ಧಮ್ಮಸೋಣ್ಡಕವಗ್ಗೋ

೧. ಧಮ್ಮಸೋಣ್ಡಕಸ್ಸ ವತ್ಥುಮ್ಹಿ ಅಯಮಾನುಪುಬ್ಬೀಕಥಾ

ತತ್ಥ ತೇಸಂ ವತ್ಥೂನ ಮುಪ್ಪತ್ತಿಯೋ ದ್ವಿಧಾ ಭವನ್ತಿ ಜಮ್ಬುದೀಪೇ ಸೀಹಳದೀಪೇಚಾತಿ, ತತ್ಥ ಜಮ್ಬುದೀಪೇ ತಾಳೀಸ, ಸೀಹಳದೀಪೇ ತೇಸಟ್ಠಿ, ತೇಸು ತಾವ ಜಮ್ಬುದೀಪುಪ್ಪತ್ತಿವತ್ಥೂನಿ ಆವಿ ಭವಿಸ್ಸನ್ತಿ, ತತೋಪಿ ಧಮ್ಮಸೋಣ್ಡಕಸ್ಸ ವತ್ಥು ಆದಿ, ಕಥಂ, ಅಮ್ಹಾಕಂ ಕಿರ ಭಗವತೋ ಪುಬ್ಬೇ ಇಮಸ್ಮಿಂಯೇವ ಭದ್ದಕಪ್ಪೇ ಕಸ್ಸಪೋನಾಮ ಸತ್ಥಾ ಲೋಕೇ ಉದಪಾದಿ, ತಸ್ಸ ಖೋ ಪನ ಭಗವತೋ ಸಾಸನನ್ತರಧಾನತೋ ನ ಚಿರೇನೇವ ಕಾಲೇನ ಅಮ್ಹಾಕಂ ಬೋಧಿಸತ್ತೋ ಬಾರಾಣಸೀರಞ್ಞೋ ಅಗ್ಗಮಹೇಸಿಯಾ ಕುಚ್ಛಿಸ್ಮಿಂ ನಿಬ್ಬತ್ತಿ, ತಸ್ಸು ಪ್ಪತ್ತಿ ಕಾಲಸಮನನ್ತರಮೇವ ಸಬ್ಬಸತ್ತಾನಂ ಮನಸಿ ಧಮ್ಮಸಞ್ಞಾ ಉದಪಾದಿ, ತಸ್ಮಾಸ್ಸ ಧಮ್ಮಸೋಣ್ಡೋತಿನಾಮ ಮಕಂಸು, ಸೋ ಪನೇಸೋ ಕುಮಾರೋ ಮಹನ್ತೇನ ಪರಿವಾರೇನ ವಡ್ಢೇನ್ತೋ ಸಬ್ಬಸಿಪ್ಪೇಸು ನಿಪ್ಫತ್ತಿಂ ಪತ್ವಾ ಪಿತರಾ ಉಪರಜ್ಜೇನ ಪೂಜಿತೋ ಹುತ್ವಾ ದಾನಾದಯೋ ದಸಕುಸಲಕಮ್ಮಪಥೇ ಪೂರೇನ್ತೋ ಪಿತುಅಚ್ಚಯೇನಾಮಚ್ಚೇಹಿ ರಜ್ಜೇನಾಭಿಸಿಞ್ಚಿತೋ ಅಹೋಸಿ, ಸೋ ಪನೇಸ ಧಮ್ಮಸೋಣ್ಡಕಮಹಾರಾಜಾ ದೇವನಗರಸದಿಸೇ ಬಾರಾಣಸೀನಗರೇ ಚಕ್ಕವತ್ತಿಸದಿಸಂ ಬಾರಾಣಸೀರಜ್ಜಂ ಕಾರೇನ್ತೋ ಮಾಸದ್ಧಮಾಸಚ್ಚಯೇನ ಸಿರಿಸಯನಗತೋ ಏವಂ ಚಿನ್ತೇಸಿ, ಮಮೇವಂ ರಜ್ಜಸಿರಿಮನುಭವನಂ ನ ಸೋಭತಿ ಧಮ್ಮವಿಯೋಗೇನ, ದಿವಾಕರ ವಿರಹಿತೋ ನಭೋ ವಿಯಾತಿಆದಿನಾ ನಾನಾಕಾರಣಂ ಚಿನ್ತೇಸಿ, ತೇನೇತ್ಥ.

೧. ಪುಞ್ಞೇನ ಸೀಲಾದಿಮಯೇನ ಪುಬ್ಬೇ,

ಕತೇನ ಪತ್ತೋಸ್ಮಿ ಅತನ್ದಿತೇನ,

ಮಸಕ್ಕಸಾರೇ ವಿಯ ದೇವರಾಜಾ;

ರಾಜತ್ತಮಿದ್ಧೇ ಪುರಮುತ್ತಮಮ್ಹಿ.

೨. ರೂಪೇನ ಹಾರೀನಯನುಸ್ಸವೇನ,

ಸದ್ದೇನ ಸಮ್ಮಾ ಸವಣಾಮತೇನ,

ಗನ್ಧೇನ ಘಾನುಸ್ಸವಸೋಭನೇನ,

ರಸಞ್ಞಪುಞ್ಞೇನ ರಸೇನಚಾಪಿ.

