೩೨. ಸುವಣ್ಣತಿಲಕಾಯ ವತ್ಥುಮ್ಹಿ ಅಯಮಾನುಪುಬ್ಬೀಕಥಾ

ಲಙ್ಕಾದೀಪೇ ಕಿರ ಅನುರಾಧಪುರನಗರೇ ಏಕೋ ಮಾತುಗಾಮೋ [ಏಕಾಮಾತುಗಾಮಾತಿವಾ ಏಕಾಮಾತುಗಾಮೋತಿವಾ ಕತ್ಥಚಿ] ಸದ್ಧಾಸಮ್ಪನ್ನಾ ನಿಚ್ಚಂ ಅಭಯುತ್ತರಚೇತಿಯೇ ಪುಪ್ಫಪೂಜಂ ಕರೋತಿ, ಅಥೇಕದಿವಸಂ ಸಾ ಅತ್ತನೋ ಧೀತುಯಾ ಸದ್ಧಿಂ ತಸ್ಮಿಂ ಚೇತಿಯೇ ಪುಪ್ಫಪೂಜನತ್ಥಾಯ [ಪುಪ್ಫಪೂಜತ್ಥಾಯ ಇತಿಕತ್ಥಚಿ] ಗನ್ತ್ವಾ ಪುಪ್ಫಾಸನಸಾಲಾಯ ಉದಕಂ ಅಪಸ್ಸನ್ತೀ ಧೀತು ಹತ್ಥೇ ಪುಪ್ಫಚಙ್ಗೋಟಕಂ ಠಪೇತ್ವಾ ಘಟ ಮಾದಾಯ ಪೋಕ್ಖರಣಿಂ ಅಗಮಾಸಿ, ತತೋ ಸಾ ದಾರಿಕಾ ಮಾತರಿ ಅನಾಗತಾಯಯೇವ [ಅನಾಗತೇಯೇವ ಇತಿಸಬ್ಬತ್ಥ] ಅಧೋತಾಸನೇ ಪುಪ್ಫಮುಟ್ಠಿಂಗಹೇತ್ವಾ ಮಣ್ಡಲಂ ಕತ್ವಾ ಪೂಜೇತ್ವಾ ಏವಂ ಪತ್ಥನಮಕಾಸಿ. ತಥಾ ಹಿ.

೧. ಮಹಾವೀರಸ್ಸ ಧೀರಸ್ಸ, ಸಯಮ್ಭುಸ್ಸ ಮಹೇಸಿನೋ;

ತಿಲೋಕಗ್ಗಸ್ಸ ನಾಥಸ್ಸ, ಭಗವನ್ತಸ್ಸ ಸತ್ಥುನೋ.

೨. ಯ ಮಹಂ ಪೂಜಯಿಂ ಪುಪ್ಫಂ, ತಸ್ಸ ಕಮ್ಮಸ್ಸ ವಾಹಸಾ;

ರೂಪೀನಂ ಪವರಾ ಹೇಸ್ಸಂ, ಆರೋಹಪರಿಣಾಹವಾ.

೩. ಮಂ ದಿಸ್ವಾ ಪುರಿಸಾ ಸಬ್ಬೇ, ಮುಚ್ಛನ್ತು ಕಾಮಮುಚ್ಛಿತಾ;

ನಿಚ್ಛರನ್ತು ಸರೀರಾ ಮೇ, ರಂಸಿಮಾಲೀವ ರಂಸಿಯೋ.

೪. ಹದಯಙ್ಗಮಾ ಕಣ್ಣಸುಖಾ, ಮಞ್ಜುಭಾಣೀ ಸುಭಾ ಮಮ;

ಕಿನ್ನರಾನಂ ಯಥಾ ವಾಣೀ, ಏವಮೇವ ಪವತ್ತತೂತಿ.

