೧. ಕಮ್ಬಕ್ಖನ್ಧಕ

ಪುಚ್ಛಾ – ಭಣ್ಡನಾದಿಕಾರಕಸ್ಸ ಆವುಸೋ ಭಿಕ್ಖುನೋ ತಜ್ಜನೀಯಕಮ್ಮಂ ಕಾತುಂ ಭಗವತಾ ಕತ್ಥ ಅನುಞ್ಞಾತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಅನುಞ್ಞಾತಂ.

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಪಣ್ಡುಕಲೋಹಿತಕೇ ಭಿಕ್ಖೂ ಆರಬ್ಭ ಅನುಞ್ಞಾತಂ, ಪಣ್ಡುಕಲೋಹಿತಕಾ ಭನ್ತೇ ಭಿಕ್ಖೂ ಅತ್ತನಾ ಭಣ್ಡನಕಾರಕಾ ಕಲಹಕಾರಕಾ ವಿವಾದಕಾರಕಾ ಭಸ್ಸಕಾರಕಾ ಸಙ್ಘೇ ಅಧಿಕರಣಕಾರಕಾ, ಯೇಪಿ ಚಞ್ಞೇ ಭಿಕ್ಖೂ ಭಣ್ಡನಕಾರಕಾ ಕಲಹಕಾರಕಾ ವಿವಾದಕಾರಕಾ ಭಸ್ಸಕಾರಕಾ ಸಙ್ಘೇ ಅಧಿಕರಣಕಾರಕಾ ತೇ ಉಪಸಙ್ಕಮಿತ್ವಾ ಏವಮಾಹಂಸು ‘‘ಮಾ ಖೋ ತುಮ್ಹೇ ಆಯಸ್ಮನ್ತೋ ಏಸೋ ಅಜೇಸಿ, ಬಲವಾಬಲವಂ ಪಟಿಮನ್ತೇಥ, ತುಮ್ಹೇ ತೇನ ಪಣ್ಡಿತತರಾ ಚ ಬ್ಯತ್ತತರಾ ಚ ಬಹುಸ್ಸುತತರಾ ಚ ಅಲಮತ್ತತರಾ ಚ, ಮಾ ಚಸ್ಸ ಭಾಯಿತ್ಥ, ಮಯಮ್ಪಿ ತುಮ್ಹಾಕಂ ಪಕ್ಖಾ ಭವಿಸ್ಸಾಮಾ’’ತಿ, ತೇನ ಅನುಪ್ಪನ್ನಾನಿ ಚೇವ ಭಣ್ಡನಾನಿ ಉಪ್ಪಜ್ಜನ್ತಿ, ಉಪ್ಪನ್ನಾನಿ ಚ ಭಣ್ಡನಾನಿ ಭಿಯ್ಯೋಭಾವಾಯ ವೇಪುಲ್ಲಾಯ ಸಂವತ್ತನ್ತಿ. ತಸ್ಮಿಂ ಭನ್ತೇ ವತ್ಥುಸ್ಮಿಂ ಅನುಞ್ಞಾತಂ.

ಪುಚ್ಛಾ – ತಜ್ಜನೀಯಕಮ್ಮಕತಸ್ಸ ಆವುಸೋ ಭಿಕ್ಖುನೋ ಕತಿಸು ವತ್ತೇಸು ಸಮ್ಮಾ ವತ್ತನ್ತಸ್ಸ ತಂ ಕಮ್ಮಂ ಪಟಿಪ್ಪಸ್ಸಮ್ಭೇತುಂ ಭಗವತಾ ಕತ್ಥ ಅನುಞ್ಞಾತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಅನುಞ್ಞಾತಂ.

ವಿಸ್ಸಜ್ಜನಾ – ಅಟ್ಠಾರಸಸು ಭನ್ತೇ ವತ್ತೇಸು ಸಮ್ಮಾ ವತ್ತನ್ತಸ್ಸ ತಜ್ಜನೀಯಕಮ್ಮಕತಸ್ಸ ಭಿಕ್ಖುನೋ ತಂ ಕಮ್ಮಂ ಪಟಿಪ್ಪಸ್ಸಮ್ಭೇತುಂ ಭಗವತಾ ಸಾವತ್ಥಿಯಂ ಅನುಞ್ಞಾತಂ, ತೇಯೇವ ಪಣ್ಡುಕಲೋಹಿತಕಾ ಭಿಕ್ಖೂ ಸಙ್ಘೇನ ತಜ್ಜನೀಯಕಮ್ಮಕತಾ ಸಮ್ಮಾ ವತ್ತಿತ್ವಾ ಸಙ್ಘಂ ಉಪಸಙ್ಕಮಿತ್ವಾ ಯಾಚಿಂಸು, ತಸ್ಮಿಂ ಭನ್ತೇ ವತ್ಥುಸ್ಮಿಂ ಅನುಞ್ಞಾತಂ.