೩. ಫಸ್ಸೇನ ಗತ್ತಸ್ಸ ಸುಫಸ್ಸದೇನ,

ಸಮಿದ್ಧಿಪತ್ತೋಸ್ಮಿ ಮಹಿದ್ಧಿಕೋಹಂ,

ನೇವೇತ್ತಕೇನೇವ ಪಮಾದಭಾವ,

ಮಾ ಪಜ್ಜಿತುಂ ಯುತ್ತರೂಪನ್ತಿ ಞತ್ವಾ.

೪. ದಸ್ಸಾಮಿ ಅಙ್ಗಅಪಿ ಜೀವಿತಞ್ಚ,

ಧಞ್ಞಂ ಧನಂ ಚಾಪಿ ಪಸನ್ನಚಿತ್ತೋ,

ಸೋಸ್ಸಾಮಿ ಧಮ್ಮಂ ಸಿವಮಾದಧಾನಂ,

ಜಿನೇರಿತಂ ಜಾತಿಜರಾಪಹಾಣಂ.

೫. ನ ಸೋಭತಿ ಯಥಾಕಾಸಂ, ಜಲಂ ಧಾಮಪತಿಂವಿನಾ,

ರಜ್ಜಕರಣಂ ತಥಾ ಮಯ್ಹಂ, ವಿನಾ ಧಮ್ಮಾ ನ ಸೋಭತಿ.

೬. ನ ಸೋಭತಿ ಹಥಾ ರತ್ತಿ, ನಿಸಾನಾಥಂ ವಿನಾ ಸದಾ,

ರಜ್ಜಕರಣಂ ತಥಾ ಮಯ್ಹಂ, ವಿನಾ ಧಮ್ಮಾ ನ ಸೋಭತಿ.

೭. ಅಲಙ್ಕತೋಪಿ ಚೇ ಹತ್ಥೀ, ವಿನಾ ದಾಠಾ ನ ಸೋಭತಿ,

ರಜ್ಜಕರಣಂ ತಥಾ ಮಯ್ಹಂ, ವಿನಾ ಧಮ್ಮಾ ನ ಸೋಭತಿ.

೮. ಯಥಾ ಕಲ್ಲೋಲಮಾಲೀಯಂ,

ವಿನಾ ವೇಲಾ ನ ಸೋಭತಿ,

ರಜ್ಜಕರಣಂ ತಥಾ ಮಯ್ಹಂ,

ವಿನಾ ಧಮ್ಮಾ ನ ಸೋಭತಿ.

೯. ಯಥಾ ಸುಮಣ್ಡಿತೋ ರಾಜಾ,

ಕುಪಟೋ ನೇವ ಸೋಭತಿ,

ರಜ್ಜಕರಣಂ ತಥಾ ಮಯ್ಹಂ,

ವಿನಾ ಧಮ್ಮಾ ನ ಸೋಭತಿ.

೧೦. ಧಮ್ಮಮೇವ ಸುಣಿಸ್ಸಾಮಿ, ಧಮ್ಮೇ ಮೇ ರಮತೀ ಮನೋ,

ನ ಹಿ ಧಮ್ಮಾ ಪರಂ ಅತ್ಥಿ, ಧಮ್ಮಮೂಲಂ ತಿಸಮ್ಪದನ್ತಿ.