ಅಥಸ್ಸಾ ಮಾತಾ ಆಗಮ್ಮ ಅಧೋತಾಸನೇ ಪೂಜಿತಾನಿ ಪುಪ್ಫಾನಿ ದಿಸ್ವಾ ಕಸ್ಮಾ ಚಣ್ಡಾಲೀ ಅಧೋತಾಸನೇ ಭಗವತೋ ಪುಪ್ಫಾನಿ ಪೂಜೇಸಿ, ಅಯುತ್ತಂ ತಯಾ ಕತನ್ತಿ ಆಹ, ತಂ ಸುತ್ವಾ ಸಾ ಮಾತುಯಾ ಕುಜ್ಝಿತ್ವಾ ತ್ವಂ ಚಣ್ಡಾಲೀತಿ ಅಕ್ಕೋಸಿ, ಸಾ ಏತ್ತಕಂ ಪುಞ್ಞಾಪುಞ್ಞಂ ಕತ್ವಾ ಅಪರಭಾಗೇ ತತೋ ಚುತಾ ಜಮ್ಬುದೀಪೇ ಉತ್ತರಮಧುರಾಯಂ ಏಕಸ್ಸ ಚಣ್ಡಾಲಗನ್ಧಬ್ಬಬ್ರಾಹ್ಮಣಸ್ಸ ಧೀತಾ ಹುತ್ವಾ ನಿಬ್ಬತ್ತಿ, ಉತ್ತಮರೂಪಧರಾ ಅಹೋಸಿ, ತಸ್ಸಾ ಸರೀರತೋ ಮೇಘಮುಖತೋ ವಿಜ್ಜುಲ್ಲತಾವಿಯ ರಂಸಿಯೋ ನಿಚ್ಛರನ್ತಿ. ಸಮನ್ತಾ ಚತುಹತ್ಥಟ್ಠಾನೇ ಸರೀರಪ್ಪಭಾಯ ಅನ್ಧಕಾರೇ ವಿಧಮತಿ. ಮುಖತೋ ಉಪ್ಪಲಗನ್ಧೋ ವಾಯತಿ, ಕಾಯತೋ ಚನ್ದನಗನ್ಧೋ, ತಸ್ಸಾ ದ್ವಿನ್ನಂ ಥನಾನ ಮನ್ತರೇ ಸುವಣ್ಣವಣ್ಣಂ ಏಕಂ ತಿಲಕಂ ಅಹೋಸಿ, ತೇನ ಬಾಲಸುರಿಯಸ್ಸ ವಿಯ ಪಭಾ ನಿಚ್ಛರತಿ. ದಿಟ್ಠದಿಟ್ಠಾ ಯೇಭುಯ್ಯೇನ ಉಮ್ಮತ್ತಾ ವಿಯ ಕಾಮಮದೇನ ವಿಸಞ್ಞಿನೋ ಹೋನ್ತಿ, ಅಹೋ ಕುಸಲಾಕುಸಲಾನಂ ಆನುಭಾವೋ. ತಥಾ ಹಿ.

೫. ಯೇನ ಸಾ ಕೋಧಸಾಮಾತು, ಚಣ್ಡಾಲೀ ಇತಿ ಭಾಸಿತಾ;

ತೇನ ಸಾ ಆಸಿ ಚಣ್ಡಾಲೀ, ಜೇಗುಚ್ಛಾ ಹೀನಜಾತಿಕಾ.

೬. ಸಲ್ಲಕ್ಖೇತ್ವಾನ ಸಮ್ಬುದ್ಧ, ಗುಣಂ ಪೂಜೇಸಿ ಯಂ ತದಾ;

ತೇನ ಪುಞ್ಞಾನುಭಾವೇನ, ಸಾ ಭಿರೂಪೀ ಮನೋರಮಾ.

೭. ಯೇನ ಯೇನ ಪಕಾರೇನ, ಪುಞ್ಞಪಾಪಾನಿ ಯೋ ಕರೇ;

ತಸ್ಸ ತಸ್ಸಾನುರೂಪೇನ, ಮೋರೋವ ಲಭತೇ ಫಲಂ.

೮. ಪಾಪೇನ ಚ ತಿರಚ್ಛಾನೇ, ಜಾಯನ್ತಿ ಕುಸಲೇನ ತೇ;

ವಣ್ಣಪೋಕ್ಖರತಾ ಹೋತಿ, ಮೋರಾನಂ ಕಮ್ಮ ಮೀದಿಸನ್ತಿ.

