ಸೂರಸ್ಸತೀನೀತಿ

ದುತಿಯೋ ಭಾಗೋ

೧. ಧನಸ್ಸ ದುಬ್ಬಿಧಂ ಕಿಚ್ಚಂ,

ಪಾಪೇತಿ ಉಣ್ಣತಂ ಧನಿಂ;

ಅಧನಿಂ ಓಣತಂ ಲೋಕೇ,

ಸಞ್ಚಿನೇ ತೇನ ತಂ ಧನಂ.

೨. ವಟ್ಟತೇ ಸತತಂ ಸೀಘಂ,

ಕಾಲಚಕ್ಕಂ ಅವಾರಿತಂ;

ತೇನ ಘಟೀ ದಿನಂ ಮಾಸೋ,

ವಸ್ಸೋ ಭವತ್ಯ ಚೀರತೋ.

೩. ಸತ್ತುನಾ ನ ಹಿ ಸನ್ಧೇಯ್ಯ,

ಏಕದಾ ಸೋ ಭಯಂ ಕರೋ;

ಸುತತ್ತಮಪಿ ಪಾನೀಯಂ,

ಸಮಯತೇ ನು ಪಾವಕಂ.

೪. ವಿಜಹಂ ಪಕತಿಂ ಯೋ ಹಿ,

ವಿಕತಿಂ ಪುನ ಗಚ್ಛತಿ;

ಸಭಾವೇನ ಆಕಾರೇನ,

ವಿಪ್ಪಲ್ಲಾಸಂ ಸ ಗಚ್ಛತಿ;

ಸಂಸುಮಾರ ಗತಾ ಗೋಧಾ,

ಯಥಾ ಥೀ ಪುಮವೇಸಿಕಾ.

೫. ಪಕ್ಖಂ ಲದ್ಧಾನ ಉಡ್ಡೇನ್ತಿ,

ಉಪಚಿಕಾ ಹಿ ವಮ್ಮಿಕಾ;

ನಿಕ್ಖನ್ತಾ ಮರಣಂ ಯನ್ತಿ,

ಉಪ್ಪತಾ ನಿಪ್ಪತಂ ಗತಾ.

೬. ಸಬ್ಬಂಪಿಯಸ್ಸ ದಜ್ಜೇಯ್ಯ,

ನಿಸ್ಸೇಸಂ ಪಿಯಮಾನಸಂ;

ಸದ್ಧಾಚಿತ್ತಂ ತು ನೋ ವಿಞ್ಞೂ,

ಸದ್ಧಾಯಿಕೋ ಪಕ್ಖಲಿತೋ.

೭. ಸಕ್ಕೋತಿ ಲಙ್ಘಿತುಂ ಬ್ಯಾಮಂ,

ಮಹುಸ್ಸಾಹೇನ ಯೋ ಹಿ ಸೋ;

ತದಡ್ಢಂ ಅನುಸ್ಸಾಹೇನ,

ನೋಸ್ಸಾಹೋ ತೇಸು ಥೋಮಿತೋ;

ಮಹುಸ್ಸಾಹೋ ದುಕ್ಖೋ ಲೋಕೇ,

ಅನುಸ್ಸಾಹೋ ಸದಾ ಸುಖೋ.

೮. ದುಕ್ಖಮಂ ಅಕ್ಖಮನ್ತೋ ಯೋ,

ಪಿಟ್ಠಿಕಾರೀಚ ದುಕ್ಕರಂ,

ಕದಾ ಲಭೇಯ್ಯ ಸೋ ಲೋಕೇ,

ಸುಖಮಂ ಸುಕರಂ ಮುಧಾ;

ಪಚ್ಚಕ್ಖಞ್ಹಿ ಸೋ ಕರೇಯ್ಯ,

ದುಕ್ಖಮಞ್ಚಾಪಿ ದುಕ್ಕರಂ.

೯. ಅನಗ್ಘೋ ಮನುಸ್ಸೋ ಲೋಕೇ,

ತೋಸನಾಪೋಸನಾದಿನಾ;

ತೇನ ಸೋ ಮಹಗ್ಘಂ ಕಮ್ಮಂ,

ಕರೇ ಲೋಕಹಿತಾಯುತಂ.

