ದುಕಅತ್ಥುದ್ಧಾರೋ

ಹೇತುಗೋಚ್ಛಕಂ

೧೪೪೧. ಕತಮೇ ಧಮ್ಮಾ ಹೇತೂ? ತಯೋ ಕುಸಲಹೇತೂ, ತಯೋ ಅಕುಸಲಹೇತೂ, ತಯೋ ಅಬ್ಯಾಕತಹೇತೂ. ಅಲೋಭೋ ಕುಸಲಹೇತು, ಅದೋಸೋ ಕುಸಲಹೇತು, ಚತೂಸು ಭೂಮೀಸು ಕುಸಲೇಸು ಉಪ್ಪಜ್ಜನ್ತಿ. ಅಮೋಹೋ ಕುಸಲಹೇತು, ಕಾಮಾವಚರಕುಸಲತೋ ಚತ್ತಾರೋ ಞಾಣವಿಪ್ಪಯುತ್ತೇ ಚಿತ್ತುಪ್ಪಾದೇ ಠಪೇತ್ವಾ, ಚತೂಸು ಭೂಮೀಸು ಕುಸಲೇಸು ಉಪ್ಪಜ್ಜತಿ.

ಲೋಭೋ ಅಟ್ಠಸು ಲೋಭಸಹಗತೇಸು ಚಿತ್ತುಪ್ಪಾದೇಸು ಉಪ್ಪಜ್ಜತಿ. ದೋಸೋ ದ್ವೀಸು ದೋಮನಸ್ಸಸಹಗತೇಸು ಚಿತ್ತುಪ್ಪಾದೇಸು ಉಪ್ಪಜ್ಜತಿ. ಮೋಹೋ ಸಬ್ಬಾಕುಸಲೇಸು ಉಪ್ಪಜ್ಜತಿ.

ಅಲೋಭೋ ವಿಪಾಕಹೇತು ಅದೋಸೋ ವಿಪಾಕಹೇತು, ಕಾಮಾವಚರಸ್ಸ ವಿಪಾಕತೋ ಅಹೇತುಕೇ ಚಿತ್ತುಪ್ಪಾದೇ ಠಪೇತ್ವಾ, ಚತೂಸು ಭೂಮೀಸು ವಿಪಾಕೇಸು ಉಪ್ಪಜ್ಜನ್ತಿ. ಅಮೋಹೋ ವಿಪಾಕಹೇತು, ಕಾಮಾವಚರಸ್ಸ ವಿಪಾಕತೋ ಅಹೇತುಕೇ ಚಿತ್ತುಪ್ಪಾದೇ ಠಪೇತ್ವಾ, ಚತ್ತಾರೋ ಞಾಣವಿಪ್ಪಯುತ್ತೇ ಚಿತ್ತುಪ್ಪಾದೇ ಠಪೇತ್ವಾ, ಚತೂಸು ಭೂಮೀಸು ವಿಪಾಕೇಸು ಉಪ್ಪಜ್ಜತಿ.

ಅಲೋಭೋ ಕಿರಿಯಹೇತು ಅದೋಸೋ ಕಿರಿಯಹೇತು, ಕಾಮಾವಚರಕಿರಿಯತೋ ಅಹೇತುಕೇ ಚಿತ್ತುಪ್ಪಾದೇ ಠಪೇತ್ವಾ, ತೀಸು ಭೂಮೀಸು ಕಿರಿಯೇಸು ಉಪ್ಪಜ್ಜನ್ತಿ. ಅಮೋಹೋ ಕಿರಿಯಹೇತು, ಕಾಮಾವಚರಕಿರಿಯತೋ ಅಹೇತುಕೇ ಚಿತ್ತುಪ್ಪಾದೇ ಠಪೇತ್ವಾ, ಚತ್ತಾರೋ ಞಾಣವಿಪ್ಪಯುತ್ತೇ ಚಿತ್ತುಪ್ಪಾದೇ ಠಪೇತ್ವಾ, ತೀಸು ಭೂಮೀಸು ಕಿರಿಯೇಸು ಉಪ್ಪಜ್ಜತಿ – ಇಮೇ ಧಮ್ಮಾ ಹೇತೂ.

೧೪೪೨. ಕತಮೇ ಧಮ್ಮಾ ನ ಹೇತೂ? ಠಪೇತ್ವಾ ಹೇತೂ, ಚತೂಸು ಭೂಮೀಸು ಕುಸಲಂ, ಅಕುಸಲಂ, ಚತೂಸು ಭೂಮೀಸು ವಿಪಾಕೋ, ತೀಸು ಭೂಮೀಸು ಕಿರಿಯಾಬ್ಯಾಕತಂ, ರೂಪಞ್ಚ, ನಿಬ್ಬಾನಞ್ಚ – ಇಮೇ ಧಮ್ಮಾ ನ ಹೇತೂ.

೧೪೪೩. ಕತಮೇ ಧಮ್ಮಾ ಸಹೇತುಕಾ? ವಿಚಿಕಿಚ್ಛಾಸಹಗತಂ ಉದ್ಧಚ್ಚಸಹಗತಂ ಮೋಹಂ ಠಪೇತ್ವಾ ಅವಸೇಸಂ ಅಕುಸಲಂ, ಚತೂಸು ಭೂಮೀಸು ಕುಸಲಂ, ಕಾಮಾವಚರಸ್ಸ ವಿಪಾಕತೋ ಅಹೇತುಕೇ ಚಿತ್ತುಪ್ಪಾದೇ ಠಪೇತ್ವಾ ಚತೂಸು ಭೂಮೀಸು ವಿಪಾಕೋ, ಕಾಮಾವಚರಕಿರಿಯತೋ ಅಹೇತುಕೇ ಚಿತ್ತುಪ್ಪಾದೇ ಠಪೇತ್ವಾ ತೀಸು ಭೂಮೀಸು ಕಿರಿಯಾಬ್ಯಾಕತಂ – ಇಮೇ ಧಮ್ಮಾ ಸಹೇತುಕಾ.

೧೪೪೪. ಕತಮೇ ಧಮ್ಮಾ ಅಹೇತುಕಾ? ವಿಚಿಕಿಚ್ಛಾಸಹಗತೋ ಮೋಹೋ, ಉದ್ಧಚ್ಚಸಹಗತೋ ಮೋಹೋ, ದ್ವೇಪಞ್ಚವಿಞ್ಞಾಣಾನಿ, ತಿಸ್ಸೋ ಚ ಮನೋಧಾತುಯೋ, ಪಞ್ಚ ಚ ಅಹೇತುಕಮನೋವಿಞ್ಞಾಣಧಾತುಯೋ, ರೂಪಞ್ಚ, ನಿಬ್ಬಾನಞ್ಚ – ಇಮೇ ಧಮ್ಮಾ ಅಹೇತುಕಾ.

೧೪೪೫. ಕತಮೇ ಧಮ್ಮಾ ಹೇತುಸಮ್ಪಯುತ್ತಾ? ವಿಚಿಕಿಚ್ಛಾಸಹಗತಂ ಉದ್ಧಚ್ಚಸಹಗತಂ ಮೋಹಂ ಠಪೇತ್ವಾ ಅವಸೇಸಂ ಅಕುಸಲಂ, ಚತೂಸು ಭೂಮೀಸು ಕುಸಲಂ, ಕಾಮಾವಚರಸ್ಸ ವಿಪಾಕತೋ ಅಹೇತುಕೇ ಚಿತ್ತುಪ್ಪಾದೇ ಠಪೇತ್ವಾ ಚತೂಸು ಭೂಮೀಸು ವಿಪಾಕೋ, ಕಾಮಾವಚರಕಿರಿಯತೋ ಅಹೇತುಕೇ ಚಿತ್ತುಪ್ಪಾದೇ ಠಪೇತ್ವಾ ತೀಸು ಭೂಮೀಸು ಕಿರಿಯಾಬ್ಯಾಕತಂ – ಇಮೇ ಧಮ್ಮಾ ಹೇತುಸಮ್ಪಯುತ್ತಾ.

೧೪೪೬. ಕತಮೇ ಧಮ್ಮಾ ಹೇತುವಿಪ್ಪಯುತ್ತಾ? ವಿಚಿಕಿಚ್ಛಾಸಹಗತೋ ಮೋಹೋ, ಉದ್ಧಚ್ಚಸಹಗತೋ ಮೋಹೋ, ದ್ವೇಪಞ್ಚವಿಞ್ಞಾಣಾನಿ ತಿಸ್ಸೋ ಚ ಮನೋಧಾತುಯೋ ಪಞ್ಚ ಚ ಅಹೇತುಕಮನೋವಿಞ್ಞಾಣಧಾತುಯೋ, ರೂಪಞ್ಚ, ನಿಬ್ಬಾನಞ್ಚ – ಇಮೇ ಧಮ್ಮಾ ಹೇತುವಿಪ್ಪಯುತ್ತಾ.

೧೪೪೭. ಕತಮೇ ಧಮ್ಮಾ ಹೇತೂ ಚೇವ ಸಹೇತುಕಾ ಚ? ಯತ್ಥ ದ್ವೇ ತಯೋ ಹೇತೂ ಏಕತೋ ಉಪ್ಪಜ್ಜನ್ತಿ – ಇಮೇ ಧಮ್ಮಾ ಹೇತೂ ಚೇವ ಸಹೇತುಕಾ ಚ.

೧೪೪೮. ಕತಮೇ ಧಮ್ಮಾ ಸಹೇತುಕಾ ಚೇವ ನ ಚ ಹೇತೂ? ಚತೂಸು ಭೂಮೀಸು ಕುಸಲಂ, ಅಕುಸಲಂ, ಕಾಮಾವಚರಸ್ಸ ವಿಪಾಕತೋ ಅಹೇತುಕೇ ಚಿತ್ತುಪ್ಪಾದೇ ಠಪೇತ್ವಾ ಚತೂಸು ಭೂಮೀಸು ವಿಪಾಕೋ, ಕಾಮಾವಚರಕಿರಿಯತೋ ಅಹೇತುಕೇ ಚಿತ್ತುಪ್ಪಾದೇ ಠಪೇತ್ವಾ ತೀಸು ಭೂಮೀಸು ಕಿರಿಯಾಬ್ಯಾಕತಂ, ಏತ್ಥುಪ್ಪನ್ನೇ ಹೇತೂ ಠಪೇತ್ವಾ – ಇಮೇ ಧಮ್ಮಾ ಸಹೇತುಕಾ ಚೇವ ನ ಚ ಹೇತೂ. ಅಹೇತುಕಾ ಧಮ್ಮಾ ನ ವತ್ತಬ್ಬಾ – ಹೇತೂ ಚೇವ ಸಹೇತುಕಾ ಚಾತಿಪಿ, ಸಹೇತುಕಾ ಚೇವ ನ ಚ ಹೇತೂತಿಪಿ.

೧೪೪೯. ಕತಮೇ ಧಮ್ಮಾ ಹೇತೂ ಚೇವ ಹೇತುಸಮ್ಪಯುತ್ತಾ ಚ? ಯತ್ಥ ದ್ವೇ ತಯೋ ಹೇತೂ ಏಕತೋ ಉಪ್ಪಜ್ಜನ್ತಿ – ಇಮೇ ಧಮ್ಮಾ ಹೇತೂ ಚೇವ ಹೇತುಸಮ್ಪಯುತ್ತಾ ಚ.

೧೪೫೦. ಕತಮೇ ಧಮ್ಮಾ ಹೇತುಸಮ್ಪಯುತ್ತಾ ಚೇವ ನ ಚ ಹೇತೂ? ಚತೂಸು ಭೂಮೀಸು ಕುಸಲಂ, ಅಕುಸಲಂ, ಕಾಮಾವಚರಸ್ಸ ವಿಪಾಕತೋ ಅಹೇತುಕೇ ಚಿತ್ತುಪ್ಪಾದೇ ಠಪೇತ್ವಾ ಚತೂಸು ಭೂಮೀಸು ವಿಪಾಕೋ, ಕಾಮಾವಚರಕಿರಿಯತೋ ಅಹೇತುಕೇ ಚಿತ್ತುಪ್ಪಾದೇ ಠಪೇತ್ವಾ ತೀಸು ಭೂಮೀಸು ಕಿರಿಯಾಬ್ಯಾಕತಂ, ಏತ್ಥುಪ್ಪನ್ನೇ ಹೇತೂ ಠಪೇತ್ವಾ – ಇಮೇ ಧಮ್ಮಾ ಹೇತುಸಮ್ಪಯುತ್ತಾ ಚೇವ ನ ಚ ಹೇತೂ. ಹೇತುವಿಪ್ಪಯುತ್ತಾ ಧಮ್ಮಾ ನ ವತ್ತಬ್ಬಾ – ಹೇತೂ ಚೇವ ಹೇತುಸಮ್ಪಯುತ್ತಾ ಚಾತಿಪಿ, ಹೇತುಸಮ್ಪಯುತ್ತಾ ಚೇವ ನ ಚ ಹೇತೂತಿಪಿ.

೧೪೫೧. ಕತಮೇ ಧಮ್ಮಾ ನ ಹೇತೂ ಸಹೇತುಕಾ? ಚತೂಸು ಭೂಮೀಸು ಕುಸಲಂ, ಅಕುಸಲಂ, ಕಾಮಾವಚರಸ್ಸ ವಿಪಾಕತೋ ಅಹೇತುಕೇ ಚಿತ್ತುಪ್ಪಾದೇ ಠಪೇತ್ವಾ ಚತೂಸು ಭೂಮೀಸು ವಿಪಾಕೋ, ಕಾಮಾವಚರಕಿರಿಯತೋ ಅಹೇತುಕೇ ಚಿತ್ತುಪ್ಪಾದೇ ಠಪೇತ್ವಾ ತೀಸು ಭೂಮೀಸು ಕಿರಿಯಾಬ್ಯಾಕತಂ, ಏತ್ಥುಪ್ಪನ್ನೇ ಹೇತೂ ಠಪೇತ್ವಾ – ಇಮೇ ಧಮ್ಮಾ ನ ಹೇತೂ ಸಹೇತುಕಾ.

೧೪೫೨. ಕತಮೇ ಧಮ್ಮಾ ನ ಹೇತೂ ಅಹೇತುಕಾ? ದ್ವೇಪಞ್ಚವಿಞ್ಞಾಣಾನಿ, ತಿಸ್ಸೋ ಚ ಮನೋಧಾತುಯೋ, ಪಞ್ಚ ಚ ಅಹೇತುಕಮನೋವಿಞ್ಞಾಣಧಾತುಯೋ, ರೂಪಞ್ಚ, ನಿಬ್ಬಾನಞ್ಚ – ಇಮೇ ಧಮ್ಮಾ ನ ಹೇತೂ ಅಹೇತುಕಾ. ಹೇತೂ ಧಮ್ಮಾ ನ ವತ್ತಬ್ಬಾ – ನ ಹೇತೂ ಸಹೇತುಕಾತಿಪಿ, ನ ಹೇತೂ ಅಹೇತುಕಾತಿಪಿ.

ಚೂಳನ್ತರದುಕಂ

೧೪೫೩. ಕತಮೇ ಧಮ್ಮಾ ಸಪ್ಪಚ್ಚಯಾ? ಚತೂಸು ಭೂಮೀಸು ಕುಸಲಂ, ಅಕುಸಲಂ, ಚತೂಸು ಭೂಮೀಸು ವಿಪಾಕೋ, ತೀಸು ಭೂಮೀಸು ಕಿರಿಯಾಬ್ಯಾಕತಂ, ಸಬ್ಬಞ್ಚ ರೂಪಂ – ಇಮೇ ಧಮ್ಮಾ ಸಪ್ಪಚ್ಚಯಾ.

೧೪೫೪. ಕತಮೇ ಧಮ್ಮಾ ಅಪ್ಪಚ್ಚಯಾ? ನಿಬ್ಬಾನಂ – ಇಮೇ ಧಮ್ಮಾ ಅಪ್ಪಚ್ಚಯಾ.

೧೪೫೫. ಕತಮೇ ಧಮ್ಮಾ ಸಙ್ಖತಾ? ಚತೂಸು ಭೂಮೀಸು ಕುಸಲಂ, ಅಕುಸಲಂ, ಚತೂಸು ಭೂಮೀಸು ವಿಪಾಕೋ, ತೀಸು ಭೂಮೀಸು ಕಿರಿಯಾಬ್ಯಾಕತಂ, ಸಬ್ಬಞ್ಚ ರೂಪಂ – ಇಮೇ ಧಮ್ಮಾ ಸಙ್ಖತಾ.

೧೪೫೬. ಕತಮೇ ಧಮ್ಮಾ ಅಸಙ್ಖತಾ? ನಿಬ್ಬಾನಂ – ಇಮೇ ಧಮ್ಮಾ ಅಸಙ್ಖತಾ.

೧೪೫೭. ಕತಮೇ ಧಮ್ಮಾ ಸನಿದಸ್ಸನಾ? ರೂಪಾಯತನಂ – ಇಮೇ ಧಮ್ಮಾ ಸನಿದಸ್ಸನಾ.

೧೪೫೮. ಕತಮೇ ಧಮ್ಮಾ ಅನಿದಸ್ಸನಾ? ಚಕ್ಖಾಯತನಂ …ಪೇ… ಫೋಟ್ಠಬ್ಬಾಯತನಂ, ಚತೂಸು ಭೂಮೀಸು ಕುಸಲಂ, ಅಕುಸಲಂ, ಚತೂಸು ಭೂಮೀಸು ವಿಪಾಕೋ, ತೀಸು ಭೂಮೀಸು ಕಿರಿಯಾಬ್ಯಾಕತಂ, ಯಞ್ಚ ರೂಪಂ ಅನಿದಸ್ಸನಂ ಅಪ್ಪಟಿಘಂ ಧಮ್ಮಾಯತನಪರಿಯಾಪನ್ನಂ, ನಿಬ್ಬಾನಞ್ಚ – ಇಮೇ ಧಮ್ಮಾ ಅನಿದಸ್ಸನಾ.

೧೪೫೯. ಕತಮೇ ಧಮ್ಮಾ ಸಪ್ಪಟಿಘಾ? ಚಕ್ಖಾಯತನಂ…ಪೇ… ಫೋಟ್ಠಬ್ಬಾಯತನಂ – ಇಮೇ ಧಮ್ಮಾ ಸಪ್ಪಟಿಘಾ.

೧೪೬೦. ಕತಮೇ ಧಮ್ಮಾ ಅಪ್ಪಟಿಘಾ? ಚತೂಸು ಭೂಮೀಸು ಕುಸಲಂ, ಅಕುಸಲಂ, ಚತೂಸು ಭೂಮೀಸು ವಿಪಾಕೋ, ತೀಸು ಭೂಮೀಸು ಕಿರಿಯಾಬ್ಯಾಕತಂ, ಯಞ್ಚ ರೂಪಂ ಅನಿದಸ್ಸನಂ ಅಪ್ಪಟಿಘಂ ಧಮ್ಮಾಯತನಪರಿಯಾಪನ್ನಂ, ನಿಬ್ಬಾನಞ್ಚ – ಇಮೇ ಧಮ್ಮಾ ಅಪ್ಪಟಿಘಾ.

೧೪೬೧. ಕತಮೇ ಧಮ್ಮಾ ರೂಪಿನೋ? ಚತ್ತಾರೋ ಚ ಮಹಾಭೂತಾ, ಚತುನ್ನಞ್ಚ ಮಹಾಭೂತಾನಂ ಉಪಾದಾಯ ರೂಪಂ – ಇಮೇ ಧಮ್ಮಾ ರೂಪಿನೋ.

೧೪೬೨. ಕತಮೇ ಧಮ್ಮಾ ಅರೂಪಿನೋ? ಚತೂಸು ಭೂಮೀಸು ಕುಸಲಂ, ಅಕುಸಲಂ, ಚತೂಸು ಭೂಮೀಸು ವಿಪಾಕೋ, ತೀಸು ಭೂಮೀಸು ಕಿರಿಯಾಬ್ಯಾಕತಂ, ನಿಬ್ಬಾನಞ್ಚ – ಇಮೇ ಧಮ್ಮಾ ಅರೂಪಿನೋ.

೧೪೬೩. ಕತಮೇ ಧಮ್ಮಾ ಲೋಕಿಯಾ? ತೀಸು ಭೂಮೀಸು ಕುಸಲಂ, ಅಕುಸಲಂ, ತೀಸು ಭೂಮೀಸು ವಿಪಾಕೋ, ತೀಸು ಭೂಮೀಸು ಕಿರಿಯಾಬ್ಯಾಕತಂ, ಸಬ್ಬಞ್ಚ ರೂಪಂ – ಇಮೇ ಧಮ್ಮಾ ಲೋಕಿಯಾ.

೧೪೬೪. ಕತಮೇ ಧಮ್ಮಾ ಲೋಕುತ್ತರಾ? ಚತ್ತಾರೋ ಮಗ್ಗಾ ಅಪರಿಯಾಪನ್ನಾ, ಚತ್ತಾರಿ ಚ ಸಾಮಞ್ಞಫಲಾನಿ, ನಿಬ್ಬಾನಞ್ಚ – ಇಮೇ ಧಮ್ಮಾ ಲೋಕುತ್ತರಾ. ಸಬ್ಬೇ [ಸಬ್ಬೇವ (ಸ್ಯಾ.)] ಧಮ್ಮಾ ಕೇನಚಿ ವಿಞ್ಞೇಯ್ಯಾ, ಕೇನಚಿ ನ ವಿಞ್ಞೇಯ್ಯಾ.

ಆಸವಗೋಚ್ಛಕಂ

೧೪೬೫. ಕತಮೇ ಧಮ್ಮಾ ಆಸವಾ? ಚತ್ತಾರೋ ಆಸವಾ – ಕಾಮಾಸವೋ, ಭವಾಸವೋ, ದಿಟ್ಠಾಸವೋ, ಅವಿಜ್ಜಾಸವೋ. ಕಾಮಾಸವೋ ಅಟ್ಠಸು ಲೋಭಸಹಗತೇಸು ಚಿತ್ತುಪ್ಪಾದೇಸು ಉಪ್ಪಜ್ಜತಿ ಭವಾಸವೋ ಚತೂಸು ದಿಟ್ಠಿಗತವಿಪ್ಪಯುತ್ತಲೋಭಸಹಗತೇಸು ಚಿತ್ತುಪ್ಪಾದೇಸು ಉಪ್ಪಜ್ಜತಿ ದಿಟ್ಠಾಸವೋ ಚತೂಸು ದಿಟ್ಠಿಗತಸಮ್ಪಯುತ್ತೇಸು ಚಿತ್ತುಪ್ಪಾದೇಸು ಉಪ್ಪಜ್ಜತಿ. ಅವಿಜ್ಜಾಸವೋ ಸಬ್ಬಾಕುಸಲೇಸು ಉಪ್ಪಜ್ಜತಿ – ಇಮೇ ಧಮ್ಮಾ ಆಸವಾ.

೧೪೬೬. ಕತಮೇ ಧಮ್ಮಾ ನೋ ಆಸವಾ? ಠಪೇತ್ವಾ ಆಸವೇ ಅವಸೇಸಂ ಅಕುಸಲಂ, ಚತೂಸು ಭೂಮೀಸು ಕುಸಲಂ, ಚತೂಸು ಭೂಮೀಸು ವಿಪಾಕೋ, ತೀಸು ಭೂಮೀಸು ಕಿರಿಯಾಬ್ಯಾಕತಂ, ರೂಪಞ್ಚ, ನಿಬ್ಬಾನಞ್ಚ – ಇಮೇ ಧಮ್ಮಾ ನೋ ಆಸವಾ.

೧೪೬೭. ಕತಮೇ ಧಮ್ಮಾ ಸಾಸವಾ? ತೀಸು ಭೂಮೀಸು ಕುಸಲಂ, ಅಕುಸಲಂ, ತೀಸು ಭೂಮೀಸು ವಿಪಾಕೋ, ತೀಸು ಭೂಮೀಸು ಕಿರಿಯಾಬ್ಯಾಕತಂ, ಸಬ್ಬಞ್ಚ ರೂಪಂ – ಇಮೇ ಧಮ್ಮಾ ಸಾಸವಾ.

೧೪೬೮. ಕತಮೇ ಧಮ್ಮಾ ಅನಾಸವಾ? ಚತ್ತಾರೋ ಮಗ್ಗಾ ಅಪರಿಯಾಪನ್ನಾ, ಚತ್ತಾರಿ ಚ ಸಾಮಞ್ಞಫಲಾನಿ, ನಿಬ್ಬಾನಞ್ಚ – ಇಮೇ ಧಮ್ಮಾ ಅನಾಸವಾ.

೧೪೬೯. ಕತಮೇ ಧಮ್ಮಾ ಆಸವಸಮ್ಪಯುತ್ತಾ? ದ್ವೇ ದೋಮನಸ್ಸಸಹಗತಚಿತ್ತುಪ್ಪಾದಾ ಏತ್ಥುಪ್ಪನ್ನಂ ಮೋಹಂ ಠಪೇತ್ವಾ, ವಿಚಿಕಿಚ್ಛಾಸಹಗತಂ ಉದ್ಧಚ್ಚಸಹಗತಂ ಮೋಹಂ ಠಪೇತ್ವಾ, ಅವಸೇಸಂ ಅಕುಸಲಂ – ಇಮೇ ಧಮ್ಮಾ ಆಸವಸಮ್ಪಯುತ್ತಾ.

೧೪೭೦. ಕತಮೇ ಧಮ್ಮಾ ಆಸವವಿಪ್ಪಯುತ್ತಾ? ದ್ವೀಸು ದೋಮನಸ್ಸಸಹಗತೇಸು ಚಿತ್ತುಪ್ಪಾದೇಸು ಉಪ್ಪನ್ನೋ ಮೋಹೋ, ವಿಚಿಕಿಚ್ಛಾಸಹಗತೋ ಮೋಹೋ, ಉದ್ಧಚ್ಚಸಹಗತೋ ಮೋಹೋ, ಚತೂಸು ಭೂಮೀಸು ಕುಸಲಂ, ಚತೂಸು ಭೂಮೀಸು ವಿಪಾಕೋ, ತೀಸು ಭೂಮೀಸು ಕಿರಿಯಾಬ್ಯಾಕತಂ, ರೂಪಞ್ಚ, ನಿಬ್ಬಾನಞ್ಚ – ಇಮೇ ಧಮ್ಮಾ ಆಸವವಿಪ್ಪಯುತ್ತಾ.

೧೪೭೧. ಕತಮೇ ಧಮ್ಮಾ ಆಸವಾ ಚೇವ ಸಾಸವಾ ಚ? ತೇವ ಆಸವಾ ಆಸವಾ ಚೇವ ಸಾಸವಾ ಚ.

೧೪೭೨. ಕತಮೇ ಧಮ್ಮಾ ಸಾಸವಾ ಚೇವ ನೋ ಚ ಆಸವಾ? ಠಪೇತ್ವಾ ಆಸವೇ, ಅವಸೇಸಂ ಅಕುಸಲಂ, ತೀಸು ಭೂಮೀಸು ಕುಸಲಂ, ತೀಸು ಭೂಮೀಸು ವಿಪಾಕೋ, ತೀಸು ಭೂಮೀಸು ಕಿರಿಯಾಬ್ಯಾಕತಂ, ಸಬ್ಬಞ್ಚ ರೂಪಂ – ಇಮೇ ಧಮ್ಮಾ ಸಾಸವಾ ಚೇವ ನೋ ಚ ಆಸವಾ. ಅನಾಸವಾ ಧಮ್ಮಾ ನ ವತ್ತಬ್ಬಾ – ಆಸವಾ ಚೇವ ಸಾಸವಾ ಚಾತಿಪಿ, ಸಾಸವಾ ಚೇವ ನೋ ಚ ಆಸವಾತಿಪಿ.

