೩೧. ಮಹಾಸೇನರಞ್ಞೋ ವತ್ಥುಮ್ಹಿ ಅಯಮಾನುಪುಬ್ಬೀಕಥಾ

ಭಗವತಿ ಪರಿನಿಬ್ಬುತೇ ಪಾಟಲಿಪುತ್ತನಗರೇ ಮಹಾಸೇನೋ ನಾಮ ರಾಜಾ ರಜ್ಜಂ ಕಾರೇಸಿ ಧಮ್ಮಿಕೋ ಧಮ್ಮರಾಜಾ. ಸೋ ಪನ ಪಿತುಪಿತಾಮಹಾದೀನಂ ಧನರಾಸಿಂ ಓಲೋಕೇತ್ವಾ ಇಮೇ ಇಮಂ ಸಾಪತೇಯ್ಯಂ ಪಹಾಯ ಮಚ್ಚುನೋ ಮುಖಮುಪಗತಾ. ಅಹೋ ಸಂಸಾರಿಕಾನಂ ಅಞ್ಞಾಣತಾ. ಧನಂ ಠಪೇತ್ವಾ ಅತ್ತನೋ ವಿನಾಸಞ್ಚ ಅತ್ತಾನಂ ಠಪೇತ್ವಾ ಧನವಿನಾಸಞ್ಚ ನ ಜಾನನ್ತೀತಿ ಸಮ್ಪತ್ತಿಯಾ ಅಧಿಗಮಞ್ಚ ವಿನಾಸಂ ಚಾತಿ ಸಬ್ಬಂ ಚಿನ್ತೇತ್ವಾ ಧಮ್ಮಞ್ಚ ಸುತ್ವಾ ಪಟಿಲದ್ಧಸದ್ಧೋ ದಿವಸೇ ದಿವಸೇ ದಸಸಹಸ್ಸಾನಂ ಭಿಕ್ಖೂನಂ ಮಧುರೇನ ಅನ್ನಪಾನೇನ ಸನ್ತಪ್ಪೇನ್ತೋ ಅನೇಕಾನಿ ಪುಞ್ಞಾನಿ ಉಪಚಿನನ್ತೋ ಏಕದಿವಸಂ ರಹೋ ಪಟಿಸಲ್ಲಿನೋ ಏವಂ ಚಿನ್ತೇಸಿ. ಏವಂ ರಾಜನಿಯೋಗೇನ ಜನಸ್ಸ ಪೀಳನಂ ಕತ್ವಾ ದಿನ್ನದಾನತೋ ಸಹತ್ಥೇನ ಕಮ್ಮಂ ಕತ್ವಾ ಲದ್ಧೇನ ದಿನ್ನದಾನಂ ಮಹಪ್ಫಲಂ ಮಹಾನಿಸಂಸಂ ಭವಿಸ್ಸತಿ, ಏವಂ ಮಯಾ ಕಾತಬ್ಬನ್ತಿ ಸೋ ಸುಹದಾ ಮಚ್ಚಸ್ಸ ರಜ್ಜಂ ನೀಯ್ಯಾತೇತ್ವಾ ಅತ್ತನೋ ಕಣಿಟ್ಠಿಕಂ ಆದಾಯ ಕಿಞ್ಚಿ ಅಜಾನಾಪೇತ್ವಾ ಅಞ್ಞತರವೇಸೇನ ನಗರಾ ನಿಕ್ಖಮ್ಮ ಉತ್ತರಮಧುರಂ ನಾಮ ನಗರಂ ಅಗಮಾಸಿ, ತತ್ಥ ಮಹಾವಿಭವೋ ಏಕೋ ಸೇಟ್ಠಿ ಪಟಿವಸತಿ, ತೇ ಸೇಟ್ಠಿನೋ ಸಮೀಪ ಮುಪಗಮ್ಮ ಠಿತಾ. ತೇನ ಕಿಮತ್ಥಾಯಾಗತಾತಿ ವುತ್ತೇ ರಾಜಾ ತವ ಗೇಹೇ ಭತಿಯಾ ಕಮ್ಮಂ ಕರಿಸ್ಸಾಮೀತಿ ವತ್ವಾ ತೇನಾನುಞ್ಞಾತೋ ತೀಣಿ ವಸ್ಸಾನಿ ಕಮ್ಮ ಮಕಾಸಿ, ತತೋ ಏಕದಿವಸಂ ಸೇಟ್ಠಿ ತೇ ದಿಸ್ವಾ ಪಕ್ಕೋಸಿತ್ವಾ ಅತೀವ ತುಮ್ಹೇ ಸುಖುಮಾಲತರಾ. ತಥಾಪಿ ಇಮಸ್ಮಿಂ ಗೇಹೇ ಕಮ್ಮಕರಣೇನ ಚಿರಂ ವಸಿತ್ಥ, ಏತ್ತಕಂ ಕಾಲಂ ಕಿಸ್ಮಿಞ್ಚಿ ಕಮ್ಮೇಪಿ ಕುಸೀತತ್ತಂ ನ ಪಞ್ಞಾಯತಿ. ಪಗೇವ ಅನಾಚಾರಮ್ಪಿ, ಯಾಗುಭತ್ತಂ ಠಪೇತ್ವಾ ಅಞ್ಞಂ ಉಪಕಾರಮ್ಪಿ ಮಮ ಸನ್ತಿಕಾ ನತ್ಥಿ, ಕೇನತ್ಥೇನ ಕಮ್ಮಂ ಕರೋಥಾತಿ ಪುಚ್ಛಿ. ರಾಜಾ ತಸ್ಸ ವಚನಂ ಸುತ್ವಾ ಇಮಸ್ಮಿಂ ಜನಪದೇ ಸಾಲಿನೋ ಮನಾಪಭಾವೋ ಬಹುಸೋ ಸೂಯತಿ. ತಸ್ಮಾ ಸಾಲೀನಮತ್ಥಾಯ ಇಧಾ ಗತಮ್ಹಾತಿ ಆಹ, ತಂ ಸುತ್ವಾ ತೇಸಂ ತುಟ್ಠೋ ಸೇಟ್ಠಿ ಸಾಲೀನಂ ಸಕಟಸಹಸ್ಸಂ ಅದಾಸಿ, ರಾಜಾ ಸಾಲಿಂಲಭಿತ್ವಾ ಸೇಟ್ಠಿನೋ ಏವಮಾಹ, ಭೋ ಇಮಂ ಅಮ್ಹಾಕಂ ನಗರಂ ಪಾಪೇಥಾತಿ, ತಂ ಸುತ್ವಾ ಸೇಟ್ಠಿ ಸಾಧೂತಿ ವತ್ವಾ ಸಾಲಿಪರಿಪುಣ್ಣಸಕಟಸಹಸ್ಸಂ ರಞ್ಞೋ ನಗರಂ ಪಾಪೇಸಿ, ರಾಜಾ ನಗರಂ ಗನ್ತ್ವಾ ಸೇಟ್ಠಿಸ್ಸ ನಾನಾವಣ್ಣವತ್ಥಹಿರಞ್ಞಸುವಣ್ಣಾದೀಹಿ ಸಕಟೇ ಪೂರೇತ್ವಾ ಪಟಿಪೇಸೇತ್ವಾ ಮೇತ್ತಿಂ ಥಿರಂ ಕತ್ವಾ ಆಭತವೀಹಯೋ ರಾಜಗೇಹೇ ಸನ್ನಿಚಯಮಕಾಸಿ, ಅಥ ರಾಜಾ ಕತಿಪಾಹಚ್ಚಯೇನ ಮುಸಲಂ ಪಗ್ಗಯ್ಹ ಸಹತ್ಥೇನೇವ ವೀಹಿಂ ಕೋಟ್ಟೇತಿ, ಕೋಟ್ಟಿತಕೋಟ್ಟಿತಂ ಕಣಿಟ್ಠಿಕಾ ಪಪ್ಫೋಟೇತಿ. ಏವಂ ಉಭೋಪಿ ತಣ್ಡುಲಾನಂ ಮಹನ್ತಂ ರಾಸಿಂ ಕತ್ವಾ ದಾರೂದಕಾದಯೋ ಆಹರಿತ್ವಾ ಅಮ್ಬಿಲಭತ್ತಂ ಪಚಿತ್ವಾ ರಾಜಗೇಹೇ ಪಞ್ಚಸತಆಸನಾನಿ ಪಞ್ಞಾಪೇತ್ವಾ ಕಾಲಂ ಉಗ್ಘೋಸೇಸುಂ, ಆಗಚ್ಛನ್ತು ಅಯ್ಯಾ ಅನುಕಮ್ಪಂ ಉಪಾದಾಯ ಮಮ ಗೇಹೇ ಭುಞ್ಜನ್ತೂತಿ. ತಂ ಸುತ್ವಾ ಪಞ್ಚಸತಾ ಭಿಕ್ಖೂ ಆಕಾಸೇನ ಆಗಮಿಂಸು, ರಾಜಾ ತೇ ಯಾವದತ್ಥಂ ಪರಿವಿಸಿ, ತತೋ ತೇಸಂ ಅನ್ತರೇ ಪಿಯಂಗುದೀಪವಾಸೀ ಏಕೋ ಮಹಾಸಿವತ್ಥೇರೋ ನಾಮ ಭತ್ತಂ ಗಹೇತ್ವಾ ಏತೇ ಮಂ ಪಸ್ಸನ್ತೂತಿ ಅಧಿಟ್ಠಹಿತ್ವಾ ಆಕಾಸೇನ ಪಿಯಂಗುದೀಪಂ ಗನ್ತ್ವಾ ಭತ್ತಂ ಪಞ್ಚಸತಾನಂ ಭಿಕ್ಖೂನಂ ದತ್ವಾ ಪರಿಭುಞ್ಚಿ. ತಂ ತಸ್ಸಾನುಭಾವೇನ ಸಬ್ಬೇಸಂ ಯಾವದತ್ಥಂ ಅಹೋಸಿ. ಏವಂ ಅಪ್ಪಕೇನಾಪಿ ದೇಯ್ಯಧಮ್ಮೇನ ಸಪ್ಪುರಿಸಾ ದಾಯಕಾನಂ ಮನಂ ಪಸಾದೇತ್ವಾ ಪತಿಟ್ಠಂ ಕರೋನ್ತೀತಿ. ವುತ್ತಞ್ಹಿ.

