ಅಕುಸಲವಿಪಾಕಅಬ್ಯಾಕತಂ

ಅಕುಸಲವಿಪಾಕಪಞ್ಚವಿಞ್ಞಾಣಾನಿ

೫೫೬. ಕತಮೇ ಧಮ್ಮಾ ಅಬ್ಯಾಕತಾ? ಯಸ್ಮಿಂ ಸಮಯೇ ಅಕುಸಲಸ್ಸ ಕಮ್ಮಸ್ಸ ಕತತ್ತಾ ಉಪಚಿತತ್ತಾ ವಿಪಾಕಂ ಚಕ್ಖುವಿಞ್ಞಾಣಂ ಉಪ್ಪನ್ನಂ ಹೋತಿ ಉಪೇಕ್ಖಾಸಹಗತಂ ರೂಪಾರಮ್ಮಣಂ…ಪೇ… ಸೋತವಿಞ್ಞಾಣಂ ಉಪ್ಪನ್ನಂ ಹೋತಿ ಉಪೇಕ್ಖಾಸಹಗತಂ ಸದ್ದಾರಮ್ಮಣಂ…ಪೇ… ಘಾನವಿಞ್ಞಾಣಂ ಉಪ್ಪನ್ನಂ ಹೋತಿ ಉಪೇಕ್ಖಾಸಹಗತಂ ಗನ್ಧಾರಮ್ಮಣಂ …ಪೇ… ಜಿವ್ಹಾವಿಞ್ಞಾಣಂ ಉಪ್ಪನ್ನಂ ಹೋತಿ ಉಪೇಕ್ಖಾಸಹಗತಂ ರಸಾರಮ್ಮಣಂ…ಪೇ… ಕಾಯವಿಞ್ಞಾಣಂ ಉಪ್ಪನ್ನಂ ಹೋತಿ ದುಕ್ಖಸಹಗತಂ ಫೋಟ್ಠಬ್ಬಾರಮ್ಮಣಂ, ತಸ್ಮಿಂ ಸಮಯೇ ಫಸ್ಸೋ ಹೋತಿ, ವೇದನಾ ಹೋತಿ, ಸಞ್ಞಾ ಹೋತಿ, ಚೇತನಾ ಹೋತಿ, ಚಿತ್ತಂ ಹೋತಿ, ದುಕ್ಖಂ ಹೋತಿ, ಚಿತ್ತಸ್ಸೇಕಗ್ಗತಾ ಹೋತಿ, ಮನಿನ್ದ್ರಿಯಂ ಹೋತಿ, ದುಕ್ಖಿನ್ದ್ರಿಯಂ ಹೋತಿ, ಜೀವಿತಿನ್ದ್ರಿಯಂ ಹೋತಿ; ಯೇ ವಾ ಪನ ತಸ್ಮಿಂ ಸಮಯೇ ಅಞ್ಞೇಪಿ ಅತ್ಥಿ ಪಟಿಚ್ಚಸಮುಪ್ಪನ್ನಾ ಅರೂಪಿನೋ ಧಮ್ಮಾ – ಇಮೇ ಧಮ್ಮಾ ಅಬ್ಯಾಕತಾ.

೫೫೭. ಕತಮೋ ತಸ್ಮಿಂ ಸಮಯೇ ಫಸ್ಸೋ ಹೋತಿ? ಯೋ ತಸ್ಮಿಂ ಸಮಯೇ ಫಸ್ಸೋ ಫುಸನಾ ಸಂಫುಸನಾ ಸಂಫುಸಿತತ್ತಂ – ಅಯಂ ತಸ್ಮಿಂ ಸಮಯೇ ಫಸ್ಸೋ ಹೋತಿ.

