೩೭. ಪುತ್ತವತ್ಥುಮ್ಹಿ ಅಯಮಾನುಪುಬ್ಬೀಕಥಾ

ಏಕಸ್ಮಿಂ ಕಿರ ಸಮಯೇ ಲಙ್ಕಾದೀಪವಾಸಿನೋ ಸಟ್ಠಿಮತ್ತಾ ಭಿಕ್ಖೂ ಜಯಮಹಾಬೋಧಿಂ ವನ್ದಿತುಕಾಮಾ ಏಕತೋ ಮನ್ತೇತ್ವಾ ಮಹಾತಿತ್ಥೇನ ನಾವಂ ಆರುಯ್ಹ ಜಮ್ಬುದೀಪಂ ಪತ್ವಾ ತಾಮಲಿತ್ತಿಪಟ್ಠೇನೇ [ತಮಲಿತ್ತಪಟ್ಟನೇ ಇತಿಕತ್ಥಚಿ] ಓತರಿತ್ವಾ ಅನುಕ್ಕಮೇನ ಪಾಟಲಿಪುತ್ತನಗರಂ ಪಾಪುಣಿಂಸು. ಅಥ ತಸ್ಮಿಂ ನಗರೇ ಪಿಣ್ಡಾಯ ಚರನ್ತೇ ತೇ ಭಿಕ್ಖೂ ಏಕೋ ದುಗ್ಗತಮನುಸ್ಸೋ ದಿಸ್ವಾ ಚಿರೇನ [ಚಿರೇನಾಹಂದಿಟ್ಠಾ ಇತಿಸಬ್ಬತ್ಥ] ಮಯಾ ದಿಟ್ಠಾ ಬುದ್ಧಪುತ್ತಾತಿ ಸೋಮನಸ್ಸೋ ಭರಿಯಂ ಪಕ್ಕೋಸಿತ್ವಾ ಭದ್ದೇ ಇಮೇಸಂ ಅಯ್ಯಾನಂ ದಾನಂ ದಾತುಕಾಮೋಮ್ಹಿ, ಪುಬ್ಬೇ ನೋ ಅಕತಪುಞ್ಞತ್ತಾ ಇದಾನಿ ದುಗ್ಗತಾ ಜಾತಾ, ಇಮೇಸು ಪುಞ್ಞಕ್ಖೇತ್ತೇಸು ಬೀಜಂ ನೋ ಚೇ ರೋಪೇಸ್ಸಾಮ, ಪುನಪಿ ಏವಮೇವ ಭವಿಸ್ಸಾಮಾತಿ ವತ್ವಾ ಕಿಂ ಮೇ ಗೇಹೇ ದೇಯ್ಯಧಮ್ಮಂ ಅತ್ಥೀತಿ ಪುಚ್ಛಿ. ಸಾ ತಂ ಸುತ್ವಾ ಘರೇ ನೋ ಸಾಮಿ ಅಯ್ಯಾನಂ ಕಿಞ್ಚಿ ದಾತಬ್ಬಂ ನ ಪಸ್ಸಾಮಿ. ಅಪಿ ಚ ಮಮ ಪುತ್ತಂ ಮಾರೇತ್ವಾ ದಾನಂ ದಾತುಂ ಸಕ್ಕಾತಿ. ಸೋ ತಸ್ಸಾ ಕಥಂ ಸುತ್ವಾ ಭದ್ದೇ ಪುತ್ತಂ ಮಾರೇತ್ವಾ ಕಿಂ ದಾನಂ ದೇಮಾತಿ ಆಹ. ತಾಯ ತಂ ಸುತ್ವಾ ಸಾಮಿ ಕಿಂ ನ ಜಾನಾಸಿ, ಪುತ್ತೇ ನೋ ಮತೇ ಸನ್ದಿಟ್ಠಸಮ್ಭತ್ತಾ ಞಾತಿಮಿತ್ತಸುಹಜ್ಜಾ ಚ ಅಮ್ಹಾಕಂ ಸನ್ತಿಕಂ ಆಗಚ್ಛಾನ್ತಾ ಕಿಞ್ಚಿ ಪಣ್ಣಾಕಾರಂ ಗಹೇತ್ವಾ ಆಗಚ್ಛನ್ತಿ. ಮಯಂ ತೇನ ಪಣ್ಣಾಕಾರೇನ ದಾನಂ ದಸ್ಸಾಮಾತಿ ವುತ್ತೇ ಉಪಾಸಕೋ ಸಾಧು ತಥಾ ಕರೋಹೀತಿ ಮಾತುಯಾ ಏವ ಭಾರಮಕಾಸಿ, ಸಾ ಪುತ್ತಂ ಮಾರೇತುಂ ಅವಿಸಹನ್ತೀ ಆಹ. ತಥಾ ಹಿ.

