೨೨. ಮಿಚ್ಛದಿಟ್ಠಿಕಸ್ಸ ವತ್ಥುಮ್ಹಿ ಅಯಮಾನುಪುಬ್ಬೀಕಥಾ

ಭಗವತಿ ಧರಮಾನೇ ರಾಜಗಹನಗರೇ ಕಿರ ಏಕೋ ಬ್ರಹ್ಮಭತ್ತಿಕೋ ಮಿಚ್ಛಾದಿಟ್ಠಿಕೋ ಪಟಿವಸತಿ, ತತ್ಥೇವ ಸಮ್ಮಾದಿಟ್ಠಿಕೋಪಿ. ತೇಸಂ ಉಭಿನ್ನಮ್ಪಿ ದ್ವೇ ಪುತ್ತಾ ಅಹೇಸುಂ. ತೇ ಏಕತೋ ಕೀಳನ್ತಾ ವಡ್ಢನ್ತಿ. ಅಥಾಪರಭಾಗೇ ಗುಳಕೀಳಂಕೀಳನ್ತಾನಂ ಸಮ್ಮಾದಿಟ್ಠಿಕಸ್ಸ ಪುತ್ತೋ ‘‘ನಮೋ ಬುದ್ಧಯಾ’’ತಿ ವತ್ವಾ ಗುಳ್ಹಂ ಖಿಪನ್ತೋ ದಿವಸೇ ದಿವಸೇ ಜಿನಾತಿ. ಮಿಚ್ಛಾದಿಟ್ಠಿಕಸ್ಸ ಪುತ್ತೋ ‘‘ನಮೋ ಬ್ರಹ್ಮುನೋ’’ತಿ ವತ್ವಾ ಖಿಪನ್ತೋ ಪರಾಜೇತಿ, ತತೋ ಮಿಚ್ಛಾದಿಟ್ಠಿಕಸ್ಸ ಪುತ್ತೋ ನಿಚ್ಚಂ ಜಿನನ್ತಂ ಸಮ್ಮಾದಿಟ್ಠಿಕಂ ಕುಮಾರಂ ದಿಸ್ವಾ ಸಮ್ಮ ತ್ವಂ ನಿಚ್ಚಮೇವ ಜಿನಾಸಿ, ಕಿಂ ವತ್ವಾ ಗುಳಂ ಖಿಪಸೀತಿ ಪುಚ್ಛಿ. ಸೋಹಂ ಸಮ್ಮ ‘‘ನಮೋ ಬುದ್ಧಾಯಾ’’ತಿ ವತ್ವಾ ಖಿಪಾಮೀತಿ ಆಹ. ಸೋಪಿ ತತೋ ಪಟ್ಠಾಯ ‘‘ನಮೋ ಬುದ್ಧಾಯಾ’’ತಿ ವತ್ವಾ ಖಿಪತಿ, ಅಥ ತೇ ಯೇಭುಯ್ಯೇನ ದೂತೇ ಸಮಸಮಾವ ಹೋನ್ತಿ. ಅಪರಭಾಗೇ ಮಿಚ್ಛಾದಿಟ್ಠಿಕಸ್ಸ ಪುತ್ತೋ ಪಿತರಾ ಸದ್ಧಿಂ ದಾರೂನಮತ್ಥಾಯ ವನಂ ಗನ್ತ್ವಾ ಸಕಟೇನ ದಾರುಂ ಗಹೇತ್ವಾ ಆಗಚ್ಛನ್ತೋ ನಗರದ್ವಾರಸಮೀಪೇ ಸಕಟಂ ವಿಸ್ಸಜ್ಜೇತ್ವಾ ತಿಣೇ ಖಾದನತ್ಥಾಯ ಗೋಣೇ ವಿಸ್ಸಜ್ಜೇಸಿ, ಗೋಣಾ ತಿಣಂ ಖಾದನ್ತೋ ಅಞ್ಞೇಹಿ ಗೋರೂಪೇಹಿ ಸದ್ಧಿಂ ಅನ್ತೋನಗರಂ ಪವಿಸಿಂಸು. ಅಥಸ್ಸ ಪಿತಾ ಗೋಣೇ ಪರಿಯೇಸನ್ತೋ ಸಕಟಂ ಓಲೋಕೇಹೀತಿ ಪುತ್ತಂ ನಿವತ್ತೇತ್ವಾ ನಗರಂ ಪವಿಟ್ಠೋ ಅಹೋಸಿ, ಅಥ ಸಾಯಣ್ಹೇ ಜಾತೇ ಮನುಸ್ಸಾ ನಗರದ್ವಾರಂ ಪಿದಹಿಂಸು, ತತೋ ಕುಮಾರೋ ಬಹಿನಗರೇ ದಾರುಸಕಟಸ್ಸ ಹೇಟ್ಠಾ ಸಯನ್ತೋ ನಿದ್ದೂಪಗತೋ ಅಹೋಸಿ. ಅಥ ತಸ್ಸಾ ರತ್ತಿಯಾ ಸಮ್ಮಾದಿಟ್ಠಿಕೋ ಚ ಮಿಚ್ಛಾದಿಟ್ಠಿಕೋ ಚಾತಿ ದ್ವೇ ಯಕ್ಖಾ ಗೋಚರಂ ಪರಿಯೇಸಮಾನಾ ಸಕಟಸ್ಸ ಹೇಟ್ಠಾ ನಿಪನ್ನಂ ಕುಮಾರಂ ಅದ್ದಸಂಸು, ತೇಸು ಮಿಚ್ಛಾದಿಟ್ಠಿಕೋ ಇಮಂ ಖಾದಾಮೀತಿ ಆಹ. ಅಥಾಪರೋ ಮಾ ಏವ ಮಕಾಸಿ, ‘‘ನಮೋ ಬುದ್ಧಾಯಾ’’ತಿ ವಾಚಕೋ ಏಸೋತಿ, ಖಾದಾಮೇವೇತನ್ತಿ ವತ್ವಾ ಇತರೇನ ಯಾವತತಿಯಂ ವಾರಿಯಮಾನೋಪಿ ಗನ್ತ್ವಾ ತಸ್ಸ ಪಾದೇ ಗಹೇತ್ವಾ ಆಕಡ್ಢಿ. ತಸ್ಮಿಂ ಖಣೇ ದಾರಕೋ ಪುಬ್ಬಪರಿಚಯೇನ ‘‘ನಮೋ ಬುದ್ಧಾಯಾ’’ತಿ ಆಹ ತಂ ಸುತ್ವಾ ಯಕ್ಖೋ ಭಯಪ್ಪತ್ತೋ ಲೋಮಹಟ್ಠೋ ಹತ್ಥಂ ವಿಸ್ಸಜ್ಜೇತ್ವಾ ಪಟಿಕ್ಕಮ್ಮ ಅಟ್ಠಾಸಿ. ಅಹೋ ಅಚ್ಛರಿಯಂ ಬುದ್ಧಾನುಭಾವಂ ಅಬ್ಭುತಂ, ಏವಂ ಅತ್ತಂ ಅನೀಯ್ಯಾತೇತ್ವಾ ಪರಿಚಯೇನ ‘‘ನಮೋ ಬುದ್ಧಾಯಾ’’ತಿ ವುತ್ತಸ್ಸಪಿ ಭಯಂ ಛಮ್ಭಿತತ್ತಂ ಉಪದ್ದವಂ ವಾ ನ ಹೋತಿ. ಪಗೇವ ಅತ್ತಂ ನೀಯ್ಯಾತೇತ್ವಾ ಯಾವಜೀವಂ ಬುದ್ಧಂ ಸರಣಂ ಗತಸ್ಸಾತಿ. ವುತ್ತಞ್ಹಿ.

