೩೦. ಸೀವಲಿತ್ಥೇರಸ್ಸ ವತ್ಥುಮ್ಹಿ ಅಯಮಾನುಪುಬ್ಬೀಕಥಾ

ಇತೋ ಕಿರ ಕಪ್ಪಸತಸಹಸ್ಸಮತ್ಥಕೇ ಪದುಮುತ್ತರೋ ನಾಮ ಸತ್ಥಾ ಲೋಕೇ ಉದಪಾದಿ ಧಮ್ಮದೇಸನಾಯ ಸತ್ತೇ ಅಮತಮಹಾನಿಬ್ಬಾಣಂ ಪಾಪೇನ್ತೋ, ತಸ್ಮಿಂ ಸಮಯೇ ಭಗವಾ ಹಂಸಾವತಿಯಂ ಸರಾಜಿಕಾಯ ಪರಿಸಾಯ ಮಜ್ಝೇ ಏಕಂ ಭಿಕ್ಖುಂ ಲಾಭೀನಂ ಅಗ್ಗಟ್ಠಾನೇ ಠಪೇಸಿ. ತದಾ ರಾಜಾ ತಂ ದಿಸ್ವಾ ತಂ ಠಾನಂ ಕಾಮಯಮಾನೋ ಬುದ್ಧಪಮುಖಸ್ಸ ಸಙ್ಘಸ್ಸ ಮಹಾದಾನಂ ದತ್ವಾ ಭಗವತೋ ಪಾದಮೂಲೇ ಸಿರಸಾ ನಿಪಜ್ಜಿ, ತದಾಸ್ಸ ಭಗವಾ ಅನಾಗತೇ ಗೋತಮಸ್ಸ ಭಗವತೋ ಸಾಸನೇ ತಂ ಠಾನಂ ಲಭಿಸ್ಸಸೀತಿ ವತ್ವಾ ಬ್ಯಾಕಾಸಿ. ತಂ ಸುತ್ವಾ ಮುದಿತೋ ರಾಜಾ ಪುಞ್ಞಾನಿ ಕತ್ವಾ ದೇವಲೋಕೇ ನಿಬ್ಬತ್ತಿ. ತತೋ ಅಪರಭಾಗೇ ಬಾರಾಣಸಿಯಂ ಸೇಟ್ಠಿಪುತ್ತೋ ಹುತ್ವಾ ಪಚ್ಚೇಕಬುದ್ಧಸಹಸ್ಸಂ ಚತುಪಚ್ಚಯದಾನೇನ ಯಾವಜೀವಂ ಪಟಿಜಗ್ಗಿತ್ವಾ ದೇವಲೋಕೇ ನಿಬ್ಬತ್ತೋ ಮಹನ್ತಂ ಸಮ್ಪತ್ತಿ ಮನುಭವಿತ್ವಾ ತತೋ ಚುತೋ ವಿಪಸ್ಸಿಸ್ಸ ಭಗವತೋ ಕಾಲೇ ಬನ್ಧುಮತೀನಗರೇ ಅಞ್ಞತರಸ್ಮಿಂ ಕುಲಗೇಹೇ ನಿಬ್ಬತ್ತಿ. ಸೋ ತಸ್ಮಿಂ ಸಮಯೇ ಸೇನಗುತ್ತಟ್ಠಾನೇ ಠತ್ವಾ ರಞ್ಞೋ ಕಮ್ಮಂ ಕರೋತಿ, ತದಾ ನಗರವಾಸಿನೋ ಉಪಾಸಕಗಣಾ ವಿಪಸ್ಸೀಸಮ್ಮಾಸಮ್ಬುದ್ಧಂ ಉಪಸಙ್ಕಮ್ಮ ವನ್ದಿತ್ವಾ ಭಗವಾ ಭನ್ತೇ ಸಸಾವಕೋ ಅಮ್ಹಾಕಂ ಅನುಗ್ಗಹಂ ಕರೋತೂತಿ ಸ್ವಾತನಾಯ ನಿಮನ್ತೇತ್ವಾ ಮಹಾದಾನಂ ದತ್ವಾ ಸಬ್ಬೇ ಏಕಚ್ಛನ್ದಾ ಭಗವನ್ತ ಮುದ್ದಿಸ್ಸ ಮಹಾರಹಂ ಮಹಾಪರಿವೇಣಂ ಕಾರಾಪೇತ್ವಾ ಪರಿವೇಣಮಹೇ ಮಹಾದಾನಂ ದದನ್ತಾ ದಾನಗ್ಗೇ ಅಸುಕಂ ನಾಮ ನತ್ಥೀತಿ ನ ವತ್ತಬ್ಬನ್ತಿ ವತ್ವಾ ದಾನಂ ಪಟಿಯಾದೇತ್ವಾ ದಾನಗ್ಗಂ ಓಲೋಕೇನ್ತಾ ನವದಧಿಞ್ಚ ಪಟಲಮಧುಞ್ಚ ಅಪಸ್ಸನ್ತಾ ಪುರಿಸೇ ಪಕ್ಕೋಸಿತ್ವಾ ಸಹಸ್ಸಂ ದತ್ವಾ ದಧಿಮಧುಂ ಖಿಪ್ಪಂ ಪರಿಯೇಸಿತ್ವಾ ಆನೇಥಾತಿ ಪೇಸೇಸುಂ, ತೇ ಸಹಸ್ಸಂ ಗಹೇತ್ವಾ ದಧಿಮಧುಂ ಉಪಧಾರೇತುಂ ತತ್ಥ ತತ್ಥ ವಿಚರನ್ತಾ ದ್ವಾರನ್ತರೇ ಅಟ್ಠಂಸು, ತದಾ ಅಯಂ ಸೇನಗುತ್ತೋ ರಞ್ಞೋ ಸಭತ್ತಂ ದಧಿಮಧುಂ ಆದಾಯ ಗಚ್ಛನ್ತೋ ಮಹಾದ್ವಾರಂ ಸಮ್ಪಾಪುಣಿ, ಅಥ ತೇ ದಧಿಮಧುಂ ದಿಸ್ವಾ ಭೋ ಕಹಾಪಣಂ ಗಹೇತ್ವಾ ಇಮಂ ದೇಹೀತಿ ಯಾಚಿಂಸು. ತೇನ [ತೇನದಸ್ಸಾಮಿ ಇತಿಪಿಕತ್ತಚಿ] ನ ದಸ್ಸಾಮೀತಿ ವುತ್ತೇ ಯಾವಸಹಸ್ಸಂ ವಡ್ಢೇತ್ವಾ ಯಾಚಿಂಸು. ತತೋ ಸೇನಗುತ್ತೋ ಇಮಂ ಅಪ್ಪಗ್ಘಂ ಸಹಸ್ಸೇನ ಯಾಚಥ, ಕಿ ಮನೇನ ಕರೋಥಾತಿ ಪುಚ್ಛಿ, ತೇಹಿ ಸಮ್ಬುದ್ಧತ್ಥಾಯಾತಿ ವುತ್ತೇ ತೇನಹಿ ಅಹಮೇವ ದಸ್ಸಾಮೀತಿ ಜೀರಮರಿಚಾದೀಹಿ ಸಕ್ಖರಮಧುಫಾಣಿತಾದಯೋ ಯೋಜೇತ್ವಾ ದಾನಗ್ಗಂ ಉಪನಾಮೇಸಿ. ತಂ ಸತ್ಥು ಆನುಭಾವೇನ ಬುದ್ಧಪಮುಖಸ್ಸ ಅಟ್ಠಸಟ್ಠಿಭಿಕ್ಖುಸತಸಹಸ್ಸಸ್ಸ ಪಹೋಣಕಂ ಅಹೋಸಿ. ತತೋ ಸೋ ತೇನ ಪುಞ್ಞಕಮ್ಮೇನ ದೇವಮನುಸ್ಸಲೋಕೇಸು ಸಮ್ಪತ್ತಿ ಮನುಭವಿತ್ವಾ ಅಪರಭಾಗೇ ಅಮ್ಹಾಕಂ ಭಗವತೋ ಕಾಲೇ ಕೋಲಿಯನಗರೇ ಮಹಾಲಿಲಿಚ್ಛವಿರಞ್ಞೋ ಉಪನಿಸ್ಸಾಯ ಸುಪ್ಪಿಯಾಯ ನಾಮ ಅಗ್ಗಮಹೇಸಿಯಾ ಕುಚ್ಛಿಸ್ಮಿಂ ಪಟಿಸನ್ಧಿಂ ಗಣ್ಹಿ. ಸೋ ಸತ್ತಮಾಸಸತ್ತಸಂವಚ್ಛರಾನಿ ಮಾತುಕುಚ್ಛಿಯಂ ವಸಿತ್ವಾ ಸತ್ತದಿವಸಾನಿ ಮೂಳ್ಹಗಬ್ಭೋ ದುಕ್ಖಮನುಭವಿ. ಮಾತುಕುಚ್ಛಿತೋ ನಿಕ್ಖಮನ್ತಸ್ಸ ತಸ್ಸ ಮಾತಾಪಿತರೋ ಸೀವಲೀತಿ ನಾಮ ಮಕಂಸು. ಏವಂ ಮಹಾಪುಞ್ಞಸ್ಸ ಏತ್ತಕಂ ಕಾಲಂ ಮಾತುಕುಚ್ಛಿಮ್ಹಿ ದುಕ್ಖಾನುಭವನಂ ಅತ್ತನಾವ ಕತೇನ ಪಾಪಬಲೇನ ಅಹೋಸಿ, ಸೋ ಕಿರ ಅತೀತೇ ರಾಜಾ ಹುತ್ವಾ ಅತ್ತನೋ ಸಪತ್ತರಞ್ಞಾ ಸದ್ಧಿಂ ಸಙ್ಗಾಮೇನ್ತೋ ಮಾತರಾ ಸದ್ಧಿಂ ಮನ್ತೇಸಿ. ಸಾ ನಗರಂ ರುನ್ಧಿತ್ವಾ ಅಮಿತ್ತೇ ಗಣ್ಹಿತುಂ ಸಕ್ಕಾತಿ ಉಪಾಯ ಮದಾಸಿ, ಸೋಪಿ ತಸ್ಸಾ ವಚನೇನ ನಗರಂ ರುನ್ಧಿತ್ವಾ ಸತ್ತಮೇ ದಿವಸೇ ಅಗ್ಗಹೇಸಿ, ತೇನ ಪಾಪಕಮ್ಮಬಲೇನ ಮಾತಾಪುತ್ತಾನಂ ಏವಂ ಮಹನ್ತಂ ದುಕ್ಖಂ ಅಹೋಸೀತಿ. ತತೋ ಸಾ ಪುತ್ತಂ ವಿಜಾಯನಕಾಲೇ ಸತ್ತಮೇ ದಿವಸೇ ಭಗವನ್ತಂ ಅನುಸ್ಸರಿತ್ವಾ ಸುಖೇನ ಭಾರಂ ಮುಞ್ಚಿ. ತುಟ್ಠಾ ಸಾ ಸತ್ತಮೇ ದಿವಸೇ ಬುದ್ಧಪಮುಖಸ್ಸ ಭಿಕ್ಖುಸಙ್ಘಸ್ಸ ಮಹಾದಾನಂ ಅದಾಸಿ, ಅಥಸ್ಸಾ ಪುತ್ತೋ ಸತ್ತವಸ್ಸಿಕಕಾಲೇ ಗೇಹಾ ನಿಕ್ಖಮ್ಮ ಸತ್ಥಾರಂ ದಿಸ್ವಾ ಪಬ್ಬಜ್ಜಂ ಯಾಚಿ. ಸತ್ಥಾ ಸಾರಿಪುತ್ತತ್ಥೇರಸ್ಸ ನಿಯೋಜೇಸಿ, ತತೋ ಸಾರಿಪುತ್ತತ್ಥೇರೇನ ಉಪಜ್ಝಾಯೇನ ಮೋಗ್ಗಲ್ಲಾನಮಾಚರಿಯಂ ಕತ್ವಾ ಪಬ್ಬಜಿ, ಅಥ ಸೋ ಖುರಗ್ಗೇಯೇವ ಅರಹತ್ತಂ ಪತ್ವಾ ಬುದ್ಧಸಾಸನಂ ಸೋಭೇಸಿ, ಸೋ ಪುಬ್ಬೇ ಕತಪುಞ್ಞಾನುಭಾವೇನ ಮಹಾಪುಞ್ಞೋ ಅಹೋಸಿ ಲಾಭೀನಞ್ಚ ಅಗ್ಗೋ. ಅಥೇಕಸ್ಮಿಂ ಸಮಯೇ ಭಗವಾ ರೇವತತ್ಥೇರಂ ದಸ್ಸನಾಯ ಖದಿರವನವಿಹಾರಂ ಗಚ್ಛನ್ತೋ ತಿಂಸಭಿಕ್ಖುಸಹಸ್ಸೇಹಿ ಸದ್ಧಿಂ ತಿಂಸಯೋಜನಿಕಂ ಛಟ್ಟಿತಕನ್ತಾರಂ ಸಮ್ಪಾಪುಣಿ ನಿರೂದಕಂ ಅಪ್ಪಭಕ್ಖಂ. ಯೇಭುಯ್ಯೇನ ದೇವತಾ ಸೀವಲಿತ್ಥೇರೇ ಪಸನ್ನಾ. ತಸ್ಮಾ ಭಗವಾ ಸೀವಲಿತ್ಥೇರಂ ಪುರತೋ ಚಾರಿಕಂ ಕತ್ವಾ ದೇವತಾಹಿ ಕಾರಾಪಿತೇ ವಿಹಾರೇ ವಸನ್ತೋ ದೇವತಾಹಿ ಸಜ್ಜಿತದಾನಂ ಪರಿಭುಞ್ಜನ್ತೋ ರೇವತತ್ಥೇರಂ ಸಂಪಾಪುಣಿತ್ವಾ ಗತಕಮ್ಮಂ ನಿಟ್ಠಾಪೇತ್ವಾ ಜೇತವನಮಾಗಮ್ಮ ಲಾಭೀನಂ ಅಗ್ಗಟ್ಠಾನೇ ತಂ ಠಪೇಸೀತಿ. ತೇನ ವುತ್ತಂ ಅಪದಾನೇ.

