೩೯. ಬೋಧಿರಾಜಧೀತುಯಾ [ಬೋಧಿರಾಜಧೀತಾಯ ಇತಿಸಬ್ಬತ್ಥ] ವತ್ಥುಮ್ಹಿ ಅಯಮಾನುಪುಬ್ಬೀಕಥಾ

ಭಗವತಿ ಪರಿನಿಬ್ಬುತೇ ಲಙ್ಕಾಯಂ ಸಾಸನೇ ಸುಪ್ಪತಿಟ್ಠಿತೇ ತತ್ಥ ಹಕುರೇಳೀತಿ ಏಕೋ ಗಾಮೋ ಅಹೋಸಿ, ತತ್ಥೇಕಾ ದಾರಿಕಾ ಗಾಮಾದಾರಿಕಾಹಿ ಸದ್ಧಿಂ ತತ್ಥ ತತ್ಥ ಕೀಳನ್ತೀ ವಿಹರತಿ, ತದಾ ಗಾಮಸಮೀಪೇ ಮಹಾಸೋಬ್ಭಂ ಹೋತಿ. ತತ್ಥೇಕೋ ಮರುತ್ಥರುಕ್ಖೋ ಸಬ್ಬದಾ ಪಾಳಿಫುಲ್ಲೋವ ತಿಟ್ಠತಿ. ಮನುಸ್ಸಾ ಬುದ್ಧಪೂಜನತ್ಥಂ ಪುಪ್ಫಾನಿ ವಿಚಿಣನ್ತಾ ಉದಕಂ ಓಗಹೇತ್ವಾ ರುಕ್ಖಮಭಿರುಯ್ಹ ಪುಪ್ಫಾನಿ ಓಚಿಣನ್ತಿ, ಕುಮಾರಿಕಾ ತೇ ದಿಸ್ವಾ ಮನುಸ್ಸಾ ಸುಖೇನ ಗನ್ತ್ವಾ ಪುಪ್ಫಾನಿ ಓಚಿಣನ್ತೂತಿ ಏಕಂ ಸುಕ್ಖಪಾಲಿಭದ್ದದಣ್ಡಕಂ ಆಹರಿತ್ವಾ ಸೇತುಂ ಕತ್ವಾ ಠಪೇಸಿ, ತತೋ ಪಟ್ಠಾಯ ಮನುಸ್ಸಾ ತೇನಗನ್ತ್ವಾ ಪುಪ್ಫಾನಿ ಓಚಿಣನ್ತಿ. ಅಥ ಸಾ ತತೋ ಚುತಾ ತೇನೇವ ಕುಸಲಕಮ್ಮೇನ ಜಮ್ಬುದೀಪೇ ಪಾಟಲಿಪುತ್ತನಗರೇ ಸೋಮದತ್ತರಞ್ಞೋ ಧೀತಾ ಹುತ್ವಾ ನಿಬ್ಬತ್ತಿ, ಉತ್ತಮರೂಪಧರಾ ದೇವಚ್ಛರಪಟಿಭಾಗಾ ಅಹೋಸಿ. ಮಾತಾಪಿತರೋ ಪನಸ್ಸಾ ಬೋಧಿರಾಜಕುಮಾರಿಕಾತಿ ವೋಹರಿಂಸು. ಪುಬ್ಬೇ ಕತಸೇತುಆನುಭಾವೇನ ತಸ್ಸಾ ಸುವೀರಕೋ ನಾಮೇಕೋ ಆಕಾಸಗಾಮೀ ಸಿನ್ಧವಪೋತಕೋ ನಿಬ್ಬತ್ತಿ. ರಾಜಧೀತುಯಾ ಪನ ಪಿತಾ ಬುದ್ಧಮಾಮಕೋ ಧಮ್ಮಮಾಮಕೋ ಸಙ್ಘಮಾಮಕೋ ಹುತ್ವಾ ಮಹನ್ತಂ ಪುಞ್ಞಂ ಪಸವನ್ತೋ ಸಿನ್ಧವಪೋತಕಂ ದಿಸ್ವಾ ಪುಞ್ಞಕರಣಸ್ಸ ಮೇ ಸಹಾಯೋ ಲದ್ಧೋತಿ ತುಟ್ಠಮಾನಸೋ ಅಸ್ಸಂ ಅಭಿರುಹಿತ್ವಾ ದಿವಸಸ್ಸ ತಿಕ್ಖತ್ತುಂ ಗನ್ತ್ವಾ ಮಹಾಬೋಧಿಂ ವನ್ದತಿ. ರಾಜಧೀತಾ ನಂ ದಿಸ್ವಾ ಪಿತುಸನ್ತಿಕಂ ಗನ್ತ್ವಾ ಅಭಿಣ್ಹಂ ತಾತ ಕುಹಿಂ ಗಚ್ಛಸೀತಿ ಪುಚ್ಛಿ. ರಾಜಾ ನ ಕಿಞ್ಚಿ ಕಥೇಸಿ, ಅಥ ಸಾ ಪುನಪ್ಪುನಂ ಪಿತರಂ ನಿಬನ್ಧನ್ತೀ ಪುಚ್ಛಿ. ತತೋ ರಾಜಾ ತಸ್ಸಾವಿ ಕರೋನ್ತೋ ಏವಮಾಹ.