ಏವಂ ಚಿನ್ತೇತ್ವಾ ಪಾತೋವ ಸಿರಿಗಬ್ಭಾ ನಿಕ್ಖಮ್ಮ ಸುಸಜ್ಜಿತೇ ಸಮುಸ್ಸಿತಸೇತಚ್ಛತ್ತೇ ರಾಜಪಲ್ಲೇಙ್ಕೇ ಅಮಚ್ಚಗಣ ಪರಿವುತೋ ನಿಸೀದಿ ದೇವರಾಜಾವಿಯ ವಿರೋಚಮಾನೋ, ನಿಸಿನ್ನೋ ಪನ ರಾಜಾ ಅಮಚ್ಚೇ ಏವಮಾಹ, ಯೋ ಪನೇತ್ಥ ಭೋನ್ತೋ ಬುದ್ಧಭಾಸಿತೇಸು ಧಮ್ಮೇಸು ಕಿಞ್ಚಿಧಮ್ಮಂ ಜಾನಾತಿ, ಸೋ ಭಾಸತು, ಸೋತುಮಿಚ್ಛಾಮಿಧಮ್ಮನ್ತಿ, ತೇ ಸಬ್ಬೇಪಿ ಮಯಂ ದೇವ ನ ಜಾನಾಮಾತಿ ಆಹಂಸು, ತಂ ಸುತ್ವಾ ಅ ನ ತ್ತ ಮ ನೋ ರಾಜಾ ಏವಂ ಚಿನ್ತೇಸಿ, ಯನ್ನೂನಾಹಂ ಹತ್ಥಿಕ್ಖನ್ಧೇ ಸಹಸ್ಸಂ ಠಪೇತ್ವಾ ನಗರೇ ಭೇರಿಂಚರಾಪೇಯ್ಯಂ, ಯಂ ಅಪ್ಪೇವನಾಮ ಕೋಚಿ ಧನಲೋಭೇನ ಚಾತುಪ್ಪದಿಕಾಯಪಿ ಗಾಥಾಯ ಧಮ್ಮಂ ದೇಸೇಯ್ಯ. ತಂ ಮೇ ದೀಘರತ್ತಂ ಹಿತಾಯ ಸುಖಾಯ ಭವಿಸ್ಸತೀತಿ, ತತೋ ಸೋ ತಥಾ ಕತ್ವಾಪಿ ಧಮ್ಮದೇಸಕಂ ಅಲಭನ್ತೋ ಪುನ ದ್ವಿಸಹಸ್ಸಂ ತಿಚತುಪಞ್ಚಸಹಸ್ಸನ್ತಿಯಾವಕೋಟಿಪ್ಪಕೋಟಿಂದಮ್ಮೀತಿ, ತತೋ ಗಾಮ ನಿಗಮ ಜನಪದೇ, ತತೋ ಸೇಟ್ಠಿಟ್ಠಾನಂ ಸೇನಾಪತಿ ಉಪರಾಜಟ್ಠಾನಾ ದಯೋಪಿ, ಪುನ ಸೇತಚ್ಛತ್ತಂ ದಮ್ಮಿ, ರಾಜವೇಸಂ ಪಹಾಯ ಅತ್ತಾನಂ ದಾಸಂ ಸಾವೇತ್ವಾ ಧಮ್ಮದೇಸೇನ್ತಸ್ಸ ದಮ್ಮಿತಿ ವತ್ವಾ ಭೇರಿ ಚರಾಪೇತ್ವಾಪಿ ಧಮ್ಮ ದೇಸಕಮಲಭಿತ್ವಾ ಸಂವಿಗ್ಗೋ ಕಿಮ್ಮೇ ಧಮ್ಮವಿಯೋಗೇನ ರಜ್ಜೇನಾತಿ ಅಮಚ್ಚಾನಂ ರಜ್ಜಂ ನೀಯ್ಯಾತೇತ್ವಾ ಸದ್ಧಮ್ಮಗವೇಸಕೋ ಧಮ್ಮಸೋಣ್ಡಕಮಹಾರಾಜಾ ಮಹಾವನಂ ಪಾವಿಸಿ ಗಾಮ ನಿಗಮ ರಾಜಧಾನಿ ಪರಮ್ಪರಾಯ, ತೇನೇತ್ಥ.

೧೧. ಪುರೇ ಭೇರಿಂ ಚರಾಪೇತ್ವಾ,

ಧಮ್ಮಸೋಣ್ಡೋ ನರಾಧಿಪೋ;

ಸದ್ಧಮ್ಮಜ್ಝೇಸಕಂ ಸತ್ಥು,

ಅಲದ್ಧಾ ಧನಕೋಟಿಹಿ.

೧೨. ದಾಸೋ ಹೋಮಿ ಪಹಾಯಾಹಂ,

ರಾಜತ್ತಂ ದೇಸಕಸ್ಸ ಮೇ;

ಇಚ್ಚಾಹ ಸೋ ಮಹೀಪಾಲೋ,

ಅಹೋ ಧಮ್ಮೇಸು ಲೋಲತಾ.

೧೩. ರಜ್ಜಂ ನೀಯ್ಯಾತಯಿತ್ವಾನ, ಅಮಚ್ಚಾನಂ ಮನೋರಮಂ,

ವನಂ ಪಾವಿಸಿ ಸೋ ರಾಜಾ, ಗವೇಸಂ ಧಮ್ಮಮುತ್ತಮನ್ತಿ.

ಮಹಾವನಂ ಪವಿಟ್ಠಕ್ಖಣೇ ಪನ ಮಹಾಸತ್ತಸ್ಸ ಪುಞ್ಞತೇಜೇನ ಸಕ್ಕಸ್ಸಾಸನಂ ಉಣ್ಹಾಕಾರಂ ದಸ್ಸೇಸಿ, ಅಥ ದೇವರಾಜಾ ಚಿನ್ತೇಸಿ ಅಕಾಮಂ ಮೇ ಪಣ್ಡುಕಮ್ಬಲ ಸಿಲಾಸನಂ ಉಣ್ಹಮಹೋಸಿ, ಕಿನ್ನುಖೋ ಕಾರಣನ್ತಿ ಲೋಕಂ ಓಲೋಕೇನ್ತೋ ಸಕ್ಕೋ ದೇವರಾಜಾ ಧಮ್ಮಸೋಣ್ಡಕ ಮಹಾರಾಜಾನಂ ಸಕಲಜಮ್ಬುದೀಪಂ ವಿಚಿನಿತ್ವಾ ಸದ್ಧಮ್ಮಜ್ಝೇಸಕಂ ಅಲಭಿತ್ವಾ ವನಂ ಪವಿಟ್ಠಭಾವಂ ಅದ್ದಸ, ಧಮ್ಮಸೋಣ್ಡಕಮಹಾರಾಜಾ ಸದ್ಧಮ್ಮತ್ಥಾಯ ರಜ್ಜ ಧನ ಬನ್ಧು ಜೀವಿತಮ್ಪಿ ಪಹಾಯ ಅರಞ್ಞಂ ಪವಿಟ್ಠೋ, ನ ಸೋ ವತಾಯಂ ಯೋವಾ ಸೋವಾ ಸತ್ತೋ, ಇಮಸ್ಮಿಂಯೇವ ಕಪ್ಪೇ ಬುದ್ಧೋ ಭವಿಸ್ಸತಿ, ಬುದ್ಧಬೋಧಿಸತ್ತೋ ಚಾಯಂ ಅಜ್ಜೇವ ಮಹಾರಞ್ಞಂ ಪವಿಟ್ಠೋ ಸದ್ಧಮ್ಮಂ ಅಲದ್ಧಾ ಮಹಾದುಕ್ಖಂ ಪಾಪುಣೇಯ್ಯ, ನ ಚೇತಂ ಯುತ್ತಂ, ಅಜ್ಜ ಮಯಾ ತತ್ಥ ಗನ್ಥಬ್ಬಂ ಧಮ್ಮಾಮತರಸೇನ ತಮಭಿಸಿಞ್ಚಿತ್ವಾ ರಜ್ಜೇ ಪಹಿಟ್ಠಾಪೇತುನ್ತಿ ಚಿನ್ತೇತ್ವಾ ಅತ್ತಭಾವಂ ವಿಜಹಿತ್ವಾ ಭಯಾನಕಂ ಮಹನ್ತಂ ರಕ್ಖಸವೇಸಂ ನಿಮ್ಮಿಣಿತ್ವಾ ಮಹಾಸತ್ತಾಭಿಮುಖೋ ಅವಿದೂರೇ ಅತ್ತಾನಂ ದಸ್ಸೇಸಿ, ತೇನೇತ್ಥ.