೧೦. ವಾತೇನ ನಪ್ಪಭಿಜ್ಜನ್ತಿ,

ನಿನ್ನಾ ವೇಳೂ ಕಸಾ ನಳಾ;

ಯಥಾವಾತಂ ನಗಚ್ಛನ್ತಿ,

ತಥಾ ಚರೇ ಜನೇ ಕದಾ.

೧೧. ಪುರತೋ ಚ ಪಚ್ಛತೋ ಚೇ,

ನಿಸ್ಸಯೋ ನತ್ಥಿ ಪಸ್ಸತೋ;

ಅಧಿಕಂ ವೀರಿಯಂ ಹೋತಿ,

ಅತ್ತನಾಥೋ ತದಾ ಭವೇ.

೧೨. ಖಣಂ ಆಖುಬಿಲಂ ಸೀಹೋ,

ಪಾಸಾಣಸಕಲಾಕುಲಂ;

ಪಪ್ಪೋತಿ ನಖಭಙ್ಗಂವಾ,

ಫಲಂವಾ ಮೂಸಿಕೋ ಭವೇ.

೧೩. ಮಗ್ಗಮುಳ್ಹಾ ಜನಾ ಅನ್ಧಾ,

ಅಮಗ್ಗಾ ಮಗ್ಗಸಞ್ಞಿನೋ;

ತಥೇವ ದುಪ್ಪಞ್ಞಾ ಮುಳ್ಹಾ,

ತಥತ್ಥಂ ನಾವ ಬುಜ್ಝರೇ.

೧೪. ಪಿಯರೂಪಂ ವೀರರೂಪಂ,

ದುವಿಧಾ ರೂಪಸಮ್ಪದಾ,

ನಾರಿಂ ಇಚ್ಛೇ ಪಿಯರೂಪಿಂ,

ಪುರಿಸಂ ವೀರರೂಪಕಂ.

೧೫. ಪಜ್ಜಲನ್ತಿ ಹಿ ಖಜ್ಜೋತಾ,

ಪಕ್ಖಚಾಲನಕಮ್ಮುನಾ;

ಕುಸಿತಾ ಸುಪಿತಾ ನೇತೇ,

ತಥಾ ಜನಾಪಿ ಕಮ್ಮಿಕಾ.

೧೬. ಕುಮ್ಮಸಙ್ಕೋಚಮೋಪಮ್ಯ,

ನಿಗ್ಗಹಮಪಿ ಸಂಖಮೇ;

ಪತ್ತಕಾಲೇ ತು ನೀತಿಞ್ಞೋ,

ಕಣ್ಹಸಪ್ಪೋವ ಉಟ್ಠಹೇ.

೧೭. ಭಕ್ಖಸೇಸಂ ನಖಾದನ್ತಿ,

ಸೀಹಾ ಉನ್ನತಚೇತಸಾ;

ಪರಂಪಿ ನಪಣಾಮೇನ್ತಿ,

ವುದ್ಧಿಕಾಮಾ ತಥಾ ಚರೇ.

೧೮. ನ ವ ವಸ್ಸೋ ಸಮುಪ್ಪನ್ನೋ,

ಖೀಣೋ ಪುರಾಣಹಾಯನೋ;

ನವವಸ್ಸೇ ನವಾ ಮೇತ್ತಾ,

ಭಾವಿತಬ್ಬಾ ಹಿತೇಸಿನಾ.

೧೯. ಸನ್ತಾಪಯನ್ತಿ ಕಮಯಾಪ್ಯಭುಜಂ ನ ರೋಗಾ,

ದುಮ್ಮನ್ತಿನಂ ಕಮುಪಯನ್ತಿ ನ ನೀತಿದೋಸಾ;

ಕಂ ಸ್ರೀ ನ ಮಾನಯತಿ ಕಂ ನ ಚ ಹನ್ತಿ ಮಚ್ಚು,

ಕಂ ಥೀಕತಾ ನ ವಿಸಯಾ ಪರಿಪೀಳಯನ್ತಿ.

(ವಸನ್ತತಿಲಕಾಗಾಥಾ.)

೨೦. (ಕ) ಬ್ಯಾಮಮತ್ತೇನ ದಣ್ಡೇನ,

ಯೋಲುಮ್ಬ್ಯ ಉದಕಂ ಮಿನೇ;

ಅಗಮ್ಭೀರಂ ಗಮ್ಭೀರಂವಾ,

ಅಗಾಧೇ ಮಞ್ಞಿ ಗಮ್ಭೀರಂ.

