೪. ಅತ್ಥಾಲಙ್ಕಾರಾವಬೋಧ-ಚತುತ್ಥಪರಿಚ್ಛೇದ

೧೬೪. ಅತ್ಥಾಲಙ್ಕಾರಸಹಿತಾ, ಸಗುಣಾ ಬನ್ಧಪದ್ಧತಿ;

ಅಚ್ಚನ್ತಕನ್ತಾ ಕನ್ತಾ [ಯತೋ ಅಚ್ಚನ್ತಕನ್ತಾ (ಕ.)] ವ ವುಚ್ಚನ್ತೇ ತೇ ತತೋ’ಧುನಾ.

೧೬೫. ಸಭಾವ, ವಙ್ಕವುತ್ತೀನಂ, ಭೇದಾ ದ್ವಿಧಾ ಅಲಂಕ್ರಿಯಾ;

ಪಠಮಾ ತತ್ಥ ವತ್ಥೂನಂ, ನಾನಾವತ್ಥಾ’ವಿಭಾವಿನೀ.

ಯಥಾ

೧೬೬. ಲೀಲಾ ವಿಕನ್ತಿ ಸುಭಗೋ, ದಿಸಾ ಥಿರ ವಿಲೋಕನೋ;

ಬೋಧಿಸತ್ತಙ್ಕುರೋ ಭಾಸಂ, ವಿರೋಚಿ ವಾಚ ಮಾಸಭಿಂ.

೧೬೭. ವುತ್ತಿ ವತ್ಥುಸಭಾವಸ್ಸ, ಯಾ’ಞ್ಞಥಾ ಸಾ’ಪರಾ ಭವೇ;

ತಸ್ಸಾ’ನನ್ತವಿಕಪ್ಪತ್ತಾ, ಹೋತಿ ಬೀಜೋ’ಪದಸ್ಸನಂ.

ವಙ್ಕವುತ್ತಿ ಅತ್ಥಾಲಙ್ಕಾರ

ಉದ್ದೇಸ

೧೬೮. ತತ್ಥಾ’ತಿಸಯ, ಉಪಮಾ, ರೂಪಕಾ, ವುತ್ತಿ, ದೀಪಕಂ,;

ಅಕ್ಖೇಪೋ, ತ್ಥನ್ತರನ್ಯಾಸೋ, ಬ್ಯತಿರೇಕೋ, ವಿಭಾವನಾ.

೧೬೯. ಹೇತು, ಕ್ಕಮೋ, ಪಿಯತರಂ, ಸಮಾಸ, ಪರಿಕಪ್ಪನಾ;

ಸಮಾಹಿತಂ, ಪರಿಯಾಯ, ವುತ್ತಿ, ಬ್ಯಾಜೋಪವಣ್ಣನಂ.

೧೭೦. ವಿಸೇಸ, ರುಳ್ಹಾಹಙ್ಕಾರಾ, ಸಿಲೇಸೋ, ತುಲ್ಯಯೋಗಿತಾ;

ನಿದಸ್ಸನಂ, ಮಹನ್ತತ್ತಂ, ವಞ್ಚನಾ, ಪ್ಪಕತತ್ಥುತಿ,.

೧೭೧. ಏಕಾವಲಿ, ಅಞ್ಞಮಞ್ಞಂ, ಸಹವುತ್ತಿ, ವಿರೋಧಿತಾ;

ಪರಿವುತ್ತಿ, ಬ್ಭಮೋ, ಭಾವೋ, ಮಿಸ್ಸ, ಮಾಸೀ, ರಸೀ, ಇತಿ.

೧೭೨. ಏತೇ ಭೇದಾ ಸಮುದ್ದಿಟ್ಠಾ, ಭಾವೋ ಜೀವಿತ ಮುಚ್ಚತೇ;

ವಙ್ಕವುತ್ತೀಸು ಪೋಸೇಸಿ, ಸಿಲೇಸೋ ತು ಸಿರಿಂ ಪರಂ.

