೩೪. ಇನ್ದಗುತ್ತತ್ಥೇರಸ್ಸ ವತ್ಥುಮ್ಹಿ ಅಯಮಾನುಪುಬ್ಬೀಕಥಾ

ಅಮ್ಹಾಕಂ ಭಗವತೋ ಪರಿನಿಬ್ಬಾಣತೋ ಓರಭಾಗೇ ಜಮ್ಬುದೀಪೇ ಕಿರ ಪಾಟಲಿಪುತ್ತಂ ನಾಮ ನಗರಂ ಅಹೋಸಿ. ತತ್ಥ ಧಮ್ಮಾಸೋಕೋ ನಾಮ ಮಹಿದ್ಧಿಕೋ ಮಹಾನುಭಾವೋ ಆಣಾಚಕ್ಕವತ್ತಿ ರಾಜಾ ರಜ್ಜಂ ಕಾರೇತಿ. ಉದ್ಧಂ ಆಕಾಸತೋ ಹೇಟ್ಠಾ ಪಥವಿಯಾ ಯೋಜನಪ್ಪಮಾಣೇ ಸಕಲಜಮ್ಬೂದೀಪೇ ತಸ್ಸ ಆಣಾ ಪವತ್ತತಿ, ತದಾ ಸಕಲಜಮ್ಬುದೀಪವಾಸಿನೋ ಚ ಚತುರಾಸೀತಿ ನಗರಸಹಸ್ಸೇ ರಾಜಾನೋ ಚ ಅತ್ತನೋ ಅತ್ತನೋ ಬಲವಾಹನೇ ಗಹೇತ್ವಾ ಆಗಮ್ಮ ಧಮ್ಮಾಸೋಕಮಹಾರಞ್ಞೋ ಉಪಟ್ಠಾನಂ ಕರೋನ್ತಿ. ತಸ್ಮಿಂ ಸಮಯೇ ದೇವಪುತ್ತನಗರೇ ದೇವಪುತ್ತೋ ನಾಮ ಮಹಾರಾಜಾ ಅತ್ತನೋ ಬಲವಾಹನಂ ಗಹೇತ್ವಾ ರಞ್ಞೋ ಉಪಟ್ಠಾನಂ ಅಗಮಾಸಿ. ಧಮ್ಮಾಸೋಕೋ ದೇವಪುತ್ತಮಹಾರಾಜಾನಂ ದಿಸ್ವಾ ಮಧುರಪಟಿಸನ್ಥಾರಂ ಕತ್ವಾ ತುಮ್ಹಾಕಂ ರಟ್ಠೇ ಬಹುಸ್ಸುತಾ ಆಗತಾಗಮಾ ಮಹಾಗುಣವನ್ತಾ ಅಯ್ಯಾ ಅತ್ಥೀತಿ ಪುಚ್ಛಿ. ತಂ ಸುತ್ವಾ ದೇವಪುತ್ತರಾಜಾ ಅತ್ಥಿ ದೇವ ತಸ್ಮಿಂ ನಗರೇ ಸೀಹಕುಮ್ಭಕಂ ನಾಮ ಮಹಾವಿಹಾರಂ. ತತ್ಥ ಅನೇಕಸಹಸ್ಸಭಿಕ್ಖೂ ವಿಹರನ್ತಿ ಸೀಲವನ್ತಾ ಅಪ್ಪಿಚ್ಛಾ ಸನ್ತುಟ್ಠಾ ವಿವೇಕಕಾಮಿನೋ. ತೇಸು ಸಾಟ್ಠಕಥಾತಿಪಿಟಕಧರೋ ಇನ್ದಗುತ್ತತ್ಥೇರೋ ನಾಮ ತೇಸಂ ಪಾಮೋಕ್ಖೋ ಅಹೋಸಿ. ಸೋ ಅನೇಕಪರಿಯಾಯೇನ ಸನರಾಮರಾನಂ ಭಿಕ್ಖೂನಂ ಧಮ್ಮಂವಣ್ಣೇತಿ. ಗುಣವಾ ಅತ್ತನೋ ಗುಣಂ ನಿಸ್ಸಾಯ ಲೋಕೇ ಪಾಕಟೋತಿ. ತಂ ಸುತ್ವಾ ರಾಜಾ ತುಟ್ಠಮಾನಸೋ ಥೇರಂ ಪಸ್ಸಿತುಕಾಮೋ ಹುತ್ವಾ ಸಮ್ಮ ತ್ವಮೇವ ಗನ್ತ್ವಾ ಥೇರಂ ಯಾಚಿತ್ವಾ ಇಧಾ ನೇಹೀತಿ ಆಹ. ತಂ ಸುತ್ವಾ ದೇವಪುತ್ತರಾಜಾ ಅತ್ತನೋ ಹತ್ಥಸ್ಸಬಲವಾಹನಾ ದಿಮಹಾ ಸೇನಙ್ಗಪರಿವುತೋ ಇನ್ದಗುತ್ತತ್ಥೇರಸ್ಸ ಸನ್ತಿಕಂ ಗನ್ತ್ವಾ ವನ್ದಿತ್ವಾ ಅಯ್ಯ ಅಯ್ಯಂ ಧಮ್ಮಾಸೋಕಮಹಾರಾಜಾ ದಟ್ಠುಕಾಮೋತಿ ಆಹ. ಥೇರೇನ ಸಾಧೂತಿ ಸಮ್ಪಟಿಚ್ಛಿತೇ ರಾಜಾ ಥೇರೇನ ಸಮ್ಪಟಿಚ್ಛಿತಭಾವಂ ಧಮ್ಮಾಸೋಕಮಹಾರಾಜಿನೋ ಪೇಸೇಸಿ. ತತೋ ಧಮ್ಮಾಸೋಕಮಹಾರಾಜಾ ಸೋಮನಸ್ಸಪ್ಪತ್ತೋ ಅತ್ತನೋ ಆಣಾಪವತ್ತಿತಟ್ಠಾನೇ ರಾಜೂನಂ ಸಾಸನಂ ಪೇಸೇಸಿ. ಸಬ್ಬೇವ ಥೇರಾಗಮನಮಗ್ಗಂ ಅಲಙ್ಕರೋನ್ತೂತಿ. ಅಥ ತೇ ರಾಜಾನೋ ತುಟ್ಠಪಹಟ್ಠಾ ಅತ್ತನೋ ಅತ್ತನೋ ನಗರೇ ಭೇರಿಂ ಚರಾಪೇತ್ವಾ ದೇವಪುತ್ತನಗರತೋ ಯಾವ ಪಾಟಲಿಪುತ್ತನಗರಂ ಏತ್ಥನ್ತರೇ ಪಞ್ಚಪಣ್ಣಾಸಯೋಜನಿಕಂ ಮಗ್ಗಂ ವಿಸಮಂ ಸಮಂ ಕರೋನ್ತೋ ದೇವತಾನಂ ದಿಬ್ಬವೀಥಿಮಿವ ಅಲಙ್ಕರಿತ್ವಾ ಧಮ್ಮಾಸೋಕಮಹಾನರಿನ್ದಸ್ಸ ಏವಂ ಸಾಸನಂ ಪೇಸೇಸುಂ. ಭವನ್ತೇತ್ಥ.

