೨೦. ಸಹಾಯಸ್ಸ ಪರಿಚ್ಚತ್ತಜೀವಿತಕಸ್ಸ ವತ್ಥುಮ್ಹಿ ಅಯಮಾನುಪುಬ್ಬೀಕಥಾ

ಭಗವತಿ ಪರಿನಿಬ್ಬುತೇ ಸಾವತ್ಥಿಯಂ ಸೋಮಬ್ರಾಹ್ಮಣೋ ಸೋಮದತ್ತಬ್ರಾಹ್ಮಣೋತಿ ದ್ವೇ ಬ್ರಾಹ್ಮಣಾ ವಸನ್ತಿ. ತತ್ಥ ಸೋಮದತ್ತಬ್ರಾಹ್ಮಣೇನ ಸದ್ಧಿಂ ಸೋಮಬ್ರಾಹ್ಮಣೋ ಯೇಭುಯ್ಯೇನ ದೂತಂ ಕೀಳತಿ. ಅಥೇಕದಿವಸಂ ಸೋಮದತ್ತೋ ಸೋಮಬ್ರಾಹ್ಮಣಂ ತೇನ ಪರಾಜೇತ್ವಾ ತಸ್ಸ ಉತ್ತರಾಸಙ್ಗಞ್ಚ ಲಞ್ಛನಮುದ್ದಿಕಞ್ಚ ಗಹೇತ್ವಾ ಅತ್ತನೋ ಗೇಹಂ ಗಚ್ಛನ್ತೋ ಸೋಮಬ್ರಾಹ್ಮಣಸ್ಸ ಏಹಿ ಗೇಹಂ ಗಚ್ಛಾ- ಮಾತಿ ಆಹ. ತತೋ ಸೋಮೋ ನಾಹಂ ಸಮ್ಮ ಏಕಸಾಟಕೋ ಹುತ್ವಾ ಅನ್ತರವೀಥಿಂ ಓತರಿತುಂ ಸಕ್ಕೋಮಿ. ಗಮನತೋ ಏತ್ಥೇವ ಮೇ ಠಾನಂ ವರತರನ್ತಿ ಆಹ, ಸೋಮದತ್ತೇನ ಏವಂ ಸತಿ ಸಮ್ಮ ಇಮಂ ಉತ್ತರಾಸಙ್ಗಂ ಗಣ್ಹಾತಿ ತಸ್ಸ ತಂ ದತ್ವಾ ಇದಾನಿ ಸಮ್ಮ ಏಹೀತಿ ವುತ್ತೋಪಿ ನಾಗಚ್ಛತಿ. ಪುನ ತೇನ ಭೋ ಕಸ್ಮಾ ನಾಗಚ್ಛಸೀತಿ ಪುಟ್ಠೋ ಸಮ್ಮ ಮಮ ಹತ್ಥೇ ಮುದ್ದಿಕಂ ಅಪಸ್ಸನ್ತಾ ಮೇ ಪುತ್ತದಾರಾದಯೋ ಮಯಾ ಸದ್ಧಿಂ ಕಲಹಂ ಕರೋನ್ತೀತಿ ಆಹ, ಅಥ ಸೋ ಏವಂ ಸನ್ತೇ ಯದಾ ತೇ ಪಹೋತಿ. ತದಾ ಮಯ್ಹಂ ದೇಹೀತಿ ಮುದ್ದಿಕಮ್ಪಿ ದತ್ವಾ ತಂ ಗಹೇತ್ವಾ ಗೇಹಂ ಅಗಮಾಸಿ. ಅಥ ತೇ ಏತ್ತಕೇನ ಸಹಾಯಾ ಅಹೇಸುಂ. ಅಪರಭಾಗೇ ಸೋಮದತ್ತಬ್ರಾಹ್ಮಣಂ ಅಯಂ ಪರದಾರಕಮ್ಮಂ ಅಕಾಸೀತಿ ಮನುಸ್ಸಾ ಗಹೇತ್ವಾ ರಞ್ಞೋ ದಸ್ಸೇಸುಂ. ರಾಜಾ ತಸ್ಸ ರೂಪಸಮ್ಪತ್ತಿಂ ದಿಸ್ವಾ ರಾಜಾಣಂ ಅಕತ್ವಾ ಮಾ ಭೋ ಪುನ ಏವಮಕಾಸೀತಿ ಓವದಿತ್ವಾ ವಿಸ್ಸಜ್ಜೇಸಿ. ರಾಜಾ ನಂ ಯಾವತತಿಯವಾರಂ ಓವದನ್ತೋ ವಿಸ್ಸಜ್ಜೇತ್ವಾ ಚತುತ್ಥೇವಾರೇ ಗಚ್ಛಥೇತಂ ಆಘಾತನಂ ನೇತ್ವಾ ಮಾರೇಥಾತಿ ಆಣಾಪೇಸಿ. ಏವಂ ಪಾಪಕಮ್ಮೇ ನಿರತಾ ಅನೇಕಾಕಾರೇನ ಓವದನ್ತಾಪಿ ನ ಸಕ್ಕಾ ನಿವಾರೇತುಂ. ತಥಾಹಿ.