ನಿದ್ದೇಸ

೧೭೩. ಪಕಾಸಕಾ ವಿಸೇಸಸ್ಸ, ಸಿಯಾ’ತಿಸಯವುತ್ತಿ ಯಾ;

ಲೋಕಾ’ತಿಕ್ಕನ್ತವಿಸಯಾ, ಲೋಕಿಯಾ,ತಿ ಚ ಸಾ ದ್ವಿಧಾ.

೧೭೪. ಲೋಕಿಯಾತಿಸಯಸ್ಸೇ’ತೇ,

ಭೇದಾ ಯೇ ಜಾತಿಆದಯೋ;

ಪಟಿಪಾದೀಯತೇ ತ್ವ’ಜ್ಜ, ಲೋಕಾತಿಕ್ಕನ್ತಗೋಚರಾ.

೧೭೫. ಪಿವನ್ತಿ ದೇಹಕನ್ತೀ ಯೇ, ನೇತ್ತಞ್ಜಲಿಪುಟೇನ ತೇ;

ನಾ’ಲಂ ಹನ್ತುಂ ಜಿನೇ’ಸಂ ತ್ವಂ, ತಣ್ಹಂ ತಣ್ಹಾಹರೋಪಿ ಕಿಂ?

೧೭೬. ಉಪಮಾನೋ’ಪಮೇಯ್ಯಾನಂ, ಸಧಮ್ಮತ್ತಂ ಸಿಯೋ’ಪಮಾ;

ಸದ್ದ, ತ್ಥಗಮ್ಮಾ, ವಾಕ್ಯತ್ಥ, ವಿಸಯಾ,ತಿ ಚ ಸಾ ಭಿಧಾ.

೧೭೭. ಸಮಾಸ, ಪಚ್ಚಯೇ, ವಾ’ದೀ, ಸದ್ದಾ ತೇಸಂ ವಸಾ ತಿಧಾ;

ಸದ್ದಗಮ್ಮಾ ಸಮಾಸೇನ, ಮುನಿನ್ದೋ ಚನ್ದಿಮಾ’ನನೋ.

೧೭೮. ಆಯಾದೀ ಪಚ್ಚಯಾ ತೇಹಿ, ವದನಂ ಪಙ್ಕಜಾಯತೇ;

ಮುನಿನ್ದನಯನ ದ್ವನ್ದಂ, ನೀಲುಪ್ಪಲದಲೀಯತಿ.

೧೭೯. ಇವಾದೀ ಇವ, ವಾ, ತುಲ್ಯ, ಸಮಾನ, ನಿಭ, ಸನ್ನಿಭಾ;

ಯಥಾ, ಸಙ್ಕಾಸ, ತುಲಿತ, ಪ್ಪಕಾಸ, ಪತಿರೂಪಕಾ.

೧೮೦. ಸರೀ, ಸರಿಕ್ಖ, ಸಂವಾದೀ, ವಿರೋಧಿ, ಸದಿಸಾ, ವಿಯ;

ಪಟಿಪಕ್ಖ, ಪಚ್ಚನೀಕಾ, ಸಪಕ್ಖೋ, ಪಮಿತೋ, ಪಮಾ.

೧೮೧. ಪಟಿಬಿಮ್ಬ, ಪಟಿಚ್ಛನ್ನ, ಸರೂಪ, ಸಮ, ಸಮಿತಾ;

ಸವಣ್ಣಾ, ಭಾ, ಪಟಿನಿಧಿ, ಸಧಮ್ಮಾ, ದಿ ಸಲಕ್ಖಣಾ.

೧೮೨. ಜಯತ್ಯ, ಕ್ಕೋಸತಿ, ಹಸತಿ, ಪತಿಗಜ್ಜತಿ, ದೂಭತಿ;

ಉಸೂಯತ್ಯ, ವಜಾನಾತಿ, ನಿನ್ದತಿ, ಸ್ಸತಿ, ರುನ್ಧತಿ.