ತತೋ ತಸ್ಸಾ ಮಾತಾಪಿತರೋ ಸುವಣ್ಣತಿಲಕಾತಿ ನಾಮ ಮಕಂಸು. ತಸ್ಮಿಂಕಿರ ನಗರೇ ಮನುಸ್ಸಾ ತಸ್ಸಾ ರುಪದಸ್ಸನೇನಚ ಸವಣೇನಚ ಸಮ್ಪತ್ತಾಪಿ ಚಣ್ಡಾಲಧೀತಾ ಅಯನ್ತಿ ಪರಿಭವಭಯೇನ ಆವಾಹಂ ನ ಕರೋನ್ತಿ. ಅಥ ತಸ್ಮಿಂ ನಗರೇ ಜೇಟ್ಠಚಣ್ಡಾಲಬ್ರಾಹ್ಮಣಸ್ಸ ಪುತ್ತೋ ಏತಮತ್ಥಾಯ ತಸ್ಸಾ ಮಾತಾಪಿತುನ್ನಂ ಸನ್ತಿಕಂ ವತ್ಥಾಭರಣಗನ್ಧಮಾಲಾದಯೋ ಪೇಸೇಸಿ ಸುವಣ್ಣತಿಲಕಂ ಅಮ್ಹಾಕಂ ದದನ್ತೂತಿ, ತೇ ತಂ ಪವತ್ತಿಂ ತಸ್ಸಾ ಆರೋಚೇಸುಂ. ಸಾಸ್ಸ ಜಿಗುಚ್ಛನ್ತೀ ಪರಿಹಾಸ ಮಕಾಸಿ. ತತೋ ಬ್ರಾಹ್ಮಣಸ್ಸ ಪುತ್ತೋ ಲಜ್ಜಿತೋ ರಞ್ಞೋ ಸನ್ತಿಕಂ ಗನ್ತ್ವಾ ವೀಣಂ ಮುಞ್ಚೇತ್ವಾ ಗಾಯಮಾನೋ ಏವಮಾಹ.

೯. ಲಲನಾ ನನಾನೀ ಚಲಲೋಚನಾನೀ,

ತರುಣಾ ರುಣಾನೀ ಚಲಿತಾಧರಾಣೀ;

ಮನುಜೋ ಹಿ ಯೋ ನೇತ್ತಪಿಯಂ ಕರೋತಿ,

ಸ ತು ನೀಚಜಾತಿಂ ಅಪಿ ನೋ ಜಹಾತಿ.

ಕಿಮಿದನ್ತಿ ರಞ್ಞಾ ಪುಟ್ಠೋ ಆಹ.

೧೦. ಸಮೇತಿ ಕಿಂ ದೇವ ಛಮಾಯ ಮತ್ತಿಕಾ,

ಕದಾಚಿ ಚಾಮೀಕರಜಾತಿಕಾಯ;

ಸಿಗಾಲಧೇನು ಅಪಿ ನೀಚಜಾತಿಕಾ,

ಸಮೇತಿ ಕಿಂಸೀಹವರೇನ ದೇವಾತಿ.