೧. ಅಮ್ಹಾಕಂ ಭಗವಾ ಪುಬ್ಬೇ, ಪೂರೇನ್ತೋ ದಸಪಾರಮೀ;

ಅದಾಸಿ ಸೀಸರತ್ತಕ್ಖಿ, ಮಂಸಂ ಜೀವಿತಮೇವ ಚ.

೨. ಪುತ್ತದಾರೇ ಚ ರಜ್ಜೇ ಚ, ಪತ್ವಾ [ದತ್ವಾ ಇತಿಪಿಕತ್ಥಚಿ] ಪಾರಮಿಮತ್ಥಕಂ;

ಅನಪ್ಪಕಪ್ಪಕೋಟೀನಂ, ಖೇಪೇತ್ವಾ ಕಪಿಲವುಯೇ.

೩. ಸಕ್ಕರಾಜಕುಲೇ ಜಾತೋ, ಲೋಕೇ ಅಪ್ಪಟಿಪುಗ್ಗಲೋ;

ಸಮ್ಪತ್ತಚಕ್ಕವತ್ತಿತ್ತಂ, ಪಹನ್ತ್ವಾನ ನರಾಧಿಪೋ.

೪. ದಿಸ್ವಾ ನಿಮಿತ್ತೇ ಚತುರೋ, ನಿಕ್ಖಮ್ಮ ಅಭಿನಿಕ್ಖಮಂ;

ಬೋಧಿಮೂಲಮುಪಾಗಮ್ಮ, ನಿಸಿನ್ನೋ ವಜಿರಾಸನೇ.

೫. ಸಹಸ್ಸಬಾಹುಂ ಮಾಪೇತ್ವಾ, ನಾನಾಯುಧಸಮಾಕುಲಂ [ನಾನಾವುಧಸಮಾಕುಲಂ-ಇತಿಸಬ್ಬತ್ಥ];

ಮಹಾಭೀತಿಕರಂ ವೇಸಂ, ಕಾಳಪಬ್ಬತಸಾದಿಸಂ.

೬. ಮಾಪೇತ್ವಾನ ಸಮಾರುಯ್ಹ, ಗಿರಿಮೇಖಲವಾರಣಂ;

ಮಾರಸೇನಂ ಸಮಾನೇತ್ವಾ, ಆಗತಂ ಮಕರದ್ಧಜಂ.

೭. ಪಾರಮಿತಾಬಲೇನ ತಂ, ಮಾರಸೇನಂ ಪಲಾಪಿಯ;

ಯತ್ಥಾಸೀನೋ ಕಿಲೇಸಾರಿ, ಸಹಸ್ಸಂ ಘಾತಯೀ ಜಿನೋ.