೫೫೮. ಕತಮಾ ತಸ್ಮಿಂ ಸಮಯೇ ವೇದನಾ ಹೋತಿ? ಯಂ ತಸ್ಮಿಂ ಸಮಯೇ ತಜ್ಜಾಕಾಯವಿಞ್ಞಾಣಧಾತುಸಮ್ಫಸ್ಸಜಂ ಕಾಯಿಕಂ ಅಸಾತಂ ಕಾಯಿಕಂ ದುಕ್ಖಂ ಕಾಯಸಮ್ಫಸ್ಸಜಂ ಅಸಾತಂ ದುಕ್ಖಂ ವೇದಯಿತಂ ಕಾಯಸಮ್ಫಸ್ಸಜಾ ಅಸಾತಾ ದುಕ್ಖಾ ವೇದನಾ – ಅಯಂ ತಸ್ಮಿಂ ಸಮಯೇ ವೇದನಾ ಹೋತಿ…ಪೇ….

೫೫೯. ಕತಮಂ ತಸ್ಮಿಂ ಸಮಯೇ ದುಕ್ಖಂ ಹೋತಿ? ಯಂ ತಸ್ಮಿಂ ಸಮಯೇ ಕಾಯಿಕಂ ಅಸಾತಂ ಕಾಯಿಕಂ ದುಕ್ಖಂ ಕಾಯಸಮ್ಫಸ್ಸಜಂ ಅಸಾತಂ ದುಕ್ಖಂ ವೇದಯಿತಂ ಕಾಯಸಮ್ಫಸ್ಸಜಾ ಅಸಾತಾ ದುಕ್ಖಾ ವೇದನಾ – ಇದಂ ತಸ್ಮಿಂ ಸಮಯೇ ದುಕ್ಖಂ ಹೋತಿ…ಪೇ….

೫೬೦. ಕತಮಂ ತಸ್ಮಿಂ ಸಮಯೇ ದುಕ್ಖಿನ್ದ್ರಿಯಂ ಹೋತಿ? ಯಂ ತಸ್ಮಿಂ ಸಮಯೇ ಕಾಯಿಕಂ ಅಸಾತಂ ಕಾಯಿಕಂ ದುಕ್ಖಂ ಕಾಯಸಮ್ಫಸ್ಸಜಂ ಅಸಾತಂ ದುಕ್ಖಂ ವೇದಯಿತಂ ಕಾಯಸಮ್ಫಸ್ಸಜಾ ಅಸಾತಾ ದುಕ್ಖಾ ವೇದನಾ – ಇದಂ ತಸ್ಮಿಂ ಸಮಯೇ ದುಕ್ಖಿನ್ದ್ರಿಯಂ ಹೋತಿ…ಪೇ… ಯೇ ವಾ ಪನ ತಸ್ಮಿಂ ಸಮಯೇ ಅಞ್ಞೇಪಿ ಅತ್ಥಿ ಪಟಿಚ್ಚಸಮುಪ್ಪನ್ನಾ ಅರೂಪಿನೋ ಧಮ್ಮಾ – ಇಮೇ ಧಮ್ಮಾ ಅಬ್ಯಾಕತಾ.

ತಸ್ಮಿಂ ಖೋ ಪನ ಸಮಯೇ ಚತ್ತಾರೋ ಖನ್ಧಾ ಹೋನ್ತಿ, ದ್ವಾಯತನಾನಿ ಹೋನ್ತಿ, ದ್ವೇ ಧಾತುಯೋ ಹೋನ್ತಿ, ತಯೋ ಆಹಾರಾ ಹೋನ್ತಿ, ತೀಣಿನ್ದ್ರಿಯಾನಿ ಹೋನ್ತಿ, ಏಕೋ ಫಸ್ಸೋ ಹೋತಿ…ಪೇ… ಏಕಾ ಕಾಯವಿಞ್ಞಾಣಧಾತು ಹೋತಿ, ಏಕಂ ಧಮ್ಮಾಯತನಂ ಹೋತಿ, ಏಕಾ ಧಮ್ಮಧಾತು ಹೋತಿ; ಯೇ ವಾ ಪನ ತಸ್ಮಿಂ ಸಮಯೇ ಅಞ್ಞೇಪಿ ಅತ್ಥಿ ಪಟಿಚ್ಚಸಮುಪ್ಪನ್ನಾ ಅರೂಪಿನೋ ಧಮ್ಮಾ – ಇಮೇ ಧಮ್ಮಾ ಅಬ್ಯಾಕತಾ…ಪೇ….

