೪೦. ಕುಣ್ಡಲಿಯಾ ವತ್ಥುಮ್ಹಿ ಅಯಮಾನುಪುಬ್ಬೀಕಥಾ

ಲಙ್ಕಾದೀಪೇ ರೋಹಣಜಪದೇ ಮಹಾಗಾಮೋ ನಾಮ ಅಹೋಸಿ, ತತ್ಥ ತಿಸ್ಸವಿಹಾರಂ ನಾಮ ಅನೇಕಸತಭಿಕ್ಖೂಹಿ ಸಮಾಕಿಣ್ಣಂ ಅನೇಕಪರಿವೇಣಪತಿಮಣ್ಡಿತಂ ವಿಹಾರಂ ಅಹೋಸಿ. ತತ್ಥೇಕೋ ತಿಸ್ಸೋ ನಾಮ ಸಾಮಣೇರೋ ಪಟಿವಸತಿ. ಸೋ ಏಕಸ್ಮಿಂಸಮಯೇ ಜನಪದಚಾರಿಕಂ ಚರನ್ತೋ ಪಾಸಾಣವಾಪಿಗಾಮೇ ಭಿಕ್ಖಂ ಚರಿತ್ವಾ ಯಾಪನಮತ್ತಂ ಭತ್ತಂ ಸಪ್ಪಿನಾ ಸದ್ಧಿಂ ಲಭಿತ್ವಾ ನಿಕ್ಖಮ್ಮ ಗಾಮದ್ವಾರಂ ಪತ್ವಾ ಮಹಾಗಾಮಾಭಿಮುಖೋ ಗಚ್ಛನ್ತೋ ಮನುಸ್ಸೇ ಉದಕಫಾಸುಕಟ್ಠಾನಂ ಪುಚ್ಛಿ. ತೇಹಿ ಭನ್ತೇ ತುಮ್ಹಾಕಂ ಅಭಿಮುಖೇ ಅವಿದೂರಟ್ಠಾನೇ ಕಕುಬನ್ದಕನ್ದರಂ ನಾಮ ಸನ್ದಮಾನಸೀತಲೋದಕಂ ಧವಲವಾಲುಕಾತಲಂ ತತ್ಥ ತುಮ್ಹೇ ಗನ್ತ್ವಾ ನಹಾತ್ವಾ ಸೀತಲಚ್ಛಾಯಾಯ ವಾಲುಕಾತಲೇ ನಿಸಿನ್ನೋ ಭತ್ತಕಿಚ್ಚಂ ಕತ್ವಾ ಗಚ್ಛಥಾತಿ ವುತ್ತೇ ಸಾಮಣೇರೋ ಸಾಧೂತಿ ವತ್ವಾ ತತ್ಥ ಗನ್ತ್ವಾ ಫಾಸುಕಟ್ಠಾನೇ ನಿಸಿನ್ನೋ ಭತ್ತಂ ಭುಞ್ಜಿತುಮಾರಭಿ. ತದಾ ಏಕೇನ ವನಕಮ್ಮಿಕೇನ ಸದ್ಧಿಂಅರಞ್ಞಂ ಗತಾ ಏಕಾ ಸುನಖೀ ತಸ್ಮಿಂ ಕನ್ದರೇ ಏಕಸ್ಮಿಂ ಪಬ್ಭಾರಟ್ಠಾನೇ ದಾರಕೇ ವಿಜಾಯಿತ್ವಾ ಛಾತಜ್ಝತ್ತಾ ಪವೇಧಮಾನಗತ್ತಾ ದಾರಕಾನಂ ಸಮೀಪೇನಿಪನ್ನಾ ಸಾಮಣೇರಸ್ಸ ಪತ್ತೇ ಆಹಾರಗನ್ಧಂ ಘಾಯಿತ್ವಾ ನಿಪನ್ನಟ್ಠಾನತೋ ವುಟ್ಠಾಯ ಪವೇಧಮಾನಾ ತಸ್ಸ ಸಮೀಪಂ ಆಗಮ್ಮ ನಙ್ಗುಟ್ಠಂ ಚಾಲೇನ್ತೀ ಅಟ್ಠಾಸಿ, ಸಾಮಣೇರೋ ತಂ ದಿಸ್ವಾ ಕಮ್ಪಿತಮಾನಸೋ ಅತ್ತನೋ ಭೋಜನತ್ಥಾಯ ವಟ್ಟಿತಂ ಪಥಮಾಲೋಪಂ ತಸ್ಸಾ ಪುರತೋ ಠಪೇಸಿ, ತತೋ ಸಾ ಸೋಮನಸ್ಸಾ ತಂ ಭುಞ್ಜಿ. ತಂ ದಿಸ್ವಾ ತುಟ್ಠೋ ಪುನಪ್ಪುನಂ ಆಲೋಪಂ ಕರೋನ್ತೋ ತಸ್ಸಾ ಭತ್ತಂ ದತ್ವಾ ಪತ್ತಂ ಧೋವಿತ್ವಾ ಥವಿಕಾಯ ಪಕ್ಖಿಪಿತ್ವಾ ಅಗಮಾಸಿ. ತತೋ ಸಾ ಸುನಖೀ ಸಾಮಣೇರಗತೇನ ಪಸಾದೇನ ತತೋ ಚುತಾ ಜಮ್ಬುದೀಪೇ ದೇವಪುತ್ತನಗರೇ ರಾಜಾನಂ ಪಟಿಚ್ಚ ತಸ್ಸ ಮಹೇಸಿಯಾ ಕುಚ್ಛಿಮ್ಹಿ ಪಟಿಸನ್ಧಿಂ ಗಣ್ಹಿತ್ವಾ ದಸಮಾಸಚ್ಚಯೇನ ಮಾತುಕುಚ್ಛಿತೋ ನಿಕ್ಖಮಿ, ಅಥಸ್ಸಾ ಸಿಖಾಮಙ್ಗಲದಿವಸೇ ಸಮ್ಪತ್ತೇ ಮಾತಾಪಿತರೋ ಪನಸ್ಸಾ ಕುಣ್ಡಲಾವಟ್ಟಕೇಸತ್ತಾ ಕುಣ್ಡಲಾತಿ ನಾಮ ಮಕಂಸು. ಸಾ ಅನುಕ್ಕಮೇನ ಸೋಳಸವಸ್ಸುದ್ದೇಸಿಕಾ ಅಹೋಸಿ, ತಸ್ಮಿಂ ಕಿರ ಸಮಯೇ ತಿಸ್ಸೋ ಸಾಮಣೇರೋ ಮಹಾಬೋಧಿಂ ವನ್ದಿಸ್ಸಾಮೀತಿ ನಾವಂ ಅಭಿರುಯ್ಹ ಜಮ್ಬುದೀಪಂ ಗನ್ತ್ವಾ ಅನುಪುಬ್ಬೇನ ದೇವಪುತ್ತನಗರಂ ಪತ್ವಾ ಸುನಿವತ್ಥೋ ಸುಪಾರುತೋ ಯುಗಮತ್ತದಸೋ ಭಿಕ್ಖಾಯ ಚರನ್ತೋ ಮಹಾವೀಥಿಂ ಸಮ್ಪಾಪುಣಿ. ರಾಜಧೀತಾ ಸೀಹಪಞ್ಜರಂ ಉಗ್ಘಾಟೇತ್ವಾ ಅನ್ತರವೀಥಿಂ ಓಲೋಕೇನ್ತೀ ಭಿಕ್ಖನ್ತಂ ಸಾಮಣೇರಂ ದಿಸ್ವಾ ಪುಬ್ಬಸಿನೇಹಂ ಪಟಿಲಭಿ, ತಸ್ಮಿಂಖಣೇ ತಸ್ಸಾ ಜಾತಿಸ್ಸರಞಾಣಂ ಅಹೋಸಿ. ಸಾ ಕಿರ ಪುಬ್ಬೇ ಭಿಕ್ಖುಣೀ ಹುತ್ವಾ ಪಣ್ಣಸೂಚಿಯಾ ಸದ್ಧಿಂ ಪೋತ್ಥಕಞ್ಚ ಪದೀಪಿಯತೇಲಞ್ಚ ದತ್ವಾ ಜಾತಿಸ್ಸರಾ ಭವೇಯ್ಯಂತಿ ಪತ್ಥನಂ ಠಪೇಸಿ, ತತೋ ಸಾಜಾತಿಂ ಅನುಸ್ಸರನ್ತೀ ಸಾಮಣೇರೇನ ಅತ್ತನೋ ಕತೂಪಕಾರಂ ದಿತ್ವಾ ಸೋಮನಸ್ಸಾ ನಂ ಪಕ್ಕೋಸಾಪೇತ್ವಾ ರಾಜಗೇಹೇ ಆಸನಂ ಪಞ್ಞಾಪೇತ್ವಾ ತತ್ಥ ನಿಸಿನ್ನಂ ನಾನಗ್ಗರಸ ಭೋಜನೇನ ಪರಿವಿಸಿತ್ವಾ ಓನೀತಪತ್ತಪಾಣಿಂ ಸಾಮಣೇರಂ ಉಪಸಙ್ಕಮಿತ್ವಾ ವನ್ದಿತ್ವಾ ಏಕಮನ್ತಂ ನಿಸಿನ್ನಾ ತೇನ ಸದ್ಧಿಂ ಸಲ್ಲಪನ್ತೀ ಏವಮಾಹ.

