೧. ಸಞ್ಞಾಪರಿಭಾಸಾನಿದ್ದೇಸ-ಪಠಮಪರಿಚ್ಛೇದ

೧. ನಮ’ತ್ಥು ಜನ ಸನ್ತಾನ, ತಮ ಸನ್ತಾನ ಭೇದಿನೋ;

ಧಮ್ಮು’ಜ್ಜಲನ್ತ ರುಚಿನೋ, ಮುನಿನ್ದೋ’ದಾತ ರೋಚಿನೋ.

೨. ಪಿಙ್ಗಲಾ’ಚರಿಯಾದೀಹಿ, ಛನ್ದಂ ಯ ಮುದಿತಂ ಪುರಾ;

ಸುದ್ಧಮಾಗಧಿಕಾನಂ ತಂ, ನ ಸಾಧೇತಿ ಯಥಿಚ್ಛಿತಂ [ಯ’ದಿಚ್ಛಿತಂ ಯತಿ’ಚ್ಛಿತಂ (ಕ.)].

೩. ತತೋ ಮಾಗಧಭಾಸಾಯ, ಮತ್ತಾ,ವಣ್ಣ,ವಿಭೇದನಂ;

ಲಕ್ಖ್ಯ ಲಕ್ಖಣ ಸಂಯುತ್ತಂ, ಪಸನ್ನ’ತ್ಥ,ಪದ,ಕ್ಕಮಂ.

೪. ಇದಂ ವುತ್ತೋದಯಂ ನಾಮ, ಲೋಕಿಯ’ಚ್ಛನ್ದನಿಸ್ಸಿತಂ;

ಆರಭಿಸ್ಸ’ಮಹಂ ದಾನಿ, ತೇಸಂ ಸುಖವಿಬುದ್ಧಿಯಾ.

೫. ಸಬ್ಬಗ್ಲಾ ಮ್ನಾ,’ದಿಗಲಹೂ, ಭ್ಯಾ’,ಮಜ್ಝ’ನ್ತ ಗರೂ ಜಸಾ;

ಮಜ್ಝ’ನ್ತಲಾ ರ,ತೇ’ತೇ’ಟ್ಠ, ಗಣಾ ಗೋ ಗರು,ಲೋ ಲಹು.

೬. ಭ,ಜ,ಸಾ ಸಬ್ಬಗ,ಲಹೂ, ಪಞ್ಚಿ’ಮೇ ಸಣ್ಠಿತಾ ಗಣಾ;

ಅರಿಯಾದಿಮ್ಹಿ ವಿಞ್ಞೇಯ್ಯಾ, ಗಣೋ ಇಧ ಚತು’ಕ್ಕಲೋ.

೭. ಸಂಯೋಗಾ’ದಿ ಚ, ದೀಘೋ ಚ, ನಿಗ್ಗಹೀತಪರೋ ಚ, ಯೋ;

ಗರು, ವಙ್ಕೋ, ಪಾದನ್ತೋ,ವಾ, ರಸ್ಸೋ’ಞ್ಞೋ ಮತ್ತಿಕೋ ಲು’ಜು.

೮. ಪರೇ ಪಾದಾದಿಸಂಯೋಗೇ, ಯೋ ಪುಬ್ಬೋ ಗರುಕ’ಕ್ಖರೋ;

ಲಹು ಸ ಕ್ವಚಿ ವಿಞ್ಞೇಯ್ಯೋ, ತದುದಾಹರಣಂ ಯಥಾ.

೯. ದಸ್ಸನರಸಾ’ನುಭಾವನೇ, ನಿಬದ್ಧಗೇಧಾ ಜಿನಸ್ಸ’ಯಂ ಜನತಾ;

ವಿಮ್ಹಯಜನನೀ ಸಞ್ಞತ, ಕ್ರಿಯಾ ನು ಕಂ ನಾ’ನುರಞ್ಜಯತಿ.

೧೦. ವಿಞ್ಞೇಯ್ಯಾ ಲೋಕತೋ ಸಞ್ಞಾ, ಸಮುದ್ದೋ,ಸು,ರಸಾದಿನಂ;

ಪಾದೋಞೇಯ್ಯೋ ಚತುತ್ಥಂ’ಸೋ, ಪದಚ್ಛೇದೋ ಯತೀ ಭವೇ.

೧೧. ಸಮ,ಮಡ್ಢಸಮಂ, ವುತ್ತಂ, ವಿಸಮಂ ಚಾ’ಪರಂ ತಿಧಾ;

ಸಮಾ ಲಕ್ಖಣತೋ ಪಾದಾ, ಚತ್ತಾರೋ ಯಸ್ಸ ತಂ ಸಮಂ.

೧೨. ಯಸ್ಸ’ನ್ತಿಮೇನ ದುತಿಯೋ, ತತಿಯೇನಾ’ದಿಮೋ ಸಮೋ;

ತ’ದಡ್ಢಸಮ, ಮಞ್ಞಂ ತು, ಭಿನ್ನ ಲಕ್ಖಣ ಪಾದಿಕಂ.

೧೩. ಪಾದ’ಮೇಕಕ್ಖರಾ’ರಬ್ಭ, ಯಾವ ಛಬ್ಬೀಸತ’ಕ್ಖರಾ;

ಭವೇ ಪಾದೇಹಿ ತಂ ಛನ್ದಂ, ನಾನಾನಾಮೋ’ದಿತಂ ತತೋ.

೧೪. ದಣ್ಡಕಾ ಚಣ್ಡವುಟ್ಠ್ಯಾ’ದಿ, ಪಾದೇಹಿ ಛಹಿ, ತೀಹಿ ತು;

‘ಗಾಥಾ’ತಿ ಚ ಪರತ್ಥೇ’ವಂ, ಛನ್ದೋ ಸಞ್ಞಾ ಪಕಾಸಿತಾ.

೧೫. ಅನನ್ತರೋ’ದಿತಂ ಚ’ಞ್ಞ, ಮೇತಂ ಸಾಮಞ್ಞ ನಾಮತೋ;

‘ಗಾಥಾ’ಇಚ್ಚೇವ ನಿದ್ದಿಟ್ಠಂ, ಮುನಿನ್ದವಚನೇ ಪನ.

೧೬. ವಿಸೇಸನಾಮತೋ ಕಿಞ್ಚಿ, ಗಹೇತ್ವಾ ಸಬ್ಬಥೋ’ಚಿತಂ;

ದಸ್ಸಯಿಸ್ಸಾಮ’ಹಂ ತೇ’ತ್ಥ, ನಾಮಾನಾ’ವಿ ಭವಿಸ್ಸರೇ.

ಇತಿ ವುತ್ತೋದಯೇ ಛನ್ದಸಿ ಸಞ್ಞಾಪರಿಭಾಸಾ ನಿದ್ದೇಸೋ ನಾಮ

ಪಠಮೋ ಪರಿಚ್ಛೇದೋ.