೩೩. ಕಪಣಾಯ ವತ್ಥುಮ್ಹಿ ಅಯಮಾನುಪುಬ್ಬೀಕಥಾ

ಭಗವತಿ ಪರಿನಿಬ್ಬುತೇ ಜಮ್ಬುದೀಪೇ ತತ್ಥ ತತ್ಥ ಭಿಕ್ಖುಭಿಕ್ಖುಣಿಯೋ ಚ ಉಪಾಸಕಉಪಾಸಿಕಾಯೋ ಚ ಜಯಮಹಾಬೋಧಿಂ ವನ್ದಿಸ್ಸಾಮೀತಿ ಯೇಭುಯ್ಯೇನ ಗನ್ತ್ವಾ ವನ್ದನ್ತಿ. ಅಥಾ ಪರಭಾಗೇ ಬಹೂ ಭಿಕ್ಖೂ ಸಙ್ಗಮ್ಮ ಮಹಾಬೋಧಿಂ ವನ್ದನತ್ಥಾಯ ಗಚ್ಛನ್ತಾ ಅಞ್ಞತರಸ್ಮಿಂ ಗಾಮಕೇ ಭಿಕ್ಖಾಯ ಚರಿತ್ವಾ ಆಸನಸಾಲಂ ಗನ್ತ್ವಾ ಕತಭತ್ತಕಿಚ್ಚಾ ಥೋಕಂ ವಿಸ್ಸಮಿಂಸು, ತದಾ ತತ್ಥ ಏಕಾ ಕಪಣಾ ದುಗ್ಗತಿತ್ಥೀ ತಥಾ ನಿಸಿನ್ನಭಿಕ್ಖೂ ದಿಸ್ವಾ ಉಪಸಙ್ಕಮಿತ್ವಾ ಪಞ್ಚಪತಿಟ್ಠಿತೇನ ವನ್ದಿತ್ವಾ ಏಕಮನ್ತೇ ಠಿತಾ ಅಯ್ಯಾ ಕುಹಿಂ ಗಚ್ಛನ್ತೀತಿ ಪುಚ್ಛಿ. ಭಿಕ್ಖೂ ತಂ ಸುತ್ವಾ ಜಯಮಹಾಬೋಧಿಸ್ಸ ಆನುಭಾವಞ್ಚ ತಂ ವನ್ದನತ್ಥಾಯ ಅತ್ತಾನಂ ಗಮನಞ್ಚ ಕಥೇನ್ತಾ ಏವಮಾಹಂಸು.

೧. ಯತ್ಥಾಸೀನೋ ಜಿನೋ ಜೇಸಿ, ಸಸೇನಂ ಮಕರದ್ಧಜಂ;

ಹನ್ತ್ವಾ ಕಿಲೇಸಸೇನಞ್ಚ, ಬುದ್ಧೋ ಆಸಿ ನಿರುತ್ತರೋ.

೨. ಯಂ ಪೂಜೇಸಿ ಮಹಾವೀರೋ, ಠಿತೋ ಪದ ಮಕೋಪಯಂ;

ಸತ್ತರತ್ತಿನ್ದಿವಂ ನೇತ್ತ, ನೀಲನೀರಜರಂಸಿನಾ.

೩. ಸುರಾಸುರನರಾದೀನಂ, ನೇತ್ತಾಲಿ ಪಾಳಿಪಾತನಾ;

ಮೇಚಕಾಕಾರಪತ್ತೇಹಿ, ಸಿಖಣ್ಡೀವಿಯ ಭಾತಿ ಯೋ.

೪. ಸುರಪಾದಪೋವ ಸತ್ತಾನಂ, ಯಂ ತಿಟ್ಠತಿ ಮಹೀತಲೇ;

ಇಹ ಲೋಕೇ ಪರತ್ತೇ ಚ, ದದನ್ತೋ ಇಚ್ಛಿತಿಚ್ಛಿತಂ.

೫. ಯಸ್ಸ ಪುರಾಣಪಣ್ಣಮ್ಪಿ, ಪತಿತಂ ಯೋ ನರೋ ಇಧ;

ಪೂಜೇತಿ ತಸ್ಸ ಸೋ ದೇತಿ, ಭವಭೋಗಂ ಮಹೀರುಹೋ.

