣಾತಿ…ಪೇ… ಯೋ ಘಾಯತಿ… ಯೋ ಸಾಯತಿ… ಯೋ ಫುಸತಿ… ಯೋ ವಿಜಾನಾತಿ ಯಂ ವಿಜಾನಾತಿ ಯೇನ ವಿಜಾನಾತಿ, ಸೋ ವಿಜಾನಾತಿ ತಂ ವಿಜಾನಾತಿ ತೇನ ವಿಜಾನಾತೀತಿ? ಆಮನ್ತಾ. ಹಞ್ಚಿ ಯೋ ವಿಜಾನಾತಿ ಯಂ ವಿಜಾನಾತಿ ಯೇನ ವಿಜಾನಾತಿ, ಸೋ ವಿಜಾನಾತಿ ತಂ ವಿಜಾನಾತಿ ತೇನ ವಿಜಾನಾತಿ; ತೇನ ವತ ರೇ ವತ್ತಬ್ಬೇ – ‘‘ಪುಗ್ಗಲೋ ಉಪಲಬ್ಭತಿ ಸಚ್ಚಿಕಟ್ಠಪರಮತ್ಥೇನಾ’’ತಿ.

೧೨೦. ಪುಗ್ಗಲೋ ಉಪಲಬ್ಭತಿ ಸಚ್ಚಿಕಟ್ಠಪರಮತ್ಥೇನಾತಿ? ಆಮನ್ತಾ. ನನು ಯೋ ನ ಪಸ್ಸತಿ ಯಂ ನ ಪಸ್ಸತಿ ಯೇನ ನ ಪಸ್ಸತಿ, ಸೋ ನ ಪಸ್ಸತಿ ತಂ ನ ಪಸ್ಸತಿ ತೇನ ನ ಪಸ್ಸತೀತಿ? ಆಮನ್ತಾ. ಹಞ್ಚಿ ಯೋ ನ ಪಸ್ಸತಿ ಯಂ ನ ಪಸ್ಸತಿ ಯೇನ ನ ಪಸ್ಸತಿ, ಸೋ ನ ಪಸ್ಸತಿ ತಂ ನ ಪಸ್ಸತಿ ತೇನ ನ ಪಸ್ಸತಿ; ನೋ ಚ ವತ ರೇ ವತ್ತಬ್ಬೇ – ‘‘ಪುಗ್ಗಲೋ ಉಪಲಬ್ಭತಿ ಸಚ್ಚಿಕಟ್ಠಪರಮತ್ಥೇನಾ’’ತಿ.

ಪುಗ್ಗಲೋ ಉಪಲಬ್ಭತಿ ಸಚ್ಚಿಕಟ್ಠಪರಮತ್ಥೇನಾತಿ? ಆಮನ್ತಾ. ನನು ಯೋ ನ ಸುಣಾತಿ…ಪೇ… ಯೋ ನ ಘಾಯತಿ… ಯೋ ನ ಸಾಯತಿ… ಯೋ ನ ಫುಸತಿ… ಯೋ ನ ವಿಜಾನಾತಿ ಯಂ ನ ವಿಜಾನಾತಿ ಯೇನ ನ ವಿಜಾನಾತಿ, ಸೋ ನ ವಿಜಾನಾತಿ ತಂ ನ ವಿಜಾನಾತಿ ತೇನ ನ ವಿಜಾನಾತೀತಿ? ಆಮನ್ತಾ. ಹಞ್ಚಿ ಯೋ ನ ವಿಜಾನಾತಿ ಯಂ ನ ವಿಜಾನಾತಿ ಯೇನ ನ ವಿಜಾನಾತಿ, ಸೋ ನ ವಿಜಾನಾತಿ ತಂ ನ ವಿಜಾನಾತಿ ತೇನ ನ ವಿಜಾನಾತಿ; ನೋ ಚ ವತ ರೇ ವತ್ತಬ್ಬೇ – ‘‘ಪುಗ್ಗಲೋ ಉಪಲಬ್ಭತಿ ಸಚ್ಚಿಕಟ್ಠಪರಮತ್ಥೇನಾ’’ತಿ.

೧೨೧. ನ ವತ್ತಬ್ಬಂ – ‘‘ಪುಗ್ಗಲೋ ಉಪಲಬ್ಭತಿ ಸಚ್ಚಿಕಟ್ಠಪರಮತ್ಥೇನಾ’’ತಿ? ಆಮನ್ತಾ. ನನು ವುತ್ತಂ ಭಗವತಾ – ‘‘ಪಸ್ಸಾಮಹಂ, ಭಿಕ್ಖವೇ, ದಿಬ್ಬೇನ ಚಕ್ಖುನಾ ವಿಸುದ್ಧೇನ ಅತಿಕ್ಕನ್ತಮಾನುಸಕೇನ ಸತ್ತೇ ಚವಮಾನೇ ಉಪಪಜ್ಜಮಾನೇ ಹೀನೇ ಪಣೀತೇ ಸುವಣ್ಣೇ ದುಬ್ಬಣ್ಣೇ, ಸುಗತೇ ದುಗ್ಗತೇ ಯಥಾಕಮ್ಮೂಪಗೇ ಸತ್ತೇ ಪಜಾನಾಮೀ’’ತಿ [ಮ. ನಿ. ೧.೨೧೩ ಥೋಕಂ ವಿಸದಿಸಂ]! ಅತ್ಥೇವ ಸುತ್ತನ್ತೋತಿ? ಆಮನ್ತಾ. ತೇನ ಹಿ ಪುಗ್ಗಲೋ ಉಪಲಬ್ಭತಿ ಸಚ್ಚಿಕಟ್ಠಪರಮತ್ಥೇನಾತಿ.

