೩೮. ತೇಭಾತಿಕಮಧುವಾಣಿಜಕಾನಂ ವತ್ಥುಮ್ಹಿ ಅಯಮಾನುಪುಬ್ಬೀಕಥಾ

ಅತೀತೇ ಕಿರ ಬಾರಾಣಸಿಯಂ ತೇ ಭಾತಿಕಾ ಏಕತೋ ಹುತ್ವಾ ಮಧುಂ ವಿಕ್ಕಿಣನ್ತಾ ಪುತ್ತದಾರೇ ಪೋಸೇನ್ತಿ. ತತೋ ತೇಸು ಏಕೋ ಪಚ್ಚನ್ತಂ ಗನ್ತ್ವಾ ಮಲಯವಾಸೀನಂ [ಮಲವಾಸೀನಂ ಇತಿಪಿಕತ್ಥಚಿ] ಹತ್ಥತೋ ಮಧುಂ ಕಿಣಿತ್ವಾ [ವಕ್ಕಿಣಿತ್ವಾ ಇತಿಸಬ್ಬತ್ಥ] ಗಣ್ಹಾತಿ, ಏಕೋ ಗಹಿತಗಹಿತಮಧುಂ ನಗರಂ ಆಹರತಿ. ಏಕೋ ತೇನ ಆಹಟಾಹಟಮಧೂನಿ ಬಾರಾಣಸಿಯಂ ನಿಸೀದಿತ್ವಾ ವಿಕ್ಕಿಣಾತಿ. ತಸ್ಮಿಂ ಸಮಯೇ ಗನ್ಧಮಾದನಪಬ್ಬತೇ ಏಕೋ ಪಚ್ಚೇಕಬುದ್ಧೋ ವಣರೋಗೇನಾ ತುರೋ ಅಹೋಸಿ. ಅಥಞ್ಞತರೋ ಪಚ್ಚೇಕಬುದ್ಧೋ ತಸ್ಸ ಮಧುನಾ ಫಾಸು ಭವಿಸ್ಸತೀತಿ ಞತ್ವಾ ಗನ್ಧಮಾದನಪಬ್ಬತೇಯೇವ ಠಿತೋ ಚೀವರಂ ಪಾರುಪಿತ್ವಾ ಆಕಾಸೇನಾ ಗನ್ತ್ವಾ ನಗರದ್ವಾರೇ ಓತರಿತ್ವಾ ಕತ್ಥ ಮಧುಂ ಲಭಾಮೀತಿ [ಲಬ್ಭತಿ ಇತಿಸಬ್ಬತ್ಥ] ಓಲೋಕೇನ್ತೋ ಅಟ್ಠಾಸೀ, ತದಾ ತಸ್ಮಿಂಪರಕುಲೇ ಭತಿಂ ಕತ್ವಾ ಜೀವಮಾನಾ ಏಕಾ ಚೇಟಿಕಾ ಘಟಮಾದಾಯ ಉದಕತ್ಥಂ ತಿತ್ಥಂ ಗಚ್ಛನ್ತೀ ಮಗ್ಗಾ ಓಕ್ಕಮ್ಮ ಘಟಂ ಠಪೇತ್ವಾ ವನ್ದಿತ್ವಾ ಏಕಮನ್ತಂ ಅಟ್ಠಾಸಿ, ತದಾ ಪಚ್ಚೇಕಬುದ್ಧೋ ಭಗಿನೀ ಏತ್ಥ ಭಿಕ್ಖಾಯ ಚರನ್ತಾನಂ ಕತರಸ್ಮಿಂ ಠಾನೇ ಮಧು ಲಬ್ಭತೀತಿ ಪುಚ್ಛಿ. ಸಾ ತಸ್ಸ ಕಥಂ ಸುತ್ವಾ ಮಧುಆಪಣಸ್ಸ ಪಞ್ಞಾಯನಟ್ಠಾನೇ ಠತ್ವಾ ಹತ್ಥಂ ಪಸಾರೇತ್ವಾ ಏಸ ಭನ್ತೇ ಮಧುಆಪಣೋತಿ ದಸ್ಸೇತ್ವಾ ಯಜ್ಜಾಯಂ ಪಚ್ಚೇಕಬುದ್ಧೋ ಆಪಣತೋ ಮಧುಂ ನ ಲಭತಿ. ಮಮ ನಿವತ್ಥವತ್ಥಕಂ ದತ್ವಾಪಿ ಮಧುಂ ದಸ್ಸಾಮೀತಿ ಚಿನ್ತೇತ್ವಾ ಓಲೋಕೇನ್ತೀ ತತ್ಥೇವ ಅಟ್ಠಾಸಿ, ಅಥ ಪಚ್ಚೇಕಬುದ್ಧೋ ಅನುಪುಬ್ಬೇನ ವಿಚರನ್ತೋ [ಚರನ್ತೋ ಇತಿಪಿಕತ್ಥಚಿ] ಮಧುಆಪಣಂ ಸಮ್ಪಾಪುಣಿ, ತತೋ ಕುಟಿಮ್ಬಿಕೋ [ಕುಟಿಮ್ಬ ಕೋ ಇತಿಪಿಕತ್ಥಚಿ] ತಂ ದಿಸ್ವಾ ಹತ್ಥತೋ ಪತ್ತಂ ಗಹೇತ್ವಾ ಆಧಾರಕೇ ಠಪೇತ್ವಾ ಮಧುಘಟಂ ಆದಾಯ ಪತ್ತಸ್ಸ ಉಪನಾಮೇನ್ತೋ ಸಹಸಾ ನಿಕ್ಕುಜ್ಜಿ. ತತೋ ಮಧು ಪತ್ತಂ ಪೂರೇತ್ವಾ ಉತ್ತರನ್ತೋ ಪುನ ಭೂಮಿಯಂ ಪಗ್ಘರಿ. ತಂ ದಿಸ್ವಾ ಸೋಮನಸ್ಸೋ ವಾಣಿಜೋ ಏವಂ ಪತ್ಥನಮಕಾಸಿ.

ವುತ್ತಞ್ಹಿ ಮಹಾವಂಸೇ.

೧. ತತ್ಥ ಪತ್ತಸ್ಸ ಬುದ್ಧಸ್ಸ, ವಾಣಿಜೋ ಸೋ ಪಸಾದವಾ;

ವಿಸ್ಸನ್ದಯನ್ತೋ ಮುಖತೋ, ಪತ್ತಪೂರಂ ಮಧುಂ ಅದಾ.

೨. ಪುಣ್ಣಞ್ಚ ಉಪ್ಪತೀತಞ್ಚ, ಪತಿತಞ್ಚ ಮಹೀತಲೇ;

ದಿಸ್ವಾ ಮಧುಂ ಪಸನ್ನೋ ಸೋ, ಏವಂ ಪಣಿದಹೀ ತದಾ.

೩. ಜಮ್ಬುದೀಪೇ ಏಕರಜ್ಜಂ, ದಾನೇನಾನೇನ ಹೋತು ಮೇ;

ಆಕಾಸೇ ಯೋಜನೇ ಆಣಾ, ಭೂಮಿಯಂ ಯೋಜನೇಪಿತಿ.

ಏವಞ್ಚ ಪನ ವತ್ವಾ ಪತ್ತಂ ಅದಾಸಿ, ಪಚ್ಚೇಕಬುದ್ಧೋ ಪತ್ತಂ ಪಟಿಗ್ಗಹೇತ್ವಾ ತತ್ಥೇವ ಠಿತೋ.

೪. ಇಚ್ಛಿತಂ ಪತ್ಥಿತಂ ತುಯ್ಹಂ, ಖಿಪ್ಪಮೇವ ಸಮಿಜ್ಝತು;

ಪೂರೇನ್ತು ಚಿತ್ಥಸಂಕಪ್ಪಾ, ಚನ್ದೋ ಪಣ್ಣರಸೋ ಯಥಾ.

೫. ಇಚ್ಛಿತಂ ಪತ್ಥಿತಂ ತುಯ್ಹಂ, ಸಬ್ಬಮೇವ ಸಮಿಜ್ಝತು;

ಪೂರೇನ್ತು ಚಿತ್ತಸಂಕಪ್ಪಾ, ಮಣಿಜೋತಿರಸೋ ಯಥಾತಿ.

ವತ್ವಾ ಮಙ್ಗಲಂ ವಡ್ಢೇತ್ವಾ ಅಗಮಾಸಿ. ಅಥನ್ತರಾಮಗ್ಗೇ ಠಿತಾ ಘಟಚೇಟಿಕಾ ಪಚ್ಚೇಕಬುದ್ಧಾಭಿಮುಖಂ ಗನ್ತ್ವಾ ಮಧುಂ ಲಭಿತ್ಥ ಭನ್ತೇತಿ ಪುಚ್ಛಿ. ತೇನ ಲದ್ಧಂ ಭಗಿನೀತಿ ವುತ್ತೇ ಕಿಂ ವತ್ವಾ ಸೋ ಅದಾಸೀತಿ ಪುಚ್ಛಿ. ಪಚ್ಚೇಕಬುದ್ಧೋ ಸಬ್ಬಂ ಕಥೇಸಿ. ಸಾ ತಂ ಸುತ್ವಾ ಥೋಕಂ ಭನ್ತೇ ಇಧೇವ ಹೋಥ ದಾಸಿಯಾ ಅನುಗ್ಗಹತ್ಥಾಯಾತಿ ಸೀಘಂ ಗೇಹಂ ಗನ್ತ್ವಾ ನಿವತ್ಥಪಿಳೋತಿಕಾ ಅತ್ತನೋ ಸಾಟಕಂ ಧೋವಿತ್ವಾ ಆಹರಿತ್ವಾ ಚುಮ್ಬಟಕಂ ಕತ್ವಾ ಪಚ್ಚೇಕಬುದ್ಧಸ್ಸ ಅದಾಸಿ, ಯದಾ ಸೋ ಭನ್ತೇ ಮಧುದಾಯಕೋ ಸಕಲಜಮ್ಬುದೀಪೇ ಏಕರಜ್ಜಂ ಕಾರೇತಿ. ತದಾಹಂ ತಸ್ಸ ಅಗ್ಗಮಹೇಸೀ ಭವೇಯ್ಯಂತಿ ವತ್ವಾ ಪತ್ಥನಂ ಕರೋನ್ತೀಏವಮಾಹ.

೬. ಯದಾ ತೇ ಮಧುದೋ ಭನ್ತೇ, ಭೂಭುಜೋ ಹೋತಿ ಭೂತಲೇ;

ತಸ್ಸ ಹೇಸ್ಸಂ ತದಾ ಭನ್ತೇ, ಪಿಯಾ ಅಗ್ಗಮಹೇಸಿಕಾ.

೭. ಸುರೂಪಾಚ ಸುವಾಣೀಚ, ಸುಯಸಾ ಸುಬ್ಬತಾ ಸುಭಾ;

ಅಸ್ಸಂ ತಸ್ಸ ಪಿಯಾಚಾಥ, ಮನಾಪಾ ಇಚ್ಛದಾ [ಇಚ್ಛಿದಾ ಇತಿಪಿಕತ್ಥಚಿ] ಸದಾತಿ.

ತಸ್ಸಾಪಿ ತದಾ ಪಚ್ಚೇಕಬುದ್ಧೋ ತಥೇವ ಹೋತೂತಿ ಮಙ್ಗಲಂ ವತ್ವಾ ಆಕಾಸೇನ ಗನ್ಧಮಾದನಮೇವ ಅಗಮಾಸಿ, ಅಥಾಪರಭಾಗೇ ತೇ ತಯೋಪಿ ಏಕತೋ ಹುತ್ವಾ ಮಧುಲೋಕನಂ ಕರೋನ್ತಾ ತಂ ಮಧುಘಟಂ ಕುಹಿಂತಿ ಪುಚ್ಛಿಂಸು, ಸೋ ತೇನತ್ತನಾ ಕತಕಮ್ಮಂ ವತ್ವಾ ಸಚೇ ತುಮ್ಹೇ ತಸ್ಮಿಂ ಪತ್ತಿಂ ಅನುಮೋದೇಯ್ಯಾಥ, ತಂ ಸಾಧು. ನೋ ಚೇ. ಮಧುಅಗ್ಘನಕಂ ಮಮ ಹತ್ಥತೋ ಗಣ್ಹಥಾತಿ ವತ್ವಾ ತೇಹಿ ತತೋ ನ ನೋ ಅತ್ಥೋ [ನನೋಹತ್ಥೋ ಇತಿಸಬ್ಬತ್ಥ] ಮಧುನಾ, ಕೀದಿಸಸ್ಸೇತಂ ಅದಾಸೀತಿ ವುತ್ತೇ ತಂ ಸುತ್ವಾ ಇತರೋ ಪಚ್ಚೇಕಬುದ್ಧಾ ನಾಮೇ ತೇ ಗನ್ಧಮಾದನೇ ವಸನ್ತಿ ಕಾಸಾವಂ ಪಾರುಪಿತ್ವಾ ಕುಲೇ ಕುಲೇ ಭಿಕ್ಖಂ ಚರನ್ತಿ, ಸನ್ತೋ ಏತೇ ಸೀಲವನ್ತಾತಿ ಕಥೇಸಿ, ಅಥ ತೇಸು ಜೇಟ್ಠೋ ಬ್ರಾಹ್ಮಣಚಣ್ಡಾಲಕಾಪಿ ಕಾಸಾವಂ ಪರಿದಹಿತ್ವಾ ಚರನ್ತಿ. ನೂನಾಯಂ ಚಣ್ಡಾಲಕೋತಿ ಮಞ್ಞಾಮೀತಿ ಆಹ, ಮಜ್ಝಿಮೋ ಕುಜ್ಝಿತ್ವಾ ತವ ಪಚ್ಚೇಕಬುದ್ಧಂ ಪರಸಮುದ್ದೇ ಖಿಪಾಹೀತಿ ಅವೋಚ, ಅಥ ತೇಸಂ ಕಥಂ ಸುತ್ವಾ ಮಧುದಾಯಕೋ ಮಾ ಭೋ ತುಮ್ಹೇ ಅರಿಯಾನಂ ಮಹೇಸಕ್ಖಾನಂ ಮಹಾನುಭಾವಾನಂ ಪಚ್ಚೇಕಬುದ್ಧಾನಂ ಫರುಸಂ ಕಥೇಥ. ನಿರಯದುಕ್ಖಾ ನ ಭಾಯಥಾತಿಆದಿನಾ ಅನೇಕಾ ಕಾರೇನ ನಿವಾರೇತ್ವಾ ತೇಸಂ ಗುಣಂ ಪಕಾಸೇಸಿ, ತಂ ಸುತ್ವಾ ತೇ ಉಭೋಪಿ ಸಾಧೂತಿ ಪಸನ್ನಾಚಿತ್ತಾ ಅನುಮೋದಿಂಸು, ಅಪರಭಾಗೇ ತೇ ಕಾಲಂ ಕತ್ವಾ ದೇವಮನುಸ್ಸೇಸು ಸಂಸರನ್ತಾ ತತ್ಥ ತತ್ಥ ಮಹಾಸಮ್ಪತ್ತಿಯೋ ಅನುಭವಿತ್ವಾ ಅಮ್ಹಾಕಂ ಸತ್ಥು ಪರಿನಿಬ್ಬಾಣತೋ ದ್ವಿನ್ನಂ ವಸ್ಸಸತಾನಂ ಅಚ್ಚಯೇನ ಅತ್ತನೋ ಅತ್ತನೋ ಸಮ್ಪತ್ತಟ್ಠಾನೇ ನಿಬ್ಬತ್ತಿಂಸು. ತೇನ ವುತ್ತಂ.

೮. ಅಸೋಕೋ ಮಧುದೋ ಸನ್ಧಿ, ಮಿತ್ತಾದೇವೀ ತು ಚೇಟಿಕಾ;

ಚಣ್ಡಾಲವಾದೀ ನಿಗ್ರೋಧೋ, ತಿಸ್ಸೋ ಸೋ ಪಾರವಾದಿಕೋತಿ.

ತೇಸು ಚಣ್ಡಾಲವಾದೀ ಜೇಟ್ಠವಾಣಿಜೋ ಬಿನ್ದುಸಾರರಞ್ಞೋ ಜೇಟ್ಠಪುತ್ತಸ್ಸ ಸುಮನರಾಜಕುಮಾರಸ್ಸ ಪುತ್ತೋ ಹುತ್ವಾ ನಿಬ್ಬತ್ತಿ. ತಸ್ಸಾಯಮಾನುಪುಬ್ಬೀಕಥಾ. ಬಿನ್ದುಸಾರರಞ್ಞೋ ಕಿರ ದುಬ್ಬಲಕಾಲೇಯೇವ ಅಸೋಕಕುಮಾರೋ ಅತ್ತನಾ ಲದ್ಧಂ ಉಜ್ಜೇನಿಯಾ ರಜ್ಜಂ ಪಹಾಯ ಆಗನ್ತ್ವಾ ಸಬ್ಬನಗರಂ ಅತ್ತನೋ ಹತ್ಥಗತಂ ಕತ್ವಾ ಸುಮನರಾಜಕುಮಾರಂ ಅಗ್ಗಹೇಸಿ. ತಂ ದಿವಸಮೇವ ಸುಮನಸ್ಸ ರಾಜಕುಮಾರಸ್ಸ ಸುಮನಾ ನಾಮ ದೇವೀ ಪರಿಪುಣ್ಣಗಬ್ಭಾ ಅಹೋಸಿ. ಸಾ ಅಞ್ಞಾತಕವೇಸೇನ ನಿಕ್ಖಮಿತ್ವಾ ಅವಿದೂರೇ ಅಞ್ಞತರಂ ಚಣ್ಡಾಲಗಾಮಂ ಸನ್ಧಾಯ ಗಚ್ಛನ್ತೀ ಜೇಟ್ಠಕಚಣ್ಡಾಲಸ್ಸ ಗೇಹತೋ ಅವಿದೂರೇ ನಿಗ್ರೋಧೋ ಅತ್ಥಿ, ತಸ್ಮಿಂ ರುಕ್ಖೇ ಅಧಿವತ್ಥಾಯ ದೇವತಾಯ ಇತೋ ಏಹಿ ಸುಮನೇತಿ ವದನ್ತಿಯಾ ಸದ್ದಂ ಸುತ್ವಾ ತಸ್ಸಾ ಸಮೀಪಂ ಗತಾ, ದೇವತಾ ಅತ್ತನೋ ಆನುಭಾವೇನ ಏಕಂ ಸಾಲಂ ನಿಮ್ಮಿಣಿತ್ವಾ ಏತ್ಥ ವಸಾಹೀತಿ ಪಾದಾಸಿ. ಸಾ ತಂ ಸಾಲಂ ಪಾವಿಸಿ, ಗತದಿವಸೇಯೇವ ಸಾ ಪುತ್ತಂ ವಿಜಾಯಿ. ಸಾ ತಸ್ಸ ನಿಗ್ರೋಧದೇವತಾಯ ಪರಿಗ್ಗಹಿತತ್ತಾ ನಿಗ್ರೋಧೋತ್ವೇವ ನಾಮಂ ಅಕಾಸಿ. ಜೇಟ್ಠಕಚಣ್ಡಾಲೋ ದಿಟ್ಠದಿವಸತೋಪ್ಪಭುತಿ ತಂ ಅತ್ತನೋ ಸಾಮಿಧೀತರಂ ವಿಯ ಮಞ್ಞಮಾನೋ ನಿಬದ್ಧವತ್ತಂ ಪಟ್ಠಪೇಸಿ. ರಾಜಧೀತಾ ತತ್ಥ ಸತ್ತವಸ್ಸಾನಿ ವಸಿ, ನಿಗ್ರೋಧಕುಮಾರೋಪಿ ಸತ್ತವಸ್ಸಿಕೋ ಜಾತೋ, ತದಾ ಮಹಾವರುಣತ್ಥೇರೋ ನಾಮ ಏಕೋ ಅರಹಾ ದಾರಕಸ್ಸ ಹೇತುಸಮ್ಪದಂ ದಿಸ್ವಾ ವಿಹರಮಾನೋ ಸತ್ತವಸ್ಸಿಕೋ ದಾನಿ ದಾರಕೋ. ಕಾಲೋ ನಂ ಪಬ್ಬಾಜೇತುಂತಿ ಚಿನ್ತೇತ್ವಾ ರಾಜಧೀತಾಯ ಆರೋಚಾಪೇತ್ವಾ ನಿಗ್ರೋಧಕುಮಾರಂ ಪಬ್ಬಾಜೇಸಿ, ಕುಮಾರೋ ಖುರಗ್ಗೇಯೇವ ಅರಹತ್ತಂ ಪಾಪುಣಿ. ತೇನ ವುತ್ತಂ ಮಹಾವಂಸೇ.

೯. ತಂ ಮಹಾವರುಣೋ ಥೇರೋ, ತದಾ ದಿಸ್ವಾ ಕುಮಾರಕಂ;

ಉಪನಿಸ್ಸಯಸಮ್ಪನ್ನಂ, ಅರಹಾ ಪುಚ್ಛಿ ಮಾತರಂ;

ಪಬ್ಬಾಜೇಸಿ ಖುರಗ್ಗೇ ಸೋ, ಅರಹತ್ತಮಪಾಪುಣೀತಿ.

ಸೋ ಕಿರ ಏಕದಿವಸಂ ಪಾತೋವ ಸರೀರಂ ಪಟಿಜಗ್ಗಿತ್ವಾ ಆಚರಿಯುಪಜ್ಝಾಯವತ್ತಂ ಕತ್ವಾ ಪತ್ತಚೀವರ ಮಾದಾಯ ಮಾತುಉಪಾಸಿಕಾಯ ಗೇಹದ್ವಾರಂ ಗಚ್ಛಾಮೀತಿ ನಿಕ್ಖಮಿ. ಮಾತುನಿವಾಸಟ್ಠಾನಞ್ಚಸ್ಸ ದಕ್ಖಿಣದ್ವಾರೇನ ನಗರಂ ಪವಿಸಿತ್ವಾ ನಗರಮಜ್ಝೇನ ಗನ್ತ್ವಾ ಪಾಚೀನದ್ವಾರೇನ ನಿಕ್ಖಮಿತ್ವಾ ಗನ್ತಬ್ಬಂ ಹೋತಿ. ತೇನ ಚ ಸಮಯೇನ ಅಸೋಕೋ ಧಮ್ಮರಾಜಾ ಪಾಚೀನದಿಸಾಭಿಮುಖೋ ಸೀಹಪಞ್ಜರೇ ಚಙ್ಕಮತಿ. ತಂ ಖಣಂಯೇವ ನಿಗ್ರೋಧೋ ರಾಜಙ್ಗಣಂ ಸಮ್ಪಾಪುಣಿ ಸನ್ತಿನ್ದ್ರಿಯೋ ಸನ್ತಮಾನಸೋ ಯುಗಮತ್ತಂ ಪೇಕ್ಖಮಾನೋ, ತೇನ ವುತ್ತಂ ಏಕದಿವಸಂ ಸೀಹಪಞ್ಜರೇ ಠಿತೋ ಅದ್ದಸ ನಿಗ್ರೋಧಂ ಸಾಮಣೇರಂ ರಾಜಙ್ಗಣೇನ ಗಚ್ಛನ್ತಂ ದನ್ತಂ ಗುತ್ತಂ ಸನ್ತಿನ್ದ್ರಿಯಂ ಇರಿಯಾಪಥಸಮ್ಪನ್ನನ್ತಿ. ದಿಸ್ವಾ ಪನಸ್ಸ ಏತದಹೋಸಿ. ಅಯಂ ಜನೋ ಸಬ್ಬೋಪಿ ವಿಕ್ಖಿತ್ತಚಿತ್ತೋ ಭನ್ತಮಿಗಪಟಿಭಾಗೋ. ಅಯಂ ಪನ ದಹರಕೋ ಅವಿಕ್ಖಿತ್ತೋ ಅತಿವಿಯಸ್ಸ ಆಲೋಕಿತವಿಲೋಕಿತಂ ಸಮ್ಮಿಞ್ಜನಪಸಾರಣಞ್ಚ ಸೋಭತಿ. ಅದ್ಧಾ ಏತಸ್ಸಬ್ಭನ್ತರೇ ಲೋಕುತ್ತರಧಮ್ಮೋ ಭವಿಸ್ಸತೀತಿ ರಞ್ಞೋ ಸಹ ದಸ್ಸನೇನೇವ ಸಾಮಣೇರೇ ಚಿತ್ತಂ ಪಸೀದಿ, ಪೇಮಂ ಸಣ್ಠಹಿ, ಕಸ್ಮಾ. ಪುಬ್ಬೇ ಕಿರ ಪುಞ್ಞಕರಣಕಾಲೇ ರಞ್ಞೋ ಜೇಟ್ಠಕಭಾತಾ ವಾಣಿಜಕೋಯಂ.