೮. ನಯನಂ ಸುಜಲಸೇಕೇಹಿ, ಸತ್ತಾಹಂ ಜಿನಸೇವಿತಂ;

ಪೂಜಿತಂ ದೇವಬ್ರಹ್ಮೇಹಿ, ಸಿದ್ಧೋರಗನರಾದಿಹಿ;

ವನ್ದಿತುಂ ಜಯಬೋಧಿಂತಂ, ಗಚ್ಛಾಮಿ ಸತತಂ ಅಹಂ.

೯. ಉಪಾಸತಿ ಸದಾ ಗನ್ತ್ವಾ, ಯೋ ನರೋ ಬೋಧಿಪಾದಪಂ;

ಗನ್ಧೋದದೀಪಧೂಪಾದಿ, ನಾನಾಪೂಜಾಹಿ ಸಾಧುಕಂ.

೧೦. ಸ ನರೋ ನಿರಾಮಯೋ ಹೋತಿ, ಪಚ್ಚತ್ತೇ ಚ ಪರತ್ಥ ಚ;

ಪೂಜಿತೋ ಮಾನಿತೋ ಹೋತಿ, ದೀಘಾಯು ಬಲವಾ ಸುಖೀ.

೧೧. ತದತ್ಥಂ ಪತ್ಥಯನ್ತೇನ, ಅತ್ಥಕಾಮೇನ ಜನ್ತುನಾ;

ಉಪಾಸನೀಯಂ ಸದ್ಧಾಯ, ನಿಚ್ಚಂ ತಂ ಬೋಧಿಪಾದಪಂತಿ.

ತಂ ಸುತ್ವಾ ಕುಮಾರಿಕಾ ಪೀತಿಯಾ ಫುಟಸರೀರಾ ಪಿತರಂ ವನ್ದಿತ್ವಾ ಅಹಮ್ಪಿ ತಾತ ಗಚ್ಛಾಮೀತಿ ಆಹ. ರಾಜಾ ಪನಸ್ಸಾ ಉಪದ್ದವಭಯೇನ ಗಮನಂ ನ ಇಚ್ಛಿ. ತತೋ ಸಾ ಯಾವತತಿಯಂ ಪಿತರಂ ಯಾಚಿತ್ವಾ ರಞ್ಞಾ ಅನುಞ್ಞಾತಾ. ತತೋ ಪಟ್ಠಾಯ ಪಿತರಾ ಸದ್ಧಿಂ ಸಿನ್ಧವಮಾರುಯ್ಹ ಬೋಧಿಂ ವನ್ದಿತುಂ ಸತತಂ ಗಚ್ಛತಿ. ಅಥಾಪರಭಾಗೇ ರಾಜಾ ಮರಣಮಞ್ಚೇ ನಿಪನ್ನೋ ಚಿನ್ತೇಸಿ. ಧೀತಾ ಮೇ ನಿರನ್ತರಂ ಬೋಧಿಉಪಟ್ಠಾನಂಗಚ್ಛತಿ, ಏತಿಸ್ಸಾ ಅನಾಗತೇ ಯಂಕಿಞ್ಚಿ ಭಯಂ ಉಪ್ಪಜ್ಜಮಾನಂ ತತೋ ಉಪ್ಪಜ್ಜತಿ. ತತ್ಥ ಮೇ ಕಿಂ ಕಾತಬ್ಬನ್ತಿ. ತತೋ ಸಿನ್ಧವಂ ಪಕ್ಕೋಸಾಪೇತ್ವಾ ತಸ್ಸ ಕಣ್ಣಮೂಲೇ ಮನ್ತೇನ್ತೋ ಏವಮಾಹ, ತಾತ ಮಮ ಧೀತಾ ಅಭಿಣ್ಹಂ ತವ ಸಹಾಯಂ ಕತ್ವಾ ಬೋಧಿಂ ವನ್ದಿತುಂ ಗಚ್ಛತಿ. ತತ್ಥಸ್ಸಾ ಯಂಕಿಞ್ಚಿ ಭಯಂ ಭವೇಯ್ಯ. ತಂ ನಪ್ಪತಿರೂಪಂ. ತತ್ಥ ಗಮನಾಗಮನೇ ಮಮ ಧೀತರಂ ರಕ್ಖೇಯ್ಯಾಸೀತಿ ತಸ್ಸ ಧೀತರಂ ಪಟಿಪಾದೇತ್ವಾ ಕಾಲಮಕಾಸಿ. ತತೋ ರಾಜಧೀತಾ ಪಿತುಸರೀರಕಿಚ್ಚಂ ಕಾರೇತ್ವಾ ದಿವಸಸ್ಸ ತಿಕ್ಖತ್ತುಂ ಅಸ್ಸಮಭಿರುಯ್ಹ ಬೋಧಿಉಪಟ್ಠಾನಂ ಗಚ್ಛತಿ. ಮನುಸ್ಸಾ ಪನಸ್ಸಾ ರೂಪಸಮ್ಪತ್ತಿಂ ದಿಸ್ವಾ ವಿಮ್ಹಿತಮಾನಸಾ ರಾಜಾರಹಂ ವತ ನೋ ಇದಂ ಪಣ್ಣಾಕಾರಂ ದಿಟ್ಠಂ. ಗನ್ತ್ವಾ ರಞ್ಞೋ ಆಚಿಕ್ಖಿಸ್ಸಾಮ. ಅಪ್ಪೇವ ನಾಮ ರಾಜಾ ಸೋ ಕಿಞ್ಚಿ ನೋ ದದೇಯ್ಯಾತಿ ಚಿನ್ತೇತ್ವಾ ರಞ್ಞೋ ಸನ್ತಿಕಂ ಗನ್ತ್ವಾ ವನ್ದಿತ್ವಾ ಠಿತಾ ಏವಮಾಹಂಸು.

