೬. ಭೇಸಜ್ಜಕ್ಖನ್ಧಕ

ಪುಚ್ಛಾ – ಪಞ್ಚ ಆವುಸೋ ಭೇಸಜ್ಜಾನಿ ಪಟಿಗ್ಗಹೇತ್ವಾ ಕಾಲೇಪಿ ವಿಕಾಲೇಪಿ ಪರಿಭುಞ್ಜಿತುಂ ಭಗವತಾ ಕತ್ಥ ಅನುಞ್ಞಾತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಅನುಞ್ಞಾತಂ.

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಸಮ್ಬಹುಲೇ ಭಿಕ್ಖೂ ಆರಬ್ಭ ಅನುಞ್ಞಾತಂ, ಸಮ್ಬಹುಲಾನಂ ಭನ್ತೇ ಭಿಕ್ಖೂನಂ ಸಾರದಿಕೇನ ಆಬಾಧೇನ ಪುಟ್ಠಾನಂ ಯಾಗುಪಿ ನ ಸಮ್ಮಾ ಪರಿಣಾಮಂ ಗಚ್ಛಿ, ಭತ್ತಮ್ಪಿ ಭುತ್ತಂ ನ ಸಮ್ಮಾ ಪರಿಣಾಮಂ ಗಚ್ಛಿ, ತೇ ತೇನ ಕಿಸಾ ಅಹೇಸುಂ ಲೂಖಾ ದುಬ್ಬಣ್ಣಾ ಉಪ್ಪಣ್ಡುಪ್ಪಣ್ಡುಕಜಾತಾ ಧಮನಿಸನ್ಥತಗತ್ತಾ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಅನುಞ್ಞಾತಂ.

ಪುಚ್ಛಾ – ಮೂಲಾದಿಭೇಸಜ್ಜಾನಿ ಆವುಸೋ ಭಗವತಾ ಕತ್ಥ ಅನುಞ್ಞಾತಾನಿ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಅನುಞ್ಞಾತಾನಿ.

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಸಮ್ಬಹುಲೇ ಗಿಲಾನೇ ಭಿಕ್ಖೂ ಆರಬ್ಭ ಅನುಞ್ಞಾತಾನಿ, ಸಮ್ಬಹುಲಾನಂ ಗಿಲಾನಾನಂ ಭಿಕ್ಖೂನಂ ಮೂಲೇಹಿ ಭೇಸಜ್ಜೇಹಿ ಅತ್ಥೋ ಅಹೋಸಿ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಅನುಞ್ಞಾತಾನಿ.

ಪುಚ್ಛಾ – ಅನ್ತೋವುಟ್ಠಂವಾ ಆವುಸೋ ಅನ್ತೋಪಕ್ಕಂ ವಾ ಸಾಮಂಪಕ್ಕಂ ವಾ ಪರಿಭುಞ್ಜನ್ತಸ್ಸ ದುಕ್ಕಟಂ ಭಗವತಾ ಕತ್ಥ ಪಞ್ಞತ್ತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ರಾಜಗಹೇ ಭನ್ತೇ ಆಯಸ್ಮನ್ತಂ ಆನನ್ದಂ ಆರಬ್ಭ ಪಞ್ಞತ್ತಂ, ಆಯಸ್ಮಾ ಭನ್ತೇ ಆನನ್ದೋ ಸಾಮಂ ತಿಲಮ್ಪಿ ತಣ್ಡುಲಮ್ಪಿ ಮುಗ್ಗಮ್ಪಿ ವಿಞ್ಞಾಪೇತ್ವಾ ಅನ್ತೋ ವಾಸೇತ್ವಾ ಅನ್ತೋ ಸಾಮಂ ಪಚಿ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ.