೧. ಸೋಣಾ ಚೇವ ಸಿಗಾಲಾ ಚ, ವಾಯಸಾ ನೀಲಮಕ್ಖಿಕಾ;

ಇಚ್ಚೇತೇ ಕುಣಪೇ ಸತ್ತಾ, ನ ಸಕ್ಕಾ ತೇ ನಿಸೇಧಿತುಂ.

೨. ತಥಾ ಪಾಣಾತಿಪಾತೇಸು, ಪರದಾರೇ ಸುರಾಯ ಚ;

ಮುಸಾವಾದೇಸು ಥೇಯ್ಯೇಸು, ಸತ್ತಸತ್ತಾ ನ ವಾರಿಯಾತಿ.

ತತೋ ರಾಜಪುರಿಸಾ ತಂ ಬನ್ಧಿತ್ವಾ ಪಕ್ಕಮಿಂಸು. ತದಾ ಸೋಮಬ್ರಾಹ್ಮಣೋ ಸೋಮದತ್ತಂ ತಥಾ ನೀಯಮಾನಂ ದಿಸ್ವಾ ಕಮ್ಪಮಾನಹದಯೋ ರಾಜಪುರಿಸಾನಂ ಸನ್ತಿಕಂ ಗನ್ತ್ವಾ ಇಮಂ ಭೋ ಮುಹುತ್ತಂ ಮಾ ಮಾರೇಥ. ಯಾವ ರಾಜಾನಂ ಜಾನಾಪೇಸ್ಸಾಮೀತಿ ವತ್ವಾ ರಞ್ಞೋ ಸನ್ತಿಕಂ ಗನ್ತ್ವಾ ವನ್ದಿತ್ವಾ ಠಿತೋ ದೇವ ಮಮ ಜೀವಿತಂ ಸೋಮದತ್ತಸ್ಸ ಬ್ರಾಹ್ಮಣಸ್ಸ ದಸ್ಸಾಮಿ. ಏತಂ ಮುಞ್ಚಥ. ಯದಿ ಮಾರೇತುಕಾಮಾ, ಮಂ ಮಾರೇಥಾತಿ ಆಹ. ರಾಜಾ ತುಣ್ಹೀ [ತುಟ್ಠೋ ಇತಿಕತ್ಥಚಿ] ಅಹೋಸಿ, ರಾಜಪುರಿಸಾ ಸೋಮದತ್ತಂ ಮುಞ್ಚಿತ್ವಾ ಸೋಮಬ್ರಾಹ್ಮಣಂ ಆಘಾತನಂ ನೇತ್ವಾ ಮಾರೇಸುಂ, ಅಹೋ ಕತಞ್ಞುನೋ ಕತವೇದಿತಾ.

ಹೋತಿ ಚೇತ್ಥ.

೩. ಕಕೂಪಕಾರ ಮತ್ತಾನಂ, ಸರನ್ತಾ ಕೇಚಿ ಮಾನುಸಾ;

ಜೀವಿತಂ ದೇನ್ತಿ ಸೋಮೋವ, ಸೋಮದತ್ತಸ್ಸ ಅತ್ತನೋತಿ.