೧. ನ ಸಞ್ಜಾನಾಸಿ ಮಂ ಧೀರ, ಪುಬ್ಬೇಹಂ ತವ ದಾಸಿಕಾ;

ತೇನಾಹಂ ಸುಖಿತಾ ಆಸಿಂ, ತಸ್ಮಾ ತ್ವಮಸಿ ಇಸ್ಸರೋತಿ.

ತಂ ಸುತ್ವಾ ಸಾಮಣೇರೋ ಆಹ.

೨. ನತ್ಥಿ ಮೇ ತಾದಿಸೀ ದಾಸೀ, ನ ಸಞ್ಜಾನಾಮಿ ತಂ ಅಹಂ;

ಕಾಸಿ ತ್ವಂ ಕಸ್ಸ ವಾ ಧೀತಾ, ತಂ ಮೇ ಅಕ್ಖಾಹಿ ಪುಚ್ಛಿತಾತಿ.

ತತೋ ಸಾ ತಂ ಸಾರಾಪೇನ್ತೀ ಆಹ.

೩. ಸಾರಾಪೇಮಿ ತುವಂ ಅಜ್ಜ, ಯಥಾ ಜಾನಾಸಿಮಂ ಇಸೇ;

ಬುಜ್ಝಸ್ಸು ಬೋಧಿತೋ ದಾನಿ, ಮಯಾ ಜಾತಿಂಸರನ್ತಿಯಾ.

೪. ಪಾಸಾಣವಾಪಿಗಾಮಮ್ಹಿ, ತಮ್ಬಪಣ್ಣಿಮ್ಹಿ ರೋಹಣೇ;

ಭಿಕ್ಖಿತ್ವಾನ ತುವಂ ಭನ್ತೇ, ಯದಾ ಕಕುಬನ್ದಕನ್ದರೇ.

೫. ನಿಸೀದಿತ್ವಾನ ತ್ವಂ ಭತ್ತಂ, ಭುತ್ತಕಾಲಂ ಸರಿಸ್ಸಸಿ;

ತದಾಹಂ ಸುನಖೀ ಆಸಿಂ, ವಿಜಾತಾ ಲದ್ಧಗೋಚರಾ.

೬. ದಾರಕೇ ಖಾದಿತುಂ ಮಯ್ಹ, ಮಾಸನ್ನಾ ಖುದಪೀಳಿತಾ;

ಪವೇಧಮಾನಸಬ್ಬಙ್ಗಾ, ಅಟ್ಠಾಸಿಂ ತವ ಸನ್ತಿಕೇ.

೭. ದಿಸ್ವಾ ತಂ ಮಂ ತದಾ ಭನ್ತೇ, ವೇಧಮಾನಂ ಬುಭುಕ್ಖಿತಂ;

ಛಿನ್ನಭತ್ತೋ ತುವಂ ಹುತ್ವಾ, ಮಮಂ ಭತ್ತೇನ ತೋಸಯೀ.

