೧೯. ಪಾನೀಯದಿನ್ನಸ್ಸ ವತ್ಥುಮ್ಹಿ ಅಯಮಾನುಪುಬ್ಬೀಕಥಾ

ಜಮ್ಬುದೀಪೇ ಅಞ್ಞತರಸ್ಮಿಂ ಜನಪದೇ ಕಿರೇ ಕೋ ಮನುಸ್ಸೋ ರಟ್ಠತೋ ರಟ್ಠಂ ಜನಪದತೋ ಜನಪದಂ ವಿಚರನ್ತೋ ಅನುಕ್ಕಮೇನ ಚನ್ದಭಾಗಾನದೀತೀರಂ ಪತ್ವಾ ನಾವಂ ಅಭಿರುಹಿತ್ವಾ ಪರತೀರಂ ಗಚ್ಛತಿ. ಅಥಾಪರಾ ಗಬ್ಭಿನಿತ್ಥೀ ತಾಯ ಏವ ನಾವಾಯ ಗಚ್ಛತಿ, ಅಥ ನಾವಾ ಗಙ್ಗಾಮಜ್ಝಪ್ಪತ್ತಕಾಲೇ ತಸ್ಸಾ ಕಮ್ಮಜವಾತಾ ಚಲಿಂಸು. ತತೋ ಸಾ ವಿಜಾಯಿತುಮಸಕ್ಕೋನ್ತೀ ಕಿಲನ್ತಾ ಪಾನೀಯಂ ಮೇ ದೇಥ, ಪಿಪಾಸಿತಾಮ್ಹಿತಿ ಮನುಸ್ಸೇ ಯಾಚಿ. ತೇ ತಸ್ಸಾ ವಚನಂ ಅಸುಣನ್ತಾ ವಿಯ ಪಾನೀಯಂ ನಾದಂಸು, ಅಥ ಸೋ ಜಾನಪದಿಕೋ ತಸ್ಸಾ ಕರುಣಾಯನ್ತೋ [ಕರುಣಾಯಪಾನೀಯಂ, ಕರುಣಾಯನ್ತೋಪಾನೀಯಂ, ಕರುಣಾಯತೋಯಂ ಇತಿಚಕತ್ಥಚಿ] ತೋಯಂ ಗಹೇತ್ವಾ ಮುಖೇ ಆಸಿಞ್ಚಿ, ತಸ್ಮಿಂ ಖಣೇ ಸಾ ಲದ್ಧಸ್ಸಾಸಾ ಸುಖೇನ ದಾರಕಂ ವಿಜಾಯಿ, ಅಥ ತೇ ತೀರಂ ಪತ್ವಾ ಕತಿಪಯದಿವಸೇನ ಅತ್ತನೋ ಅತ್ತನೋ ಠಾನಂ ಪಾಪುಣಿಂಸು. ಅಥಾಪರಭಾಗೇ ಸೋ ಜಾನಪದಿಕೋ ಅಞ್ಞತರಕಿಚ್ಚಂ ಪಟಿಚ್ಚ ತಸ್ಸಾ ಇತ್ಥಿಯಾ ವಸನನಗರಂ ಪತ್ವಾ ತತ್ಥ ತತ್ಥ ಆಹಿಣ್ಡನ್ತೋ ನಿವಾಸನಟ್ಠಾನಂ ಅಲಭಿತ್ವಾ ನಗರದ್ವಾರೇ ಸಾಲಂ ಗನ್ತ್ವಾ ತತ್ಥ ನಿಪಜ್ಜಿ. ತಸ್ಮಿಂಯೇವ ದಿವಸೇ ಚೋರಾ ನಗರಂ ಪವಿಸಿತ್ವಾ ರಾಜಗೇಹೇ ಸನ್ಧಿಂ ಛಿನ್ದಿತ್ವಾ ಧನಸಾರಂ ಗಹೇತ್ವಾ ಗಚ್ಛನ್ತಾ ರಾಜಪುರಿಸೇಹಿ ಅನುಬನ್ಧಾ ಗನ್ತ್ವಾ ತಾಯೇವ ಸಾಲಾಯ ಛಡ್ಡೇತ್ವಾ ಪಲಾಯಿಂಸು. ಅಥ ರಾಜಪುರಿಸಾ ಆಗನ್ತ್ವಾ ಚೋರೇ ಅಪಸ್ಸನ್ತಾ ತಂ ಜಾನಪದಿಕಂ ದಿಸ್ವಾ ಅಯಂ ಚೋರೋತಿ ಗಹೇತ್ವಾ ಪಚ್ಛಾಬಾಹಂ ಗಾಳ್ಹಂ ಬನ್ಧಿತ್ವಾ ಪುನ ದಿವಸೇ ರಞ್ಞೋ ದಸ್ಸೇಸುಂ. ರಞ್ಞಾ ಕಸ್ಮಾ ಭಣೇ ಚೋರಕಮ್ಮ ಮಕಾಸೀತಿ ಪುಚ್ಛಿತೋ ನಾಹಂ ದೇವ ಚೋರೋ, ಆಗನ್ತುಕೋಮ್ಹೀತಿ ವುತ್ತೇ ರಾಜಾ ಚೋರೇ ಪರಿಯೇಸಿತ್ವಾ ಅಲಭನ್ತೋ ಅಯಮೇವ ಚೋರೋ, ಇಮಂ ಮಾರೇಥಾತಿ ಆಣಾಪೇಸಿ. ರಾಜಪುರಿಸೇಹಿ ತಂ ಗಾಳ್ಹಂ ಬನ್ಧಿತ್ವಾ ಆಘಾತನಂ ನೀತೇ ಸಾ ಇತ್ಥೀ ತಂ ತಥಾ ನೀಯಮಾನಂ ದಿಸ್ವಾ ಸಞ್ಜಾನಿತ್ವಾ ಕಮ್ಪಮಾನಹದಯಾ ಮುಹುತ್ತೇನ ರಞ್ಞೋ ಸನ್ತಿಕಂ ಗನ್ತ್ವಾ ವನ್ದಿತ್ವಾ ದೇವ ಏಸೋ ನ ಚೋರೋ ಆಗನ್ತುಕೋ ಮುಞ್ಚಥೇತಂ ದೇವಾತಿ ಆಹ. ರಾಜಾ ತಸ್ಸಾ ಕಥಂ ಅಸದ್ದಹನ್ತೋ ಯಜ್ಜೇತಂ ಮೋಚೇತು ಮಿಚ್ಛಸಿ. ತಸ್ಸಗ್ಘನಕಂ ಧನಂ ದತ್ವಾ ಮುಞ್ಚಾಪೇಹೀತಿ, ಸಾ ಸಾಮಿ ಮಮ ಗೇಹೇ ಧನಂ ನತ್ಥಿ. ಅಪಿಚ ಮಮ ಸತ್ತಪುತ್ತೇಹಿ ಸದ್ಧಿಂ ಮಂ ದಾಸಿಂ ಕರೋಹಿ, ಏತಂ ಮುಞ್ಚ ದೇವಾತಿ ಆಹ, ಅಥ ರಾಜಾ ತ್ವಂ ಏತಂ ಅಧುನಾಗತೋತಿ ವದಸಿ. ಏತಂ ನಿಸ್ಸಾಯ ಪುತ್ತೇಹಿ ಸದ್ಧಿಂ ಅತ್ತಾನಂ ದಾಸತ್ತಂ ಸಾವೇಸಿ. ಕಿಮೇಸೋ ತೇ ಞಾತಿ ವಾ, ಉದಾಹು ಉಪಕಾರಕೋತಿ ಪುಚ್ಛನ್ತೋ ಆಹ.