೧. ಇನ್ದಗುತ್ತಮಹಾಥೇರ, ಸಾಮಿನೋ ಗಮನಾಯ ನೋ;

ಮಗ್ಗಂ ಅಲಙ್ಕರೋನ್ತೂತಿ, ಮಹಾರಾಜೇನ ಪೇಸಿತಂ.

೨. ತತೋ ತೇ ಅಪನೇತ್ವಾನ, ಪಾಸಾಣಕಣ್ಟಕಾದಿಕಂ;

ವಿಸಮಂ ಸಮಂ ಕರಿತ್ವಾನ, ಸಮ್ಮಜ್ಜಿತ್ವಾನ ಸಾಧುಕಂ.

೩. ಧೋತಮುತ್ತಾ ಸಮಾಭಾಸಾ, ಓಕಿರಿತ್ವಾನ ವಾಲುಕಾ;

ಉಸ್ಸಾಪಿತಾ ತತ್ಥ ತತ್ಥ, ದುಸ್ಸತೋರಣಪನ್ತಿಯೋ.

೪. ಕಲಧೋತಹೇಮರಮ್ಭಾದಿ, ನಾನಾತೋರಣಪನ್ತಿಯೋ;

ತಥಾ ಪುಪ್ಫಮಯಾ ನೇಕ, ತೋರಣೂಪರಿತೋರಣಾ.

೫. ತೇಸು ತೇಸುಚ ಠಾನೇಸು, ಸಙ್ಖತಾ ಕುಸುಮಗ್ಘಿಕಾ;

ತಥೇವ ಗನ್ಧತೇಲೇಹಿ, ದೀಪಿತಾ ದೀಪಪನ್ತಿಯೋ.

೬. ಪದುಮುಪ್ಪಲಸನ್ನೀರ, ಪುಪ್ಫಪಲ್ಲವ ಲಙ್ಕತಾ;

ಠಪಿತಾ ಘಟಮಾಲಾಯೋ, ಪುಣ್ಣಾ ಸೋಗನ್ಧವಾರಿಹಿ.

೭. ನಿಲಪೀತಾ ದಿಸಮ್ಭಿನ್ನ, ಪತಾಕಾಹಿ ಧಜೇಹಿ ಚ;

ಮಗ್ಗಸ್ಸ ಉಭತೋ ಪಸ್ಸೇ, ವನಮಾಸಿ ಸಮಾಕುಲಂ.

೮. ಕೇತವೋ ಉಗ್ಗತಾ ತತ್ಥ, ಮನ್ದಮನ್ದಸಮೀರಣಾ;

ಅವ್ಹಯನ್ತಾವ ಸೋಭನ್ತಿ, ಬ್ರಹ್ಮೋರಗಸುರಾದಯೋ.

೯. ನಾಗಚಮ್ಪಪುನ್ನಾಗ, ಕೇತಕೀವಕುಲಾದಿಹಿ;

ಪದುಮುಪ್ಪಲಾ ದಿಜಲಜೇಹಿ, ಮಾಲತೀ ಕುಸುಮಾ ದಿಹಿ.

೧೦. ಮಾಲಾದಾಮೇಹಿ ನೇಕೇಹಿ, ಮಗ್ಗಮಾಸಿ ವಿಚಿತ್ತಕಂ;

ಪತ್ಥರಿತ್ವಾ ಪಾದಪಟೇ, ಸಿತ್ತಸಮ್ಮತ್ತಭೂಮಿಯಂ.

೧೧. ಲಾಜಾದಿಪಞ್ಚಪುಪ್ಫಾನಿ, ವಿಕಿರಿಂಸು ಮನೋರಮಂ;

ಅಲಙ್ಕರಿತ್ವಾ ಹತ್ತಸ್ಸಾ, ಕುಸುಮಾ ಭರಣಾದಿಹಿ.

೧೨. ಮಗ್ಗಾಲಙ್ಕರಣತ್ಥಾಯ, ಠಪಿತಾಸುಂ ತತೋ ತತೋ;

ತೇಸು ತೇಸು ಚ ಠಾನೇಸು, ಭೇರಿಮಣ್ಡಲಮಜ್ಝಗಾ.