೧೮೩. ತಸ್ಸ ಚೋರೇತಿ ಸೋಭಗ್ಗಂ, ತಸ್ಸ ಕನ್ತಿಂ ವಿಲುಮ್ಪತಿ;

ತೇನ ಸದ್ಧಿಂ ವಿವದತಿ, ತುಲ್ಯಂ ತೇನಾ’ಧಿರೋಹತಿ.

೧೮೪. ಕಚ್ಛಂ ವಿಗಾಹತೇ, ತಸ್ಸ, ತ ಮನ್ವೇತ್ಯ, ನುಬನ್ಧತಿ;

ತಂಸೀಲಂ, ತಂನಿಸೇಧೇತಿ, ತಸ್ಸ ಚಾ’ನುಕರೋತಿ, ಮೇ.

೧೮೫. ಉಪಮಾನೋ’ಪಮೇಯ್ಯಾನಂ, ಸಧಮ್ಮತ್ತಂ ವಿಭಾವಿಭಿ;

ಇಮೇಹಿ ಉಪಮಾಭೇದಾ, ಕೇಚಿ ನಿಯ್ಯನ್ತಿ ಸಮ್ಪತಿ.

೧೮೬. ವಿಕಾಸಿಪದುಮಂ’ವಾ’ತಿ, ಸುನ್ದರಂ ಸುಗತಾ’ನನಂ;

ಇತಿ ಧಮ್ಮೋಪಮಾ ನಾಮ, ತುಲ್ಯಧಮ್ಮನಿದಸ್ಸನಾ.

೧೮೭. ಧಮ್ಮಹೀನಾ ‘‘ಮುಖ’ಮ್ಭೋಜ, ಸದಿಸಂ ಮುನಿನೋ’’ಇತಿ;

ವಿಪರೀತೋ’ಪಮಾ ‘‘ತುಲ್ಯ, ಮಾನನೇನ’ಮ್ಬುಜಂ ತವ’’.

೧೮೮. ತವಾ’ನನ’ಮಿವ’ಮ್ಭೋಜಂ, ಅಮ್ಭೋಜ’ಮಿವ ತೇ ಮುಖಂ;

ಅಞ್ಞಮಞ್ಞೋಪಮಾ ಸಾ’ಯಂ, ಅಞ್ಞಮಞ್ಞೋಪಮಾನತೋ.

೧೮೯. ‘‘ಯದಿ ಕಿಞ್ಚಿ ಭವೇ’ಮ್ಭೋಜಂ, ಲೋಚನ’ಬ್ಭಮುವಿಬ್ಭಮಂ;

ಧಾರೇತುಂ ಮುಖಸೋಭಂ ತಂ, ತವೇ’’ತಿ ಅಬ್ಭುತೋಪಮಾ.

೧೯೦. ‘‘ಸುಗನ್ಧಿ ಸೋಭಾ ಸಮ್ಬನ್ಧೀ, ಸಿಸಿರಂ’ಸು ವಿರೋಧಿ ಚ;

ಮುಖಂ ತವ’ಮ್ಬುಜಂವೇ’ತಿ’’, ಸಾ ಸಿಲೇಸೋಪಮಾ ಮತಾ.

೧೯೧. ಸರೂಪಸದ್ದವಾಚ್ಚತ್ತಾ, ಸಾ ಸನ್ತಾನೋಪಮಾ ಯಥಾ;

ಬಾಲಾ’ವು’ಯ್ಯಾನಮಾಲಾ’ಯಂ, ಸಾ’ಲಕಾ’ನನಸೋಭಿನೀ.

೧೯೨. ಖಯೀ ಚನ್ದೋ, ಬಹುರಜಂ, ಪದುಮಂ, ತೇಹಿ ತೇ ಮುಖಂ;

ಸಮಾನಮ್ಪಿ ಸಮುಕ್ಕಂಸಿ, ತ್ಯ’ಯಂ ನಿನ್ದೋಪಮಾ ಮತಾ.

