೧. ದೋಸಾವಬೋಧ-ಪಠಮಪರಿಚ್ಛೇದ

ರತನತ್ತಯಪ್ಪಣಾಮ

೧. ಮುನಿನ್ದವದನಮ್ಭೋಜ, ಗಬ್ಭಸಮ್ಭವಸುನ್ದರೀ;

ಸರಣಂ ಪಾಣಿನಂ ವಾಣೀ, ಮಯ್ಹಂ ಪೀಣಯತಂ ಮನಂ.

ನಿಮಿತ್ತ

೨. ರಾಮ, ಸಮ್ಮಾ’ದ್ಯ’ಲಙ್ಕಾರಾ, ಸನ್ತಿ ಸನ್ತೋ ಪುರಾತನಾ;

ತಥಾಪಿ ತು ವಳಞ್ಜೇನ್ತಿ, ಸುದ್ಧಮಾಗಧಿಕಾ ನ ತೇ.

ಅಭಿಧಾನಾದಿಕಂ

೩. ತೇನಾ’ಪಿ ನಾಮ ತೋಸೇಯ್ಯ, ಮೇತೇ ಲಙ್ಕಾರವಜ್ಜಿತೇ;

ಅನುರೂಪೇನಾ’ಲಙ್ಕಾರೇ, ನೇ’ಸ ಮೇಸೋ ಪರಿಸ್ಸಮೋ.

೪. ಯೇಸಂ ನ ಸಞ್ಚಿತಾ ಪಞ್ಞಾ, ನೇಕಸತ್ಥನ್ತರೋ’ಚಿತಾ;

ಸಮ್ಮೋಹ’ಬ್ಭಾಹತಾ ವೇ’ತೇ, ನಾವಬುಜ್ಝನ್ತಿ ಕಿಞ್ಚಿಪಿ.

೫. ಕಿಂ ತೇಹಿ ಪಾದಸುಸ್ಸೂಸಾ, ಯೇಸಂ ನತ್ಥಿ ಗರೂನಿ’ಹ;

ಯೇ ತಪ್ಪಾದರಜೋಕಿಣ್ಣಾ, ತೇ’ವ ಸಾಧೂ ವಿವೇಕಿನೋ.

೬. ಕಬ್ಬ, ನಾಟಕನಿಕ್ಖಿತ್ತ, ನೇತ್ತಚಿತ್ತಾ ಕವಿಜ್ಜನಾ;

ಯಂಕಿಞ್ಚಿ ರಚಯನ್ತೇ’ತಂ, ನ ವಿಮ್ಹಯಕರಂ ಪರಂ.

೭. ತೇಯೇ’ವ ಪಟಿಭಾವೇನ್ತೋ, ಸೋ’ವ ಬನ್ಧೋ ಸವಿಮ್ಹಯೋ;

ಯೇನ ತೋಸೇನ್ತಿ ವಿಞ್ಞೂ ಯೇ, ತತ್ಥ ಪ್ಯ’ವಿಹಿತಾ’ದರಾ.

೮. ಬನ್ಧೋ ಚ ನಾಮ ಸದ್ದ,ತ್ಥಾ, ಸಹಿತಾ ದೋಸವಜ್ಜಿತಾ;

ಪಜ್ಜ ಗಜ್ಜ ವಿಮಿಸ್ಸಾನಂ, ಭೇದೇನಾ’ಯಂ ತಿಧಾ ಭವೇ.

೯. ನಿಬನ್ಧೋ ಚಾ’ನಿಬನ್ಧೋ ಚ, ಪುನ ದ್ವಿಧಾ ನಿರುಪ್ಪತೇ;

ತಂ ತು ಪಾಪೇನ್ತ್ಯ’ಲಙ್ಕಾರಾ, ವಿನ್ದನೀಯತರತ್ತನಂ.

೧೦. ಅನವಜ್ಜಂ ಮುಖಮ್ಭೋಜ [‘‘ಅಮ್ಭೋಜ’’ನ್ತಿ ಪದಂ ಪಾಳಿಯಂ ನತ್ಥಿ, ವಾರಿಜವಾಚಕಂ, ಸಕ್ಕಟಗನ್ಥತೋ ಅನೀತಂ], ಮನವಜ್ಜಾ ಚ ಭಾರತೀ;

ಅಲಙ್ಕತಾ’ವ ಸೋಭನ್ತೇ, ಕಿಂ ನು ತೇ ನಿರ’ಲಙ್ಕತಾ?