೬. ಗನ್ಧಮಾಲೇಹಿ ಸಲಿಲೇಹಿ, ಯಮುಪಾಸತಿ ಸದಾ ನರೋ;

ಅಜ್ಝತ್ತಞ್ಚ ಬಹಿದ್ಧಾ ಚ, ದುರಿತಂ ಸೋ ನಿಹಞ್ಞತಿ.

೭. ಯೋ ದೇತಿ ಇಹಲೋಕತ್ಥಂ,

ಯೋ ದೇತಿ ಪಾರಲೋಕಿಕಂ,

ಸಮ್ಪದಂ ಜಯಬೋಧಿಂತಂ,

ಭೋತಿ ಗಚ್ಛಾಮ ವನ್ದಿತುಂ.

ತಂ ಸುತ್ವಾ ಉದಗ್ಗಾ ಸೋಮನಸ್ಸಜಾತಾ ಭಿಕ್ಖೂನಂ ಏವಮಾಹ. ಅಹಂ ಭನ್ತೇ ಪರಕುಲೇ ಭತಿಯಾ ಕಮ್ಮಂ ಕರೋನ್ತೀ ದುಕ್ಖೇನ ಕಸಿರೇನ ಜೀವಿಕಂ ಕಪ್ಪೇಮಿ. ಸ್ವಾತನಾಯ ಮೇ ತಣ್ಡುಲನಾಲಿಪಿ [ಭಣ್ಡುಲನಾಮ್ಪ ಇತಿಸಬ್ಬತ್ಥ] ನತ್ಥಿ, ಪಗೇವ ಅಞ್ಞಂ ಧನಂ, ಇಮಂ ವಿನಾ ಅಞ್ಞಂ ಸಾಟಕಮ್ಪಿ ನತ್ಥಿ, ಕಸ್ಮಾ ಪುಬ್ಬೇ ಅಕತಪುಞ್ಞತ್ತಾ, ತಸ್ಮಾ ಇಮಂ ಭನ್ತೇ ಸಾಟಕಂ ಮಮಾನುಗ್ಗಹಾಯ ಬೋಧಿಮ್ಹಿ ಧಜಂ ಬನ್ಧಥಾತಿ ಯಾಚಿತ್ವಾ ಸಾಟಕಂ ಧೋವಿತ್ವಾ ತೇಸಂ ಅದಾಸಿ. ಭಿಕ್ಖೂಪಿ ತಸ್ಸಾನುಗ್ಗಹಾಯ ತಂ ಗಹೇತ್ವಾ ಅಗಮಂಸು. ಸಾ ಸಾಟಕಂ ದತ್ವಾ ಪೀತಿಪಾಮೋಜ್ಜಮಾನಸಾ ಗೇಹಂ ಗನ್ತ್ವಾ ತದಹೇವ ರತ್ತಿಯಾ ಮಜ್ಝಿಮಯಾಮೇ ಸತ್ಥಕವಾತೇನ ಉಪಹತಾ ಕಾಲಂ ಕತ್ವಾ ತೇಸಂ ಭಿಕ್ಖೂನಂ ಗಮನಮಗ್ಗೇ ಏಕಸ್ಮಿಂ ರಮಣೀಯೇ ವನಸಣ್ಡೇ ಭುಮ್ಮದೇವತಾ ಹುತ್ವಾ ನಿಬ್ಬತ್ತೀ, ಅಥಸ್ಸಾ ಪುಞ್ಞಾನುಭಾವೇನ ತಿಯೋಜನಿಕೇ ಠಾನೇ ದಿಬ್ಬಕಪ್ಪರುಕ್ಖಾ ಪಾತುರಹಂಸು, ತತ್ತ ತತ್ತ ನಾನಾವಿರಾಗಧಜಪತಾಕಾ ಓಲಮ್ಬನ್ತಿ. ದೇವಪುತ್ತಾ ಚ ದೇವಧೀತರೋ ಚ ಸಬ್ಬಾಭರಣವಿಭೂಸಿತಾ ತಥೇವ ಧಜಪತಾಕಾದಯೋ ಗಹೇತ್ವಾ ಕೀಳನ್ತಿ. ನಚ್ಚಗೀತಾದಿನೇಕಾನಿ ಅಚ್ಛರಿಯಾನಿ ಪಯೋಜೇನ್ತಿ. ಅಥ ದುತಿಯದಿವಸೇ ತೇಪಿ ಭಿಕ್ಖೂ ಬೋಧಿಮಣ್ಡಲಂ ಗಚ್ಛನ್ತಾ ಸಾಯಣ್ಹೇ ತಂ ಠಾನಂ ಪತ್ವಾ ಅಜ್ಜ ಇಮಸ್ಮಿಂ ವನಸಣ್ಡೇ ವಸಿತ್ವಾ ಗಮಿಸ್ಸಾಮಾತಿ ತತ್ಥ ವಾಸಂ ಉಪಗಮಿಂಸು, ತತೋ ತೇ ರತ್ತಿಭಾಗೇ ನಾನಾವಣ್ಣಧಜೇ ಚ ದೇವತಾಹಿ ಪಯೋಜಿಯಮಾನಾ ಗೀತವಾದಿತಾದಯೋ ಚ ತಿಯೋಜನಟ್ಠಾನೇ ಕಪ್ಪರುಕ್ಖಾನಿ ಚ ಇದಂ ಸಬ್ಬಂ ದೇವಿಸ್ಸರಿಯಂ ತಸ್ಸಾನುಭಾವೇನ ನಿಬ್ಬತ್ತಭಾವಂ ದಿಸ್ವಾ ವಿಮ್ಹಿತಮಾನಸಾ ದೇವಧೀತರಂ ಆಮನ್ತೇತ್ವಾ ತ್ವಂ ಕೇನ ಕಮ್ಮೇನ ಇಧ ನಿಬ್ಬತ್ತಾತಿ ಪುಚ್ಛಿಂಸು. ಸಾ ಭಿಕ್ಖೂ ವನ್ದಿತ್ವಾ ಅಞ್ಜಲಿಂ ಪಗ್ಗಯ್ಹ ಠಿತಾ ಭನ್ತೇ ಮಂ ನ ಸಞ್ಜಾನಿತ್ಥಾತಿ ಆಹ. ಭಿಕ್ಖೂಹಿ ನ ಮಯಂ ಸಞ್ಜಾನಾಮ ಭಗಿನೀತಿ ವುತ್ತೇ ಸಾ ಅತ್ತನೋ ಸಭಾವಂ ಕಥೇನ್ತೀ ಏವಮಾಹ.

