೨. ಪಾರಿವಾಸಿಕಕ್ಖನ್ಧಕ

ಪುಚ್ಛಾ – ಪಾರಿವಾಸಿಕಸ್ಸ ಆವುಸೋ ಪಕತತ್ತಾನಂ ಭಿಕ್ಖೂನಂ ಅಭಿವಾದನಾದೀನಿ ಸಾದಿಯನ್ತಸ್ಸ ದುಕ್ಕಟಂ ಭಗವತಾ ಕತ್ಥ ಪಞ್ಞತ್ತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಪಾರಿವಾಸಿಕೇ ಭಿಕ್ಖೂ ಆರಬ್ಭ ಪಞ್ಞತ್ತಂ, ಪಾರಿವಾಸಿಕಾ ಭನ್ತೇ ಭಿಕ್ಖೂ ಸಾದಿಯಿಂಸು ಪಕತತ್ತಾನಂ ಭಿಕ್ಖೂನಂ ಅಭಿವಾದನಾದೀನಿ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ.

ಪುಚ್ಛಾ – ಪಾರಿವಾಸಿಕೇನ ಆವುಸೋ ಭಿಕ್ಖುನಾ ಕತಿಸು ವತ್ತೇಸು ಸಮ್ಮಾ ವತ್ತಿತಬ್ಬಂ.

ವಿಸ್ಸಜ್ಜನಾ – ಪಾರಿವಾಸಿಕೇನ ಭನ್ತೇ ಭಿಕ್ಖುನಾ ಚತುನವುತಿಯಾ ವತ್ತೇಸು ಸಮ್ಮಾ ವತ್ತಿತಬ್ಬಂ.

ಪುಚ್ಛಾ – ಪಾರಿವಾಸಿಕಂ ಪುಚ್ಛಿಸ್ಸಂ, ಸನಿದಾನಂ ಸನಿದ್ದೇಸಂ. ಸಮುಕ್ಕಟ್ಠಪದಾನಂ ಆವುಸೋ ಕತಿ ಆಪತ್ತಿಯೋ.

ವಿಸ್ಸಜ್ಜನಾ – ಪಾರಿವಾಸಿಕಂ ವಿಸ್ಸಜ್ಜಿಸ್ಸಂ, ಸನಿದಾನಂ ಸನಿದ್ದೇಸಂ. ಸಮುಕ್ಕಟ್ಠಪದಾನಂ ಭನ್ತೇ ಏಕಾ ಆಪತ್ತಿ.