೧೪. ಬ್ಯಗ್ಘಚ್ಛಸೀಹಮಹಿಸೋ ರಗಹತ್ಥಿದೀಪಿ,

ಮಿಗಾಕುಲಂ ಕಣ್ಟಕಸೇಲರುಕ್ಖಂ;

ನರಾನಮಿನ್ದೋ ಪವಿಸಿತ್ವಕಾನನಂ,

ಇತೋಚಿತೋ ವಿಬ್ಭಮಿ ಧಮ್ಮಕಾಮೋ.

೧೫. ತಸ್ಸಾನುಭಾವೇನ ಪುರಿನ್ದದಸ್ಸ,

ಸಿಲಾಸನಂ ಉಣ್ಹಮಹೋಸಿ ಕಾಮಂ;

ತೇನೇವ ಸೋ ಲೋಕಮುದಿಕ್ಖಮಾನೋ,

ಅದ್ದಕ್ಖಿ ಧೀರಂ ವಿಪಿನೇ ಚರನ್ತಂ.

೧೬. ಮಯಜ್ಜ ತಂ ಧಮ್ಮರಸೇನ ಸಮ್ಮಾ,

ಸನ್ತಪ್ಪಯಿತ್ವಾ ಗಮನಂ ವರನ್ತಿ;

ಮನ್ತ್ವಾ ಸುಭೀಮಞ್ಜನಕೂಟವಣ್ಣಂ,

ಮಹಾಮುಖಂ ನಿಗ್ಗತ ಭೀಮದಾಠಂ.

೧೭. ದಿತ್ತಗ್ಗಿಸಙ್ಕಾಸ ವಿಸಾಲನೇತ್ತಂ,

ಮಜ್ಝೇನ ಭಗ್ಗಂ ಚಿಪಿಟಗ್ಗನಾಸಂ;

ಖರತಮ್ಬದಾಠಿಂ ಘನಮಸ್ಸುವನ್ತಂ,

ನೀಲೋದರಂ ಗಜ್ಜಿತಭೀಮಘೋಸಂ.

೧೮. ಕರೋರುಹಂ ತಿಕ್ಖಸಲೋಹಿತಾಯತಂ,

ವಿಸಾಲಧೋತಾಯತಖಗ್ಗಹತ್ಥಂ;

ಗದಾಯುಧೇನಙ್ಕಿತಮಞ್ಞಬಾಹುಂ,

ದಟ್ಠೋಟ್ಠಭೀಮಂ ಸವಲೀಲಲಾಟಂ.

೧೯. ಮನುಸ್ಸಮಂಸಾದನರತ್ತಪಾನಂ,

ಭಯಾನಕಂ ಕಕ್ಖಲಯಕ್ಖವಣ್ಣಂ;

ಸುಮಾಪಯಿತ್ವಾನ ವನನ್ತರಸ್ಮಿಂ,

ದಸ್ಸೇಸಿ ಅತ್ತಂ ಸ ನರಾಧಿಪಸ್ಸಾತಿ.

ಅಥ ಮಹಾಸತ್ತೋ ಅತ್ತನೋ ಅವಿದೂರೇ ಠಿತಂ ರಕ್ಖಸಂ ಅದ್ದಕ್ಖಿ, ತಂ ದಿಸ್ವಾನಾಸ್ಸ ಭಯಂವಾ ಛಮ್ಭಿತತ್ತಂವಾ ಚಿತ್ಥುತ್ರಾಸಮತ್ತಂವಾ ನಾಹೋಸಿ, ಕಿಮತ್ರ ಚಿನ್ತೇಸಿ, ಅಪಿನಾಮ ಏವರೂಪೋ ಪಿರಕ್ಖಸೋ ಧಮ್ಮಂ ಜಾನೇಯ್ಯ, ಯನ್ನೂನಾಹಂ ತಸ್ಸ ಸನ್ತಿಕೇ ಧಮ್ಮಂ ಸುಣಿಸ್ಸಾಮಿ, ತಮ್ಮೇ ದೀಘರತ್ತಂ ಹಿತಾಯ ಸುಖಾಯ ಭವಿಸ್ಸತೀತಿ ಚಿನ್ತೇಸಿ. ಚಿನ್ತೇತ್ವಾ ಚಪನ ಅಜ್ಜ ಮಯಾ ತಮುಪಸಙ್ಕಮ್ಮ ಪುಚ್ಛಿತಂ ವಟ್ಟತೀತಿ ಗನ್ತ್ವಾ ರಕ್ಖಸೇನ ಸದ್ಧಿಂ ಸಲ್ಲಪನ್ತೋ ಆಹ.

