೭. ವೇಸ್ಸಾಮಿತ್ತಾಯ ವತ್ಥುಮ್ಹಿ ಅಯಮಾನುಪುಬ್ಬೀಕಥಾ

ಜಮ್ಬುದೀಪೇ ಕಿರ ಕೋಸಮ್ಬಿನಗರೇ ಕೋಸಮ್ಬಿರಞ್ಞೋ ವೇಸ್ಸಾಮಿತ್ತಾನಾಮ ಅಗ್ಗಮಹೇಸೀ ಅಹೋಸಿ. ತದಾ ಭಗವಾ ಕೋಸಮ್ಬಿಯಂ ಪಟಿವಸತಿ ಮಹತಾ ಭಿಕ್ಖುಸಙ್ಘೇನ ಸದ್ಧಿಂ ಚಾರಿಕಂ ಚರಮಾನೋ. ತಸ್ಮಿಂ ಸಮಯೇ ಸಾ ರಞ್ಞಾ ಸದ್ಧಿಂ ವಿಹಾರಂ ಗನ್ತ್ವಾ ಅನೋಪಮಾಯ ಬುದ್ಧಲೀಳಾಯ ಮಧುರೇನ ಸರೇನ ದೇಸೇನ್ತಸ್ಸ ಭಗವತೋ ಧಮ್ಮಂ ಸುತ್ವಾ ಪಸನ್ನಾ ಸರಣೇಸು ಪತಿಟ್ಠಾಯ ಬುದ್ಧಮಾಮಿಕಾ ಹುತ್ವಾ ವಿಹರತಿ. ಅಥಾ ಪರಭಾಗೇ ತಸ್ಸ ರಞ್ಞೋ ರಜ್ಜತ್ಥಾಯ ಪಚ್ಚನ್ತರಾಜಾ ಯುದ್ಧಸಜ್ಜೋ ರಜ್ಜಂ ವಾ ದೇತು, ಯುದ್ಧಂವಾತಿ ಪಣ್ಣಂ ಪಹಿಣಿ. ತಂ ಸುತ್ವಾ ರಾಜಾ ಮಹತಿಯಾ ಸೇನಾಯ ಪರಿವುತೋ ಯುದ್ಧಭೂಮಿಂ ಗಚ್ಛನ್ತೋ ಮಹೇಸಿಯಾ ಸದ್ಧಿಂ ಗನ್ತ್ವಾ ಖನ್ಧಾವಾರಂ ನಿವಾಸೇತ್ವಾ ತಸ್ಸಾ ಏವಮಾಹ. ಭದ್ದೇ ಸಙ್ಗಾಮಸೀಸೇ ಜಯಪರಾಜಯೋ ನಾಮ ನ ಸಕ್ಕಾ ವಿಞ್ಞಾತುಂ. ಸಚೇ ಮೇ ಪರಾಜಯೋ ಅಭವಿಸ್ಸ, ಪುರೇತರಮೇವ ರತ್ತಪತಾಕಂ ಉಸ್ಸಾಪೇಸ್ಸಾಮಿ, ತೇನ ಅಭಿಞ್ಞಾಣೇನ ತ್ವಂ ಕೋಸಮ್ಬಿಮೇವ ಗಚ್ಛಾಹೀತಿ ಅನುಸಾಸಿತ್ವಾ ಸಙ್ಗಾಮ ಮಣ್ಡಲಂ ಗನ್ತ್ವಾ ಮಹಾರಣಂ ಕರೋನ್ತೋ ಅತ್ತನೋ ಪರಾಜಯಭಾವಂ ಞತ್ವಾ ಮಾತುಗಾಮಂ ಸರಿತ್ವಾ ರತ್ತದ್ಧಜಂ ಉಸ್ಸಾಪೇತ್ವಾ ಯುಜ್ಝನ್ತೋ ರಣೇ ಪತಿ. ಅಥ ಸಾ ರತ್ತಪತಾಕಂ ದಿಸ್ವಾ ಪರಾಜಿತೋ ನೂನ ಮೇ ಸಾಮಿಕೋತಿ ಭಯೇನ ಪಲಾಯಿತುಮಾರಭಿ. ಅಥ ತಂ ಚೋರರಞ್ಞೋ ಮನುಸ್ಸಾ ದಿಸ್ವಾ ನೂನಾಯಂ ರಞ್ಞೋ ಅಗ್ಗಮಹೇಸೀತಿ ಞತ್ವಾ ಅತ್ತನೋ ರಾಜಾನಂ ದಸ್ಸೇಸುಂ, ರಾಜಾ ತಂ ದಿಸ್ವಾ ಪಟಿಬದ್ಧಚಿತ್ತೋ ಮಮೇತಂ ಅಭಿಸೇಕಂ ಕರೋಥಾತಿ ಅಮಚ್ಚೇ ಆಣಾಪೇಸಿ. ಅಮಚ್ಚಾ ತಂ ಅಭಿಸೇಕತ್ಥಾಯ ಯಾಚಿಂಸು, ಸಾ ನ ಮೇ ಭಣೇ ಅಭಿಸೇಕೇನತ್ಥೋತಿ ನ ಇಚ್ಛಿ. ಅಮಚ್ಚಾ ತಮತ್ಥಂ ರಞ್ಞೋ ಆರೋಚೇಸುಂ. ರಾಜಾ ನಂ ಪಕ್ಕೋಸಾಪೇತ್ವಾ ಕಸ್ಮಾ ನ ಇಚ್ಛಸೀತಿ ಪುಚ್ಛಿ. ಸಾ ಏವಮಾಹ.