೮. ಹೀಯ್ಯೋ ಆಸನಸಾಲಾಯ, ನಿಸೀದಿತ್ಥ ಸಮಾಗತಾ;

ತುಮ್ಹಕಂ ಸನ್ತಿಕಂ ಗಮ್ಮ, ಯಾ ವರಾಕೀಭಿವಾದಯಿ.

೯. ಯಾ ಬೋಧಿಂ ಪೂಜನತ್ಥಾಯ, ವತ್ಥಕಂ ಪಟಿಪಾದಯಿ;

ಸಾಹಂ ಹೀಯ್ಯೋ ಚುತಾ ಆಸಿಂ, ರತ್ತಿಯಂ ಬ್ಯಾಧಿಪೀಳಿತಾ.

೧೦. ನಾನಾಸಮ್ಪತ್ತಿಸಂಯುತ್ತಾ, ನಾನಾಭೂಸನಭೂಸಿತಾ;

ವಿಮಾನೇ ರತನಾ ಕಿಣ್ಣೇ, ಜಾತಾಹಂ ಏತ್ಥ ಕಾನನೇ.

೧೧. ಹೀಯ್ಯೋ ಪಸ್ಸಿತ್ಥ ಮೇ ಗತ್ತಂ, ರಜೋಜಲ್ಲೇಹಿ ಸಂಕುಲಂ;

ಅಜ್ಜ ಪಸ್ಸಥ ಮೇ ಗತ್ತಂ, ವಣ್ಣವನ್ತಂ ಪಭಸ್ಸರಂ.

೧೨. ಹೀಯ್ಯೋ ಪಸ್ಸಿತ್ಥ ಮೇ ಭನ್ತೇ, ನಿವತ್ಥಂ ಮಲಿನಮ್ಬರಂ;

ಅಜ್ಜ ಪಸ್ಸಥ ಮೇ ಭನ್ತೇ, ದಿಬ್ಬಮಮ್ಬರಮುತ್ತಮಂ.

೧೩. ವಿಕಿಣ್ಣಫಲಿತಗ್ಗೇಹಿ, ಕೇಸೇಹಿ ವಿರಲಾ ಕುಲಂ;

ಊಕಾಗೂಥಪಟಿಕ್ಕೂಲಂ, ಹೀಯ್ಯೋ ಆಸಿಸಿರಂ ಮಮ.