ಪುಚ್ಛಾ – ಬಾಲಸ್ಸ ಆವುಸೋ ಅಬ್ಯತ್ತಸ್ಸ ಆಪತ್ತಿಬಹುಲಸ್ಸ ಅನಪದಾನಸ್ಸ ಗಿಹಿಸಂಸಟ್ಠಸ್ಸ ಅನನುಲೋಮಿಕೇಹಿ ಗಿಹಿಸಂಸಗ್ಗೇಹಿ ನಿಯಸ್ಸಕಮ್ಮಂ ಕಾತುಂ ಕತ್ಥ ಪಞ್ಞತ್ತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಆಯಸ್ಮನ್ತಂ ಸೇಯ್ಯಸಕಂ ಆರಬ್ಭ ಪಞ್ಞತ್ತಂ, ಆಯಸ್ಮಾ ಭನ್ತೇ ಸೇಯ್ಯಸಕೋ ಬಾಲೋ ಅಹೋಸಿ ಅಬ್ಯತ್ತೋ ಆಪತ್ತಿಬಹುಲೋ ಅನಪದಾನೋ ಗಿಹಿಸಂಸಟ್ಠೋ ವಿಹಾಸಿ ಅನನುಲೋಮಿಕೇಹಿ ಗಿಹಿಸಂಸಗ್ಗೇಹಿ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ.

ಪುಚ್ಛಾ – ನಿಯಸ್ಸಕಮ್ಮಕತಸ್ಸ ಆವುಸೋ ಭಿಕ್ಖುನೋ ಕತಿಸು ವತ್ತೇಸು ಸಮ್ಮಾ ವತ್ತನ್ತಸ್ಸ ತಂ ಕಮ್ಮಂ ಪಟಿಪ್ಪಸ್ಸಮ್ಭೇತುಂ ಭಗವತಾ ಅನುಞ್ಞಾತಂ.

ವಿಸ್ಸಜ್ಜನಾ – ಅಟ್ಠಾರಸಸು ಭನ್ತೇ ವತ್ತೇಸು ಸಮ್ಮಾ ವತ್ತನ್ತಸ್ಸ ನಿಯಸ್ಸ ಕಮ್ಮಕತಸ್ಸ ಭಿಕ್ಖುನೋ ತಂ ಕಮ್ಮಂ ಪಟಿಪ್ಪಸ್ಸಮ್ಭೇತುಂ ಭಗವತಾ ಅನುಞ್ಞಾತಂ, ನ ಉಪಸಮ್ಪಾದೇತಬ್ಬಂ, ನ ನಿಸ್ಸಯೋ ದಾತಬ್ಬೋ, ನ ಸಾಮಣೇರೋ ಉಪಟ್ಠಾಪೇತಬ್ಬೋ, ನ ಭಿಕ್ಖುನೋವಾದಕಸಮ್ಮುತಿ ಸಾದಿತಬ್ಬಾ, ಸಮ್ಮತೇನಪಿ ಭಿಕ್ಖುನಿಯೋ ನ ಓವದಿತಬ್ಬಾ, ಏವಮಾದೀಸು ಭನ್ತೇ ಅಟ್ಠಾರಸಸು ವತ್ತೇಸು ಸಮ್ಮಾ ವತ್ತನ್ತಸ್ಸ ನಿಯಸ್ಸಕಮ್ಮಕತಸ್ಸ ಭಿಕ್ಖುನೋ ತಂ ಕಮ್ಮಂ ಪಟಿಪ್ಪಸ್ಸಮ್ಭೇತುಂ ಭಗವತಾ ಅನುಞ್ಞಾತಂ.