(ಖ)

ತಥಾ ಮನ್ದೋ ಸಞ್ಞಾಣೇನ,

ಅಗಾಧೇ ಮಞ್ಞಿ ಪಣ್ಡಿತಂ;

ಸಮಾಸಮಂ ನ ಜಾನಾತಿ,

ಬಹ್ವಪ್ಪಂ ತಿಕ್ಖಮನ್ದತಂ.

೨೧. ದುಟ್ಠಕಮ್ಮೇ ಸಙ್ಗಮನ್ತಿ,

ಛೇಕಕಮ್ಮೇ ಚ ನೋ ಇಧ;

ಮಚ್ಚುಂ ವಹನ್ತಿ ಸೀಸೇನ,

ತೇ ಮುಳ್ಹಾ ಮುಳ್ಹಸಙ್ಗಮಾ.

೨೨. ದುವಿಧೋ ಸಙ್ಗಮೋ ಲೋಕೇ,

ಉಜುಕೋ ಕುಟಿಲೋ ಭವೇ;

ಉಜುಕೋವ ಪಸಂಸೇಯ್ಯೋ,

ನೋಹ್ಯಞ್ಞೋ ಸಾಜಸಙ್ಗಮೋ.

ತೇ ಇಮಿನಾ ಉಪಾಯೇನ ಸಮಗ್ಗಾ ಸಮ್ಮೋದಮಾನಾ ಮಹಾ ಭಿತ್ತಿಪಿಟ್ಠಿಕಾಯ ವಸನ್ತಿ. (ಮಹೋಸಧಜಾತಕ ಅಟ್ಠಕಥಾ)

೨೩. ಯೂಥಿಕಾ ಪುಪ್ಫತೇ ನೋಹಿ,

ಸಿಞ್ಚಿತಾಪಿ ಪುನಪ್ಪುನಂ;

ಪುಪ್ಫತೇ ಸಮ್ಪತ್ತೇ ಕಾಲೇ,

ಏವಂ ಧಾರೇಥ ವೀರಿಯಂ.

೨೪. ಧನುಚ್ಚಯೋ ಧನಕ್ಖೇಪೋ,

ದುವಿಧಾ ಹಿ ಧನಾಕತಿ;

ಧನುಚ್ಚಯೇ ನಯೋ ಅತ್ಥಿ,

ಧನಕ್ಖೇಪಮ್ಹಿ ನೋ ಇಧ.

೨೫. ಅಮಾತಾ ಪಿತರಸಂ ವಡ್ಢಂ,

ಜೂತಕಾರಞ್ಚ ಚಞ್ಚಲಂ;

ನಾಲಪೇಯ್ಯ ವಿಸೇಸಞ್ಞೂ,

ಯದಿಚ್ಛೇ ಸಿದ್ಧಿ ಮತ್ತನೋ.

ಹಲಿದ್ದಿರಾಗಂ ಕಪಿಚಿತ್ತಂ,

ಪುರಿಸಂ ರಾಗವಿರಾಗಿನಂ;

ಏದಿಸಂ ತಾತ ಮಾಸೇವಿ,

ನಿಮ್ಮನುಸ್ಸಂಪಿ ಚೇ ಸಿಯಾ.

೨೬. ಗುಣಾ ಗುಣಞ್ಞೂಸು ಗುಣಾ ಭವನ್ತಿ,

ತೇ ನಿಗ್ಗುಣಂ ಪತ್ವಾ ಭವನ್ತಿ ದೋಸಾ;

ಆಸಾದ್ಯತೋಯಾ ಪಭವನ್ತಿ ನಜ್ಜೋ,

ಸಮುದ್ರಮಾಸಜ್ಜ ಭವನ್ತ್ಯಪೇಯ್ಯಾ.

(ಉಪಜಾತಿಗಾಥಾ)

೨೭. ಸಿಲಾರೂಪಂ ನಿಮ್ಮಿನನ್ತಿ,

ಕೋಟ್ಟೇತ್ವಾನ ಪುನಪ್ಪುನಂ;

ಕೋಟ್ಟಕೋವ ತಥಾ ಬಾಲಾ,

ಸಾಧುಂ ಓವಜ್ಜ ನಿಮ್ಮಿತಾ.