೧೩. ನಚ್ಚನ್ತಿ ಚಾತುರಾ ನಾರೀ, ರಸಭಾವನಿರನ್ತರಾ;

ಕಂಸವಂಸಾದಿಪಗ್ಗಯ್ಹ, ವಜ್ಜೇನ್ತಾನೇಕತನ್ತಿಯೋ.

೧೪. ಗಾಯನ್ತಿ ಮಧುರಂ ಗೀತಂ, ಗಾಯನ್ತೇತ್ಥ ಲಯಾನ್ವಿತಂ;

ಮಗ್ಗೋಸೋ ಸಾಧುವಾದೇಹಿ, ಭೇರಿತನ್ತಿನದೇಹಿಚ.

೧೫. ಕರೀನಂ ಕೋಞ್ಚನಾದೇಹಿ, ಹಯಾನಂ ಹೇಸಿತೇಹಿ ಚ;

ನೇಕವಿಟಙ್ಕಸಙ್ಘೇಹಿ, ಸೋ ಕರೀಹಿ ಸಮಾಕುಲೋ.

೧೬. ಮಗ್ಗಸ್ಸ ಉಭತೋ ಪಸ್ಸೇ, ದೇವಕಞ್ಞೂಪಮಾ ಸುಭಾ;

ಮಾಲಾಕಲಾಪೇ ಪಗ್ಗಯ್ಹ, ತಿಟ್ಠನ್ತಿ ತುಟ್ಠಮಾನಸಾ.

೧೭. ತಥಾ ಪುಣ್ಣಘಟೇ ಗಯ್ಹ, ಪದುಮುಪ್ಪಲಸಂಕುಲೇ,

ಅಟ್ಠಮಙ್ಗಲಮುಗ್ಗಯ್ಹ, ತಿಟ್ಠನ್ತಿ ಪಮದಾ ತಹಿಂ.

೧೮. ಸೀತಲೂದಕಸಮ್ಪನ್ನ, ಪಪಾಹಿ ಸಮಲಙ್ಕತಾ;

ಸಿನಾನತ್ಥಂ ಖತಾ ಆಸುಂ, ಪೋಕ್ಖರಞ್ಞೋ ತಹಿಂತಹಿಂ.

೧೯. ತಹಿಂತಹಿಂಕತಾ ಆಸುಂ, ದಾನಸಾಲಾ ಮನೋರಮಾ;

ನಿಚಿತಾಸುಮನೇಕಾನಿ, ದಾನೋಪಕರಣಾ ತಹಿಂ.

೨೦. ಏವಂ ನೇಕವಿಧಾ ಪೂಜಾ, ಅಮ್ಹೇಹಿ ಪಟಿಪಾದಿತಾ;

ಠಪೇತ್ವಾನ ಮಹಾಗಙ್ಗಂ, ತಂ ಜಾನಾತು ಮಹೀಪತೀತಿ.

ತಂ ಸುತ್ವಾ ಅಸೋಕಮಹಾರಾಜಾ ಗಙ್ಗಂ ಅಲಙ್ಕರೋಥಾತಿ ಸೋಳಸಯಕ್ಖೇ ಪೇಸೇಸಿ, ತೇ ಸಪರಿವಾರಾ ತತ್ಥ ಗನ್ತ್ವಾ ಅತ್ತನೋ ಆನುಭಾವೇನ ಗಙ್ಗಾಯ ಅನ್ತೋ ತಿಗಾವುತಟ್ಠಾನೇ ಉದುಕ್ಖಲಪಾಸಾಣೇ ಠಪೇಸುಂ. ಠಪೇತ್ವಾ ಥಮ್ಭೇ ಉಸ್ಸಾಪೇತ್ವಾ ತುಲಾಸಂಘಾಟೇ ದತ್ವಾ ಹಿಮವನ್ತತೋ ರತ್ತಚನ್ದನಸಾರೇ ಆಹರಿತ್ವಾ ಪದರೇ ಸನ್ಥರಿತ್ವಾ ಅನೇಕೇಹಿ ಪೂಜಾವಿಧಾನೇಹಿ ಅಲಙ್ಕರಿತ್ವಾ ರಞ್ಞೋ ಏವಂ ಸಾಸನಂ ಪೇಸೇಸುಂ. ಭವನ್ತೇತ್ಥ.