ಪುಚ್ಛಾ – ಕುಲದೂಸಕಸ್ಸ ಆವುಸೋ ಪಾಪಸಮಾಚಾರಸ್ಸ ಭಿಕ್ಖುನೋ ಪಬ್ಬಾಜನೀಯಕಮ್ಮಂ ಕಾತುಂ ಭಗವತಾ ಕತ್ಥ ಅನುಞ್ಞಾತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಅನುಞ್ಞಾತಂ.

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಅಸ್ಸಜಿಪುನಬ್ಬಸುಕೇ ಭಿಕ್ಖೂ ಆರಬ್ಭ ಅನುಞ್ಞಾತಂ, ಅಸ್ಸಜಿಪುನಬ್ಬಸುಕಾ ಭನ್ತೇ ಭಿಕ್ಖೂ ಕೀಟಾಗಿರಿಸ್ಮಿಂ ಕುಲದೂಸಕಾ ಅಹೇಸುಂ ಪಾಪಸಮಾಚಾರಾ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಅನುಞ್ಞಾತಂ.

ಪುಚ್ಛಾ – ಪಟಿಸಾರಣೀಯಕಮ್ಮಂ ಆವುಸೋ ಪುಚ್ಛಾಮಿ, ಸದ್ಧಂ ಆವುಸೋ ಪಸನ್ನಂ ಗಹಪತಿಂ ದಾಯಕಂ ಕಾರಕಂ ಸಙ್ಘುಪಟ್ಠಾಕಂ ಹೀನೇನ ಖುಂಸೇನ್ತಸ್ಸ ಭಿಕ್ಖುನೋ ಪಟಿಸಾರಣೀಯಕಮ್ಮಂ ಕಾತುಂ ಭಗವತಾ ಕತ್ಥ ಅನುಞ್ಞಾತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಅನುಞ್ಞಾತಂ.

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಆಯಸ್ಮನ್ತಂ ಸುಧಮ್ಮಂ ಆರಬ್ಭ ಅನುಞ್ಞಾತಂ, ಭಗವತಿ ಭನ್ತೇ ಸಾವತ್ಥಿಯಂ ವಿಹರತಿ ಆಯಸ್ಮಾ ಸುಧಮ್ಮೋ ಮಚ್ಛಿಕಾಸಣ್ಡೇ ಚಿತ್ತಂ ಗಹಪತಿಂ ಸದ್ಧಂ ಪಸನ್ನಂ ದಾಯಕಂ ಕಾರಕಂ ಸಙ್ಘುಪಟ್ಠಾಕಂ ಹೀನೇನ ಖುಂಸೇಸಿ ಹೀನೇನ ವಮ್ಭೇಸಿ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಅನುಞ್ಞಾತಂ.

ತೇನಹಿ ಭಿಕ್ಖವೇ ಸಙ್ಘೋ ಸುಧಮ್ಮಸ್ಸ ಭಿಕ್ಖುನೋ ಪಟಿಸಾರಣೀಯಕಮ್ಮಂ ಕರೋತು ‘‘ಚಿತ್ತೋ ತೇ ಗಹಪತಿ ಖಮಾಪೇತಬ್ಬೋ’’ತಿ –

ಪುಚ್ಛಾ – ಪಟಿಸಾರಣೀಯಕಮ್ಮಕತಸ್ಸ ಆವುಸೋ ಭಿಕ್ಖುನೋ ಅನುದೂತಂ ದಾತುಞ್ಚ ತೇನ ಅನುದೂತೇನ ಸದ್ಧಿಂ ಗನ್ತ್ವಾ ಯಥಾಖುಂಸಿತಂ ಗಹಪತಿಂ ಖಮಾಪೇತುಂ ಚ ಭಗವತಾ ಕತ್ಥ ಅನುಞ್ಞಾತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಅನುಞ್ಞಾತಂ.

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಆಯಸ್ಮನ್ತಂಯೇವ ಸುಧಮ್ಮಂ ಆರಬ್ಭ ಅನುಞ್ಞಾತಂ, ಆಯಸ್ಮಾ ಭನ್ತೇ ಸುಧಮ್ಮೋ ಮಚ್ಛಿಕಾಸಣ್ಡಂ ಗನ್ತ್ವಾ ಮಙ್ಕುಭೂತೋ ನಾಸಕ್ಖಿ ಚಿತ್ತಂ ಗಹಪತಿಂ ಖಮಾಪೇತುಂ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಅನುಞ್ಞಾತಂ.

