೧೦. ರೂಪದೇವಿಯಾ ವತ್ಥುಮ್ಹಿ ಅಯಮಾನುಪುಬ್ಬೀಕಥಾ

ಅತೀತೇ ಕಿರ ವಿಪಸ್ಸಿಸ್ಸ ಭಗವತೋ ಕಾಲೇ ತಸ್ಮಿಂ ನಗರೇ ಏಕಾ ಗಾಮದಾರಿಕಾ ವಿಹಾರೇ ಆಹಿಣ್ಡನ್ತೀ ಏಕಂ ಗಿಲಾನಭಿಕ್ಖುಂ ದಿಸ್ವಾ ಕಮ್ಪಮಾನಹದಯಾ ಉಪಸಙ್ಕಮಿತ್ವಾ ವನ್ದಿತ್ವಾ ಭನ್ತೇ ಕೋತೇ ಆಬಾಧೋ ಸರೀರಂ ಪೀಳೇತೀತಿ ಪುಚ್ಛಿ. ತೇನಾಪಿ ಭಗಿನಿ ಖರಾಬಾಧೋ ಮೇ ಪೀಳೇತೀತಿ ವುತ್ತೇ ಸಾ ತೇನಹಿ ಭನ್ತೇ ಅಹಂ ತಂ ರೋಗಂ ವೂಪಸಮೇಸ್ಸಾಮೀತಿ ನಿಮನ್ತೇತ್ವಾ ಗೇಹಂ ಗನ್ತ್ವಾ ತಂ ಪವತ್ತಿಂ ಮಾತಾಪಿತುನ್ನಂ ಕಥೇತ್ವಾ ತೇಹಿ ಅನುಞ್ಞಾತಾ ಪುನ ದಿವಸೇ ನಾನಗ್ಗರಸೇನ ಭೇಸಜ್ಜಾಹಾರಂ ಸಮ್ಪಾದೇಸಿ, ತತೋ ಸೋ ಭಿಕ್ಖು ಪುನದಿವಸೇ ಚೀವರಂ ಪಾರುಪಿತ್ವಾ ಭಿಕ್ಖಾಯ ಚರನ್ತೋ ತಸ್ಸಾ ಗೇಹಂ ಗನ್ತ್ವಾ ಅಟ್ಠಾಸಿ. ಸಾ ಥೇರಂ ಆಗತಂ ದಿಸ್ವಾ ಸೋಮನಸ್ಸಜಾತಾ ಪತ್ತಂ ಗಹೇತ್ವಾ ಆಸನಂ ಪಞ್ಞಾಪೇತ್ವಾ ಅದಾಸಿ. ತತ್ಥ ನಿಸಿನ್ನಂ ತಂ ಆಹಾರೇನ ಸಾಧುಕಂ ಪರಿವಿಸಿತ್ವಾ ಸಕ್ಕಾರ ಮಕಾಸಿ. ಅಥಸ್ಸಾ ಸದ್ಧಾಬಲೇನ ಭುತ್ತಮತ್ತೇಯೇವ ಸೋ ಆಬಾಧೋ ವೂಪಸಮಿ. ತತೋ ಸೋ ವೂಪಸನ್ತರೋಗೋ ದುತಿಯದಿವಸೇ ತಸ್ಸಾ ಗೇಹಂ ನಾ ಗಮಾಸಿ. ಅಥ ಸಾ ವಿಹಾರಂ ಗನ್ತ್ವಾ ತಂ ವನ್ದಿತ್ವಾ ಕಸ್ಮಾನಾಗತತ್ಥಾತಿ ಪುಚ್ಛಿತ್ವಾ ತೇನ ಮೇ ಭಗಿನಿ ಬ್ಯಾಧಿ ವೂಪಸಮಿ, ತಸ್ಮಾ ನಾಗತೋಸ್ಮೀತಿ ವುತ್ತೇ ಸಾ ಸಾಧು ಭನ್ತೇತಿ ಸೋಮನಸ್ಸಜಾತಾ ಗೇಹಮೇವ ಅಗಮಾಸಿ. ಸಾ ತೇನ ಪುಞ್ಞಕಮ್ಮೇನ ಕಾಲಂ ಕತ್ವಾ ದೇವಲೋಕೇ ನಿಬ್ಬತ್ತಿ. ತಸ್ಸಾ ತತ್ಥ ದ್ವಾದಸಯೋಜನಿಕಂ ಕನಕವಿಮಾನಂ ನಿಬ್ಬತ್ತಿ. ಸಾ ತತ್ಥ ದೇವಿಸ್ಸರಿಯಂ ಅನುಭವನ್ತೀ ಛಬುದ್ಧನ್ತರಂ ಖೇಪೇತ್ವಾ ಅಮ್ಹಾಕಂ ಭಗವತೋ ಕಾಲೇ ಜಮ್ಬುದೀಪೇ ದೇವಪುತ್ತನಗರೇ ಉದಿಚ್ಚಬ್ರಹ್ಮಣಕುಲೇ ಜೇಟ್ಠಬ್ರಾಹ್ಮಣಸ್ಸ ಭರಿಯಾಯ ಕುಚ್ಛಿಮ್ಹಿ ಪಟಿಸನ್ಧಿಂ ಗಣ್ಹಿ, ಸಾ ಪರಿಪಾಕ ಮನ್ವಾಯ ಮಾತುಕುಚ್ಛಿತೋ ನಿಕ್ಖಮಿ. ತಸ್ಸಾ ಮಾತುಕುಚ್ಛಿತೋ ನಿಕ್ಖನ್ತಕಾಲತೋ ಪಟ್ಠಾಯ ದಿವಸೇ ದಿವಸೇ ಅಟ್ಠಟ್ಠನಾಲಿಮತ್ತಂ ತಣ್ಡುಲಂ ನಿಬ್ಬತ್ತತಿ. ತಸ್ಸಾ ರೂಪಸಮ್ಪತ್ತಿಂ ದಿಸ್ವಾ ಪಸನ್ನಾ ಮಾತಾಪಿತರೋ ರೂಪದೇವೀತಿ ನಾಮ ಮಕಂಸು. ಪಚ್ಛಾ ತಂ ಪತಿರೂಪೇನ ದಾರಕೇನ ನಿಯೋಜೇಸುಂ. ಅಥಸ್ಸಾ ತಣ್ಡುಲ- ನಾಲಿಮತ್ತಂ ಗಹೇತ್ವಾ ಪಚಿತುಂ ಆರದ್ಧೇ ಇಚ್ಛಿತಿಚ್ಛಿತಮಂಸಾದಿಬ್ಯಞ್ಜನಞ್ಜ ಸಪ್ಪಿನವನೀತದಧಿಖೀರಾದಿಗೋರಸಞ್ಚ ಜೀರಮರಿಚಾದಿಕಟುಕಭಣ್ಡಞ್ಚ ಕದಲಿಪನಸಮಧುಗುಳಾದಿಉಪಕರಣಞ್ಚ ಭಾಜನಾನಿ ಪೂರೇತ್ವಾ ನಿಬ್ಬತ್ತತಿ, ತಾಯ ಹತ್ಥೇನ ಗಹಿತಂ ಕಿಞ್ಚಿ ಖಾದನೀಯಂ ಭೋಜನೀಯಂವಾ ಪೂತಿಭಾವಂ ನ ಗಚ್ಛತಿ, ಭತ್ತುಕ್ಖಲಿಂ ಗಹೇತ್ವಾ ಸಕಲನಗರವಾಸಿನೋ ಭೋಜೇನ್ತಿಯಾಪಿ ಏಕಕಟಚ್ಛುಮತ್ತಂ ಭತ್ತಂ ಗಹಿತಟ್ಠಾನಂ ನ ಪಞ್ಞಾಯತಿ. ಏವಂ ಅಪರಿಕ್ಖಯಪುಞ್ಞಾ ಅಹೋಸಿ, ಸಕಲದೇವಪುತ್ತನಗರೇ ಚನ್ದಸುರಿಯಾವ ಪಾಕಟಾ ಅಹೋಸಿ, ಅಥ ಸಾ ಪಞ್ಚಸತಭಿಕ್ಖೂ ನಿಮನ್ತೇತ್ವಾ ನಿಚ್ಚಂ ಸಕನಿವೇಸನೇಯೇವ ಭೋಜೇತಿ, ತದಾ ತೇಸಂ ಅನ್ತರೇ ಪಟಿಸಮ್ಭಿದಾಪತ್ತೋ ಮಹಾಸಙ್ಘರಕ್ಖಿತತ್ಥೇರೋನಾಮ ಇಮಿಸ್ಸಾ ಪುಞ್ಞಾನುಭಾವಂ ದಿಬ್ಬಚಕ್ಖುನಾ ದಿಸ್ವಾ ನ ಜಾನಾತಿ ಏಸಾ ಅತ್ಥನಾ ಪುಬ್ಬೇ ಕತಕಮ್ಮಂ. ಯನ್ನೂನಾಹಂ ಅಸ್ಸಾ ಪಕಾಸೇಯ್ಯನ್ತಿ ಏಕದಿವಸಂ ತಸ್ಸಾ ನಿವೇಸನೇ ಭುಞ್ಜಿತ್ವಾ ಅನುಮೋದನಂ ಕರೋನ್ತೋ ಜಾನಾಸಿ ಭಗಿನಿ ತಯಾ ಪುಬ್ಬೇ ಕತಕಮ್ಮನ್ತಿ ಪುಚ್ಛಿ, ನ ಜಾನಾಮಿ ಭನ್ತೇ. ಸೋತುಮಿಚ್ಛಾಮೀತಿ, ಅಥಸ್ಸಾ ಸೋ ಪುಬ್ಬಕಮ್ಮಂ ಪಕಾಸೇನ್ತೋ.