೨೧. ಯಮತ್ಥಾಯ ಮಯಂ ಸಬ್ಬೇ, ಮಹಾರಾಜೇನ ಪೇಸಿತಾ;

ಅಮ್ಹೇಹಿ ದಾನಿ ತಂ ಸಬ್ಬಂ, ಕತಮೇವ ಸುಣೋಥ ತಂ.

೨೨. ಗಾವುತತ್ತಯಗಮ್ಭೀರಂ, ಗಙ್ಗಂ ಯೋಜನವಿತ್ಥತಂ;

ಥಮ್ಭೇ ಪತಿಟ್ಠಪೇತ್ವಾನ, ಅನಗ್ಘಂ ರತ್ತಚನ್ದನಂ.

೨೩. ಹಿಮವನ್ತತೋ ಹರಿತ್ವಾನ, ಸೇತುಂ ತತ್ಥ ಸುಮಾಪಿತಂ;

ತೋರಣಾ ಚ ಉಭೋ ಪಸ್ಸೇ, ರತನೇಹಿ ಸುನಿಮ್ಮಿತಾ.

೨೪. ಪುಣ್ಣಕುಮ್ಭದ್ಧಜಾ ಚೇವ, ಪದೀಪಾವಲಿಯೋ ತಥಾ;

ಉಭೋ ಪಸ್ಸೇಸು ರತನಾನಿ, ಮಾಪೇತ್ವಾಲಮ್ಬನಾನಿಚ.

೨೫. ಸುವಣ್ಣಮಣಿಮುತ್ತಾದಿ, ದಾಮೇಹಿ ಸಮಲಙ್ಕತಾ;

ವಾಲುಕತ್ಥಾಯ ಓಕಿಣ್ಣಾ, ಧೋತಮುತ್ತಾ ಪಭಸ್ಸರಾ.

೨೬. ತೇಸು ತೇಸು ಚ ಠಾನೇಸು, ಠಪಿತಾಸುಂ ಮಹಾಮಣೀ;

ನಾನಾರಾಗವಿತಾನೇಹಿ, ಸೋಭಿತಾ ಸೇತುನೋ ಪರಿ.

೨೭. ಓಲಮ್ಬಿತಾಸುಂ ತತ್ಥೇವ, ದಿಬ್ಬಾದಿಕುಸುಮಾದಯೋ;

ನಿಟ್ಠಿತಂ ಇಧ ಕಾತಬ್ಬ, ಯುತ್ತಂ ಪೂಜಾವಿಧಿಂತು ನೋ;

ದೇವೋತಂ ಪಟಿಜಾನಾತು, ಇತಿ ವತ್ವಾನ ಪೇಸಯುಂತಿ.