೧೪೭೩. ಕತಮೇ ಧಮ್ಮಾ ಆಸವಾ ಚೇವ ಆಸವಸಮ್ಪಯುತ್ತಾ ಚ? ಯತ್ಥ ದ್ವೇ ತಯೋ ಆಸವಾ ಏಕತೋ ಉಪ್ಪಜ್ಜನ್ತಿ – ಇಮೇ ಧಮ್ಮಾ ಆಸವಾ ಚೇವ ಆಸವಸಮ್ಪಯುತ್ತಾ ಚ.

೧೪೭೪. ಕತಮೇ ಧಮ್ಮಾ ಆಸವಸಮ್ಪಯುತ್ತಾ ಚೇವ ನೋ ಚ ಆಸವಾ? ಠಪೇತ್ವಾ ಆಸವೇ, ಅವಸೇಸಂ ಅಕುಸಲಂ – ಇಮೇ ಧಮ್ಮಾ ಆಸವಸಮ್ಪಯುತ್ತಾ ಚೇವ ನೋ ಚ ಆಸವಾ. ಆಸವವಿಪ್ಪಯುತ್ತಾ ಧಮ್ಮಾ ನ ವತ್ತಬ್ಬಾ – ಆಸವಾ ಚೇವ ಆಸವಸಮ್ಪಯುತ್ತಾ ಚಾತಿಪಿ, ಆಸವಸಮ್ಪಯುತ್ತಾ ಚೇವ ನೋ ಚ ಆಸವಾತಿಪಿ.

೧೪೭೫. ಕತಮೇ ಧಮ್ಮಾ ಆಸವವಿಪ್ಪಯುತ್ತಾ ಸಾಸವಾ? ದ್ವೀಸು ದೋಮನಸ್ಸಸಹಗತೇಸು ಚಿತ್ತುಪ್ಪಾದೇಸು ಉಪ್ಪನ್ನೋ ಮೋಹೋ, ವಿಚಿಕಿಚ್ಛಾಸಹಗತೋ ಮೋಹೋ, ಉದ್ಧಚ್ಚಸಹಗತೋ ಮೋಹೋ, ತೀಸು ಭೂಮೀಸು ಕುಸಲಂ, ತೀಸು ಭೂಮೀಸು ವಿಪಾಕೋ, ತೀಸು ಭೂಮೀಸು ಕಿರಿಯಾಬ್ಯಾಕತಂ, ಸಬ್ಬಞ್ಚ ರೂಪಂ – ಇಮೇ ಧಮ್ಮಾ ಆಸವವಿಪ್ಪಯುತ್ತಾ ಸಾಸವಾ.

೧೪೭೬. ಕತಮೇ ಧಮ್ಮಾ ಆಸವವಿಪ್ಪಯುತ್ತಾ ಅನಾಸವಾ? ಚತ್ತಾರೋ ಮಗ್ಗಾ ಅಪರಿಯಾಪನ್ನಾ, ಚತ್ತಾರಿ ಚ ಸಾಮಞ್ಞಫಲಾನಿ, ನಿಬ್ಬಾನಞ್ಚ – ಇಮೇ ಧಮ್ಮಾ ಆಸವವಿಪ್ಪಯುತ್ತಾ ಅನಾಸವಾ. ಆಸವಸಮ್ಪಯುತ್ತಾ ಧಮ್ಮಾ ನ ವತ್ತಬ್ಬಾ – ಆಸವವಿಪ್ಪಯುತ್ತಾ ಸಾಸವಾತಿಪಿ, ಆಸವವಿಪ್ಪಯುತ್ತಾ ಅನಾಸವಾತಿಪಿ.

ಸಂಯೋಜನಗೋಚ್ಛಕಂ

೧೪೭೭. ಕತಮೇ ಧಮ್ಮಾ ಸಂಯೋಜನಾ? ದಸ ಸಂಯೋಜನಾನಿ – ಕಾಮರಾಗಸಂಯೋಜನಂ, ಪಟಿಘಸಂಯೋಜನಂ, ಮಾನಸಂಯೋಜನಂ, ದಿಟ್ಠಿಸಂಯೋಜನಂ, ವಿಚಿಕಿಚ್ಛಾಸಂಯೋಜನಂ, ಸೀಲಬ್ಬತಪರಾಮಾಸಸಂಯೋಜನಂ, ಭವರಾಗಸಂಯೋಜನಂ, ಇಸ್ಸಾಸಂಯೋಜನಂ, ಮಚ್ಛರಿಯಸಂಯೋಜನಂ, ಅವಿಜ್ಜಾಸಂಯೋಜನಂ. ಕಾಮರಾಗಸಂಯೋಜನಂ ಅಟ್ಠಸು ಲೋಭಸಹಗತೇಸು ಚಿತ್ತುಪ್ಪಾದೇಸು ಉಪ್ಪಜ್ಜತಿ. ಪಟಿಘಸಂಯೋಜನಂ ದ್ವೀಸು ದೋಮನಸ್ಸಸಹಗತೇಸು ಚಿತ್ತುಪ್ಪಾದೇಸು ಉಪ್ಪಜ್ಜತಿ. ಮಾನಸಂಯೋಜನಂ ಚತೂಸು ದಿಟ್ಠಿಗತವಿಪ್ಪಯುತ್ತಲೋಭಸಹಗತೇಸು ಚಿತ್ತುಪ್ಪಾದೇಸು ಉಪ್ಪಜ್ಜತಿ. ದಿಟ್ಠಿಸಂಯೋಜನಂ ಚತೂಸು ದಿಟ್ಠಿಗತಸಮ್ಪಯುತ್ತೇಸು ಚಿತ್ತುಪ್ಪಾದೇಸು ಉಪ್ಪಜ್ಜತಿ. ವಿಚಿಕಿಚ್ಛಾಸಂಯೋಜನಂ ವಿಚಿಕಿಚ್ಛಾಸಹಗತೇಸು ಚಿತ್ತುಪ್ಪಾದೇಸು ಉಪ್ಪಜ್ಜತಿ. ಸೀಲಬ್ಬತಪರಾಮಾಸಸಂಯೋಜನಂ ಚತೂಸು ದಿಟ್ಠಿಗತಸಮ್ಪಯುತ್ತೇಸು ಚಿತ್ತುಪ್ಪಾದೇಸು ಉಪ್ಪಜ್ಜತಿ. ಭವರಾಗಸಂಯೋಜನಂ ಚತೂಸು ದಿಟ್ಠಿಗತವಿಪ್ಪಯುತ್ತಲೋಭಸಹಗತೇಸು ಚಿತ್ತುಪ್ಪಾದೇಸು ಉಪ್ಪಜ್ಜತಿ. ಇಸ್ಸಾಸಂಯೋಜನಞ್ಚ ಮಚ್ಛರಿಯಸಂಯೋಜನಞ್ಚ ದ್ವೀಸು ದೋಮನಸ್ಸಸಹಗತೇಸು ಚಿತ್ತುಪ್ಪಾದೇಸು ಉಪ್ಪಜ್ಜನ್ತಿ. ಅವಿಜ್ಜಾಸಂಯೋಜನಂ ಸಬ್ಬಾಕುಸಲೇಸು ಉಪ್ಪಜ್ಜತಿ – ಇಮೇ ಧಮ್ಮಾ ಸಂಯೋಜನಾ.

೧೪೭೮. ಕತಮೇ ಧಮ್ಮಾ ನೋ ಸಂಯೋಜನಾ. ಠಪೇತ್ವಾ ಸಂಯೋಜನೇ ಅವಸೇಸಂ ಅಕುಸಲಂ, ಚತೂಸು ಭೂಮೀಸು ಕುಸಲಂ, ಚತೂಸು ಭೂಮೀಸು ವಿಪಾಕೋ, ತೀಸು ಭೂಮೀಸು ಕಿರಿಯಾಬ್ಯಾಕತಂ, ರೂಪಞ್ಚ, ನಿಬ್ಬಾನಞ್ಚ – ಇಮೇ ಧಮ್ಮಾ ನೋ ಸಂಯೋಜನಾ.

೧೪೭೯. ಕತಮೇ ಧಮ್ಮಾ ಸಂಯೋಜನಿಯಾ? ತೀಸು ಭೂಮೀಸು ಕುಸಲಂ, ಅಕುಸಲಂ, ತೀಸು ಭೂಮೀಸು ವಿಪಾಕೋ, ತೀಸು ಭೂಮೀಸು ಕಿರಿಯಾಬ್ಯಾಕತಂ, ಸಬ್ಬಞ್ಚ ರೂಪಂ – ಇಮೇ ಧಮ್ಮಾ ಸಂಯೋಜನಿಯಾ.

೧೪೮೦. ಕತಮೇ ಧಮ್ಮಾ ಅಸಂಯೋಜನಿಯಾ? ಚತ್ತಾರೋ ಮಗ್ಗಾ ಅಪರಿಯಾಪನ್ನಾ, ಚತ್ತಾರಿ ಚ ಸಾಮಞ್ಞಫಲಾನಿ, ನಿಬ್ಬಾನಞ್ಚ – ಇಮೇ ಧಮ್ಮಾ ಅಸಂಯೋಜನಿಯಾ.

೧೪೮೧. ಕತಮೇ ಧಮ್ಮಾ ಸಂಯೋಜನಸಮ್ಪಯುತ್ತಾ? ಉದ್ಧಚ್ಚಸಹಗತಂ ಮೋಹಂ ಠಪೇತ್ವಾ ಅವಸೇಸಂ ಅಕುಸಲಂ – ಇಮೇ ಧಮ್ಮಾ ಸಂಯೋಜನಸಮ್ಪಯುತ್ತಾ.

೧೪೮೨. ಕತಮೇ ಧಮ್ಮಾ ಸಂಯೋಜನವಿಪ್ಪಯುತ್ತಾ? ಉದ್ಧಚ್ಚಸಹಗತೋ ಮೋಹೋ, ಚತೂಸು ಭೂಮೀಸು ಕುಸಲಂ, ಚತೂಸು ಭೂಮೀಸು ವಿಪಾಕೋ, ತೀಸು ಭೂಮೀಸು ಕಿರಿಯಾಬ್ಯಾಕತಂ, ರೂಪಞ್ಚ, ನಿಬ್ಬಾನಞ್ಚ – ಇಮೇ ಧಮ್ಮಾ ಸಂಯೋಜನವಿಪ್ಪಯುತ್ತಾ.

೧೪೮೩. ಕತಮೇ ಧಮ್ಮಾ ಸಂಯೋಜನಾ ಚೇವ ಸಂಯೋಜನಿಯಾ ಚ? ತಾನೇವ ಸಂಯೋಜನಾನಿ ಸಂಯೋಜನಾ ಚೇವ ಸಂಯೋಜನಿಯಾ ಚ.

೧೪೮೪. ಕತಮೇ ಧಮ್ಮಾ ಸಂಯೋಜನಿಯಾ ಚೇವ ನೋ ಚ ಸಂಯೋಜನಾ? ಠಪೇತ್ವಾ ಸಂಯೋಜನೇ ಅವಸೇಸಂ ಅಕುಸಲಂ, ತೀಸು ಭೂಮೀಸು ಕುಸಲಂ, ತೀಸು ಭೂಮೀಸು ವಿಪಾಕೋ, ತೀಸು ಭೂಮೀಸು ಕಿರಿಯಾಬ್ಯಾಕತಂ, ಸಬ್ಬಞ್ಚ ರೂಪಂ – ಇಮೇ ಧಮ್ಮಾ ಸಂಯೋಜನಿಯಾ ಚೇವ ನೋ ಚ ಸಂಯೋಜನಾ. ಅಸಂಯೋಜನಿಯಾ ಧಮ್ಮಾ ನ ವತ್ತಬ್ಬಾ – ಸಂಯೋಜನಾ ಚೇವ ಸಂಯೋಜನಿಯಾ ಚಾತಿಪಿ, ಸಂಯೋಜನಿಯಾ ಚೇವ ನೋ ಚ ಸಂಯೋಜನಾತಿಪಿ.

೧೪೮೫. ಕತಮೇ ಧಮ್ಮಾ ಸಂಯೋಜನಾ ಚೇವ ಸಂಯೋಜನಸಮ್ಪಯುತ್ತಾ ಚ? ಯತ್ಥ ದ್ವೇ ತೀಣಿ ಸಂಯೋಜನಾನಿ ಏಕತೋ ಉಪ್ಪಜ್ಜನ್ತಿ – ಇಮೇ ಧಮ್ಮಾ ಸಂಯೋಜನಾ ಚೇವ ಸಂಯೋಜನಸಮ್ಪಯುತ್ತಾ ಚ.

೧೪೮೬. ಕತಮೇ ಧಮ್ಮಾ ಸಂಯೋಜನಸಮ್ಪಯುತ್ತಾ ಚೇವ ನೋ ಚ ಸಂಯೋಜನಾ? ಠಪೇತ್ವಾ ಸಂಯೋಜನೇ, ಅವಸೇಸಂ ಅಕುಸಲಂ – ಇಮೇ ಧಮ್ಮಾ ಸಂಯೋಜನಸಮ್ಪಯುತ್ತಾ ಚೇವ ನೋ ಚ ಸಂಯೋಜನಾ. ಸಂಯೋಜನವಿಪ್ಪಯುತ್ತಾ ಧಮ್ಮಾ ನ ವತ್ತಬ್ಬಾ – ಸಂಯೋಜನಾ ಚೇವ ಸಂಯೋಜನಸಮ್ಪಯುತ್ತಾ ಚಾತಿಪಿ, ಸಂಯೋಜನಸಮ್ಪಯುತ್ತಾ ಚೇವ ನೋ ಚ ಸಂಯೋಜನಾತಿಪಿ.