೧೧. ವಿನಾ ಗರೂಪದೇಸಂ ತಂ, ಬಾಲೋ’ಲಙ್ಕತ್ತು ಮಿಚ್ಛತಿ;

ಸಮ್ಪಾಪುಣೇ ನ ವಿಞ್ಞೂಹಿ, ಹಸ್ಸಭಾವಂ ಕಥಂ ನು ಸೋ?

೧೨. ಗನ್ಥೋಪಿ ಕವಿವಾಚಾನ, ಮಲಙ್ಕಾರ’ಪ್ಪಕಾಸಕೋ;

ಯಾತಿ ತಬ್ಬಚನೀಯತ್ತಂ, ತ’ಬ್ಬೋಹಾರೂ’ಪಚಾರತೋ.

೧೩. ದ್ವಿಪ್ಪಕಾರಾ ಅಲಙ್ಕಾರಾ, ತತ್ಥ ಸದ್ದ, ತ್ಥಭೇದತೋ;

ಸದ್ದತ್ಥಾ ಬನ್ಧನಾಮಾ’ವ, ತಂಸಜ್ಜಿತ ತದಾವಲಿ.

೧೪. ಗುಣಾಲಙ್ಕಾರಸಂಯುತ್ತಾ, ಅಪಿ ದೋಸಲವ’ಙ್ಕಿತಾ;

ಪಸಂಸಿಯಾ ನ ವಿಞ್ಞೂಹಿ, ಸಾ ಕಞ್ಞಾ ವಿಯ ತಾದಿಸೀ.

೧೫. ತೇನ ದೋಸನಿರಾಸೋ’ವ, ಮಹುಸ್ಸಾಹೇನ ಸಾಧಿಯೋ;

ನಿದ್ದೋಸಾ ಸಬ್ಬಥಾ ಸಾ’ಯಂ, ಸಗುಣಾ ನ ಭವೇಯ್ಯ ಕಿಂ?

೧೬. ಸಾ’ಲಙ್ಕಾರವಿಯುತ್ತಾ’ಪಿ, ಗುಣಯುತ್ತಾ ಮನೋಹರಾ;

ನಿದ್ದೋಸಾ ದೋಸರಹಿತಾ, ಗುಣಯುತ್ತಾ ವಧೂ ವಿಯ.

೧೭. ಪದೇ ವಾಕ್ಯೇ ತದತ್ಥೇ ಚ, ದೋಸಾ ಯೇ ವಿವಿಧಾ ಮತಾ;

ಸೋ’ದಾಹರಣ ಮೇತೇಸಂ, ಲಕ್ಖಣಂ ಕಥಯಾಮ್ಯ’ಹಂ.

ಪದದೋಸ ಉದ್ದೇಸ

೧೮. ವಿರುದ್ಧತ್ಥನ್ತರಾ, ಝತ್ಥ, ಕಿಲಿಟ್ಠಾನಿ, ವಿರೋಧಿ ಚ;

ನೇಯ್ಯಂ, ವಿಸೇಸನಾಪೇಕ್ಖಂ, ಹೀನತ್ಥಕ ಮನತ್ಥಕಂ.

ವಾಕ್ಯದೋಸ ಉದ್ದೇಸ

೧೯. ದೋಸಾ ಪದಾನ ವಾಕ್ಯಾನ, ಮೇಕತ್ಥಂ ಭಗ್ಗರೀತಿಕಂ;

ತಥಾ ಬ್ಯಾಕಿಣ್ಣ ಗಾಮ್ಮಾನಿ, ಯತಿಹೀನಂ ಕಮಚ್ಚುತಂ;

ಅತಿವುತ್ತ ಮಪೇತತ್ಥಂ, ಸಬನ್ಧಫರುಸಂ ತಥಾ.

ವಾಕ್ಯತ್ಥದೋಸಉದ್ದೇಸ

೨೦. ಅಪಕ್ಕಮೋ’, ಚಿತ್ಯಹೀನಂ, ಭಗ್ಗರೀತಿ, ಸಸಂಸಯಂ;

ಗಾಮ್ಮಂ ದುಟ್ಠಾಲಙ್ಕತೀತಿ, ದೋಸಾ ವಾಕ್ಯತ್ಥನಿಸ್ಸಿತಾ.