೨೦. ಅಸ್ಮಿಂ ವನಸ್ಮಿಂ ತರುಸಣ್ಡ ಮಣ್ಡಿತೇ;

ಸುಫುಲ್ಲಿತಾನೇಕಲತಾಕುಲಾಕುಲೇ;

ಅಧಿಗ್ಗಹೀತೋ ಸಿ ಮಹಾನುಭಾವ,

ಪುಚ್ಛಾಮಿ ತಂ ದೇವ ವದೇಹಿ ಕಙ್ಖಂ.

೨೧. ಧಮ್ಮಂ ಗವೇಸಂ ವನಮಾಗತೋಮ್ಹಿ,

ಪಹಾಯ ರಜ್ಜಂ ಅಪಿ ಞಾತಿಸಙ್ಘಂ;

ಜಾನಾಸಿ ಚೇ ಸಮ್ಮ ವದೇಹಿ ಮಯ್ಹಂ,

ಏಕಮ್ಪಿ ಗಾಥಂ ಸುಗತೇನ ದೇಸಿತಂ.

ತತೋ ಯಕ್ಖೋ ಆಹ.

೨೨. ಧಮ್ಮಂ ಪಜಾನಾಮಹಮೇಕದೇಸಂ,

ಜಿನೇರಿತಂ ಸಾಧುತರಂ ರಸಾನಂ,

ದೇಸೇಮಿ ಚೇಹಂ ತವ ಧಮ್ಮ ಮಗ್ಗಂ,

ತುವಞ್ಹಿ ಕಿಂ ಕಾಹಸಿ ದೇಸಕಸ್ಸಾತಿ.

ಅಥ ಮಹಾಸತ್ತೋ ಆಹ.

೨೩. ರಜ್ಜೇ ಠಿತೋ ಅಸ್ಸಮಹಂ ಸಚೇ ಭೋ,

ಅನಪ್ಪರೂಪಂ ಪಕರೋಮಿ ಪೂಜಂ;

ಇದಾನಿ ಏಕೋ ವನಮಜ್ಝಪತ್ತೋ,

ಕರೋಮಿ ಕಿಂ ದೇಹಮಿಮಂ ಠಪೇತ್ವಾ.

೨೪. ಯದಿಚ್ಛಸಿ ತ್ವಂ ಮಮ ಮಂಸಲೋಹಿತಂ,

ಕರೋಮಹಂ ಸಙ್ಗಹಮಜ್ಜ ತೇನ,

ನ ಚತ್ಥಿ ಅಞ್ಞಂ ತವ ಅಚ್ಚನೀಯಂ,

ದೇಸೇಹಿ ಧಮ್ಮಂ ಸುಗತ ಪ್ಪಸತ್ಥನ್ತಿ.

ತತೋ ಯಕ್ಖೋ ಆಹ.

೨೫. ಭುತ್ವಾನ ಮಂಸಂ ಸುಹಿತೋವ ಸನ್ತೋ,

ಹನ್ತ್ವಾ ಪಿಪಾಸಂ ರುಧಿರಂ ಪಿವಿತ್ವಾ;

ಧಮ್ಮಂ ಕಥೇತುಂ ಪಭವಾಮಿ ತುಯ್ಹಂ,

ವತ್ತುಂ ನ ಸಕ್ಕೋಮಿ ಖುದಾಪರೇತೋತಿ.

ಅಥ ಮಹಾಸತ್ತೋ ಆಹ.

೨೬. ಭುತ್ವಾ ತುವಂ ಮಂ ಪಥಮಞ್ಹಿ ಯಕ್ಖ,

ಪಚ್ಛಾ ತು ದೇಸೇಸ್ಸಸಿ ಕಸ್ಸ ಧಮ್ಮಂ;

ಧಮ್ಮಸ್ಸ ಮಯ್ಹಂ ತವ ಮಂಸಲಾಭಂ,

ತ್ವಮೇವ ಜಾನಾಹಿ ಯಥಾ ಭವೇಯ್ಯಾತಿ.