೧೦. ಪುಬ್ಬೇವ [ಪುಬ್ಬೇನ ಇತಿಕತ್ಥಚಿ] ಸನ್ನಿವಾಸೇನ, ಪಚ್ಚುಪ್ಪನ್ನಹಿತೇನ ವಾ;

ಏವಂ ತಂ ಜಾಯತೇ ಪೇಮಂ, ಉಪ್ಪಲಂವ ಯಥೋದಕೇತಿ.

ಅಥ ರಾಜಾ ಸಞ್ಜಾತಪೇಮೋ ಸಬಹುಮಾನೋ ಸಾಮಣೇರಂ ಪಕ್ಕೋಸಥಾತಿ ಅಮಚ್ಚೇ ಪೇಸೇಸಿ, ತೇ ಅತಿಚಿರಾಯನ್ತೀತಿ ಪುನ ದ್ವೇ ತಯೋ ಪೇಸೇಸಿ ತುರಿತಂ ಆಗಚ್ಛತೂತಿ. ಸಾಮಣೇರೋ ಅತ್ತನೋ ಪಕತಿಯಾ ಏವ ಅಗಮಾಸಿ. ರಾಜಾ ಪತಿರೂಪಾಸನಂ ಞತ್ವಾ ನಿಸೀದಥಾತಿ ಆಹ. ಸೋ ಇತೋಚಿತೋ ಚ ವಿಲೋಕೇತ್ವಾ ನತ್ಥಿ ದಾನಿ ಅಞ್ಞೋ ಭಿಕ್ಖೂತಿ ಸಮುಸ್ಸಿತಸೇತಚ್ಛತ್ತಂ ರಾಜಪಲ್ಲಙ್ಕಂ ಉಪಸಙ್ಕಮಿತ್ವಾ ಪತ್ತಂ ಗಣ್ಹನತ್ಥಾಯ ರಞ್ಞೋ ಆಕಾರಂ ದಸ್ಸೇಸಿ. ರಾಜಾ ತಂ ಪಲ್ಲಙ್ಕಸಮೀಪಂ ಗಚ್ಛನ್ತಂ ಏವ ದಿಸ್ವಾ ಚಿನ್ತೇಸಿ ಅಜ್ಜೇವ ದಾನಿ ಅಯಂ ಸಾಮಣೇರೋ ಇಮಸ್ಸ ಗೇಹಸ್ಸ ಸಾಮಿಕೋ ಭವಿಸ್ಸತೀತಿ, ಸಾಮಣೇರೋ ರಞ್ಞೋ ಹತ್ಥೇ ಪತ್ತಂ ದತ್ವಾ ಪಲ್ಲಙ್ಕಂ ಅಭಿರುಹಿತ್ವಾ ನಿಸೀದಿ. ರಾಜಾ ಅತ್ತನೋ ಅತ್ಥಾಯ ಸಮ್ಪಾದಿತಂ ಸಬ್ಬಂ ಯಾಗುಖಜ್ಜಕಭತ್ತವಿಕತಿಂ ಉಪನಾಮೇಸಿ. ಸಾಮಣೇರೋ ಅತ್ತನೋ ಯಾಪನಮತ್ತಮೇವ ಸಮ್ಪಟಿಚ್ಛಿ. ಭತ್ತಕಿಚ್ಚಾವಸಾನೇ ರಾಜಾ ಆಹ ಸತ್ಥಾರಾ ತುಮ್ಹಾಕಂ ದಿನ್ನಓವಾದಂ ಜಾನಾಥಾತಿ. ಜಾನಾಮಿ ಮಹಾರಾಜ ಏಕದೇಸೇನಾತಿ. ತಾತ ಮಯ್ಹಮ್ಪೀ ನಂ ಕಥೇಹೀತಿ. ಸಾಧು ಮಹಾರಾಜಾತಿ ರಞ್ಞೋ ಅನುರೂಪಂ ಧಮ್ಮಪಏದ ಅಪ್ಪಮಾದವಗ್ಗಂ ಅನುಮೋದನತ್ಥಾಯ ಅಭಾಸಿ. ರಾಜಾ ಪನ ಅಪ್ಪಮಾದೋ ಅಮತಪದಂ, ಪಮಾದೋ ಮಚ್ಚುನೋ ಪದಂತಿ ಸುತ್ವಾವ ಅಞ್ಞಾತಂ ತಾತ, ಪರಿಯೋಸಾಪೇಹೀತಿ ಆಹ. ಸಾಮಣೇರೋ ಅನುಮೋದನಾ ವಸಾನೇ ದ್ವತ್ತಿಂಸಧುವಭತ್ತಾನಿ [ದ್ವಿತ್ತಿಂಸಧುರಭತ್ತಾನಿ ಇತಿಸಬ್ಬತ್ಥ] ಲಭಿತ್ವಾ ಪುನ ದಿವಸೇ ದ್ವತ್ತಿಂಸಭಿಕ್ಖೂ ಗಹೇತ್ವಾ ರಾಜನ್ತೋಪುರಂ ಪವಿಸಿತ್ವಾ ಭತ್ತಕಿಚ್ಚ ಮಕಾಸಿ. ರಾಜಾ ಅಞ್ಞೇಪಿ ದ್ವತ್ತಿಂಸಭಿಕ್ಖೂ ತುಮ್ಹೇಹಿ ಸದ್ಧಿಂಸ್ವೇ ಭಿಕ್ಖಂ ಗಣ್ಹನ್ತೂತಿ ಏತೇನೇವ ಉಪಾಯೇನ ದಿವಸೇ ದಿವಸೇ ವಡ್ಢಾಪೇನ್ತೋ ಸಟ್ಠಿಸಹಸ್ಸಾನಂ ಬ್ರಾಹ್ಮಣಪರಿಬ್ಬಾಜಕಾನಂ ಭತ್ತಂ ಉಪಚ್ಛಿನ್ದಿತ್ವಾ ಅನ್ತೋನಿವೇಸನೇ ಸಟ್ಠಿಸಹಸ್ಸಾನಂ ಭಿಕ್ಖೂನಂ ನಿಚ್ಚಭತ್ತಂ ಪಟ್ಠಪೇಸಿ ನಿಗ್ರೋಧತ್ಥೇರಗತೇನೇವ ಪಸಾದೇನ. ನಿಗ್ರೋಧತ್ಥೇರೋಪಿ ರಾಜಾನಂ ಸಪರಿಸಂ ತೀಸು ಸರಣೇಸು ಪಞ್ಚಸು ಸೀಲೇಸು ಪತಿಟ್ಠಾಪೇತ್ವಾ ಬುದ್ಧಸಾಸನೇ ಪೋಥುಜ್ಜನಿಕೇನ ಪಸಾದೇನ ಅಚಲಪ್ಪಸಾದಂ ಕತ್ವಾ ಪತಿಟ್ಠಾಪೇಸಿ. ರಾಜಾಪಿ ಅಸೋಕಾರಾಮಂ ನಾಮ ಮಹಾವಿಹಾರಂ ಕಾರಾಪೇತ್ವಾ ಸಟ್ಠಿಸಹಸ್ಸಾನಂ ಭಿಕ್ಖೂನಂ ನಿಚ್ಚಭತ್ತಂ ಪಟ್ಠಪೇಸಿ. ಸಕಲಜಮ್ಬುದೀಪೇ ಚತುರಾಸೀತಿಯಾ ನಗರಸಹಸ್ಸೇಸು ಚತುರಾಸೀತಿವಿಹಾರಸಹಸ್ಸಾನಿ ಕಾರಾಪೇಸಿ. ತೇನ ವುತ್ತಂ.

೧೧. ಚಣ್ಡಾಲವಾದಿದೋಸೇನ,

ಜಾತೋ ಚಣ್ಡಾಲಗಾಮಕೇ;

ಪತ್ತಾನುಮೋದನಾ ಪಾಕಾ,

ಆಸೇ ಸೋ [ಅಸೇಸೋ ಇತಿಪಿಕತ್ಥಚಿ] ಹಿ ಅನಾಸವೋತಿ.

ಅಯಂ ನಿಗ್ರೋಧತ್ಥೇರಸ್ಸ ಕಥಾನಯೋ.

ಮಧುದಾಯಕೋ ಪನ ವಾಣಿಜೋ ದೇವಲೋಕತೋ ಚವಿತ್ವಾ ಪುಪ್ಫಪುರೇ ರಾಜಕುಲೇ ಉಪ್ಪಜ್ಜಿತ್ವಾ ಪಿಯದಾಸೋ ನಾಮ ಕುಮಾರೋ ಹುತ್ವಾ ಛತ್ತಂ ಉಸ್ಸಾಪೇತ್ವಾ ಸಕಲಜಮ್ಬುದೀಪೇ ಏಕರಜ್ಜಂ ಅಕಾಸಿ. ಕಥಂ.