೧. ಏಕನವುತೇ ಇತೋ ಕಪ್ಪೇ,

ವಿಪಸ್ಸೀನಾಮ ನಾಯಕೋ;

ಅಹೋಸಿ ಲೋಕೇ ಲೋಕೇಕ,

ನಾಯಕೋ ಛಿನ್ನಬನ್ಧನೋ.

೨. ತದಾ ತಸ್ಮಿಂ ಪುರೇ ರಮ್ಮೇ, ಆಸಿ ತ್ವಂ ಗಾಮದಾರಿಕಾ;

ಆಹಿಣ್ಡನ್ತೀ ವಿಹಾರಸ್ಮಿಂ, ಅದ್ದಕ್ಖಿ ಜಿನಸಾವಕಂ.

೩. ರೋಗಾತುರಂ ಕಿಸಂ ಪಣ್ಡುಂ, ಅಸ್ಸಸನ್ತಂ ಮುಹುಂ ಮುಹುಂ;

ದಿಸ್ವಾನ ಕಮ್ಪಿತಾ ಚಿತ್ತಾ, ನಿಮನ್ತೇತ್ವಾನ ತಂ ಮುನಿಂ.

೪. ಭೇಸಜ್ಜಞ್ಚೇವ ಭತ್ತಞ್ಚ, ಅದಾ ತ್ವಂ ತೇನ ಸೋ ಯತಿ;

ಅಬ್ಯಾಬಾಧೋ ಅನೀಘೋಚ, ಅಹೋಸಿ ಅನುಪದ್ದವೋ.

೫. ತತೋ ತ್ವಂ ತೇನ ಕಮ್ಮೇನ, ಸುಕತೇನ ತತೋ ಚುತಾ;

ಜಾತಾಸಿ ದೇವಲೋಕಸ್ಮಿಂ, ಸಬ್ಬಕಾಮಸಮಿದ್ಧಿನೀ.

೬. ತತ್ಥ ತೇ ಪುಞ್ಞತೇಜೇನ, ಪಾಸಾದೋ ರತನಾಮಯೋ;

ಮಣಿಥೂಪಿಸತಾಕಿಣ್ಣೋ, ಕೂಟಾಗಾರೇಹಿ ಲಙ್ಕತೋ.

೭. ನೇಕಗಬ್ಭಸತಾಕಿಣ್ಣೋ, ಸಯನಾಸನಮಣ್ಡಿತೋ;

ಅಚ್ಛರಾಸತಸಂಕಿಣ್ಣೋ, ನಚ್ಚಗೀತಾದಿಸಂಕುಲೋ.

೮. ರಮ್ಭಾಮ್ಬಜಮ್ಬುಸನ್ನೀರ, ಪೂಗಪುನ್ನಾಗಪಾಟಲೀ;

ನಾಗಾದಿತರುಸಣ್ಡೇಹಿ, ಮಣ್ಡಿತುಯ್ಯಾನಪನ್ತಿಹಿ.