೧. ಪದುಮುತ್ತರೋ ನಾಮ ಜಿನೋ, ಸಬ್ಬಧಮ್ಮೇಸು ಚಕ್ಖುಮಾ;

ಇತೋ ಸತಸಹಸ್ಸಮ್ಹಿ, ಕಪ್ಪೇ ಉಪ್ಪಜ್ಜಿ ನಾಯಕೋ.

೨. ಸೀಲಂ ತಸ್ಸ ಅಸಙ್ಖ್ಯೇಯ್ಯಂ, ಸಮಾಧಿ ವಜಿರೂಪಮೋ [ವಜಿರೂಪಮಾ ಇತಿಕತ್ಥಚಿ];

ಅಸಂಖಿಯಂ ಞಾಣವರಂ, ವಿಮುತ್ತಿ ಚ ಅನೋಪಮಾ.

೩. ಮನುಜಾಮರನಾಗಾನಂ, ಬ್ರಹ್ಮಾನಞ್ಚ ಸಮಾಗಮೇ;

ಸಮಣಬ್ರಾಹ್ಮಣಾಕಿಣ್ಣೇ, ಧಮ್ಮಂ ದೇಸೇತಿ ನಾಯಕೋ.

೪. ಸಸಾವಕಂ ಮಹಾಲಾಭಿಂ, ಪುಞ್ಞವನ್ತಂ ಜುತಿನ್ಧರಂ,

ಠಪೇಸಿ ಏತದಗ್ಗಮ್ಹಿ, ಪರಿಸಾಸು ವಿಸಾರದೋ.

೫. ತದಾಹಂ ಖತ್ತಿಯೋ ಆಸಿಂ, ಪುರೇ ಹಂಸವತೀವ್ಹಯೇ [ಹಂಸಾವತವ್ಹಯೇ ಇತಿಸಬ್ಬತ್ಥ];

ಸುತ್ವಾ ಜಿನಸ್ಸ ತಂ ವಾಕ್ಯಂ, ಸಾವಕಸ್ಸ ಗುಣಂ ಬಹುಂ.