೧೨. ಬೋಧಿಮಣ್ಡಂ ಸಮಾಗಮ್ಮ, ಅಭಿಣ್ಹಂ ತುಟ್ಠಮಾನಸಾ;

ವನ್ದನ್ತೀ ಯಾತಿ ಕಞ್ಞೇಕಾ, ವಿಜ್ಜೂವ ಸಿರಿಯಾ ಜಲಂ.

೧೩. ನೀಲಧಮ್ಪಿಲ್ಲಭಾರಾ ಸಾ, ವಿಸಾಲಾಯತಲೋಚನಾ;

ಸೋಣ್ಣದೋಲಾಭಸವಣಾ, ಸಾಮಾ ಸುಭಪಯೋಧರಾ.

೧೪. ಸತರಂಸೀಹಿ ಸಮ್ಮಿಸ್ಸ, ಸಞ್ಚ್ಯಾಮ್ಬುದಸಮಾಧರಾ;

ತುಙ್ಗನಾಸಾ ನೀಲಭಮು, ಹಾಸಭಾಸಾ ಮನೋರಮಾ.

೧೫. ಈದಿಸಂ ನೋ ಮಹಾರಾಜಾ [ಮಹಾರಾಜದಿಟ್ಠಪುಬ್ಬ ಇತಿಪಿಕತ್ಥಚಿ], ದಿಟ್ಠಪುಬ್ಬಂ ಕುದಾಚನಂ;

ಏಹಿ ತಸ್ಸಾ ಸಿರಿಂದೇವ, ಬೋಧಿಮಣ್ಡಮ್ಹಿ ದಕ್ಖಸೀತಿ.