೧೪೮೭. ಕತಮೇ ಧಮ್ಮಾ ಸಂಯೋಜನವಿಪ್ಪಯುತ್ತಾ ಸಂಯೋಜನಿಯಾ? ಉದ್ಧಚ್ಚಸಹಗತೋ ಮೋಹೋ, ತೀಸು ಭೂಮೀಸು ಕುಸಲಂ, ತೀಸು ಭೂಮೀಸು ವಿಪಾಕೋ, ತೀಸು ಭೂಮೀಸು ಕಿರಿಯಾಬ್ಯಾಕತಂ, ಸಬ್ಬಞ್ಚ ರೂಪಂ – ಇಮೇ ಧಮ್ಮಾ ಸಂಯೋಜನವಿಪ್ಪಯುತ್ತಾ ಸಂಯೋಜನಿಯಾ.

೧೪೮೮. ಕತಮೇ ಧಮ್ಮಾ ಸಂಯೋಜನವಿಪ್ಪಯುತ್ತಾ ಅಸಂಯೋಜನಿಯಾ? ಚತ್ತಾರೋ ಮಗ್ಗಾ ಅಪರಿಯಾಪನ್ನಾ, ಚತ್ತಾರಿ ಚ ಸಾಮಞ್ಞಫಲಾನಿ, ನಿಬ್ಬಾನಞ್ಚ – ಇಮೇ ಧಮ್ಮಾ ಸಂಯೋಜನವಿಪ್ಪಯುತ್ತಾ ಅಸಂಯೋಜನಿಯಾ. ಸಂಯೋಜನಸಮ್ಪಯುತ್ತಾ ಧಮ್ಮಾ ನ ವತ್ತಬ್ಬಾ – ಸಂಯೋಜನವಿಪ್ಪಯುತ್ತಾ ಸಂಯೋಜನಿಯಾತಿಪಿ, ಸಂಯೋಜನವಿಪ್ಪಯುತ್ತಾ ಅಸಂಯೋಜನಿಯಾತಿಪಿ.

ಗನ್ಥಗೋಚ್ಛಕಂ

೧೪೮೯. ಕತಮೇ ಧಮ್ಮಾ ಗನ್ಥಾ? ಚತ್ತಾರೋ ಗನ್ಥಾ – ಅಭಿಜ್ಝಾಕಾಯಗನ್ಥೋ, ಬ್ಯಾಪಾದೋ ಕಾಯಗನ್ಥೋ, ಸೀಲಬ್ಬತಪರಾಮಾಸೋ ಕಾಯಗನ್ಥೋ, ಇದಂಸಚ್ಚಾಭಿನಿವೇಸೋ ಕಾಯಗನ್ಥೋ. ಅಭಿಜ್ಝಾಕಾಯಗನ್ಥೋ ಅಟ್ಠಸು ಲೋಭಸಹಗತೇಸು ಚಿತ್ತುಪ್ಪಾದೇಸು ಉಪ್ಪಜ್ಜತಿ. ಬ್ಯಾಪಾದೋ ಕಾಯಗನ್ಥೋ ದ್ವೀಸು ದೋಮನಸ್ಸಸಹಗತೇಸು ಚಿತ್ತುಪ್ಪಾದೇಸು ಉಪ್ಪಜ್ಜತಿ. ಸೀಲಬ್ಬತಪರಾಮಾಸೋ ಕಾಯಗನ್ಥೋ ಚ ಇದಂಸಚ್ಚಾಭಿನಿವೇಸೋ ಕಾಯಗನ್ಥೋ ಚ ಚತೂಸು ದಿಟ್ಠಿಗತಸಮ್ಪಯುತ್ತೇಸು ಚಿತ್ತುಪ್ಪಾದೇಸು ಉಪ್ಪಜ್ಜನ್ತಿ – ಇಮೇ ಧಮ್ಮಾ ಗನ್ಥಾ.

೧೪೯೦. ಕತಮೇ ಧಮ್ಮಾ ನೋ ಗನ್ಥಾ? ಠಪೇತ್ವಾ ಗನ್ಥೇ, ಅವಸೇಸಂ ಅಕುಸಲಂ, ಚತೂಸು ಭೂಮೀಸು ಕುಸಲಂ, ಚತೂಸು ಭೂಮೀಸು ವಿಪಾಕೋ, ತೀಸು ಭೂಮೀಸು ಕಿರಿಯಾಬ್ಯಾಕತಂ, ರೂಪಞ್ಚ, ನಿಬ್ಬಾನಞ್ಚ – ಇಮೇ ಧಮ್ಮಾ ನೋ ಗನ್ಥಾ.

೧೪೯೧. ಕತಮೇ ಧಮ್ಮಾ ಗನ್ಥನಿಯಾ? ತೀಸು ಭೂಮೀಸು ಕುಸಲಂ, ಅಕುಸಲಂ, ತೀಸು ಭೂಮೀಸು ವಿಪಾಕೋ, ತೀಸು ಭೂಮೀಸು ಕಿರಿಯಾಬ್ಯಾಕತಂ, ಸಬ್ಬಞ್ಚ ರೂಪಂ – ಇಮೇ ಧಮ್ಮಾ ಗನ್ಥನಿಯಾ.

೧೪೯೨. ಕತಮೇ ಧಮ್ಮಾ ಅಗನ್ಥನಿಯಾ? ಚತ್ತಾರೋ ಮಗ್ಗಾ ಅಪರಿಯಾಪನ್ನಾ, ಚತ್ತಾರಿ ಚ ಸಾಮಞ್ಞಫಲಾನಿ, ನಿಬ್ಬಾನಞ್ಚ – ಇಮೇ ಧಮ್ಮಾ ಅಗನ್ಥನಿಯಾ.

೧೪೯೩. ಕತಮೇ ಧಮ್ಮಾ ಗನ್ಥಸಮ್ಪಯುತ್ತಾ? ಚತ್ತಾರೋ ದಿಟ್ಠಿಗತಸಮ್ಪಯುತ್ತಚಿತ್ತುಪ್ಪಾದಾ, ಚತ್ತಾರೋ ದಿಟ್ಠಿಗತವಿಪ್ಪಯುತ್ತಲೋಭಸಹಗತಚಿತ್ತುಪ್ಪಾದಾ, ಏತ್ಥುಪ್ಪನ್ನಂ ಲೋಭಂ ಠಪೇತ್ವಾ, ದ್ವೇ ದೋಮನಸ್ಸಸಹಗತಚಿತ್ತುಪ್ಪಾದಾ, ಏತ್ಥುಪ್ಪನ್ನಂ ಪಟಿಘಂ ಠಪೇತ್ವಾ – ಇಮೇ ಧಮ್ಮಾ ಗನ್ಥಸಮ್ಪಯುತ್ತಾ.

೧೪೯೪. ಕತಮೇ ಧಮ್ಮಾ ಗನ್ಥವಿಪ್ಪಯುತ್ತಾ? ಚತೂಸು ದಿಟ್ಠಿಗತವಿಪ್ಪಯುತ್ತಲೋಭಸಹಗತೇಸು ಚಿತ್ತುಪ್ಪಾದೇಸು ಉಪ್ಪನ್ನೋ ಲೋಭೋ, ದ್ವೀಸು ದೋಮನಸ್ಸಸಹಗತೇಸು ಚಿತ್ತುಪ್ಪಾದೇಸು ಉಪ್ಪನ್ನಂ ಪಟಿಘಂ, ವಿಚಿಕಿಚ್ಛಾಸಹಗತೋ ಚಿತ್ತುಪ್ಪಾದೋ, ಉದ್ಧಚ್ಚಸಹಗತೋ ಚಿತ್ತುಪ್ಪಾದೋ, ಚತೂಸು ಭೂಮೀಸು ಕುಸಲಂ, ಚತೂಸು ಭೂಮೀಸು ವಿಪಾಕೋ, ತೀಸು ಭೂಮೀಸು ಕಿರಿಯಾಬ್ಯಾಕತಂ, ರೂಪಞ್ಚ, ನಿಬ್ಬಾನಞ್ಚ – ಇಮೇ ಧಮ್ಮಾ ಗನ್ಥವಿಪ್ಪಯುತ್ತಾ.

೧೪೯೫. ಕತಮೇ ಧಮ್ಮಾ ಗನ್ಥಾ ಚೇವ ಗನ್ಥನಿಯಾ ಚ? ತೇವ ಗನ್ಥಾ ಗನ್ಥಾ ಚೇವ ಗನ್ಥನಿಯಾ ಚ.

೧೪೯೬. ಕತಮೇ ಧಮ್ಮಾ ಗನ್ಥನಿಯಾ ಚೇವ ನೋ ಚ ಗನ್ಥಾ? ಠಪೇತ್ವಾ ಗನ್ಥೇ ಅವಸೇಸಂ ಅಕುಸಲಂ, ತೀಸು ಭೂಮೀಸು ಕುಸಲಂ, ತೀಸು ಭೂಮೀಸು ವಿಪಾಕೋ, ತೀಸು ಭೂಮೀಸು ಕಿರಿಯಾಬ್ಯಾಕತಂ, ಸಬ್ಬಞ್ಚ ರೂಪಂ – ಇಮೇ ಧಮ್ಮಾ ಗನ್ಥನಿಯಾ ಚೇವ ನೋ ಚ ಗನ್ಥಾ. ಅಗನ್ಥನಿಯಾ ಧಮ್ಮಾ ನ ವತ್ತಬ್ಬಾ – ಗನ್ಥಾ ಚೇವ ಗನ್ಥನಿಯಾ ಚಾತಿಪಿ, ಗನ್ಥನಿಯಾ ಚೇವ ನೋ ಚ ಗನ್ಥಾತಿಪಿ.

೧೪೯೭. ಕತಮೇ ಧಮ್ಮಾ ಗನ್ಥಾ ಚೇವ ಗನ್ಥಸಮ್ಪಯುತ್ತಾ ಚ? ಯತ್ಥ ದಿಟ್ಠಿ ಚ ಲೋಭೋ ಚ ಏಕತೋ ಉಪ್ಪಜ್ಜನ್ತಿ – ಇಮೇ ಧಮ್ಮಾ ಗನ್ಥಾ ಚೇವ ಗನ್ಥಸಮ್ಪಯುತ್ತಾ ಚ.

೧೪೯೮. ಕತಮೇ ಧಮ್ಮಾ ಗನ್ಥಸಮ್ಪಯುತ್ತಾ ಚೇವ ನೋ ಚ ಗನ್ಥಾ? ಅಟ್ಠ ಲೋಭಸಹಗತಚಿತ್ತುಪ್ಪಾದಾ ದ್ವೇ ದೋಮನಸ್ಸಸಹಗತಚಿತ್ತುಪ್ಪಾದಾ, ಏತ್ಥುಪ್ಪನ್ನೇ ಗನ್ಥೇ ಠಪೇತ್ವಾ – ಇಮೇ ಧಮ್ಮಾ ಗನ್ಥಸಮ್ಪಯುತ್ತಾ ಚೇವ ನೋ ಚ ಗನ್ಥಾ. ಗನ್ಥವಿಪ್ಪಯುತ್ತಾ ಧಮ್ಮಾ ನ ವತ್ತಬ್ಬಾ – ಗನ್ಥಾ ಚೇವ ಗನ್ಥಸಮ್ಪಯುತ್ತಾ ಚಾತಿಪಿ, ಗನ್ಥಸಮ್ಪಯುತ್ತಾ ಚೇವ ನೋ ಚ ಗನ್ಥಾತಿಪಿ.

೧೪೯೯. ಕತಮೇ ಧಮ್ಮಾ ಗನ್ಥವಿಪ್ಪಯುತ್ತಾ ಗನ್ಥನಿಯಾ? ಚತೂಸು ದಿಟ್ಠಿಗತವಿಪ್ಪಯುತ್ತಲೋಭಸಹಗತೇಸು ಚಿತ್ತುಪ್ಪಾದೇಸು ಉಪ್ಪನ್ನೋ ಲೋಭೋ, ದ್ವೀಸು ದೋಮನಸ್ಸಸಹಗತೇಸು ಚಿತ್ತುಪ್ಪಾದೇಸು ಉಪ್ಪನ್ನಂ ಪಟಿಘಂ, ವಿಚಿಕಿಚ್ಛಾಸಹಗತೋ ಚಿತ್ತುಪ್ಪಾದೋ, ಉದ್ಧಚ್ಚಸಹಗತೋ ಚಿತ್ತುಪ್ಪಾದೋ, ತೀಸು ಭೂಮೀಸು ಕುಸಲಂ, ತೀಸು ಭೂಮೀಸು ವಿಪಾಕೋ, ತೀಸು ಭೂಮೀಸು ಕಿರಿಯಾಬ್ಯಾಕತಂ, ಸಬ್ಬಞ್ಚ ರೂಪಂ – ಇಮೇ ಧಮ್ಮಾ ಗನ್ಥವಿಪ್ಪಯುತ್ತಾ ಗನ್ಥನಿಯಾ.