ಏವಞ್ಚ ಪನ ವತ್ವಾ ದೇವ ಇಮಸ್ಮಿಂನಗರೇ ಸುವಣ್ಣತಿಲಕಾ ನಾಮೇಕಾ ಚಣ್ಡಾಲಧೀತಾ ಅತ್ಥಿ, ಸಾ ಸಮಾನಜಾತಿಕೇಹಿ ಪೇಸಿತಪಣ್ಣಾಕಾರಂ ನ ಗಣ್ಹಾತಿ, ಕುಲವನ್ತೇಯೇವ ಪತ್ಥೇತಿ, ಕದಾ ನಾಮ ಕಾಕೀ ಸುವಣ್ಣಹಂಸೇನ ಸಮಾಗಚ್ಛತಿ ದೇವಾತಿ. ರಾಜಾ ತಂ ಸುತ್ವಾ ತಸ್ಸಾ ಪಿತರಂ ಪಕ್ಕೋಸಾಪೇತ್ವಾ ತಮತ್ಥಂ ವತ್ವಾ ಸಚ್ಚಂ ಭಣೇತಿ ಪುಚ್ಛಿ, ಸೋಪಿ ಸಚ್ಚಂ ದೇವ, ಸಾ ಜಾತಿಸಮ್ಪನ್ನಮೇವ ಕಾಮೇತೀತಿ ಆಹ. ರಾಜಾ ಏವಂ ಸತಿ ಭಣೇ ಪಞ್ಚಮಧುರನಗರೇ ಉದ್ದಾಳಬ್ರಾಹ್ಮಣೋ ನಾಮ ಅತ್ಥಿ, ಸೋ ಜಾತಿಸಮ್ಪನ್ನೋ ಮಾತಿತೋಚ ಪಿತಿತೋಚ ಅನುಪಕ್ಕುಟ್ಠೋ, ಜೇಗುಚ್ಛಾ ಪಟಿಕ್ಕೂಲಾ ಏತಾತಿ ಮಾತುಗಾಮೇನ ಸದ್ಧಿಂ ನ ಸಂವಸತಿ. ಅತ್ತನೋ ಗೇಹತೋ ರಾಜಗೇಹಂ ಗಚ್ಛನ್ತೋಚ ಆಗಚ್ಛನ್ತೋ ಚ ಸೋಳಸಖೀರೋದಕಘಟೇಹಿ ಮಗ್ಗೇ ಸಿಞ್ಚಾಪೇಸಿ. ಮಾತುಗಾಮೇ ದಿಸ್ವಾ ಕಾಲಕಣ್ಣೀ ಮಯಾ ದಿಟ್ಠಾತಿ ಖೀರೋದಕೇನ ಮುಖಂ ಧೋವತಿ. ತವ ಧೀತಾ ಸಕ್ಕೋನ್ತೀ ತೇನ ಸದ್ಧಿಂ ಸಂವಸತು, ಏತಮತ್ಥಂ ತವ ಧೀತರಂ ಕಥೇಹೀತಿ ಆಹ, ಸೋಪಿ ತಂ ಸುತ್ವಾ ಗೇಹಂ ಗನ್ತ್ವಾ ಧೀತರಂ ಪಕ್ಕೋಸಿತ್ವಾ ರಞ್ಞಾ ವುತ್ತನಿಯಾಮೇನೇವ ತಸ್ಸಾ ಕಥೇಸಿ. ತಾಯ ತಂ ಸುತ್ವಾ ಸಕ್ಕೋನ್ತೀ ಅಹಂ ಉದ್ದಾಳಬ್ರಾಹ್ಮಣೇನ ಸದ್ಧಿಂ ವಸಿಸ್ಸಾಮಿ, ಮಾ ತುಮ್ಹೇ ಚಿನ್ತೇಥ, ಪಪಞ್ಚಮ್ಪಿ ಮಾ ಕರೋಥ, ಪಾತೋವ ಗಮಿಸ್ಸಾಮೀತಿ ವುತ್ತೇ ಪಿತಾ ಪನಸ್ಸಾ ಸಾಧೂತಿ ಸಹಸ್ಸಗ್ಘನಕಚಿತ್ತಕಮ್ಬಲಕಞ್ಚುಕೇನ ಧೀತು ಸರೀರಂ ಪಾರುಪಾಪೇತ್ವಾ ವೀಣಾದಿತುರಿಯಭಣ್ಡಾನಿ ಗಾಹಾಪೇತ್ವಾ ಧೀತುಯಾ ಸದ್ಧಿಂ ಅದ್ಧಾನಮಗ್ಗಂ ಪಟಿಪಜ್ಜಿ. ಗಚ್ಛನ್ತೋ ಅನ್ತರಾಮಗ್ಗೇ ಅಞ್ಞತರಸ್ಮಿಂ ನಗರೇ ರಞ್ಞೋ ಗನ್ಧಬ್ಬಂ ಕರೋನ್ತೋ ಧೀತರಂ ಪಿಟ್ಠಿಪಸ್ಸೇ ನಿಸೀದಾಪೇತ್ವಾ ಗನ್ಧಬ್ಬಮಕಾಸಿ. ಅಥಸ್ಸ ಪಿಟ್ಠಿಪಸ್ಸನಿಸಿನ್ನಾ ಸುವಣ್ಣತಿಲಕಾ ನಯನಕೋಟಿಯಾ ದಿಟ್ಠಿಂ ಪಾಪೇನ್ತೀ ಸರಸೇನ ತಂ ಓಲೋಕೇತ್ವಾ ಪಾರುತಕಞ್ಚುಕಂ ಕಿಞ್ಚಿ ಅಪನೇತ್ವಾ ಸರೀರಪ್ಪಭಂ ಪಞ್ಞಾಪೇಸಿ, ರಾಜಾ ಪನಸ್ಸಾ ಸರೀರಪ್ಪಭಂಚ ರೂಪಸಮ್ಪದಂಚ ದಿಸ್ವಾ ಕಾಮಾತುರೋ ವಿಗತಸಞ್ಞೋ ಸಮ್ಮೂಳ್ಹೋ ಹುತ್ವಾ ಮುಹುತ್ತೇನ ಪಟಿಲದ್ಧಸ್ಸಾಸೋ ತಸ್ಸಾ ಸಸ್ಸಾಮಿಕಾಸ್ಸಾಮಿಕಭಾವಂ ಪುಚ್ಛಿತ್ವಾ ಚಣ್ಡಾಲಧೀತಾತಿ ಸುತ್ವಾ ಪರಿಭವಭಯೇನ ತಂ ಆನೇತು ಮಸಕ್ಕೋನ್ತೋ ಏವರೂಪಂ ವಣ್ಣಪೋಕ್ಖರಸಮ್ಪನ್ನಂ ಇತ್ಥಿರತನಂ ಅಲಭನ್ತಸ್ಸ ಮೇ ಕೋ ಅತ್ಥೋ ಜೀವಿತೇನಾತಿ ಸೋಚನ್ತೋ ಪರಿದೇವನ್ತೋ ಕಾಮಮುಚ್ಛಿತೋ ಕತ್ತಬ್ಬಾ ಕತ್ತಬ್ಬಂ ಅಜಾನನ್ತೋ ಅಸಿಂ ಗಹೇತ್ವಾ ಅತ್ತನೋ ಸೀಸಂ ಸಯಮೇವ ಛಿನ್ದಿತ್ವಾ ಕಾಲ ಮಕಾಸಿ. ಏವಮೇವ ಅನ್ತರಾಮಗ್ಗೇ ಪಞ್ಚರಾಜಾನೋ ತಸ್ಸಾ ರೂಪಸಮ್ಪತ್ತಿಮದಮತ್ತಾ ಅಸಿನಾ ಛಿನ್ನಸೀಸಾ ಜೀವಿತಕ್ಖಯಂ ಪಾಪುಣಿಂಸು. ತಥಾ ಹಿ ಸತ್ತಾ ಹಿರಞ್ಞಸುವಣ್ಣದಾಸಿದಾಸ ಪುತ್ತದಾರಾದೀಸು [ಪುತ್ತದಾರಾದೀಹಿ ಇತಿಸಬ್ಬತ್ಥ] ಪಿಯಂ ನಿಸ್ಸಾಯ ಕಾಮೇನ ಮುಚ್ಛಿತಾ ಅನಯಬ್ಯಸನಂ ಪಾಪುಣನ್ತೀತಿ. ವುತ್ತಞ್ಹೇತಂ ಭಗವತಾ.