೧. ಕಿಚ್ಛಾ ಲದ್ಧಂ ಪಿಯಂ ಪುತ್ತಂ, ಅಮ್ಮಮ್ಮಾತಿ ಪಿಯಂ ವದಂ;

ಸುನೀಲನೇತ್ತಂ ಸುಭಮುಂ, ಕೋ ಪಕ್ಕಮಿತುಮಿಚ್ಛತಿ.

೨. ಮಾತರಾ ಮಾರಿಯನ್ತೋಪಿ, ಮಾತರಮೇವ ರೋದತಿ;

ಮಾರೇತುಂ ತಂ ನ ಸಕ್ಕೋಮಿ, ಹದಯಂ ಮೇ ಪವೇಧತೀತಿ.

ಏವಞ್ಚ ಪನ ವತ್ವಾ ಅಹಂ ಸಾಮಿ ನ ಸಕ್ಕೋಮಿ ಪುತ್ತಂ ಮಾರೇತುಂ. ತ್ವಂ ಮಾರೇಹೀತಿ ಪುತ್ತಂ ಪಿತುಸನ್ತಿಕಂ ಪೇಸೇಸಿ. ಅಥ ಸೋಪಿ ತಂ ಮಾರೇತು ಮಸಕ್ಕೋನ್ತೋ ಏವಮಾಹ. ವುತ್ತಞ್ಹಿ.

೩. ತಾಯನ್ತಿ ಪಿತುನೋ ದುಕ್ಖಂ, ಪುತ್ತಾ ಪುತ್ತಾತಿ ಕಿತ್ತಿತಾ;

ಪಿತು ದುಕ್ಖಂ ಸುಖಂ ಪುತ್ತಾ, ದಾಯಾದಾ ಹೋನ್ತಿ ಸಬ್ಬದಾ.

೪. ತಸ್ಮಾ ಮೇ ಸದಿಸಂ ಪುತ್ತಂ, ಪಿಲ್ಲಕಂ ಮಞ್ಜುಭಾಸನಂ;

ನ ಸಕ್ಕೋಮಿ ಅಹಂ ಭದ್ದೇ, ಜೀವಿತಾ ತಂ ವಿಯೋಜಿತುಂ.

೫. ಅಯಸಞ್ಚ ಅಕಿತ್ತಿಞ್ಚ, ಪಪ್ಪೋತಿ ಪುತ್ತಘಾತಕೋ;

ಪಾಣಾತಿಪಾತಕಮ್ಮಮ್ಪಿ, ಕಾಮಂ ಸೋ ಫುಸತೇ ನರೋತಿ.