೧೫೦೦. ಕತಮೇ ಧಮ್ಮಾ ಗನ್ಥವಿಪ್ಪಯುತ್ತಾ ಅಗನ್ಥನಿಯಾ? ಚತ್ತಾರೋ ಮಗ್ಗಾ ಅಪರಿಯಾಪನ್ನಾ, ಚತ್ತಾರಿ ಚ ಸಾಮಞ್ಞಫಲಾನಿ, ನಿಬ್ಬಾನಞ್ಚ – ಇಮೇ ಧಮ್ಮಾ ಗನ್ಥವಿಪ್ಪಯುತ್ತಾ ಅಗನ್ಥನಿಯಾ. ಗನ್ಥಸಮ್ಪಯುತ್ತಾ ಧಮ್ಮಾ ನ ವತ್ತಬ್ಬಾ – ಗನ್ಥವಿಪ್ಪಯುತ್ತಾ ಗನ್ಥನಿಯಾತಿಪಿ, ಗನ್ಥವಿಪ್ಪಯುತ್ತಾ ಅಗನ್ಥನಿಯಾತಿಪಿ.

ಓಘಗೋಚ್ಛಕಂ

೧೫೦೧. ಕತಮೇ ಧಮ್ಮಾ ಓಘಾ…ಪೇ….

ಯೋಗಗೋಚ್ಛಕಂ

೧೫೦೨. ಕತಮೇ ಧಮ್ಮಾ ಯೋಗಾ…ಪೇ….

ನೀವರಣಗೋಚ್ಛಕಂ

೧೫೦೩. ಕತಮೇ ಧಮ್ಮಾ ನೀವರಣಾ? ಛ ನೀವರಣಾ – ಕಾಮಚ್ಛನ್ದನೀವರಣಂ, ಬ್ಯಾಪಾದನೀವರಣಂ, ಥಿನಮಿದ್ಧನೀವರಣಂ, ಉದ್ಧಚ್ಚಕುಕ್ಕುಚ್ಚನೀವರಣಂ, ವಿಚಿಕಿಚ್ಛಾನೀವರಣಂ, ಅವಿಜ್ಜಾನೀವರಣಂ. ಕಾಮಚ್ಛನ್ದನೀವರಣಂ ಅಟ್ಠಸು ಲೋಭಸಹಗತೇಸು ಚಿತ್ತುಪ್ಪಾದೇಸು ಉಪ್ಪಜ್ಜತಿ, ಬ್ಯಾಪಾದನೀವರಣಂ ದ್ವೀಸು ದೋಮನಸ್ಸಸಹಗತೇಸು ಚಿತ್ತುಪ್ಪಾದೇಸು ಉಪ್ಪಜ್ಜತಿ, ಥಿನಮಿದ್ಧನೀವರಣಂ ಸಸಙ್ಖಾರಿಕೇಸು ಅಕುಸಲೇಸು ಉಪ್ಪಜ್ಜತಿ, ಉದ್ಧಚ್ಚನೀವರಣಂ ಉದ್ಧಚ್ಚಸಹಗತೇಸು ಚಿತ್ತುಪ್ಪಾದೇಸು ಉಪ್ಪಜ್ಜತಿ, ಕುಕ್ಕುಚ್ಚನೀವರಣಂ ದ್ವೀಸು ದೋಮನಸ್ಸಸಹಗತೇಸು ಚಿತ್ತುಪ್ಪಾದೇಸು ಉಪ್ಪಜ್ಜತಿ, ವಿಚಿಕಿಚ್ಛಾನೀವರಣಂ ವಿಚಿಕಿಚ್ಛಾಸಹಗತೇಸು ಚಿತ್ತುಪ್ಪಾದೇಸು ಉಪ್ಪಜ್ಜತಿ, ಅವಿಜ್ಜಾನೀವರಣಂ ಸಬ್ಬಾಕುಸಲೇಸು ಉಪ್ಪಜ್ಜತಿ – ಇಮೇ ಧಮ್ಮಾ ನೀವರಣಾ.

೧೫೦೪. ಕತಮೇ ಧಮ್ಮಾ ನೋ ನೀವರಣಾ? ಠಪೇತ್ವಾ ನೀವರಣೇ ಅವಸೇಸಂ ಅಕುಸಲಂ, ಚತೂಸು ಭೂಮೀಸು ಕುಸಲಂ, ಚತೂಸು ಭೂಮೀಸು ವಿಪಾಕೋ, ತೀಸು ಭೂಮೀಸು ಕಿರಿಯಾಬ್ಯಾಕತಂ, ರೂಪಞ್ಚ, ನಿಬ್ಬಾನಞ್ಚ – ಇಮೇ ಧಮ್ಮಾ ನೋ ನೀವರಣಾ.

೧೫೦೫. ಕತಮೇ ಧಮ್ಮಾ ನೀವರಣಿಯಾ? ತೀಸು ಭೂಮೀಸು ಕುಸಲಂ, ಅಕುಸಲಂ, ತೀಸು ಭೂಮೀಸು ವಿಪಾಕೋ, ತೀಸು ಭೂಮೀಸು ಕಿರಿಯಾಬ್ಯಾಕತಂ, ಸಬ್ಬಞ್ಚ ರೂಪಂ – ಇಮೇ ಧಮ್ಮಾ ನೀವರಣಿಯಾ.

೧೫೦೬. ಕತಮೇ ಧಮ್ಮಾ ಅನೀವರಣಿಯಾ? ಚತ್ತಾರೋ ಮಗ್ಗಾ ಅಪರಿಯಾಪನ್ನಾ, ಚತ್ತಾರಿ ಚ ಸಾಮಞ್ಞಫಲಾನಿ, ನಿಬ್ಬಾನಞ್ಚ – ಇಮೇ ಧಮ್ಮಾ ಅನೀವರಣಿಯಾ.

೧೫೦೭. ಕತಮೇ ಧಮ್ಮಾ ನೀವರಣಸಮ್ಪಯುತ್ತಾ? ದ್ವಾದಸ ಅಕುಸಲಚಿತ್ತುಪ್ಪಾದಾ – ಇಮೇ ಧಮ್ಮಾ ನೀವರಣಸಮ್ಪಯುತ್ತಾ.

೧೫೦೮. ಕತಮೇ ಧಮ್ಮಾ ನೀವರಣವಿಪ್ಪಯುತ್ತಾ? ಚತೂಸು ಭೂಮೀಸು ಕುಸಲಂ, ಚತೂಸು ಭೂಮೀಸು ವಿಪಾಕೋ, ತೀಸು ಭೂಮೀಸು ಕಿರಿಯಾಬ್ಯಾಕತಂ, ರೂಪಞ್ಚ, ನಿಬ್ಬಾನಞ್ಚ – ಇಮೇ ಧಮ್ಮಾ ನೀವರಣವಿಪ್ಪಯುತ್ತಾ.

೧೫೦೯. ಕತಮೇ ಧಮ್ಮಾ ನೀವರಣಾ ಚೇವ ನೀವರಣಿಯಾ ಚ? ತಾನೇವ ನೀವರಣಾನಿ ನೀವರಣಾ ಚೇವ ನೀವರಣಿಯಾ ಚ.

೧೫೧೦. ಕತಮೇ ಧಮ್ಮಾ ನೀವರಣಿಯಾ ಚೇವ ನೋ ಚ ನೀವರಣಾ? ಠಪೇತ್ವಾ ನೀವರಣೇ, ಅವಸೇಸಂ ಅಕುಸಲಂ, ತೀಸು ಭೂಮೀಸು ಕುಸಲಂ, ತೀಸು ಭೂಮೀಸು ವಿಪಾಕೋ, ತೀಸು ಭೂಮೀಸು ಕಿರಿಯಾಬ್ಯಾಕತಂ, ಸಬ್ಬಞ್ಚ ರೂಪಂ – ಇಮೇ ಧಮ್ಮಾ ನೀವರಣಿಯಾ ಚೇವ ನೋ ಚ ನೀವರಣಾ. ಅನೀವರಣಿಯಾ ಧಮ್ಮಾ ನ ವತ್ತಬ್ಬಾ – ನೀವರಣಾ ಚೇವ ನೀವರಣಿಯಾ ಚಾತಿಪಿ, ನೀವರಣಿಯಾ ಚೇವ ನೋ ಚ ನೀವರಣಾತಿಪಿ.

೧೫೧೧. ಕತಮೇ ಧಮ್ಮಾ ನೀವರಣಾ ಚೇವ ನೀವರಣಸಮ್ಪಯುತ್ತಾ ಚ? ಯತ್ಥ ದ್ವೇ ತೀಣಿ ನೀವರಣಾನಿ ಏಕತೋ ಉಪ್ಪಜ್ಜನ್ತಿ – ಇಮೇ ಧಮ್ಮಾ ನೀವರಣಾ ಚೇವ ನೀವರಣಸಮ್ಪಯುತ್ತಾ ಚ.

೧೫೧೨. ಕತಮೇ ಧಮ್ಮಾ ನೀವರಣಸಮ್ಪಯುತ್ತಾ ಚೇವ ನೋ ಚ ನೀವರಣಾ? ಠಪೇತ್ವಾ ನೀವರಣೇ, ಅವಸೇಸಂ ಅಕುಸಲಂ – ಇಮೇ ಧಮ್ಮಾ ನೀವರಣಸಮ್ಪಯುತ್ತಾ ಚೇವ ನೋ ಚ ನೀವರಣಾ. ನೀವರಣವಿಪ್ಪಯುತ್ತಾ ಧಮ್ಮಾ ನ ವತ್ತಬ್ಬಾ – ನೀವರಣಾ ಚೇವ ನೀವರಣಸಮ್ಪಯುತ್ತಾ ಚಾತಿಪಿ, ನೀವರಣಸಮ್ಪಯುತ್ತಾ ಚೇವ ನೋ ಚ ನೀವರಣಾತಿಪಿ.

೧೫೧೩. ಕತಮೇ ಧಮ್ಮಾ ನೀವರಣವಿಪ್ಪಯುತ್ತಾ ನೀವರಣಿಯಾ? ತೀಸು ಭೂಮೀಸು ಕುಸಲಂ, ತೀಸು ಭೂಮೀಸು ವಿಪಾಕೋ, ತೀಸು ಭೂಮೀಸು ಕಿರಿಯಾಬ್ಯಾಕತಂ, ಸಬ್ಬಞ್ಚ ರೂಪಂ – ಇಮೇ ಧಮ್ಮಾ ನೀವರಣವಿಪ್ಪಯುತ್ತಾ ನೀವರಣಿಯಾ.

೧೫೧೪. ಕತಮೇ ಧಮ್ಮಾ ನೀವರಣವಿಪ್ಪಯುತ್ತಾ ಅನೀವರಣಿಯಾ? ಚತ್ತಾರೋ ಮಗ್ಗಾ ಅಪರಿಯಾಪನ್ನಾ, ಚತ್ತಾರಿ ಚ ಸಾಮಞ್ಞಫಲಾನಿ, ನಿಬ್ಬಾನಞ್ಚ – ಇಮೇ ಧಮ್ಮಾ ನೀವರಣವಿಪ್ಪಯುತ್ತಾ ಅನೀವರಣಿಯಾ. ನೀವರಣಸಮ್ಪಯುತ್ತಾ ಧಮ್ಮಾ ನ ವತ್ತಬ್ಬಾ – ನೀವರಣವಿಪ್ಪಯುತ್ತಾ ನೀವರಣಿಯಾತಿಪಿ, ನೀವರಣವಿಪ್ಪಯುತ್ತಾ ಅನೀವರಣಿಯಾತಿಪಿ.

ಪರಾಮಾಸಗೋಚ್ಛಕಂ

೧೫೧೫. ಕತಮೇ ಧಮ್ಮಾ ಪರಾಮಾಸಾ? ದಿಟ್ಠಿಪರಾಮಾಸೋ ಚತೂಸು ದಿಟ್ಠಿಗತಸಮ್ಪಯುತ್ತೇಸು ಚಿತ್ತುಪ್ಪಾದೇಸು ಉಪ್ಪಜ್ಜತಿ – ಇಮೇ ಧಮ್ಮಾ ಪರಾಮಾಸಾ.

೧೫೧೬. ಕತಮೇ ಧಮ್ಮಾ ನೋ ಪರಾಮಾಸಾ? ಠಪೇತ್ವಾ ಪರಾಮಾಸಂ ಅವಸೇಸಂ ಅಕುಸಲಂ, ಚತೂಸು ಭೂಮೀಸು ಕುಸಲಂ, ಚತೂಸು ಭೂಮೀಸು ವಿಪಾಕೋ, ತೀಸು ಭೂಮೀಸು ಕಿರಿಯಾಬ್ಯಾಕತಂ, ರೂಪಞ್ಚ, ನಿಬ್ಬಾನಞ್ಚ – ಇಮೇ ಧಮ್ಮಾ ನೋ ಪರಾಮಾಸಾ.

೧೫೧೭. ಕತಮೇ ಧಮ್ಮಾ ಪರಾಮಟ್ಠಾ? ತೀಸು ಭೂಮೀಸು ಕುಸಲಂ, ಅಕುಸಲಂ, ತೀಸು ಭೂಮೀಸು ವಿಪಾಕೋ, ತೀಸು ಭೂಮೀಸು ಕಿರಿಯಾಬ್ಯಾಕತಂ, ಸಬ್ಬಞ್ಚ ರೂಪಂ – ಇಮೇ ಧಮ್ಮಾ ಪರಾಮಟ್ಠಾ.

೧೫೧೮. ಕತಮೇ ಧಮ್ಮಾ ಅಪರಾಮಟ್ಠಾ? ಚತ್ತಾರೋ ಮಗ್ಗಾ ಅಪರಿಯಾಪನ್ನಾ, ಚತ್ತಾರಿ ಚ ಸಾಮಞ್ಞಫಲಾನಿ ನಿಬ್ಬಾನಞ್ಚ – ಇಮೇ ಧಮ್ಮಾ ಅಪರಾಮಟ್ಠಾ.