೫೬೧. ಕತಮೋ ತಸ್ಮಿಂ ಸಮಯೇ ಸಙ್ಖಾರಕ್ಖನ್ಧೋ ಹೋತಿ? ಫಸ್ಸೋ ಚೇತನಾ ಚಿತ್ತಸ್ಸೇಕಗ್ಗತಾ ಜೀವಿತಿನ್ದ್ರಿಯಂ; ಯೇ ವಾ ಪನ ತಸ್ಮಿಂ ಸಮಯೇ ಅಞ್ಞೇಪಿ ಅತ್ಥಿ ಪಟಿಚ್ಚಸಮುಪ್ಪನ್ನಾ ಅರೂಪಿನೋ ಧಮ್ಮಾ ಠಪೇತ್ವಾ ವೇದನಾಕ್ಖನ್ಧಂ ಠಪೇತ್ವಾ ಸಞ್ಞಾಕ್ಖನ್ಧಂ ಠಪೇತ್ವಾ ವಿಞ್ಞಾಣಕ್ಖನ್ಧಂ – ಅಯಂ ತಸ್ಮಿಂ ಸಮಯೇ ಸಙ್ಖಾರಕ್ಖನ್ಧೋ ಹೋತಿ…ಪೇ… ಇಮೇ ಧಮ್ಮಾ ಅಬ್ಯಾಕತಾ.

ಅಕುಸಲವಿಪಾಕಪಞ್ಚವಿಞ್ಞಾಣಾನಿ.

ಅಕುಸಲವಿಪಾಕಮನೋಧಾತು

೫೬೨. ಕತಮೇ ಧಮ್ಮಾ ಅಬ್ಯಾಕತಾ? ಯಸ್ಮಿಂ ಸಮಯೇ ಅಕುಸಲಸ್ಸ ಕಮ್ಮಸ್ಸ ಕತತ್ತಾ ಉಪಚಿತತ್ತಾ ವಿಪಾಕಾ ಮನೋಧಾತು ಉಪ್ಪನ್ನಾ ಹೋತಿ ಉಪೇಕ್ಖಾಸಹಗತಾ ರೂಪಾರಮ್ಮಣಾ ವಾ…ಪೇ… ಫೋಟ್ಠಬ್ಬಾರಮ್ಮಣಾ ವಾ ಯಂ ಯಂ ವಾ ಪನಾರಬ್ಭ, ತಸ್ಮಿಂ ಸಮಯೇ ಫಸ್ಸೋ ಹೋತಿ, ವೇದನಾ ಹೋತಿ, ಸಞ್ಞಾ ಹೋತಿ, ಚೇತನಾ ಹೋತಿ, ಚಿತ್ತಂ ಹೋತಿ, ವಿತಕ್ಕೋ ಹೋತಿ, ವಿಚಾರೋ ಹೋತಿ, ಉಪೇಕ್ಖಾ ಹೋತಿ, ಚಿತ್ತಸ್ಸೇಕಗ್ಗತಾ ಹೋತಿ, ಮನಿನ್ದ್ರಿಯಂ ಹೋತಿ, ಉಪೇಕ್ಖಿನ್ದ್ರಿಯಂ ಹೋತಿ, ಜೀವಿತಿನ್ದ್ರಿಯಂ ಹೋತಿ; ಯೇ ವಾ ಪನ ತಸ್ಮಿಂ ಸಮಯೇ ಅಞ್ಞೇಪಿ ಅತ್ಥಿ ಪಟಿಚ್ಚಸಮುಪ್ಪನ್ನಾ ಅರೂಪಿನೋ ಧಮ್ಮಾ – ಇಮೇ ಧಮ್ಮಾ ಅಬ್ಯಾಕತಾ…ಪೇ….