೧. ಸುಣೋಹಿ ಸಾಧುಕಂ ದೇವ, ಭಾಸಮಾನಾಯ ಮೇ ವಚೋ;

ಭತ್ತಾ ಮಯ್ಹಂ ಮತೋ ಅಜ್ಜ, ಸಬ್ಬಸಮ್ಪತ್ತಿದಾಯಕೋ.

೨. ಕತ್ವಾನ ಸೋಭಿಸೇಕಂ ಮಂ, ಅತ್ತನೋ ಹದಯಂ ವಿಯ;

ಪಾಲೇತಿ ತಂ ಸರನ್ತಸ್ಸಾ, ಸೋಕಗ್ಗಿ ದಹತೇ ಮನಂ.

೩. ಮಹಾರಾಜ ಸಚಞ್ಞಸ್ಸ, ಅಸ್ಸ ಮಗ್ಗಮಹೇಸಿಕಾ;

ತಮ್ಹಾ ದುಕ್ಖಾ ನ ಮುಚ್ಚಾಮಿ, ತೇನಾಹಂ ತಂ ನ ಪತ್ಥಯೇ.

೪. ಸೋಕಗ್ಗಿನಾ ಪದಿತ್ತಾಹಂ, ಸೋಕೇ ಸೋಕಂ ಕಥಂ ಖಿಪೇ;

ಜಲನ್ತಗ್ಗಿಮ್ಹೀ ಕೋ ನಾಮ, ಪಲಾಲಂ ಪಕ್ಖಿಪೇ ಬುಧೋ.

೫. ಪಿಯವಿಪ್ಪಯೋಗದುಕ್ಖಂ, ತಂ ಚಿನ್ತಯನ್ತೀ ಪುನಪ್ಪುನಂ;

ತಮ್ಹಾ ದುಕ್ಖಾ ನ ಮುಚ್ಚಾಮಿ, ತಸ್ಮಾಹಂ ತಂ ನ ಪತ್ಥಯೇತಿ.

ತಂ ಸುತ್ವಾ ರಾಜಾ ಕೋಧೇನಾಭಿಭೂತೋ ಸಚೇ ನಾಭಿಸಿಞ್ಚಿಸ್ಸಸಿ, ಅಗ್ಗಿಮ್ಹಿ ತಂ ಪಕ್ಖಿಪಿಸ್ಸಾಮೀತಿ ವತ್ವಾ ಮಹನ್ತಂ ದಾರುಚಿತಕಂ ಕಾರಾಪೇತ್ವಾ ಅಗ್ಗಿಂ ದತ್ವಾ ಏಕಪಜ್ಜೋತೇ ಜಾತೇ ಏತ್ತ ಪವಿಸಾತಿ ಆಹ. ಅಥ ಸಾ ಯಾಚನ್ತೀ ರಾಜಾನಂ ಆಹ.

೬. ಪಾಪೋ ನಿಪ್ಪಾಪಿನಂ ರಾಜ, ಪಾತನಂ ಖಲು ಪಾವಕೇ;

ಹೋತಿ ಪಾಪಫಲಂ ತಸ್ಸ, ಪಚ್ಚತ್ತೇಚ ಪರತ್ಥಚ.