೯. ಪದುಮುಪ್ಪಲಕಳಾರ, ಕುನ್ದಕಾನನಮಣ್ಡಿತೇ;

ಮಧುಮತ್ತಾಲಿಪಾಲೀಹಿ, ಸಾರಸೀಸರಸಂಕುಲೇ.

೧೦. ದೇವಪುತ್ತೇಹಿ ನೇಕೇಹಿ, ತಥಾ ದೇವಚ್ಛರಾಹಿಚ;

ನಿಚ್ಚುಸ್ಸವೇ ಮಹಾಭೋಗೇ, ವಿಮಾನೇ ಮನನನ್ದನೇ.

೧೧. ತ್ವಮೇವಂ ದೇವಲೋಕಮ್ಹಿ, ವಿನ್ದಮಾನಾ ಮಹಾಯಸಂ;

ಅದ್ಧಾನಂ ವೀತಿನಾಮೇತ್ವಾ, ನಿಬ್ಬುತೇ ಗೋತಮೇ ಜಿನೇ.

೧೨. ಜಮ್ಬುದೀಪೇ ಇದಾನಿ ತ್ವಂ, ನಿಬ್ಬತ್ತಾ ಉದಿತೇ ಕುಲೇ;

ಪುಞ್ಞಪಞ್ಞಾಗುಣಾವಾಸಾ, ರೂಪೇನಗ್ಗಾ ಪಿಯಂವದಾ.

೧೩. ಏತಂ ತೇ ದೇವಲೋಕಸ್ಮಿಂ, ದೇವಿಸ್ಸರಿಯಮಬ್ಭುತಂ,

ಇಮಂ ತೇ ಇಧ ಲೋಕಸ್ಮಿಂ, ಸಬ್ಬಂ ಮಾನುಸಿಕಂ ಸುಖಂ.

೧೪. ವಿಪಸ್ಸಿಮುನಿನೋ ಕಾಲೇ, ತ್ವಂ ತಸ್ಸೇಕಸ್ಸ ಭಿಕ್ಖುನೋ;

ಅದಾ ದಾನಂ ಗಿಲಾನಸ್ಸ, ತಸ್ಸ ತಂ ಫಲಮೀದಿಸಂ.

೧೫. ಕಾತಬ್ಬಞ್ಹಿ ಸದಾ ಪುಞ್ಞಂ, ಇಚ್ಛನ್ತೇನ ಸುಖಪ್ಪದಂ;

ತಸ್ಮಾ ತ್ವಂ ಸಬ್ಬದಾ ಭದ್ದೇ, ಉಸ್ಸುಕ್ಕಾ ಕುಸಲೇ ಭವಾತಿ.

ಏವಂ ಸೋ ತಸ್ಸ ಪುರಿಮತ್ತಭಾವೇ ಕತಕಮ್ಮಂ ಪಕಾಸೇತ್ವಾ ಇದಾನಿ ಪುಞ್ಞಕಮ್ಮೇ ಅಪ್ಪಮಾದಾ ಭವಾತಿ ಅನುಸಾಸಿ. ಸಾ ಥೇರಸ್ಸ ಧಮ್ಮದೇಸನಂ ಸುತ್ವಾ ಪರಮಸೋಮನಸ್ಸಾ ತತೋ ಪಟ್ಠಾಯ ದಾನಾದೀಸು ನಿರತಾ ಪುಞ್ಞಾನಿ ಕರೋನ್ತೀ ತೇನೇವ ಸೋಮನಸ್ಸೇನ ಸೋತಾಪನ್ನಾ ಅರಿಯಸಾವಿಕಾ ಅಹೋಸೀತಿ.

೧೬. ಇತಿ ತರುಣಕುಮಾರೀ ಪುಞ್ಞಕಮ್ಮೇಸು ಸಾರಂ,

ಅವಿದಿತಗುಣಮತ್ತಾ ದತ್ವ ಭಿಕ್ಖುಸ್ಸ ದಾನಂ;

ದಿವಿಮನುಜಸುಖಂ ಸಾಲತ್ಥ ತುಮ್ಹೇ ಭವನ್ತಾ,

ವಿದಿತಕುಸಲಪಾಕಾ ಕಿಂ ನ ಲಬ್ಭೇಥ ಸನ್ತಿಂ.

ರೂಪದೇವಿಯಾ ವತ್ಥುಂ ದಸಮಂ.

ಧಮ್ಮಸೋಣ್ಡಕವಗ್ಗೋ ಪಥಮೋ.