ಏವಂ ವುತ್ತೇ ಸಕ್ಕೋ ದೇವಾನಮಿನ್ದೋ ಸಾಧು ಮಹಾರಾಜ ಅಹಮೇವ ಯುತ್ತಂ ಜಾನಾಮೀತಿ ವತ್ವಾ ತಸ್ಸಾವಿದೂರೇ ತಿಗಾವುತುಬ್ಬೇಧಂ ಅಞ್ಜನವಣ್ಣಂ ಮಹನ್ತಂ ಪಬ್ಬತಂ ಮಾಪೇತ್ವಾ ಮಹಾರಾಜ ಇಮಮಾರುಯ್ಹ ಪಬ್ಬತಮುದ್ಧನಿಟ್ಠಿತೋ ಮಮ ಮುಖೇ ಪತತು, ಅಹಂ ಪತನ್ಥಸ್ಸ ತೇ ಧಮ್ಮಂ ದೇಸೇಸ್ಸಾಮಿ, ಏವಂ ಸನ್ತೇ ತುಯ್ಹಂ ಧಮ್ಮಪಟಿಲಾಭೋ, ಮಯ್ಹಂಚ ಮಂಸಪಟಿಲಾಭೋ ಭವಿಸ್ಸತೀತಿ. ತಂ ಸುತ್ವಾ ಮಹಾಸತ್ತೋ ಅನಮತಗ್ಗೇ ಸಂಸಾರೇ ಸಂಸರತೋ ಮೇ ಸೀಹಬ್ಯಗ್ಘಚ್ಛಮಚ್ಛಕಚ್ಛಪವಿಹಙ್ಗಾದೀನಂ ಭಕ್ಖಭೂತಸ್ಸ ಜಾತೀಸು ಪಮಾಣಂ ನತ್ತಿ, ಅಜ್ಜ ಮಯಾ ಸಮ್ಬುದ್ಧಸ್ಸ ಧಮ್ಮತ್ಥಾಯ ಜೀವಿತಂ ಪರಿಚ್ಚಜಿತುಂ ವಟ್ಟತೀತಿ ಚಿನ್ತೇತ್ವಾ ಏವಮಾಹ.

೨೭. ಸಂಸಾರವಟ್ಟೇಸು ವಿವಟ್ಟಮಾನಾ,

ಪಪ್ಪೋನ್ತಿ ದುಕ್ಖಂ ಜನತಾ ಅನೇಕಾ;

ಏತಞ್ಹಿ ಭೋ ಅತ್ತನೋ ವಾ ಪರಸ್ಸ,

ಅತ್ಥಾಯ ನಾಹೋಸಿ ಅಹೋಸಿ ತುಚ್ಛಂ.

೨೮. ತ್ವಮದಿನ್ನಹಾರೀ ತಿಚ ಪಾರದಾರಿಕೋ,

ಪಾಣಾತಿಪಾತೀಸಿ ಮುಸಾ ಅಭಾಸಿ;

ತ್ವ ಮಜ್ಜಪಾಯೀತಿ ಅಕಾಸಿ ದೋಸಂ,

ಪಗ್ಗಯ್ಹ ದುಕ್ಖಂ ಬಹುಸೋ ದದನ್ತಿ.

೨೯. ಏತಞ್ಹಿ ಭೋ ಅತ್ತನೋ ವಾ ಪರಸ್ಸ,

ಅತ್ಥಾಯ ನಾಹೋಸಿ ಅಹೋಸಿ ತುಚ್ಛಂ;

ರುಕ್ಖಾ ಪಪಾತಾ ಪಪತಿತ್ವಕೇಚಿ,

ದುಬ್ಬನ್ಧಿಯಾ ದುಗ್ಗವಿಸಾದನೇನ.

೩೦. ಬ್ಯಾಧೀಹಿ ನಾನಾಖರವೇದನಾಹಿ,

ಮರನ್ತಿ ಸತ್ತಾ ಉತುವೇದನಾಹಿ;

ಏತಞ್ಹಿ ಭೋ ಅತ್ತನೋ ವಾ ಪರಸ್ಸ,

ಅತ್ಥಾಯ ನಾಹೋಸಿ ಅಹೋಸಿ ತುಚ್ಛಂ.

೩೧. ಬ್ಯಗ್ಘಚ್ಛಮಚ್ಛೋ ರಗಕುಚ್ಛಿಯಞ್ಹಿ,

ಮತಸ್ಸ ಮೇ ನತ್ಥಿ ಪಮಾಣಸಙ್ಖಾ;

ಏತಞ್ಹಿ ಭೋ ಅತ್ತನೋ ವಾ ಪರಸ್ಸ,

ಅತ್ಥಾಯ ನಾಹೋಸಿ ಅಹೋಸಿ ತುಚ್ಛಂ.

೩೨. ಏತಜ್ಜ ಮೇ ದುಚ್ಚ ಜ ಮತ್ತದಾನಂ,

ನ ಹೋತಿ ದೇವಿಸ್ಸರಿಯಾದಿಕಾಯ;

ಸಬ್ಬಞ್ಞುಭಾವಂ ಪನ ಪಾಪುಣಿತ್ವಾ,

ಸಂಸಾರತೋ ನಿತ್ತರಣಾಯ ಸತ್ತೇ.

೩೩. ತ್ವಂ ಸಮ್ಮ ಮಯ್ಹಂ ಬಹುಸೋ ಪಕಾರೀ,

ತಸ್ಮಾ ತವೇತಂ ವಚನಂ ಕರೋಮಿ;

ಅಸಂಕಿತೋ ದೇಸಯ ಮಯ್ಹಧಮ್ಮಂ,

ಸಮಿಜ್ಝತೇ ದಾನಿ ಮನೋರಥೋ ತೇತಿ.