೧೯೩. ಅಸಮತ್ಥೋ ಮುಖೇನಿ’ನ್ದು, ಜಿನ! ತೇ ಪಟಿಗಜ್ಜಿತುಂ;

ಜಳೋ ಕಲಙ್ಕೀ’ತಿ ಅಯಂ, ಪಟಿಸೇಧೋಪಮಾ ಸಿಯಾ.

೧೯೪. ‘‘ಕಚ್ಛಂ ಚನ್ದಾರವಿನ್ದಾನಂ, ಅತಿಕ್ಕಮ್ಮ ಮುಖಂ ತವ;

ಅತ್ತನಾ’ವ ಸಮಂ ಜಾತ’’, ಮಿತ್ಯ’ಸಾಧಾರಣೋಪಮಾ.

೧೯೫. ‘‘ಸಬ್ಬ’ಮ್ಭೋಜ’ಪ್ಪಭಾಸಾರೋ, ರಾಸಿಭೂತೋ’ವ ಕತ್ಥಚಿ;

ತವಾ’ನನಂ ವಿಭಾತೀ’’ತಿ, ಹೋತಾ’ಭೂತೋಪಮಾ ಅಯಂ.

೧೯೬. ಪತೀಯತೇ’ತ್ಥಗಮ್ಮಾ ತು, ಸದ್ದಸಾಮತ್ಥಿಯಾ ಕ್ವಚಿ;

ಸಮಾಸ, ಪ್ಪಚ್ಚಯೇ, ವಾದಿ, ಸದ್ದಯೋಗಂ ವಿನಾ ಅಪಿ.

೧೯೭. ಭಿಙ್ಗಾನೇ’ಮಾನಿ ಚಕ್ಖೂನಿ, ನಾ’ಮ್ಬುಜಂ ಮುಖ’ಮೇವಿ’ದಂ;

ಸುಬ್ಯತ್ತಸದಿಸತ್ತೇನ, ಸಾ ಸರೂಪೋಪಮಾ ಮತಾ.

೧೯೮. ‘‘ಮಯೇ’ವ ಮುಖಸೋಭಾ’ಸ್ಸೇ, ತ್ಯಲ’ಮಿನ್ದು! ವಿಕತ್ಥನಾ;

ಯತೋ’ಮ್ಬುಜೇಪಿ ಸಾ’ತ್ಥೀತಿ’’, ಪರಿಕಪ್ಪೋಪಮಾ ಅಯಂ.

೧೯೯. ‘‘ಕಿಂ ವಾ’ಮ್ಬುಜ’ನ್ತೋಭನ್ತಾಲಿ, ಕಿಂ ಲೋಲನಯನಂ ಮುಖಂ;

ಮಮ ದೋಲಾಯತೇ ಚಿತ್ತ’’, ಮಿಚ್ಚ’ಯಂ ಸಂಸಯೋಪಮಾ.

೨೦೦. ಕಿಞ್ಚಿ ವತ್ಥುಂ ಪದಸ್ಸೇತ್ವಾ, ಸಧಮ್ಮಸ್ಸಾ’ಭಿಧಾನತೋ;

ಸಾಮ್ಯಪ್ಪತೀತಿಸಬ್ಭಾವಾ, ಪತಿವತ್ಥುಪಮಾ ಯಥಾ.

೨೦೧. ಜನೇಸು ಜಾಯಮಾನೇಸು, ನೇ’ಕೋಪಿ ಜಿನಸಾದಿಸೋ;

ದುತಿಯೋ ನನು ನತ್ಥೇ’ವ, ಪಾರಿಜಾತಸ್ಸ ಪಾದಪೋ.

೨೦೨. ವಾಕ್ಯತ್ಥೇನೇ’ವ ವಾಕ್ಯತ್ಥೋ, ಯದಿ ಕೋಚೂ’ಪಮೀಯತೇ;

ಇವಯುತ್ತಾ, ವಿಯುತ್ತತ್ತಾ, ಸಾ ವಾಕ್ಯತ್ಥೋಪಮಾ ದ್ವಿಧಾ.