೭. ಪುರಾತನೇಹಿ ಭೂಪಾಲ, ಸಮಣಬ್ರಹ್ಮಣೇಸುಚ;

ಮಾತಾಪಿತುಸು ಬಾಲೇಸು, ರೋಗೇನಾ ತುರಇತ್ಥಿಸು;

ನಪ್ಪಸತ್ಥೋ ವಧೋ ದೇವ, ತಸ್ಮಾಹಂ ನ ವಧಾರಹಾತಿ.

ತಂ ಸುತ್ವಾಪಿ ರಾಜಾ ಅಸದ್ದಹನ್ತೋ ಮನುಸ್ಸೇ ಆಣಾಪೇಸಿ. ಏತಾಯ ಹತ್ಥಪಾದೇ ಗಹೇತ್ವಾ ಅಗ್ಗಿಮ್ಹಿ ಪಕ್ಖಿಪಥಾತಿ ತೇ ತಥಾ ಕರಿಂಸು, ಅಥ ಸಾ ಅಗ್ಗಿಮ್ಹಿ ಪಕ್ಖಿಪಮಾನಾ ನತ್ಥೇತ್ಥ ಮೇ ಕೋಚಿ ಪಟಿಸರಣೋತಿ ಸರಣಮೇವ ಸರಣಂ ಕರೋಮೀತಿ ಚಿನ್ತೇತ್ವಾ ‘‘ಬುದ್ಧಂ ಸರಣಂ ಗಚ್ಛಾಮಿ, ಧಮ್ಮಂ ಸರಣಂ ಗಚ್ಛಾಮಿ, ಸಙ್ಘಂ ಸರಣಂ ಗಚ್ಛಾಮೀತಿ’’ ವದನ್ತೀ ಮನಸಾಚ ಅನುಸ್ಸರನ್ತೀ ಅಗ್ಗಿಮ್ಹಿ ಪತಿ, ತಥಾವಿಧೋಪಿ ಅಗ್ಗಿ ತಸ್ಸಾ ಸರೀರೇ ಲೋಮಕೂಪಮತ್ತಮ್ಪಿ ಉಣ್ಹಾಕಾರಂ ಕಾತುಂ ನಾಸಕ್ಖಿ. ಪದುಮಗಬ್ಭಂ ಪವಿಟ್ಠಾ ವಿಯ ಸೀತಿಭೂತಸರೀರಾ ಅಹೋಸಿ. ರಾಜಾ ತಂ ಅಚ್ಛರಿಯಂ ದಿಸ್ವಾ ಸಂವಿಗ್ಗೋ ಲೋಮಹಟ್ಠಜಾತೋ ವೇಗೇನ ತಂ ಉಪಸಙ್ಕಮಿತ್ವಾ ಉಭೋಹಿ ಹತ್ಥೇಹಿ ಪಗ್ಗಯ್ಹ ಉರೇ ನಿಪಜ್ಜಾಪೇತ್ವಾ ರಾಜಾಸನೇ ನಿಸೀದಾಪೇತ್ವಾ ಅಞ್ಜಲಿಂ ಗಗ್ಗಯ್ಹ ಠಿತೋ ಕಸ್ಮಾ ತೇ ತಂ ಅಗ್ಗಿ ಸರೀರಂ ಮಾ ಪರಿದಹೀತಿ ಪುಚ್ಛಿ. ಸಾ ತಂ ಕಾರಣಂ ಕಥೇನ್ತೀ ಏವ ಮಾಹ.

೮. ಮಾತಾ ಪಿತಾಚ ಞಾತೀಚ, ಪರಿವಾರಾಚ ಸೋಹದಾ;

ಮನ್ತೋ ಸಧಾದಯೋಚಾಪಿ, ಮಹೇಸಕ್ಖಾಚ ದೇವತಾ.

೯. ಏತೇಚ ಞ್ಞೇಚ ಭೂಪಾಲ, ಸತ್ತಾನಂ ಭಯ ಮಾಗತೇ;

ರಕ್ಖಿತುಂ ನೇವ ಸಕ್ಕೋನ್ತಿ, ಹಿತ್ವಾನ ಸರಣತ್ತಯಂ.

೧೦. ಅಗಾಹಂ ಬುದ್ಧಂ ಸರಣಂ, ಬುದ್ಧೋ ಮೇ ಸರಣಂ ಇತಿ;

ತೇನ ತೇಜೇನ ಮಂ ರಾಜ, ಜಲನ್ತೋ ಅಗ್ಗಿ ನೋ ದಹಿ.

೧೧. ಅಗಾಹಂ ಧಮ್ಮಂ ಸರಣಂ, ಧಮ್ಮೋ ಮೇ ಸರಣಂ ಇತಿ;

ತೇನ ತೇಜೇನ ಮಂ ರಾಜ, ಜಲನ್ತೋ ಅಗ್ಗಿ ನೋ ದಹಿ.

೧೨. ಅಗಾಹಂ ಸಙ್ಘಂ ಸರಣಂ, ಸಙ್ಘೋ ಮೇ ಸರಣಂ ಇತಿ;

ತೇನ ತೇಜೇನ ಮಂ ರಾಜ, ಜಲನ್ತೋ ಅಗ್ಗಿ ನೋ ದಹಿ.

೧೩. ಏವಂ ಮಹಾನುಭಾವನ್ತಂ, ಪಚ್ಚಕ್ಖಂ ಏಹಿಪಸ್ಸಿಕಂ;

ನಾನೋ ಪದ್ದವ ವಿದ್ಧಂಸಿಂ, ನಾನಾಸಮ್ಪತ್ತಿದಾಯಕಂ.

೧೪. ಸರಣತ್ತಯಞ್ಹಿ ಯೋ ಸತ್ತೋ, ನ ಸಮಾದಾಯ ಗಣ್ಹತಿ;

ಇಧವಾ ಪರತ್ಥವಾ ಲೋಕೇ, ಸೋ ಸುಖಂ ನಾನುಭೋಸ್ಸತಿ.

೧೫. ಸರಣತ್ತಯಞ್ಹಿ ಯೋ ಸತ್ತೋ, ಸುಸಮಾದಾಯ ಗಣ್ಹತಿ;

ಇಧವಾಪರತ್ಥವಾ ಲೋಕೇ, ಸೋ ಸುಖಾ ನ ವಿಹಾಯತಿ.

೧೬. ತಸ್ಮಾ ತುವಮ್ಪಿ ಭೂಪಾಲ, ಗಣ್ಹಾಹಿ ಸರಣತ್ತಯಂ;

ತಂ ತೇ ಭವತಿ ಸಬ್ಬತ್ಥ, ತಾಣಂ ಲೇಣಂ ಪರಾಯಣನ್ತಿ.

ತಂ ಸುತ್ವಾ ರಾಜಾ ಅತಿವಿಯ ಪಸನ್ನಮಾನಸೋ ತಂ ಖಮಾಪೇತ್ವಾ ಮಹನ್ತಂ ಸಕ್ಕಾರಸಮ್ಮಾನಂ ಕತ್ವಾ ಅಜ್ಜಪ್ಪಟ್ಠಾಯ ತ್ವಂ ಮಮ ಮಾತಾತಿ ತಂ ಮಾತುಟ್ಠಾನೇ ಠಪೇತ್ವಾ ಸರಣ ಮಗಮಾಸಿ. ತಸ್ಮಿಂ ಸನ್ನಿಪತಿತ್ವಾ ಠಿತಮಹಾಜನಾ ತಂ ಪಾಟಿಹಾರಿಯಂ ದಿಸ್ವಾ ಸರಣೇಸುಚ ಸೀಲೇಸುಚ ಪತಿಟ್ಠಾಯ ದಾನಾದೀನಿ ಪುಞ್ಞಕಮ್ಮಾನಿ ಕತ್ವಾ ಯಥಾಕಮ್ಮಂ ಗತಾತಿ.

೧೭. ಇತಿ ಸರಣವರಂ ಸಾ ಕೇವಲಂ ಉಗ್ಗಹೇತ್ವಾ,

ಜಲಿತದಹನಮಜ್ಝೇ ಸೀತಿಭಾವಂ ಅಲತ್ಥ;

ಪರಮಸರಣಸೀಲಂ ಪಾಲಯನ್ತಾ ಕಥಂ ವೋ,

ನ ಲಭಥ ಭವಭೋಗಂ ನಿಬ್ಬುತಿಞ್ಚಾಪಿ ಅನ್ತೇತಿ.

ವೇಸ್ಸಾಮಿತ್ತಾಪ ವತ್ಥುಂ ಸತ್ತಮಂ.