ಏವಞ್ಚ ಪನ ವತ್ವಾ ಮಹಾಸತ್ತೋ ಪಬ್ಬತಮಾರುಯ್ಹ ಠಿತೋ ಆಹ, ಅಹಮಜ್ಜ ರಜ್ಜೇನ ಸದ್ಧಿಂ ಜೀವಿತಞ್ಚ ಸರೀರಮಂಸಞ್ಚ ಸದ್ಧಮ್ಮತ್ಥಾಯ ದಮ್ಮೀತಿ ಸೋಮನಸ್ಸಪ್ಪತ್ತೋ ಹುತ್ವಾ ಸಮ್ಮ ಧಮ್ಮಂ ದೇಸೇಹೀತಿ ವತ್ವಾ ತಸ್ಮಿಂ ಮಹಾದಾಠಂ ಮಹಾಮುಖಂ ವಿವರಿತ್ವಾ ಠಿತೇ ತಸ್ಸಾಭಿಮುಖೋ ಉಪಪತಿ. ಅಥ ಸಕ್ಕೋ ದೇವಾನಮಿನ್ದೋ ಸೋಮನಸ್ಸೋ ಅಚ್ಛರಿಯಪ್ಪತ್ತೋ ಅತ್ತಭಾವಂ ವಿಜಹಿತ್ವಾ ಅಲಙ್ಕತದಿಬ್ಬತ್ತಭಾವಂ ಮಾಪೇತ್ವಾ ಆಕಾಸೇ ತರುಣಸುರಿಯೋ ವಿಯ ಓಭಾಸಮಾನೋ ಆಕಾಸತೋ ಪತನ್ತಂ ಮಹಾಸತ್ತಂ ಉಭೋಹಿ ಹತ್ಥೇಹಿ ದಳ್ಹಂ ಪತಿಗಣ್ಹಿತ್ವಾ ದೇವಲೋಕಂ ನೇತ್ವಾ ಪಣ್ಡುಕಮ್ಬಲ ಸಿಲಾಸನೇ ನಿಸೀದಾಪೇತ್ವಾ ದಿಬ್ಬಮಯೇಹಿ ಗನ್ಧಮಾಲಾದೀಹಿ ಪೂಜೇತ್ವಾ ಸಯಂ ಧಮ್ಮಂ ಸುತ್ವಾ ಪಸನ್ನೋ ಪಸನ್ನಾಕಾರಂ ಕತ್ವಾ ಕಸ್ಸಪದಸಬಲೇನ ದೇಸಿತಾಯ ಅನಿಚ್ಚಾದಿಪರಿದೀಪಿಕಾಯ.

೩೪. ಅನಿಚ್ಚಾವ ತ ಸಙ್ಖಾರಾ, ಉಪ್ಪಾದವಯಧಮ್ಮಿನೋ;

ಉಪ್ಪಜ್ಜಿತ್ವಾ ನಿರುಜ್ಝನ್ತಿ, ತೇಸಂ ವೂಪಸಮೋ ಸುಖೋತಿ.

ಗಾಥಾಯ ಧಮ್ಮದೇಸನೇನ ತಸ್ಸ ಮನೋರಥಂ ಮತ್ಥಕಂ ಪಾಪೇತ್ವಾ ದೇವಲೋಕೇ ಮಹನ್ತಂ ಸಿರಿವಿಭವಂ ದಸ್ಸೇತ್ವಾ ಆನೇತ್ವಾ ಸಕರಜ್ಜೇಯೇವ ಪತಿಟ್ಠಾಪೇತ್ವಾ ಅಪ್ಪಮತ್ತೋ ಹೋತಿ ಮಹಾರಾಜಾತಿ ಓವದಿತ್ವಾ ದೇವಲೋಕಮೇವ ಅಗಮಾಸೀತಿ.

೩೫. ಇತಿ ಅಮಿತಸಿರಿಂ ವಾ ಜೀವಿತಂ ವಾಪಿ ಸನ್ತೋ,

ನ ಸುಮರಿಯ ಪಸತ್ಥಂ ಧಮ್ಮಮೇವಾ ಚರನ್ತಿ;

ತನುತರ ವಿಭವಾನಂ ಅಪ್ಪಮಾಯೂನಮಮ್ಭೋ,

ಇಹ ಕುಸಲಪಮಾದೋ ಕೋ ನು ತುಮ್ಹಾದಿಸಾನನ್ತಿ.

ಧಮ್ಮಸೋಣ್ಡಕವತ್ಥುಂ ಪಠಮಂ.