ಇವಯುತ್ತಾ

೨೦೩. ಜಿನೋ ಸಂಕ್ಲೇಸತತ್ತಾನಂ, ಆವಿಭೂತೋ ಜನಾನ’ಯಂ;

ಘಮ್ಮಸನ್ತಾಪತತ್ತಾನಂ, ಘಮ್ಮಕಾಲೇ’ಮ್ಬುದೋ ವಿಯ.

ಇವವಿಯುತ್ತಾ

೨೦೪. ಮುನಿನ್ದಾನನ ಮಾಭಾತಿ, ವಿಲಾಸೇಕಮನೋಹರಂ;

ಉದ್ಧಂ ಸಮುಗ್ಗತಸ್ಸಾ’ಪಿ, ಕಿಂ ತೇ ಚನ್ದ ವಿಜಮ್ಭನಾ.

೨೦೫. ಸಮುಬ್ಬೇಜೇತಿ ಧೀಮನ್ತಂ, ಭಿನ್ನಲಿಙ್ಗಾದಿಕಂ ತು ಯಂ;

ಉಪಮಾದೂಸನಾಯಾ’ಲ, ಮೇತಂ ಕತ್ಥಚಿ ತಂ ಯಥಾ.

೨೦೬. ಹಂಸೀ’ವಾ’ಯಂ ಸಸೀ ಭಿನ್ನ, ಲಿಙ್ಗಾ, ಕಾಸಂ ಸರಾನಿ’ವ;

ವಿಜಾತಿ ವಚನಾ, ಹೀನಾ, ಸಾ’ವ ಭತ್ತೋ ಭಟೋ’ಧಿಪೇ.

೨೦೭. ‘‘ಖಜ್ಜೋತೋ ಭಾಣುಮಾಲೀ’ವ, ವಿಭಾತಿ’’ತ್ಯಧಿಕೋಪಮಾ;

ಅಫುಟ್ಠತ್ಥಾ ‘‘ಬಲಮ್ಬೋಧಿ, ಸಾಗರೋ ವಿಯ ಸಂಖುಭಿ.’’

೨೦೮. ‘‘ಚನ್ದೇ ಕಲಙ್ಕೋ ಭಿಙ್ಗೋ’ವೇ’, ತ್ಯು’ಪಮಾಪೇಕ್ಖಿನೀ ಅಯಂ;

ಖಣ್ಡಿತಾ ಕೇರವಾ’ಕಾರೋ, ಸಕಲಙ್ಕೋ ನಿಸಾಕರೋ.

೨೦೯. ಇಚ್ಚೇವಮಾದಿರೂಪೇಸು, ಭವನ್ತಿ ವಿಗತಾ’ದರಾ;

ಕರೋನ್ತಿ ಚಾ’ದರಂ ಧೀರಾ, ಪಯೋಗೇ ಕ್ವಚಿ ದೇ’ವ ತು.

೨೧೦. ಇತ್ಥೀಯಂ’ವಾ’ಜನೋ ಯಾತಿ, ವದತ್ಯೇ’ಸಾ ಪುಮಾ ವಿಯ;

ಪಿಯೋ ಪಾಣಾ ಇವಾ’ಯಂ ಮೇ, ವಿಜ್ಜಾ ಧನ’ಮಿವ’ಚ್ಚಿತಾ.

೨೧೧. ಭವಂ ವಿಯ ಮಹೀಪಾಲ, ದೇವರಾಜಾ ವಿರೋಚತೇ;

ಅಲ’ಮಂಸುಮತೋ ಕಚ್ಛಂ, ತೇಜಸಾ ರೋಹಿತುಂ ಅಯಂ.

೨೧೨. ಉಪಮಾನೋ’ಪಮೇಯ್ಯಾನಂ, ಅಭೇದಸ್ಸ ನಿರೂಪನಾ;

ಉಪಮಾ’ವ ತಿರೋಭೂತ, ಭೇದಾ ರೂಪಕ ಮುಚ್ಚತೇ.