೧೧. ಪಿಯತೋ ಜಾಯತೇ ಸೋಕೋ,

ಪಿಯತೋ ಜಾಯತೇ ಭಯಂ;

ಪಿಯತೋ ವಿಪ್ಪಮುತ್ತಸ್ಸ,

ನತ್ಥಿ ಸೋಕೋ ಕುತೋ ಭಯಂ.

೧೨. ಪೇಮತೋ ಜಾಯತೇ ಸೋಕೋ,

ಪೇಮತೋ ಜಾಯತೇ ಭಯಂ;

ಪೇಮತೋ ವಿಪ್ಪಮುತ್ತಸ್ಸ,

ನತ್ಥಿ ಸೋಕೋ ಕುತೋ ಭಯಂ.

೧೩. ರತಿಯಾ ಜಾಯತೇ ಸೋಕೋ,

ರತಿಯಾ ಜಾಯತೇ ಭಯಂ;

ರತಿಯಾ ವಿಪ್ಪಮುತ್ತಸ್ಸ,

ನತ್ಥಿ ಸೋಕೋ ಕುತೋ ಭಯಂ.

೧೪. ಕಾಮತೋ ಜಾಯತೇ ಸೋಕೋ,

ಕಾಮತೋ ಜಾಯತೇ ಭಯಂ;

ಕಾಮತೋ ವಿಪ್ಪಮುತ್ತಸ್ಸ,

ನತ್ಥಿ ಸೋಕೋ ಕುತೋ ಭಯಂ.

೧೫. ತಣ್ಹಾಯ ಜಾಯತೇ ಸೋಕೋ,

ತಣ್ಹಾಯ ಜಾಯತೇ ಭಯಂ;

ತಣ್ಹಾಯ ವಿಪ್ಪಮುತ್ತಸ್ಸ,

ನತ್ಥಿ ಸೋಕೋ ಕುತೋ ಭಯಂ.