ತಮ್ಪಿ ಸುತ್ವಾ ಅಸೋಕೋ ಮಹಾರಾಜಾ ತುಮ್ಹೇವ ಥೇರಂ ಇಧಾನೇಥಾತಿ ತೇಸಂಯೇವ ಸಾಸನಂ ಪಟಿಪೇಸೇಸಿ, ತೇ ಸಾಧೂತಿ ಇನ್ದಗುತ್ತತ್ಥೇರಸ್ಸ ಸನ್ತಿಕಂ ಗನ್ತ್ವಾ ವನ್ದಿತ್ವಾ ಭನ್ತೇ ಪಾಟಲಿಪುತ್ತನಗರಸ್ಸ ಗಮನಾಯ ಕಾಲೋತಿ ಆಹಂಸು, ತತೋ ಥೇರೋ ಸಟ್ಠಿಸಹಸ್ಸಮತ್ತೇಹಿ ಭಿಕ್ಖುಸಙ್ಘೇಹಿ ಪರಿವುತೋ ಪಞ್ಚಪಣ್ಣಾಸಯೋಜನಮಗ್ಗಂ ಪಟಿಪಜ್ಜಿ. ಅಥಾಪರಂ ದೇವಪುತ್ತನಗರವಾಸಿನೋ ಅನೇಕವಿಧಮಾಲಾಗನ್ಧವಾಸಚುಣ್ಣದ್ಧಜಪತಾಕಾದೀಹಿ ಅನೇಕೇಹಿ ತಾಲಾವಚರೇಹಿ ನಚ್ಚಗೀತವಾದಿತೇಹಿ ಪೂಜೇತ್ವಾ ಅಗಮಂಸು. ಅಥ ಥೇರೋ ಮಹನ್ತೇನ ಪೂಜಾವಿಧಾನೇನ ಜಮ್ಬುದೀಪವಾಸೀಹಿ ಪೂಜಿಯಮಾನೋ ಅನುಕ್ಕಮೇನ ಚನ್ದಭಾಗಾಯ ಗಙ್ಗಾಯ ಸೇತುಂ ಪತ್ವಾ ತತ್ಥ ಮಹನ್ತಂ ಪೂಜಾವಿಧಾನಂ ಓಲೋಕೇನ್ತೋ ಏವಂ ಚಿನ್ತೇಸಿ, ಏವಂ ಉಳಾರಂ ಪೂಜಾವಿಧಾನಂ ಇದಾನಿ ಜಮ್ಬುದೀಪೇ ನಾಞ್ಞಸ್ಸ ಹೋತಿ, ಮಯ್ಹಮೇವೇತಂ ಕತಂ. ಅಹಮೇವೇತ್ತ ಉತ್ತಮೋ ಅಪ್ಪಟಿಮೋತಿ ಏವಂ ಸೇಯ್ಯಸ್ಸ ಸೇಯ್ಯೋಹಮಸ್ಮೀತಿ ಮಾನಂ ಉಪ್ಪಾದೇತ್ವಾ ಅಟ್ಠಾಸಿ. ತಸ್ಮಿಂ ಖಣೇ ಏಕೋ ಖೀಣಾಸವತ್ಥೇರೋ ತಂ ಮಾನೇನುಪತ್ಥದ್ಧಚೇತಸಾ ಠಿತಂ ದಿಬ್ಬಚಕ್ಖುನಾ ದಿಸ್ವಾ ಉಪಸಙ್ಕಮಿತ್ವಾ ವನ್ದಿತ್ವಾ ಥೇರಸ್ಸ ಓವದನ್ತೋ ಏವಮಾಹ. ತಸ್ಮಾ.

೨೮. ಮಾ ಮಾನಸ್ಸ ವಸೀ ಹೋಥ, ಮಾನೋ ಭನ್ತೇ ವಸಂಗತಂ [ಮಾನಂಭನ್ತೇವಸೀಕತಂ ಇತಿಸಬ್ಬತ್ಥ];

ಅನತ್ಥದೋ ಸದಾ ಹೋತಿ, ಪಾತೇತ್ವಾನ ಭವಾ ವಟೇ.

೨೯. ಮಾನೋ ಪಲಾಲಿತೋ ಸತ್ತೋ, ತಣ್ಹಾಪಟಿಘಸಙ್ಗತೋ;

ಮಕ್ಕಟೋರಗಸೋಣಾದಿ, ಹುತ್ವಾ ಜಾಯತಿ ಜಾತಿಸು.

೩೦. ಮಾ ಮಾನಂ ಸಾಮಿ ಪೂರೇಹಿ, ಅತ್ತಾನಂ ಪರಿಸೋಧಯ;

ಅಪರಿಸುದ್ಧಾ ಸಯೋ ಭಿಕ್ಖು, ದಾಯಕಂ ನ ಪರಿತೋಸತಿ.