೧. ಅಪ್ಪಕೇನಪಿ ಮೇಧಾವೀ, ದಾಯಕಾನಂ ಮನಂ ಪತಿ;

ಸದ್ಧಂ ವಡ್ಢೇನ್ತಿ ಚನ್ದೋವ, ರಂಸಿನಾ ಖೀರಸಾಗರಂ.

೨. ಅಟ್ಠಾನೇ ನ ನಿಯೋಜೇನ್ತಾ, ಕರೋನ್ತಾ ನೇವ ಸನ್ನಿಧಿಂ;

ಪರಿಭೋಗ ಮಕತ್ವಾನ, ನೇವ ನಾಸೇನ್ತಿ ಪಚ್ಚಯಂ.

೩. ನ ಪಾಪೇನ್ತಾಚ ಥೇಯ್ಯಸ್ಸ, ನ ಕರೋನ್ತಾ ತಥೇವಿಣಂ;

ವಿಭಜನ್ತಿ ಸುಸೀಲೇಸು, ಸಯಂ ಭುತ್ವಾನ ಸೀಲವಾತಿ.

ಅಥ ರಾಜಾ ಕಣಿಟ್ಠಿಕಾಯ ಸದ್ಧಿಂ ಥತ್ಥೇವ ಠಿತೋ ಪಿಯಂಗುದೀಪೇ ಪರಿಭುಞ್ಜನ್ತೇ ಪಞ್ಚಸತಭಿಕ್ಖೂ ದಿಸ್ವಾ ಹಟ್ಠೋ ಉದಗ್ಗೋ ಅಹೋಸಿ. ಅಥ ತೇ ಅಪರಭಾಗೇ ಅತ್ತನಾ ಕತಂ ದಾನವರಂ ಅನುಸ್ಸರನ್ತಾ ನ ಚಿರೇನೇವ ಉಭೋಪಿ ಸೋತಾಪನ್ನಾ ಅಹೇಸುಂತಿ.

೪. ನ ಗಣೇನ್ತಾತ್ತನೋ ದುಕ್ಖಂ, ವಿಹಾಯ ಮಹತಿಂ ಸಿರಿಂ;

ಆಯತಿಂಭವಮಿಚ್ಛನ್ತಾ, ಸುಜನೇವಂ ಸುಭೇ ರತಾ.

೫. ಆಯಾಸೇನ ಕತಂ ಪುಞ್ಞಂ, ಮಹನ್ತಫಲದಾಯಕಂ;

ಇತಿ ಮನ್ತ್ವಾನ ಮೇಧಾವೀ, ಸಹತ್ಥೇನೇವ ತಂ ಕರೇತಿ.

ಮಹಾಸೇನರಞ್ಞೋ ವತ್ಥುಂ ಪಥಮಂ.