೧. ಯಥಾಪಿ ಸಿಖಿನೋ ನಾದಂ, ಭುಜಙ್ಗಾನಂ ಭಯಾವಹಂ;

ಏವಂ ಬುದ್ಧೋತಿ ವಚನಂ, ಅಮನುಸ್ಸಾನಂ ಭಯಾವಹಂ.

೨. ಯಥಾ ಮನ್ತಸ್ಸ ಜಪ್ಪೇನ, ವಿಲಯಂ ಯಾತಿ ಕಿಬ್ಬಿಸಂ;

ಏವಂ ಬುದ್ಧೋತಿ ವಚನೇನ, ಅಪಯನ್ತಿ [ಪಹಾಯನ್ತಿ ಇತಿಸಬ್ಬತ್ಥ] ಪಿಸಾಚಕಾ.

೩. ಅಗ್ಗಿಂ ದಿಸ್ವಾ ಯಥಾ ಸಿತ್ಥಂ, ದೂರತೋವ ವಿಲೀಯತಿ;

ದಿಸ್ವಾನೇವಂ ಸರಣಗತಂ, ಪೇತಾ ಪೇನ್ತಿವ [ಪೇತಾಪೇನ್ತಾವ ಇತಿಕತ್ಥಚಿ] ದೂರತೋ.

೪. ಪವರಂ ಬುದ್ಧಇಚ್ಚೇತ, ಮಕ್ಖರದ್ವಯಮಬ್ಭುತಂ;

ಸಬ್ಬೋ ಪದ್ದವನಾಸಾಯ, ಥಿರಪಾಕಾರ ಮುಗ್ಗತಂ.

೫. ಸತ್ತರತನಪಾಸಾದಂ, ತಮೇವ ವಜಿರಂ ಗುಹಂ;

ತಮೇವ ನಾವಂ ದೀಪಂ ತಂ, ತಮೇವ ಕವಚಂ ಸುಭಂ.

೬. ತಮೇವ ಸಿರಸಿ ಭಾಸನ್ತಂ, ಕಿರೀಟಂ ರತನಾಮಯಂ;

ಲಲಾಟೇ ತಿಲಕಂ ರಮ್ಮಂ, ಕಪ್ಪೂರಂ ನಯನದ್ವಯೇ.

೭. ತಾಡಙ್ಕಂ ಕಣ್ಣಯುಗಲೇ, ಸೋಣ್ಣಮಾಲಾ ಗಲೇ ಸುಭಾ;

ಏಕಾವಳಿ ತಾರಹಾರ, ಭಾರಾ ಜತ್ತುಸು ಲಙ್ಕತಾ.

೮. ಅಙ್ಗದಂ ಬಾಹುಮೂಲಸ್ಸ, ಕರಗ್ಗೇ ವಲಯಂ ತಥಾ;

ಅಙ್ಗುಲಿಸ್ವಙ್ಗುಲಿಯಞ್ಚ, ಖಗ್ಗಂ ಮಙ್ಗಲಸಮ್ಮತಂ.

೯. ಸೋಣ್ಣಾ ತಪತ್ತ ಮುಣ್ಹೀಸಂ, ಸಬಾಣಂವ ಸರಾಸನಂ;

ತಮೇವ ಸಬ್ಬಾಲಙ್ಕಾರಂ, ತಮೇವ ದುರಿತಾಪಹಂ.

೧೦. ತಸ್ಮಾ ಹಿ ಪಣ್ಡಿತೋ ಪೋಸೋ,

ಲೋಕಲೋಚನಸತ್ಥುನೋ;

ಸರಣಂ ತಸ್ಸ ಗನ್ತೇವ,

ಗುಣನಾಮಂ ಏಹಿಪಸ್ಸಿಕಂ.

೧೧. ನಮೋತಿ ವಚನಂ ಪುಬ್ಬಂ, ಬುದ್ಧಾಯೇತಿ ಗಿರಂ ತದಾ;

ಸುಪನ್ತೇನ ಕುಮಾರೇನ, ಮಿಚ್ಛಾದಿಟ್ಠಿಕಸೂನುನಾ.

೧೨. ಸುತ್ವಾ ವುತ್ತಂ ಪಿಸಾ ಚಾಪಿ, ಮನುಸ್ಸಕುಣಪೇ ರತಾ;

ನ ಹಿಂಸನ್ತಿ ಅಹೋ ಬುದ್ಧ, ಗುಣಸಾರಮಹನ್ತತಾತಿ.