ಬಿನ್ದುಸಾರರಾಜಸ್ಸ ಏಕಸತಪುತ್ತಾ ಅಹೇಸುಂ. ತೇ ಸಬ್ಬೇ ಅಸೋಕೋ ಅತ್ತನಾ ಸದ್ಧಿಂ ಏಕಮಾತಿಕಂ ತಿಸ್ಸಕುಮಾರಂ ಠಪೇತ್ವಾ ಘಾತೇಸಿ. ಘಾತೇನ್ತೋ ಚತ್ತಾರಿ ವಸ್ಸಾನಿ ಅನಭಿಸಿತ್ತೋವ ರಜ್ಜಂ ಕಾರೇತ್ವಾ ಚತುನ್ನಂ ವಸ್ಸಾನಂ ಅಚ್ಚಯೇನ ತಥಾಗತಸ್ಸ ಪರಿನಿಬ್ಬಾಣತೋ ದ್ವಿನ್ನಂ ವಸ್ಸಸತನಂ ಉಪರಿ ಅಟ್ಠಾರಸಮೇ ವಸ್ಸೇ ಸಕಲಜಮ್ಬುದೀಪೇ ಏಕರಜ್ಜಾಭಿಸೇಕಂ ಪಾಪುಣಿ. ಅಥ ತಂ ಸಕಲಜಮ್ಬುದೀಪೇ ಚತುರಾಸೀತಿನಗರಸಹಸ್ಸೇ ರಾಜಾನೋ ಆಗನ್ತ್ವಾ ಉಪಟ್ಠಹಿಸ್ಸನ್ತಿ. ತಿಣ್ಣಂ ಉತೂನಂ ಅನುಚ್ಛವಿಕಾ ತಯೋ ಪಾಸಾದಾ ಅಹೇಸುಂ. ಏಕೋ ಮಹಾಸಪ್ಪಿಕೋ, ಏಕೋ ಮೋರಗೀವೋ, ಏಕೋ ಮಙ್ಗಲೋ ನಾಮ, ತೇಸು ನೇಕನಾಟಕಸಹಸ್ಸಪರಿವುತೋ ಪಟಿವಸತಿ. ಯಾಸ್ಸ ಮಧುಆಪಣಂ ದಸ್ಸೇಸಿ, ಸಾ ಅಸನ್ಧಿಮಿತ್ತಾ ನಾಮ ದೇವಚ್ಛರಪರಿಭಾಗಾ ರಾಜಧೀತಾ ಹುತ್ವಾ ಸಟ್ಠಿಸಹಸ್ಸಾನಂ ಇತ್ಥೀನಂ ಜೇಟ್ಠಿಕಾ ಧಮ್ಮಾಸೋಕರಞ್ಞೋ ಅಗ್ಗಮಹೇಸೀ ಅಹೋಸಿ. ಅಭಿಸೇಕಾನನ್ತರಂ ತಸ್ಸ ಇಮಾ ರಾಜಿದ್ಧಿಯೋ ಆಗತಾ, ಪಥವಿಯಾ ಚ ಹೇಟ್ಠಾ ಯೋಜನಪ್ಪಮಾಣೇ ಆಣಾ ಪವತ್ತತಿ. ತಥಾ ಉಪರಿ ಆಕಾಸೇ. ಅನೋತತ್ತದಹತೋ ಅಟ್ಠಹಿ ಕಾಜೇಹಿ ಸೋಳಸಪಾನೀಯಘಟೇ ದಿವಸೇ ದಿವಸೇ ದೇವತಾ ಆಹರನ್ತಿ. ಯತೋ ಸಾಸನೇ ಉಪ್ಪನ್ನಸದ್ಧೋ ಹುತ್ವಾ ಅಟ್ಠಘಟೇ ಭಿಕ್ಖುಸಙ್ಘಸ್ಸ ಅದಾಸಿ. ದ್ವೇ ಘಟೇ ಸಟ್ಠಿಮತ್ತಾನಂ ತೇಪಿಟಕಭಿಕ್ಖೂನಂ ದ್ವೇ ಘಟೇ ಅಗ್ಗಮಹೇಸಿಯಾ ಅಸನ್ಧಿಮಿತ್ತಾಯ. ಚತ್ತಾರೋ ಘಟೇ ಅತ್ತನಾ ಪರಿಭುಞ್ಚಿ ದೇವತಾ [ದೇವತಾಏವಂ ಇತಿಸಬ್ಬತ್ಥ], ಏವ ಹಿಮವನ್ತತೋ ನಾಗಲತಾದನ್ತಕಟ್ಠಂ ಸಿನಿದ್ಧಂ ಮುದುಕಂ ರಸವನ್ತಂ ದಿವಸೇ ದಿವಸೇ ಆಹರನ್ತಿ, ತೇನ ರಞ್ಞೋ ಚ ಮಹೇಸಿಯಾ ಚ ಸೋಳಸನ್ನಂ ನಾಟಕಸಹಸ್ಸಾನಞ್ಚ ಸಟ್ಠಿಮತ್ತಾನಞ್ಚ ಭಿಕ್ಖುಸಹಸ್ಸಾನಂ ದೇವಸಿಕಂ ದನ್ತಪೋಣಕಿಚ್ಚಂ ನಿಪ್ಫಜ್ಜತಿ. ದೇವಸಿಕಮೇವಸ್ಸ ದೇವತಾ ಅಗದಾಮಲಕಂ ಅಗದಹರೀಟಕಂ ಸುವಣ್ಣವಣ್ಣಞ್ಚ ಗನ್ಧರಸಸಮ್ಪನ್ನಂ ಅಮ್ಬಪಕ್ಕಂ ಆಹರನ್ತಿ. ಛದ್ದನ್ತದಹತೋ ಪಞ್ಚವಣ್ಣಂ ನಿವಾಸನಪಾರುಪನಂ ಪೀತಕವಣ್ಣಂ ಹತ್ಥಪುಞ್ಛನಕಪಟಂ [ಹತ್ಥಪುಚ್ಛನಕಪಟ್ಟಂ ಇತಿಸಬ್ಬತ್ಥ] ದಿಬ್ಬಞ್ಚ ಪಾನಂ ಆಹರನ್ತಿ. ದೇವಸಿಕಮೇವಸ್ಸ ಅನುಲೇಪನಗನ್ಧಂ ಪಾರುಪನತ್ಥಾಯ ಅಸುತ್ತಮಯಿಕಂ ಸುಮನಪುಪ್ಫಪಟಂ ಮಹಾರಹಞ್ಜ ಅಞ್ಜನಂ ನಾಗಭವನತೋ ನಾಗರಾಜಾನೋ ಆಹರನ್ತಿ. ಛದ್ದನ್ತದಹತೋಯೇವ ಉಟ್ಠಿತಸ್ಸ ಸಾಲಿನೋ ನವವಾಹಸಹಸ್ಸನಿ ದಿವಸೇ ದಿವಸೇ ಸುವಾ ಆಹರನ್ತಿ. ತೇ ಮೂಸಿಕಾ ನಿತ್ಥುಸಕಾನಿ ಕರೋನ್ತಿ. ಏಕೋಪಿ ಖಣ್ಡತಣ್ಡುಲೋ ನಾಹೋಸಿ. ರಞ್ಞೋ ಸಬ್ಬಟ್ಠಾನೇಸು ಅಯಮೇವ ತಣ್ಡುಲೋ ಪರಿಭೋಗಂ ಗಚ್ಛತಿ. ಮಧುಮಕ್ಖಿಕಾ ಮಧುಂ ಕರೋನ್ತಿ. ಕಮ್ಮಾರಸಾಲಾಸು ಅಚ್ಛಾ ಕೂಟಂ ಪಹರನ್ತಿ. ಕರವೀಕಸಕುಣಾ ಆಗನ್ತ್ವಾ ಮಧುರಸ್ಸರಂ ವಿಕೂಜೇನ್ತಾ ರಞ್ಞೋ ಬಲಿಕಮ್ಮಂ ಕರೋನ್ತಿ. ಇಮಾಹಿ ಇದ್ಧೀಹಿ ಸಮನ್ನಾಗತೋ ರಾಜಾ ಏಕದಿವಸಂ ಸುವಣ್ಣಸಙ್ಖಲಿಕಬನ್ಧನಂ ಪೇಸೇತ್ವಾ ಚತುನ್ನಂ ಬುದ್ಧಾನಂ ಅಧಿಗತರೂಪದಸ್ಸನಂ ಕಪ್ಪಾ ಯುಕಂ ಮಹಾಕಾಲನಾಗರಾಜಾನಂ ಆನಯಿತ್ವಾ ಸೇತಚ್ಛತ್ತಸ್ಸ ಹೇಟ್ಠಾ ಮಹಾರಹೇ ಪಲ್ಲಙ್ಕೇ ನಿಸೀದಾಪೇತ್ವಾ ಅನೇಕಸತ ವಣ್ಣೇಹಿ ಜಲಜಥಲಜಪುಪ್ಫೇಹಿ ಸುವಣ್ಣಪುಪ್ಫೇಹಿ ಚ ಪೂಜಂ ಕತ್ವಾ ಸಬ್ಬಾ ಲಙ್ಕಾರಪತಿಮಣ್ಡಿತೇಹಿ ಸೋಳಸಹಿ ನಾಟಕಸಹಸ್ಸೇಹಿ ಸಮನ್ತತೋ ಪರಿಕ್ಖಿಪಿತ್ವಾ ಅನನ್ತಞಾಣಸ್ಸ ತಾವ ಮೇ ಸದ್ಧಮ್ಮವರಚಕ್ಕವತ್ತಿನೋ ಸಮ್ಮಾಸಮ್ಬುದ್ಧಸ್ಸ [ಸಮ್ಮಾಸಮ್ಬುದ್ಧರೂಪಂ ಇತಿಸಬ್ಬತ್ಥ] ರೂಪಂ ಇಮೇಸಂ ಅಕ್ಖೀನಂ ಆಪಾಥಂ ಕರೋಹೀತಿ ವತ್ವಾ ತೇನ ನಿಮ್ಮಿತಂ ಸಕಲಸರೀರೇ ವಿಪ್ಪಕಿಣ್ಣಪುಞ್ಞಪ್ಪಭಾವನಿಬ್ಬತ್ತಾಸೀತಿ ಅನುಬ್ಯಞ್ಜನಪತಿಮಣ್ಡಿತ ದ್ವತ್ತಿಂಸ ಮಹಾಪುರಿಸಲಕ್ಖಣ ಸಸ್ಸಿರೀಕತಾಯ ವಿಕಚಕಮಲುಪ್ಪಲಪುಣ್ಡರೀಕಪತಿಮಣ್ಡಿತಮಿವ ಸಲಿಲತಲಂ ತಾರಾಗಣರಂಸಿಜಾಲವಿಸರವಿಪ್ಫುರಿತಸೋಭಾಸಮುಜ್ಜಲಮಿವ ಗಗನತಲಂ ನೀಲಪೀತಲೋಹಿತಾ ದಿಭೇದಂ ವಿಚಿತ್ತವಣ್ಣರಂಸಿವಿನದ್ಧಬ್ಯಾಮಪ್ಪಭಾಪರಿಕ್ಖೇಪವಿಲಾಸಿತಾಯ ಸಞ್ಚ್ಯಾಪ್ಪಭಾನುರಾಗಇನ್ದಧನುವಿಜ್ಜುಲ್ಲತಾಪರಿಕ್ಖಿತ್ತಮಿವ ಕಣಕಗಿರಿಸಿಖರಂ ನಾನಾವಿರಾಗವಿಮಲಕೇತುಮಾಲಾಸಮುಜ್ಜಲಿತಚಾರುಮತ್ಥಕಸೋಭನಂ ನಯನರಸಾಯನಮಿವ ಚ ಬ್ರಹ್ಮದೇವಮನುಜನಾಗಯಕ್ಖಗಣಾನಂ ಬುದ್ಧರೂಪಂ ಪಸ್ಸನ್ತೋ ಸತ್ತದಿವಸಾನಿ ಅಕ್ಖಿಪೂಜಂ ನಾಮ ಅಕಾಸಿ. ರಾಜಾ ಕಿರ ಅಭಿಸೇಕಂ ಪಾಪುಣಿತ್ವಾ ತೀಣಿಯೇವ ಸಂವಚ್ಛರಾನಿ ಬಾಹಿರಕಪಾಸಣ್ಡಂ ಪರಿಗಣ್ಹಿ, ಚತುತ್ಥೇ ಸಂವಚ್ಛರೇ ಬುದ್ಧಸಾಸನೇ ಪಸೀದಿ, ತಸ್ಸ ಪನ ಪಿತಾ ಬಿನ್ದುಸಾರೋ ಬ್ರಾಹ್ಮಣಭತ್ತೋ ಅಹೋಸಿ. ಸೋ ಬ್ರಾಹ್ಮಣಾನಞ್ಚ ಬ್ರಾಹ್ಮಣಜಾತಿಪಾಸಣ್ಡಾನಂ ಪಣ್ಡರಙ್ಗಪರಿಬ್ಬಾಜಕಾನಞ್ಚ ಸಟ್ಠಿಸಹಸ್ಸಮತ್ತಾನಂ ನಿಚ್ಚಭತ್ತಂ ಪಟ್ಠಪೇಸಿ. ಅಸೋಕೋಪಿ ಪಿತರಾ ಪವತ್ತಿತಂ ದಾನಂ ಅತ್ತನೋ ಅನ್ತೋಪುರೇ [ಅನ್ತೇಪುರೇ ಇತಿಸಬ್ಬತ್ಥ] ತಥೇವ ದದಮಾನೋ ಏಕದಿವಸಂ ಸೀಹಪಞ್ಜರೇ ಠಿತೋ ತೇ ಉಪಸಮಪರಿಬಾಹಿರೇನ ಆಚಾರೇನ ಭುಞ್ಜಮಾನೇ ಅಸಂಯತಿನ್ದ್ರಿಯೇ ಅವಿನೀತಇರಿಯಾಪಥೇ ದಿಸ್ವಾ ಚಿನ್ತೇಸಿ, ಈದಿಸಂ ದಾನಂ ಉಪಪರಿಕ್ಖಿತ್ವಾ ಯುತ್ತಟ್ಠಾನೇ ದಾತುಂ ವಟ್ಟತೀತಿ. ಏವಂ ಚಿನ್ತೇತ್ವಾ ಅಮಚ್ಚೇ ಆಹ, ಗಚ್ಛಥ ಭಣೇ ಅತ್ತನೋ ಅತ್ತನೋ ಸಾಧುಸಮ್ಮತೇ ಸಮಣಬ್ರಾಹ್ಮಣೇ ಅನ್ತೋಪುರಂ ಅಭಿಹರಥ ದಾನಂ ದಸ್ಸಾಮೀತಿ, ಅಮಚ್ಚಾ ಸಾಧು ದೇವಾತಿ ರಞ್ಞೋ ಪಟಿಸ್ಸುತ್ವಾ ತೇ ತೇ ಪಣ್ಡರಙ್ಗಪರಿಬ್ಬಾಜಕಾ ಜೀವಕ ನಿಗಣ್ಠಾದಯೋ ಆನೇತ್ವಾ ಇಮೇ ಮಹಾರಾಜ ಅಮ್ಹಾಕಂ ಅರಹನ್ತೋತಿ ಆಹಂಸು, ಅಥ ರಾಜಾ ಅನ್ತೋಪುರೇ ಉಚ್ಚಾವಚಾನಿ ಆಸನಾನಿ ಪಞ್ಞಾಪೇತ್ವಾ ಆಗಚ್ಛನ್ತೂತಿ ವತ್ವಾ ಆಗತಾಗತೇ ಆಹ ಅತ್ತನೋ ಅನುರೂಪೇ ಆಸನೇ ನಿಸೀದಥಾತಿ, ಏಕಚ್ಚೇ ಭದ್ದಪೀಠಕೇಸು ಏಕಚ್ಚೇ ಫಲಕಪೀಠಕೇಸು ನಿಸೀದಿಂಸು, ತಂ ದಿಸ್ವಾ ರಾಜಾ ನತ್ಥಿ ಏತೇಸಂ ಅನ್ತೋ ಸಾರೋತಿ ಞತ್ವಾ ತೇಸಂ ಅನುರೂಪಂ ಖಾದನೀಯಭೋಜನೀಯಂ ದತ್ವಾ ಉಯ್ಯೋಜೇಸಿ. ಏವಂ ಗಚ್ಛನ್ತೇ ಕಾಲೇ ಏಕದಿವಸಂ ಸೀಹಪಞ್ಜರೇ ಠಿತೋ ನಿಗ್ರೋಧಸಾಮಣೇರಂ ದಿಸ್ವಾ ತಸ್ಮಿಂ ಗತೇನ ಪಸಾದೇನ ಬುದ್ಧಸಾಸನೇ ಪಸನ್ನೋ ಸಟ್ಠಿಸಹಸ್ಸಮತ್ತೇ ಪಾಸಣ್ಡಿಯೇ ಅಪನೇತ್ವಾ ಸಟ್ಠಿಸಹಸ್ಸಮತ್ತೇ ಭಿಕ್ಖೂ ಭೋಜೇನ್ತೋ ಬುದ್ಧಸಾಸನೇ ಪಸೀದಿತ್ವಾ ಅಸೋಕಾರಾಮಂ ಕಾರೇತ್ವಾ ತತ್ಥ ತೇ ವಸಾಪೇನ್ತೋ ಏಕದಿವಸಂ ಅಸೋಕಾರಾಮೇ ಸಟ್ಠಿಸಹಸ್ಸಭಿಕ್ಖೂನಂ ದಾನಂ ದತ್ವಾ ತೇಸಂ ಮಜ್ಝೇ ನಿಸಜ್ಜ ಸಙ್ಘಂ ಚತೂಹಿ ಪಚ್ಚಯೇಹಿ ಪವಾರೇತ್ವಾ ಇಮಂ ಪಞ್ಹಂ ಪುಚ್ಛಿ, ಭನ್ತೇ ಭಗವತಾ ದೇಸಿತಧಮ್ಮೋ ನಾಮ ಕಿತ್ತಕೋ ಹೋತೀತಿ, ಮಹಾರಾಜ ನವ ಅಙ್ಗಾನಿ, ಖನ್ಧತೋ ಚತುರಾಸೀತಿಧಮ್ಮಕ್ಖನ್ಧಸಹಸ್ಸಾನೀತಿ. ರಾಜಾ ಧಮ್ಮೇ ಪಸೀದಿತ್ವಾ ಏಕೇಕಂ ಧಮ್ಮಕ್ಖನ್ಧಂ ಏಕೇಕವಿಹಾರೇನ ಪೂಜೇಸ್ಸಾಮೀತಿ ಏಕದಿವಸಮೇವ ಛನ್ನವುತಿಕೋಟಿಖನಂ ವಿಸ್ಸಜ್ಜೇತ್ವಾ ಅಮಚ್ಚೇ ಆಣಾಪೇಸಿ, ಏಕಮೇಕಸ್ಮಿಂ ನಗರೇ ಏಕಮೇಕಂ ವಿಹಾರಂ ಕಾರೇನ್ತಾ ಚತುರಾಸೀತಿಯಾ ನಗರಸಹಸ್ಸೇಸು ಚತುರಾಸೀತಿವಿಹಾರಸಹಸ್ಸಾನಿ ಕಾರಾಪೇಥಾತಿ, ಸಯಞ್ಚ ಅಸೋಕಾರಾಮೇ ಅಸೋಕಮಹಾವಿಹಾರತ್ಥಾಯ [ಸಯಂಚಅಸೋಕಹೋವಿಹಾರತ್ಥಾಯ ಇತಿಪಿಕತ್ಥಚಿ] ಕಮ್ಮಂ ಪಟ್ಠಪೇಸಿ, ಸಙ್ಘೋ ಇನ್ದಗುತ್ತತ್ಥೇರಂ ನಾಮ ಮಹಿದ್ಧಿಕಂ ಮಹಾನುಭಾವಂ ಖೀಣಾಸವಂ ನವಕಮ್ಮಾಧಿಟ್ಠಾಯಕಂ ಅದಾಸಿ, ಥೇರೋ ಯಂ ಯಂ ನ ನಿಟ್ಠಾತಿ, ತಂ ತಂ ಅತ್ತನೋ ಆನುಭಾವೇನ ನಿಟ್ಠಾಪೇಸಿ, ಏವಂಪಿತೀಹಿ ಸಂವಚ್ಛರೇಹಿ ವಿಹಾರಕಮ್ಮಂ ನಿಟ್ಠಾಪೇಸಿ, ಏಕದಿವಸಮೇವ ಸಬ್ಬನಗರೇಹಿ ಪಣ್ಣಾನಿ ಆಗಮಿಂಸು, ಅಮಚ್ಚಾ ರಞ್ಞೋ ಆರೋಚೇಸುಂ ನಿಟ್ಠಿತಾನಿ ದೇವ ಚತುರಾಸೀತಿಮಹಾವಿಹಾರಸಹಸ್ಸಾನೀತಿ. ಅಥ ರಾಜಾ ಭಿಕ್ಖುಸಙ್ಘಂ ಉಪಸಙ್ಕಮಿತ್ವಾ ಭನ್ತೇ ಮಯಾ ಚತುರಾಸೀತಿವಿಹಾರಸಹಸ್ಸಾನಿ ಕಾರಿತಾನಿ, ಧಾತುಯೋ ಕುತೋ ಲಚ್ಛಾಮೀತಿ ಪುಚ್ಛಿ, ಮಹಾರಾಜ ಧಾತುನಿಧಾನಂ ನಾಮ ಅತ್ಥೀತಿ ಸುಣೋಮ, ನ ಪನ ಪಞ್ಞಾಯತಿ ಅಸುಕಟ್ಠಾನೇತಿ. ರಾಜಾ ರಾಜಗಹೇ ಚೇತಿಯಂ ಭಿನ್ದಾಪೇತ್ವಾ ಧಾತುಂ ಅಪಸ್ಸನ್ತೋ ಪಟಿಪಾಕತಿಕಂ ಕಾರಾಪೇತ್ವಾ ಭಿಕ್ಖುಭಿಕ್ಖುಣಿಯೋ ಉಪಾಸಕಉಪಾಸಿಕಾಯೋತಿ ಚತಸ್ಸೋ ಪರಿಸಾ ಗಹೇತ್ವಾ ವೇಸಾಲಿಯಂ ಗತೋ. ತತ್ರಾಪಿ ಅಲಭಿತ್ವಾ ಕಪಿಲವತ್ಥುಂ ಗತೋ, ತತ್ರಾಪಿ ಅಲಭಿತ್ವಾ ರಾಮಗಾಮಂ ಗತೋ, ರಾಮಗಾಮೇ ನಾಗಾ ಚೇತಿಯಂ ಭಿನ್ದಿತುಂ ನಾದಂಸು. ಚೇತಿಯೇ ನಿಪತಿತಕುದ್ದಾಲೋ ಖಣ್ಡಾವಣ್ಡಂ ಹೋತಿ, ಏವಂ ತತ್ರಾಪಿ ಅಲಭಿತ್ವಾ ಅಲ್ಲಕಪ್ಪಂ ಪಾವಂ ಕುಸಿನಾರಂತಿ ಸಬ್ಬಚೇತಿಯಾನಿ ಭಿನ್ದಿತ್ವಾ ಧಾತುಂ ಅಲಭಿತ್ವಾ ಪಟಿಪಾಕತಿಕಾನಿ ಕತ್ವಾ ರಾಜಗಹಂ ಗನ್ತ್ವಾ ಚತಸ್ಸೋ ಪರಿಸಾ ಸನ್ನಿಪಾತಾಪೇತ್ವಾ ಅತ್ಥಿ ಕೇನಚಿ ಸುತಪುಬ್ಬಂ ಅಸುಕಟ್ಠಾನೇ ಧಾತುನಿಧಾನಂತಿ ಪುಚ್ಛಿ. ತತ್ಥೇಕೋ ವೀಸಂವಸ್ಸ ಸತಿಕೋ ಥೇರೋ ಅಸುಕಟ್ಠಾನೇ ಧಾತುನಿಧಾನಂತಿ ನ ಜಾನಾಮಿ, ಮಯ್ಹಂ ಪನ ಪಿತಾಮಹತ್ಥೇರೋ ಮಯಿ ಸತ್ತವಸ್ಸಿಕಾಲೇ ಮಾಲಾಚಙ್ಗೋಟಕಂ ಗಾಹಾಪೇತ್ವಾ ಏಹಿ ಸಾಮಣೇರ ಅಸುಕಗಚ್ಛನ್ತರೇ ಪಾಸಾಣಥೂಪೋ ಅತ್ಥಿ. ತತ್ಥ ಗಚ್ಛಾಮಾತಿ ಗನ್ತ್ವಾ ಪೂಜೇತ್ವಾ ಇಮಂ ಠಾನಂ ಉಪಧಾರೇತುಂ ವಟ್ಟತಿ ಸಾಮಣೇರಾತಿ ಆಹ. ಅಹಂ ಏತಮೇವ ಜಾನಾಮಿ ಮಹಾರಾಜಾತಿ ಆಹ. ರಾಜಾ ಏತದೇವ ಠಾನಂತಿ ವತ್ವಾ ಗಚ್ಛೇ ಹರಾಪೇತ್ವಾ ಪಾಸಾಣಥೂಪಂ ಪಂಸುಂಚ ಅಪನೇತ್ವಾ ಹೇಟ್ಠಾ ಸುಧಾಭೂಮಿಂ ಅದ್ದಸ, ತತೋ ಸುಧಾ ಚ ಇಟ್ಠಕಾಯೋ ಚ ಹರಾಪೇತ್ವಾ ಅನುಪುಬ್ಬೇನ ಪರಿವೇಣಂ ಓರುಯ್ಹ ಸತ್ತರತನವಾಲಿಕಂ ಅಸಿಹತ್ಥಾನಿ ಚ ಕಟ್ಠರೂಪಕಾನಿ ಸಮ್ಪರಿವತ್ತನ್ತಾನಿ ಅದ್ದಸ, ಸೋ ಯಕ್ಖದಾಸಕೇ ಪಕ್ಕೋಸಾಪೇತ್ವಾ ಬಲಿಕಮ್ಮಂ ಕಾರಾಪೇತ್ವಾಪಿ ನೇವ ಅನ್ತಂ ಪಸ್ಸನ್ತೋ ದೇವತಾ ನಮಸ್ಸಮಾನೋ ಅಹಂ ಇಮಾ ಧಾತುಯೋ ಗಹೇತ್ವಾ ಚತುರಾಸೀತಿವಿಹಾರಸಹಸ್ಸೇ ನಿದಹಿತ್ವಾ ಸಕ್ಕಾರಂ ಕರೋಮಿ. ಮಾ ಮೇ ದೇವತಾ ಅನ್ತರಾಯಂ ಕರೋನ್ತೂತಿ ಆಹ, ಸಕ್ಕೋ ದೇವರಾಜಾ ಚಾರಿಕಂ ಚರನ್ತೋ ತಂ ದಿಸ್ವಾ ವಿಸ್ಸಕಮ್ಮಂ ಆಮನ್ತೇತ್ವಾ ತಾತ ಅಸೋಕಧಮ್ಮರಾಜಾ ಧಾತುಯೋ ನೀಹರಿಸ್ಸಾಮೀತಿ ಪರಿವೇಣಂ ಓತಿಣ್ಣೋ. ಗನ್ತ್ವಾ ಕಟ್ಠರೂಪಾನಿ ನೀಹರಾಪೇಹೀತಿ. ಸೋ ಪಞ್ಚಚೂಲಕಗಾಮದಾರಕವೇಸೇನ ಗನ್ತ್ವಾ ರಞ್ಞೋ ಪುರತೋ ಧನುಕಹತ್ಥೋ ಠತ್ವಾ ಹಾರೇಮಿ ಮಹಾರಾಜಾತಿ ಆಹ, ಹರ ತಾತಾತಿ ಸರಂ ಗಹೇತ್ವಾ ಸನ್ಧಿಮ್ಹಿಯೇವ ವಿಜ್ಝಿ, ಸಬ್ಬಂ ವಿಪ್ಪಕಿರೀಯಿತ್ಥ, ಅಥ ರಾಜಾ ಆವಿಞ್ಜನೇ [ಅವಿಞ್ಚಿನೇ ಇತಿಪಿಕತ್ಥಚಿ] ಬನ್ಧಕುಞ್ಚಿಕಮುದ್ದಿಕಂ ಗಣ್ಹಿ, ಮಣಿಕ್ಖನ್ಧಂ ಪಸ್ಸಿತ್ವಾ ಅನಾಗತೇ ದಳಿದ್ದರಾಜಾನೋ ಇಮಂ ಮಣಿಂ ಗಹೇತ್ವಾ ಧಾತೂನಂ ಸಕ್ಕಾರಂ ಕರೋನ್ತೂತಿ ಪಣ್ಣೇ ಅಕ್ಖರಾನಿ ದಿಸ್ವಾ ಕುಜ್ಝಿತ್ವಾ ಮಾದಿಸಾನಂ ಪನ ರಾಜೂನಂ [ರಾಜಾನಂ ಇತಿಸಬ್ಬತ್ಥ] ದಳಿದ್ದರಾಜಾತಿ ವತ್ತುಂ ಅಯುತ್ತಂತಿ ಪುನಪ್ಪುನಂ ಘಟೇತ್ವಾ ದ್ವಾರಂ ವಿವರಿತ್ವಾ ಅನ್ತೋಗೇಹಂ ಪವಿಟ್ಠೋ ಅಟ್ಠಾರಸವಸ್ಸಾಧಿಕಾನಂ ದ್ವಿನ್ನಂ ವಸ್ಸಸತಾನಂ ಉಪರಿ ಆರೋಪಿತದೀಪಾ ತಥೇವ ಪಜ್ಜಲನ್ತಿ, ನೀಲುಪ್ಪಲಪುಪ್ಫಾನಿ ತಂಖಣಂಯೇವ ಆಹರಿತ್ವಾ ಆರೋಪಿತಾನಿ ವಿಯ ಪುಪ್ಫಸನ್ಥಾರೋ ತಂ ಖಣಂ ಸನ್ಥತೋ ವಿಯ ಗನ್ಧಾ ತಂ ಮುಹುತ್ತಂ ಪಿಂಸಿತ್ವಾ ಠಪಿತಾ ವಿಯ ಅಹೇಸುಂ. ರಾಜಾ ಸುವಣ್ಣಪಟ್ಟಂ ಗಹೇತ್ವಾ ಅನಾಗತೇ ಪಿಯದಾಸೋ ನಾಮ ಕುಮಾರೋ ಛತ್ತಂ ಉಸ್ಸಾಪೇತ್ವಾ ಅಸೋಕೋ ನಾಮ ಧಮ್ಮರಾಜಾ ಭವಿಸ್ಸತಿ, ಸೋ ಇಮಾ ಧಾತುಯೋ ವಿತ್ಥಾರಿತಾ ಕರಿಸ್ಸತೀತಿ ವಾಚೇತ್ವಾ ದಿಟ್ಠೋಹಂ ಅಯ್ಯೇನ ಮಹಾಕಸ್ಸಪತ್ಥೇರೇನಾತಿ ವತ್ವಾ ವಾಮಹತ್ಥಂ ಆಭುಜಿತ್ವಾ ದಕ್ಖಿಣಹತ್ಥೇನ ಅಪ್ಫೋಟೇಸಿ. ಸೋ ತಸ್ಮಿಂ ಠಾನೇ ಪರಿಚರಣಕಧಾತುಮತ್ತಮೇವ ಠಪೇತ್ವಾ ಸೇಸಧಾತುಯೋ ಸಬ್ಬಾ ಗಹೇತ್ವಾ ಧಾತುಘರಂ ಪುಬ್ಬೇ ಪಿಹಿತನಯೇನೇವ ಪಿದಹಿತ್ವಾ ಸಬ್ಬಾ ಯಥಾ ಪಕತಿಯಾಯೇವ ಕಾರೇತ್ವಾ ಉಪರಿಪಾಸಾಣಚೇತಿಯಂ ಪತಿಟ್ಠಾಪೇತ್ವಾ ಚತುರಾಸೀತಿಯಾ ವಿಹಾರಸಹಸ್ಸೇಸು ಧಾತುಯೋ ಪತಿಟ್ಠಾಪೇಸಿ. ಅಥೇಕದಿವಸಂ ರಾಜಾ ವಿಹಾರಂ ಗನ್ತ್ವಾ ಭಿಕ್ಖುಸಂಘಂ ವನ್ದಿತ್ವಾ ಏಕಮನ್ತೇ ನಿಸಿನ್ನೋ ಯದಿ ಭನ್ತೇ ಛನ್ನವುತಿಕೋಟಿಧನಂ ವಿಸ್ಸಜ್ಜೇತ್ವಾ ಚತುರಾಸೀತಿವಿಹಾರಸಹಸ್ಸಾನಿಸಚೇತಿಯಾನಿ ಕಾರಾಪೇತ್ವಾಪಿ ಅಹಂ ನ ದಾಯಾದೋ. ಅಞ್ಞೋ ಕೋ ದಾಯಾದೋತಿ, ಪಚ್ಚಯದಾಯಕೋ ನಾಮ ತ್ವಂ ಮಹಾರಾಜ, ಯೋ ಪನ ಅತ್ತನೋ ಪುತ್ತಞ್ಚ ಧೀತರಞ್ಚ ಪಬ್ಬಾಜೇತಿ, ಅಯಂ ಸಾಸನೇ ದಾಯಾದೋ ನಾಮಾತಿ ಏವಂ ವುತ್ತೇ ಅಸೋಕೋ ರಾಜಾ ಸಾಸನೇ ದಾಯಾದಭಾವಂ ಪತ್ಥಯಮಾನೋ ಅವಿದೂರೇ ಠಿತಂ ಮಹಿನ್ದಕುಮಾರಂ ದಿಸ್ವಾ ಸಕ್ಖಿಸ್ಸಸಿ ತಾತ ತ್ವಂ ಪಬ್ಬಜಿತುಂತಿ ಆಹ. ಕುಮಾರೋ ಪಕತಿಯಾ ಪಬ್ಬಜಿತುಕಾಮೋ ರಞ್ಞೋ ವಚನಂ ಸುತ್ವಾ ಅತಿವಿಯ ಪಾಮೋಜ್ಜಜಾತೋ ಪುಬ್ಬಜಾಮಿ [ಪಬ್ಬಜ್ಜಾಮಿ ಇತಿಸಬ್ಬತ್ಥ] ದೇವ. ಮಂ ಪಬ್ಬಾಜೇತ್ವಾ ಸಾಸನೇ ದಾಯಾದೋ ಹೋಥಾತಿ ಆಹ. ತೇನ ಚ ಸಮಯೇನ ರಾಜಧೀತಾ ಸಂಘಮಿತ್ತಾಪಿ ತಸ್ಮಿಂ ಠಾನೇ ಠಿತಾ ಹೋತಿ. ತಂ ದಿಸ್ವಾ ಆಹ ತ್ವಮ್ಪಿ ಅಮ್ಮ ಪಬ್ಬಜಿತುಂ ಸಕ್ಖಿಸ್ಸಸೀತಿ, ಸಾಧು ತಾತಾತಿ ಸಮ್ಪಟಿಚ್ಛಿ. ರಾಜಾ ಪುತ್ತಾನಂ ಮನಂ ಲಭಿತ್ವಾ ಪಹಟ್ಠಚಿತ್ತೋ ಭಿಕ್ಖುಸಂಘಂ ಉಪಸಙ್ಕಮಿತ್ವಾ ಭನ್ತೇ ಇಮೇ ದಾರಕೇ ಪಬ್ಬಾಜೇತ್ವಾ ಮಂ ಸಾಸನೇ ದಾಯಾದಂ ಕರೋಥಾತಿ. ಸಙ್ಘೋ ರಞ್ಞೋ ವಚನಂ ಸಮ್ಪಟಿಚ್ಛಿತ್ವಾ ಕುಮಾರಂ ಮೋಗ್ಗಲಿಪುತ್ತತಿಸ್ಸತ್ಥೇರೇನ ಉಪಜ್ಝಾಯೇನ ಮಹಾದೇವತ್ಥೇರೇನ ಆಚರಿಯೇನ ಪಬ್ಬಜಾಪೇಸಿ [ಪಬ್ಬಜ್ಜಾಪೇಸಿ ಇತಿಸಬ್ಬತ್ಥ]. ಮಜ್ಝನ್ತಿಕತ್ಥೇರೇನ ಆಚರಿಯೇನ ಉಪಸಮ್ಪಾದೇಸಿ, ಸೋ ಉಪಸಮ್ಪದಾಮಾಲಕೇಯೇವ ಸಹ ಪಟಿಸಮ್ಭಿದಾಹಿ ಅರಹತ್ತಂ ಪಾಪುಣಿ. ಸಙ್ಘಮಿತ್ತಾಯಪಿ ರಾಜಧೀತಾಯ ಆಚರಿಯಾಣೀ ಆಯುಪಾಲತ್ಥೇರೀ ನಾಮ [ಅಚಾರಿಯಾ ಆಯುಪಾಲತ್ಥೇರೀನಾಮ ಇತಿಸಬ್ಬತ್ಥ]. ಉಪಜ್ಝಾಯಾ ಧಮ್ಮಪಾಲತ್ಥೇರೀ ನಾಮ ಅಹೋಸಿ. ರಾಜಾ ಪನ ಅನೇಕಾಕಾರೇನ ಬುದ್ಧಸಾಸನಂ ಸೋಭೇತ್ವಾ ಮೋಗ್ಗಲಿಪುತ್ತತಿಸ್ಸತ್ಥೇರಸ್ಸ ಸಹಾಯೇನ [ಸಹಯ್ಯೇನ. ಸಾಹಾಯ್ಯೇನ. ಸಾಹಯ್ಯೇನ ಇತಿಪಿಕತ್ಥಚಿ] ಸಟ್ಠಿಸಹಸ್ಸಮತ್ತೇ ದುಸ್ಸೀಲೇ ತಿತ್ಥಿಯೇ ಬುದ್ಧಸಾಸನಾ ಉಪ್ಪಬ್ಬಾಜೇತ್ವಾ ತತಿಯಧಮ್ಮಸಂಗೀತಿಂ ನಿಟ್ಠಾಪೇಸಿ. ತಸ್ಮಿಂ ಕಿರ ಸಮಾಗಮೇ ಭಿಕ್ಖುಭಿಕ್ಖುಣಿಯೋ ಕಿತ್ತಕಾತಿ [ಕಿತ್ತಕಾನೀತಿ ಇತಿಸಬ್ಬತ್ಥ], ವುತ್ತಞ್ಹಿ.