ತಸ್ಮಿಂ ಖೋ ಪನ ಸಮಯೇ ಚತ್ತಾರೋ ಖನ್ಧಾ ಹೋನ್ತಿ, ದ್ವಾಯತನಾನಿ ಹೋನ್ತಿ, ದ್ವೇ ಧಾತುಯೋ ಹೋನ್ತಿ, ತಯೋ ಆಹಾರಾ ಹೋನ್ತಿ, ತೀಣಿನ್ದ್ರಿಯಾನಿ ಹೋನ್ತಿ, ಏಕೋ ಫಸ್ಸೋ ಹೋತಿ…ಪೇ… ಏಕಾ ಮನೋಧಾತು ಹೋತಿ, ಏಕಂ ಧಮ್ಮಾಯತನಂ ಹೋತಿ, ಏಕಾ ಧಮ್ಮಧಾತು ಹೋತಿ; ಯೇ ವಾ ಪನ ತಸ್ಮಿಂ ಸಮಯೇ ಅಞ್ಞೇಪಿ ಅತ್ಥಿ ಪಟಿಚ್ಚಸಮುಪ್ಪನ್ನಾ ಅರೂಪಿನೋ ಧಮ್ಮಾ – ಇಮೇ ಧಮ್ಮಾ ಅಬ್ಯಾಕತಾ…ಪೇ….

೫೬೩. ಕತಮೋ ತಸ್ಮಿಂ ಸಮಯೇ ಸಙ್ಖಾರಕ್ಖನ್ಧೋ ಹೋತಿ? ಫಸ್ಸೋ ಚೇತನಾ ವಿತಕ್ಕೋ ವಿಚಾರೋ ಚಿತ್ತಸ್ಸೇಕಗ್ಗತಾ ಜೀವಿತಿನ್ದ್ರಿಯಂ; ಯೇ ವಾ ಪನ ತಸ್ಮಿಂ ಸಮಯೇ ಅಞ್ಞೇಪಿ ಅತ್ಥಿ ಪಟಿಚ್ಚಸಮುಪ್ಪನ್ನಾ ಅರೂಪಿನೋ ಧಮ್ಮಾ ಠಪೇತ್ವಾ ವೇದನಾಕ್ಖನ್ಧಂ ಠಪೇತ್ವಾ ಸಞ್ಞಾಕ್ಖನ್ಧಂ ಠಪೇತ್ವಾ ವಿಞ್ಞಾಣಕ್ಖನ್ಧಂ – ಅಯಂ ತಸ್ಮಿಂ ಸಮಯೇ ಸಙ್ಖಾರಕ್ಖನ್ಧೋ ಹೋತಿ…ಪೇ… ಇಮೇ ಧಮ್ಮಾ ಅಬ್ಯಾಕತಾ.

ಅಕುಸಲವಿಪಾಕಾ ಮನೋಧಾತು.

ಅಕುಸಲವಿಪಾಕಮನೋವಿಞ್ಞಾಣಧಾತು

೫೬೪. ಕತಮೇ ಧಮ್ಮಾ ಅಬ್ಯಾಕತಾ? ಯಸ್ಮಿಂ ಸಮಯೇ ಅಕುಸಲಸ್ಸ ಕಮ್ಮಸ್ಸ ಕತತ್ತಾ ಉಪಚಿತತ್ತಾ ವಿಪಾಕಾ ಮನೋವಿಞ್ಞಾಣಧಾತು ಉಪ್ಪನ್ನಾ ಹೋತಿ ಉಪೇಕ್ಖಾಸಹಗತಾ ರೂಪಾರಮ್ಮಣಾ ವಾ…ಪೇ… ಧಮ್ಮಾರಮ್ಮಣಾ ವಾ ಯಂ ಯಂ ವಾ ಪನಾರಬ್ಭ, ತಸ್ಮಿಂ ಸಮಯೇ ಫಸ್ಸೋ ಹೋತಿ, ವೇದನಾ ಹೋತಿ, ಸಞ್ಞಾ ಹೋತಿ, ಚೇತನಾ ಹೋತಿ, ಚಿತ್ತಂ ಹೋತಿ, ವಿತಕ್ಕೋ ಹೋತಿ, ವಿಚಾರೋ ಹೋತಿ, ಉಪೇಕ್ಖಾ ಹೋತಿ, ಚಿತ್ತಸ್ಸೇಕಗ್ಗತಾ ಹೋತಿ, ಮನಿನ್ದ್ರಿಯಂ ಹೋತಿ, ಉಪೇಕ್ಖಿನ್ದ್ರಿಯಂ ಹೋತಿ, ಜೀವಿತಿನ್ದ್ರಿಯಂ ಹೋತಿ; ಯೇ ವಾ ಪನ ತಸ್ಮಿಂ ಸಮಯೇ ಅಞ್ಞೇಪಿ ಅತ್ಥಿ ಪಟಿಚ್ಚಸಮುಪ್ಪನ್ನಾ ಅರೂಪಿನೋ ಧಮ್ಮಾ – ಇಮೇ ಧಮ್ಮಾ ಅಬ್ಯಾಕತಾ…ಪೇ….