ತತೋ ಸೋ ಅನುಕ್ಕಮೇನ ಪಞ್ಚಮಧುರನಗರಂ ಗನ್ತ್ವಾ ಅತ್ತನೋ ಆಗತಭಾವಂ ರಞ್ಞಾ ಕಥಾಪೇತ್ವಾ ತೇನ ಅನುಞ್ಞಾತೋ ಗನ್ತ್ವಾ ರಾಜಾನಂ ಅದ್ದಸ. ತದಾ ಉದ್ದಾಳಬ್ರಾಹ್ಮಣೋ ರಞ್ಞೋ ಅವಿದೂರೇ ಕಮ್ಬಲಭದ್ದಪೀಠೇ ನಿಸಿನ್ನೋ ಹೋತಿ, ಗನ್ಧಬ್ಬಬ್ರಾಹ್ಮಣೋಪಿ ಧೀತುಯಾ ಸದ್ಧಿಂ ಗನ್ಧಬ್ಬಂ ಕುರುಮಾನೋ ನಿಸೀದಿ. ತಸ್ಮಿಂಖಣೇ ಪಿತು ಪಿಟ್ಠಿಪಸ್ಸೇ ನಿಸಿನ್ನಾ ಸುವಣ್ಣತಿಲಕಾ ಉದ್ದಾಳಬ್ರಾಹ್ಮಣೋ ಕತಮೋತಿ ಪುಚ್ಛಿತ್ವಾ ಏತಸ್ಮಿಂ ಭದ್ದಪೀಠೇ ನಿಸಿನ್ನೋಂ ಏಸೋತಿ ಸುತ್ವಾ ನಿಲಾಮಲಲೋಚನೇಹಿ ತಂ ಓಲೋಕನ್ತಿ ದಸನರಂಸಿನಾ ಸಮ್ಭಿನ್ನಸುರತ್ತಾಧರೇನ ಮನ್ದಹಸಿತಂ ಕರೋನ್ತೀ ತಂ ಓಲೋಕೇತ್ವಾ ಪಾರುತಕಞ್ಚುಕಂ ಅಪನೇತ್ವಾ ಸರೀರಪ್ಪಭಂ ವಿಸ್ಸಜ್ಜೇಸಿ. ತಂ ದಿಸ್ವಾ ಬ್ರಾಹ್ಮಣೋ ಉಮ್ಮತ್ತೋ ಸೋಕೇನ ಪರಿದಡ್ಢಗತ್ತೋ ಉಣ್ಹವಾತೇನ ಪೂರಿತಮುಖನಾಸೋ ಅಸ್ಸುನಾ ಕಿಲಿನ್ನನೇತ್ತೋ ವಿಸಞ್ಞೀ ಅಹೋಸಿ. ತತೋ ಸೋ ಮುಹುತ್ತೇನ ಲದ್ಧಸ್ಸಾಸೋ ರೋಗೀವಿಯ ರಞ್ಞೋ ಸಕಾಸಾ ಅಪಸರನ್ತೋ ಅತ್ತನೋ ಗೇಹಂ ಗನ್ತ್ವಾ ಸುಹದೇ ಪಕ್ಕೋಸಿತ್ವಾ ತೇಸಂ ಏವಮಾಹ. ಭವನ್ತೇತ್ಥ.

೧೬. ಯೋ ಆಪದೇ ಸಮುಪ್ಪನ್ನೇ,

ಉಪತಿಟ್ಠತಿ ಸನ್ತಿಕೇ;

ಸುಖದುಕ್ಖೇ ಸಮೋ ಹೋತಿ,

ಸೋ ಮಿತ್ತೋ ಸೋಚ ಞಾತಕೋ.

೧೭. ಯೋ ಗುಣಂ ಭಾಸತೇ ಯಸ್ಸ, ಅಗುಣಞ್ಚ ನಿಗೂಹತಿ;

ಪಟಿಸೇಧೇತ್ಯ [ಪಟಿಸೇಧೇತಿಕತ್ತಬ್ಬಾ ಇತಿಸಬ್ಬತ್ಥ] ಕತ್ತಬ್ಬಾ, ಸೋ ಮಿತ್ತೋ ಸೋಚ ಞಾತಕೋ.

೧೮. ಸುವಣ್ಣತಿಲಕಾನಾಮ, ಲಲನಾ ಕಾಮಲಾಲಯಾ;

ನೀಲಕ್ಖಿಚಣ್ಡಕಣ್ಡೇಹಿ, ವಿಖಣ್ಡೇಸಿ ಮನೋ ಮಮ.

೧೯. ತಸ್ಸಾ ಮುಖಮ್ಬುಜೇ ಸತ್ತಾ, ಮಮ ನೇತ್ತಮಧುಬ್ಬತಾ,

ಅಪ್ಪಮ್ಪಿನ ಸರನ್ತಾಮಂ, ತತ್ಥೇವಾ ಭಿರಮನ್ತಿ ತೇ.