ತಂ ಸುತ್ವಾ ರಾಜಾ ಸವಣಸಂಸಗ್ಗೇನೇವ ತಾಯ ಪಟಿಬದ್ಧಚಿತ್ತೋ ಚತುರಙ್ಗಿನಿಂಸೇನಂ ಗಹೇತ್ವಾ ರಾಜಧೀತರಂ ಬೋಧಿವನ್ದನತ್ಥಾಯ ಆಗತಕಾಲೇ ಬಹಿಪಾಕಾರೇ ಸೇನಂ ಪರಿಕ್ಖಿಪಾಪೇತ್ವಾ ಗಣ್ಹಥೇತನ್ತಿ ಮನುಸ್ಸೇ ನಿಯೋಜೇಸಿ. ತತೋ ಸೇನಾಪಿ ತಂ ಗಹಣಸಜ್ಜಾ ಅಟ್ಠಾಸಿ. ರಾಜಧೀತಾ ತೇ ದಿಸ್ವಾ ಸೀಘಂ ಸಿನ್ಧವಂ ಉಪಸಙ್ಕಮಿತ್ವಾ ತಸ್ಸ ಪಿಟ್ಠಿಯಂ ನಿಸಿನ್ನಾ ಪಣ್ಹಿಯಾ ಸಞ್ಞಂ ಅದಾಸಿ. ಸೋ ತಂ ಗಹೇತ್ವಾ ವೇಗೇನ ಆಕಾಸಂ ಪಕ್ಖನ್ದಿ. ಸಾ ಪನ ದುನ್ನಿಸಿನ್ನಭಾವೇನ ಅಸ್ಸಸ್ಸ ವೇಗಂ ಸನ್ಧಾರೇತುಮಸಕ್ಕೋನ್ತೀ ಅಸ್ಸಪಿಟ್ಠಿತೋ ಪರಿಗಲಿ. ಸಿನ್ಧವೋ ರಾಜಧೀತರಂ ಪತಮಾನಂ ದಿಸ್ವಾ ರಾಜೋವಾದಂ ಸರಮಾನೋ ವೇಗೇನಾಗನ್ತ್ವಾ ತಸ್ಸಾ ಕೇಸೇ ಡಂಸಿತ್ವಾ ಉಕ್ಖಿಪಿತ್ವಾ ಪತಮಾನಾಯ ತಸ್ಸಾ ಪಿಟ್ಠಿಂದತ್ವಾ ನಿಸೀದಾಪೇತ್ವಾ ಆಕಾಸೇನ ತಂ ನೇತ್ವಾ ಪಾಟಲಿಪುತ್ತನಗರೇಯೇವ ಪತಿಟ್ಠಾಪೇಸಿ [ಪಾತಲಿಪುತ್ತನಗರೇಯೇವತಂ ಪವಿಠಾಪೇಸಿಇತಿಪಿಕತ್ಥಚಿ].

೧೬. ತಿರಚ್ಛಾನಗತಾಪೇವಂ, ಸರನ್ತಾ ಉಪಕಾರಕಂ;

ನ ಜಹನ್ತೀತಿ ಮನ್ತ್ವಾನ, ಕತಞ್ಞೂ ಹೋನ್ತು [ಹೋನ್ತಿಪಾಣಿನೋ-ಇತಿಪಿಕತ್ಥಚಿ] ಪಾಣಿನೋತಿ.

ತತೋ ಪಟ್ಠಾಯ ಸಾ ಪುಞ್ಞಕಮ್ಮಂ ಕತ್ವಾ ಸಗ್ಗಪರಾಯನಾ ಅಹೋಸೀತಿ.

೧೭. ಯೋ ಯಂ ದುಮಿನ್ದಂಯತಿನನ್ದನೇನ;

ಸಮ್ಪೂಜಿತಂ ಪೂಜಯತೇ ಸ ಪಞ್ಞೋ;

ಸ ಭೋಗವಾ ಹೋತಿ ಅನೀತಿಕೋ ಚ,

ಸಬ್ಬತ್ಥ ಸೋ ಹೋತಿ ಪಸತ್ಥರೂಪೋ.

ಬೋಧಿರಾಜಧೀತುಯಾ ವತ್ಥುಂ ನವಮಂ.