೧೨೨. ವುತ್ತಂ ಭಗವತಾ – ‘‘ಪಸ್ಸಾಮಹಂ, ಭಿಕ್ಖವೇ, ದಿಬ್ಬೇನ ಚಕ್ಖುನಾ ವಿಸುದ್ಧೇನ ಅತಿಕ್ಕನ್ತಮಾನುಸಕೇನ ಸತ್ತೇ ಚವಮಾನೇ ಉಪಪಜ್ಜಮಾನೇ ಹೀನೇ ಪಣೀತೇ ಸುವಣ್ಣೇ ದುಬ್ಬಣ್ಣೇ, ಸುಗತೇ ದುಗ್ಗತೇ ಯಥಾಕಮ್ಮೂಪಗೇ ಸತ್ತೇ ಪಜಾನಾಮೀ’’ತಿ ಕತ್ವಾ ತೇನೇವ ಕಾರಣೇನ ಪುಗ್ಗಲೋ ಉಪಲಬ್ಭತಿ ಸಚ್ಚಿಕಟ್ಠಪರಮತ್ಥೇನಾತಿ? ಆಮನ್ತಾ. ಭಗವಾ ದಿಬ್ಬೇನ ಚಕ್ಖುನಾ ವಿಸುದ್ಧೇನ ಅತಿಕ್ಕನ್ತಮಾನುಸಕೇನ ರೂಪಂ ಪಸ್ಸತಿ ಪುಗ್ಗಲಂ ಪಸ್ಸತೀತಿ? ರೂಪಂ ಪಸ್ಸತಿ. ರೂಪಂ ಪುಗ್ಗಲೋ, ರೂಪಂ ಚವತಿ, ರೂಪಂ ಉಪಪಜ್ಜತಿ, ರೂಪಂ ಯಥಾಕಮ್ಮೂಪಗನ್ತಿ? ನ ಹೇವಂ ವತ್ತಬ್ಬೇ.

ಭಗವಾ ದಿಬ್ಬೇನ ಚಕ್ಖುನಾ ವಿಸುದ್ಧೇನ ಅತಿಕ್ಕನ್ತಮಾನುಸಕೇನ ರೂಪಂ ಪಸ್ಸತಿ ಪುಗ್ಗಲಂ ಪಸ್ಸತೀತಿ? ಪುಗ್ಗಲಂ ಪಸ್ಸತಿ. ಪುಗ್ಗಲೋ ರೂಪಂ ರೂಪಾಯತನಂ ರೂಪಧಾತು ನೀಲಂ ಪೀತಕಂ ಲೋಹಿತಕಂ ಓದಾತಂ ಚಕ್ಖುವಿಞ್ಞೇಯ್ಯಂ ಚಕ್ಖುಸ್ಮಿಂ ಪಟಿಹಞ್ಞತಿ, ಚಕ್ಖುಸ್ಸ ಆಪಾಥಂ ಆಗಚ್ಛತೀತಿ? ನ ಹೇವಂ ವತ್ತಬ್ಬೇ.

ಭಗವಾ ದಿಬ್ಬೇನ ಚಕ್ಖುನಾ ವಿಸುದ್ಧೇನ ಅತಿಕ್ಕನ್ತಮಾನುಸಕೇನ ರೂಪಂ ಪಸ್ಸತಿ ಪುಗ್ಗಲಂ ಪಸ್ಸತೀತಿ? ಉಭೋ ಪಸ್ಸತಿ. ಉಭೋ ರೂಪಂ ರೂಪಾಯತನಂ ರೂಪಧಾತು, ಉಭೋ ನೀಲಾ, ಉಭೋ ಪೀತಕಾ, ಉಭೋ ಲೋಹಿತಕಾ, ಉಭೋ ಓದಾತಾ, ಉಭೋ ಚಕ್ಖುವಿಞ್ಞೇಯ್ಯಾ, ಉಭೋ ಚಕ್ಖುಸ್ಮಿಂ ಪಟಿಹಞ್ಞನ್ತಿ, ಉಭೋ ಚಕ್ಖುಸ್ಸ ಆಪಾಥಂ ಆಗಚ್ಛನ್ತಿ, ಉಭೋ ಚವನ್ತಿ, ಉಭೋ ಉಪಪಜ್ಜನ್ತಿ, ಉಭೋ ಯಥಾಕಮ್ಮೂಪಗಾತಿ? ನ ಹೇವಂ ವತ್ತಬ್ಬೇ.

ಉಪಾದಾಪಞ್ಞತ್ತಾನುಯೋಗೋ.