೨೦. ಸಹೇವ ತೇಹಿ ಮೇ ಚಿತ್ತಂ, ಗತಂ ಉಲ್ಲಂಘಿಯುದ್ಧತೋ;

ಲಜ್ಜಾಗಮ್ಭೀರಪರಿಖಂ, ಧಿತಿಪಾಕಾರಮುಗ್ಗತಂ.

೨೧. ಸಮ್ಮುಯ್ಹಾಮಿ ಪಮುಯ್ಹಾಮಿ, ಸಬ್ಬಾ ಮುಯ್ಹನ್ತಿ ಮೇ ದಿಸಾ;

ತಸ್ಸ ಮೇ ಸರಣಂ ಹೋಥ, ಕರೋಥ ಮಮ ಸಙ್ಗಹನ್ತಿ.

ತಂ ಸುತ್ವಾ ತೇ ಏವಮಾಹಂಸು.

೨೨. ಯಂ ತ್ವಮಾಚರಿಯ ಪತ್ಥೇಸಿ, ಚಣ್ಡಾಲೀ ಸಾ ಅಸಙ್ಗಮಾ;

ಕಿನ್ನು ಮೀಳ್ಹೇನ ಸಂಯೋಗೋ, ಚನ್ದನಸ್ಸ ಕದಾ ಸಿಯಾ.

೨೩. ಅಗಮ್ಮಗಮನಾ ಯಾತಿ, ನರಾನಂ ದೂರತೋ ಸಿರೀ;

ಕಿತ್ತಿಚಾಯು ಬಲಂ ಬುದ್ಧಿ, ಅಯಸಂಚ ಸ ಗಚ್ಛತೀತಿ.

ಅಥ ತೇಸಂ ಬ್ರಹ್ಮಣೋ ಆಹ.

೨೪. ನ ಪರಿಚ್ಚಜತಿ ಲೋಕೋಯಂ, ಅಮೇಜ್ಝೇ ಮಣಿಮುತ್ತಮಂ;

ಥೀರತನಂ ಯುವಾಣೀ ಚ, ದುಕ್ಕುಲಾ ಅಪಿ ಗಾಹಿಯಾತಿ.