ಪದದೋಸನಿದ್ದೇಸ

೨೧. ವಿರುದ್ಧತ್ಥನ್ತರಂ ತಞ್ಹಿ, ಯಸ್ಸ’ಞ್ಞತ್ಥೋ ವಿರುಜ್ಝತಿ;

ಅಧಿಪ್ಪೇತೇ ಯಥಾ ಮೇಘೋ, ವಿಸದೋ ಸುಖಯೇ ಜನಂ.

೨೨. ವಿಸೇಸ್ಯ ಮಧಿಕಂ ಯೇನಾ, ಝತ್ಥ ಮೇತಂ ಭವೇ ಯಥಾ;

ಓಭಾಸಿತಾ’ಸೇಸದಿಸೋ, ಖಜ್ಜೋತೋ’ಯಂ ವಿರಾಜತೇ.

೨೩. ಯಸ್ಸ’ತ್ಥಾ’ವಗಮೋ ದುಕ್ಖೋ, ಪಕತ್ಯಾ’ದಿವಿಭಾಗತೋ;

ಕಿಲಿಟ್ಠಂ ತಂ ಯಥಾ ತಾಯ, ಸೋ’ಯ ಮಾಲಿಙ್ಗ್ಯತೇ ಪಿಯಾ.

೨೪. ಯಂ ಕಿಲಿಟ್ಠಪದಂ ಮನ್ದಾ, ಭಿಧೇಯ್ಯಂ ಯಮಕಾದಿಕಂ;

ಕಿಲಿಟ್ಠಪದದೋಸೇ’ವ, ತಮ್ಪಿ ಅನ್ತೋ ಕರೀಯತಿ.

೨೫. ಪತೀತಸದ್ದರಚಿತಂ, ಸಿಲಿಟ್ಠಪದಸನ್ಧಿಕಂ;

ಪಸಾದಗುಣಸಂಯುತ್ತಂ, ಯಮಕಂ ಮತ ಮೇದಿಸಂ.

೨೬. ಅಬ್ಯಪೇತಂ ಬ್ಯಪೇತ’ಞ್ಞ, ಮಾವುತ್ತಾ’ನೇಕವಣ್ಣಜಂ;

ಯಮಕಂ ತಞ್ಚ ಪಾದಾನ, ಮಾದಿ, ಮಜ್ಝ, ನ್ತ, ಗೋಚರಂ.

ಅಬ್ಯಪೇತ ಪಠಮಪಾದಾದಿ ಯಮಕಂ

೨೭. ಸುಜನಾ’ಸುಜನಾ ಸಬ್ಬೇ, ಗುಣೇನಾಪಿ ವಿವೇಕಿನೋ;

ವಿವೇಕಂ ನ ಸಮಾಯನ್ತಿ, ಅವಿವೇಕಿಜನನ್ತಿಕೇ.

ಅಬ್ಯಪೇತ ಪಠಮ ದುತಿಯ ಪಾದಾದಿ ಯಮಕಂ

೨೮. ಕುಸಲಾ’ಕುಸಲಾ ಸಬ್ಬೇ, ಪಬಲಾ’ಪಬಲಾ ಥವಾ;

ನೋ ಯಾತಾ ಯಾವ’ಹೋಸಿತ್ತಂ, ಸುಖದುಕ್ಖಪ್ಪದಾ ಸಿಯುಂ;

ಅಬ್ಯಪೇತ ಪಠಮ ದುತಿಯ ತತಿಯಪಾದಾದಿ ಯಮಕಂ.

೨೯. ಸಾದರಂ ಸಾ ದರಂ ಹನ್ತು, ವಿಹಿತಾ ವಿಹಿತಾ ಮಯಾ;

ವನ್ದನಾ ವನ್ದನಾಮಾನ, ಭಾಜನೇ ರತನತ್ತಯೇ.

ಅಬ್ಯಪೇತ ಚತುಕ್ಕಪಾದಾದಿ ಯಮಕಂ

೩೦. ಕಮಲಂ ಕ’ಮಲಂ ಕತ್ತುಂ, ವನದೋ ವನದೋ’ಮ್ಬರಂ;

ಸುಗತೋ ಸುಗತೋ ಲೋಕಂ, ಸಹಿತಂ ಸ ಹಿತಂ ಕರಂ.

೩೧. ಅಬ್ಯಪೇತಾದಿಯಮಕ, ಸ್ಸೇಸೋ ಲೇಸೋ ನಿದಸ್ಸಿತೋ;

ಞೇಯ್ಯಾನಿ’ಮಾಯೇವ ದಿಸಾ, ಯ’ಞ್ಞಾನಿ ಯಮಕಾನಿಪಿ.