೧೨. ತಸ್ಮಿಂ ಸಮಾಗಮೇ ಆಸುಂ, ಅಸೀತಿಭಿಕ್ಖುಕೋಟಿಯೋ;

ಅಹೇಸುಂ ಸತಸಹಸ್ಸಾನಿ, ತೇಸು ಖೀಣಾಸವಾ ಯತೀ.

೧೩. ನವುತಿಸತಸಹಸ್ಸಾನಿ, ಅಹೂ ಭಿಕ್ಖುಣಿಯೋ ತಹಿಂ;

ಖೀಣಾಸವಾ ಸಿಕ್ಖುಣಿಯೋ, ಸಹಸ್ಸಂ ಆಸು ತಾಸು ಚಾತಿ.

ಏವಂ ಸೋ ಅಸೋಕೋ ಧಮ್ಮರಾಜಾ ಸಕಲಜಮ್ಬುದೀಪೇ ಅಗ್ಗರಾಜಾ ಹುತ್ವಾ ಬುದ್ಧಸಾಸನಂ ಸೋಭೇನ್ತೋ ವಿಹಾಸಿ. ಅಯಂ ಪನೇತ್ಥ ಸಙ್ಖೇಪೋ, ವಿತ್ಥಾರೋ ಪನ ಮಹಾವಂಸೇ ವುತ್ತೋತಿ. ವುತ್ತಞ್ಹಿ.

೧೪. ಸಮ್ಪುಣ್ಣತ್ತಾ ಅಯಂ ತಿಸ್ಸೋ, ಚೇತನಾಯೋ ಮಧುಪ್ಪದೋ;

ಸಬ್ಬತ್ಥ ಸಬ್ಬದಾ ಸಬ್ಬ, ಸಮ್ಪತ್ತಿಮಭಿಸಮ್ಭುಣೀತಿ.