೧. ಕಿಂತೇ ಭೋತಿ ಅಯಂ ಪೋಸೋ, ತುವಂ ಪುಚ್ಛಾಮಿ ಸಂಸಯಂ;

ಭಾತಾ ವಾ ತೇ ಪಿತಾ ಹೋತಿ, ಪತಿ ವಾ ದೇವರೋ ತವ.

೨. ಞಾತಿ ಸಾಲೋಹಿತೋ ಕಿನ್ನು, ಉದಾಹು ಇಣದಾಯಕೋ;

ಅಥೋಪಕಾರಕೋ ಕಿನ್ನು, ಕಸ್ಮಾಸ್ಸ ದೇಸಿ ಜೀವಿತಂತಿ.

ತತೋ ಸಾ ಆಹ.

೩. ಏಸೋ ಮೇ ಪುರಿಸೋ ದೇವ, ಕತಪುಬ್ಬೋಪಕಾರಕೋ;

ಅತಾಣಮೇಕಿಕಂ [ಅತ್ತಾನಮೇಕಿಕಂ ಇತಿಕತ್ಥಚಿ] ಚೇಸೋ, ದುಕ್ಖಿತಂ ಮರಣೇ ಠಿತಂ.

೪. ವಿಜಾಯಿತು ಮಸಕ್ಕೋನ್ತಿಂ, ಗಬ್ಭಿನಿಂ ದುಕ್ಖವೇದಿನಿಂ;

ತೋಯೇನ ಮಂ ಉಪಟ್ಠಾಸಿ, ತೇನಾಹಂ ಸುಖಿತಾ ತದಾ.

೫. ಭಙ್ಗಕಲ್ಲೋಲಮಾಲಾಯ, ಉತ್ತರನ್ತಂ ಮಹಣ್ಣವಂ;

ಪಹಾಯ ಪಾತುಂ ಕೂಪಸ್ಸ, ಯಾತಿ ಲೋಕೋ ಪಿಪಾಸಿತೋ.

೬. ತಥೇವ ವಿಜ್ಜಮಾನೇಸು, ಜನೇಸು ಮನುಜಾಧಿಪ,

ಏಕಸ್ಸೇವ ಮನಸ್ಮಿಂಹಿ, ಗುಣಂ ತಿಟ್ಠತಿ ಸಾಧುಕಂ.

೭. ಪಹತ್ವಾನ ಮತಂ ಹತ್ಥಿಂ, ಮಂಸತ್ಥೀ ಕೇಚಿ ಜನ್ತುನೋ;

ಅನುಬನ್ಧನ್ತಿ ಮಂಸತ್ಥಂ, ಸಸಂ ಧಾವನ್ತ ಮೇಕಕಂ.

೮. ತಥೇವ ವಿಜ್ಜಮಾನೇಸು, ಜನೇಸು ಮನುಜಾಧಿಪ;

ಗುಣವನ್ತ ಮನುಬನ್ಧನ್ತಿ, ಸಪ್ಪುರಿಸಂ ಕತವೇದಿಕಂ.

೯. ತಸ್ಮಾ ಸಪ್ಪುರಿಸೇ ಧಮ್ಮೇ, ಪತಿಟ್ಠಾಸ್ಮಿ ನರಾಧಿಪ;

ಅನುಸ್ಸರನ್ತಿ ಏತೇನ, ಕತಪುಬ್ಬೂ ಪಕಾರಕಂ.

೧೦. ಅಹಞ್ಚ ಮಮ ಪುತ್ತಾ ಚ, ಏತೇನಮ್ಹ ಸುಖಾಪಿತಾ;

ಜೀವಿತಮ್ಪಿ ಪರಿಚ್ಚಜ್ಜ, ಮುಚ್ಚನೀಯೋ ಅಯಂ ಮಯಾತಿ.

ತತೋ ರಾಜಾ ದೋವಾರಿಕಂ ಪಕ್ಕೋಸಿತ್ವಾ ತಮ್ಪಿ ಪುಚ್ಛಿತ್ವಾ ಅಧುನಾಗತಭಾವಂ ಞತ್ವಾ ತಸ್ಸಾ ಸಪ್ಪುರಿಸಧಮ್ಮೇ ಸನ್ತುಟ್ಠೋ ತೇಸಂ ಉಭಿನ್ನಮ್ಪಿ ಮಹನ್ತಂ ಯಸಂ ಅನುಪ್ಪದಾಸಿ. ತೇ ಲದ್ಧಯಸಾ ತ ತೋ ಪಟ್ಠಾಯ ದಾನಾದೀನಿ ಪುಞ್ಞಕಮ್ಮಾನಿ ಕತ್ವಾ ಸಗ್ಗಪರಾಯಣಾ ಅಹೇಸುನ್ತಿ.

೧೧. ಧಮ್ಮೇ ಪತಿಟ್ಠಿತಮನಾ ಅಪಿ ಮಾತುಗಾಮಾ,

ಏವಂ ಲಭನ್ತಿ ವಿಭವಞ್ಚ ಪಸಂಸನಞ್ಚ;

ಧಮ್ಮಞ್ಚ ಸಾಧುಚರಿತಂ ಮನಸೀಕರೋನ್ತೋ,

ಧಮ್ಮೇಸು ವತ್ತಥ ಸದಾ ಸುಚಿಸಜ್ಜನಾತಿ.

ಪಾನೀಯದಿನ್ನಸ್ಸ ವತ್ಥುಂ ನವಮಂ.