೬. ನಿಮನ್ತಯಿತ್ವಾ ಸತ್ತಾಹಂ, ಭೋಜಯಿತ್ವಾ ಸಸಾವಕಂ;

ಮಹಾದಾನಂ ದದಿತ್ವಾನ, ತಂ ಠಾನಮಭಿಪತ್ಥಯಿಂ.

೭. ತದಾ ಮಂ ವಿನತಂ ಪಾದೇ, ದಿಸ್ವಾನ ಪುರಿಸಾಸಭೋ;

ಸೋ ಸರೇನ ಮಹಾವೀರೋ, ಇಮಂ ವಚನಮಬ್ರವೀ.

೮. ತತೋ ಜಿನಸ್ಸ ವಚನಂ, ಸೋತುಕಾಮಾ ಮಹಾಜನಾ;

ದೇವದಾನವಗನ್ಧಬ್ಬಾ, ಬ್ರಹ್ಮಾನೋಚ ಮಹಿದ್ಧಿಕಾ.

೯. ಸಮಣಬ್ರಾಹ್ಮಣಾ ಚಾಪಿ, ನಮಸ್ಸಿಸುಂ ಕತಞ್ಜಲೀ;

ನಮೋ ತೇ ಪುರಿಸಾಜಞ್ಞ, ನಮೋ ತೇ ಪುರಿಸುತ್ತಮ.

೧೦. ಖತ್ತಿಯೇನ ಮಹಾದಾನಂ, ದಿನ್ನಂ ಸತ್ತಾಹಕಮ್ಪಿ [ಸತ್ತಾಹಕಂಪಿತೋ ಇತಿಪಿಕತ್ಥಚಿ] ನೋ;

ಸೋತುಕಾಮಾ ಫಲಂ ತಸ್ಸ, ಬ್ಯಾಕರೋಹಿ ಮಹಾಮುನೇ.

೧೧. ತತೋ ಅವೋಚ ಭಗವಾ, ಸುಣೋಥ ಮಮ ಭಾಸಿತಂ;

ಅಪ್ಪಮೇಯ್ಯಮ್ಹಿ ಬುದ್ಧಸ್ಮಿಂ, ಗುಣಮ್ಹಿ ಸುಪ್ಪತಿಟ್ಠಿತಾ.

೧೨. ದಕ್ಖಿಣಾ ದಾಯಕಂ ಪತ್ವಾ, ಅಪ್ಪಮೇಯ್ಯಫಲಾವಹಾ;

ಅಪಿ ಚೇ ಸ ಮಹಾಭೋಗೋ, ಠಾನಂ ಪತ್ಥೇತಿ ಮುತ್ತಮಂ.

೧೩. ಲಾಭೀ ವಿಪುಲಲಾಭೀನಂ, ಯಥಾ ಭಿಕ್ಖು ಸುದಸ್ಸನೋ;

ತಥಾಹಂಪಿ ಭವೇಯ್ಯನ್ತಿ, ಲಚ್ಛತೇ ತಂ ಅನಾಗತೇ.

೧೪. ಸತಸಹಸ್ಸಿತೋ ಕಪ್ಪೇ, ಓಕ್ಕಾಕಕುಲಸಮ್ಭವೋ;

ಗೋತಮೋನಾಮ ನಾಮೇನ, ಸತ್ಥಾ ಲೋಕೇ ಭವಿಸ್ಸತಿ.

೧೫. ತಸ್ಸ ಧಮ್ಮೇಸು ದಾಯಾದೋ, ಓರಸೋ ಧಮ್ಮನಿಮ್ಮಿತೋ;

ಸೀವಲಿ ನಾಮ ನಾಮೇನ, ಹೇಸ್ಸತಿ ಸತ್ಥುಸಾವಕೋ.

೧೬. ತೇನ ಕಮ್ಮೇನ ಸುಕತೇನ, ಚೇತನಾಪಣಿಧೀಹಿ ಚ;

ಜಹಿತ್ವಾ ಮಾನುಸಂ ದೇಹಂ, ತಾವತಿಂಸೂಪಗೋ ಅಹಂ.