೧೫೧೯. ಕತಮೇ ಧಮ್ಮಾ ಪರಾಮಾಸಸಮ್ಪಯುತ್ತಾ? ಚತ್ತಾರೋ ದಿಟ್ಠಿಗತಸಮ್ಪಯುತ್ತಚಿತ್ತುಪ್ಪಾದಾ, ಏತ್ಥುಪ್ಪನ್ನಂ ಪರಾಮಾಸಂ ಠಪೇತ್ವಾ – ಇಮೇ ಧಮ್ಮಾ ಪರಾಮಾಸಸಮ್ಪಯುತ್ತಾ.

೧೫೨೦. ಕತಮೇ ಧಮ್ಮಾ ಪರಾಮಾಸವಿಪ್ಪಯುತ್ತಾ? ಚತ್ತಾರೋ ದಿಟ್ಠಿಗತವಿಪ್ಪಯುತ್ತಲೋಭಸಹಗತಚಿತ್ತುಪ್ಪಾದಾ, ದ್ವೇ ದೋಮನಸ್ಸಸಹಗತಚಿತ್ತುಪ್ಪಾದಾ, ವಿಚಿಕಿಚ್ಛಾಸಹಗತೋ ಚಿತ್ತುಪ್ಪಾದೋ, ಉದ್ಧಚ್ಚಸಹಗತೋ ಚಿತ್ತುಪ್ಪಾದೋ, ಚತೂಸು ಭೂಮೀಸು ಕುಸಲಂ, ಚತೂಸು ಭೂಮೀಸು ವಿಪಾಕೋ, ತೀಸು ಭೂಮೀಸು ಕಿರಿಯಾಬ್ಯಾಕತಂ, ರೂಪಞ್ಚ, ನಿಬ್ಬಾನಞ್ಚ – ಇಮೇ ಧಮ್ಮಾ ಪರಾಮಾಸವಿಪ್ಪಯುತ್ತಾ. ಪರಾಮಾಸೋ ನ ವತ್ತಬ್ಬೋ – ಪರಾಮಾಸಸಮ್ಪಯುತ್ತೋತಿಪಿ, ಪರಾಮಾಸವಿಪ್ಪಯುತ್ತೋತಿಪಿ.

೧೫೨೧. ಕತಮೇ ಧಮ್ಮಾ ಪರಾಮಾಸಾ ಚೇವ ಪರಾಮಟ್ಠಾ ಚ? ಸೋ ಏವ ಪರಾಮಾಸೋ ಪರಾಮಾಸೋ ಚೇವ ಪರಾಮಟ್ಠೋ ಚ.

೧೫೨೨. ಕತಮೇ ಧಮ್ಮಾ ಪರಾಮಟ್ಠಾ ಚೇವ ನೋ ಚ ಪರಾಮಾಸಾ? ಠಪೇತ್ವಾ ಪರಾಮಾಸಂ ಅವಸೇಸಂ ಅಕುಸಲಂ, ತೀಸು ಭೂಮೀಸು ಕುಸಲಂ, ತೀಸು ಭೂಮೀಸು ವಿಪಾಕೋ, ತೀಸು ಭೂಮೀಸು ಕಿರಿಯಾಬ್ಯಾಕತಂ, ಸಬ್ಬಞ್ಚ ರೂಪಂ – ಇಮೇ ಧಮ್ಮಾ ಪರಾಮಟ್ಠಾ ಚೇವ ನೋ ಚ ಪರಾಮಾಸಾ. ಅಪರಾಮಟ್ಠಾ ಧಮ್ಮಾ ನ ವತ್ತಬ್ಬಾ – ಪರಾಮಾಸಾ ಚೇವ ಪರಾಮಟ್ಠಾ ಚಾತಿಪಿ, ಪರಾಮಟ್ಠಾ ಚೇವ ನೋ ಚ ಪರಾಮಾಸಾತಿಪಿ.

೧೫೨೩. ಕತಮೇ ಧಮ್ಮಾ ಪರಾಮಾಸವಿಪ್ಪಯುತ್ತಾ ಪರಾಮಟ್ಠಾ? ಚತ್ತಾರೋ ದಿಟ್ಠಿಗತವಿಪ್ಪಯುತ್ತಲೋಭಸಹಗತಚಿತ್ತುಪ್ಪಾದಾ, ದ್ವೇ ದೋಮನಸ್ಸಸಹಗತಚಿತ್ತುಪ್ಪಾದಾ, ವಿಚಿಕಿಚ್ಛಾಸಹಗತೋ ಚಿತ್ತುಪ್ಪಾದೋ, ಉದ್ಧಚ್ಚಸಹಗತೋ ಚಿತ್ತುಪ್ಪಾದೋ, ತೀಸು ಭೂಮೀಸು ಕುಸಲಂ, ತೀಸು ಭೂಮೀಸು ವಿಪಾಕೋ, ತೀಸು ಭೂಮೀಸು ಕಿರಿಯಾಬ್ಯಾಕತಂ, ಸಬ್ಬಞ್ಚ ರೂಪಂ – ಇಮೇ ಧಮ್ಮಾ ಪರಾಮಾಸವಿಪ್ಪಯುತ್ತಾ ಪರಾಮಟ್ಠಾ.

೧೫೨೪. ಕತಮೇ ಧಮ್ಮಾ ಪರಾಮಾಸವಿಪ್ಪಯುತ್ತಾ ಅಪರಾಮಟ್ಠಾ? ಚತ್ತಾರೋ ಮಗ್ಗಾ ಅಪರಿಯಾಪನ್ನಾ, ಚತ್ತಾರಿ ಚ ಸಾಮಞ್ಞಫಲಾನಿ, ನಿಬ್ಬಾನಞ್ಚ – ಇಮೇ ಧಮ್ಮಾ ಪರಾಮಾಸವಿಪ್ಪಯುತ್ತಾ ಅಪರಾಮಟ್ಠಾ. ಪರಾಮಾಸಾ ಚ ಪರಾಮಾಸಸಮ್ಪಯುತ್ತಾ ಚ ಧಮ್ಮಾ ನ ವತ್ತಬ್ಬಾ – ಪರಾಮಾಸವಿಪ್ಪಯುತ್ತಾ ಪರಾಮಟ್ಠಾತಿಪಿ, ಪರಾಮಾಸವಿಪ್ಪಯುತ್ತಾ ಅಪರಾಮಟ್ಠಾತಿಪಿ.

ಮಹನ್ತರದುಕಂ

೧೫೨೫. ಕತಮೇ ಧಮ್ಮಾ ಸಾರಮ್ಮಣಾ? ಚತೂಸು ಭೂಮೀಸು ಕುಸಲಂ, ಅಕುಸಲಂ, ಚತೂಸು ಭೂಮೀಸು ವಿಪಾಕೋ, ತೀಸು ಭೂಮೀಸು ಕಿರಿಯಾಬ್ಯಾಕತಂ – ಇಮೇ ಧಮ್ಮಾ ಸಾರಮ್ಮಣಾ.

೧೫೨೬. ಕತಮೇ ಧಮ್ಮಾ ಅನಾರಮ್ಮಣಾ? ರೂಪಞ್ಚ, ನಿಬ್ಬಾನಞ್ಚ – ಇಮೇ ಧಮ್ಮಾ ಅನಾರಮ್ಮಣಾ.

೧೫೨೭. ಕತಮೇ ಧಮ್ಮಾ ಚಿತ್ತಾ? ಚಕ್ಖುವಿಞ್ಞಾಣಂ, ಸೋತವಿಞ್ಞಾಣಂ, ಘಾನವಿಞ್ಞಾಣಂ, ಜಿವ್ಹಾವಿಞ್ಞಾಣಂ, ಕಾಯವಿಞ್ಞಾಣಂ, ಮನೋಧಾತು, ಮನೋವಿಞ್ಞಾಣಧಾತು – ಇಮೇ ಧಮ್ಮಾ ಚಿತ್ತಾ.

೧೫೨೮. ಕತಮೇ ಧಮ್ಮಾ ನೋ ಚಿತ್ತಾ? ವೇದನಾಕ್ಖನ್ಧೋ, ಸಞ್ಞಾಕ್ಖನ್ಧೋ, ಸಙ್ಖಾರಕ್ಖನ್ಧೋ, ರೂಪಞ್ಚ, ನಿಬ್ಬಾನಞ್ಚ – ಇಮೇ ಧಮ್ಮಾ ನೋ ಚಿತ್ತಾ.

೧೫೨೯. ಕತಮೇ ಧಮ್ಮಾ ಚೇತಸಿಕಾ? ವೇದನಾಕ್ಖನ್ಧೋ, ಸಞ್ಞಾಕ್ಖನ್ಧೋ, ಸಙ್ಖಾರಕ್ಖನ್ಧೋ – ಇಮೇ ಧಮ್ಮಾ ಚೇತಸಿಕಾ.

೧೫೩೦. ಕತಮೇ ಧಮ್ಮಾ ಅಚೇತಸಿಕಾ? ಚಿತ್ತಞ್ಚ, ರೂಪಞ್ಚ, ನಿಬ್ಬಾನಞ್ಚ – ಇಮೇ ಧಮ್ಮಾ ಅಚೇತಸಿಕಾ.

೧೫೩೧. ಕತಮೇ ಧಮ್ಮಾ ಚಿತ್ತಸಮ್ಪಯುತ್ತಾ? ವೇದನಾಕ್ಖನ್ಧೋ, ಸಞ್ಞಾಕ್ಖನ್ಧೋ, ಸಙ್ಖಾರಕ್ಖನ್ಧೋ – ಇಮೇ ಧಮ್ಮಾ ಚಿತ್ತಸಮ್ಪಯುತ್ತಾ.

೧೫೩೨. ಕತಮೇ ಧಮ್ಮಾ ಚಿತ್ತವಿಪ್ಪಯುತ್ತಾ? ರೂಪಞ್ಚ, ನಿಬ್ಬಾನಞ್ಚ – ಇಮೇ ಧಮ್ಮಾ ಚಿತ್ತವಿಪ್ಪಯುತ್ತಾ. ಚಿತ್ತಂ ನ ವತ್ತಬ್ಬಂ – ಚಿತ್ತೇನ ಸಮ್ಪಯುತ್ತನ್ತಿಪಿ, ಚಿತ್ತೇನ ವಿಪ್ಪಯುತ್ತನ್ತಿಪಿ.

೧೫೩೩. ಕತಮೇ ಧಮ್ಮಾ ಚಿತ್ತಸಂಸಟ್ಠಾ? ವೇದನಾಕ್ಖನ್ಧೋ, ಸಞ್ಞಾಕ್ಖನ್ಧೋ, ಸಙ್ಖಾರಕ್ಖನ್ಧೋ – ಇಮೇ ಧಮ್ಮಾ ಚಿತ್ತಸಂಸಟ್ಠಾ.

೧೫೩೪. ಕತಮೇ ಧಮ್ಮಾ ಚಿತ್ತವಿಸಂಸಟ್ಠಾ? ರೂಪಞ್ಚ, ನಿಬ್ಬಾನಞ್ಚ – ಇಮೇ ಧಮ್ಮಾ ಚಿತ್ತವಿಸಂಸಟ್ಠಾ. ಚಿತ್ತಂ ನ ವತ್ತಬ್ಬಂ – ಚಿತ್ತೇನ ಸಂಸಟ್ಠನ್ತಿಪಿ, ಚಿತ್ತೇನ ವಿಸಂಸಟ್ಠನ್ತಿಪಿ.

೧೫೩೫. ಕತಮೇ ಧಮ್ಮಾ ಚಿತ್ತಸಮುಟ್ಠಾನಾ? ವೇದನಾಕ್ಖನ್ಧೋ, ಸಞ್ಞಾಕ್ಖನ್ಧೋ, ಸಙ್ಖಾರಕ್ಖನ್ಧೋ, ಕಾಯವಿಞ್ಞತ್ತಿ, ವಚೀವಿಞ್ಞತ್ತಿ, ಯಂ ವಾ ಪನಞ್ಞಮ್ಪಿ ಅತ್ಥಿ ರೂಪಂ ಚಿತ್ತಜಂ ಚಿತ್ತಹೇತುಕಂ ಚಿತ್ತಸಮುಟ್ಠಾನಂ – ರೂಪಾಯತನಂ ಸದ್ದಾಯತನಂ ಗನ್ಧಾಯತನಂ ರಸಾಯತನಂ ಫೋಟ್ಠಬ್ಬಾಯತನಂ ಆಕಾಸಧಾತು ಆಪೋಧಾತು ರೂಪಸ್ಸ ಲಹುತಾ ರೂಪಸ್ಸ ಮುದುತಾ ರೂಪಸ್ಸ ಕಮ್ಮಞ್ಞತಾ ರೂಪಸ್ಸ ಉಪಚಯೋ ರೂಪಸ್ಸ ಸನ್ತತಿ ಕಬಳೀಕಾರೋ ಆಹಾರೋ – ಇಮೇ ಧಮ್ಮಾ ಚಿತ್ತಸಮುಟ್ಠಾನಾ.

೧೫೩೬. ಕತಮೇ ಧಮ್ಮಾ ನೋ ಚಿತ್ತಸಮುಟ್ಠಾನಾ? ಚಿತ್ತಞ್ಚ, ಅವಸೇಸಞ್ಚ ರೂಪಂ, ನಿಬ್ಬಾನಞ್ಚ – ಇಮೇ ಧಮ್ಮಾ ನೋ ಚಿತ್ತಸಮುಟ್ಠಾನಾ.

೧೫೩೭. ಕತಮೇ ಧಮ್ಮಾ ಚಿತ್ತಸಹಭುನೋ? ವೇದನಾಕ್ಖನ್ಧೋ, ಸಞ್ಞಾಕ್ಖನ್ಧೋ, ಸಙ್ಖಾರಕ್ಖನ್ಧೋ, ಕಾಯವಿಞ್ಞತ್ತಿ, ವಚೀವಿಞ್ಞತ್ತಿ – ಇಮೇ ಧಮ್ಮಾ ಚಿತ್ತಸಹಭುನೋ.