ಸುಪ್ಪಿಯಾ ವತ್ಥು

ಪುಚ್ಛಾ – ಮನುಸ್ಸಮಂಸಂ ಆವುಸೋ ಪರಿಭುಞ್ಜನ್ತಸ್ಸ ಥುಲ್ಲಚ್ಚಯಞ್ಚ ಅಪ್ಪಟಿವೇಕ್ಖಿತ್ವಾ ಮಂಸಂ ಪರಿಭುಞ್ಜನ್ತಸ್ಸ ದುಕ್ಕಟಞ್ಚ ಭಗವತಾ ಕತ್ಥ ಪಞ್ಞತ್ತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ಬಾರಾಣಸಿಯಂ ಭನ್ತೇ ಅಞ್ಞತರಂ ಭಿಕ್ಖುಂ ಆರಬ್ಭ ಪಞ್ಞತ್ತಂ, ಅಞ್ಞತರೋ ಭನ್ತೇ ಭಿಕ್ಖು ಅಪ್ಪಟಿವೇಕ್ಖಿತ್ವಾ ಮನುಸ್ಸಮಂಸಂ ಭುಞ್ಜಿ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ.

ನ ಭಿಕ್ಖವೇ ಮನುಸ್ಸಮಂಸಂ ಪರಿಭುಞ್ಜಿತಬ್ಬಂ, ಯೋ ಪರಿಭುಞ್ಜೇಯ್ಯ, ಆಪತ್ತಿ ಥುಲ್ಲಚ್ಚಯಸ್ಸ, ನ ಚ ಭಿಕ್ಖವೇ ಅಪ್ಪಟಿವೇಕ್ಖಿತ್ವಾ ಮಂಸಂ ಪರಿಭುಞ್ಜಿತಬ್ಬಂ, ಯೋ ಪರಿಭುಞ್ಜೇಯ್ಯ ಆಪತ್ತಿ ದುಕ್ಕಟಸ್ಸ.

ಪುಚ್ಛಾ – ಹತ್ಥಿಮಂಸಂ ವಾ ಆವುಸೋ ಅಸ್ಸಮಂಸಂ ವಾ ಪರಿಭುಞ್ಜನ್ತಸ್ಸ ದುಕ್ಕಟಂ ಭಗವತಾ ಕತ್ಥ ಪಞ್ಞತ್ತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ಬಾರಾಣಸಿಯಂ ಭನ್ತೇ ಸಮ್ಬಹುಲೇ ಭಿಕ್ಖೂ ಆರಬ್ಭ ಪಞ್ಞತ್ತಂ, ಸಮ್ಬಹುಲಾ ಭನ್ತೇ ಭಿಕ್ಖೂ ಹತ್ಥಿಮಂಸಮ್ಪಿ ಅಸ್ಸಮಂಸಮ್ಪಿ ಪರಿಭುಞ್ಜಿಂಸು, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ.

ಪುಚ್ಛಾ – ಸುನಕ್ಖಮಂಸಂ ವಾ ಆವುಸೋ ಅಹಿಮಂಸಂ ವಾ ಭುಞ್ಜನ್ತಸ್ಸ ದುಕ್ಕಟಂ ಭಗವತಾ ಕತ್ಥ ಪಞ್ಞತ್ತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ಬಾರಾಣಸಿಯಂ ಭನ್ತೇ ಸಮ್ಬಹುಲೇ ಭಿಕ್ಖೂ ಆರಬ್ಭ ಪಞ್ಞತ್ತಂ, ಸಮ್ಬಹುಲಾ ಭನ್ತೇ ಭಿಕ್ಖೂ ಸುನಕ್ಖಮಂಸಮ್ಪಿ ಅಹಿಮಂಸಮ್ಪಿ ಪರಿಭುಞ್ಜಿಂಸು, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ.

ಪುಚ್ಛಾ – ಸೀಹಮಂಸಂ ವಾ ಆವುಸೋ ಬ್ಯಗ್ಘಮಂಸಂ ವಾ ದೀಪಿಮಂಸಂ ವಾ ಅಚ್ಛಮಂಸಂ ವಾ ತರಚ್ಛಮಂಸಂ ವಾ ಭುಞ್ಜನ್ತಸ್ಸ ದುಕ್ಕಟಂ ಭಗವತಾ ಕತ್ಥ ಪಞ್ಞತ್ತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ಬಾರಾಣಸಿಯಂಯೇವ ಭನ್ತೇ ಸಮ್ಬಹುಲೇ ಭಿಕ್ಖೂ ಆರಬ್ಭ ಪಞ್ಞತ್ತಂ, ಸಮ್ಬಹುಲಾ ಭನ್ತೇ ಭಿಕ್ಖೂ ಸೀಹಮಂಸಮ್ಪಿ ಬ್ಯಗ್ಘಮಂಸಮ್ಪಿ ದೀಪಿಮಂಸಮ್ಪಿ ಅಚ್ಛಮಂಸಮ್ಪಿ ತರಚ್ಛಮಂಸಮ್ಪಿ ಪರಿಭುಞ್ಜಿಂಸು, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ.