೨೧೩. ಅಸೇಸ ವತ್ಥು ವಿಸಯಂ, ಏಕದೇಸ ವಿವುತ್ತಿ [ವಿವತ್ತಿ (ಟೀಕಾ)], ಚ;

ತಂ ದ್ವಿಧಾ ಪುನ ಪಚ್ಚೇಕಂ, ಸಮಾಸಾದಿವಸಾ ತಿಧಾ.

ಅಸೇಸವತ್ಥುವಿಸಯಸಮಾಸ

೨೧೪. ಅಙ್ಗುಲಿದಲ ಸಂಸೋಭಿಂ, ನಖದೀಧಿತಿ ಕೇಸರಂ;

ಸಿರಸಾ ನ ಪಿಲನ್ಧನ್ತಿ, ಕೇ ಮುನಿನ್ದ ಪದ’ಮ್ಬುಜಂ.

ಅಸೇಸವತ್ಥುವಿಸಯಅಸಮಾಸ

೨೧೫. ರತನಾನಿ ಗುಣಾ ಭೂರೀ, ಕರುಣಾ ಸೀತಲಂ ಜಲಂ;

ಗಮ್ಭೀರತ್ತ ಮಗಾಧತ್ತಂ, ಪಚ್ಚಕ್ಖೋ’ಯಂ ಜಿನೋ’ಮ್ಬುಧಿ.

ಅಸೇಸವತ್ಥುವಿಸಯಮಿಸ್ಸಕ

೨೧೬. ಚನ್ದಿಕಾ ಮನ್ದಹಾಸಾ ತೇ, ಮುನಿನ್ದ! ವದನಿ’ನ್ದುನೋ;

ಪಬೋಧಯತ್ಯ’ಯಂ ಸಾಧು, ಮನೋ ಕುಮುದ ಕಾನನಂ.

೨೧೭. ಅಸೇಸವತ್ಥುವಿಸಯೇ, ಪಭೇದೋ ರೂಪಕೇ ಅಯಂ;

ಏಕದೇಸವಿವುತ್ತಿಮ್ಹಿ, ಭೇದೋ ದಾನಿ ಪವುಚ್ಚತಿ.

ಏಕದೇಸವಿವುತ್ತಿಸಮಾಸ

೨೧೮. ವಿಲಾಸ ಹಾಸ ಕುಸುಮಂ, ರುಚಿರಾ’ಧರ ಪಲ್ಲವಂ;

ಸುಖಂ ಕೇ ವಾ ನ ವಿನ್ದನ್ತಿ, ಪಸ್ಸನ್ತಾ ಮುನಿನೋ ಮುಖಂ.

ಏಕದೇಸವಿವುತ್ತಿಅಸಮಾಸ

೨೧೯. ಪಾದದ್ವನ್ದಂ ಮುನಿನ್ದಸ್ಸ, ದದಾತು ವಿಜಯಂ ತವ;

ನಖರಂಸೀ ಪರಂ ಕನ್ತಾ, ಯಸ್ಸ ಪಾಪಜಯದ್ಧಜಾ.

ಏಕದೇಸವಿವುತ್ತಿಮಿಸ್ಸಕ

೨೨೦. ಸುನಿಮ್ಮಲಕಪೋಲಸ್ಸ, ಮುನಿನ್ದ ವದನಿ’ನ್ದುನೋ;

ಸಾಧು’ಪ್ಪಬುದ್ಧ ಹದಯಂ, ಜಾತಂ ಕೇರವ ಕಾನನಂ.