೧೫೩೮. ಕತಮೇ ಧಮ್ಮಾ ನೋ ಚಿತ್ತಸಹಭುನೋ? ಚಿತ್ತಞ್ಚ, ಅವಸೇಸಞ್ಚ ರೂಪಂ, ನಿಬ್ಬಾನಞ್ಚ – ಇಮೇ ಧಮ್ಮಾ ನೋ ಚಿತ್ತಸಹಭುನೋ.

೧೫೩೯. ಕತಮೇ ಧಮ್ಮಾ ಚಿತ್ತಾನುಪರಿವತ್ತಿನೋ? ವೇದನಾಕ್ಖನ್ಧೋ, ಸಞ್ಞಾಕ್ಖನ್ಧೋ, ಸಙ್ಖಾರಕ್ಖನ್ಧೋ, ಕಾಯವಿಞ್ಞತ್ತಿ, ವಚೀವಿಞ್ಞತ್ತಿ – ಇಮೇ ಧಮ್ಮಾ ಚಿತ್ತಾನುಪರಿವತ್ತಿನೋ.

೧೫೪೦. ಕತಮೇ ಧಮ್ಮಾ ನೋ ಚಿತ್ತಾನುಪರಿವತ್ತಿನೋ? ಚಿತ್ತಞ್ಚ, ಅವಸೇಸಞ್ಚ ರೂಪಂ, ನಿಬ್ಬಾನಞ್ಚ – ಇಮೇ ಧಮ್ಮಾ ನೋ ಚಿತ್ತಾನುಪರಿವತ್ತಿನೋ.

೧೫೪೧. ಕತಮೇ ಧಮ್ಮಾ ಚಿತ್ತಸಂಸಟ್ಠಸಮುಟ್ಠಾನಾ? ವೇದನಾಕ್ಖನ್ಧೋ, ಸಞ್ಞಾಕ್ಖನ್ಧೋ, ಸಙ್ಖಾರಕ್ಖನ್ಧೋ – ಇಮೇ ಧಮ್ಮಾ ಚಿತ್ತಸಂಸಟ್ಠಸಮುಟ್ಠಾನಾ.

೧೫೪೨. ಕತಮೇ ಧಮ್ಮಾ ನೋ ಚಿತ್ತಸಂಸಟ್ಠಸಮುಟ್ಠಾನಾ? ಚಿತ್ತಞ್ಚ, ರೂಪಞ್ಚ, ನಿಬ್ಬಾನಞ್ಚ – ಇಮೇ ಧಮ್ಮಾ ನೋ ಚಿತ್ತಸಂಸಟ್ಠಸಮುಟ್ಠಾನಾ.

೧೫೪೩. ಕತಮೇ ಧಮ್ಮಾ ಚಿತ್ತಸಂಸಟ್ಠಸಮುಟ್ಠಾನಸಹಭುನೋ? ವೇದನಾಕ್ಖನ್ಧೋ, ಸಞ್ಞಾಕ್ಖನ್ಧೋ, ಸಙ್ಖಾರಕ್ಖನ್ಧೋ – ಇಮೇ ಧಮ್ಮಾ ಚಿತ್ತಸಂಸಟ್ಠಸಮುಟ್ಠಾನಸಹಭುನೋ.

೧೫೪೪. ಕತಮೇ ಧಮ್ಮಾ ನೋ ಚಿತ್ತಸಂಸಟ್ಠಸಮುಟ್ಠಾನಸಹಭುನೋ? ಚಿತ್ತಞ್ಚ, ರೂಪಞ್ಚ, ನಿಬ್ಬಾನಞ್ಚ – ಇಮೇ ಧಮ್ಮಾ ನೋ ಚಿತ್ತಸಂಸಟ್ಠಸಮುಟ್ಠಾನಸಹಭುನೋ.

೧೫೪೫. ಕತಮೇ ಧಮ್ಮಾ ಚಿತ್ತಸಂಸಟ್ಠಸಮುಟ್ಠಾನಾನುಪರಿವತ್ತಿನೋ? ವೇದನಾಕ್ಖನ್ಧೋ, ಸಞ್ಞಾಕ್ಖನ್ಧೋ, ಸಙ್ಖಾರಕ್ಖನ್ಧೋ – ಇಮೇ ಧಮ್ಮಾ ಚಿತ್ತಸಂಸಟ್ಠಸಮುಟ್ಠಾನಾನುಪರಿವತ್ತಿನೋ.

೧೫೪೬. ಕತಮೇ ಧಮ್ಮಾ ನೋ ಚಿತ್ತಸಂಸಟ್ಠಸಮುಟ್ಠಾನಾನುಪರಿವತ್ತಿನೋ? ಚಿತ್ತಞ್ಚ, ರೂಪಞ್ಚ, ನಿಬ್ಬಾನಞ್ಚ – ಇಮೇ ಧಮ್ಮಾ ನೋ ಚಿತ್ತಸಂಸಟ್ಠಸಮುಟ್ಠಾನಾನುಪರಿವತ್ತಿನೋ.

೧೫೪೭. ಕತಮೇ ಧಮ್ಮಾ ಅಜ್ಝತ್ತಿಕಾ? ಚಕ್ಖಾಯತನಂ…ಪೇ… ಮನಾಯತನಂ – ಇಮೇ ಧಮ್ಮಾ ಅಜ್ಝತ್ತಿಕಾ.

೧೫೪೮. ಕತಮೇ ಧಮ್ಮಾ ಬಾಹಿರಾ? ರೂಪಾಯತನಂ…ಪೇ… ಧಮ್ಮಾಯತನಂ – ಇಮೇ ಧಮ್ಮಾ ಬಾಹಿರಾ.

೧೫೪೯. ಕತಮೇ ಧಮ್ಮಾ ಉಪಾದಾ? ಚಕ್ಖಾಯತನಂ…ಪೇ… ಕಬಳೀಕಾರೋ ಆಹಾರೋ – ಇಮೇ ಧಮ್ಮಾ ಉಪಾದಾ.

೧೫೫೦. ಕತಮೇ ಧಮ್ಮಾ ನೋ ಉಪಾದಾ? ಚತೂಸು ಭೂಮೀಸು ಕುಸಲಂ, ಅಕುಸಲಂ, ಚತೂಸು ಭೂಮೀಸು ವಿಪಾಕೋ, ತೀಸು ಭೂಮೀಸು ಕಿರಿಯಾಬ್ಯಾಕತಂ, ಚತ್ತಾರೋ ಚ ಮಹಾಭೂತಾ, ನಿಬ್ಬಾನಞ್ಚ – ಇಮೇ ಧಮ್ಮಾ ನೋ ಉಪಾದಾ.

೧೫೫೧. ಕತಮೇ ಧಮ್ಮಾ ಉಪಾದಿಣ್ಣಾ? ತೀಸು ಭೂಮೀಸು ವಿಪಾಕೋ, ಯಞ್ಚ ರೂಪಂ ಕಮ್ಮಸ್ಸ ಕತತ್ತಾ – ಇಮೇ ಧಮ್ಮಾ ಉಪಾದಿಣ್ಣಾ.

೧೫೫೨. ಕತಮೇ ಧಮ್ಮಾ ಅನುಪಾದಿಣ್ಣಾ? ತೀಸು ಭೂಮೀಸು ಕುಸಲಂ, ಅಕುಸಲಂ, ತೀಸು ಭೂಮೀಸು ಕಿರಿಯಾಬ್ಯಾಕತಂ, ಯಞ್ಚ ರೂಪಂ ನ ಕಮ್ಮಸ್ಸ ಕತತ್ತಾ, ಚತ್ತಾರೋ ಮಗ್ಗಾ ಅಪರಿಯಾಪನ್ನಾ, ಚತ್ತಾರಿ ಚ ಸಾಮಞ್ಞಫಲಾನಿ, ನಿಬ್ಬಾನಞ್ಚ – ಇಮೇ ಧಮ್ಮಾ ಅನುಪಾದಿಣ್ಣಾ.

ಉಪಾದಾನಗೋಚ್ಛಕಂ

೧೫೫೩. ಕತಮೇ ಧಮ್ಮಾ ಉಪಾದಾನಾ? ಚತ್ತಾರಿ ಉಪಾದಾನಾನಿ – ಕಾಮುಪಾದಾನಂ, ದಿಟ್ಠುಪಾದಾನಂ, ಸೀಲಬ್ಬತುಪಾದಾನಂ, ಅತ್ತವಾದುಪಾದಾನಂ. ಕಾಮುಪಾದಾನಂ ಅಟ್ಠಸು ಲೋಭಸಹಗತೇಸು ಚಿತ್ತುಪ್ಪಾದೇಸು ಉಪ್ಪಜ್ಜತಿ. ದಿಟ್ಠುಪಾದಾನಞ್ಚ ಸೀಲಬ್ಬತುಪಾದಾನಞ್ಚ ಅತ್ತವಾದುಪಾದಾನಞ್ಚ ಚತೂಸು ದಿಟ್ಠಿಗತಸಮ್ಪಯುತ್ತೇಸು ಚಿತ್ತುಪ್ಪಾದೇಸು ಉಪ್ಪಜ್ಜನ್ತಿ – ಇಮೇ ಧಮ್ಮಾ ಉಪಾದಾನಾ.

೧೫೫೪. ಕತಮೇ ಧಮ್ಮಾ ನೋ ಉಪಾದಾನಾ? ಠಪೇತ್ವಾ ಉಪಾದಾನೇ ಅವಸೇಸಂ ಅಕುಸಲಂ, ಚತೂಸು ಭೂಮೀಸು ಕುಸಲಂ, ಚತೂಸು ಭೂಮೀಸು ವಿಪಾಕೋ, ತೀಸು ಭೂಮೀಸು ಕಿರಿಯಾಬ್ಯಾಕತಂ, ರೂಪಞ್ಚ, ನಿಬ್ಬಾನಞ್ಚ – ಇಮೇ ಧಮ್ಮಾ ನೋ ಉಪಾದಾನಾ.

೧೫೫೫. ಕತಮೇ ಧಮ್ಮಾ ಉಪಾದಾನಿಯಾ? ತೀಸು ಭೂಮೀಸು ಕುಸಲಂ, ಅಕುಸಲಂ, ತೀಸು ಭೂಮೀಸು ವಿಪಾಕೋ, ತೀಸು ಭೂಮೀಸು ಕಿರಿಯಾಬ್ಯಾಕತಂ, ಸಬ್ಬಞ್ಚ ರೂಪಂ – ಇಮೇ ಧಮ್ಮಾ ಉಪಾದಾನಿಯಾ.

೧೫೫೬. ಕತಮೇ ಧಮ್ಮಾ ಅನುಪಾದಾನಿಯಾ? ಚತ್ತಾರೋ ಮಗ್ಗಾ ಅಪರಿಯಾಪನ್ನಾ, ಚತ್ತಾರಿ ಚ ಸಾಮಞ್ಞಫಲಾನಿ, ನಿಬ್ಬಾನಞ್ಚ – ಇಮೇ ಧಮ್ಮಾ ಅನುಪಾದಾನಿಯಾ.

೧೫೫೭. ಕತಮೇ ಧಮ್ಮಾ ಉಪಾದಾನಸಮ್ಪಯುತ್ತಾ? ಚತ್ತಾರೋ ದಿಟ್ಠಿಗತಸಮ್ಪಯುತ್ತಲೋಭಸಹಗತಚಿತ್ತುಪ್ಪಾದಾ, ಚತ್ತಾರೋ ದಿಟ್ಠಿಗತವಿಪ್ಪಯುತ್ತಲೋಭಸಹಗತಚಿತ್ತುಪ್ಪಾದಾ, ಏತ್ಥುಪ್ಪನ್ನಂ ಲೋಭಂ ಠಪೇತ್ವಾ – ಇಮೇ ಧಮ್ಮಾ ಉಪಾದಾನಸಮ್ಪಯುತ್ತಾ.

೧೫೫೮. ಕತಮೇ ಧಮ್ಮಾ ಉಪಾದಾನವಿಪ್ಪಯುತ್ತಾ? ಚತೂಸು ದಿಟ್ಠಿಗತವಿಪ್ಪಯುತ್ತಲೋಭಸಹಗತೇಸು ಚಿತ್ತುಪ್ಪಾದೇಸು ಉಪ್ಪನ್ನೋ ಲೋಭೋ, ದ್ವೇ ದೋಮನಸ್ಸಸಹಗತಚಿತ್ತುಪ್ಪಾದಾ, ವಿಚಿಕಿಚ್ಛಾಸಹಗತೋ ಚಿತ್ತುಪ್ಪಾದೋ, ಉದ್ಧಚ್ಚಸಹಗತೋ ಚಿತ್ತುಪ್ಪಾದೋ, ಚತೂಸು ಭೂಮೀಸು ಕುಸಲಂ, ಚತೂಸು ಭೂಮೀಸು ವಿಪಾಕೋ, ತೀಸು ಭೂಮೀಸು ಕಿರಿಯಾಬ್ಯಾಕತಂ, ರೂಪಞ್ಚ, ನಿಬ್ಬಾನಞ್ಚ – ಇಮೇ ಧಮ್ಮಾ ಉಪಾದಾನವಿಪ್ಪಯುತ್ತಾ.

೧೫೫೯. ಕತಮೇ ಧಮ್ಮಾ ಉಪಾದಾನಾ ಚೇವ ಉಪಾದಾನಿಯಾ ಚ? ತಾನೇವ ಉಪಾದಾನಾನಿ ಉಪಾದಾನಾ ಚೇವ ಉಪಾದಾನಿಯಾ ಚ.