೧೭. ತತೋಪರಸ್ಮಿಂಸಮಯೇ, ಬಾರಾಣಸಿಪುರುತ್ತಮೇ;

ಸೇಟ್ಠಿಪುತ್ತೋ ಅಹಂ ಆಸಿಂ, ಅಡ್ಢಪ್ಪತ್ತೋ ಮಹಾಧನೋ.

೧೮. ಸಹಸ್ಸಮತ್ತೇ ಪಚ್ಚೇಕ, ನಾಯಕೇ ಚ ನಿಮನ್ತಿಯ;

ಮಧುರೇನನ್ನಪಾನೇನ, ಸನ್ತಪ್ಪೇಸಿಂತದಾದರೋ.

೧೯. ತತೋ ಚುತೋ ಛಕಾಮಗ್ಗೇ, ಅನುಭೋಸಿಂಮಹಾಯಸಂ;

ದೇವಚ್ಛರಾಪರಿವುತೋ, ಪಾಸಾದೇ ರತನಾಮಯೇ.

೨೦. ಏವಂ ಅಚಿನ್ತಿಯಾ ಬುದ್ಧಾ, ಬುದ್ಧಧಮ್ಮಾ ಅಚಿನ್ತಿಯಾ;

ಅಚಿನ್ತಿಯೇ ಪಸನ್ನಾನಂ, ವಿಪಾಕೋಪಿ ಅಚಿನ್ತಿಯೋ.

೨೧. ಏಕನವುತಿತೋ ಕಪ್ಪೇ, ವಿಪಸ್ಸೀನಾಮ ನಾಯಕೋ;

ಉಪ್ಪಜ್ಜಿ ಚಾರುನಯನೋ, ಸಬ್ಬಧಮ್ಮವಿಪಸ್ಸಕೋ.

೨೨. ತದಾಹಂ ಬನ್ಧುಮತಿಯಾ, ಕುಲಸ್ಸಞ್ಞತರಸ್ಸ ಚ;

ದಯಿತೋ ಪತ್ಥಿತೋ ಪುತ್ತೋ, ಆಸಿಂ ಕಮ್ಮನ್ತಬ್ಯಾವಟೋ.

೨೩. ತದಾ ಅಞ್ಞತರೋ ಪೂಗೋ, ವಿಪಸ್ಸಿಸ್ಸ ಮಹೇಸಿನೋ;

ಪರಿವೇಣಂ ಅಕಾರೇಸಿ, ಮಹನ್ತ ಮಿತಿ ವಿಸ್ಸುತಂ.

೨೪. ನಿಟ್ಠಿತೇ ಚ ಮಹಾದಾನಂ, ದದಂ ಖಜ್ಜಕಸಂಯುತಂ;

ನವಂ ದಧಿ ಮಧುಞ್ಚೇವ, ವಿಚಿನಂ ನ ಚ ಮದ್ದಸ.

೨೫. ತದಾಹಂ ತಂ ಗಹೇತ್ವಾನ, ನವಂ ದಧಿ ಮಧುಮ್ಪಿಚ,

ಕಮ್ಮಸಾಮಿಘರಂ ಗಚ್ಛಂ, ತಮೇನಂ [ತಮೇಸಂ ಇತಿಸಬ್ಬತ್ಥ] ದಾನ ಮದ್ದಸಂ.

೨೬. ಸಹಸ್ಸಮ್ಪಿ ಚ ದತ್ವಾನ, ನ ಲತಿಂಸು ಚ ತಂ ದ್ವಯಂ;

ತತೋ ಏವಂ ವಿಚಿನ್ತೇಸಿಂ, ನೇತಂ ಹೇಸ್ಸತಿ ಓರಕಂ.

೨೭. ಯಥಾ ಇಮೇ ಜನಾ ಸಬ್ಬೇ, ಸಕ್ಕರೋನ್ತಿ ತಥಾಗತಂ;

ಅಹಮ್ಪಿ ಕಾರಂ ಕಸ್ಸಾಮಿ, ಸಸಙ್ಘೇ ಲೋಕನಾಯಕೇ.