ಪುಚ್ಛಾ – ಗಿಲಾನಸ್ಸ ಆವುಸೋ ಗುಳಂ ವಾ ಅಗಿಲಾನಸ್ಸ ಗುಳೋದಕಂ ವಾ ಭಗವತಾ ಕತ್ಥ ಅನುಞ್ಞಾತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಅನುಞ್ಞಾತಂ.

ವಿಸ್ಸಜ್ಜನಾ – ರಾಜಗಹೇ ಭನ್ತೇ ಸಮ್ಬಹುಲೇ ಭಿಕ್ಖೂ ಆರಬ್ಭ ಅನುಞ್ಞಾತಂ, ಸಮ್ಬಹುಲಾ ಭನ್ತೇ ಭಿಕ್ಖೂ ಗಿಲಾನಸ್ಸೇವ ಭಗವತಾ ಗುಳೋ ಅನುಞ್ಞಾತೋ ನೋ ಅಗಿಲಾನಸ್ಸಾತಿ ಕುಕ್ಕುಚ್ಚಾಯನ್ತಾ ಗುಳಂ ನ ಭುಞ್ಜಿಂಸು, ತಸ್ಮಿಂ ಭನ್ತೇ ವತ್ಥುಸ್ಮಿಂ ಅನುಞ್ಞಾತಂ.

ಪುಚ್ಛಾ – ಜಾನಂ ಆವುಸೋ ಉದ್ದಿಸ್ಸ ಕತಂ ಮಂಸಂ ಪರಿಭುಞ್ಜನ್ತಸ್ಸ ದುಕ್ಕಟಂ ಪಞ್ಞಪೇತ್ವಾ ತಿಕೋಟಿಪರಿಸುದ್ಧಂ ಮಂಸಂ ಭಗವತಾ ಕತ್ಥ ಅನುಞ್ಞಾತಂ.

ವಿಸ್ಸಜ್ಜನಾ – ವೇಸಾಲಿಯಂ ಭನ್ತೇ ಸೀಹಸ್ಸ ಸೇಟಾಪತಿನೋ ವತ್ಥುಸ್ಮಿಂ ಅನುಞ್ಞಾತಂ.

ಮೇಣ್ಡಕ ವತ್ಥು

ಪುಚ್ಛಾ – ಪಾಥೇಯ್ಯಂ ಆವುಸೋ ಪರಿಯೇಸಿತುಞ್ಚ ಕಪ್ಪಿಯಕಾರಕಾನಂ ಹತ್ಥೇ ಉಪನಿಕ್ಖಿತ್ತಹಿರಞ್ಞತೋ ನಿಬ್ಬತ್ತಂ ಕಪ್ಪಿಯಪಚ್ಚಯಂ ಸಾದಿತುಞ್ಚ ಭಗವತಾ ಕತ್ಥ ಅನುಞ್ಞಾತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಅನುಞ್ಞಾತಂ.

ವಿಸ್ಸಜ್ಜನಾ – ಅನ್ತರಾ ಚ ಭನ್ತೇ ಭದ್ದಿಯಂ ಅನ್ತರಾ ಚ ಅಙ್ಗುತ್ತರಾಪಂ ಮೇಣ್ಡಕಂ ಗಹಪತಿಂ ಆರಬ್ಭ ಅನುಞ್ಞಾತಂ, ಮೇಣ್ಡಕೋ ಭನ್ತೇ ಗಹಪತಿ ಭಗವನ್ತಂ ಯಾಚಿ ‘‘ಸನ್ತಿ ಭನ್ತೇ ಮಗ್ಗಾ ಕನ್ತಾರಾ ಅಪ್ಪೋದಕಾ ಅಪ್ಪಭಕ್ಖಾ ನ ಸುಕರಾ ಅಪಾಥೇಯ್ಯೇನ ಗನ್ತುಂ, ಸಾಧು ಭನ್ತೇ ಭಗವಾ ಭಿಕ್ಖೂನಂ ಪಾಥೇಯ್ಯಂ ಅನುಜಾನಾತೂ’’ತಿ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಅನುಞ್ಞಾತಂ.