೩೨. ಅಚ್ಚನ್ತಬಹವೋ ತೇಸಂ, ಭೇದಾ ಸಮ್ಭೇದಯೋನಿಯೋ;

ತಥಾಪಿ ಕೇಚಿ ಸುಕರಾ, ಕೇಚಿ ಅಚ್ಚನ್ತದುಕ್ಕರಾ.

೩೩. ಯಮಕಂ ತಂ ಪಹೇಲೀ [ಪಹೇಳಿ (ಕ.)] ಚ, ನೇಕನ್ತಮಧುರಾನಿ’ತಿ;

ಉಪೇಕ್ಖಿಯನ್ತಿ ಸಬ್ಬಾನಿ, ಸಿಸ್ಸಖೇದಭಯಾ ಮಯಾ.

೩೪. ದೇಸಕಾಲಕಲಾಲೋಕ, ಞಾಯಾಗಮವಿರೋಧಿ ಯಂ;

ತಂ ವಿರೋಧಿಪದಂ ಚೇ’ತ, ಮುದಾಹರಣತೋ ಫುಟಂ.

೩೫. ಯ ದಪ್ಪತೀತ ಮಾನೀಯ, ವತ್ತಬ್ಬಂ ನೇಯ್ಯ ಮಾಹು ತಂ;

ಯಥಾ ಸಬ್ಬಾಪಿ ಧವಲಾ, ದಿಸಾ ರೋಚನ್ತಿ ರತ್ತಿಯಂ.

೩೬. ನೇದಿಸಂ ಬಹು ಮಞ್ಞನ್ತಿ, ಸಬ್ಬೇ ಸಬ್ಬತ್ಥ ವಿಞ್ಞುನೋ;

ದುಲ್ಲಭಾ’ವಗತೀ ಸದ್ದ, ಸಾಮತ್ಥಿಯವಿಲಙ್ಘಿನೀ.

೩೭. ಸಿಯಾ ವಿಸೇಸನಾಪೇಕ್ಖಂ, ಯಂ ತಂ ಪತ್ವಾ ವಿಸೇಸನಂ;

ಸಾತ್ಥಕಂ ತಂ ಯಥಾ ತಂ ಸೋ, ಭಿಯ್ಯೋ ಪಸ್ಸತಿ ಚಕ್ಖುನಾ.

೩೮. ಹೀನಂ ಕರೇ ವಿಸೇಸ್ಯಂ ಯಂ, ತಂ ಹೀನತ್ಥಂ ಭವೇ ಯಥಾ;

ನಿಪ್ಪಭೀ ಕತ ಖಜ್ಜೋತೋ, ಸಮುದೇತಿ ದಿವಾಕರೋ.

೩೯. ಪಾದಪೂರಣಮತ್ತಂ ಯಂ, ಅನತ್ಥಮಿತಿ ತಂ ಮತಂ;

ಯಥಾ ಹಿ ವನ್ದೇ ಬುದ್ಧಸ್ಸ, ಪಾದಪಙ್ಕೇರುಹಂ ಪಿ ಚ.

ವಾಕ್ಯದೋಸ ನಿದ್ದೇಸ

೪೦. ಸದ್ದತೋ ಅತ್ಥತೋ ವುತ್ತಂ, ಯತ್ಥ ಭಿಯ್ಯೋಪಿ ವುಚ್ಚತಿ;

ತ ಮೇಕತ್ಥಂ ಯಥಾ’ಭಾತಿ, ವಾರಿದೋ ವಾರಿದೋ ಅಯಂ.

ಯಥಾ ಚ

೪೧. ತಿತ್ಥಿಯಙ್ಕುರಬೀಜಾನಿ, ಜಹಂ ದಿಟ್ಠಿಗತಾನಿ’ಹ;

ಪಸಾದೇತಿ ಪಸನ್ನೇ’ಸೋ, ಮಹಾಮುನಿ ಮಹಾಜನೇ.

೪೨. ಆರದ್ಧಕ್ಕಮವಿಚ್ಛೇದಾ, ಭಗ್ಗರೀತಿ ಭವೇ ಯಥಾ;

ಕಾಪಿ ಪಞ್ಞಾ, ಕೋಪಿ ಪಗುಣೋ, ಪಕತೀಪಿ ಅಹೋ ತವ.