ಅಥ ಸಮ್ಮಾದಿಟ್ಠಿಕಯಕ್ಖೋ ಮಿಚ್ಛಾದಿಟ್ಠಿಕಸ್ಸ ಯಕ್ಖಸ್ಸ ಏವಮಾಹ, ಅಯುತ್ತಂ ಭೋ ತಯಾ ಕತಂ. ಬುದ್ಧಗುಣೇ ಪಹಾರೋ ದಿನ್ನೋ, ದಣ್ಡಕಮ್ಮಂ ತಯಾ ಕಾತಬ್ಬಂತಿ, ತೇನ ಕಿಂಮಯಾ ಸಮ್ಮ ಕಾತಬ್ಬನ್ತಿ ವುತ್ತೇ ಬುಭುಕ್ಖಿತಸ್ಸ ಆಹಾರಂ ದೇಹೀತಿ ಆಹ. ತತೋ ಸೋ ಸಾಧೂತಿ ವತ್ವಾ ಯಾವಾಹಂ ಆಗಚ್ಛಾಮಿ, ತ್ವಂ ತಾವೇತ್ಥ ವಚ್ಛಾಹೀತಿ ವತ್ವಾ ಬಿಮ್ಬಿಸಾರರಞ್ಞೋ ಕಞ್ಚನತಟ್ಟಕೇ ವಡ್ಢಿತಂ ರಸಭೋಜನಂ ಆಹರಿತ್ವಾ ಕುಮಾರಸ್ಸ ಪಿತುವಣ್ಣೇನ ದಾರಕಂ ಭೋಜೇತ್ವಾ ಪುನ ಕುಮಾರೇನ ವುತ್ತಬುದ್ಧವಚನಞ್ಚ ಅತ್ತನಾ ಕತವಾಯಾಮಂ ಚಾತಿ ಸಬ್ಬಂ ತಟ್ಟಕೇ ಲಿಖಿತ್ವಾ ಇದಂ ರಞ್ಞೋಯೇವ ಪಞ್ಞಾಯತೂತಿ ಅಧಿಟ್ಠಾಯ ಅಗಮಂಸು, ಅಥ ಪಭಾತಾಯ ರತ್ತಿಯಾ ರಞ್ಞೋ ಭೋಜನಕಾಲೇ ರಾಜಪುರಿಸಾ ತತ್ಥ ತಟ್ಟಕಂ ಅದಿಸ್ವಾ ನಗರಂ ಉಪಪರಿಕ್ಖನ್ತಾ ಸಕಟೇ ದಾರಕಞ್ಚ ತಟ್ಟಕಞ್ಚ ದಿಸ್ವಾ ತಟ್ಟಕೇನ ಸದ್ಧಿಂ ತಂ ಗಹೇತ್ವಾ ರಞ್ಞೋ ದಸ್ಸೇಸುಂ. ರಾಜಾ ತಟ್ಟಕೇ ಅಕ್ಖರಾದೀನಿ ದಿಸ್ವಾ ವಾಚೇತ್ವಾ ತಸ್ಸ ಗುಣೇ ಪಸನ್ನೋ ಮಹನ್ತೇನ ಯಸೇನ ಸದ್ಧಿಂ ಸೇಟ್ಠಿಟ್ಠಾನಮದಾಸಿ.

೧೩. ಜಿನಸ್ಸ ನಾಮಂ ಸುಪಿನೇನ ಪೇವಂ,

ನ ಹೋತಿ ಭೀತಿಂ ಲಪನೇನ ಯಸ್ಮಾ;

ತಸ್ಮಾ ಮುನಿನ್ದಂ ಸತತಂ ಸರಾಥ,

ಗುಣೇ ಸರನ್ತಾ ಸರಣಞ್ಚ ಯಾಥಾತಿ.

ಮಿಚ್ಛಾದಿಟ್ಠಿಕಸ್ಸ ವತ್ಥುಂ ದುತಿಯಂ.