೨. ಮಿಗಲುದ್ದಕಸ್ಸ ವತ್ಥುಮ್ಹಿ ಅಯಮಾನುಪುಬ್ಬಿಕಥಾ

ಇತೋ ಕಿರ ಏಕ ತಿಂಸತಿಮೇ ಕಪ್ಪೇ ಸಿಖೀನಾಮ ಸಮ್ಮಾಸಮ್ಬುದ್ಧೋ ಸಮತಿಂಸ ಪಾರಮಿಯೋ ಪೂರೇತ್ವಾ ಪರಮಾತಿಸಮ್ಬೋಧಿಂ ಪತ್ವಾ ಸದೇವಕಂ ಲೋಕಂ ಸಂಸಾರಕನ್ತಾರಾ ಉತ್ತಾರೇನ್ತೋ ಧಮ್ಮರತನವಸ್ಸಂ ವಸ್ಸಾಪೇನ್ತೋ ಧಮ್ಮಭೇರಿಂಪಹರನ್ತೋ ಧಮ್ಮಕೇತುಂ ಉಸ್ಸಾಪೇನ್ತೋ ಏಕಸ್ಮಿಂ ಸಮಯೇ ವಿವೇಕ ಮನುಬ್ರೂಹನ್ತೋ ಅರಞ್ಞಾಯತನಂ ಪಾವಿಸಿ, ಪವಿಸಿತ್ವಾ ಚಪನ ಸುಪುಪ್ಫಿತನಾಗಪುನ್ನಾಗಾದಿನಾನಾತರುಸಣ್ಡಮಣ್ಡಿತೇ ಸುಫುಲ್ಲಸುಮನಮಾಲತಿಪ್ಪಭುತಿನಾನಾಲತಾಕುಲೇ ಅನೇಕವಿಧದಿಪದಚತುಪ್ಪದಸಙ್ಘನಿಸೇವಿತೇ ರಮಣೀಯೇ ಸೀತಲಸಿಲಾತಲೇ ಚತುಗ್ಗುಣಂ ಸಙ್ಘಾಟಿಂಪಞ್ಞಪೇತ್ವಾ ನಿಸೀದಿ ಛಬ್ಬಣ್ಣರಂಸೀಹಿ ದಿಸಂ ಪೂರಯನ್ತೋ, ತದಾ ತತ್ಥ ದೇವಬ್ರಹ್ಮನಾಗಸುಪಣ್ಣಾದಯೋ ಸನ್ನಿಪತಿತ್ವಾ ದಿಬ್ಬಮಯೇಹಿ ಗನ್ಧಮಾಲಾದೀಹಿ ಭಗವನ್ತಂ ಪೂಜಯಮಾನಾ ಥೋಮಯಮಾನಾ ನಮಸ್ಸಮಾನಾ ಅಟ್ಠಂಸು, ತಸ್ಮಿಂ ಪನಸಮಾಗಮೇ ಭಗವಾ ಮಧುರಸ್ಸರಂ ನಿಚ್ಛಾರೇನ್ತೋ ಬ್ರಹ್ಮಘೋಸೇನ ಚತುಸಚ್ಚಪಟಿಸಂಯುತ್ತಂ ಧಮ್ಮಂ ದೇಸೇತಿ ಅಮತವಸ್ಸಂ ವಸ್ಸಾಪೇನ್ತೋವಿಯ. ತದಾ ಏಕೋ ಮಿಗಲುದ್ದಕೋ ವನಂ ಪವಿಟ್ಠೋ ಮಿಗಸೂಕರೇ ಹನ್ತ್ವಾ ಮಂಸಂ ಖಾದನ್ತೋ ತಂ ಠಾನಂ ಪತ್ವಾ ಅದ್ದಸ ಭಗವನ್ತಂ ಧಮ್ಮಂ ದೇಸೇನ್ತಂ. ದಿಸ್ವಾ ಏಕಮನ್ತಂ ಠಿತೋ ಧಮ್ಮಂ ಸುತ್ವಾ ಚಿತ್ತಂ ಪಸಾದೇತ್ವಾ ತತೋ ಚುತೋ ದೇವಲೋಕೇ ನಿಬ್ಬತ್ತಿತ್ವಾ ಛಸು ಕಾಮಸಗ್ಗೇಸು ಮನುಸ್ಸೇಸುಚ ಅಪರಾಪರಂ ಇಸ್ಸರಿಯಂ ಅನುಭವನ್ತೋ ಇಮಸ್ಮಿಂ ಬುದ್ಧುಪ್ಪಾದೇ ಸಾವತ್ಥಿಯಂ ಕುಲಗೇಹೇ ನಿಬ್ಬತ್ತಿತ್ವಾ ವಿಞ್ಞುತಂ ಪತ್ತೋ ಭಗವತೋ ಸಾಸನೇ ಪಬ್ಬಜಿತ್ವಾ ಏಕದಿವಸಂ ಧಮ್ಮಂ ದೇಸೇನ್ತಸ್ಸ ಭಗವತೋ ಚತುಸಚ್ಚಪತಿ ಸಂಯುತ್ತಂ ಧಮ್ಮಕಥಂ ಸುತ್ವಾ ಚತುಪಟಿಸಮ್ಭಿದಾಹಿ ಅರಹತ್ತಂ ಪತ್ವಾ ಏಕದಿವಸಂ ಭಿಕ್ಖುಸಙ್ಘಮಜ್ಝಗತೋ ಅತ್ತನೋ ಕತಕಮ್ಮಪ್ಪಕಾಸನೇನ ಪೀತಿವಾಚಮುದಾಹರಿ.

೧. ಏ ಕ ತಿಂ ಸೇ ಇತೋ ಕಪ್ಪೇ,

ಲೋಕೇ ಉಪ್ಪಜ್ಜಿ ನಾಯಕೋ;

ಪತ್ತಿಂಸ ಲಕ್ಖಣಾತಿಣ್ಣೋ,

ಸಮ್ಬುದ್ಧೋ ಸ ಸಿಖೀವ್ಹಯೋ.

೨. ಜಲನ್ತೋ ದೀಪರುಕ್ಖೋವ, ಸೂರಿಯೋವ ನಭ ಮುಗ್ಗತೋ;

ಮೇರುರಾಜಾವ ಸಮ್ಬುದ್ಧೋ, ಜನೇಸಗ್ಗೋ ಪತಾಪವಾ.