೧೫೬೦. ಕತಮೇ ಧಮ್ಮಾ ಉಪಾದಾನಿಯಾ ಚೇವ ನೋ ಚ ಉಪಾದಾನಾ? ಠಪೇತ್ವಾ ಉಪಾದಾನೇ ಅವಸೇಸಂ ಅಕುಸಲಂ, ತೀಸು ಭೂಮೀಸು ಕುಸಲಂ, ತೀಸು ಭೂಮೀಸು ವಿಪಾಕೋ, ತೀಸು ಭೂಮೀಸು ಕಿರಿಯಾಬ್ಯಾಕತಂ, ಸಬ್ಬಞ್ಚ ರೂಪಂ – ಇಮೇ ಧಮ್ಮಾ ಉಪಾದಾನಿಯಾ ಚೇವ ನೋ ಚ ಉಪಾದಾನಾ. ಅನುಪಾದಾನಿಯಾ ಧಮ್ಮಾ ನ ವತ್ತಬ್ಬಾ – ಉಪಾದಾನಾ ಚೇವ ಉಪಾದಾನಿಯಾ ಚಾತಿಪಿ, ಉಪಾದಾನಿಯಾ ಚೇವ ನೋ ಚ ಉಪಾದಾನಾತಿಪಿ.

೧೫೬೧. ಕತಮೇ ಧಮ್ಮಾ ಉಪಾದಾನಾ ಚೇವ ಉಪಾದಾನಸಮ್ಪಯುತ್ತಾ ಚ? ಯತ್ಥ ದಿಟ್ಠಿ ಚ ಲೋಭೋ ಚ ಏಕತೋ ಉಪ್ಪಜ್ಜನ್ತಿ – ಇಮೇ ಧಮ್ಮಾ ಉಪಾದಾನಾ ಚೇವ ಉಪಾದಾನಸಮ್ಪಯುತ್ತಾ ಚ.

೧೫೬೨. ಕತಮೇ ಧಮ್ಮಾ ಉಪಾದಾನಸಮ್ಪಯುತ್ತಾ ಚೇವ ನೋ ಚ ಉಪಾದಾನಾ? ಅಟ್ಠ ಲೋಭಸಹಗತಚಿತ್ತುಪ್ಪಾದಾ, ಏತ್ಥುಪ್ಪನ್ನೇ ಉಪಾದಾನೇ ಠಪೇತ್ವಾ – ಇಮೇ ಧಮ್ಮಾ ಉಪಾದಾನಸಮ್ಪಯುತ್ತಾ ಚೇವ ನೋ ಚ ಉಪಾದಾನಾ. ಉಪಾದಾನವಿಪ್ಪಯುತ್ತಾ ಧಮ್ಮಾ ನ ವತ್ತಬ್ಬಾ – ಉಪಾದಾನಾ ಚೇವ ಉಪಾದಾನಸಮ್ಪಯುತ್ತಾ ಚಾತಿಪಿ, ಉಪಾದಾನಸಮ್ಪಯುತ್ತಾ ಚೇವ ನೋ ಚ ಉಪಾದಾನಾತಿಪಿ.

೧೫೬೩. ಕತಮೇ ಧಮ್ಮಾ ಉಪಾದಾನವಿಪ್ಪಯುತ್ತಾ ಉಪಾದಾನಿಯಾ? ಚತೂಸು ದಿಟ್ಠಿಗತವಿಪ್ಪಯುತ್ತಲೋಭಸಹಗತೇಸು ಚಿತ್ತುಪ್ಪಾದೇಸು ಉಪ್ಪನ್ನೋ ಲೋಭೋ, ದ್ವೇ ದೋಮನಸ್ಸಸಹಗತಚಿತ್ತುಪ್ಪಾದಾ, ವಿಚಿಕಿಚ್ಛಾಸಹಗತೋ ಚಿತ್ತುಪ್ಪಾದೋ, ಉದ್ಧಚ್ಚಸಹಗತೋ ಚಿತ್ತುಪ್ಪಾದೋ, ತೀಸು ಭೂಮೀಸು ಕುಸಲಂ, ತೀಸು ಭೂಮೀಸು ವಿಪಾಕೋ, ತೀಸು ಭೂಮೀಸು ಕಿರಿಯಾಬ್ಯಾಕತಂ, ಸಬ್ಬಞ್ಚ ರೂಪಂ – ಇಮೇ ಧಮ್ಮಾ ಉಪಾದಾನವಿಪ್ಪಯುತ್ತಾ ಉಪಾದಾನಿಯಾ.

೧೫೬೪. ಕತಮೇ ಧಮ್ಮಾ ಉಪಾದಾನವಿಪ್ಪಯುತ್ತಾ ಅನುಪಾದಾನಿಯಾ? ಚತ್ತಾರೋ ಮಗ್ಗಾ ಅಪರಿಯಾಪನ್ನಾ, ಚತ್ತಾರಿ ಚ ಸಾಮಞ್ಞಫಲಾನಿ, ನಿಬ್ಬಾನಞ್ಚ – ಇಮೇ ಧಮ್ಮಾ ಉಪಾದಾನವಿಪ್ಪಯುತ್ತಾ ಅನುಪಾದಾನಿಯಾ. ಉಪಾದಾನಸಮ್ಪಯುತ್ತಾ ಧಮ್ಮಾ ನ ವತ್ತಬ್ಬಾ – ಉಪಾದಾನವಿಪ್ಪಯುತ್ತಾ ಉಪಾದಾನಿಯಾತಿಪಿ, ಉಪಾದಾನವಿಪ್ಪಯುತ್ತಾ ಅನುಪಾದಾನಿಯಾತಿಪಿ.

ಕಿಲೇಸಗೋಚ್ಛಕಂ

೧೫೬೫. ಕತಮೇ ಧಮ್ಮಾ ಕಿಲೇಸಾ? ದಸ ಕಿಲೇಸವತ್ಥೂನಿ – ಲೋಭೋ, ದೋಸೋ, ಮೋಹೋ, ಮಾನೋ, ದಿಟ್ಠಿ, ವಿಚಿಕಿಚ್ಛಾ, ಥಿನಂ, ಉದ್ಧಚ್ಚಂ, ಅಹಿರಿಕಂ, ಅನೋತ್ತಪ್ಪಂ. ಲೋಭೋ ಅಟ್ಠಸು ಲೋಭಸಹಗತೇಸು ಚಿತ್ತುಪ್ಪಾದೇಸು ಉಪ್ಪಜ್ಜತಿ. ದೋಸೋ ದ್ವೀಸು ದೋಮನಸ್ಸಸಹಗತೇಸು ಚಿತ್ತುಪ್ಪಾದೇಸು ಉಪ್ಪಜ್ಜತಿ. ಮೋಹೋ ಸಬ್ಬಾಕುಸಲೇಸು ಉಪ್ಪಜ್ಜತಿ. ಮಾನೋ ಚತೂಸು ದಿಟ್ಠಿಗತವಿಪ್ಪಯುತ್ತಲೋಭಸಹಗತೇಸು ಚಿತ್ತುಪ್ಪಾದೇಸು ಉಪ್ಪಜ್ಜತಿ. ದಿಟ್ಠಿ ಚತೂಸು ದಿಟ್ಠಿಗತಸಮ್ಪಯುತ್ತೇಸು ಚಿತ್ತುಪ್ಪಾದೇಸು ಉಪ್ಪಜ್ಜತಿ. ವಿಚಿಕಿಚ್ಛಾ ವಿಚಿಕಿಚ್ಛಾಸಹಗತೇಸು ಚಿತ್ತುಪ್ಪಾದೇಸು ಉಪ್ಪಜ್ಜತಿ. ಥಿನಂ ಸಸಙ್ಖಾರಿಕೇಸು ಅಕುಸಲೇಸು ಉಪ್ಪಜ್ಜತಿ. ಉದ್ಧಚ್ಚಞ್ಚ ಅಹಿರಿಕಞ್ಚ ಅನೋತ್ತಪ್ಪಞ್ಚ ಸಬ್ಬಾಕುಸಲೇಸು ಉಪ್ಪಜ್ಜನ್ತಿ – ಇಮೇ ಧಮ್ಮಾ ಕಿಲೇಸಾ.

೧೫೬೬. ಕತಮೇ ಧಮ್ಮಾ ನೋ ಕಿಲೇಸಾ? ಠಪೇತ್ವಾ ಕಿಲೇಸೇ ಅವಸೇಸಂ ಅಕುಸಲಂ, ಚತೂಸು ಭೂಮೀಸು ಕುಸಲಂ, ಚತೂಸು ಭೂಮೀಸು ವಿಪಾಕೋ, ತೀಸು ಭೂಮೀಸು ಕಿರಿಯಾಬ್ಯಾಕತಂ, ರೂಪಞ್ಚ, ನಿಬ್ಬಾನಞ್ಚ – ಇಮೇ ಧಮ್ಮಾ ನೋ ಕಿಲೇಸಾ.

೧೫೬೭. ಕತಮೇ ಧಮ್ಮಾ ಸಂಕಿಲೇಸಿಕಾ? ತೀಸು ಭೂಮೀಸು ಕುಸಲಂ, ಅಕುಸಲಂ, ತೀಸು ಭೂಮೀಸು ವಿಪಾಕೋ, ತೀಸು ಭೂಮೀಸು ಕಿರಿಯಾಬ್ಯಾಕತಂ ಸಬ್ಬಞ್ಚ ರೂಪಂ – ಇಮೇ ಧಮ್ಮಾ ಸಂಕಿಲೇಸಿಕಾ.

೧೫೬೮. ಕತಮೇ ಧಮ್ಮಾ ಅಸಂಕಿಲೇಸಿಕಾ? ಚತ್ತಾರೋ ಮಗ್ಗಾ ಅಪರಿಯಾಪನ್ನಾ, ಚತ್ತಾರಿ ಚ ಸಾಮಞ್ಞಫಲಾನಿ, ನಿಬ್ಬಾನಞ್ಚ – ಇಮೇ ಧಮ್ಮಾ ಅಸಂಕಿಲೇಸಿಕಾ.

೧೫೬೯. ಕತಮೇ ಧಮ್ಮಾ ಸಂಕಿಲಿಟ್ಠಾ? ದ್ವಾದಸ ಅಕುಸಲಚಿತ್ತುಪ್ಪಾದಾ – ಇಮೇ ಧಮ್ಮಾ ಸಂಕಿಲಿಟ್ಠಾ.

೧೫೭೦. ಕತಮೇ ಧಮ್ಮಾ ಅಸಂಕಿಲಿಟ್ಠಾ? ಚತೂಸು ಭೂಮೀಸು ಕುಸಲಂ, ಚತೂಸು ಭೂಮೀಸು ವಿಪಾಕೋ, ತೀಸು ಭೂಮೀಸು ಕಿರಿಯಾಬ್ಯಾಕತಂ, ರೂಪಞ್ಚ, ನಿಬ್ಬಾನಞ್ಚ – ಇಮೇ ಧಮ್ಮಾ ಅಸಂಕಿಲಿಟ್ಠಾ.

೧೫೭೧. ಕತಮೇ ಧಮ್ಮಾ ಕಿಲೇಸಸಮ್ಪಯುತ್ತಾ? ದ್ವಾದಸ ಅಕುಸಲಚಿತ್ತುಪ್ಪಾದಾ – ಇಮೇ ಧಮ್ಮಾ ಕಿಲೇಸಸಮ್ಪಯುತ್ತಾ.

೧೫೭೨. ಕತಮೇ ಧಮ್ಮಾ ಕಿಲೇಸವಿಪ್ಪಯುತ್ತಾ? ಚತೂಸು ಭೂಮೀಸು ಕುಸಲಂ, ಚತೂಸು ಭೂಮೀಸು ವಿಪಾಕೋ, ತೀಸು ಭೂಮೀಸು ಕಿರಿಯಾಬ್ಯಾಕತಂ, ರೂಪಞ್ಚ, ನಿಬ್ಬಾನಞ್ಚ – ಇಮೇ ಧಮ್ಮಾ ಕಿಲೇಸವಿಪ್ಪಯುತ್ತಾ.

೧೫೭೩. ಕತಮೇ ಧಮ್ಮಾ ಕಿಲೇಸಾ ಚೇವ ಸಂಕಿಲೇಸಿಕಾ ಚ? ತೇವ ಕಿಲೇಸಾ ಕಿಲೇಸಾ ಚೇವ ಸಂಕಿಲೇಸಿಕಾ ಚ.

೧೫೭೪. ಕತಮೇ ಧಮ್ಮಾ ಸಂಕಿಲೇಸಿಕಾ ಚೇವ ನೋ ಚ ಕಿಲೇಸಾ? ಠಪೇತ್ವಾ ಕಿಲೇಸೇ ಅವಸೇಸಂ ಅಕುಸಲಂ, ತೀಸು ಭೂಮೀಸು ಕುಸಲಂ, ತೀಸು ಭೂಮೀಸು ವಿಪಾಕೋ, ತೀಸು ಭೂಮೀಸು ಕಿರಿಯಾಬ್ಯಾಕತಂ, ಸಬ್ಬಞ್ಚ ರೂಪಂ – ಇಮೇ ಧಮ್ಮಾ ಸಂಕಿಲೇಸಿಕಾ ಚೇವ ನೋ ಚ ಕಿಲೇಸಾ. ಅಸಂಕಿಲೇಸಿಕಾ ಧಮ್ಮಾ ನ ವತ್ತಬ್ಬಾ – ಕಿಲೇಸಾ ಚೇವ ಸಂಕಿಲೇಸಿಕಾ ಚಾತಿಪಿ, ಸಂಕಿಲೇಸಿಕಾ ಚೇವ ನೋ ಚ ಕಿಲೇಸಾತಿಪಿ.