೪೩. ಪದಾನಂ ದುಬ್ಬಿನಿಕ್ಖೇಪಾ, ಬ್ಯಾಮೋಹೋ ಯತ್ಥ ಜಾಯತಿ;

ತಂ ಬ್ಯಾಕಿಣ್ಣನ್ತಿ ವಿಞ್ಞೇಯ್ಯಂ, ತದುದಾಹರಣಂ ಯಥಾ.

೪೪. ಬಹುಗುಣೇ ಪಣಮತಿ, ದುಜ್ಜನಾನಂ ಪ್ಯಯಂ ಜನೋ;

ಹಿತಂ ಪಮುದಿತೋ ನಿಚ್ಚಂ, ಸುಗತಂ ಸಮನುಸ್ಸರಂ.

೪೫. ವಿಸಿಟ್ಠವಚನಾ’ಪೇತಂ, ಗಾಮ್ಮಂ’ತ್ಯ’ಭಿಮತಂ ಯಥಾ;

ಕಞ್ಞೇ ಕಾಮಯಮಾನಂ ಮಂ, ನ ಕಾಮಯಸಿ ಕಿಂನ್ವಿ’ದಂ?

೪೬. ಪದಸನ್ಧಾನತೋ ಕಿಞ್ಚಿ, ದುಪ್ಪತೀತಿಕರಂ ಭವೇ;

ತಮ್ಪಿ ಗಾಮ್ಮಂ ತ್ಯ’ಭಿಮತಂ, ಯಥಾ ಯಾಭವತೋ ಪಿಯಾ.

೪೭. ವುತ್ತೇಸು ಸೂಚಿತೇ ಟ್ಠಾನೇ, ಪದಚ್ಛೇದೋ ಭವೇ ಯತಿ;

ಯಂ ತಾಯ ಹೀನಂ ತಂ ವುತ್ತಂ, ಯತಿಹೀನನ್ತಿ ಸಾ ಪನ.

೪೮. ಯತಿ ಸಬ್ಬತ್ಥಪಾದನ್ತೇ, ವುತ್ತಡ್ಢೇ ಚ ವಿಸೇಸತೋ;

ಪುಬ್ಬಾಪರಾನೇಕವಣ್ಣ, ಪದಮಜ್ಝೇಪಿ ಕತ್ಥಚಿ.

ತತ್ಥೋದಾಹರಣಪಚ್ಚುದಾಹರಣಾನಿ ಯಥಾ

೪೯. ತಂ ನಮೇ ಸಿರಸಾ ಚಾಮಿ, ಕರವಣ್ಣಂ ತಥಾಗತಂ;

ಸಕಲಾಪಿ ದಿಸಾ ಸಿಞ್ಚ, ತಿವ ಸೋಣ್ಣರಸೇಹಿ ಯೋ.

೫೦. ಸರೋ ಸನ್ಧಿಮ್ಹಿ ಪುಬ್ಬನ್ತೋ, ವಿಯ ಲೋಪೇ ವಿಭತ್ತಿಯಾ;

ಅಞ್ಞಥಾ ತ್ವ’ಞ್ಞಥಾ ತತ್ಥ, ಯಾ’ದೇಸಾದಿ ಪರಾ’ದಿ’ವ.

೫೧. ಚಾದೀ ಪುಬ್ಬಪದನ್ತಾ’ವ, ನಿಚ್ಚಂ ಪುಬ್ಬಪದಸ್ಸಿತಾ;

ಪಾದಯೋ ನಿಚ್ಚಸಮ್ಬನ್ಧಾ, ಪರಾದೀವ ಪರೇನ ತು.

ಸಬ್ಬತ್ಥೋದಾಹರಣಾನಿ ಯಥಾ

೫೨. ನಮೇ ತಂ ಸಿರಸಾ ಸಬ್ಬೋ, ಪಮಾ’ತೀತಂ ತಥಾಗತಂ;

ಯಸ್ಸ ಲೋಕಗ್ಗತಂ ಪತ್ತ, ಸ್ಸೋ’ಪಮಾ ನ ಹಿ ಯುಜ್ಜತಿ.

೫೩. ಮುನಿನ್ದಂ ತಂ ಸದಾ ವನ್ದಾ, ಮ್ಯ’ನನ್ತಮತಿ ಮುತ್ತಮಂ;

ಯಸ್ಸ ಪಞ್ಞಾ ಚ ಮೇತ್ತಾ ಚ, ನಿಸ್ಸೀಮಾತಿ ವಿಜಮ್ಭತಿ.