ಮಜ್ಝಿಮೋ ಪನ ವಾಣಿಜೋ ಅತ್ತನೋ ಪಾರವಾದಿದೋಸೇನ ಪರಸಮುದ್ದೇ ಲಙ್ಕಾಯಂ ನಿಬ್ಬತ್ತಿ. ತಸ್ಸೇವಂ ಕಥಾಪಟಿಪಾಟಿ ವೇದಿತಬ್ಬಾ. ತಮ್ಬಪಣ್ಣಿದೀಪೇ ಕಿರ ಮುಟಸೀವೋ ನಾಮ ರಾಜಾ ಸಟ್ಠಿವಸ್ಸಾನಿ ರಜ್ಜಂ ಕಾರೇಸಿ, ತಸ್ಸ ಪುಞ್ಞಪಞ್ಞಾಗುಣೋಪೇತಾ ಅಞ್ಞಮಞ್ಞಂ ಹಿತೇಸಿನೋ ದಸ ಪುತ್ತಾ ಅಹೇಸುಂ. ದ್ವೇ ಚ ಧೀತರೋ. ಸಬ್ಬೇ ತೇ ಸಮಗ್ಗಾ ಸಮ್ಮೋದಮಾನಾ ವಸನ್ತಿ. ಅಥಾಪರಸ್ಮಿಂ ಸಮಯೇ ಅಮಚ್ಚಾ ಮುಟಸೀವರಞ್ಞೇ ಕಾಲಕತೇ ದೇವಾನಂಪಿಯತಿಸ್ಸಕುಮಾರಂ ಅಭಿಸಿಞ್ಚಿಂಸು, ಅಭಿಸೇಕಸಮಕಾಲಮೇವಸ್ಸ ಅನೇಕಾನಿ ಅಚ್ಛರಿಯಾನಿ ಅಹೇಸುಂ. ತಾನಿ ಪಕಾಸೇನ್ತಾ ಮಹಾವಂಸಕಥಾಚರಿಯಾ ಆಹಂಸು.

೧೫. ದೇವಾನಂಪಿಯತಿಸ್ಸೋತಿ, ವಿಸ್ಸುತೋ ದುತಿಯೋ ಸುತೋ;

ತೇಸು [ಅಹೋಸಿಮುಟಸೀವಸ್ಸ, ದಸಪುತ್ತೇಸುಪುಞ್ಞವಾ ಇತಿಕತ್ಥಚಿ] ಭಾತುಸು ಸಬ್ಬೇಸು, ಪುಞ್ಞಪಞ್ಞಾಧಿಕೋ ಅಹು.

೧೬. ದೇವಾನಂಪಿಯತಿಸ್ಸೋ ಸೋ, ರಾಜಾಸಿ ಪಿತುಅಚ್ಚಯೇ;

ತಸ್ಸಾಭಿಸೇಕೇನ ಸಮಂ, ಬಹೂನಚ್ಛರಿಯಾನಹೂ.

೧೭. ಲಙ್ಕಾದೀಪಮ್ಹಿ ಸಕಲೇ, ನಿಧಯೋ ರತನಾನಿಚ;

ಅನ್ತೋಠಿತಾನಿ ಉಗ್ಗನ್ತ್ವಾ, ಪಥವೀತಲಮಾರುಹುಂ.

೧೮. ಲಙ್ಕಾದೀಪಸಮೀಪಮ್ಹಿ, ಭಿನ್ನನಾವಾ ಗತಾನಿ ಚ;

ತತ್ರ ಜಾತಾನಿ ಚ ಥಲಂ, ರತನಾನಿ ಸಮಾರುಹುಂ.

೧೯. ಛಾತಪಬ್ಬತಪಾದಮ್ಹಿ, ತಿಸ್ಸೋ ಚ ವೇಳುಯಟ್ಠಿಯೋ;

ಜಾತಾ ರಥಪತೋದೇನ, ಸಮಾನಾ ಪರಿಮಾಣತೋ.

೨೦. ತಾಸು ಏಕಾ ಲತಾಯಟ್ಠಿ, ರಜತಾಭಾ ತಹಿಂ ಲತಾ;

ಸುವಣ್ಣವಣ್ಣಾ ರುಚಿರಾ; ದಿಸ್ಸನ್ತೇತಾ ಮನೋರಮಾ.

೨೧. ಏಕಾ ಕುಸುಮಯಟ್ಠೀತು; ಕುಸುಮಾನಿ ತಹಿಂಪನ;

ನಾನಾನಿ ನಾನಾವಣ್ಣಾನಿ; ದಿಸ್ಸನ್ತೇತಿಫುಟಾನಿ ಚ.

೨೨. ಏಕಾ ಸಕುಣಯಟ್ಠೀ ತು, ತಹಿಂಪಕ್ಖಿಮಿಗಾ ಬಹೂ;

ನಾನಾ ಚ ನಾನಾವಣ್ಣಾ ಚ, ಸಜೀವಾವಿಯ ದಿಸ್ಸರೇ.

೨೩. ಹಯಗಜರಥಾ ಮಲಕ್ಯಾ, ವಲಯಙ್ಗುಲಿವೇಠಕಾ ಚೇವ;

ಕಕುಧಫಲಾ ಪಾಕತಿಕಾ, ಇಚ್ಚೇ ತಾ ಅಟ್ಠ ಜಾತಿಯಾ.

೨೪. ಮುತ್ತಾ ಸಮುದ್ದಾ ಉಗ್ಗನ್ತ್ವಾ; ತೀರೇ ವಟ್ಟಿವಿಯಟ್ಠಿತಾ;

ದೇವಾನಂಪಿಯತಿಸ್ಸಸ್ಸ; ಸಬ್ಬಂ ಪುಞ್ಞವಿಜಮ್ಭಿತಂ.

೨೫. ಇನ್ದನೀಲಂ ವೇಳುರಿಯಂ, ಲೋಹಿತಙ್ಕಮಣೀ ಚಿ ಮೇ;

ರತನಾನಿ ಪನೇ ತಾನಿ, ಮುತ್ತಾ ತಾ ತಾಚ ಯಟ್ಠಿಯೋ;

ಸತ್ತಾಹಬ್ಭನ್ತರೇಯೇವ, ರಞ್ಞೋ ಸನ್ತಿಕಮಾಹರುಂತಿ.

ತೇನ ಚ ಸಮಯೇನ ದೇವಾನಂಪಿಯತಿಸ್ಸಮಹಾರಾಜಾ ಚ ಅಸೋಕೋ ಧಮ್ಮರಾಜಾ ಚ ಅದ್ದಿಟ್ಠಸಹಾಯಾ ಹೋನ್ತಿ. ತಸ್ಮಾ ಸೋ ಏತಾನಿ ರತನಾನಿ ಚ ಅಞ್ಞಾನಿ ಬಹೂನಿ ಉಪಾಯನಾನಿ ಮಮ ಸಹಾಯಸ್ಸ ದೇಥಾತಿ ಧಮ್ಮಾಸೋಕಮಹಾನರಿನ್ದಸ್ಸ ಪಣ್ಣಾಕಾರತ್ಥಾಯ ಪೇಸೇಸಿ. ಸೋಪಿ ತಂ ದಿಸ್ವಾ ಪಸೀದಿತ್ವಾ ಪಞ್ಚರಾಜಕಕುಧಭಣ್ಡಾನಿ ಚ ಅಞ್ಞಞ್ಚ ಬಹುಪಣ್ಣಾಕಾರಞ್ಚ ಅಭಿಸೇಕತ್ಥಾಯ ಪೇಸೇಸಿ. ಮಯ್ಹಂ ಸಹಾಯಂ ಅಭಿಸೇಕಂ ಕರೋನ್ತೂತಿ. ನ ಕೇವಲಞ್ಚೇತಂ ಆಮಿಸಪಣ್ಣಾಕಾರಂ. ಇಮಂ ಕಿರ ಧಮ್ಮಪಣ್ಣಾಕಾರಮ್ಪಿ ಪೇಸೇಸಿ.

೨೬. ಅಹಂ ಬುದ್ಧಂಚ ಧಮ್ಮಂಚ; ಸಂಘಂಚ ಸರಣಂ ಗತೋ;

ಉಪಸಕತ್ತಂ ವೇದೇಸಿಂ; ಸಕ್ಯಪುತ್ತಸ್ಸ ಸಾಸನೇ.

೨೭. ಇಮೇಸು ತೀಸು ವತ್ಥೂಸು; ಉತ್ತಮೇಸು ನರುತ್ತಮ;

ಚಿತ್ತಂ ಪಸಾದಯಿತ್ವಾನ, ಸದ್ಧಾಯ ಸರಣಂ ವಜಾತಿ.

ಅಮಚ್ಚಾ ಪುನ ಲಙ್ಕಮಾಗಮ್ಮ ರಾಜಾನಂ ಅಭಿಸಿಞ್ಚಿಂಸು, ತೇನ ಖೋ ಪನ ಸಮಯೇನ ಮೋಗ್ಗಲಿಪುತ್ತತಿಸ್ಸತ್ಥೇರೋ ಕತ್ಥ ನುಖೋ ಅನಾಗತೇ ಸಾಸನಂ ಸುಪ್ಪತಿಟ್ಠಿತಂ ಭವೇಯ್ಯಾತಿ ಉಪಪರಿಕ್ಖನ್ತೋ ಪಚ್ಚನ್ತಿಮೇ ಸುಪ್ಪತಿಟ್ಠಿತಂ ಭವಿಸ್ಸತೀತಿ ಞತ್ವಾ ತೇ ತೇ ಥೇರೇ ತತ್ಥ ತತ್ಥ ಪೇಸೇತ್ವಾ ಮಹಾಮಹಿನ್ದತ್ಥೇರಂ ಗನ್ತ್ವಾ ತಮ್ಬಪಣ್ಣಿದೀಪಂ ಪಸಾದೇಹೀತಿ ನಿಯೋಜೇಸಿ, ಸಕ್ಕೋ ಚ ದೇವಾನಮಿನ್ದೋ ಮಹಾಮಹಿನ್ದತ್ಥೇರಂ ಉಪಸಂಕಮಿತ್ವಾ ಕಾಲಕತೋ ಭನ್ತೇ ಮುಟಸೀವೋ ರಾಜಾ. ಇದಾನಿ ದೇವಾನಂಪಿಯತಿಸ್ಸಮಹಾರಾಜಾ ರಜ್ಜಂ ಕಾರೇತಿ. ಸಮ್ಮಾಸಮ್ಬುದ್ಧೇನ ಚ ತುಮ್ಹೇ ಬ್ಯಾಕತಾ ಅನಾಗತೇ ಮಹಿನ್ದೋ ನಾಮ ಭಿಕ್ಖು ತಮ್ಬಪಣ್ಣಿದೀಪಂ ಪಸಾದೇಸ್ಸತೀತಿ. ತಸ್ಮಾ ತಿಹ ಖೋ ಭನ್ತೇ ಕಾಲೋ ದೀಪವರಂ ಗಮನಾಯ, ಅಹಮ್ಪಿ ಸಹಾಯೋ ಭವಿಸ್ಸಾಮೀತಿ, ಥೇರೋ ತಸ್ಸ ವಚನಂ ಸಮ್ಪಟಿಚ್ಛಿತ್ವಾ ಅತ್ತಸತ್ತಮೋ ಚೇತಿಯಪಬ್ಬತವಿಹಾರತೋ ವೇಹಾಸಂ ಉಪ್ಪತಿತ್ವಾ ಅನುರಾಧಪುರಸ್ಸ ಪುರತ್ಥಿಮದಿಸಾಯ ಮಿಸ್ಸಕಪಬ್ಬತೇ ಪತಿಟ್ಠಹಿ, ಇಮಂ ಏತರಹಿ ಚೇತಿಯಪಬ್ಬತೋತಿಪಿ ಸಞ್ಜಾನನ್ತಿ. ತದಾ ತಮ್ಬಪಣ್ಣಿಯಂ ಉಸ್ಸವದಿವಸೋ ಹೋತಿ, ರಾಜಾ ಛಣಂ ಕರೋಥಾತಿ ಅಮಚ್ಚೇ ಆಣಾಪೇತ್ವಾ ಚತ್ತಾಳೀಸಸಹಸ್ಸಪುರಿಸೇಹಿ ಪರಿವಾರಿತೋ ನಗರಮ್ಹಾ ನಿಕ್ಖಮಿತ್ವಾ ಮಿಸ್ಸಕಪಬ್ಬತಂ ಪಾಯಾಸಿ ಮಿಗವಂ ಕೀಳಿತುಕಾಮೋ. ಅಥ ತಸ್ಮಿಂ ಪಬ್ಬತೇ ಅಧಿವತ್ಥಾ ಏಕಾ ದೇವತಾ ರಞ್ಞೋ ಥೇರೇ ದಸ್ಸೇಸ್ಸಾಮೀತಿ ರೋಹಿತಮೀಗವಣ್ಣೇನ ಅವಿದೂರೇ ತಿಣಪಣ್ಣಾನಿ ಖಾದಮಾನಾ ವಿಯ ಚರತಿ, ರಾಜಾ ಅಯುತ್ತಂ ದಾನಿ ಪಮತ್ತಂ ವಿಜ್ಝಿತುಂತಿ ಜಿಯಂ ಪೋಠೇಸಿ, ಮಿಗೋ ಅಮ್ಬತ್ಥಲಮಗ್ಗಂ ಗಹೇತ್ವಾ ಪಲಾಯಿತುಂ ಆರಭಿ, ರಾಜಾ ತಂ ಅನುಬನ್ಧನ್ತೋ ಅಮ್ಬತ್ಥಲಮೇವ ಅಭಿರುಹಿ, ಮಿಗೋಪಿ ಥೇರಾನಂ ಅವಿದೂರೇ ಅನ್ತರಧಾಯಿ, ಮಹಿನ್ದತ್ಥೇರೋ ರಾಜಾನಂ ಅವಿದೂರೇ ಆಗಚ್ಛನ್ತ ಮಂಯೇವ ರಾಜಾ ಪಸ್ಸತು, ಮಾ ಇತರೇತಿ ಅಧಿಟ್ಠಹಿತ್ವಾ ತಿಸ್ಸ ತಿಸ್ಸ ಇತೋ ಏಹೀತಿ ಆಹ, ರಾಜಾ ತಂ ಸುತ್ವಾ ಚಿನ್ತೇಸಿ. ಇಮಸ್ಮಿಂ ತಮ್ಬಪಣ್ಣಿದೀಪೇ ಜಾತೋ ಮಂ ತಿಸ್ಸೋತಿ ನಾಮಂ ಗಹೇತ್ವಾ ಆಲಪಿತುಂ ಸಮತ್ಥೋ ನಾಮ ನತ್ಥಿ. ಅಯಂ ಪನ ಛಿನ್ನಭಿನ್ನಪಟಧರೋ ಭಣ್ಡುಕಾಸಾವ ವಸನೋ ಮಂ ನಾಮೇನಾ ಲಪತಿ, ಕೋ ನುಖೋ ಯಂ ಭವಿಸ್ಸತಿ ಮನುಸ್ಸೋ ಅಮನುಸ್ಸೋ ವಾತಿ. ಥೇರೋ ಆಹ.