೨೨೧. ರೂಪಕಾನಿ ಬಹೂನ್ಯೇ’ವ [ಟೀಕಾಯಂ ಉದ್ಧಟಂ ಯುತ್ತರೂಪಕಂ ಸಿತಪುಪ್ಫುಜಲಂ ಲೋಲ, ನೇತ್ತಭಿಙ್ಗ ತವಾ’ನನಂ; ಕಸ್ಸ ನಾಮ ಮನೋ ಧೀರ, ನಾಕಡ್ಢತಿ ಮನೋಹರಂ;], ಯುತ್ತಾ, ಯುತ್ತಾದಿಭೇದತೋ;

ವಿಸುಂ ನ ತಾನಿ ವುತ್ತಾನಿ, ಏತ್ಥೇ’ವ’ನ್ತೋಗಧಾನಿ’ತಿ.

೨೨೨. ‘‘ಚನ್ದಿಮಾ’ಕಾಸಪದುಮ’’, ಮಿಚ್ಚೇತಂ ಖಣ್ಡರೂಪಕಂ;

ದುಟ್ಠ, ‘‘ಮಮ್ಬೋರುಹವನಂ, ನೇತ್ತಾನಿ’ಚ್ಚಾ’’ದಿ ಸುನ್ದರಂ.

೨೨೩. ಪರಿಯನ್ತೋ ವಿಕಪ್ಪಾನಂ, ರೂಪಕಸ್ಸೋ’ಪಮಾಯ ಚ;

ನತ್ಥಿ ಯಂ ತೇನ ವಿಞ್ಞೇಯ್ಯಂ, ಅವುತ್ತ ಮನುಮಾನತೋ.

೨೨೪. ಪುನಪ್ಪುನ ಮುಚ್ಚಾರಣಂ [ಪುನಪ್ಪುನುಚ್ಚಾರಣಂ ಯಂ (ಸೀ. ಕ.)], ಯಮತ್ಥಸ್ಸ, ಪದಸ್ಸ ಚ;

ಉಭಯೇಸಞ್ಚ ವಿಞ್ಞೇಯ್ಯಾ, ಸಾ’ಯ’ಮಾವುತ್ತಿ ನಾಮತೋ.

ಅತ್ಥಾವುತ್ತಿ

೨೨೫. ಮನೋ ಹರತಿ ಸಬ್ಬೇಸಂ, ಆದದಾತಿ ದಿಸಾ ದಸ;

ಗಣ್ಹಾತಿ ನಿಮ್ಮಲತ್ತಞ್ಚ, ಯಸೋರಾಸಿ ಜಿನಸ್ಸ’ಯಂ.

ಪದಾವುತ್ತಿ

೨೨೬. ವಿಭಾಸೇನ್ತಿ ದಿಸಾ ಸಬ್ಬಾ, ಮುನಿನೋ ದೇಹಕನ್ತಿಯೋ;

ವಿಭಾ ಸೇನ್ತಿ ಚ ಸಬ್ಬಾಪಿ, ಚನ್ದಾದೀನಂ ಹತಾ ವಿಯ.

ಉಭಯಾವುತ್ತಿ

೨೨೭. ಜಿತ್ವಾ ವಿಹರತಿ ಕ್ಲೇಸ, ರಿಪುಂ ಲೋಕೇ ಜಿನೋ ಅಯಂ;

ವಿಹರತ್ಯ’ರಿವಗ್ಗೋ’ಯಂ, ರಾಸಿಭೂತೋ’ವ ದುಜ್ಜನೇ.

೨೨೮. ಏಕತ್ಥ ವತ್ತಮಾನಮ್ಪಿ, ಸಬ್ಬವಾಕ್ಯೋ’ಪಕಾರಕಂ;

ದೀಪಕಂ ನಾಮ ತಂ ಚಾದಿ, ಮಜ್ಝ, ನ್ತವಿಸಯಂ ತಿಧಾ.

ಆದಿ ದೀಪಕ

೨೨೯. ಅಕಾಸಿ ಬುದ್ಧೋ ವೇನೇಯ್ಯ, ಬನ್ಧೂನ ಮಮಿತೋ’ದಯಂ;

ಸಬ್ಬಪಾಪೇಹಿ ಚ ಸಮಂ, ನೇಕತಿತ್ಥಿಯಮದ್ದನಂ.