ಕೇಣಿಯ ವತ್ಥು

ಪುಚ್ಛಾ – ಅಟ್ಠ ಆವುಸೋ ಪಾನಾನಿ ಭಗವತಾ ಕತ್ಥ ಅನುಞ್ಞಾತಾನಿ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಅನುಞ್ಞಾತಾನಿ.

ವಿಸ್ಸಜ್ಜನಾ – ಆಪಣೇ ಭನ್ತೇ ಸಮ್ಬಹುಲೇ ಭಿಕ್ಖೂ ಆರಬ್ಭ ಅನುಞ್ಞಾತಾನಿ, ಸಮ್ಬಹುಲಾ ಭನ್ತೇ ಭಿಕ್ಖೂ ಕುಕ್ಕುಚ್ಚಾಯನ್ತಾ ಪಾನಾನಿ ನ ಪಟಿಗ್ಗಣ್ಹಿಂಸು, ತಸ್ಮಿಂ ಭನ್ತೇ ವತ್ಥುಸ್ಮಿಂ ಅನುಞ್ಞಾತಾನಿ.

ರೋಜಮಲ್ಲಾ ವತ್ಥು

ಪುಚ್ಛಾ – ಸಬ್ಬಞ್ಚ ಆವುಸೋ ಡಾಕಂ ಸಬ್ಬಞ್ಚ ಪಿಟ್ಠಖಾದನೀಯಂ ಭಗವತಾ ಕತ್ಥ ಅನುಞ್ಞಾತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಅನುಞ್ಞಾತಂ.

ವಿಸ್ಸಜ್ಜನಾ – ಕುಸಿನಾರಾಯಂ ಭನ್ತೇ ಸಮ್ಬಹುಲೇ ಭಿಕ್ಖೂ ಆರಬ್ಭ ಅನುಞ್ಞಾತಂ, ಸಮ್ಬಹುಲಾ ಭನ್ತೇ ಭಿಕ್ಖೂ ಕುಕ್ಕುಚ್ಚಾಯನ್ತಾ ಡಾಕಞ್ಚ ಪಿಟ್ಠಖಾದನೀಯಞ್ಚ ನ ಪಟಿಗ್ಗಹೇಸುಂ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಅನುಞ್ಞಾತಂ.

ಪುಚ್ಛಾ – ಅಕಪ್ಪಿಯಂ ಆವುಸೋ ಸಮಾದಪೇನ್ತಸ್ಸ ದುಕ್ಕಟಂ ಭಗವತಾ ಕತ್ಥ ಪಞ್ಞತ್ತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ಆತುಮಾಯಂ ಭನ್ತೇ ಅಞ್ಞತರಂ ವುಡ್ಢಪಬ್ಬಜಿತಂ ಆರಬ್ಭ ಪಞ್ಞತ್ತಂ, ಅಞ್ಞತರೋ ಭನ್ತೇ ವುಡ್ಢಪಬ್ಬಜಿತೋ ಅಕಪ್ಪಿಯೇ ಸಮಾದಪೇತಿ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ.

ಪುಚ್ಛಾ – ಸಙ್ಘಿಕಾನಿ ವಾ ಆವುಸೋ ಪುಗ್ಗಲಿಕಾನಿ ವಾ ಬೀಜಾನಿ ಪುಗ್ಗಲಿಕಾಯ ವಾ ಸಙ್ಘಿಕಾಯ ವಾ ಭೂಮಿಯಾ ರೋಪಿತಾನಿ ಭಾಗಂ ದತ್ವಾ ಪರಿಭುಞ್ಜಿತುಂ ಭಗವತಾ ಕತ್ಥ ಅನುಞ್ಞಾತಂ, ಕಿಸ್ಮಿಂ ವತ್ಥುಸ್ಮಿಂ ಅನುಞ್ಞಾತಂ.