ಸೋ ತೇನ ಜೀವಿತದಾನೇನ ದೇವಲೋಕೇ ನಿಬ್ಬತ್ತಿತ್ವಾ ಮಹನ್ತೇ ಕನಕವಿಮಾನೇ ದೇವಚ್ಛರಾಸಹಸ್ಸಪರಿವುತೋ ದಿಬ್ಬಸಮ್ಪತ್ತಿಮನುಭೋನ್ತೋ ಪಟಿವಸತಿ. ತದಾ ಸೋಮದತ್ತಬ್ರಾಹ್ಮಣೋ ಏಸೋ ಮಂ ಮರಣಪ್ಪತ್ತಂ ಮೋಚೇಸೀತಿ ವತ್ವಾ ತಸ್ಸತ್ಥಾಯ ದಾನಂ ದತ್ವಾ ಪತ್ತಿಂ ಅದಾಸಿ. ತಾವದೇವಸ್ಸ ತತೋ ಬಹುತರಂ ದೇವಿಸ್ಸರಿಯಂ ಅಹೋಸಿ ದೇವಾನುಭಾವಞ್ಚ. ತತೋ ಸೋ ಸೋಮದೇವೋ ಅತ್ತನೋ ದೇವಿಸ್ಸರಿಯಂ ಓಲೋಕೇನ್ತೋ ಸಹಾಯಸ್ಸ ಅತ್ತನೋ ಜೀವಿತದಾನಂ ಅದ್ದಸ. ದಿಸ್ವಾ ಅತ್ತಭಾವಂ ವಿಜಹಿತ್ವಾ ಮಾಣವಕವಣ್ಣೇನ ಸೋಮದತ್ತಬ್ರಾಹ್ಮಣಂ ಉಪಸಙ್ಕಮಿತ್ವಾ ಪಟಿಸನ್ಥಾರಂ ಕತ್ವಾ ಅತ್ತಾನಂ ದೇವಲೋಕೇ ನಿಬ್ಬತ್ತಭಾವಂ ಪಕಾಸೇತ್ವಾ ತಂ ಗಹೇತ್ವಾ ಅತ್ತನೋ ಆನುಭಾವೇನ ದೇವಲೋಕಂ ನೇತ್ವಾ ಯಥಾಕಾಮಂ ಸಮ್ಪತ್ತಿ ಮನುಭವಾತಿ ವತ್ವಾ ಸತ್ತಾಹಂ ದೇವಸ್ಸರಿಯಂ ದತ್ವಾ ಸತ್ತಮೇ ದಿವಸೇ ನೇತ್ವಾ ತಸ್ಸ ಗೇಹೇಯೇವ ಪತಿಟ್ಠಾಪೇಸಿ. ತತ್ಥ ಹಿ ದಿಬ್ಬಸಮ್ಪತ್ತಿ ಮನುಭೂತಸ್ಸ ಮನುಸ್ಸಸಮ್ಪತ್ತಿ ಪಟಿಕ್ಕುಲಾ ಹೋತಿ. ತತೋ ಸೋ ದಿಬ್ಬಸಮ್ಪತ್ತಿಮನುಸ್ಸರನ್ತೋ ಕಿಸೋ ದುಬ್ಬಲೋ ಉಪ್ಪಣ್ಡುಪ್ಪಣ್ಡುಕಜಾತೋ ಅಹೋಸಿ. ಅಥೇಕದಿವಸಂ ದೇವಪುತ್ತೋ ತಂ ಓಲೋಕೇನ್ತೋ ತಥಾ ದುಕ್ಖಪ್ಪತ್ತಂ ದಿಸ್ವಾ ನ ಸಕ್ಕಾ ಮನುಸ್ಸೇನ ದಿಬ್ಬಸಮ್ಪತ್ತಿಮನುಭವಿತುನ್ತಿ ಇಚ್ಛಿತಿಚ್ಛಿತಸಮ್ಪತ್ತಿದಾಯಕಂ ಏಕಂ ಚಿನ್ತಾಮಣಿಂ ದತ್ವಾ ತಸ್ಸ ಭರಿಯಮ್ಪಿ ಅತ್ತನೋ ಆನುಭಾವೇನ ರೂಪವನ್ಥಂ ಯಸವನ್ತಂ ವಣ್ಣವನ್ತಂ ಅತಿಕ್ಕನ್ತಮನುಸ್ಸಿತ್ಥಿವಣ್ಣಂ ಅಕಾಸಿ, ಅಪರಭಾಗೇ ತೇ ಜಯಮ್ಪತಿಕಾ ಪಚ್ಚಕ್ಖತೋ ದಿಟ್ಠದಿಬ್ಬಸಮ್ಪತ್ತಿವಿಭವಾ ದಾನಂ ದತ್ವಾ ಸೀಲಂ ರಕ್ಖಿತ್ವಾ ಸಹಾಯದೇವಪುತ್ತಸ್ಸ ಸನ್ತಿಕೇಯೇವ ನಿಬ್ಬತ್ತಿಂಸೂತಿ.

೪. ಮನ್ದೇನ ನನ್ದಿತಮನಾ ಉಪಕಾರಕೇನ,

ಪಾಣಮ್ಪಿ ದೇನ್ತಿ ಸುಜನಾ ಇತಿ ಚಿನ್ತಯಿತ್ವಾ;

ಮಿತ್ತದ್ದು ಮಾ ಭವಥ ಭೋ ಉಪಕಾರಕಸ್ಸ;

ಪಾಸಂಸಿಯಾ ಭವಥ ಸಾಧುಜನೇಹಿ ನಿಚ್ಚಂತಿ.

ಸಹಾಯಸ್ಸ ಪರಿಚ್ಚತ್ತಜೀವಿತಕಸ್ಸ ವತ್ಥುಂ ದಸಮಂ.

ನನ್ದಿಯರಾಜವಗ್ಗೋ ದುತಿಯೋ.