೨೮. ತದಾಹಮೇವಂ ಚಿನ್ತೇತ್ವಾ, ದಧಿಂಮಧುಞ್ಚ ಏಕತೋ;

ಯೋಜೇತ್ವಾ ಲೋಕನಾಥಸ್ಸ, ಸಸಙ್ಘಸ್ಸ ಅದಾಸಹಂ.

೨೯. ತೇನ ಕಮ್ಮೇನ ಸುಕತೇನ, ಚೇತನಾಪಣಿಧೀಹಿ ಚ;

ಜಹಿತ್ವಾ ಮಾನುಸಂ ದೇಹಂ, ತಾವತಿಂಸ ಮಗಞ್ಛಹಂ.

೩೦. ಪುನಾಹಂ ಬಾರಾಣಸಿಯಂ, ರಾಜಾ ಹುತ್ವಾ ಮಹಾಯಸೋ;

ಸತ್ತುಕಸ್ಸ ತದಾ ರುದ್ಧೋ, ದ್ವಾರರೋಧಂ ಅಕಾರಯಿಂ.

೩೧. ತತೋ ಸಪತ್ತಿನೋ [ಸಮ್ಪತ್ತಿನೋ; ಸಪತ್ತಾನೋ ಇತಿಚಕತ್ಥಚಿ] ರುದ್ಧಾ, ಏಕಾಹಂ ರಕ್ಖಿತಾ ಅಹುಂ;

ತತೋ ತಸ್ಸ ವಿಪಾಕೇನ, ಪಾಪುಣಿಂ ನಿರಯಂ ಭುಸಂ.

೩೨. ಪಚ್ಛಿಮೇ ಚ ಭವೇ ದಾನಿ, ಜಾತೋಹಂ ಕೋಲಿಯೇ ಪುರೇ;

ಸುಪ್ಪವಾಸಾ ಚ ಮೇ ಮಾತಾ, ಮಹಾಲಿ ಲಿಚ್ಛವೀ ಪಿತಾ.

೩೩. ಖತ್ತಿಯೇ ಪುಞ್ಞಕಮ್ಮೇನ, ದ್ವಾರರೋಧಸ್ಸ ವಾಹಸಾ;

ಸತ್ತಮಾಸೇ ಸತ್ತವಸ್ಸೇ, ವಸಿಂಕುಚ್ಛಿಮ್ಹಿ ದುಕ್ಖಿತೋ.

೩೪. ಸತ್ತಾಹಂ ದ್ವಾರಮೂಳ್ಹೋಹಂ, ಮಹಾದುಕ್ಖಸಮಪ್ಪಿತೋ;

ಮಾತಾ ಮೇ ಛನ್ದದಾನೇನ, ಏವ ಮಾಸಿ ಸುದುಕ್ಖಿತಾ.

೩೫. ಸುವತ್ಥಿತೋಹಂ ನಿಕ್ಖನ್ತೋ, ಬುದ್ಧೇನ ಅನುಕಮ್ಪಿತೋ;

ನಿಕ್ಖನ್ತದಿವಸೇಯೇವ, ಪಬ್ಬಜಿಂ ಅನಗಾರಿಯಂ.

೩೬. ಉಪಜ್ಝಾ ಸಾರಿಪುತ್ತೋ ಮೇ, ಮೋಗ್ಗಲ್ಲಾನೋ ಮಹಿದ್ಧಿಕೋ;

ಕೇಸೇ ಓರೋಪಯನ್ತೋ ಮೇ, ಅನುಸಾಸಿ ಮಹಾಮತಿ.

೩೭. ಕೇಸೇಸು ಛಿಜ್ಜಮಾನೇಸು [ಛನ್ನಮನೇಸು ಇತಿಪಿಕತ್ಥಚಿ], ಅರಹತ್ತಮಪಾಪುಣೀಂ;

ದೇವೋ ನಾಗಾ ಮನುಸ್ಸಾ ಚ, ಪಚ್ಚಯಾನು ಪನೇನ್ತಿ ಮೇ.

೩೮. ಪದುಮುತ್ತರನಾಮಞ್ಚ, ವಿಪಸ್ಸಿಂಚ ವಿನಾಯಕಂ;

ಸಂಪೂಜಯಿಂ ಪಮುದಿತೋ, ಪಚ್ಚಯೇಹಿ ವಿಸೇಸತೋ.