ಚಾದಿಪಾದೀಸು ಪಚ್ಚುದಾಹರಣಾನಿ ಯಥಾ

೫೪. ಮಹಾಮೇತ್ತಾ ಮಹಾಪಞ್ಞಾ, ಚ ಯತ್ಥ ಪರಮೋದಯಾ;

ಪಣಮಾಮಿ ಜಿನಂ ತಂ ಪ, ವರಂ ವರಗುಣಾ’ಲಯಂ.

೫೫. ಪದತ್ಥಕ್ಕಮತೋ ಮುತ್ತಂ, ಕಮಚ್ಚುತ ಮಿದಂ ಯಥಾ;

ಖೇತ್ತಂ ವಾ ದೇಹಿ ಗಾಮಂ ವಾ, ದೇಸಂ ವಾ ಮಮ ಸೋಭನಂ.

೫೬. ಲೋಕಿಯತ್ಥ ಮತಿಕ್ಕನ್ತಂ, ಅತಿವುತ್ತಂ ಮತಂ ಯಥಾ;

ಅತಿಸಮ್ಬಾಧ ಮಾಕಾಸ, ಮೇತಿಸ್ಸಾ ಥನಜಮ್ಭನೇ.

೫೭. ಸಮುದಾಯತ್ಥತೋ’ಪೇತಂ, ತಂ ಅಪೇತತ್ಥಕಂ ಯಥಾ;

ಗಾವಿಪುತ್ತೋ ಬಲಿಬದ್ಧೋ, ತಿಣಂ ಖಾದೀ ಪಿವೀ ಜಲಂ.

೫೮. ಬನ್ಧೇ ಫರುಸತಾ ಯತ್ಥ, ತಂ ಬನ್ಧಫರುಸಂ ಯಥಾ;

ಖರಾ ಖಿಲಾ ಪರಿಕ್ಖೀಣಾ, ಖೇತ್ತೇ ಖಿತ್ತಂ ಫಲತ್ಯ’ಲಂ.

ವಾಕ್ಯತ್ಥದೋಸ ನಿದ್ದೇಸ

೫೯. ಞೇಯ್ಯಂ ಲಕ್ಖಣ ಮನ್ವತ್ಥ, ವಸೇನಾ’ಪಕ್ಕಮಾದಿನಂ;

ಉದಾಹರಣ ಮೇತೇಸಂ, ದಾನಿ ಸನ್ದಸ್ಸಯಾಮ್ಯ’ಹಂ.

ತತ್ಥಾ’ಪಕ್ಕಮಂ ಯಥಾ

೬೦. ಭಾವನಾ, ದಾನ, ಸೀಲಾನಿ, ಸಮ್ಮಾ ಸಮ್ಪಾದಿತಾನಿ’ಹ;

ಭೋಗ, ಸಗ್ಗಾದಿ, ನಿಬ್ಬಾನ, ಸಾಧನಾನಿ ನ ಸಂಸಯೋ.

ಓಚಿತ್ಯಹೀನಂ ಯಥಾ

೬೧. ಪೂಜನೀಯತರೋ ಲೋಕೇ, ಅಹ ಮೇಕೋ ನಿರನ್ತರಂ;

ಮಯೇಕಸ್ಮಿಂ ಗುಣಾ ಸಬ್ಬೇ, ಯತೋ ಸಮುದಿತಾ ಅಹುಂ.

ಯಥಾ ಚ

೬೨. ಯಾಚಿತೋ’ಹಂ ಕಥಂ ನಾಮ, ನ ದಜ್ಜಾಮ್ಯ’ಪಿ ಜೀವಿತಂ;

ತಥಾಪಿ ಪುತ್ತದಾನೇನ, ವೇಧತೇ ಹದಯಂ ಮಮ.

ಭಗ್ಗರೀತಿ ಯಥಾ

೬೩. ಇತ್ಥೀನಂ ದುಜ್ಜನಾನಞ್ಚ, ವಿಸ್ಸಾಸೋ ನೋಪಪಜ್ಜತೇ;

ವಿಸೇ ಸಿಙ್ಗಿಮ್ಹಿ ನದಿಯಂ, ರೋಗೇ ರಾಜಕುಲಮ್ಹಿ ಚ.

ಸಸಂಸಯಂ ಯಥಾ