ಪುಚ್ಛಾ – ಪಟಿಸಾರಣೀಯಕಮ್ಮಕತಸ್ಸ ಆವುಸೋ ಭಿಕ್ಖುನೋ ಕತಿಸು ವತ್ತೇಸು ಸಮ್ಮಾ ವತ್ತನ್ತಸ್ಸ ತಂ ಕಮ್ಮಂ ಪಟಿಪ್ಪಸ್ಸಮ್ಭೇತುಂ ಭಗವತಾ ಅನುಞ್ಞಾತಂ.

ವಿಸ್ಸಜ್ಜನಾ – ಅಟ್ಠಾರಸಸು ಭನ್ತೇ ವತ್ತೇಸು ಸಮ್ಮಾ ವತ್ತನ್ತಸ್ಸ ಪಟಿಸಾರಣೀಯ ಕಮ್ಮಕತಸ್ಸ ಭಿಕ್ಖುನೋ ತಂ ಕಮ್ಮಂ ಪಟಿಪ್ಪಸ್ಸಮ್ಭೇತುಂ ಭಗವತಾ ಅನುಞ್ಞಾತಂ.

ಪುಚ್ಛಾ – ಆಪತ್ತಿಂ ಆವುಸೋ ಆಪಜ್ಜಿತ್ವಾ ತಂ ಆಪತ್ತಿಂ ಪಸ್ಸಿತುಂ ವಾ ಪಟಿಕಾತುಂ ವಾ ನ ಇಚ್ಛನ್ತಸ್ಸ ಭಿಕ್ಖುನೋ ಆಪತ್ತಿಯಾ ಅದಸ್ಸನೇ ವಾ ಅಪ್ಪಟಿಕಮ್ಮೇ ವಾ ಉಕ್ಖೇಪನೀಯಕಮ್ಮಂ ಕಾತುಂ ಭಗವತಾ ಕತ್ಥ ಪಞ್ಞತ್ತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ಕೋಸಮ್ಬಿಯಂ ಭನ್ತೇ ಆಯಸ್ಮನ್ತಂ ಛನ್ನತ್ಥೇರಂ ಆರಬ್ಭ ಪಞ್ಞತ್ತಂ, ಆಯಸ್ಮಾ ಭನ್ತೇ ಛನ್ನೋ ಆಪತ್ತಿಂ ಆಪಜ್ಜಿತ್ವಾ ನ ಇಚ್ಛಿ ತಂ ಆಪತ್ತಿಂ ಪಸ್ಸಿತುಂ ವಾ ಪಟಿಕಾತುಂ ವಾ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ.

ಪುಚ್ಛಾ – ಆಪತ್ತಿಯಾ ಆವುಸೋ ಅದಸ್ಸನೇನ ವಾ ಅಪ್ಪಟಿಕಮ್ಮೇ ವಾ ಉಕ್ಖೇಪನೀಯ ಕಮ್ಮಕತೇನ ಭಿಕ್ಖುನಾ ಕತಿಸು ವತ್ತೇಸು ಸಮ್ಮಾ ವತ್ತಿತಬ್ಬಂ.

ವಿಸ್ಸಜ್ಜನಾ – ತೇಚತ್ತಾಲೀಸಾಯ ಭನ್ತೇ ವತ್ತೇಸು ಸಮ್ಮಾ ವತ್ತಿತಬ್ಬಂ.

ಪುಚ್ಛಾ – ಉಕ್ಖೇಪನೀಯಕಮ್ಮಕತಸ್ಸ ಆವುಸೋ ಭಿಕ್ಖುನೋ ಸಮ್ಮಾ ವತ್ತನ್ತಸ್ಸ ತಂ ಕಮ್ಮಂ ಪಟಿಪ್ಪಸ್ಸಮ್ಭೇತುಂ ಭಗವತಾ ಕತ್ಥ ಅನುಞ್ಞಾತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಅನುಞ್ಞಾತಂ.