ಏವಞ್ಚ ಪನ ವತ್ವಾ ತಸ್ಸಾ ಸಸ್ಸಾಮಿಕಾಸ್ಸಾಮಿಕಭಾವಂ ಞತ್ವಾ ಆನೇಥಾತಿ ಆಹ, ತೇ ತಥಾ ಅಕಂಸು. ತತೋ ಬ್ರಾಹ್ಮಣೋ ತಾಯ ಗೇಹಂ ಆಗತಕಾಲತೋ ಪಟ್ಠಾಯ ಚತ್ತಾರೋ ಮಾಸೇ ರಞ್ಞೋ ಉಪಟ್ಠಾನಂ ನೇವ ಅಗಮಾಸಿ. ತಸ್ಸ ಪನ ಬ್ರಹ್ಮಣಸ್ಸ ಸನ್ತಿಕೇ ಪಞ್ಚಸತರಾಜಕುಮಾರಾ ನಾನಾವಿಧಾನಿ ಸಿಪ್ಪಾನಿ ಉಗ್ಗಣ್ಹನ್ತಿ. ತೇ ತಂ ಕಾರಣಂ ಞತ್ವಾ ಸುವಣ್ಣತಿಲಕಾಯ ವಿಜ್ಜಮಾನಾಯ ಅಮ್ಹಾಕಂ ಸಿಪ್ಪುಗ್ಗಹಣಸ್ಸ ಅನ್ತರಾಯೋ ಭವಿಸ್ಸತಿ, ಯೇನ ಕೇನಚಿ ಉಪಾಯೇನ ಏತಂ ಮಾರೇತುಂ ವಟ್ಟತೀತಿ, ಚಿನ್ತೇತ್ವಾ ತೇ ಹತ್ಥಾ ಚರಿಯಂ ಪಕ್ಕೋಸಿತ್ವಾ ಲಞ್ಜಂ ದತ್ವಾ ಏವಮಾಹಂಸು, ಹತ್ಥಿಂ ಸುರಾಯ ಮತ್ತಂ ಕತ್ವಾ ಸುವಣ್ಣತಿಲಕಂ ಮಾರೇಹೀತಿ. ತತೋ ತೇ ಸಬ್ಬೇ ರಾಜಙ್ಗಣೇ ಸನ್ನಿಪತಿತ್ವಾ ದೂತಂ ಪಾಹೇಸುಂ, ಆಚರಿಯಂ ದಟ್ಠುಕಾಮಮ್ಹಾತಿ. ತತೋ ಬ್ರಾಹ್ಮಣೇನ ಆಗನ್ತ್ವಾ ನಿಸಿನ್ನೇನ ಪಟಿಸನ್ಥಾರಂ ಕತ್ವಾ ಆಚರಿಯ ಆಚರಿಯಾನಿಂ ಪಸ್ಸಿತುಕಾಮಮ್ಹಾತಿ ಆಹಂಸು. ಅಥ ಸೋ ಸುವಣ್ಣತಿಲಕಂ ಗಹೇತ್ವಾ ಆಗಚ್ಛಥಾತಿ ಮನುಸ್ಸೇ ಪೇಸೇಸಿ. ತೇ ತಥಾ ಕರಿಂಸು, ಅಥ ತಸ್ಸಾ ವೀಥಿಮಜ್ಝಂ ಸಮ್ಪತ್ತಕಾಲೇ ಹತ್ಥಿಂ ವಿಸ್ಸಜ್ಜಾಪೇಸುಂ. ಸೋ ಸೋಣ್ಡಾಯ ಭೂಮಿಯಂ ಪಹರನ್ತೋ [ಪಹರನ್ತೋಉಪಧಾವಿತ್ವಾ ಇತಿಕತ್ಥಚಿ] ಗಚ್ಛನ್ತೋ ಉಪಧಾವಿತ್ವಾ ಸೋಣ್ಡೇನ ತಂ ಉಕ್ಖಿಪಿತ್ವಾ ಕುಮ್ಭೇ ನಿಸೀದಾಪೇಸಿ. ತತೋ ರಾಜಾನೋ ತಥಾ ತಂ ಮಾರಾಪೇತು ಮಸಕ್ಕೋನ್ತಾ ಪುನ ದಿವಸೇ ಮನುಸ್ಸೇ ಪಯೋಜೇತ್ವಾ ರತ್ತಿಯಂ ಮಾರಾಪೇಸುಂ. ಬ್ರಾಹ್ಮಣೋಪಿ ಏವರೂಪಂ ಇತ್ಥಿಂ ಅಲಸಿತ್ವಾ ಜೀವನತೋ ಮತಮೇವ [ಮತಂಮೇಸೇಯ್ಯೋ ಇತಿಕತ್ಥಚಿ] ಸೇಯ್ಯೋತಿ ಸೋಚನ್ತೋ ಪರಿದೇವನ್ತೋ ರಾಜಙ್ಗಣೇ ದಾರುಚಿತಕಂ ಕಾರಾಪೇತ್ವಾ ಅಗ್ಗಿಂಪವಿಸಿತ್ವಾ ಮತೋತಿ. ಏವಂ ಮಾತುಗಾಮವಸಙ್ಗತಾ ಮಹನ್ತಂ ಅನಯಬ್ಯಸನಞ್ಚ ಮರಣಞ್ಚ ಪಾಪುಣನ್ತೀತಿ. ವುತ್ತಞ್ಹೇತಂ ಭಗವತಾ.

೨೫. ಮಾಯಾವೇಸಾ [ಮಾಯಾಚೇಸಾ ಇತಿಕತ್ಥಚಿ] ಮರೀಚೀವ,

ಸೋಕೋ ರೋಗೋ ಚುಪದ್ದವೋ;

ಖರಾವ ಬನ್ಧನಾ ಚೇಸಾ,

ಮಚ್ಚುಪಾಸೋ ಗುಹಾಸಯೋ;

ತಾಸು ಯೋ ವಿಸ್ಸಸೇ ಪೋಸೋ,

ಸೋ ನರೇಸು ನರಾಧಮೋತಿ.

೨೬. ಅಯೋನಿಸೋ ಸಾ ಪುರಿಮಾಯ ಜಾತಿಯಾ,

ಪುಞ್ಞಂ ಕರಿತ್ವಾ ಅಲಭೀದಿಸಂ ಗತಿಂ;

ಧೀಸಮ್ಪಯುತ್ತಂ [ಧಿತಿಸಮ್ಪಯುತ್ತಂ ಇತಿಕತ್ಥಚಿ] ಕುಸಲಂ ಕರೋನ್ತಾ,

ನಿಬ್ಬಾಣಮೇವಾಭಿಮುಖಂ ಕರೋಥಾತಿ.

ಸುವಣ್ಣತಿಲಕಾಯ ವತ್ಥುಂ ದುತಿಯಂ.