೩೯. ತತೋ ತೇಸಂ ವಿಪಾಕೇನ, ಕಮ್ಮಾನಂ ವಿಪುಲುತ್ತಮಂ;

ಲಾಭಂ ಲಭಾಮಿ ಸಬ್ಬತ್ಥ, ವನೇ ಗಾಮೇ ಜಲೇ ಥಲೇ.

೪೦. ರೇವತಂ ದಸ್ಸನತ್ಥಾಯ, ಯದಾ ಯಾತಿ ವಿನಾಯಕೋ;

ತಿಂಸಭಿಕ್ಖುಸಹಸ್ಸೇಹಿ, ಸಹ ಲೋಕಗ್ಗನಾಯಕೋ.

೪೧. ತದಾ ದೇವೋ ಪನೀತೇಹಿ [ಪಣೀತೇಹಿ ಇತಿಸಬ್ಬತ್ಥ], ಮಮತ್ಥಾಯ ಮಹಾಮತಿ;

ಪಚ್ಚಯೇಹಿ ಮಹಾವೀರೋ, ಸಸಙ್ಘೋ ಲೋಕನಾಯಕೋ.

೪೨. ಉಪಟ್ಠಿತೋ ಮಯಾ ಬುದ್ಧೋ, ಗನ್ತ್ವಾ ರೇವತಮದ್ದಸ;

ತತೋ ಜೇತವನಂ ಗನ್ತ್ವಾ, ಏತದಗ್ಗೇ ಠಪೇಸಿಮಂ.

೪೩. ಲಾಭೀನಂ ಸೀವಲಿ ಅಗ್ಗೋ, ಮಮ ಸಿಸ್ಸೇಸು ಭಿಕ್ಖವೋ;

ಸಬ್ಬೇಲೋಕಹಿತೋ ಸತ್ಥಾ, ಕಿತ್ತಯೀ ಪರಿಸಾಸುಮಂ.

೪೪. ಕಿಲೇಸಾ ಝಾಪಿತಾ ಮಯ್ಹಂ, ಭವಾ ಸಬ್ಬೇ ಸಮೂಹತಾ;

ನಾಗೋವ ಬನ್ಧನಂ ಛೇತ್ವಾ, ವಿಹರಾಮಿ ಅನಾಸವೋ.

೪೫. ಸ್ವಾಗತಂ ವತ ಮೇ ಆಸಿ, ಬುದ್ಧಸೇಟ್ಠಸ್ಸ ಸನ್ತಿಕಂ;

ತಿಸ್ಸೋ ವಿಜ್ಜಾ ಅನುಪ್ಪತ್ತೋ, ಕತಂ ಬುದ್ಧಸ್ಸ ಸಾಸನಂ.

೪೬. ಪಟಿಸಮ್ಭಿದಾ ಚತಸ್ಸೋಪಿ, ವಿಮೋಕ್ಖಾ ಪಿಚ ಅಟ್ಠಿಮೇ;

ಛಳಭಿಞ್ಞಾ ಸಚ್ಛಿಕತಾ, ಕತಂ ಬುದ್ಧಸ್ಸ ಸಾಸನನ್ತಿ.

ಇತ್ಥಂ ಸುದಂ ಆಯಸ್ಮಾ ಸೀವಲಿತ್ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.

೪೭. ಸುತ್ವಾನ ಏತಂ ಚರಿತಂ ಮಹಬ್ಭುತಂ,

ಪುಞ್ಞಾನುಭಾವಞ್ಚ ಸಿರಿಂ ಸಿರೀಮತಂ;

ಹಿತ್ವಾ ಕುಸೀತಂ ಕುಸಲಂ ಕರೋಥ,

ಕಾಮಾತ್ಥ ಕಾಮಂ ಭವಭೋಗನಿಬ್ಬುತಿಂ.

ಸೀವಲಿತ್ಥೇರಸ್ಸ ವತ್ಥುಂ ದಸಮಂ.

ಯಕ್ಖವಞ್ಚಿತವಗ್ಗೋ ತತಿಯೋ.