ತಸ್ಮಿಂ ಖೋ ಪನ ಸಮಯೇ ಚತ್ತಾರೋ ಖನ್ಧಾ ಹೋನ್ತಿ, ದ್ವಾಯತನಾನಿ ಹೋನ್ತಿ, ದ್ವೇ ಧಾತುಯೋ ಹೋನ್ತಿ, ತಯೋ ಆಹಾರಾ ಹೋನ್ತಿ, ತೀಣಿನ್ದ್ರಿಯಾನಿ ಹೋನ್ತಿ, ಏಕೋ ಫಸ್ಸೋ ಹೋತಿ…ಪೇ… ಏಕಾ ಮನೋವಿಞ್ಞಾಣಧಾತು ಹೋತಿ, ಏಕಂ ಧಮ್ಮಾಯತನಂ ಹೋತಿ, ಏಕಾ ಧಮ್ಮಧಾತು ಹೋತಿ; ಯೇ ವಾ ಪನ ತಸ್ಮಿಂ ಸಮಯೇ ಅಞ್ಞೇಪಿ ಅತ್ಥಿ ಪಟಿಚ್ಚಸಮುಪ್ಪನ್ನಾ ಅರೂಪಿನೋ ಧಮ್ಮಾ – ಇಮೇ ಧಮ್ಮಾ ಅಬ್ಯಾಕತಾ…ಪೇ….

೫೬೫. ಕತಮೋ ತಸ್ಮಿಂ ಸಮಯೇ ಸಙ್ಖಾರಕ್ಖನ್ಧೋ ಹೋತಿ? ಫಸ್ಸೋ ಚೇತನಾ ವಿತಕ್ಕೋ ವಿಚಾರೋ ಚಿತ್ತಸ್ಸೇಕಗ್ಗತಾ ಜೀವಿತಿನ್ದ್ರಿಯಂ; ಯೇ ವಾ ಪನ ತಸ್ಮಿಂ ಸಮಯೇ ಅಞ್ಞೇಪಿ ಅತ್ಥಿ ಪಟಿಚ್ಚಸಮುಪ್ಪನ್ನಾ ಅರೂಪಿನೋ ಧಮ್ಮಾ ಠಪೇತ್ವಾ ವೇದನಾಕ್ಖನ್ಧಂ ಠಪೇತ್ವಾ ಸಞ್ಞಾಕ್ಖನ್ಧಂ ಠಪೇತ್ವಾ ವಿಞ್ಞಾಣಕ್ಖನ್ಧಂ – ಅಯಂ ತಸ್ಮಿಂ ಸಮಯೇ ಸಙ್ಖಾರಕ್ಖನ್ಧೋ ಹೋತಿ…ಪೇ… ಇಮೇ ಧಮ್ಮಾ ಅಬ್ಯಾಕತಾ.

ಅಕುಸಲವಿಪಾಕಾ ಮನೋವಿಞ್ಞಾಣಧಾತು.

ವಿಪಾಕಾ ಅಬ್ಯಾಕತಾ.