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಅನುಞ್ಞಾತಂ, ಸಾವತ್ಥಿಯಂ ಭನ್ತೇ ಭಗವತಿ ವಿಹರತಿ ಸಙ್ಘಿಕಾನಿಪಿ ಬೀಜಾನಿ ಪುಗ್ಗಲಿಕಾಯ ಭೂಮಿಯಾ ರೋಪಿಯಿಂಸು, ಪುಗ್ಗಲಿಕಾನಿಪಿ ಬೀಜಾನಿ ಸಙ್ಘಿಕಾಯ ಭೂಮಿಯಾ ರೋಪಿಯಿಂಸು, ತಸ್ಮಿಂ ಭನ್ತೇ ವತ್ಥುಸ್ಮಿಂ ಅನುಞ್ಞಾತಂ.

ಪುಚ್ಛಾ – ವಿನಯಮಹಾಪದೇಸಸಙ್ಖಾತಾನಿ ಆವುಸೋ ಚತ್ತಾರಿ ಕಪ್ಪಿಯಾಕಪ್ಪಿಯಅನುಲೋಮಾನಿ ಭಗವತಾ ಕತ್ಥ ಪಞ್ಞತ್ತಾನಿ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಾನಿ.

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಸಮ್ಬಹುಲೇ ಭಿಕ್ಖೂ ಆರಬ್ಭ ಪಞ್ಞತ್ತಾನಿ, ಸಮ್ಬಹುಲಾನಂ ಭನ್ತೇ ಭಿಕ್ಖೂನಂ ಕಿಸ್ಮಿಞ್ಚಿ ಕಿಸ್ಮಿಞ್ಚಿಠಾನೇ ಕುಕ್ಕುಚ್ಚಂ ಉಪ್ಪಜ್ಜಿ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಾನಿ.

ಪುಚ್ಛಾ – ಯಾವಕಾಲಿಕಾದೀಹಿ ಸಂಸಟ್ಠಾನಂ ಆವುಸೋ ಯಾಮಕಾಲಿಕಾದೀನಂ ಪರಿಭೋಗಕಾಲಮರಿಯಾದಂ ಭಗವತಾ ಕತ್ಥ ಪಞ್ಞತ್ತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಸಮ್ಬಹುಲೇ ಭಿಕ್ಖೂ ಆರಬ್ಭ ಪಞ್ಞತ್ತಂ, ಸಮ್ಬಹುಲಾನಂ ಭನ್ತೇ ಭಿಕ್ಖೂನಂ ಏತದಹೋಸಿ ‘‘ಕಪ್ಪತಿ ನುಖೋ ಯಾವಕಾಲಿಕೇನ ಯಾಮಕಾಲಿಕಂ ಸತ್ತಾಹಕಾಲಿಕಂ ಯಾವಜೀವಿಕಂ, ನ ನುಖೋ ಕಪ್ಪತಿ. ಕಪ್ಪತಿನುಖೋ ಯಾಮಕಾಲಿಕೇನ ಸತ್ತಾಹಕಾಲಿಕಂ ಯಾವಜೀವಿಕಂ, ನ ನುಖೋ ಕಪ್ಪತಿ. ಕಪ್ಪತಿ ನುಖೋ ಸತ್ತಾಹಕಾಲಿಕೇನ ಯಾವಜೀವಿಕಂ, ನ ನುಖೋ ಕಪ್ಪತೀ’’ತಿ. ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ.

ಪುಚ್ಛಾ – ಭೇಸಜ್ಜಕಂ ಪುಚ್ಛಿಸ್ಸಂ, ಸನಿದಾನಂ ಸನಿದ್ದೇಸಂ. ಸಮುಕ್ಕಟ್ಠಪದಾನಂ ಆವುಸೋ ಕತಿ ಆಪತ್ತಿಯೋ.

ವಿಸ್ಸಜ್ಜನಾ – ಭೇಸಜ್ಜಕಂ ವಿಸ್ಸಜ್ಜಿಸ್ಸಂ ಸನಿದಾನಂ ಸನಿದ್ದೇಸಂ. ಸಮುಕ್ಕಟ್ಠಪದಾನಂ ಭನ್ತೇ ತಿಸ್ಸೋ ಆಪತ್ತಿಯೋ.