ವಿಸ್ಸಜ್ಜನಾ – ಕೋಸಮ್ಬಿಯಂ ಭನ್ತೇ ಆಯಸ್ಮನ್ತಂಯೇವ ಛನ್ನಂ ಆರಬ್ಭ ಅನುಞ್ಞಾತಂ, ಆಯಸ್ಮಾ ಭನ್ತೇ ಛನ್ನೋ ಸಙ್ಘೇನ ಆಪತ್ತಿಯಾ ಅದಸ್ಸನೇ ವಾ ಅಪ್ಪಟಿಕಮ್ಮೇ ವಾ ಉಕ್ಖೇಪನೀಯಕಮ್ಮಕತೋ ಸಮ್ಮಾ ವತ್ತೇಸಿ ಲೋಮಂಪಾತೇಸಿ ನೇತ್ಥಾರಂ ವತ್ತೇಸಿ ಸಙ್ಘಂ ಉಪಸಙ್ಕಮಿತ್ವಾ ತಸ್ಸ ಕಮ್ಮಸ್ಸ ಪಟಿಪ್ಪಸ್ಸದ್ಧಿಯಾ ಯಾಚಿ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಅನುಞ್ಞಾತಂ.

ಪುಚ್ಛಾ – ಪಾಪಿಕಂ ಆವುಸೋ ದಿಟ್ಠಿಂ ಗಹೇತ್ವಾ ತಂ ದಿಟ್ಠಿಂ ನ ಪಟಿನಿಸ್ಸಜ್ಜನ್ತಸ್ಸ ಪಾಪಿಕಾಯ ದಿಟ್ಠಿಯಾ ಅಪ್ಪಟಿನಿಸ್ಸಗ್ಗೇ ಉಕ್ಖೇಪನೀಯಕಮ್ಮಂ ಕಾತುಂ ಭಗವತಾ ಕತ್ಥ ಪಞ್ಞತ್ತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಅರಿಟ್ಠಂ ಭಿಕ್ಖುಂ ಗದ್ಧಬಾಧಿಪುಬ್ಬಂ ಆರಬ್ಭ ಪಞ್ಞತ್ತಂ, ಭಗವತಿ ಭನ್ತೇ ಸಾವತ್ಥಿಯಂ ವಿಹರತಿ ಅರಿಟ್ಠಸ್ಸ ನಾಮ ಭಿಕ್ಖುನೋ ಗದ್ಧಬಾಧಿಪುಬ್ಬಸ್ಸ ಏವರೂಪಂ ಪಾಪಕಂ ದಿಟ್ಠಿಗತಂ ಉಪ್ಪನ್ನಂ ಅಹೋಸಿ ‘‘ತಥಾಹಂ ಭಗವತಾ ಧಮ್ಮಂ ದೇಸಿತಂ ಆಜಾನಾಮಿ, ಯಥಾಯೇಮೇ ಅನ್ತರಾಯಿಕಾ ಧಮ್ಮಾ ವುತ್ತಾ ಭಗವತಾ, ತೇ ಪಟಿಸೇವತೋ ನಾಲಂ ಅನ್ತರಾಯಾಯಾ’’ತಿ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ.

ಪುಚ್ಛಾ – ಪಾಪಿಕಾಯ ಆವುಸೋ ದಿಟ್ಠಿಯಾ ಅಪ್ಪಟಿನಿಸ್ಸಗ್ಗೇ ಉಕ್ಖೇಪನೀಯಕಮ್ಮಕತೇನ ಭಿಕ್ಖುನಾ ಕತಿಸು ವತ್ತೇಸು ಸಮ್ಮಾ ವತ್ತಿತಬ್ಬಂ.

ವಿಸ್ಸಜ್ಜನಾ – ತೇಚತ್ತಾಲೀಸಾಯ ಭನ್ತೇ ವತ್ತೇಸು ಸಮ್ಮಾ ವತ್ತಿತಬ್ಬಂ.

ಪುಚ್ಛಾ – ಕಮ್ಮಕ್ಖನ್ಧಕಂ ಪುಚ್ಛಿಸ್ಸಂ, ಸನಿದಾನಿ ಸನಿದ್ದೇಸಂ. ಸಮುಕ್ಕಟ್ಠಪದಾನಂ ಆವುಸೋ ಕತಿ ಆಪತ್ತಿಯೋ.

ವಿಸ್ಸಜ್ಜನಾ – ಕಮ್ಮಕ್ಖನ್ಧಕಂ ವಿಸ್ಸಜ್ಜಿಸ್ಸಂ, ಸನಿದಾನಂ ಸನಿದ್ದೇಸಂ. ಸಮುಕ್ಕಟ್ಠಪದಾನಂ ಭನ್ತೇ ಏಕಾ ಆಪತ್ತಿ.