ಏವಞ್ಚ ಪನ ವತ್ವಾ ಸೋ ತ್ವಮೇವ ತವ ಪುತ್ತಂ ಮಾರೇಹೀತಿ ಪೇಸೇಸಿ, ಏವಂ ತೇನ ವುತ್ತೇ ಪುತ್ಥಸ್ಸ ಮಾರಪಾಣೂಪಾಯಂ ಪರಿಯೇಸನ್ತಾ ಏವಮಾಹಂಸು, ಅಮ್ಹೇ ಪನಿಮಂ ಮಾರೇತುಂ ನ ಸಕ್ಕೋಮಿ, ಅಮ್ಹಾಕಂ ಪಚ್ಛಾಗೇಹೇ ಮಹನ್ತೋ ವಮ್ಮಿಕೋ ಅತ್ಥಿ, ತಸ್ಮಿಂ ಏಕೋ ನಾಗರಾಜಾ ಪಟಿವಸತಿ. ಕುಮಾರಂ ತತ್ಥ ಪೇಸೇಸ್ಸಾಮ, ಸೋ ತಂ ಡಸಿತ್ವಾ ಮಾರೇಸ್ಸತೀತಿ. ಇಚ್ಚೇತೇ ಏಸೋ ಖೋ ಉಪಾಯೋ ಏವಾತಿ ಚಿನ್ತೇತ್ವಾ ಕುಮಾರಂ ಪಕ್ಕೋಸಿತ್ವಾ ಅಞ್ಚನಾ ವಲಿವಲಯಾದೀಹಿ ಮಣ್ಡೇತ್ವಾ ತಸ್ಸ ಹತ್ಥೇ ಗೇಣ್ಡುಂ [ತೇಣ್ಡುಂ ಇತಿಸಬ್ಬತ್ಥ] ಠಪೇತ್ವಾ ತಾತ ಪಚ್ಛಾಗೇಹೇ ವಮ್ಮಿಕಸಮೀಪಂ ಗನ್ತ್ವಾ ಕೀಳಾತಿ ಪೇಸೇಸುಂ. ತತೋ ದಾರಕೋ ಗನ್ತ್ವಾ ಗೇಣ್ಡುಕೇನ ಕೀಳನ್ತೋ ವಮ್ಮಿಕಬಿಲೇ ಗೇಣ್ಡುಕಂ ಪಾತೇಸಿ. ಅಥ ಸೋ ಗೇಣ್ಡುಕಂ ಗಣ್ಹಿಸ್ಸಾಮೀತಿ ವಮ್ಮಿಕಸುಸಿರೇ ಹತ್ಥಂ ಪವೇಸೇಸಿ. ತತೋ ಸಪ್ಪೋ ಕುಜ್ಝಿತ್ವಾ ಸುಸೂತಿಸದ್ದಂ ಕರೋನ್ತೋ ಮಹನ್ತಂ ಫಣಂ ಕತ್ವಾ ಬಿಲತೋ ಸೀಸಂ ಉಕ್ಖಿಪಿತ್ವಾ ಓಲೋಕೇನ್ತೋ ಅಟ್ಠಾಸಿ ಕುಮಾರಸ್ಸ ಹತ್ಥತೋ ಪರಿಗಲಿತಪಾಸಂವಿಯ. ಅಥಸ್ಸ ಕುಮಾರೋ ಕಿಞ್ಚಿ ಅಜಾನನ್ತೋ ಸಪ್ಪಸ್ಸ ಗೀವಂ ದಳ್ಹಂ ಗಣ್ಹಿ. ಅಥಸ್ಸ ಮಾತಾಪಿತುನ್ನಂ ಸದ್ಧಾಬಲೇನ ನಾಗರಾಜಾ ಕುಮಾರಸ್ಸ ಕರತಲೇ ಅಟ್ಠಂಸಂ ಇಚ್ಛಾದಾಯಕಂ ಕಣ್ಠಮಣಿರತನಂ ಪಾತೇಸಿ. ಕುಮಾರಸ್ಸ ಮಾತಾಪಿತರೋ ದ್ವಾರಂ ನಿಸ್ಸಾಯ ಠಿತಾ ತಸ್ಸ ಕಿರಿಯಂ ಓಲೋಕೇನ್ತೋ ತಂ ಮಣಿರತನಂ ದಿಸ್ವಾ ಸೀಘಂ ಗನ್ತ್ವಾ ಪುತ್ತಂ ಉಕ್ಖಿಪಿತ್ವಾ ಹತ್ಥತೋ ಮಣಿರತನಂ ಗಣ್ಹಿಂಸು. ತತೋ ತೇ ತಂ ಮಣಿರತನಂ ಪರಿಸುದ್ಧಾಸನೇ ಠಪೇತ್ವಾ ಉಪಚಾರಂ ಕತ್ವಾ ಅಮ್ಹಾಕಂ ಇದಞ್ಚಿದಞ್ಚ ದೇಥಾತಿ ಅಬ್ಭುಕ್ಕಿರಿಂಸು. ಅಥ ತೇ ಮಣಿರತನಾನುಭಾವೇನ ಗೇಹದ್ವಾರೇ ಮಹನ್ತಂ ಮಣ್ಡಪಂ ಕಾರೇತ್ವಾ ವಿತಾನಾದಿನಾ ಮಣ್ಡಪಂ ಅಲಙ್ಕರಿತ್ವಾ ಭಿಕ್ಖೂನಂ ಆಸನಾನಿ ಪಞ್ಞಾಪೇತ್ವಾ ತೇ ಸಟ್ಠಿಮತ್ತೇ ಭಿಕ್ಖೂ ನಿಸೀದಾಪೇತ್ವಾ ಮಹಾದಾನಂ ಅದಂಸು. ತತೋ ನಗರವಾಸಿನೋ ಮಣಿರತನಾನುಭಾವಂ ಸುತ್ವಾ ಸನ್ನಿಪತಿಂಸು. ಅಥ ತೇ ತೇಸಂ ಮಜ್ಝೇ ಅತ್ತನೋ ಸದ್ಧಾಬಲೇನ ಮಣಿರತನಸ್ಸ ಲಾಭಂ ಪಕಾಸೇತ್ವಾ ಇಮಞ್ಹಿ ದಾನತ್ಥಾಯೇವ ಪರಿಚ್ಚಜ್ಜಾಮಾತಿ ಏಕಸ್ಮಿಂ ಠಾನೇ ಪತಿಟ್ಠಾಪೇತ್ವಾ ತೇನಾನುಭಾವೇನ ಯಾವಜೀವಂ ದಾನಂ ದದನ್ತಾ ಸೀಲಂ ರಕ್ಖನ್ತಾ ಆಯುಪರಿಯೋಸಾನೇ ದೇವಲೋಕೇ ನಿಬ್ಬತ್ತಿಂಸೂತಿ.

೬. ಛೇತ್ವಾನ ಪೇಮಂ ಅಪಿ ಅತ್ರಜೇಸು,

ದದನ್ತಿ ದಾನಂ ಇಧ ಮಾನುಸೇವಂ;

ನ ದದಾತಿ ಕೋ ನಾಮ ನರೋ ಸಮಿದ್ಧೋ,

ದಾನಞ್ಹಿ ದಾನಸ್ಸ ಫಲಂ ಸರನ್ತೋತಿ.

ಪುತ್ತವತ್ಥುಂ ಸತ್ತಮಂ.