೧೪. ಅಜ್ಜ ತಂ ಪರಿವತ್ತಿತ್ವಾ, ಮಮ ಪುಞ್ಞಾನುಭಾವತೋ;

ಸುನೀಲಮುದುಧಮ್ಮಿಲ್ಲಂ, ಕುಸುಮಾ ಭರಣಭೂಸಿತಂ.

೧೫. ಪುರಾ ಮೇ ಸಕಸೀಸೇನ, ವಹಿತಂ ದಾರೂ ದಕಾದಿಕಂ;

ಪುಞ್ಞೇನಾಹಂ ಅಜ್ಜ ಮಾಲಾ, ಭಾರಂ ಸೀಸೇ ಸಮುಬ್ಬಹೇ.

೧೬. ಧಜತ್ಥಾಯ ಮಯಾ ಹೀಯ್ಯೋ, ಪದಿನ್ನಂ ಥೂಲಸಾಟಕಂ;

ಅಜ್ಜ ನಿಬ್ಬತ್ತಿ ಮೇ ಭೋನ್ತೋ, ಮಹನ್ತಂ ದಿಬ್ಬಸಮ್ಪದಂ.

೧೭. ಜಾನಮಾನೇನ ಕತ್ತಬ್ಬಂ, ದಾನಾದೀಸು ಮಹಪ್ಫಲಂ;

ದೇವಲೋಕೇ ಮನುಸ್ಸೇಸು, ಸುಖದಂ ದಾನ ಮುತ್ತಮನ್ತಿ.

ತಂ ಸುತ್ವಾ ಸಬ್ಬೇ ಭಿಕ್ಖೂ ಅಚ್ಛರಿಯಬ್ಭುತಚಿತ್ತಾ ಅಹೇಸುಂ. ಸಾ ದೇವತಾ ತಸ್ಸಾ ರತ್ತಿಯಾ ಅಚ್ಚಯೇನ ಭಿಕ್ಖೂ ನಿಮನ್ತೇತ್ವಾ ದಿಬ್ಬೇಹಿ ಖಜ್ಜಭೋಜ್ಜೇಹಿ ಸಹತ್ಥಾ ಸನ್ತಪ್ಪೇತ್ವಾ ತೇಹಿ ಸದ್ಧಿಂ ಆಗಚ್ಛನ್ತೀ ಅನ್ತರಾಮಗ್ಗೇ ದಾನಂ ದದಮಾನಾ ಮಹಾಬೋಧಿಂ ಗನ್ತ್ವಾ ಸಬ್ಬೇಹಿ ಧಜಪತಾಕಾ ದೀಹಿ ಚ ನಾನಾವಿಧವಣ್ಣಗನ್ಧಸಮ್ಪನ್ನಪುಪ್ಫೇಹಿ ಚ ದೀಪಧೂಪೇಹಿ ಚ ಬೋಧಿಂ ಪೂಜೇತ್ವಾ ಭಿಕ್ಖೂನಂ ಚೀವರತ್ಥಾಯ ದಿಬ್ಬವತ್ಥಾನಿ ದತ್ವಾ ಆಗಮ್ಮ ತಸ್ಮಿಂಯೇವ ವನಸಣ್ಡೇ ವಸನ್ತೀ ನಾನಾವಿಧಾನಿ ಪುಞ್ಞಾನಿ ಕತ್ವಾ ತಾವತಿಂಸಭವನೇ ನಿಬ್ಬತ್ತಿ. ಭಿಕ್ಖೂಪಿ ತಂ ಅಚ್ಛರಿಯಂ ತತ್ಥ ತತ್ಥ ಪಕಾಸೇನ್ತಾ ಬಹೂಜನೇ ಪುಞ್ಞಕಮ್ಮೇ ನಿಯೋಜೇಸುಂತಿ.

೧೮. ಏವಂ ವಿಧಾಪಿ ಕಪಣಾ ಜಿನಸಾಸನಮ್ಹಿ,

ಕತ್ವಾ ಪಸಾದ ಮಥ ಥೂಲಕುಚೇಲಕೇನ;

ಪೂಜೇತ್ವ ದಿಬ್ಬವಿಭವಂ ಅಲಭೀತಿ ಞತ್ವಾ,

ಪೂಜಾಪರಾ ಭವಥ ವತ್ಥುಸು ತೀಸು ಸಮ್ಮಾತಿ.

ಕಪಣಾಯ ವತ್ಥುಂ ತತಿಯಂ.