೨೮. ಸಮಣಾ ಮಯಂ ಮಹಾರಾಜ, ಧಮ್ಮರಾಜಸ್ಸ ಸಾವಕಾ;

ತವೇವ ಅನುಕಮ್ಪಾಯ, ಜಮ್ಬುದೀಪಾ ಇಧಾಗತಾತಿ.

ರಾಜಾ ಧಮ್ಮಾಸೋಕನರಿನ್ದೇನ ಪೇಸಿತಸಾಸನಾನುಸಾರೇನ ಅನುಸ್ಸರಮಾನೋ ಅಯ್ಯಾ ನುಖೋ ಆಗತಾತಿ ತಾವದೇವ ಆಯುಧಂ ನಿಕ್ಖಿಪಿತ್ವಾ ಏಕಮನ್ತಂ ನಿಸೀದಿ ಸಮ್ಮೋದನೀಯಂ ಕಥಂ ಕಥಯಮಾನೋ ಸಾರಣೀಯಂ [ಸಮ್ಮೋದನೀಯಂ-ಇತಿಸಬ್ಬತ್ಥ] ಕಥಂ ಕುರುಮಾನೋ. ತಸ್ಮಿಂ ತಾನಿಪಿ ಚತ್ತಾಳೀಸಪುರಿಸಸಹಸ್ಸಾನಿ ಆಗನ್ತ್ವಾ ತಂ ಪರಿವಾರೇಸುಂ, ತದಾ ಥೇರೋ ಇತರೇಪಿ ಜನೇ ದಸ್ಸೇಸಿ, ರಾಜಾ ದಿಸ್ವಾ ಇಮೇ ಕದಾ ಆಗತಾತಿ ಪುಚ್ಛಿ, ಮಯಾ ಸದ್ಧಿಂಯೇವ ಮಹಾರಾಜಾತಿ. ಇದಾನಿ ಪನ ಜಮ್ಬುದೀಪೇ ಅಞ್ಞೇಪಿ ಏವರೂಪಾ ಸಮಣಾ ಸನ್ತೀತಿ. ಮಹಾರಾಜ ಏತರಹಿ ಜಮ್ಬುದೀಪೋ ಕಾಸಾವಪಜ್ಜೋತೋ ಇಸಿವಾತಪಟಿವಾತೋ, ತಸ್ಮಿಂ.

೨೯. ತೇವಿಜ್ಜಾ ಇದ್ಧಿಪ್ಪತ್ತಾ ಚ, ಚೇತೋಪರಿಞ್ಞಕೋವಿದಾ;

ಖೀಣಾಸವಾ ಅರಹನ್ತೋ, ಬಹೂ ಬುದ್ಧಸ್ಸ ಸಾವಕಾತಿ.

ರಾಜಾ ತಂ ಸುತ್ವಾ ಪಸನ್ನೋ ಅಹೋಸಿ, ಅಥ ಥೇರೋ ರುಕ್ಖೋಪಮಾದಿನಾ ತಸ್ಸ ಪಞ್ಞಾವೇಯ್ಯತ್ತಿಯಂ ಞತ್ವಾ ಧಮ್ಮಂ ದೇಸೇಸಿ ಸನರಾಮರೇಹಿ ಸಾಧುಕಾರಂ ಕಾರಯಮಾನೋ. ತೇನ ವುತ್ಥಂ.

೩೦. ಪಣ್ಡಿತೋತಿ ವಿದಿತ್ವಾನ, ಚುಲ್ಲಹತ್ಥಿಪದೋಪಮಂ;

ಸುತ್ತನ್ತಂ ದೇಸಯೀ ಥೇರೋ, ಮಹೀಪಸ್ಸ ಮಹಾಮತಿ [ಮಹೀಮತೀ ಇತಿಪಿಕತ್ಥಚಿ].

ದೇಸನಾಪರಿಯೋಸಾನೇ ಸೋ ಸದ್ಧಿಂ ತೇಹಿ ನರೇಹಿ ಚತ್ತಾಳೀಸಸಹಸ್ಸೇಹಿ ಸರಣೇಸು ಪತಿಟ್ಠಹೀತಿ. ಅಥಸ್ಸ ರಾಜಾ ಸ್ವೇ ಭನ್ತೇ ಮಮ ಗೇಹೇ ಭಿಕ್ಖಂ ಗಣ್ಹಾಥಾತಿ ಯಾಚಿತ್ವಾ ಗನ್ತ್ವಾ ನಗರಞ್ಚ ರಾಜಗೇಹಞ್ಚ ಅಲಙ್ಕರಿತ್ವಾ ಥೇರೇ ನಿಸೀದಾಪೇತ್ವಾ ಪಣೀತೇನಾಹಾರೇನ ಪರಿವಿಸಿತ್ವಾ ಅನುಳಾದೇವಿಪ್ಪಮುಖಾಹಿ ಪಞ್ಚಸತಇತ್ಥೀಹಿ ಸದ್ಧಿಂ ಏಕಮನ್ತಂ ನಿಸೀದಿ. ಅಥ ಥೇರೋ ಧಮ್ಮರತನ ವಸ್ಸಂ ವಸ್ಸಾಪೇಸಿ. ತತೋ ತಾ ಪಞ್ಚಸತಇತ್ಥಿಯೋ ಸೋತಾಪತ್ತಿಫಲಂ ಪಾಪುಣಿಂಸು. ತತೋ ಹತ್ಥಿಸಾಲಾಯಂ ಸಹಸ್ಸಂ, ನನ್ದನವನೇ ಸಹಸ್ಸಂತಿ ಏವಂ ದುತಿಯದಿವಸೇ ಅಡ್ಢತೇಯ್ಯಾನಿ ಪಾಣಸಹಸ್ಸಾನಿ ಸೋತಾಪತ್ತಿಫಲೇ ಪತಿಟ್ಠಾಪೇಸಿ. ತತಿಯದಿವಸೇ ಅಡ್ಢನವಪ್ಪಮಾಣಂ ಪಾಣಸಹಸ್ಸಂತಿ ಏವಂ ಅನೇಕಸತಾನಂ ಅನೇಕಸಹಸ್ಸಾನಂ ಅನೇಕಸತ ಸಹಸ್ಸಾನಂ ಧಮ್ಮಾ ಮತಂ ಪಾಯೇಸಿ. ವುತ್ತಞ್ಹಿ.

೩೧. ಮಹಾಮಹಿನ್ದಸುರಿಯೋ, ಲಙ್ಕಾವೇಹಾಸಮಜ್ಝಗೋ;

ಬೋಧನೇಯ್ಯಮ್ಬುಜೇ ಕಾಸಿ, ವಿಕಾಸಂ ಧಮ್ಮರಂಸಿನಾ.

೩೨. ಮಹಾಮಹಿನ್ದಚನ್ದೋ ಸೋ, ಲಙ್ಕಾವೇಹಾಸಮಜ್ಝಗೋ;

ಬೋಧೇಸಿ ಧಮ್ಮರಂಸೀಹಿ, ವೇನೇಯ್ಯಕುಮುದಾಕರೇ.

೩೩. ಮಹಾಮಹಿನ್ದಮೇಘೋ ಸೋ, ವಸ್ಸಂ ಧಮ್ಮಮ್ಬುವುಟ್ಠಿಯಾ;

ಸಾಧೂನಂ ಚಿತ್ತಬೀಜೇಸು, ಜನೇಸಿ ಕುಸಲಙ್ಕುರೇತಿ.

ಅಥ ರಾಜಾ ಸುಮನಸಾಮಣೇರೇನ ಧಮ್ಮಾಸೋಕಸ್ಸ ಹತ್ಥತೋ ಸಮ್ಮಾಸಮ್ಬುದ್ಧಪರಿಭುತ್ತಪತ್ತಪೂರಧಾತುಯೋ ಚ ಸಕ್ಕಸ್ಸ ಸನ್ತಿಕಾ ದಕ್ಖಿಣಕ್ಖಕಧಾತುಂಚ ಆಹರಾಪೇತ್ವಾ [ಆಹಾರಿತ್ವಾ-ಇತಿಸಬ್ಬತ್ಥ] ಚೇತಿಯಪಬ್ಬತೇ ಥೂಪಂ ಆದಿಂಕತ್ವಾ ಸಕಲಲಙ್ಕಾದೀಪೇ ಯೋಜನೇ ಯೋಜನೇ ಥೂಪಾನಿ ಕಾರೇತ್ವಾ ದಕ್ಖಿಣಕಧಾತುಂ ನಿದಹಿತ್ವಾ ಥೂಪಾರಾಮಥೂಪಞ್ಚ ಪತಿಟ್ಠಾಪೇಸಿ. ಅಥ ಸಙ್ಘಮಿತ್ತಾಯ ಥೇರಿಯಾ ಆನೀತಂ ಜಯಮಹಾಬೋಧಿನೋ ದಕ್ಖಿಣಮಹಾಸಾಖಂ ಪತಿಟ್ಠಾಪೇತ್ವಾ ಪೂಜಂ ಕಾರೇಸಿ. ಸಬ್ಬೋ ಪನೇತ್ಥ ಕಥಾವಿತ್ಥರೋ ಮಹಾವಂಸತೋ ವೇದಿತಬ್ಬೋ.

೩೪. ಪಾರವಾದಿಕದೋಸೇನ, ಜಾತೇವಂ ಪರಸಾಗರೇ;

ಪತ್ತಾನುಮೋದನಾ ಏವಂ, ಲಙ್ಕಾಯಂ ಆಸಿ ಇಸ್ಸರೋ.

೩೫. ಪಾಪಮ್ಪಿ ಏವಂ ಫಲತೀತಿ ಮನ್ತ್ವಾ,

ಞತ್ವಾನ ಪುಞ್ಞಸ್ಸ ಫಲಂ ಇದನ್ತಿ;

ಭೋ ಯೋನಿಸೋ ಕುಬ್ಬಥ ಪುಞ್ಞಕಮ್ಮೇ,

ಗನ್ತ್ವಾನ ಯೇ ಯತ್ಥ ನ ಸೋಚಯನ್ತೀತಿ.

ತೇಭಾತಿಕಮಧುವಾಣಿಜಕಾನಂ ವತ್ಥುಂ ಅಟ್ಠಮಂ.