೮. ತದಾಹಂ ಮುದುಚಿತ್ತೇನ, ಚಿತ್ತಂ ತಯಿ ಪಸಾದಯಿಂ;

ತೇನಾಹಂ ಪುಞ್ಞಕಮ್ಮೇನ, ದುತಿಯೇ ಅತ್ತಸಮ್ಭವೇ.

೯. ಇಧ ರಾಜಕುಲೇ ಜಾತಾ, ಸಬ್ಬಕಾಮಸಮಿದ್ಧಿನೀ;

ಚಿತ್ತಪ್ಪಸಾದಮತ್ತೇನ, ಲೋಕನಾಥಸ್ಸ ಸಾಸನೇ.

೧೦. ತದಹುಪಬ್ಬಜಿತಸ್ಸಾಪಿ, ಈದಿಸಾ ಹೋನ್ತಿ ಸಮ್ಪದಾ;

ಕೀದಿಸಂ ಹೋತಿ ಸಮ್ಬುದ್ಧೇ, ಪಸಾದೇನ ಫಲಂ ಅಹೋ.

೧೧. ಅಞ್ಞಾನಿ ಪನ ಕಿಚ್ಚಾನಿ, ಪಹಾಯಾತ್ತಹಿತೇ ರತೋ;

ಅತನ್ದಿತೋ ದಿವಾರತ್ತಿಂ, ಸರಾತು ರತನತ್ತಯಂತಿ.

ಏವಂ ಸಾಮಣೇರೇನ ಕತೂಪಕಾರಂ ಸಾರಾಪೇತ್ವಾ ಭನ್ತೇ ತವ ದಾಸಿಯಾ ಅನುಗ್ಗಹಂ ಪಟಿಚ್ಚ ಇಧೇವ ವಸಥಾತಿ ನಿಮನ್ತಿತ್ವಾ ತೇನ ಸಮ್ಪಟಿಚ್ಛಿತೇ ಮಹನ್ತಂ ವಿಹಾರಂ ಕಾರಾಪೇತ್ವಾ ಸಾಮಣೇರಂ ಆದಿಂ ಕತ್ವಾ ಅನೇಕಭಿಕ್ಖುಸತೇ ನಿಮನ್ತೇತ್ವಾ ವಿಹಾರೇ ವಸಾಪೇತ್ವಾ ಸುಲಭಂ ಕತ್ವಾ ಚತುಪಚ್ಚಯೇಹಿ ಉಪಟ್ಠಾಸಿ. ಸಾಮಣೇರೋಪಿ ಸುನಖಿಯಾ ದಿನ್ನದಾನಂ ಅನುಸ್ಸರಿತ್ವಾ ತುಟ್ಠೋ ಬುದ್ಧಾನುಸ್ಸತಿಂ ಮನಸಿಕರೋನ್ತೋ ನ ಚಿರೇನವ ಅರಹತ್ತಂ ಪತ್ವಾ ತಸ್ಮಿಂಯೇವ ವಿಹಾರೇ ವಸನ್ತೋ ಆಯುಪರಿಯೋಸಾನೇ ತತ್ಥೇವ ಪರಿನಿಬ್ಬಾಯೀತಿ.

೧೨. ತಿಯದ್ಧೇಸು ತಿಲೋಕಸ್ಮಿಂ, ನತ್ಥಿ ವತ್ಥುತ್ತಯಂ ವಿನಾ;

ಸತ್ತಾನ ಮಞ್ಞ ಮಿಚ್ಛತ್ಥ, ದಾಯಕಂ ಸುರಪಾದಪಂ.

ಕುಣ್ಡಲಿಯಾ ವತ್ಥುಂ ದಸಮಂ.

ಮಹಾಸೇನವಗ್ಗೋ ಚತುತ್ಥೋ.

ಏತ್ತಾವತಾ ಜಮ್ಬುದೀಪುಪ್ಪತ್ತಿಕಥಾ ಸಮತ್ತಾ.