೩೧. ದದನ್ತಾನಂ ಸರನ್ತಾನಂ, ಪೂಜೇನ್ತಾನಂ ಸಚೇ ತುವಂ;

ಮಹಪ್ಫಲಂ ಮಹಾಭೂತಿಂ, ಕಾಮತ್ಥ ಹೋಥ ನಿಬ್ಬಣಾತಿ [ನಿಮ್ಮನಾ ಇತಿಕತ್ತಚಿ].

ತಂ ಸುತ್ವಾ ಥೇರೋ ಸಂಸಾರೇ ನಿಬ್ಬಿನ್ದೋ ತತ್ಥೇವ ಠಿತೋ ತಿಲಕ್ಖಣಂ ಪಟ್ಠಪೇತ್ವಾ ಕರಜಕಾಯಂ ಸಮ್ಮಸನ್ತೋ ಸಹಪಟಿ ಸಮ್ಭಿದಾಹಿ ಅರಹತ್ತಂ ಪತ್ವಾವ ನಿಕ್ಖಮಿ. ತತೋ ಧಮ್ಮಾಸೋಕಮಹಾರಾಜಾ ಬಲವಾಹನಪರಿವುತೋ ಮಹನ್ತೇನ ಪೂಜಾವಿಧಾನೇನ ಪಟಿಮಗ್ಗಂ ಆಗಮ್ಮ ವನ್ದಿತ್ವಾ ತತೋ ದಿಗುಣಂ ಪೂಜಾಸಕ್ಕಾರಂ ಕುರುಮಾನೋ ಮಹಾಭಿಕ್ಖುಸಙ್ಘೇನ ಸದ್ಧಿಂ ಥೇರಂ ಅತ್ತನೋ ನಗರಂ ನೇತ್ವಾ ತಸ್ಸ ಧಮ್ಮಕಥಂ ಸುತ್ವಾ ಪಸನ್ನಮಾನಸೋ ಪಞ್ಚಸೀಲೇ ಪತಿಟ್ಠಾಯ ಮಹನ್ತಂ ವಿಹಾರಂ ಕಾರೇತ್ವಾ ಥೇರೇನ ಸಹಾಗತಾನಂ ಸಟ್ಠಿಸಹಸ್ಸಾನಂ ಭಿಕ್ಖೂನಂ ಚತುಪಚ್ಚಯೇಹಿ ಉಪಟ್ಠಾನ ಮಕಾಸಿ, ಅಥ ಥೇರೋ ಸಾಟ್ಠಕಥಂ ಪಿಟಕತ್ತಯಂ ಪಕಾಸೇನ್ತೋ ತಸ್ಮಿಂ ಚಿರಂ ವಸಿತ್ವಾ ತತ್ಥೇವ ಪರಿನಿಬ್ಬಾಯಿ. ತತೋ ರಾಜಾ ಸಪರಿಸೋ ತಸ್ಸ ಸರೀರನಿಕ್ಖೇಪಂ ಕಾರೇತ್ವಾ ಧಾತುಯೋ ಗಹೇತ್ವಾ ಮಹನ್ತಂ ಚೇತಿಯಂ ಕಾರಾಪೇಸೀತಿ.

೩೨. ಪುರಾತನಾನಂ ಭುವಿ ಪುಞ್ಞಕಮ್ಮಿನಂ,

ಗುಣಾನುಭಾವೇನ ಮಹೇನ್ತಿ ಏವಂ;

ಸದೇವಕಾ ನಂ ಮನಸೀಕರೋನ್ತಾ,

ಪುಞ್ಞಂ ಕರೋಥಾ ಯತನೇ ಸದಾ ದರಾತಿ.

ಇನ್ದಗುತ್ತತ್ಥೇರಸ್ಸ ವತ್ಥುಂ ಚತುತ್ಥಂ.